Стихи́:

Здра́во проро́к рече́: боле́знено чре́во,

Сопра́ное же му́ченик бо́ле не рече́:

В два́десять вторы́й Васи́лия рожны́ сбодо́ше.

Той бя́ше при Иулиа́не законопресту́пнице, и Саторни́не иге́моне, Агки́рския це́ркве свяще́нник сый. Обо́лган же быв, предста́ иге́мону: и вопроше́н бысть, Христа́ испове́да И́стиннаго Бо́га су́ща, и Творца́ веко́в. И пове́шен быв на дре́ве, и по ре́бром стро́ган, и в темни́цу затворе́н. И из темни́цы изведе́н, и па́ки на мно́зе стро́ган, и мн́ого крепце му́чен быв, и желе́зы тя́жко око́ван, и па́ки вве́ржен в темни́цу. По не́колицех же днех отсту́пнику сквозе́ Агки́ру проходя́щу, и приведе́н бысть святы́й свя́зан, и пре́дан бысть коми́ту Африки́ю, на реме́нное кроение ко́жи его́, и́же на́скоре сотвори́. Мно́гу же реме́нию содрану, спреди́ и созади́ реме́нем ви́сящым на плещу́. И еди́н реме́нь отто́рг святы́й, ве́рже на лице́ мучи́телево. Он же повеле́ рожны́ ражже́ными желе́зными те́ло его́ сбости́ по чре́ву и по плеще́ма, и проверте́ти чре́во его́. И тому́ бы́вшу, предаде́ дух Бо́гу святы́й му́ченик.

Царю Трая́ну повсегда́ живота́ лиша́ющу, Христа́ испове́дающих, и о́нех телеса в небрегу́щих и скве́рных помета́ющу ме́стех. Во вре́мя же то бя́ху жены́ в по́стничестве не́коем, за́поведи Бо́жия соблюда́юще, и де́ло без презо́ра иму́ще. И́хже и ка́яждо прави́тельниц осо́бно иму́щи мо́щи святы́х, и благоуха́ньми и поня́вами ску́тавающе, и полага́юще во свои́х им обителех. Сия́ уве́давши Дроси́да, дщи Трая́на царя́, прии́де к таковы́м жена́м, иму́щи с собо́ю оде́жду многоце́нну. Всем же и́же о́коло ея́ сном глубо́ким одержа́щымся, моля́щися сше́ствовати с ни́ми, на прия́тие честна́го телесе́. Андреа́н же не́кто сове́тник сый царе́в, и обру́чник Дроси́дин, рече́ к царю́: самоде́ржче влады́ко, повели́ поста́вити во́я на соблюде́ние муже́й сме́ртных, да позна́ем кото́рии суть, и́же телеса́ их кра́дут. Царь же повеле́ таково́му бы́ти. И бде́вше стра́жницы я́ша пять о́нех правительниц ку́пно со дще́рию царе́вою Дроси́дою. И зау́тра тех приве́дше, поста́виша пред царе́м. Ви́дев же царь Дроси́ду, и ужасе́ся, и повеле́ храни́ти ю́ стра́жем в тве́рде ме́сте кре́пко, еда́ ка́ко раска́явшися обрати́тся: А на о́нех жен прави́тельниц, повеле́ скова́ти горни́ло вели́ко, и та́мо воврещи́ свяще́нныя о́ны жены́: и с ни́ми медь дово́льную на стопле́ние, я́ко да солие́тся медь с телесы́ о́нех святы́х жен, и да сгори́т ку́пно. И то́ю же ме́дию повеле́ скова́ти трено́ги. Та́коже и о со́зданней па́губней ба́ни, ейже в пра́здник Аполо́нов хотя́щи подпале́не бы́ти, и обнови́тися ей во устра́бу, и во упокое́ние единомы́сленым его́ идолослужи́телем. Тому́же убо бы́вшу, му́ченица же Христо́вым сгоре́вшым, и трено́гам ско́ванным бы́вшим. И разже́гше ба́ню, пропове́даху повсю́ду глаго́люще: Ели́цы люби́ми есте́ благоути́шимых бого́в, и прия́телие царе́вы, вни́дите во испы́тную ба́ню обновле́ния. И а́бие стица́хуся вси. Пе́рвый же устреми́ся вни́ти в преддве́рие пе́рвых врат ба́ни, долу пад ду́шу изве́рже. Та́коже и и́же с ним прибли́жившиися, ники́йже в пе́рвая врата́ вни́ти возмо́же. Сия́ же уве́дав царь, бого́в свои́х иере́ов призва́, и рече́: Что сие́? Еда́ что сие не́которое от христиа́н волхвова́ние бысть? И реко́ша они́: ни царю́, но от сотворе́нныя ме́ди, и от прави́тельных о́нех жен сие́ бысть. Повели́ у́бо други́м трено́гам бы́ти, и та́ко сбу́дется соде́лование. И тому́ бы́вшу. Рече́ Андреа́н к царю: Повели́ ми царю́ пе́рвыя трено́ги па́ки разлия́ти, и сотвори́ти онех воображе́ния жен наги́х, в подо́бие о́нех пяти́ прави́тельниц, и к поноше́нию и безче́стию поста́вити их пред ба́нею твооего́ ца́рствия. И а́бие повеле́ царь: И бысть. И по поставле́нии о́нех, ви́де сам во сне пять а́гниц небла́зненых ходя́щих в раи́, и Па́стыря стра́шна пасу́ща их, и глаго́люща к царю́: О́ беззако́нный царю́ нечести́вый, я́же ты вмени́л еси́ в безче́стии стоя́ти. Но до́брый благи́й Па́стырь от тебе́ я́ отто́рг, и положи́ в ме́сте сем, иде́же хо́щет и Дроси́да нескве́рная а́гница и твоя́ дщи доити́. Пробуди́вся же царь, и неи́стовствовав злочести́вый и беззако́нный, я́ко и по сме́рти о́ны святы́я жены́, посрами́ша сове́ты его́. И повеле́ две пе́щи запали́ти вне гра́да, и жещи́ я́ на всяк день. Написа́в же на пе́щех по́дпись, о́браз ца́рских повеле́ний явля́ющь, и си́це пи́сано: Мужие галиле́йстии, и́же Распя́тому поклоня́ющиися, изба́вите ли себе́ от мно́гих мук и трудо́в? А́ще хо́щете изба́вити себе́ от мно́гих мук и трудо́в, то пожри́те бого́м. А́ще ли же ни, то ко́ждо вы сам себе́ да врева́ет в пещь. Таково́му же повеле́нию изшедшу, и слы́шавши сия раба́ Бо́жия Дроси́да, я́ко ко́ждо от христиа́н ве́ры ра́ди и любве́ Христо́вы, врева́ют са́ми себе́ в пещь: возде́вши о́чи свои́ на не́бо и рече́: Влады́ко Го́споди Иису́се Христе́ Сы́не Бо́жий, а́ще есть во́ля Твоя́ е́же спасти́ся ми, и угонзну́ Ти неи́стовных служе́б отца́ моего́ Трая́на злочести́ваго, Ты Сам поспеши́ ми е́же свободи́тися женит́вы Андреа́на беззако́ннаго, и взы́ти на не́бо иде́же и они́ пять прави́тельниц, наста́вльшии мя в страх Твой: Успи́ же глубо́ким сном мене́ стрегу́щих, да возмогу́ избе́гнути. И такова́я ре́кши ей, и ца́рское воображе́ние отло́жши, изы́де мо́лком, никому́же зна́вшу. Иду́щи же ей е́же ври́нути себе́ во еди́ну от пе́щей, помышля́ше в себе глаго́лющи: Ка́ко и́мам поити́ к Бо́гу не им́ущу ми бра́чныя оде́жды, сиречь, креще́ния не прие́мши, того́ ра́ди нечиста́ су́щи есмь? Но о́ Царю́ ца́рствующым Го́споди Иису́се Христе́, се оста́вих ца́рство мое́ Тебе́ ра́ди, да поста́виши мя две́рницу Ца́рствию Твоему́, крести́ мя Сам Ду́хом Твои́м Святы́м. И я́ко си́це рече́: изъе́мши еже ноша́ше ми́ро от свои́х сокро́вищ, и пома́за вся у́ды своя́. И вве́рже себе́ во еди́н пото́к водны́й, и крести́ся, ре́кши: Креща́ется раб́а Бо́жия Дроси́да, во имя Отца́, и Сы́на, и Свята́го Ду́ха. И сохра́ньши себе́ по креще́нии дний седмь, вкуша́ющи бя́ше пи́щу а́нгельскую. Христолю́бцы же не́цыи обре́тше ю́, и пребы́вше с не́ю, и уве́девше я́же о ней, и я́же сама́ о себе́ испове́да. Во осмы́й же день помоли́вшися о не́мже что соде́ла, и ко Го́споду отъи́де.

Стихи́:

Сугу́ба ве́черя, па́сху зако́нную прино́сит,

И Па́сху но́вую, Кровь и Те́ло Влады́чнее.

Уже́ помы́слите бра́тие, доне́леже жи́ви есмы́, како́в страх и́мамы прия́ти в день Су́дный, егда́ ста́нем умиле́ни от злых дел, я́же сотвори́хом в животе́ сем, игра́юще и пусто́шная творя́ще, пою́ща и пля́шуще, и ина мно́га зла творя́ще, и́хже не подоба́ет христиа́ном твори́ти. Не рече́м сего́, ни блазни́мся глаго́люще: А́ще бы Бог повеле́л ни я́сти ни пи́ти ни весели́тися, то почто́ у́бо сотвори́л все то на земли́? Послу́шайте рече́: Аз реку́ вам: Илия́ проро́к не име́л ли хле́ба и вина́, и ра́дости челове́чи? Но вся оста́вль и́де в го́ру, и сотвори́ четы́редесять дний, и а́бие взы́де на не́бо с пло́тию. И други́й проро́к Дании́л, не име́л ли чесо́ в дому́ свое́м, у царя́ сый властели́н ве́лий? Зла́та име́я мно́го, и всю у́тварь ца́рску, и би́серы безце́нныя, и ка́мения драги́я. И вся та оста́вив, Бо́га испове́да, и приобре́те себе́ жизнь ве́чную: Вве́ржен бо бысть в ров, и лиза́ху льво́ве но́зе его́, и исхити́ его́ Дух Святы́й отту́ду. А вы челове́цы неразу́мнии, о чем наде́ющеся Бо́га не боите́ся: но хо́дите зде велича́ние упова́юще и ску́постию, ду́шу свою́ зле го́рдостию губя́ще? Почто́ не поми́луете себе́, о́ неразу́мнии челове́цы? Не льсти́теся глаго́люще: я́ко ны́не живе́м, а у́тро гние́м, и земля́ в зе́млю и́дет. Но сие́ ти глаго́лю: земли́ ли еси́ прия́знь, о несмы́сленне, да зе́млю си́лы твоея́ наполниши, и ду́шу твою́ погуби́ши? Разуме́йте бра́тие: и́же кто ско́рбен зде о души́, той о́намо небе́сною сла́вою утвержде́н бу́дет. О́ братие, удержи́теся от объяде́ния и пия́нства, и удержи́те у́ши от слы́шания неподо́бных слове́с, и ру́це от грабле́ния: и бы́стра тече́ния сотвори́м нога́м на́шым к це́ркви, и бу́дем ми́лостиви и пода́тливи к ни́щым, и покая́ниием возопие́м ко Го́сподеви Бо́гу. Слы́шите ка́ко претерпе́ Творе́ц от раб Свои́х, руга́ние и пропя́тие, а мы челове́цы на блага́я дела́ сотворе́ни есмы, почто́ доса́ды не терпи́м? Отцы́ и бра́тие, ма́терие и сестры́, сего́ не веща́йте глаго́люще: мы уже́ ле́та изжи́ли, и не мо́жем коле́ну пригиба́ти на поклоне́ние. О́ ста́рии, вам отве́ти суть угото́вание, да не лени́теся о спасе́нии ва́шем. О́ бра́тия младая́ и сестры́, не блазни́теся реку́ще: я́ко млади есмы́, ны́не да я́мы и пие́м и весели́мся, а у́тро пока́емся. О́ бра́тие, не ве́сте ли я́ко роса́ и́зсхнет со́лнцем, та́ко и ва́ша ю́ность злы́ми де́лы изнемога́ется? О́ человече, егда спи́ши, чу́еши ли татя прише́дша в дом твой? Та́ко и сего́ не ве́си когда́ прии́дет ангел, и восхи́тит ду́шу негото́ву су́щу, и без успе́ха на́чнеши ка́ятися тогда́. Но доне́леже вре́мя им́амы бра́тие, поживе́м доброде́тельно, соворя́юще за́поведи Бо́жия да Ца́рство небе́сное прии́мем.