Пасха

На стра́жи мое́й ста́нуАвв.2:1, глаго́лет чу́дный Авваку́м, и аз с ним днесь, [в] да́нней ми от Ду́ха вла́сти, и виде́нии: и усмотрю́, и уве́м, что яви́тся, и что возглаго́лется ми. И стах и усмотри́х, и се муж вше́д[2] на о́блацех, и сей высо́к зело́: и виде́ние его́, я́ко виде́ние а́нгелаСуд.13:6: и ри́за его́, я́ко свет мо́лния преходя́щаго. И воздви́же ру́ку свою́ на восто́ки, и возопи́ гла́сом вели́ким. Глас его́ я́ко глас трубы́, и окру́г его́ я́ко мно́жество небе́снаго во́инства, и рече́: Днесь спасе́ние ми́ру, ели́к же ви́димь, и ели́к неви́димь. Христо́с из ме́ртвых, совоста́йте. Христо́с в Себе́, восприходи́те. Христос из гро́ба, свободи́теся от уз греха́. Врата́ а́дова отверза́ются, и смерть разруша́ется, и ве́тхий Ада́м отлага́ется, и но́вый соисполня́ется. А́ще ко́е во Христе́ но́во зда́ние2Кор.5:17, обновля́йтеся. Сия́ у́бо ов глаго́лаше, о́ви же воспева́ху, е́же и пе́рвее, внегда́ нам яви́ся Христо́с, ни́жним Рождество́м: Сла́ва в вы́шних Бо́гу, и на земли́ мир, в челове́цех благоволе́ниеЛк.2:14.   С ни́ми же и сам в вас сия́ веща́ю. Да бу́дет же и глас прия́ти а́нгельскаго досто́ин, и вся оглаша́ющь концы́: Па́сха, Госпо́дня Па́сха, и па́ки реку́, Па́сха. Честь Тро́ицы. Сей пра́здников нам Пра́здник, и Торжество́ торже́ств, толи́ко превыша́ющая вся; не челове́ческая то́чию и ни́зу гряду́щая, но уже́ и я́же самаго́ Христа́, и в Нем соверша́ема, ели́ко зве́зды со́лнце. Добро́ у́бо и вчера́шнее нам светлоно́сие, и светово́дство, е́же осо́бь же и о́бщне соста́вихом, весь род челове́чь, ма́ло и сан весь, оби́льным огне́м нощь освеща́юще и ве́льскаго све́та возобра́зное, ели́к же не́бо свы́ше просвеща́ет, мир весь озаря́я от себе́ добро́тами, и ели́к пренебе́сный, во а́нгелех же пе́рвом све́тлом естестве́, по Пе́рвом, е́же отону́ду точи́тися, и ели́к в Тро́ице, от Нея́же свет весь соста́вися, от неразде́льнаго Све́та, разделя́емый и что́мый. До́брьшее же дне́шное и пресве́тльшее, ели́ко вчера́ у́бо предте́чев бе вели́каго Све́та востаю́щаго свет, и я́ко весе́лие не́кое предпра́зднственно; днесь же Воскресе́ние са́мое пра́зднуем, не еще́ наде́емое, но уже́ бы́вшее, и мир весь себе́ собира́ющее.   Ин у́бо и́но что вре́мени да плодоно́сит, и дароно́сит дар пра́здничный - или́ мал, или́ бо́льший - духо́вных же и Бо́гу любе́зных, я́ко у́бо ки́йждо и́мать си́лу. Досто́инство бо едва́ и а́нгели получа́ют, пе́рвии, и у́мнии, и чи́стии вы́шния сла́вы ви́дителе[6] и све́дителе, а́ще же и сим все дости́жно пе́ния. Мы же сло́во внесо́м, и́хже и́мамы добре́йшее же и честне́йшее, и́нако же и Сло́во пою́ще о благодея́нии слове́снаго естества́.  Начну́ же отсю́ду. Ниже́ бо терплю́, о вели́цей Же́ртве и велича́йшем дне, жря словеса́, но к Бо́гу востещи́ и отону́ду сотвори́ти нача́ло. И очи́стите ми и ум, и слух, и ра́зум, ели́цы пита́етеся таковы́ми, поне́же о Бо́зе и Бо́жие сло́во, да отъи́дете напита́вшеся[7] и́стинно неистоцева́емыми. Бу́дет же то́е испо́лнейшее же ку́пно и скраще́ннейшее, я́ко ниже́ ску́дну печа́ловати, ниже́ несла́достно бы́ти за сы́тость.   Бог бе у́бо при́сно, и есть, и бу́дет. Па́че же есть при́сно. Е́же бо бе и бу́дет, по нам вре́мене сече́ния, и те́чнаго естества́. Сый же при́сно, и сие́ Сам Себе́ имену́ет, Моисе́ю сказу́я на горе́{8]. Все бо в себе́ сообъе́м, и́мать, е́же бы́ти. Ниже́ наче́ншееся, ниже́ преста́нущее, я́ко не́кая пучи́на существа́ безме́рна и непреде́яна, всю преиспа́дающая мысль, и вре́мени, и естества́, умо́м еди́нем сенопи́шема, [и тем зело́ мра́чно и ме́рно, не от их же по Нему́, но от и́хже о Нем, и́ному от и́наго мечта́нию собира́ему], во еди́н не́кий и́стинны о́браз, пре́жде да́же удержа́тися бегу́щь и пре́жде да́же разуме́тися пробега́ющь, толи́ка освеща́ющь на́ше влады́чествительное и толи́ка очище́нное, ели́ка и виде́ние, мо́лния ско́рость не стоя́щаго, мне мне́тися да пости́жным у́бо влече́т к себе́. Сове́ршенне бо непости́жно, безнаде́ждно и неначина́емо, непости́жным же чуди́тся, чуди́мое же лю́бится вя́щше, люби́мое же очища́ет, очища́ющее же богови́дцы де́ет. Таковы́м же бы́вшым, я́ко Cвои́м уже́ прибесе́дует, [дерза́ет не́что ю́ношеско сло́во] Бог бого́м еди́нствуемь же и зна́емь и толи́ко не́гли, ели́ко уже́ зна́ет зна́емыя1Кор.13:12.   Безме́рно у́бо Божество́ и неудобозри́мо. И сие́ вся́ко пости́жно Его́ то́чию безме́рие, а́ще и кто непщу́ет про́стаго бы́ти естества́: или́ все непости́жно бы́ти, или́ соверше́нне пости́жно. Что бо су́щее про́стаго есть естества́ взы́щем. Ни бо у́бо сие́ естество́ ему́ простота́, елма́ ниже́ сло́жным то́чию е́же бы́ти сло́жным. Сугу́бо же безме́рну зри́му, по нача́лу же и концу́ [е́же бо па́че си́х, и в сих безме́рно], егда́ у́бо в го́рнюю глубину́ ум возри́т, не име́я где ста́нет и утверди́тся о Бо́зе мечта́нии, зде безме́рно и невосхо́дно, безнача́льное нарече́. Егда́ же в до́льнюю и про́чая, безсме́ртно и неги́блемо. Егда́ же совокупи́т все - ве́чное. Век бо ниже́ ле́то, ниже́ ле́та ка́я часть, ниже́ бо ме́римо. Но е́же нам ле́то, со́лнца тече́нием ме́римо, сие́ присносу́щным век, сопростира́емое су́щным, я́ко не́кое ле́тное движе́ние и разстоя́ние.   Сия́ ми о Бо́зе да любому́дрствуются ны́не. Ниже́ бо о сих вре́мя, я́ко ни богосло́вие, предлежа́щее нам, но смотре́ние[10]. Бо́га же, егда́ реку́, глаго́лю: Отца́, и Сы́на, и Свята́го Ду́ха. Ниже́ па́че сих Божеству́ излива́ющуся, да не собо́р бого́в введе́м, ниже́ внутрь сих определя́ющуся, да не убо́жеством Божества́ осу́димся, или́ за единонача́лие иуде́йствующе, или́ за мно́жество е́ллинствующе. Зло бо во обои́х подо́бно, а́ще и в проти́вных обрета́ются. Си́це у́бо свята́я святы́х, я́же и серафи́мом сокрыва́ются, и сла́вятся треми́ святба́ми, во еди́но сходя́щыми Госпо́дство и Божество́, е́же и и́ному не́коему пре́жде нас любому́дрствовася, добре́йши же и высоча́йши.   Елма́же не довля́ше Бла́гости сие́, е́же двиза́тися то́чию Себе́ Самы́я виде́нием, но подоба́ше излия́тися благо́му и проити́, я́ко мно́гшым бы́ти благоде́тельствуемым, [сие́ бо кра́йнея бе Бла́гости], пе́рвое у́бо умышля́ет анге́льския си́лы и небе́сныя: и умышле́ние де́ло бе, Сло́вом соисполня́емо, и Ду́хом соверша́емо. И та́ко соста́вишася све́тлости вторы́я, слуги́ пе́рвыя Све́тлости. А́ще же у́мныя ду́хи, а́ще же огнь, я́ко невеще́ственен и безтеле́сен, а́ще же не́кое естество́ и́но, я́ко ближа́йши рече́нных сия́ непщева́тельно. Хощу́ у́бо рещи́, я́ко недви́жимыя ко злу и еди́но иму́щыя до́браго движе́ние, я́ко[11] при Бо́зе су́щыя и я́же пе́рвое от Бо́га сия́емыя, [я́же бо зде втора́го сия́ния], увещава́ет же мя не недви́жныя, но неудободви́жныя, и непщева́ти сия́, и глаго́лати, за све́тлость светоно́сец[12], тма за вознесе́ние[13] и быв, и глаго́лемый, я́же под ним отсту́пныя си́лы, соде́теле зло́бы, до́браго беѓством, и нам хода́тае. Та́ко у́бо у́мный Ему́, и сих ра́ди соста́вися мир: я́ко мне у́бо о сих любому́дрствовати, ма́лым сло́вом вели́кая купоня́щу[14].   Поне́же пе́рвая до́бре имя́ху ему́, вторы́й умышля́ет мир, веще́ствен и ви́димь, и сей есть из небесе́ и земли́ и су́щих посреде́, составле́ние же и сосу́ждение: похва́льно у́бо по коему́ждо благосочта́ния[15], досто́йно похва́лньшее же су́щаго от вся́ких благочленове́ния и согла́сия, и́ному ко и́ному чесо́му до́бре иму́щу, и всем ко всем, во еди́наго ми́ра соисполне́ние. Да ука́жет не то́чию Свое́ Себе́ естество́, но и вся́ко стра́нное соста́вити си́лен Сый. Свое́ у́бо Божества́, у́мная естества́ и умо́м еди́нем пости́жна. Стра́нно же вся́чески, ели́ки под чу́вством. И сих са́мых еще́ дальне́йшы, ели́ки весьма́ безду́шнии и недви́жны.   Ум у́бо уже́ и чу́вство, си́це от друг дру́га разсужде́ннии, внутрь свои́х преде́л стоя́ху, и Соде́теля Сло́ва вели́чие в себе́ нося́ху, молча́щии похва́льницы великоде́йства и велегла́снии пропове́дницы. Не у́ же бе растворе́ние из обои́х, ниже́ ко́е смеше́ние проти́вных - Му́дрости бо́льшия позна́ние, и о естестве́х многосоверше́нства - ниже́ все бога́тство Бла́гости зна́емо. Сие́ у́бо восхоте́в Хитре́ц показа́ти сло́во и живо́тное еди́но, из обои́х, ви́димаго же глаго́лю и неви́димаго естества́, содеева́ет челове́ка. И от ве́щи у́бо прие́м те́ло, уже́ предподста́вшия, от себе́ же жизнь[16] вложи́в, [е́же у́бо у́мну ду́шу, и о́браз Бо́жий весть сло́во], я́ко не́кий мир вторы́й, в ма́лом вели́к, на земле́ поставля́ет а́нгела ина́го, покло́нника смеше́на, назира́теля ви́димаго зда́ния, та́ибника у́мствуемаго, царя́ су́щих на земле́, ца́рствуемаго горе́[17], земле́на и небе́сна, привре́менна и безсме́ртна, ви́дима и у́мствуема, сре́дственна вели́чества и смире́ния, того́жде дух и плоть: дух за благода́ть, плоть за вознесе́ние. О́во у́бо да пребыва́ет и сла́вит Благоде́теля, о́во же да стра́ждет, и стражда́ воспомина́ется и наказу́ется, вели́чеством любоче́ствуемь, живо́тное зде устроя́емо и и́намо преставля́емо и, [коне́ц та́йны], к Бо́гу ма́нием обожа́емо. В сие́ бо ми но́сит ме́рное зде сия́ние и́стинны, све́тлость Бо́га и ви́дети и пострада́ти, досто́йную и Связа́вшаго, и Разреши́вшаго, и па́ки Свя́жущаго вы́шше.   Сего́ поста́ви у́бо в раи́, [и́же кий тогда́ рай бе сий], самовла́стием почты́й, да бу́дет изво́льшаго благо́е не мне́е, не́же подава́ющаго се́мена, елдо́в[18] безсме́ртных де́лателя - боже́ственных мы́слей не́гли, про́стших же и соверше́нших - на́га простото́ю и жи́знию безхи́тростною, и кроме́ вся́каго прикро́ва и оде́жды, такову́ бо ле́потствоваше бы́ти су́щу изнача́ла. И дае́т зако́н, вещь самовла́стному. Зако́н бе за́поведь: и́хже прия́тельно ему́ садо́в и ему́же не прикаса́тельно. Сие́ же бе, дре́во зна́ния, ниже́ насажде́нное изнача́ла зле, ниже́ отрече́ное зави́стне, [да не пуща́ют[19] та́мо язы́к богобо́рцы, ниже́ зми́я подража́ют], но до́брое у́бо, благовре́менно прие́млемо. Виде́ние бо бе сад, я́ко мое́ виде́ние, к нем́уже еди́нем прихо́дит тве́рдо, и́мством соверше́ньшим: не добро́ же про́стшым, еще́ и жела́нием ла́комшым, я́коже ниже́ пи́ща соверше́нная поле́зна млады́м еще́ и тре́бующым млека́.   Елма́ же за́вистию диа́волею и жены́ искуше́нием, е́же пострада́ я́ко мя́гшая, и е́же принесе́ я́ко ве́тлившая [О́ле мое́я не́мощи! Моя́ бо пра́отца], за́поведи у́бо забы́сть да́ныя, и победи́ся го́рьким вку́сом; ку́пно же от жи́зни дре́ва, и рая́, и Бо́га, за зло́бу изгна́н быва́ет, и в ко́жаны одея́ется ри́зы, не́гли де́бельшую плоть - и сме́ртну, и противоо́бразну. И сие́ пе́рвое зна́ет свой студ и от Бо́га кры́ется. Приобрета́ет у́бо что и зде - смерть и е́же пресечи́ся греху́, да не безсме́ртно бу́дет зло. И быва́ет человеколю́бие, муче́ние: та́ко бо увеща́юся му́чити Бо́гу.   Мно́гими же нака́зан пе́рвее за мно́гия грехи́, я́же зло́бы ко́рень прозябе́, по разли́чным вина́м и времене́м: сло́вом, зако́ном, проро́ками, благодея́ньми, преще́нии, ра́нами, вода́ми, запале́ньми, бра́ньми, побе́дами, одоле́нии, зна́мении с небесе́, зна́мении с возду́ха, из земли́, из мо́ря, муже́й, градо́в, язы́к безпаде́жными преложе́ньми, [от ни́хже соте́ртися зло́бе тщи́мо бя́ше], коне́ц, кре́пшаго тре́бует врачества́, в лю́тых не́мощех, другдругоуби́йствех, прелюбодея́ниих, прероче́ниих, муженеи́ствовствех, [е́же всех после́днее зо́л, и пе́рвое] идолослуже́ниих и преложе́нии поклоне́ния от Сотво́ршаго назда́ния. Сия́, поне́же бо́льшия тре́боваху по́мощи, бо́льшую и получа́ют.   Сия́ же бе, са́мое Бо́жие Сло́во: Преве́чное, Неви́димое, Необъе́млемо, Безтеле́сно, из Нача́ла Нача́ло, из Све́та Свет, Исто́чник жи́зни и безсме́ртия, Изображе́ние Началообра́знаго, недви́жимая Печа́ть, непреме́нный Образ, Оте́ч Преде́л и Сло́во, - во Свой о́браз вмеща́ется и плоть но́сит за плоть, и душе́ у́мной за мою́ ду́шу смешева́ется, подо́бным подо́бное возочища́я, и вся быва́ет, кроме́ греха́, челове́к. Роди́вся у́бо из Де́вы, и душе́ю и пло́тию предочище́нныя Ду́хом, [подоба́ше бо и рождеству́ почти́тися, и де́вству предпочти́тися], проше́д же Бог соприя́тием, еди́но из двох проти́вных: пло́ти и Ду́ха, и́хже О́во у́бо обожи́, о́во же обожи́ся.   О но́ваго смеше́ния! О пресла́внаго растворе́ния! Сый быва́ет, и Несозда́н зи́ждется, Невмести́мый вмеща́ется, сре́дственною душе́ю у́мною, сре́дствующею Божеству́ и пло́ти де́бельству. И обогаща́я обнищева́ет, обнищева́ет бо мое́ю пло́тию, да аз обогащу́ся Его́ Божество́м. И испо́лнь истоща́ется, истоща́ется бо Своея́ сла́вы на ма́ло, да аз Его́ причащу́ся исполне́нию. Ко́е бога́тство бла́гости! Ка́я о мне сия́ та́йна? Причасти́хся о́бразу, и не сохрани́х. Причаща́ется мое́й пло́ти, да о́браз спасе́т и плоть обезсме́ртит. Второ́е обща́ет обще́ние, мно́го пе́рвшаго пресла́внейшее, ели́ко тогда́ у́бо лу́чшее предаде́, ны́не же причаща́ется го́ршему. Сие́ пе́рвшаго богови́днейшее, сие́ ум иму́щым вы́шшее.   «Но что сих нам?», - не́гли у́бо рече́т кто от зело́ празднолю́бных и те́пльших, - «Боди́ жребца́ до обра́ти, пра́здничная нам любому́дрствуй, и и́мже председи́м днесь». Сие́ у́бо и сотворю́, и а́ще ма́ло вы́шше нача́х, та́ко сло́ву и любве́ пону́дившым.   Не го́ршее же не́гли любоучи́мым и любодобро́тным, о нарица́нии само́м Па́схи кра́ткая расприя́ти, бу́дет бо не ху́до сие́ слу́хом привхо́дное. Па́сха сия́, ве́лия же и честна́я, фа́ска евре́ом нарица́ется, по о́нех гла́су, явля́ет же глас преше́ствие. Пове́стне у́бо, за из Еги́пта к Ханане́е бе́гство и преселе́ние; духо́вне же, за от ни́жных к вы́шним и земле́ обетова́ния прехо́д и возше́ствие. Е́же мно́гажды Писа́нию слу́чшееся обрето́хом, от нея́вственших претворе́ная не́кая от име́н на я́вственшее, или́ гру́бих на благообра́зншее - сие́ и зде ви́дехом. Спаси́тельныя бо стра́сти и́мя сие́ не́цыи мне́вше, та́же из е́ллинствующе глас, по Ферт на Поко́й, и Ка́ко на Хер претворе́нию, Па́сху день нареко́ша[20]. Прие́м же обы́чай глас, кре́пший сотвори́, притека́ющу мно́гих слу́ху, я́ко благочести́вшим глаго́лом.   Весь у́бо зако́н, сень[21] бы́ти бу́дущихКол.2:17 и разуме́емых, боже́ственный апо́стол пре́жде нас провеща́. И глаго́лавый пре́жде сего́ Моисе́ю Бог, внегда́ о сих законополага́ше. Зри бо, глаго́лет, сотвори́ши вся по о́бразу ука́заному ти на горе́Исх.25:40, сенописа́ние не́кое и предначерта́ние неви́димых, показу́я ви́димая. И увеща́юся ничто́же всу́е, ниже безслове́сне, ниже́ низупле́жно[24] [сих] зачини́тися, ниже́ не досто́йне Бо́жияго законоположе́ния и Моисе́ова служе́ния, а́ще и неудо́бно[25] ко́ейждо се́ней ко́еждо изобрести́ виде́ние, в то́нкое нисхо́дищу, ели́ка же о се́ни той, и ме́рах, и ве́щи, нося́щих сия́ леви́тех же и служи́телех, ели́ка же о же́ртвах и очище́ниих, и отъя́тиих законоположи́шася. И еди́нем бы́ти ви́дима су́щым по Моисе́ю, доброде́телию, или́ я́ко ближа́йши о́наго наказа́ния. Поне́ и на само́й горе́ Бог челове́ком явля́ется, о́во у́бо не́что нисходя́ Сам от Своего́ осмотри́лища, о́во же нас возводя́ от до́льнаго смире́ния, да вмести́тся ме́рно у́бо сме́ртным естество́м и ели́ко тве́рдо невмести́мый. Ни бо мо́щно и́наче в разуме́нии Бо́жии бы́ти, телеса́ веще́ственнаго и свя́заннаго ума́ де́бельству, не помоществу́ему. Тогда́ у́бо не вси того́жде сподо́бльшеся явля́ются чи́на же и стоя́ния, но ов у́бо того́, ов же ина́го, по ме́ре, непщу́ю, своего́ очище́ния ки́йждо. О́виже и весма́ отгна́ни, и еди́н слы́шати вы́шний глас попуща́еми, ели́цы зверови́днии нраво́м, и [и́же вельми́] боже́ственных та́ин недосто́йнии. Оба́чеже, средо́ю ходя́ще мы, вся́ко де́бельших ра́зумом и зело́ ви́дительных же и возведе́ных, да ниже́ весма́ пра́здни и недви́жни пребыва́ем, ниже́ преде́лательнейшии подоба́ющаго бу́дем, и предлежа́щим отпаде́жнии и чу́ждии, [о́вобо у́бо иуде́йское не́како и смире́ное, о́воже сонносуди́тельно, и подо́бне обоя́ зазо́рна], та́ко о сих разглаго́лем, по нам дости́жному, и не зело́ безме́стному, ниже́ мно́гим посмея́тельному.   Мним бо, поне́же па́дшым нам от греха́, изнача́ла, сла́стию, укра́дшымся да́же до идолослуже́ния и беззако́нных крови́й, подоба́ше па́ки воззва́тися и к дре́внему возвести́ся, за утро́бы[26] ми́лости Бо́га Отца́ на́шего, не терпя́ща отщети́тися толи́ку де́лу Своея́ руки́ челове́ку, не́како у́бо возсозда́тися. И что бы́ти? Е́же у́бо зе́льному врачества́ не искуствова́тися, я́же ниже́ уве́щущу[27] и приуязви́ти могу́щу, за е́же от вре́мене надме́ние; кро́тким же и человеколюбе́зным лекова́ния устро́ит ся ко исправле́нию. Ниже́ бо бы кри́ву пру́ту терпе́ти напра́сное преклоне́ние и ну́жду руки́ направля́ющия скоре́е у́бо уязви́тися, не́жели напра́витися. Ниже́ коню́ теплу́ и прево́зрастну узды́ муче́ние, кроме́ не́коего ласка́ния и звизда́ний. Сего́ ра́ди дае́тся Зако́н нам в по́мощь, я́ко не́кая прегра́да сре́дственна Бо́га и куми́р, от о́вех у́бо отводя́ нас, ко О́ному же приводя́. И проща́ет не́что ма́ло изнача́ла, да вя́щее прии́мет. Проща́ет же́ртвы, еда́ да воста́вит Бо́га. Та́же егда́ вре́мя, раздру́шит и же́ртвы, му́дро подъизменя́я ны пома́лу уя́тий и преводя́ на Ева́нгелие, уже́ науче́ныя к благопокоре́нию. Та́ко бо у́бо, и сих ра́ди вни́де пи́саный Зако́н, собира́я нас во Христа́. И сие́ жертв сло́во, я́ко мое́ сло́во.   Я́ко же у́бо му́дрости глубины́ да не [не] разуме́еши, и бога́тства неизсле́дных Его́ суде́б, ниже́ сия́ вся́чески[28] несвяще́нныя оста́ви, ниже́ несоверше́нныя, ниже́ до худы́я проходя́щыя кро́ве, но ве́лия неже́ртвеная Же́ртва, [да та́ко реку́] ели́ко о пе́рвом Естестве́, зако́нным же́ртвам примеси́ся, и нема́лыя ча́сти вселе́нныя, ниже́ на ма́ло, но всего́ ми́ра, и ве́чнующее очище́ние. Сего́ ра́ди прие́млется овча́Исх.12:5, у́бо за незло́бство, и оде́жда дре́вняго обнаже́ния. Таково́ бо заны́ закла́ние, оде́жда нетле́ния, и су́щи, и зове́ма. Соверше́нна же не за Божество́ то́чию, Его́же ничто́же соверше́ньшее, но и за прия́тие, помаза́ное Божество́м, и бы́вшее е́же Помаза́вшее, и дерза́ю глаго́лати купнобо́жное. Му́жеско же я́ко о Ада́ме приноси́мо, па́чеже тве́рдаго тве́рдшее, пе́рвому па́дшу под гре́х, и я́ко па́че ничто́же же́нско, и́же нему́жественно в себе́ нося́ще; но и исто́ргшееся ну́ждею уз деви́ческих же и ма́терних по мно́гой вла́сти, и ро́ждшееся му́жеское от проро́чицы, я́ко Иса́ия благовеству́етИс.8:3. Единоле́тно же я́ко со́лнце пра́вдыМал.4:2, или́ отону́ду гряду́ще, или́ ви́димым опи́санное, и до Себе́ обраща́ющееся. Вене́ц же бла́гости благословля́емьПс.64:12, и отвсю́ду ра́вен Себе́ и подо́бен. Не то́чию же, но и я́ко живоражда́ющ доброде́телей круг, ти́хо присмешева́емых и растворя́емых друг дру́гу зако́ном любве́ и чи́на. Непоро́чно же и нескве́рно, я́ко лечи́телю поро́ков и от зло́бы ума́лении и скверн. А́ще бо и грехи́ на́ша восприя́т и неду́ги понесе́, но и Сам ничто́ пострада́ лечбы́ досто́йных. Искуси́ся у́бо по всем, по подо́бию на́шему, кроме́ греха́ жеЕвр.4:15, гони́в бо светя́щь во тме Свет не пости́жеИн.1:5.   Что еще́? Ме́сяц убо вво́дится пе́рвый, па́чеже нача́ло ме́сяцейИсх.12:2, а́ще же кий сие́ у евре́й сый от нача́ла, а́ще же после́жди отту́ду быв и от та́йны е́же бы́ти пе́рвый прие́м. Десяти́цею же ме́сяца - сие́ бо числ испо́лньнейшее, и еди́ниц пе́рвая еди́ница соверше́ная, и роди́тельная соверше́нства. Соблюда́ется же на пя́тый деньИсх. 12:6, не́гли я́ко чисти́тельна чувств моя́ же́ртва, от ни́хже е́же греши́ти и о и́хже брань прие́млющих жа́ло греха́. Избира́ется же не от а́гнец то́чию, но и ху́ждшаго ви́да и шу́ия руки́ ко́злищ, я́ко не за пра́ведныя то́чию, но и гре́шныя закала́ется, не́гли же за сия́ и вя́щше, ели́ко и вя́щшаго тре́буем человеколю́бия. Чу́дно же ничто́же, а́ще па́че у́бо на дом ки́йждо взыску́ется овча́, а́ще же ни, и по домо́м отче́ств, за убо́жество собира́емое. Поне́же держа́внейшее па́че у́бо самому́ коему́ждо довле́ти себе́ к соверше́нию и же́ртву жи́ву свя́ту приноси́ти зову́щу Бо́гу всегда́ же и все́ми освяща́ему. А́ще же ни, и споспе́шник[37] на сие́ употреби́ти, по доброде́телей единоро́дных и единонра́вных. Сего́ бо ми мни́тся хоте́ти, общева́ти бли́жним же́ртву, а́ще бы тре́бовалося. Отсю́ду свяще́нная нощь, и насу́тствующаго жития́ разли́чныя, сея́же но́щи противобо́рбница, в ню́же перворо́дная реши́тся тма и во свет вся, в чин, в вид гряду́т, и красоту́ пре́жнее безкрасо́тство прие́млет. Отсю́ду Еги́пта бе́гаем, дря́хла, и гони́тельна греха́, и фарао́на неви́димаго мучи́теля, и го́рьких делода́вец, к го́рнему преустроя́еми ми́ру, и от ка́ла и пли́нфства свобожда́емся, пле́внаго же и бла́зненаго плотска́го сего́ соста́ва, и ниже́ ели́ко пле́вными мы́сльми от мно́гих держи́маго. Отсю́ду а́гнец закала́ется, и зна́менаются честно́ю кро́вию дея́ние и сло́во, или́ у́бо и́мство и де́йство: на́ших дверь подкле́пи[38], глаго́лю у́бо ума́ движе́ний же и догма́т до́бре отверза́емых и заключа́емых от виде́ния, поне́же ме́ра есть не́кая и постиже́ний. Отсю́ду коне́чная и тяжча́йшая гони́телем ра́на, и но́щи и́стинно достойна́я: и пла́чется перворо́дных свои́х мы́слей и дея́ний Еги́пет, е́же и се́мя халде́йское взема́емоИс.48:14 Писа́нию нарица́ется, и младе́нцы вавило́нстии, ка́мени приража́еми и реши́миПс.136:9. И во́пля вся испо́лнена и кли́ча еги́птяном. И от нас отъи́дет тогда́ о́нех губи́тель, студо́м и стра́хом пома́зания. Отсю́ду взя́тие ква́са седмодне́вное: сие́ бо та́инственнейшее числ, и [ми́ру сему́ состихо́вно], ве́тхия и оцте́нныя зло́бы, [не бо́ хлеботво́рнагоже и живо́тнаго], да ничто́же еги́петским напитава́емся те́стом и оста́нок фарисе́йскаго и безбо́жнаго уче́ния.   И си́и у́бо да пла́чутся, нам же а́гнец сне́стся. К ве́черу у́бо, зане́ при сконча́нии веко́в Христо́ва страсть. Елма́ и обща́ет та́йну ученико́м в ве́чер, реша́я тму греха́, не вари́мь же, но пеко́мь, я́ко да ничто́же неви́димо, ниже́ во́дно сло́во нам и́мать, ниже́ удоборазреша́емо, но все состоя́щее бу́дет, и тве́рдо, и чисти́тельным огне́м искуше́но, и вся́каго тиме́ннаго свобо́дно, и неизбы́точно, и до́брыми у́гльми помоществу́емся, разуме́тельное на́ше вжига́ющыми и чи́щащыми, от Прише́дшаго огнь воврещи́ на землю́Лк.12:49, зло́бных имств потреби́телен, и вожже́ния Тща́щагося. Ели́ко у́бо плотско́е сло́ва и пи́щное, со вну́трьними и сокрове́нными ума́ сне́стся и потреби́тся, и во изсуче́ние[42] духо́вное возда́стся да́же до главы́ и ног, пе́рвых же о Божестве́ виде́ний и коне́чных воплоще́ния попече́ний. Ничто́же изнесе́м, ниже́ на у́тро оста́вим, я́ко ниже́ изно́сна вне́шним мно́га на́ших та́ин, ниже́ па́че но́щи сея́ есть не́кое очище́ние и отложе́ния[43] непохва́льно, Сло́ву причаща́ющымся. Я́коже бо гне́ву не преде́йствовати, но предразре́шати со́лнцу, добро́ и Бо́гу любе́зно вре́менне же и возво́дне, [захо́дити бо гне́вающымся нам не небла́знено[44] пра́вды Со́лнцу,] та́ко таково́й сне́ди не пренощева́ти, ниже́ в про́чее отлага́тися. Ели́ко же ко́стно и несне́дно и нам неудобови́димо, ниже́ сокруши́тся, зле разделя́емо и разумева́емо, [оставля́ю бо глаго́лати, я́ко ниже́ по по́вести Иису́совой сокруши́ся, и у́бо сме́рти распина́телем притща́щейся савва́ти[45] ра́ди,] ниже́ отве́ржется и расто́ргнется, де не даду́тся свята́я псом и злым Сло́ва растерза́телем, я́ко ниже́ свиния́м све́тлое Сло́ва и би́серное, но огне́м потреби́тся, и́мже и всесожже́ния вся испыту́ющую и ве́дящу Ду́ху, [и]стончева́ема и соблюда́ема, не погубля́ема на вода́х, ниже́ се́ема, я́коже глава́ тельца́ от Моисе́я разсы́пана Изра́илю во укори́зну же́стости.   Досто́йно же ниже́ яде́ния о́браз претещи́, я́ко ниже́ Зако́н да́же и до сего́ виде́ния люботружда́ющься в пи́смени. Потреби́м бо же́ртву по тща́нию, и безква́сная с горчи́цами[46] снеда́юще, и чре́сла препоя́савше, и сапога́ми обложе́ни, и ста́рчески па́личествующеИсх.12:11. По тща́нию у́бо, да не постра́ждем, е́же Лот он, отрече́ся от за́поведи, не озри́мся, ни ста́ним во вся́ком преде́ле, на гор́е спасе́мся, да не сообъя́ти бу́дем содо́мским и стра́нным огне́мБыт.19:17, ниже́ в столп со́ли сме́рзнемся[49], от е́же на го́ршее обраще́ния: е́же де́лает ле́ность. С горчи́цами же за го́рькое жития́ по Бо́гу, и проти́вное начина́ющым па́че, и сласте́й вы́шшее. А́ще бо и бла́го но́во и́го, и бре́мя легко́ Мф.11:30, я́коже слы́шиши, но за наде́жду се и воздая́ние, мно́го зде́шнего злостра́стия су́щее оби́льнейшее. Елма́ и́накоже, кто у́бо не рече́т, многозако́нных зачине́ний[51] Ева́нгелие де́лательнейшее бы́ти и тру́днейшее? Зако́ну бо концы́ грехо́в возбрана́ющу, мы же и вина́ми, а́ки дея́нии близ, порица́емся. Не прелюбоде́еши[52], глаго́лет Зако́н. Ты же ниже́ похотстви́ши от преде́лательна[53] взо́ра, и люботру́днаго паля́ страсть. Не убие́шиМф.5:21, Он. Ты же ниже́ противобие́ши, но и тебе́ сама́го вда́си ударя́ющу. Ели́ко сия́ о́нех любому́дршая! Не прероти́шисяМф.5:33, Он. Ты же ниже́ роти́тися начина́й ни ма́ло, ни вя́щше, я́ко роте́ прероче́ние ражда́ющей. Не совокупи́ши до́му к до́му, Он, и села́ к селу́Ис.5:8, наси́льствуя убо́гагоИез.22:29. Ты же отложи́ши и пра́ведно стяжа́ная усе́рдно, и обнажи́шися убо́гым, да леѓце крест но́сиши и обогати́шися неви́димыми.   Чре́сло у́бо безслове́сным да сла́бо бу́дет и несвя́зано, ниже́ бо сло́во и́мут держа́щее сла́сти, [не у́ глаго́лю я́ко и о́ная преде́л ве́дят есте́ственнаго движе́ния]. Тебе́ же да востя́гнется по́ясом, и целому́дрием похотстви́тельное, и хрепета́тельное[58], я́ко боже́ственное глаго́лет Писа́ние, стра́сти сту́дное обруга́ющееИер.5:8, да чи́сто я́си Па́сху, умертви́в у́ды су́щыя на земли́Кол.3:5, Иоа́нна по́ясу подража́я пусты́ннаго и Предоте́чи и вели́каго и́стинны пропове́дника. Вем и по́яс ин, во́инствен глаго́лю и му́жеск, по нему́же благопо́ясницыНав.4:13 Си́рстии, и единопо́ясницы4Цар.24:2 не́цыи имену́ются[63], по нему́же и И́ову бесе́дуя глаго́лет Бог: Ни, но опоя́ши я́ко муж чресло́ твое́Иов.40:2, и даждь отве́т му́жеск. И́мже и боже́ственный Дави́д препоя́сатися си́лоюПс.17:33 от Бо́га великохва́лится, и Бо́га Сама́го вво́дит оде́яна в си́лу, и препоя́санаПс.92:1, я́ве я́ко на нечести́выя, а́ще не любе́зно, Превосходя́щему си́лу, и я́ко Вску́тленому[67]  та́ко проявля́тися, по нему́же и све́том одея́ется я́ко ри́зоюПс.103:2. Неудержи́мому бо Его́ си́лы и све́та кто подста́нет? Ищу́, что о́бщее чре́слу и и́стинне? Что́же свято́му Па́влу разумева́ется глаго́лати: ста́ните у́бо препоя́савше чре́сло ва́ше во и́стиннеЕф.6:14? Еда́ когда́ зри́тельному похотстви́тельное обстяга́ющу, и не попуща́ющу и́намо носи́тися? Не бо́ хо́щет, о чесо́м залежа́щее рачи́тельне, ко и́нем сласте́м ту́южде име́ти си́лу.   Сапоги́[70] же, святы́я у́бо земли́ и богосто́йныя каса́тися хотя́, да отреша́етИсх.3:5, я́ко и Моисе́й он на горе́, да ничто́же ме́ртво но́сит, ниже́ сре́дственное Бо́га и челове́ка. Я́коже и а́ще кий учени́к на благовествова́ние посыла́ется, любому́дро и неизли́шно ему́же подоба́ет, к безме́дну, и безже́злену, и единори́зну, е́же и нагоно́жну, да явя́тся но́ги красны́ благовеству́ющих мирИс.52:7 и и́но все благо́е. Бе́гая же Еги́пта и еги́петских, да усапо́жится[73], и́ноя же тве́рдости ра́ди и я́же к скорпи́ем и змие́м, я́же и мно́гия Еги́пет пита́ет, я́коже не врежда́тися от блюдя́щих[74] пяту́, я́же попира́ти повели́хомся[75].Лк.10:19   О па́лице же та́ко и́мам и е́же о ней гада́нии, о́ву у́бо подпира́тельну вем, о́ву же па́стырскую же и учи́тельскую и слове́сныя о́вцы обраща́ющую. Но тебе́ ны́не подпира́ющую зако́н повелева́ет, да не где по́мысл уклони́ши, кровь Бо́жию и страсть слы́ша и смерть, да не где пренесе́шися безбо́жне, яко Бо́жий соглаго́льник, но безсту́дно и безбоя́зненно яждь Те́ло и пий Кровь, а́ще жи́зни жела́тельно и́маши. Ниже́ о пло́ти не ве́руя словесе́м, ниже́ су́щими о стра́сти врежда́емь, утвержде́н ста́ни, кре́пок, тверд, в ничесо́м коле́блемь от противолежа́щих, ниже́ уве́тливства словесы́ превлачи́мь. На высоте́ твое́й ста́ни, во дво́рех иерусали́мских поста́ви но́гиПс.121:2, на ка́мени утверди́, да не колеба́ются твоя́ [я́же] по Бо́гу стопы́Пс.16:5.   Что глаго́леши? Та́ко сия́ изво́лишася, Еги́пта изъити́ желе́зныя пещи́Втор.4:20, оста́вити тебе́ та́мошнее многобо́жие и от Моисе́я веде́ну бы́ти и о́ного законоположе́ния и воево́дства. Сказу́ю не́что и не от мои́х, па́че же [и] зело́ мои́х, а́ще духо́вно зри́ши. Заем́ли от еги́птян сосу́ды зла́ты и сре́бряни, с ни́ми пу́тьствуй, от чу́ждых напу́тствися, па́че же твои́х. До́лженствуется тебе́ мзда рабо́ты и пли́нфства, умудри́ не́что и ты о стяза́нии, до́бре улиши́. Бу́ди! Труди́лся еси́ зде, с ка́лом боря́ся, зло́бным сим и скве́рным те́лом, и гра́ди зи́ждая чу́жди и бла́знены, и́хже погиба́ет па́мять с шу́момПс.9:7. Что́ же? Ту́не изхо́диши и безмез́дно? Что́ же оста́виши еги́птяном и противоле́жащым си́лам, я́же зле стяжа́ша и го́рше иждиву́т? Несть о́нех, украдо́ша, восхи́тиша, Ре́кшаго: Мое́ сребро́, и Мое́ есть зла́то[81], и дам е, ему́же хощу́. Вчера́ бе о́нех, попуща́шеся бо. Днесь тебе́ прино́сит, и дае́т Влады́ка, до́бре употребля́ющу и спаси́телне. Стяжи́м нам сами́м люби́мичи от мамо́ны непра́вды, да егда́ оскуде́ем, восприи́мем во вре́мя суда́Лк.16:9.   А́ще у́бо ка́я еси́ Рахи́ль или́ Ли́я, душа́ патриа́ршеская и вели́кая, и и́доли укра́ди, я́же а́ще обря́щеши [у] твоего́ отца́, не да сохрани́ши, но да исчезнови́ши. А́ще же изра́ильтянин мудр, на зе́млю обетова́нную пренеси́. И о сих гони́тель да поболи́т и разуме́ет уму́дрствен, я́ко всу́е мучи́тельствоваше и порабоща́ше лу́чшыя. А́ще та́ко твори́ши, и та́ко изъи́деши из Еги́пта, бла́го вем, я́ко столпо́м огня́ и о́блака наста́вишися[83] но́щию и днем. Пусты́ня укроти́тся, мо́ре тебе́ разсече́тся, фарао́н погрузи́тся, хлеб одожди́тся, ка́мень исто́чничествит; Амали́к пора́тится, не ору́жии то́чию, но и ра́тники рука́ми пра́ведных, моли́тву ку́пно образу́ющыми и Креста́ побе́ду непобеди́мую; река́ возврати́тся, со́лнце ста́нет, ме́сяц[84] удержи́тся, стен́ы низнесу́тся, и кроме́ ко́зней[85], о́сы предтеку́тВтор.7:20, путетворя́щыя Изра́илю и иноплеме́нники возбраня́ющыя. И́наже ели́ка о сих, и с си́ми повествова́шася, а не до́лго простру́ слово, от Бо́га тебе́ дая́тся.   Таковы́й праз́дник пра́зднуеши днесь! Таково́ гости́ши, о тебе Ро́ждьшагося рожде́ственное и Пострада́вшаго надгро́бное. Такова́ тебе́ Па́схи та́йна. Сия́ Зако́н подписа́, сия́ Христо́с соверши́, пи́смене Раздруши́тель, и Соверши́тель Ду́ха, И́же и́миже пострада́, страда́ти уча́я; и́миже просла́вися, сопросла́витися да́рует.   Есть у́бо истяза́ти дея́ние и уче́ние, мно́гим у́бо презира́емое, мне́ же и зело́ истязу́емое. Кому́ бо за ны кровь и о ком излия́ся, вели́кая и превоспе́тая, Бо́га, и Архие́рея, и Же́ртвы? Одержи́ми бо бы́хом от лука́ваго, про́дани под грехо́м, и восприе́мше зло́бы сласть. А́ще же изба́ва не и́ного ко́его, но держа́щаго быва́ет, ищу́, кому́ сия́ внесе́ся, и ки́я вины́ ра́ди? А́ще у́бо лука́вому, о́[87] доса́ды! А́ще не от Бо́га то́чию, но и Бо́га Сама́го изба́ву разбо́йник прие́млет, и мзду та́ко превели́ку своего мучи́тельства, ея́же ра́ди и нас щаде́ти пра́ведно бе. А́ще же Отцу́, пе́рвое у́бо: ка́ко? Не от О́наго бо держа́хомся. Второ́е же: ко́е сло́во Единоро́днаго кро́вию красова́тися Отцу́, И́же ниже́ Исаа́ка прия́т, от отца́ приноси́маго, но измени́ же́ртву? И́бо явле́нно, я́ко прие́млет у́бо Оте́ц, не проси́в, ниже́ тре́бовав, но смотре́ния ра́ди, и е́же тре́бствовати освяти́тися челове́ческим Бо́жиим челове́ку, да Сам нас и́змет, мучи́теля ну́ждею удержа́в, и к Себе́ возведе́т, Сы́ном сре́дствовавшим и в честь Отцу́ сие́ устро́ившим, Ему́же вся попуща́я явля́ется? Христо́ва у́бо такова́я, и вя́щшая молча́нием да почита́ются.   Ме́дный же змий, пове́шается у́бо на угрыза́ющыя зми́я, не я́ко о́браз же за ны Пострада́вшаго, но я́ко противообра́зен. И спасе́т нань зря́щыя[88], не я́ко живе́т, ве́руемый, но я́ко умертви́ся и соумерщвля́ет су́щыя под ни́м си́лы, раздруше́н, я́ко бе досто́ин. И ко́е ле́потствующее ему́ от нас надгро́бное? Где твое́ сме́рти жа́ло?1Кор.15:55 Где твоя́ а́де побе́да? Кресто́м изве́ргся еси́, животво́рным умертви́лся еси́, бездухнове́н, мертв, недви́жимь, безде́лен, а́ще и о́браз снабдева́еши зми́ев, на высоте́ облича́емь!   Причасти́мся же Па́схе[90], ны́не у́бо обра́зно еще́, и а́ще ве́тхия я́вственнее. Зако́нная бо Па́сха, дерза́ю и глаго́лю, о́браза о́браз бе темне́йшь. Ма́ло же после́жди, соверше́ннее и чи́стее, внегда́ у́бо ту́ю пие́т но́ву с на́ми Сло́во во Ца́рствии Отца́Мф.26:29, открыва́я и уча́, я́же ны́не ме́рно показа́, но́во бо есть при́сно ны́не познава́емое. Во е́же пи́во[92] и наслажде́ние? На́ше у́бо е́же научи́тися, О́наго же е́же научи́ти, и сообщи́ти Cвои́м ученико́м сло́во: пи́ща бо есть уче́ние и пита́ющаго.   Но прииди́, и мы зако́ну причасти́мся ева́нгельски, но не пи́санне: соверше́нно, но не несоверше́нно. Присносу́щно, но не привре́менно. Сотвори́м главу не до́льный Иерусали́м, но го́рний Матерогра́д[93] ‐ не от во́инств ны́не попира́емый, но от а́нгел сла́вимый. Пожри́м не телцы́ ю́ны, ниже́ а́гнцы, ро́ги износя́ща и па́зногтиПс.68:32, в ни́хже мно́го ме́ртвено и безчу́вственно. Но пожри́м Бо́гу, же́ртву хвалы́Пс.49:14, на го́рнем же́ртвеннице, с го́рним ликостоя́нием. Разве́рзим пе́рвую заве́су, ко второ́й прии́дем, во свята́я святы́х прини́кнем. Реку́ бо́льшее: ны самы́я пожри́м Бо́гу, па́че же жрим на ки́йждо день и вся́ко движе́ние. Вся за Сло́во прие́млем, страстьми́ страсть подража́им, кро́вию кровь почти́м, на крест восхо́дим усе́рдни: сла́дцы гво́зди, и а́ще зело́ боле́зненни. Со Христо́м бо страда́ти и за Христа́, не́же со и́ными пита́тися[96] изво́льнейшее.   А́ще Си́мон еси Кирине́й, крест возми́, и после́дуй. А́ще сора́спнешися я́ко разбо́йник, я́ко благоразу́мен Бо́га позна́й. А́ще и Он со беззако́нными вмени́сяМк.15:28, тебе́ ра́ди, и твоего́ греха́, ты бу́ди О́ного ра́ди зако́нен. Поклони́ся тебе́ ра́ди Пове́шеному и ви́сяй, приобря́щи не́что и от зло́бы, купи́ сме́ртию спасе́ние. В рай вни́ди со Иису́сом, да́же уве́дети, и́хже отпа́л еси́. Та́мошныя добро́ты узри́, ропотника́ оста́ви умре́ти вне с хуло́ю. А́ще и Ио́сиф еси́ от Аримафе́й, испроси́ Те́ло от распина́ющаго, твое́ да бу́дет ми́ра чисти́тельное. А́ще и Никоди́м еси́ нощны́й богочести́вец, мастьми́[98] Его́ погреби́. А́ще и Мари́я ка́я еси́, а́ще и и́на Мари́я, а́ще и Сало́ми, а́ще и Иоа́нна, прослези́ся ра́но. Виждь пе́рвая, а́ще ка́мень взят, не́глиже и а́нгели, и Иису́са Само́го. Провеща́й не́что, глас услы́ши. А́ще услы́шиши: не каса́йся Мене́Ин.20:17, дале́че ста́ни, почти́ Сло́во, но да не опеча́лишися. Весть бо, и́мже яви́ся пе́рвое. Обнови́ воскресе́ние, Е́ве помози́, пе́рвой па́дшей, и пе́рвой Христа́ поцелова́ти, и сказа́ти ученико́м. Бу́ди Петр, или́ Иоа́нн, ко гро́бу спеши́ся, противотеча́, и сотеча́Ин.20:4, до́брою ре́тию ретя́ся. А́ще и предвари́шися ско́ростию, тща́нием победи́. Не прини́к во гроб, но внутрь быв. А́ще и я́ко Фома́ оста́вишися учени́к собра́нных, и́мже Христо́с явля́ется ‐ егда́ уви́диши, да не возневе́рствуеши. А́ще и возневе́рствуеши, глаго́лющым уве́руй. А́ще же ниже́ си́ми, о́бразы гвозде́й уве́рися. А́ще во ад нисхо́дит, сосни́ди. Позна́й и та́мошныя Христо́вы та́йны: ко́е смотре́ние сугу́баго низше́ствия, ко́е сло́во? Про́сто спаса́ет вся, я́влься, или́ и та́мо ве́ровавшыя?   А́ще и на небеса́ восхо́дит, совосходи́. Бу́ди со провожда́ющыми[101], или́ прие́млющыми. Вознести́ся врато́мПс.23:7, повели́ вы́шшым бы́ти, да от е́же пострада́ти Вы́шшаго прии́мут. Отвеща́й и доумева́ющым за те́ло и стра́сти о́бразы, с ни́миже не снизше́д, совосхо́дит, и сего ра́ди вопроша́ющым: «Кто есть сей Царь сла́вы?». «Я́ко Госпо́дь Кре́пок и Си́лен», - во всех же, я́же при́сно сотвори́ и твори́т, и ны́нешнею бра́нию и побе́дою о челове́честве. И даждь сугу́бому вопро́су, сугу́б отве́т. А́ще и чудя́тся глаго́люще, по Иса́ину делодея́нию[103]: «Кто сей прише́дый из Едо́ма, и земны́х?» Или́ ка́ко червле́ны ри́зы Безкро́внаго и Безтеле́снаго, я́ко точилоше́ственика и испо́лнь точи́ло топта́вшагоИс. 63:1–3? Предложи́ кра́сное оде́жди, пострада́вшаго телесе́, стра́стию удобре́наго и Божество́м просвети́вшагося, ея́же ничто́же рачи́тельнейшее, ниже́ красне́йшее.   К сим что глаго́лют нам клеве́тницы, го́рькии Божества́ слове́сницы, оглаго́льницы похваля́емых, те́мнии о Све́те, о Му́дрости ненака́заннии, за я́же Христо́с ту́не у́мре, неблагода́рная зда́ния, лука́ваго тва́ри? Сие́ ли порица́еши Бо́гу - благодея́ние? Сего́ ли ра́ди Мал, зане́ тебе́ ра́ди Смире́н? Зане́ к блудя́щему прии́де Па́стырь до́брый, полага́я ду́шу за о́вцыИн.10:11, на го́ры и хо́лми, на ни́хже жрил еси́, и блудя́щее обре́те; и обре́т, на ра́мы восприя́т, на я́же и дре́во; и взем, возведе́ в го́рнюю жизнь; и возве́д, пребыва́ющым сопричте́? Зане́ свети́льник вожже́, Cвою́ плоть; и дом умете́, от греха́ мир очища́я; и дра́хму взы́ще[106], Ца́рский о́браз, сопосы́пан страстьми́; и созыва́ет любе́зныя Ему́ си́лы, о дра́хме обре́тении; и обе́щницы твори́т весе́лия, я́же и смотре́ния таи́бницы сотвори́Лк.15:8-9? Зане́ предте́чному свети́льнику Свет после́дует пресве́тлый, и гла́су Сло́во, и невестоводи́телю Жени́х, устро́ящу Го́сподеви люд изря́ден[108],Тит.2:14 и предочища́ющу к Ду́ху водо́ю? Сия́ ли порица́еши Бо́гу? И сих ра́ди непщу́еши го́рша, я́ко ле́нтием препоя́сается, и умыва́ет но́ги учени́кИн.13:4-5, и показу́ет блажа́йшь путь возвыше́ния - смире́ние? Зане́ за сони́чущую[111] ни́зу ду́шу смиря́ется, да и совозвы́cит до́лу ни́чущее от греха́? О́ного же ка́ко не оглаго́луеши, я́ко с мытари́ яст и у мытаре́й, и учи́т мытари́, да и Сам не́что приобря́щет? Что сие́? Гре́шных спасе́ние. А́ще не и врача́ вино́вствует кто, я́ко сони́чет на стра́сти и злово́ние терпи́т, да даст здра́вие боля́щымИсх.25; и [вино́вствовати] Прикланя́ющася я́ме за человеколю́биеВтор.22, да впа́дший скот по зако́ну возспасе́тИсх.23:5, Лк.14:5?   Посла́ся у́бо, но я́ко Челове́к, [Сугу́б бо бе. Елма́ и труди́ся, и взалка́, и возжада́Ин.1, и подвиза́ся, и прослези́ся, зако́ном естества́Мф.4.] а́ще же и я́ко Бог, что сие́? Благоволе́ние Отца́Лк.19 посла́ние бы́ти непщу́й, Нань же возно́сит Своя́, и я́ко Нача́ло чтя безле́тно, и е́же не мне́тися бы́ти Богопроти́вен. Елма́ и преда́тися глаго́летсяРим.4:25, и Себе́ Сама́го преда́ти написа́сяЕф.5:2,25, и воскреcи́тися от Отца́, и взя́тисяДеян.3:15; 1:11, но и Самому́ воскре́снути, и возъити́ па́ки1Фес.4:14, Еф.4:10. О́ная благоволе́ния, сия́ вла́сти. Ты же умаля́ющая у́бо глаго́леши, возвыша́ющая же претекае́ши. И я́ко у́бо пострада́, вменя́еши; я́ко же во́лен, не прилага́еши. Якова́ стра́ждет и ны́не Сло́во! От о́вех у́бо я́ко Бог че́ствуется и совокупля́ется; от о́вех же я́ко плоть безче́ствуется и разлуча́ется. Ки́им разгне́вается вя́щше, па́чеже ки́им оста́вит? Совокупля́ющым зле или́ секу́щым? И́бо и о́нем разделя́ти подоба́ше и сим совокупля́ти; о́вем у́бо число́м, о́вем же Божество́м. Протыка́ешися пло́ти? Сие́ и иуде́и. Или́ и самаряни́ка нарица́еши? И про́чее умолчу́. Не ве́руеши Божеству́? Сие́ ниже́ де́мони, о́ и де́монов неве́рнейше ты, и иуде́й несмыс́леннейше! Они́ Сы́на нарече́ние единоче́стия глас мне́ша, си́и изганя́юща Бо́га ве́деша, увеща́хуся бо, от я́же страда́ху. Ты же ниже́ ра́вность прие́млеши, ниже́ испове́дуеши Божество́. Лу́чше бя́ше ти обре́затися и бесни́тися, [да реку́ что и смехо́вно,] не́жели в необре́зании и здра́вии залежа́ти лу́каво и безбо́жне. Но ко о́нем брань или́ да раздруша́ется, по́зде у́бо уцелому́дрившымся а́ще хо́щут, или́ да отложи́тся не хотя́щым, но и́мущым я́ко и́мут. Вся́ко ничесо́же убои́мся, за Тро́ицу, с Тро́ицею подвиза́ющеся.   Ны́не же ну́ждно нам, си́це оглави́ти сло́во. Бы́хом, да бла́го стра́ждем. Бла́го пострада́хом, елма́ бы́хом. Ра́еви[122] вве́рихомся, да напита́емся. За́поведь прия́хом, да благоиску́ствуем, сию́ сохра́ньше ‐ не неве́дущу Бо́гу бу́дущее, но законополага́ющу самовла́стное. Прельсти́хомся, елма́ зави́ствовахомся. Испадо́хом, елма́ преступи́хом. Пости́хом, елма́ не пости́хом, от дре́ва зна́ния подудержа́вшеся. Дре́вняя бо бе за́поведь и нам единовре́менна, души́ не́кое су́щи наказа́ние и пи́щи целому́дрие, е́юже учини́хомся ле́потно, да е́же не сохра́ньше отверго́хом, сохра́ньше восприи́мем. Тре́бовахом Бо́га воплоща́ема и умерщвля́ема да живе́м, соумертви́хомся да очи́стимся. Совоскресо́хом, елма́ соумертви́хомся. Сопросла́вихомся, елма́ совоскресо́хом.   Мно́га у́бо тогда́шнего вре́мене чудеса́. Бог распина́емь, со́лнце потемня́емо и па́ки возпаля́емо. Подоба́ше бо Зижди́телю сострада́ти и зда́нием. Заве́са раздира́ема, кровь и вода́ из ребра́ лию́щая. О́во у́бо, я́ко челове́ка, о́во же я́ко па́че челове́ка. Земля́ трясу́щися, ка́мение за Ка́мень распада́еми. Ме́ртвии воскреса́ющии в ве́ру коне́чнаго и о́бщаго воскресе́ния. Я́же при гро́бе зна́мения, я́же по гро́бе, я́же кто у́бо досто́йно воспое́т? Ни еди́ноже, я́ко чу́до моего́ спасе́ния. Ка́пли кро́ви ма́лы мир весь воззи́ждущыя, и быва́ют я́коже сы́рище млеку́ всем челове́ком, во еди́но нас связу́ющыя и собира́ющыя.   Но о́ Па́сха ве́лия, и свяще́нная, и всего́ ми́ра чисти́тельна! Я́ко бо душе́вной тебе́ возглаго́лю. О́ Сло́во Бо́жие, и Све́те, и Жи́зне, и Му́дросте, и Си́ло! Ра́дуюся бо все́ми твои́ми имены́. О́ Ума́ вели́каго Ро́де, и Исхожде́ние, и Зна́мение! О́ Сло́во разумева́емое, и Челове́че зри́мый, И́же вся но́сиши, связа́в глаго́лом си́лы Твоея́!Евр.1:3 Ны́не у́бо и́маши сло́во сие́, не нача́ток, но исполне́ние не́гли на́шего плодоно́сия; благода́рственно тое́ и моли́твенно, ничто́же злострада́ти нам вне ну́ждных и свяще́нных, и́мже сожи́хом. И уста́виши телеси́, [е́же] на ны мучи́тельство, [Зри́ши ели́ко, Го́споди, и я́ко кла́няющее,] или́ Твой суд, а́ще от Тебе́ низверза́емся. А́ще же разреши́хомся досто́йно жела́ния, и прии́мемся небе́сными селе́нии, не́гли Тебе́ и та́мо пожре́м прия́тна на святы́й Твой же́ртвенник. О́ О́тче, и Сло́ве, и Ду́ше Святы́й, я́ко Тебе́ подоба́ет вся́ка сла́ва, честь, и держа́ва, во ве́ки. Ами́нь.

Стихи́:

Христо́с сше́д к борьбе́ а́дове Еди́н.

Мно́гия взе́м побе́ды коры́сти, взы́де.

Во святу́ю и вели́кую Неде́лю Па́схи, са́мое живоно́сное Воскресе́ние пра́зднуем Го́спода Бо́га и Спа́са на́шего Иису́са Христа́, е́же у́бо и Па́сху имену́ем: я́же евре́йскою бесе́дою преведе́ние толку́ется. То́й бо е́сть де́нь, во́ньже Бо́г в нача́ле ми́р от небытия́ приведе́. В то́й де́нь изра́ильтеския лю́ди, сквозе́ Чермно́е мо́ре прове́д, от фарао́новых исхища́ет ру́к. В то́й па́ки с небесе́ соше́д, во утро́бу Де́вы всели́ся: и ны́не из а́довых сокро́вищ челове́ческое естество́ все́ исхити́в, на небеса́ возведе́, и к дре́внему достоя́нию приведе́ нетле́ния. Оба́че соше́д во а́д, не все́х воскреси́, но ели́цы ве́ровати Ему́ изво́лиша: ду́шы же я́же от ве́ка святы́х ну́ждею держи́мыя от а́да свободи́, и все́м даде́ на небеса́ взы́ти. Сего́ ра́ди ра́дующеся преесте́ственне со све́тлостию Воскресе́ние пра́зднуем, ра́дость образу́юще, е́юже естество́ на́ше милосе́рдия ра́ди ми́лости Бо́жия обогати́ся: та́кожде и вражды́ разруше́ние, и е́же с Бо́гом соедине́ние и с саме́ми а́нгелы показу́юще, обы́чное содева́ем целова́ние. Госпо́дне же Воскресе́ние бы́сть си́це: во́ином стрегу́щым гро́б, о полу́нощи тру́с быва́ет: соше́д бо А́нгел, ка́мень отваля́ет от две́рей гро́ба, стра́жие же ужаса́ющеся бе́гают. И прихожде́ние зде́ жена́м быва́ет в суббо́ту по́зде, я́коже от полсуббо́тныя но́щи. И пе́рвее у́бо Воскресе́ние Бо́жии Ма́тери познава́емо быва́ет пря́мо седя́щей гро́ба с Магдали́нею, я́коже глаго́лет Матфе́й. Но да не сомни́ло бы ся Воскресе́ние, за е́же к Ма́тери присвое́ния, евангели́сти глаго́лют: пе́рвее явля́ется Магдали́ни Мари́и, она́ же и на ка́мени А́нгела ви́де: и прини́кши па́ки су́щыя вну́трь зри́т, и́же у́бо и Госпо́дне Воскресе́ние возвеща́ют: воста́ бо, глаго́лют, не́сть зде́: се́ ме́сто, иде́же положи́ша Его́. Тече́т у́бо сия́ слы́шавши, и к тепле́йшым от учени́к прихо́дит, к Петру́ и Иоа́нну, и Воскресе́ние си́м благовеству́ет. Возвраща́ющися же е́й с друго́ю Мари́ею, сре́те я́ Христо́с, глаго́ля: ра́дуйтеся. Подоба́ше бо пе́рвее слы́шавшему ро́ду: в печа́лех роди́ши ча́да, тому́ пре́жде и ра́дость внуши́ти. Сия́ же любо́вию побежда́емыя приступа́ют, и пречи́стыма нога́ма Его́ каса́ются, опа́снейше разуме́ти хотя́ще. Апо́стола же ко гро́бу притеко́ста, Иоа́нн у́бо прини́к то́чию во гро́б, оти́де. Пе́тр же вну́трь вхо́дит, и испы́тнейше зри́т, плащани́це же каса́ется и сударе́ви. Па́ки же Магдали́на прихо́дит ко гро́бу о у́трени, со други́ми жена́ми, ви́денная уве́рити хотя́щи опа́сне. У вне́шних же стоя́щи рыда́ше, вну́трь же гро́ба прини́кши, зри́т два́ А́нгела блиста́ющася све́тлостию, и а́ки претя́ща е́й, и глаго́люща: же́но, что́ пла́чеши? и кого́ и́щеши? Иису́са и́щете Назаряни́на распя́таго: воста́, не́сть зде́. И а́бие воста́ша пристра́шни, ви́девше Го́спода. Те́мже она́ обра́щшися вспя́ть, ви́дит Христа́ стоя́ща, вертогра́даря же его́ бы́ти мня́щи, [зане́ в вертогра́де гро́б бы́сть,] глаго́лет: Го́споди, а́ще Ты́ еси́ взя́л Его́, рцы́ ми, где́ еси́ положи́л Его́? и а́з возму́ Его́. Па́ки же Спа́с ко А́нгелом помаа́в, глаго́лет к Магдали́ни: Мари́е. Она́ же сла́дкий и обы́чный Христо́в ощути́вши гла́с, прикосну́тися Ему́ хотя́ше. О́н же глаго́лет: не прикаса́йся Мне́, не у бо взыдо́х ко Отцу́ Моему́, я́коже ты́ помышля́еши, еще́ челове́ка Мя́ бы́ти непщу́ющи: иди́ же к бра́тии мое́й, и рцы́ и́м, ели́ка же ви́дела еси́ и слы́шала. И сие́ у́бо Магдали́на де́лает. Свита́ющу же дню́ па́ки у гро́ба с про́чими быва́ет. Су́щии же со Иоа́нною и Саломи́ею, возсия́вшу со́лнцу приидо́ша. И про́сто рещи́, разли́чно е́же на гро́б же́н прихожде́ние бы́сть, в ни́хже бе́ и Богоро́дица: та́ бо е́сть, ю́же Иоси́еву глаго́лет Мари́ю Ева́нглие. Ио́сифов же бе́ сы́н се́й Иоси́й. В неизве́стном у́бо е́сть, в ки́й ча́с воскре́се Госпо́дь: не́цыи у́бо в пе́рвое куроглаше́ние глаго́лют: друзи́и же егда́ тру́с бы́сть, и разли́чно друзи́и. Си́м же та́ко бы́вшым, се́ не́цыи от кустоди́и доше́дше, возвести́ша архиере́ем соде́явшаяся. Они́ же сре́брениками и́х умзди́вше, повину́ют рещи́: я́ко ученицы́ Его́ прише́дше но́щию, украдо́ша Его́. В ве́чер настоя́щаго дне́, ученико́м во еди́но собра́ным стра́ха ра́ди иуде́йскаго, и две́рем тве́рдо заключе́ным, вхо́дит к ни́м Иису́с, я́ко в нетле́ннем телеси́ бе́, и ми́р обы́чно си́м благовеству́ет. Они́ же Сего́ ви́девше, премно́го возра́довашася, и дунове́нием соверше́ннейшее Всесвята́го Ду́ха де́йство прие́млют. Ка́ко же тридне́вное Воскресе́ние Госпо́дне? ве́ждь си́це: Ве́чер четвертка́, и де́нь пятка́, та́ко бо нощеде́нство евре́е исчита́ют, де́нь еди́н. Пятка́ па́ки но́щь, и суббо́та вся́, друго́е нощеде́нство, се́ де́нь вторы́й. Па́ки суббо́тная но́щь, и неде́ли де́нь, от ча́сти бо нача́ла все́ прие́млется, тре́тие нощеде́нство: се́ де́нь тре́тий. Или́ си́це: В тре́тий ча́с пятка́ ра́спят бы́сть Христо́с. Та́же от шеста́го часа́ до девя́таго тма́ бы́сть, сие́ но́щь ми́ разуме́й, се́ от тре́тияго да́же до девя́таго еди́но нощеде́нство. Та́же па́ки по тме́, де́нь и но́щь пятка́, се́ два́ нощеде́нства. Де́нь суббо́ты, и но́щь ея́ па́ки, се́ три́ нощеде́нства, по евангели́сту глаго́лющему: свита́ющу во еди́ну от суббо́т. А́ще ли в тре́тий обеща́в облагоде́тельствова на́с Спа́с, скоре́йше соде́ла благоде́йство, и та́ко благода́ть, и сла́ва Ему́ во ве́ки веко́в. Ами́нь.

[Сие́ сло́во бы́ше пи́сано по таково́му слу́чаю: Поста́влену бы́ти святи́телю Григо́рию во презви́тера проти́ву си́лы его́ вспомоществова́ти престаре́лому отцу́ его́ епи́скопу Назиа́нстей епи́скопии, по смире́нию и жела́нию созерца́тельнаго живота́ той бы́ше удали́лся в Понт, но вма́ле по́слежде в са́мый день Па́схи возврати́шеся в Назиа́нз и провеща́л сие́ сло́во.]   Воскресе́ния день, и нача́ло де́сно. И просвети́мся торжество́м, и друг дру́га объи́мем. Рцем: «Бра́тие» и ненави́дящым нас[1], не я́ко любве́ ра́ди что сотво́ршым или́ пострада́вшым. И прости́м вся Воскресе́нием, дади́м ми́лость друг дру́гу. Аз же му́чивыйся до́брою му́кою, се бо ны́не прилага́ю. И вы, до́бре му́чившии, а́ще что ми поро́куете опожде́ния, я́ко не́гли бо́льши се и честне́йши Боѓу други́х ско́рости. Бла́го бо и уступи́ти[2] Бо́гу что ма́ло, я́ко Моисе́й он дре́вле, и Иереми́я по́слежде, и притещи́ гото́во зову́щу, я́ко Ааро́н же и Иса́ия. То́чию благоче́стно обоя́, о́во за свою́ не́мощь, о́во же за зову́щаго си́лу. Та́инство[3] пома́за мя, та́инству[4] ма́ло уступи́х, ели́ко себе́ присети́ти. Та́инством[5] совосприходя́, добру́ приноша́ю моему́ боя́зньству и неможе́нию по́мощь день. Да И́же днесь из ме́ртвых воскре́с, и мене́ новотвори́т ду́хом. И в но́ваго обо́лк челове́ка, даст но́вей тва́ри и́же по Бо́зе ражда́емым, зда́теля бла́га и учи́теля, Христо́ви соумерщвя́ема усе́рдно и совоскреша́ема.   Вчера́ А́гнец закала́шеся, и ма́захуся пра́зи, и пла́кася Еги́пет перворо́дных. И нас мину́ губя́й, и зна́мение стра́шно и боя́зненно, и честно́ю кро́вию огради́хомся. Днесь чи́сте убего́хом Еги́пта, и фарао́на го́рькаго влады́ки, и тя́жких приста́вник, и ка́ла и бе́рния свободи́хомся. И никто́же возбраня́яй нас пра́здновати Го́споду Бо́гу на́шему пра́здник исхо́дный. И пра́здновати «Не в ква́се ве́тсе, зло́бе и лука́вства, но в безква́сиих чистоты́ и и́стины»[6], ничто́же принося́ще еги́петскаго и безбо́жнаго вмеше́ния. Вчера́ сраспина́хся Христу́, днесь спрославля́юся. Вчера́ соумерщвя́хся, соживотворя́юся днесь. Вчера́ спогреба́хся, днесь совостаю́.   Но и плодоно́ствуим И́же нас ра́ди пострада́вшему и воскре́сшу. Зла́то мя еда́ непщу́ете глаго́лати, или́ сребро́, или́ поста́вы, или́ ка́мений све́тлых и честны́х, земли́ точа́щи греху́, и до́ле пребыва́ющу, ю́же всегда́ ли́хо и́мут зли́и, и раби́ до́льних и мироде́ржца. Плодоно́сим нас саме́х, пречестно́е Бо́гу зда́ние и при́сное. Отдади́м О́бразу пообра́зное, позна́ем на́шего достоя́ния. Почте́м Первообра́зное, позна́ем та́йны си́лу, и за кого́ Христо́с у́мре. Бу́дем я́ко Христо́с, зане́же Христо́с я́ко и мы. Бу́дем бо́зи Его́ ра́ди, зане́же и он Челове́к нас ра́ди бысть, я́коже изво́ли. Прия́т го́ршее, да возда́ст до́брое. Обнища́, да мы о́наго нището́ю обогати́мся. Ра́бий о́браз взят, да мы свобо́ду во́змем. Сни́де, да мы вознесе́мся. Искуси́ся, да одоле́ем. Безче́ствовася, да ны просла́вит. У́мре, да ны спасе́т. Взы́де, да ны прибли́жит к Себе́, ни́зу лежа́щих в грехо́внем паде́нии. Вся дава́й кто, вся плодоноси́ да́вшему Себе́ избавле́ние за нас и измене́ние. Даст же ни еди́но сицево́ я́коже себе́, та́йны разумева́юща и О́ного ра́ди вся бы́вша, ели́к Он нас ра́ди бывает.   Плодоно́сит у́бо вам, я́коже ви́дите па́стыря[7], [Се бо упова́ет и мо́лится, и от вас тре́бует пови́нных,[8]] па́стырь до́брый, положе́й ду́шу свою́ за о́вцы. И сугу́бь во еди́наго ме́сто дае́тся вам сам и твори́т па́лицу ста́рости - па́лицу ду́ху. И прилага́ет безду́шней це́ркви[9] душе́вную[10], до́брой сей и небе́сной - якову́ю у́бо и коли́ку, но у́бо себе́ честне́йшую, и ту по́ты мно́гими соверше́ную и боле́зньми. [Бу́ди же рещи́, я́ко и боле́знем досто́йну!] И вся прилага́ет вам своя́ си: [О́ великоду́шия, или́ се у́бо и́стиннейше рещи́, любоча́дия!] cеди́нство, ю́ность, це́рковь, Первосвяще́нника, причастода́вца, насле́дника[11], словеса́ я́же любля́сте. И сих, ни е́же всу́е и в возду́х теку́щих и да́же до слу́ха стоя́щих, но и́хже пи́шет Дух и на скрижа́лех вообража́ет ка́менных, си́речь пло́тных. Не от све́рху начерта́емых и оттира́емых, но во глубину́ назна́менуемых; не черни́лом, но благода́тию. Сия́ у́бо вам честны́й Авраа́м, патриа́рх, честна́я гла́ва и гове́йная, и́же всех до́брых вселе́ние, и́же доброде́тели пра́вило, свяще́нству соверше́ние, и́же во́льную же́ртву принесе́ Го́сподеви днесь: единоро́днаго, и́же от обетова́ния.   Вы же плодоноси́те Бо́гу и нам, е́же до́бре па́ствоватися, в ме́сто зла́чно вселя́еми, и на воде́ поко́я воспита́еми. Ве́дуще до́бре Па́стыря, и ве́доми. И после́дующе зову́щу па́стырьски и свобо́дно две́рьми. Чужде́му же не послед́ующе, прела́зящу дворо́м разбо́йнически же и наве́тнически. Ниже́ чужда́го гла́са послу́шающе, подкра́дающа и разсева́юща от и́стины в го́ры и пусты́ни, и про́пасти, и ме́ста, я́же не посеща́ет Госпо́дь, и от здра́выя у́бо ве́ры отводя́ща е́же во Отца́ и Сы́на и Свята́го Ду́ха, еди́ного Божества́ и си́лы, Его́же услы́шаша при́сно глас, и слы́шат моя́ о́вцы. Словесы́ же скве́рными и растле́нными, кра́дующа и разсыпа́юща от и́стиннаго и пе́рваго Па́стыря. И́хже бу́ди всех нас, и па́стыря, и па́ству, я́ко неду́жны па́жити и сме́ртны, дале́че и пасо́мых и пасу́щих, еди́но бы́ти всем о Христе́ Иису́се, ны́не же и во о́ном поко́и, Ему́же сла́ва и держа́ва во ве́ки. Ами́нь.

Иже во святых отца нашего Иоанна, Архиепископа Константинопольскаго, Златоустаго, слово Огласительное во святый и светоносный день преславнаго и спасительнаго Христа́ Бога нашего Воскресе́ния.

А́ще кто благочести́в и боголюби́в, да наслади́тся сего́ до́браго и све́тлаго торжества́. А́ще кто раб благоразу́мный, да вни́дет ра́дуяся в ра́дость Го́спода своего́. А́ще кто потруди́ся постя́ся, да восприи́мет ны́не дина́рий. А́ще кто от пе́рваго часа́ де́лал есть, да прии́мет днесь пра́ведный долг. А́ще кто по тре́тием часе́ прии́де, благодаря́ да пра́зднует. А́ще кто по шесто́м часе́ дости́же, ничто́же да сумни́тся, и́бо ничи́мже отщетева́ется. А́ще кто лиши́ся и девя́таго часа́, да присту́пит, ничто́же сумня́ся, ничто́же боя́ся. А́ще кто то́чию дости́же, и во единонадеся́тый час, да не устраши́тся замедле́ния: любочести́в бо Сый Влады́ка, прие́млет после́дняго я́коже и пе́рваго: упокоева́ет в единонадеся́тый час прише́дшаго, я́коже де́лавшаго от пе́рваго часа́. И после́дняго ми́лует, и пе́рвому угожда́ет, и о́ному дае́т, и сему́ да́рствует, и дела́ прие́млет, и наме́рение целу́ет, и дея́ние почита́ет, и предложе́ние хва́лит. Те́мже у́бо вни́дите вси в ра́дость Го́спода своего́: и пе́рвии и втори́и, мзду приими́те. Бога́тии и убо́зии, друг со дру́гом лику́йте. Возде́ржницы и лени́вии, день почти́те. Пости́вшиися и непости́вшиися, возвесели́теся днесь. Трапе́за испо́лнена, наслади́теся вси. Теле́ц упита́нный, никто́же да изы́дет а́лчай, вси наслади́теся пи́ра ве́ры: вси восприими́те бога́тство бла́гости. Никто́же да рыда́ет убо́жества, яви́ся бо о́бщее Ца́рство. Никто́же да пла́чет прегреше́ний, проще́ние бо от гро́ба возсия́. Никто́же да убои́тся сме́рти, свободи́ бо нас Спа́сова смерть. Угаси́ ю́, И́же от нея́ держи́мый. Плени́ а́да, Соше́дый во ад. Огорчи́ его́ вкуси́вша пло́ти Его́. И сие́ предприе́мый Иса́иа возопи́: ад, глаго́лет, огорчи́ся, срет Тя до́ле. Огорчи́ся, и́бо упраздни́ся. Огорчи́ся, и́бо пору́ган бысть. Огорчи́ся, и́бо умертви́ся. Огорчи́ся, и́бо низложи́ся. Огорчи́ся, и́бо связа́ся. Прия́т те́ло, и Бо́гу прирази́ся. Прия́т зе́млю, и сре́те Не́бо. Прия́т е́же ви́дяше, и впаде́ во е́же не ви́дяше. Где твое́, сме́рте, жа́ло? где твоя́, а́де, побе́да? Воскре́се Христо́с, и ты низве́рглся еси́. Воскре́се Христо́с, и падо́ша де́мони. Воскре́се Христо́с, и ра́дуются А́нгели. Воскре́се Христо́с, и жизнь жи́тельствует. Воскре́се Христо́с, и ме́ртвый ни еди́н во гро́бе. Христо́с бо воста́в от ме́ртвых, Нача́ток усо́пших бысть. Тому́ сла́ва и держа́ва, во ве́ки веко́в. Ами́нь.

И а́бие, пое́м тропа́рь Иоа́нна Златоу́стого, глас 8:

Уст твои́х, я́коже све́тлость огня́ возсия́вши, благода́ть вселе́нную просвети́: не сребролю́бия ми́рови сокро́вища сниска́, высоту́ нам смиреному́дрия показа́, но твои́ми словесы́ наказу́я, о́тче Иоа́нне Златоу́сте, моли́ Сло́ва, Христа́ Бо́га, спасти́ся душа́м на́шим.

Воста́ в тре́тий день Госпо́дь наш Иису́с Христо́с, жизнь ми́рови дая́. И се е́тери от кустоди́и ре́ша, прише́дше ко иуде́ом: «Воста́ от ме́ртвых Иису́с, реко́мый Христо́с». Глаго́лаша иуде́и: «То почто́ не я́сте Его́?» Глаго́лаша во́ини: «Вы держа́вше Его́, ки́й прибы́ток име́сте? Но то́чию тщету́ душ ва́ших. Той бо рече́, я́ко умре́ти Ми есть, и в тре́тий день воста́ти. И то сконча́, со мно́гою сла́вою воста́в из ме́ртвых». Глаго́лаша жи́дове: «Вы да́ры взя́сте от учени́к Его́, и да́сте те́ло Его́». Отвеща́ша во́ини: «Вы такова́го неве́рия и́мате законопресту́пницы, тому́ не ве́ровасте глаго́лющу, я́ко пострада́ти ми есть, и в тре́тий день воста́ти. Го́ре вам о́ жи́дове, я́ко ны́не прише́л есть, и не ве́ровасте Ему́. Сего́ ра́ди Ему́ прише́дшу, да сбу́дутся кни́ги вся глаго́лющыя Его́ ра́ди. Егда́ же прии́дете на второ́е Его́ прише́ствие, что сотвори́те; Го́ре вам в той день. Ка́коже держа́ти Его́ можа́хом, ме́ртви бы́вше от стра́ха сла́вы Его́. Егда́ бо воста́, сотрясе́ся ме́сто от основа́нии, и во́инства а́нгел объидо́ша гроб Его́. И приступи́в еди́н а́нгел, отвали́ ка́мень от две́рий гро́ба, и се́ изы́де Иису́с, я́ко жени́х из черто́га, и я́коже мо́лния блиста́ющи. И услы́шахом а́нгела глаго́люща к жена́м: «Не бо́йтеся вы, иде́те и рцы́те ученико́м Его́, я́ко воста́ из ме́ртвых, и се́ варя́ет вы в Галиле́и, и ту И́ у́зрите». Се́ у́бо в Галиле́и есть, а́ще си́льни есте́, ше́дше ими́те Его́. Се́ реко́х[ом] вам и́стину, ю́же от а́нгела слы́шахом». Жи́дове слы́шавше, я́ко ме́ртви бы́ша. И совеща́вше, сребро́ да́ша мно́го во́ином. И моли́ша их, глаго́люще: «Рцы́те, я́ко ученицы́ Его́ но́щию прише́дше украдо́ша И́, нам спя́щым. Да а́ще услы́шано се́ бу́дет у кня́зя, мы увеща́ем его́, и вас без печа́ли сотвори́м». О́ беззако́нницы жи́дове, всего́ ми́ра кто увеща́ет. Го́ре вам окая́ннии, я́ко совеща́сте сове́т зол, я́ко ча́да нарече́ни бы́сте, и пси яви́стеся. Го́ре вам жестосе́рдии и необре́заннии, я́ко лю́дие Госпо́дни су́ще, во́лцы бы́сте. И зу́бы изостри́сте на А́гнца Бо́жия, и чу́жди сла́вы Его́ бы́сте. Го́ре вам неразу́мивии, я́ко возлюби́сте а́да, и ве́чнаго огня́. Ад бо, егда́ изы́дут в сокро́вищах его́, вас в тех ме́сто ждет, глаго́ля: еда́ почи́ет кто от жи́дов, и́же на Го́спода ру́це простро́ша, и мене́ плене́на сотвори́ша. А́ще бо они́ не бы́ша совеща́ли на Го́спода зло, не бо́ им аз сели́ка прия́л. Егда́ прииму́ их, сведу́ их в преиспо́дних, иде́же оте́ц их диа́вол, затворе́н во огни́ ве́чнем и че́рвии неусыпа́еме, да навы́кнут не воева́ти на Го́спода сла́вы, ни да глаго́лют на Го́спода непра́вду. Го́ре вам окая́ннии жи́дове, я́ко свет оста́вльше, тму возлюби́сте. Вас бо де́льма рече́ Иса́ия проро́к: «Го́ре полага́ющым свет во тму, и тму во свет: и глаго́лющым го́рькому сла́дко, и сла́дкому го́рько». Го́ре вам жи́дове, егда́ у́зрите Дре́во, на не́мже Го́спода распя́сте, всего́ ми́ра покланя́ющася ему́. И в день воста́ния Го́спода гряду́ща по облако́м небе́сным, а́нгелми честь прие́млюща, и вас осу́дяща. Го́ре вам жи́дове, я́ко совеща́сте сове́т зол, умори́ти неумира́ющаго. То́йже живе́т во ве́ки ве́ка, и вы неве́рием умро́сте. То́йже во ве́ки ца́рствует, и вас во ве́ки и́мать му́чити, не ве́рующих Ему́. Но мы се́ оста́вльше злому́дренных жидо́в, к Госпо́дню Воскресе́нию с весе́лием потеце́м. Воскре́се Госпо́дь из ме́ртвых, и срето́сте Его́ две жене́, Мари́я Магдалы́ни, и друга́я Мари́я, я́же есть ма́ти Иису́сова. Пла́касте же ся, не обре́тше те́ла Госпо́дня. И сре́тшии Го́спода о́бе Мари́и, пе́рвее от Него́ ра́дость прия́сте, и отъидо́сте во своя́ си, ра́дость прии́мше от Влады́ки всея́ тва́ри. Магдалы́ни же Мари́я па́ки на гроб прии́де, и не обре́тши Его́, глас а́нгельск слы́ша. Второ́е же и от Го́спода слы́ша, я́ко рече́ варя́ю вы в Галиле́и. И обра́щьшися, узре́ Го́спода стоя́ща, мня́щи вертогра́даря су́ща, вопроша́ше Его: «А́ще све́си, где Госпо́дь положе́н есть?» Иису́с же рече́ к ней: «Мари́е, что ся пла́чеши, и кого́ и́щеши?» Уста́вися от пла́ча, ра́дость прии́мши. Иде́же ра́дость, бежи́т се́тование и скорбь. Иде́же ра́дость, весе́лия о́брази. Аз есмь Иису́с, Сын Де́выя. Аз есмь Иису́с, Победи́тель а́да. Аз есмь Иису́с, победи́вый всего́ ми́ра. Аз есмь Иису́с, попра́вый смерть. Аз есмь Иису́с, испрове́ргий а́да. Аз есмь Иису́с, благовести́вый ме́ртвым наде́жду воста́ния. Аз есмь Иису́с, стерпе́вый пропя́тие за спасе́ние ми́ра. Аз есмь Иису́с, воста́вый из ме́ртвых в тре́тий день, я́коже рех пе́рвее: не́бо и земля́ ми́мо и́дет, а словеса́ Моя́ не пре́йдут. Аз есмь Иису́с, крестя́щымся Краси́тель. Мене́ ра́ди Па́вел возопие́т: «Ели́цы во Христа́ крести́стеся, во Христа́ облеко́стеся». Аз есмь Иису́с, ми́рный Да́тель, и весе́лия Пода́тель. Уста́витеся от слез, в ра́дость облеце́теся. Уста́витеся от пла́ча, и апо́столом благовесту́йте. Сей день, во́ньже отъя́т сле́зы от вся́каго лица́. Сей день побежде́ния сме́ртнаго живо́т а́дским. Сей день, во́ньже Пе́рвенец из ме́ртвых воста́х, и ра́дость ми́рови пода́х. Сей день, во́ньже Петро́ви и апо́столом ва́ми нареку́ю Моего́ Воскресе́ния благове́щения. Ше́дше бо рце́те бра́тии мое́й и Петро́ви, я́ко воста́л есмь от ме́ртвых, и ту варя́ю вас в Галиле́и, ту Мя ви́дите. Ви́де ли благосе́рдия Влады́ки, ни еди́наго же ученика́ и́мя нарече́, то́кмо петро́во. Почто́ Го́споди, того́ еди́наго и́мя нарече́? Послу́шай, почто́ того́ еди́наго и́менем нареко́х: а́ще случи́тся нам с Тобо́ю умре́ти, не отве́ржемся Тебе́. Но сие́ рек, отве́ржеся три́жды, и раска́явся пла́кася го́рько. Боя́тися у́бо и́мать пред лице́ Мое́ приити́, мня не отпуще́на греха́ его́. Сего́ ра́ди рех: «и Петро́ви», да безсумне́ния со ученики́ Мои́ми прии́дет и у́зрит мя. Рцы́те и Петро́ви, ника́коже устраши́тся: не ума́лих бо тя от ли́ка сла́вы, не сотвори́х тя ме́ньша ли́ка апо́стольскаго. А́ще Иоа́нна люблю́, и тому́ я́ко чи́сту на Кресте́ преда́х Ма́терь Мою́, но и тебе́ дах ключи́ Ца́рствия Небе́снаго. Не устраши́ся у́бо приити́ ко Мне́. Е́же бо а́ще свя́жени на земли́, бу́дет свя́зано на небесе́х. Не бо́йся Пе́тре, не отста́вих тя от первоседа́ния со ученики́ Мои́ми. Е́же бо ти обеща́ю и конча́ю. На ка́менней бо ти ве́ре сози́жду си Це́рковь, и врата́ а́дова не одоле́ют ей. Ты упасе́ши Ми о́вцы, ты упасе́ши Ми а́гнцы, ты ста́неши одесну́ю Мене́, я́ко чинонача́льник. Не бо́йся, зане́же ся Мене́ отве́рже. Ви́дех бо сле́зы твоя́, и отпусти́х ти согреше́ния. До́бро бы бы́ло Иу́де, а́ще бы ся пока́ял, а не возве́сился, ка́ющих бо ся есмь Бог. Сего́ ра́ди снидо́х на зе́млю, да покая́ние ми́рови пода́м. Мытаре́м и блудни́цам толи́ка мно́жества грехо́в отпусти́х, а тебе́ ли еди́наго не отпусти́х. Аз ка́ющихся люблю́. Помяни́ я́ко прослези́хся за Иу́ду, не хоте́х да поги́бнет. Добро́ бы бы́ло ему́, егда́ сре́бреники пове́рг в це́ркви, а́ще бы пока́ялся, а не возве́сился. Но поне́же без покая́ния пребы́сть, сего́ ра́ди ве́чно му́чится. Ты же не бо́йся, ви́дех бо сле́зы твоя́, и отпусти́х ти грехи́. Дави́ду дво́е зло сотво́ршу, прелюбодея́ние и уби́йство, отпусти́х, и на пе́рвый сан проро́чества поста́вих. И тебе́ оста́вившему дом и жену́ и ладию́, еди́наго ли греха́ не оста́влю. Не бо́йся Пе́тре, Аз есмь реки́й: «Ра́дость быва́ет на небеси́ о еди́ном гре́шнице ка́ющемся». Аз есмь реки́й: «Прииди́те ко Мне вси тружда́ющиися и обремене́ннии, и Аз поко́ю вы». Добро́ бы бы́ло Иу́де, а́ще бы возврати́лся ко Мне, а не обяза́лся у́жем удавле́ния, и сам ся погуби́л. И грех его́ на Кресте́ бых пригвозди́л, себе́ у́бо пови́нен бысть, но и не прокля́х его́, па́че же та́коже умы́х ему́ но́зе, я́коже и други́м, и хлеб пода́х. И ника́коже ему́ пои́м твори́х, дабы́ прише́л в покая́ние, и не хоте́х сего́ ра́ди му́читися ему́ ве́чно. Ты же пока́явся, не бо́йся яви́ти ми ся со ученики́ мои́ми. Тольма́ тя не ума́лих Пе́тре, я́ко и стень твой исцели́т неду́жныя. Я́ко и убру́сцы и по́яси прожену́т бе́сы, и каса́ние руки́ твоея́, от ро́да хрома́го на тече́ние убы́стрит. И воста́вше ученицы́, идо́ша с ра́достию в Галиле́ю, на го́ру на ню́же повеле́ им Иису́с. И ви́деша Его́, поклони́шася Ему́. И сбы́сться все проро́чество, е́же Его́ ра́ди, о стра́сти и о погребе́нии, и о Воскресе́нии Иису́сове Христа́ Бо́га на́шего. Се́ все пострада́ нас ра́ди безстра́стный, да ны сотвори́т насле́дники безстра́стия. Мир ми́рови пода́в, и весе́лие и ра́дость дарова́в Це́рквам. Ца́рствие Небе́сное ве́рным обеща́в. Побе́дище непобеди́мо Крест нам дарова́. Кто ся не и́мать диви́ти вели́цей сей та́йне я́же о нас; Кто не и́мать просла́вити пригвожде́наго на нем; Кто не и́мать поклони́тися воскре́сшему из ме́ртвых; Кто не и́мать воспе́ти упраздни́вшаго Кресто́м жа́ло сме́рти; И а́ще хо́щеши уве́дети си́лу крес́тную, послу́шай разу́мно: Крест бесо́м прогони́тель. Крест побе́да на дия́вола. Крест христия́ном похвала́. Крест царе́м возвелича́ние. Крест влады́кам возноше́ние. Крест князе́м си́ла. Крест ору́жие на ра́тных. Крест покро́в ве́рным. Крест спасе́ние душа́м. Крест огражде́ние Це́рквам. Крест свобо́да крести́вшымся. Крест красота́ христия́ном. Крест благоле́пота ве́рным. Крест ору́жие на враги́. Крест сохра́нник ве́рным. Сим зна́мением сте́ны супоста́тных па́дают. Сим зна́мением бе́си ги́бнут. Все покаря́ется дре́ву кре́стному, си́лою распя́таго на нем. И не то́чию ны́не побежда́ет о́браз кре́стный ра́тных, но и пе́рвее сего́ побежда́ше и одолева́ше. Да ся почуди́ши, я́ко какову́ си́лу и́мать Крест. Я́ко и о́браз начерта́ше, побежда́ше проти́вных полки́. И разуме́й о́браза си́лу: желз моисе́ов, о́браз имя́ше Креста́. Я́коже рече́ Па́вел апо́стол: пия́ху бо от духо́внаго после́дующаго ка́меня, ка́мень же бе Христо́с. Жезл бе́яше о́браз Креста́, коли́ко сотвори́ проти́вным у́бо злове́рным жидо́м: ре́ки еги́петския Моисе́й жезло́м на кровь преложи́в. И пру́ги, и хру́сты, и град, тму осяжи́му, и мглу, и смерть пе́рвенец, жезло́м нанесе́. На не́же бо нанесе́н быва́ше жезл, ту побе́да явля́шеся. Жезло́м возврати́л Бог род евре́йский от лю́тыя рабо́ты: крес́тный о́браз их спасл, и и́стине ся не поклони́ша. Егда́ сквозе́ мо́ре чермно́е проидо́ша, ничто́же имя́ше Моисе́й, то́кмо зна́мение кре́стное. И се фарао́н, жены́й по них со мно́гим ору́жием, и мно́жеством безчи́сленным муже́й хра́брых, мо́ре ви́дев не убоя́ся: жезла́ же моисе́ова ви́дев о́браз, и убоя́ся. Незия́ющая пучи́на раздра́ся, и многоше́потный глас волн разступи́ся. Неудержа́нная пучи́на морска́я стена́ одесну́ю, и стена́ ошу́юю им бысть. Да сия́ спасло́, о́ны же погуби́ло. Разуме́ ли о́браза си́лу, поклони́ся кре́стней и́стине. Слы́ша ли о́браза явле́ние, в честь име́й явле́ние и́стине. Предзря́ Моисе́й Креста́, хотя́ща сия́ти по вселе́нней, тем о́бразом вся побежда́ше. И егда́ посла́ Иису́са На́ввина бра́тися с супоста́ты, просте́ртием ру́ку креста́ образу́я, крепля́ше Иису́са на враги́ и побежда́ше. Те́мже креста́ о́браз побе́ды, и при Моисе́и явля́шеся. Мно́го у́бо есть сло́во е́же о Кресте́, и неизрече́нна си́ла его́. Мно́го ся потща́ дия́вол поста́вити креста́, не ве́дый си́лы его́. И егда́ ста, не мо́же воззре́ти нань. И покланя́ющиися Кресту́, побежда́ют дия́вола. Всеси́лен есть Крест, все бла́го творя́, от всех покланя́ние прие́млет. И виждь благодея́ния его́: а́ще кто нищь есть: и помо́лится ему́, и а́бие дом его обогати́тся. Ин посреде́ мо́ря вла́емь, и бу́рею прибива́емь, намене́нием кре́стным в ти́хо приста́нище приста́нет. Ин бы́стриною ре́чною носи́мь, намене́нием кре́стным цел на су́хо пре́йдет. Други́й на тре держи́м за вся́ку беду́, или́ во́льною, или́ нево́льною, Креста́ помо́щника призове́т, от тоя́ беды́ свобо́дь быва́ет. Ин мно́жеством грехо́в объя́т, намене́нием кре́стным от бу́ри согреше́ний спасе́н бысть, и в ми́рно приста́нище до́йдет. Е́же есть Крест, Христо́с Бог наш пригвожде́нный на нем, и во гроб положе́н, и из ме́ртвых воста́, просвети́в вся́ческая. Тому́ сла́ва со Отце́м и со святы́м Ду́хом, ны́не и при́сно и во ве́ки веко́в, Ами́нь.

И́же у́бо вне́шних по́двигов зри́тель, егда́ не́коего до́блественна подви́жника или́ вене́чника отне́куды прише́дша уве́дят, стека́ются вси е́же уве́дети его́ борения, и худо́жество, и кре́пость всю. И уви́диши у́бо все испо́лнено позо́рище тем мно́гых. И всех та́мо и теле́сныя и мы́сленыя простира́ющых очеса́, я́ко бы ничему́же их о быва́емых претещи́.

И мусики́и же а́ще кто чу́ден прии́де во град, та́коже са́ми си́и соверша́ют позо́рище. И вся оста́вльше я́же в рука́х ну́жная мно́жицею су́ща и потре́бнейшая, ожида́юще сидя́т. И со мно́гым тща́нием пе́сней, и бреца́ней слы́шаще. И обои́х истязу́юще согла́сие. И сия́ у́бо неве́жди.

Ри́торских же иску́снии словеси́, и си́и па́ки о премудреце́х сие́ и́стое де́йствуют. Суть есть бо и сим зри́тели и слы́шатели. И бряца́ния из рук, глаго́лемых кре́пость.

А́ще же ри́торских и свире́льствующых и подви́жных муже́й, о́вех у́бо зри́тели, о́вех вку́пе зри́тели и слы́шатели, с толи́ким седя́т усе́рдием, коли́ко у́бо нам и тща́ние и усе́рдие пра́веднии бу́дете подая́ти.

Не свире́льнику не́коему, ниже́ премудрецу́ ны́не в по́двизе седя́щу, но му́жу от небе́с веща́ющу и вопию́щу, и трубы́ светле́йши испуща́ющу глас.

Всю вселе́нную держа́ и дости́же, и напо́лни вопие́нием. Не тем е́же вельми́ воскрича́ти, но е́же с боже́ственою благода́тию подви́гнути язы́ка. И е́же у́бо чу́днейше, я́ко су́щее си́це вели́ко вопие́ние несть же́стоко не́кое, ниже́ несла́достно, но вся́кого мусике́йскаго согла́сия сла́достнейше и жела́тельнейше, и наслажда́ти ве́дуще мно́жае, и к сим всем и святе́йше и грозгне́йше , и толи́ких по́лно су́ще неизрече́нных, и толи́ка нося́ще бл́ага, я́же со опасе́нием и усе́рдием приема́ющих и сохраня́ющих несть про́чее челове́ком бы́ти и на земли́ пребыва́ти, но вы́ше всех стоя́ти жите́йских и ко а́нгельскому причита́емым жре́бию я́коже на небеси́ си́це и на земли́ жи́ти.

Гро́мов бо сын. Возлю́бленый Христо́в столп су́щим по вселе́нней це́рквам име́яй ключа́ небеси́. Пи́вый ча́шу Христо́ву и креще́нием крести́вся возлеги́й на пе́рси Влады́чни с дерзнове́нием многым. Сей нам вхо́дит ны́не не притворе́ние прочита́я ниже́ ли́чною кры́я главу́, не такова́ бо рече́т, ниже́ на высо́ко ме́сто восходя́, ниже́ пляси́лище ного́ю ударя́я, ниже́ оде́жею укра́шен злато́ю. Но вхо́дит оде́жду име́я, неизрече́нную добро́ту име́ющу.

Во Христа́ у́бо облече́н нам яви́ся. Но́зи обуве́н красны́ми. Во угото́вании благовествова́ния ми́ра по́яс не о пе́рсех име́я, но о чре́слех. Не от ко́жи черле́ны, ниже́ свы́ше пома́зан зла́том, но от и́стины истка́н и сложе́н от нея́ – си́це нам яви́ся ны́не. Не лицеме́рие име́я, ниже́ бо лицеме́рие от него́, ниже́ мечта́ние и ба́сни, но наго́ю главо́ю возвести́ и́стинну. Не ин у́бо сый, и́на же о себе́ слы́шащих увещева́я об́разом, зре́нием, гла́сом, не орга́на ко извеще́нию тре́буя, си́речь гу́слей или́ ли́ры, или́ не́коего таковы́х ина́го, но вся язы́ком соде́ловает. Вся́кого у́бо гу́сельника вся́кия же мусики́я сла́достнейши и потре́бнейшь глас испуща́я.

Есть же ему́ предски́ние у́бо – не́бо, все позо́рище же – Вселе́нная, зри́тели же и слы́шатели – вси а́нгели и от челове́к ели́цы у́бо а́нгели случа́ются су́ще или́ бы́ти жела́ют, си́и бо еди́ни его́ опа́сне возмо́гут слы́шати согла́сия. И де́лы саме́ми показа́ти, и послу́шателем бы́ти яковы́м же бы́ти подоба́ет. Поне́же у́бо ини́и вси я́коже отроча́та ма́лая слы́шат у́бо. Не ве́дят же, я́же слы́шат, но о пиро́зех устраша́ются и игра́нии де́тскими. Си́це у́бо и си́и, смею́щеся наслажа́ющеся бога́тством и могу́тством и обьяда́ющеся, слы́шат у́бо не́когда рече́нных, ве́лие же ничто́же, ниже́ высо́ко де́лы показу́ют, но я́коже ка́лу и пли́нфом рабо́тают и пригвожда́ют себе́.

Сему́ же апо́столу го́рняя си́лы предстоя́т, ужаса́ющеся о добро́те его́ души́ и ра́зуме и красоте́ доброде́тели, е́юже и той привлече́ Христа́ и духо́вную прия́т благода́ть.

Я́коже бо не́кую ли́ру благосложе́ну и ка́мением украше́ну и златы́м име́ющу веща́ния, си́це свою́ угото́вил душу. Да не́ю ве́ле не́что и высо́ко возшуме́ти ду́ху. Я́коже у́бо не ктому́ ры́барю, ниже́ сы́ну Зеведе́ову, но и́же глубины́ ве́дящему ду́ху, глаго́лю в сию́ обряца́ющу ли́ру, си́це да слы́шим.

Ничто́же бо челове́ческо нам рече́т, но от бездн духо́вных я́же у́бо глаго́лет, неизрече́нных оне́х, я́же ниже́ а́нгели пре́же да́же сему́ бы́ти ве́дяху. С на́ми бо и си́и Иоа́нновым гла́сом и на́ми уви́деши е́же позна́хом. И сие́ изъяви́л есть ин апо́стол рек «да позна́нна ны́не бу́дут нача́лом и вла́стем це́ркови? многоразли́чная прему́дрость Бо́жия» .

А́ще у́бо и нача́ла и вла́сти и херуви́ми и серафи́ми це́рковию уви́деша сия́. Благоявле́нно, я́ко и си́и со мно́гою зе́льностию о сем потща́шася послуша́нии. И́бо и сим почте́ни бы́хом нема́ло, е́же с на́ми а́нгелом навы́кнути е́же не ве́дяху. А е́же и на́ми вя́щше, и не у́ еще́ реку́, кото́рым или́ каковы́м су́щым нам.

Мно́го у́бо да подади́м и мы молча́ние со благочи́нием, не днесь то́кмо, ниже́ в день во́ньже слы́шим, но чрез все житие́. Поне́же у́бо вы́ну послу́шати его добро́ есть. А́ще у́бо я́же в ца́рских быва́ема и жела́ем ве́дати, си́речь что рече́, что сотвори́, что совеща́ о нача́льствуемых царь, а́ще и мно́жицею ничи́мже нас по́льзуют, мно́го паче я́же Бог рече́ возжеле́нна слы́шати и наипа́че, егда́ нам вся поле́зна суть.

Сия́ же вся со опасе́нием нам сей рече́т. Друг самого́ Царя́ сый. Па́чеже и Его́ име́я в себе́ глаго́люща, и от Него́ вся слы́ша, я́же от Отца́ Он. «Вас бо рех друго́в, - рече́, - зане́ вся я́же слы́шах от Отца́ Моего́ сказа́х вам» . Я́коже у́бо а́ще бы не́коего свы́ше от верха́ небе́с прини́кше внеза́пу ви́дели бы́хом и обеща́ющася я́же та́мо со опасе́нием рещи́, вси у́бо притекли́ бы́хом, си́це и ны́не да соверша́ем. Отоню́ду бо нам муж сей бесе́дует. Несть бо от ми́ра сего́, я́коже рече́ и сам Христо́с: «Вы не́сте от ми́ра сего́» . Но и Уте́шителя име́ет веща́юща в себе́, И́же везде́ су́щаго, И́же си́це опа́сне ве́дящаго глубины́ Бо́жия, я́коже своя́ весть челове́ческая душа́, Ду́ха святы́ни, Ду́ха пра́вды Влады́чественна, Наставля́юща на небеса́ творя́щаго очеса́ ина́я устрая́ющаго бу́дущая я́ко настоя́щая зре́ти и с пло́тию я́же на небесе́х созерца́ти подаю́щаго.

Мно́го у́бо да подае́м безмо́лвия ему́ вы́ну жития́. Никто́же лени́в, никто́же сонли́в, никто́же скверне́н зде вшед да пребыва́ет. Но да преложим себе́ к небеси́. Отту́ду бо сия́ веща́ет жи́тельствующим та́мо. И а́ще пребу́дем на земли́, ничто́же приобрета́ем отсю́ду ве́лия. Ничто́же бо к нехотя́щым свободи́тися сви́нскаго жития́ глаго́лы Иоа́нновы, я́коже у́бо ниже́ ко о́ному я́же зде.

Гром у́бо ужаса́ет на́шых душ незна́менит име́ющь шум. Сего́ же глас смуща́ет у́бо ни еди́ного же ве́рных, но и ослабля́ет молвы́ и смуще́ния, ужаса́ет бесо́в еди́ных и оне́м рабо́тающи.

Я́ко у́бо да уви́дим, ка́ко их ужаса́ет, мно́го да подае́м молча́ние. И е́же отвне́, и е́же в мы́сли, и сие́ наипа́че. Ка́я бо по́льза усто́м молча́щим, егда́ душа волну́ется и мно́гу име́ет бу́рю. О́но аз взыску́ю безмо́лвие е́же от мы́сли, е́же от души́, поне́же у́бо и слу́ха о́ного тре́буя. Тако́в бо нам сей мусики́й.

Ниже́ еди́но у́бо да стужа́ет име́ней вожделе́ние, ниже́ сла́вы раче́ние, ниже́ я́рости наси́льство, ни ины́х страсте́й про́чий наро́д. Несть бо не очи́щшемуся слуху ви́дети глаго́лемых высоту́ я́коже ви́дети подоба́ет, ниже́ разуме́ти я́коже досто́ит та́инств сих стра́шное и неизрече́нное и ину́ю вся́кую доброде́тель, ю́же в боже́ственых сих зако́нех.

А́ще бо песнь свире́льную и гу́сельную не у́бо кто уве́сть до́бре не вся́чески спротя́г ум, ка́ко та́инственых гла́сов седя́ слы́шатель послу́шати возмо́жет ле́ностною душе́ю?

Сего́ ра́ди и Христо́с нака́зываше глаго́ля: «Не дава́йте свята́я псом, ниже́ пове́рзите би́сер пред сви́ниями» . Би́серы же сия́ глаго́лы нарече́. А́ще и многоче́стнейша сих су́ща, сим же сия́ приложи́л есть, поне́же сея́ ве́щи несть нам и́на честне́йша. Сего́ ра́ди и сла́дость их ме́ду мно́жицею уподобля́ти обы́че, не поне́же толи́ко ея́ ме́ра то́кмо, но зане́ сего́ ничто́же есть и́но сла́достнейше у нас.

Поне́же я́ко и ка́меней естества́ честны́х и вся́кого ме́да сла́дость по мно́гому одолева́ет вели́честву, услы́ши проро́ка глаго́люща о них и премно́жество сие́ показу́юща вожделе́нна бо, рече́: «Па́че зла́та и ка́мени че́стна мно́го, и сладчайша па́че ме́да и со́та» , но здра́вствующым, те́мже и приведе́: «И́бо раб твой храни́т я́» . И́нде па́ки рек сия́ сла́дка, приложи́л есть: «Горта́ни моему́». Не про́сте сла́дка, но «Па́че ме́да сла́дка бо, - рече́, - горта́ни моему́ словеса́ твоя́» . И вели́чество па́ки соблюда́ет глаго́ля: «Па́че ме́да и со́та усто́м мои́м» , поне́же у́бо зело́ здра́вствова.

Да не у́бо ниже́ мы неду́гующе прихо́дим к сим, но исцели́вше ду́шу, си́це да прии́мем бра́шна. Сего́ бо ра́ди толи́ка вам рех, не у́ вложи́х врачева́ния сия́, да ко́ждо вся́кого отложи́в неду́гования о́браз, я́коже в са́мое входя́ не́бо, си́це да вхо́дит чист и я́рости, и попече́ния, и боя́зни жите́йския, и ины́х свобожде́н страсте́й.

Несть бо и́нако приобрести́ не́что ве́лие отсю́ду, не пе́рвие си́це очи́щьшу ду́шу. И да не глаго́лет ми не́кто, я́ко кра́тко вре́мя е́же посреди́ собра́ния бу́дущаго. Леть бо не в пяти́х то́кмо дней, но и во еди́ном часце́ преложи́ти житие́ свое́.

Что бо рцы ми разбо́йника иму́ же уби́йцы го́рши? Не после́дний ли сей зло́би вид есть?

Но оба́че в коне́ц доброде́тели вско́ре дости́же и в са́мый отъи́де рай. Не дней потре́бовав, ни по́лу дни, но кра́ткаго часца́. Я́коже у́бо леть есть внеза́пу преложи́тися и бы́ти зла́ту в ме́сто бре́наго, поне́же не естество́м я́же доброде́тели и зло́бы суть и́хже удо́бно преложе́ние и вся́кия ну́жди свобожде́но. «А́ще хо́щете и послу́шаете мене́, - рече́, - блага́я земли́ сне́сте» .

Зри́те ли я́ко хоте́ния нам тре́ба есть еди́наго. Хоте́ния не о́бщаго сего́ то́кмо глаго́лю, но потща́тельнаго, поне́же всех вем на не́бо хотя́щих ны́не возлете́ти. Но де́лы подоба́ет хоте́ние показа́ти.

И́бо и купе́ц хо́щет богате́ти. Но не домы́сли, е́же хоте́ти поставля́ет, но и кора́бль уготовля́ет, и собира́ет кора́блеников, и призыва́ет ко́рмчия, и ины́ми все́ми сострая́ет кора́бль, и зла́та заи́мствует, пла́вает пучи́ну, и в чужду́ю отхо́дит зе́млю, и беды́ претерпева́ет мно́ги, и и́на вся я́же ве́дят мо́ре пла́вающии. Си́це и вам подоба́ет хоте́ние показа́ти.

Пла́ваем бо и мы пла́вание. Не е́же от земли́ в зе́млю, но е́же от земли́ на небесе́.

Да пригото́вим у́бо по́мысл наш ко окормле́нию прили́чному, горе́ нося́щему, и кора́блеников ему поко́рных, и кора́бль кре́пок да угото́вим. Я́ко бы ниже́ обстоя́нием, ни печа́лию потопля́тися жите́йскою, ниже́ горды́ни взима́тися духом, но до́бре опоя́сану бы́ти и легку. А́ще у́бо си́це кора́бль, си́це же ко́рмчия и корабле́ников пригото́вим. Благополу́чно пла́ваем, и Сы́на Бо́жия и́стиннаго Ко́рмчия привлече́м к себе́. И́же не оста́вит погре́зитися ло́дии на́шей. Но а́ще и безчи́слении возве́ют ве́три, и ве́тром запрети́т, и мо́рю, и в ме́сто возмуще́ния мн́огую соде́лает тишину́. Пригото́вивше у́бо са́ми себе́ си́це: в приходя́щий день прииди́те в це́рковь, а́ще у́бо восхо́щете потща́тельно вам не́что от потре́бных услы́шати и положи́ти в ду́шу.

Никто́же пут да бу́дет, никто́же ка́мень, никто́же те́рния испо́лнен. Да сотвори́м собе́ нововзора́ния. Си́це бо и мы со усе́рдием се́мена низве́ржем, а́ще уви́дим зе́млю чи́сту. А́ще ка́менну и же́стоку, прости́те не хотя́щим ту́не тружа́тися.

А́ще бо е́же се́яти оста́вльше, еа́чнем те́рние отсеца́ти, па́ки после́дняго безу́мия се́мена помета́ти в неде́ланную зе́млю.

Сего́ наслади́вшемуся послуша́ния, не подоба́ет де́монския причаща́тися трапе́зы. «Ко́е бо обще́ние пра́вде и беззако́ннию?» Стал еси́ послу́шая Иоа́нна и о нем я́же Свята́го Ду́ха науча́яся. И по сих ли отхо́диши блудни́ц послу́шая жен, сту́дно веща́ющих, сту́днейша же показу́ющих , ю́нош, зауша́емых и зауша́ющих друг др́уга. Ка́ко возмо́жеши до́бре очи́ститися, оскверня́емь ти́ною толи́кою? Ка́я бо потре́ба по ча́сти все изчита́ти безобра́зие е́же та́мо. Вся бо та́мо смех, вся студ, вся срам и укори́зны, и поноше́ние, вся наруга́ния, вся разреше́ние, вся вред. Се предглаго́лю и завещава́ю всем вам, никто́же от наслади́вшихся сей трапе́зы да растлева́ют свою́ ду́шу смертоно́сными оне́ми зре́нии, по́честь вся суть я́же та́мо подсмеява́ема сатани́нска.

Ве́сте же просвеща́нии , каков́ы нам положи́сте обе́ты, па́че же каковы́ положи́сте Христу́, егда́ вам Сам та́йно уча́ше? Что к Нему́ реко́сте? Что о по́чести сатани́нской Ему́ бесе́довасте? Ка́ко дел сатаны́ и а́ггел его си́це тогда отреко́стеся и обеща́стеся ниже́ прини́кнути та́мо? Страх убо не мал да не от таковы́х обеща́ниих неблагоразу́мен не́кто быв недосто́йна себе́ устро́ит та́инств сих.

Не зри́ши ли, ка́ко в ца́рских дворе́х неприрази́вшиися почте́нии нарица́ются, но причаща́ющеся ра́зума о́ного и в дру́ги вчиня́ются Царев́ы? И хода́тай нам прии́де от небеси́, от Самого́ по́слан Бо́га, о не́ких ну́жных нам бесе́дуя. Та́же вы оста́вльше что хо́щет и что хода́тайствует к нам, седи́те ли сме́шников послу́шающе. И толи́кых недосто́йна сия́ убива́ющих мо́лний, коли́ких гро́мов! Я́коже у́бо трапе́зы не подоба́ет причаща́тися бесо́вския си́це, ниже́ послуша́ния бесо́вскаго, ниже́ со скве́рною ри́зою на све́тлую трапе́зу приити́, толи́ку испо́лнену су́щу благы́х, ю́же Сам угото́вил есть Бог.

Такова́ бо ея си́ла, я́ко и к небеси́ самому́ внеза́пу нас взя́ти, то́кмо а́ще целому́дреною мы́слию внимаем. Несть бо ча́сте боже́ствеными оглаша́ема словесы́ в настоя́щем пребы́ти смире́нии. Но ну́жда впери́тися а́бие, и к самому́ возлете́ти го́рнему ли́ку, и безчи́сленным собесе́довати благы́х сокро́вищь, и́хже бу́ди всем нам получи́ти благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва вку́пе и Свято́му Ду́ху ны́не и при́сно и во ве́ки веко́в. Ами́нь.