Стихи́:

Похи́ти дух те́ло, и па́ки пове́рже

Врата́ землена́я скры́ша ме́ртву Мари́ю:

В пе́рвый апри́ля Мари́ю обре́те смерть в пусты́ни.

Преподо́бная Мари́я бе от Еги́пта, от ю́ности пре́жде пожи́вши в блуде́ за седмьна́десять лет невстягнове́нно. И сицево́ю вино́ю прии́де в покая́ние: ви́де не́кия ю́ношы ле́зуща в кора́бль, и вопроси́ их: ка́мо и́дут. И ре́ша ей: «На поклоне́ние честна́го Креста́ во Иерусали́м», и умоли́ их с собо́ю поя́ти себе́, не я́ко жела́ющи честно́му Дре́ву поклони́тися, но несы́тством грехо́вным пали́ма. Вше́дши бо в кора́бль, мно́ги оскверни́. И во Иерусали́ме бы́вши, возбране́но ей бысть вни́ти в церко́вная врата́ а́нгелом, иде́же спасе́ное дре́во честна́го Креста́ бя́ше, и три́жды пону́дившися вни́ти, и не возмо́же вни́ти. И помы́сливши вся своя́ согреше́ния, и уклони́вшися во у́гол па́перти церко́вныя, и ту ви́де ико́ну святы́я Богоро́дицы, и о свои́х гресе́х пред Не́ю ка́ющися, глаго́лаше: «О́ Пресвята́я Богоро́дице Де́во, Ро́ждьшая Спа́са всего́ ми́ра, ве́де у́бо я́ко несть благоле́пно мне скве́рной блудни́це на святу́ю Твою́ ико́ну воззре́ти. Пра́ведно же у́бо мне и ненави́диме бы́ти Твое́ю чистото́ю, и мерзе́ти ми пред Тобо́ю. Но оба́че бу́ди мне Помо́щница, и Пору́чница о мое́м покая́нии к Сы́ну Своему́ и Бо́гу моему́». И се ре́кши, и помоли́вшися, и в це́ркви бы́вши, и честно́е Дре́во кре́стное целова́вши, и́де на Иорда́н. И в це́ркви Предте́чеве причасти́вшися Пречи́стых Та́ин, и предаде́ся вели́кому воздержа́нию и доброде́телем. И тольми́ вознесе́ся беззстра́стием, я́ко и реку́ ей преходи́ти по верху́ вод нога́ма, моля́щися Бо́гу. И преше́дши же Иорда́н, пребы́сть в пусты́ни, четы́редесять седмь лет, подвиза́ся без покро́ва нага́, ни еди́наго челове́ка ви́дев, но Бо́га еди́наго имя́ше Ви́дца, и челове́ческаго естества́ не отступа́юща. Последи́ же по Бо́жию про́мыслу яви́ся Зоси́ме свято́му ста́рцу, во вну́тренюю пусты́ню вше́дшу ему́: и бесе́довавши с ним, и я́же о себе́ пове́давши. И ви́дена бысть Зоси́мою на возду́се стоя́ща. И па́ки в прииду́щее ле́то Иорда́н преше́дши, причасти́вшися от свята́го Зоси́мы, и посе́м в свое́ ме́сто возврати́вшися, и при пото́це иде́же с Зоси́мою бесе́довавшу у́спе. В прииду́щее же ле́то шед Зоси́ма, обре́те ю́ ме́ртву. И не могу́щу ему́ погребсти́ ея́ от ста́рости, прише́д лев, и пре́днима нога́ма ископа́в я́му блаже́нней: и промышле́нием Бо́жиим погре́б ю́ ста́рец, и возврати́ся.

Фарао́н царь, коли́ка прия́т долготерпе́ния Бо́жия? Терпя́ше бо ему́ Бог, творя́щу мно́га зла́я. Ви́дите у́бо, я́ко последи́ за вся зла́я прия́т отме́стие, и лю́тую ка́знь. Не то́кмо е́же жития́ сего́ зле отлуче́н есть, но и она́мо лю́те и неми́лостивно му́чимь бу́дет. Того́ де́ля нам бра́тие, больми́ досто́ит тужи́ти, скорбе́ти же и боле́зновати па́че о тех, и́же благодея́ния зде, и здра́вия прие́млют, во зло́бе живу́ще, и ничто́ же творя́ще добра́, ско́рби же и боле́зни и никако́го Бо́жия присеще́ния к себе́ не ви́дящи.

Егда́ же ли за зла́я на́ша де́ла, наво́дит на ны ка́зни Бог, и томле́ния немощьми́, легча́е нам твори́т о таковы́х суд. А́щели по коему́ждо согреше́нию терпи́т, вели́ко нас ожида́ет зло осужде́ние. А́ще бы никто́ зде приима́л зла, никто́ бы мнел Бо́га над на́ми су́ща. А́ще ли бы па́ки зде ко́ждо по де́лом приима́л, никто́же бы мнел, я́ко бы́ти воскресе́нию ме́ртвым, я́ко всем по де́лом прие́млющим. Того́ ра́ди ины́я зде томи́т, а ины́я оставля́ет. Мно́зи же пра́веднии, за ма́лая согреше́ния зде восприе́млют ка́зни. Мно́ги же ви́дим злы́я здра́вы телесы́, и благоде́нствующа, но она́мо бу́дет таковы́м вельми́ лю́то.

Афана́сий Вели́кий рече́: «Мно́зи правди́вии ду́шу влеку́т на мно́ги дни боле́зньми зле: не́цыи же гре́шнии ми́рно и вско́ре и́здшут». Григо́рий рече́: «Мно́гажды благочести́вии мно́ги ско́рби и туги́ пре́жде, и во вре́мя сме́рти прие́млют: зане́ ма́лы и́мут не́каки грехи́, да тех изба́вятся. Несть бо пра́ведна, и́же что не иму́ща греха́. И несть гре́шника, и́же не и́мать что добра́». Анаста́сий Сина́йский рече́: «По трех ли́цех пра́веднии напра́сною сме́ртию, восхи́тими быва́ют: или́ от зве́ря и от воды́, или́ от гро́ма и от огня́: да и про́чии ви́девше умудря́ются на до́брая де́ла, а ини́и за худы́я грехи́, зде томле́ния прие́млют».

Сия́ у́бо ве́дуще, да не смуща́емся. Проро́к Иса́ия претре́н бе. Стефа́н ка́мением побие́н. Петр апо́стол распя́т. Иоа́нн Предте́ча мече́м посе́чен. И ини́и мно́зи святи́и, лю́тыя беды́, и разли́чныя сме́рти приима́ху. А и́же гре́шнии, ну́жною и лю́тою умира́ют сме́ртию, да про́чии убоя́тся тех в ка́зни ви́девше. А ти́и и́же умира́ют лю́те, часть оставле́ния от мук прии́мут. Ты же не чуди́ся, егда́ кого́ ви́диши утону́вша, или́ земле́ю пода́влена, или́ со хра́мины па́дша, я́коже и о де́тех И́ововых: или́ я́ко о Маврики́и царе́, и́же Фо́це мучи́телю пре́дан, и лю́тою сме́ртию коне́ц прия́т. Зане́же Бо́жия судьбы́ неве́домы суть. И его́же лю́бит Госпо́дь, того́ и ка́жет . А и́же су́ще зли, и во оби́лии живу́т, и не прие́млют бед, такови́и лю́те бу́дут осужде́ни.