Стихи́:

Ева́нгельски до́бре ше́ствуя путь,

Иродио́не добре́йший восприя́т вене́ц:

Ду́шу Ага́ва проро́ка-апо́стола

Душеспасе́ный призыва́ет Влады́ка:

Погаси́ Фле́гонт пре́льсти пла́мень попаля́ющь,

И́хже Дави́д рече́ «огнь паля́щаго» зрит умы́:

В осмы́й изы́де Иродио́н от друго́в и бли́жник.

В сих у́бо, Иродио́н, его́же вели́кий апо́стол Па́вел помина́ет, святы́м апо́столом служа́ше о всем. Посему́ же от них поста́влен бысть епи́скоп Неопа́трьский. Мно́гия же от е́ллин уча́ и обраща́я к ве́ре Христо́ве. Позави́ден бысть от иуде́й, и обсту́пльше того́ со идолослужи́тели, пе́рвее же кре́пко бие́н, и ка́мением уста́ ему́ сокруши́ша, и дре́вом по главе́ уда́рен. Пото́м ноже́м закла́н сконча́ся. Ага́в же, и́же и по́яс вели́каго апо́стола Па́вла взем, и свои́ ру́це и но́зе связа́в, проро́чествова глаго́ля: «Та́ко глаго́лет Дух Святы́й: Му́жа его́же есть по́яс сей, та́ко того́ свя́жут во Иерусали́ме иуде́и, и би́ти того́ и́мут», е́же и сбы́сться. Не то́чию же того́ связа́ша, но и уби́ти помы́слиша. То́йже Ага́в в прилу́чшуюся ему́ страну́ вселе́нныя пропове́да. Руф же, и́же того́ в Ри́мстей еписто́лии апо́стол воспомина́ет, епи́скоп гра́да Фиве́йскаго, и́же во Елла́де быв. Та́коже и Фле́гонт, и про́чии, по всей вселе́нней пропове́дающе благове́стие, и неве́рныя ко и́стинней ве́ре приводя́ще, в еди́н день разли́чно му́чими бы́вше от иуде́й и е́ллин, сконча́шася.

Во Александри́и Еги́петстей, при Па́вле па́пе, де́ва не́кая оста́влена бысть сирото́ю. Роди́теля ея́ иму́ще име́ние мно́го, бе́ же и еще́ не крещена́. Во еди́н же от дней сквозе́ виногра́д свой проходя́щи, и́же оста́виста ей роди́теля ея́: и ви́де е́тера пригото́вившася на удавле́ние, и притече́, и рече́ ему́: «Что твори́ши челове́че?». И той рече́ ей: «О́ де́во, не дей мене́, я́ко во мно́зе ско́рби есмь». Глаго́ла ему́ де́ва: «Пове́ждь ми вину́, а́ще бу́дет льзе помощи́ ми, и аз помогу́ ти». Он же рече́: «Мно́гим до́лгом до́лжен есмь, и му́чимь есмь от них, и́мже мне дава́ти. И изво́лих себе́ умре́ти вско́ре, не́жели жи́ти зло́ю жи́знию». И глаго́ла ему́ де́ва: «Поиди́ за мно́ю, да ели́ко и́мам возми́, и даждь за ся, то́кмо не погуби́ себе́ молю́тися». Он же взем, даде́ за ся и свободи́ся. Оскуде́вши же ей и не иму́щи ей кто бы ся е́ю па́ки пекл, и пу́ста су́щи роди́телю, того́ ра́ди предаде́ся в блуд. И по ле́те еди́ном разболе́ся, и в себе́ прише́д смири́ся. И глаго́лаше сосе́дом: «Бо́га ра́ди сотвори́те лю́бовь о души́ мое́й, умоли́те па́пу да мя крести́т, и сотвори́т христиа́ну». И вси о ней небрежа́ху глаго́люще: «Кто во́змет сию́ блудни́цу?». И скорбя́ше она́ о сем моля́щися. Приступи́ же а́нгел Госпо́день во о́бразе челове́ка того́, с ним же сотвори́ она́ ми́лость его́же от удавле́ния изъя́т, и рече́ ей: «Что скорби́ши, госпоже́ моя́?». Она́ же рече́: «Мы́слю бы́ти христия́на, и никто́ же хо́щет о мне глаго́лати па́пе». И рече́ ей а́нгел: «Во и́стину ли жела́еши?». И отвеща́ ему́: «Во и́стину хо́щу». И глаго́ла к ней а́нгел: «Ника́ко же не уныва́й, аз приведу́ не́кия и донесе́м тя до це́ркве». Приведе́ же к ней и́на два свята́я а́нгела, и взе́мше несо́ша ю́ в це́рковь. И па́ки преобрази́шася в ина́я лица́, и зна́емый чин презви́терский, и глаго́лаша па́пе да крести́т ю́. Па́па же призва́ попы́ церко́вныя, да ю́ крестя́т со дия́коны. И ти́и глаго́лаша прине́сшим ю́: «Поруча́ете ли ся по ней?». И ре́ша: «Ей, мы поручае́мся по ней». И та́ко крести́ша ю, и бе́лы ри́зы нося́щи прии́де в дом свой, носи́ма и́ми. И посади́ша ю́, и неви́дими бы́ша. Сосе́ды же прише́дше и ви́деша ю́ бе́лы ри́зы нося́щу, и ре́ша ей: «Кто тя крести́?». И испове́да им: «Я́ко не́цыи приидо́ша, и принесо́ша мя в це́рковь, и глаго́лаше па́пе: крести́ти мя, и крести́ша мя». И ре́ша сосе́ди ей: «Зна́еши ли их?». Она́ же рече: «Знаю». Ше́дше сосе́ди ре́ша па́пе, и призва́ па́па крести́вших ю́, и рече́: «Вы ли есте́ крести́ли ю́?». Они́ же ре́ша: «Ей, умоле́ни есмы́ о́нсими о́вем и о́вем». Призва́ же епи́скоп я́же нареко́ша, и испыта́ша о́нех, а́ще есте́ поручи́шася по ню. И ре́ша: «Не знае́м, и не ве́мы ея́». И тогда́ разуме́ епи́скоп, я́ко от Бо́жия си́лы сотвори́лося есть. И призва́ деви́цу, рече́ ей: «Рцы ми дщи, что еси́ добро́ сотвори́ла?». И рече́: «Что добро́ соде́яти ми, блудни́це убо́гой?». Глаго́ла ей: «Ничто́же ли отню́д не ве́си себе́ соде́явшу добра́?». Она́ рече́: «Ничто́ же влады́ко, то́чию ви́дех не́коего удави́тися хотя́ща, наси́луема от должни́к, и все име́ние свое́ дах ему́, и изба́вих его́». И то ре́кши, а́бие преста́вися. И тогда́ па́па и иже с ним, просла́виша Бо́га. И рече́: «Пра́веден еси́ Го́споди, и пра́вы суды́ Твои́», и сла́ва Ти о всем творя́щему ди́вная чудеса́, ны́не и при́сно и во ве́ки веко́в. Ами́нь.