Если чтения отсутствуют - значит, по данному дню еще не были добавлены тексты.
По третьей песни:
Чтутся седальны по обычаю.Бе Свет и́стинный, И́же просвеща́ет вся́кого челове́ка, гряду́щаго в мир.
Сего́ ра́ди, о́ мно́го вожделе́нное ча́до, по ча́сти вас от писа́ний учре́ждаем разуме́ньми и не внеза́пу вся излива́ем, да удо́бно при́сно вложе́нных вам хране́ние бу́дет. И́бо о созда́нии, и́же у́бо не у́ пе́рвым ка́мением свя́занным бы́вшим ины́х наложи́в, ху́ду всю и удо́бь разори́му зи́ждет сте́ну. А и́же ожида́я пе́рвие водрузи́тися ка́мененцу ма́лому и, си́це оста́вшее пома́лу наложи́в, со опасе́нием всю соверша́ет хра́мину, не маловре́менну не́кую, ниже́ удо́бь разоря́ему, но утвержде́нну устрая́ет. Сих у́бо и мы подража́ем зда́телей и по тому́ же нра́ву ва́ша созида́ем ду́ши. И у́бо убоя́хомся, да не́когда пе́рвому положе́нию, нововодруже́нну су́щу, наложе́ние вторы́х виде́ний и пе́рвым повреди́т, мы́сли не довле́ющей вся держа́ти.
Что же у́бо есть нам днесь прочте́нное? «Бе Свет и́стинный И́же просвеща́ет вся́кого челове́ка, гряду́щаго в мир». Поне́же бо вы́ше о Иоа́нне бесе́дуя глаго́лаше, я́ко прии́де да сведе́тельствует о Све́те и я́ко ны́не по́слан бысть. Да не кто сия́ слы́шав, но́ваго ра́ди прише́ствия сведе́тельствующаго и о сведе́тельствуемом таково́ не́кое мне́ние восприи́мет, возведе́ мысль и к бытию́ превы́ше вся́кого нача́ла посла́, нигде́же скончева́ющуся, ниже́ стаю́щу. И ка́ко есть сие́ рече́ Сы́ну су́щу име́ти? О Бо́зе бесе́дуем, и е́жели каково́ вопраша́еши? И не бои́шилися, ниже́ трепе́щеши? Но а́ще у́бо тебе́ вопроси́т кто, ка́коже на́ши ду́ши безконе́чную прии́мут жизнь и телеса́ по сих, посмее́шися вопроше́нию, я́ко не у́бо челове́ческия мы́сли су́ща такова́я иска́ти, но подоба́ет ве́ровати то́кмо и не исп́ытовати рече́нное, довле́юще име́ющее указа́ние рече́ннаго си́лу Ре́кшаго. А́щеже ду́ши и телеса́ Соде́лавшаго и тва́ри вся́кия без разсужде́ния Преиме́ющаго, безнача́льна бы́ти рече́м, о́браза ли от нас истязу́еши? И кто у́бо сия́ устрое́нныя рече́т души́? Кто же здра́вствующа по́мысла? Слы́шал ли еси́ я́ко «бе Свет и́стинный». Что любопри́шися ту́не и всу́е превзы́ти по́мыслом безчи́сленный сей живо́т? Ниже́ бо мо́щно есть. Что взыску́еши невзыску́емая? Что испы́туеши непости́жное? Что исле́дуеши неиспы́тная? Разсмотри́ со́лнечных лучь ко́рень са́мый, но не возмо́жеши. И оба́че не негоду́еши, ниже́ стужа́еши о не́мощи. Ка́ко у́бо в бо́льших де́рзостен был еси́ и продерзли́в?
И́же гро́мов сын Иоа́нн, трубу́ име́яй духо́вную, е́же бе слы́шал от Ду́ха, ничто́же взыска́ вя́щше. Ты же благода́ти не причаща́яся о́ного и от я́вственных веща́яй, по́мысл превзы́ти ли ме́ру о́ного ра́зума любоприши́ся?
И сего́ ра́ди у́бо ниже́ к ме́ре дости́гнути возмо́жеши. Таково́ бо есть дия́вольское ухищре́ние: изво́дит бо от уста́вов от Бо́га да́нных нам покаря́ющихся ему́, я́ко на мно́зе бо́льших. Егда́ же наде́ждами си́ми прельсти́в отри́нет от Бо́жия благода́ти, тогда́ про́чее ничто́же вя́щьше предае́т, [ка́ко у́бо, диа́вол сый?], но ниже́ в пе́рвое, иде́же опа́сне и утверже́нне пребыва́хом, попуща́ет возврати́тися, но всю́ду обво́дит заблужа́емых и не име́ющих нигде́же ста́ти.
Си́це и первозда́ннаго от ра́йскаго пребыва́ния сотвори́л есть отпа́сти, ча́янием бо бо́льшаго позна́ния и че́сти напы́щив его́, и и́же тогда́ су́щих ему́ со осла́бою изве́рже.
Не то́кмо бо ра́вен Бо́гу не бысть я́коже обеща́ся ему́, но и [в] томи́тельство сме́рти впаде́. Не то́кмо ничто́же вя́щьше от дре́ва ра́зума прие́м, но и ра́зума его́же имя́ше нема́ло погуби́в наде́ждею мно́жайшаго ра́зума. Е́же бо стыде́тися и покрыва́тися о наготе́ тогда́ ему́ пребы́сть, пре́жде прельще́ния вы́шшу сего́ су́щу студа́. Са́мое бо е́же зре́ти на́га себе́ су́ща, и тре́бовати про́чее е́же от риз одея́ния, и ина́я мно́жайша ему́ отсю́ду прозябо́ша стра́сти тогда́. Е́же да не и мы постра́жем, да покаря́емся Бо́гу и да пребыва́ем в ни́хже Он нам повеле́. И ничто́же да́лейше мно́го да испыту́ем, да не уже́ да́нных нам отпаде́м благи́х я́коже и си́и пострада́ша. Безнача́льнаго живота́ нача́ло взыску́юще обрести́, и я́же можа́ху име́ти погуби́ша. Ниже́ бо иско́мое обрето́ша, ниже́ бо есть мо́щно. И здра́выя о Единоро́дном отпадо́ша ве́ры.
Но мы да не прехо́дим преде́лы ве́чныя, я́же положи́ша отцы́ нам, но уступа́ем везде́ Ду́ха зако́на. И слы́шавше я́ко «бе Свет и́стинный» при́сно, ничто́же мно́жае да взы́щем обрести́, ниже́ бо есть сие́ превзы́ти рече́ние.
А́ще бо я́ко челове́к роди́л бы, ну́жда посреде́ бы́ти ражда́ющаго и рожде́ннаго. Но поне́же неизрече́нне и я́коже Бо́гу ле́по роди́л есть: е́же пре́же и е́же по́сле. Отступа́ют, време́н бо сия́ имена́. Сын же и веко́в всех есть Творе́ц.
Те́мже у́бо не Оте́ц рече́но, брат. Ка́я же ну́жда, рцы ми? А́ще бо и Отца́ и Сы́на от ина́го глаго́лали бы́ти ко́рени, до́бре у́бо сия́ глаго́лал бы еси́ тогда́. А́ще же сего́ у́бо бе́гаем нече́стия, глаго́лем же Отца́ у́бо ко е́же безнача́льна бы́ти, ниже́ роди́тися, Сы́на же безнача́льна у́бо бы́ти, рожде́нна же от Отца́. Ка́я ну́жда от умышле́ния сего́ нечести́вому сло́ву о́ному привни́ти? Ни еди́но же. Осия́ние бо есть. Осия́ние же сразумева́ется естество́м бу́дет осия́ние. Сего́ бо ра́ди и Па́вел Его́ си́це нарече́ , да ничто́же посреде́ вознепщу́еши Отца́ и Сы́на. Сие́ у́бо сему́ изъяви́тельно есть. А е́же на про́чее пе́рваго указа́ния устремля́ющеся несмы́сленным безме́стие исправля́ет. Да не у́бо поне́же осия́ние, рече́, слы́шал еси́, Своея́ Ему́ лиши́тися вознепщу́еши ипоста́си. Нечести́во бо сие́ и Саве́лиян и су́щых от Марке́ла неи́стовства. Мы же не си́це глаго́лемым, но в Свое́й Ему́ бы́ти ипоста́си.
Се́го ра́ди рек Его́ осия́ние, наведе́, я́ко начерта́ние есть ипоста́си Его́ . Да Свою́ ипоста́сь яви́т, и Того́ же существа́ Себе́ су́ща, Его́же есть и начерта́ние. Не довле́ет бо еди́ным рече́нием я́коже предвари́х рек, я́же о Бо́зе предста́вити догма́ты челове́ком. Но возлю́бленно у́бо мно́го сне́сше, от коего́ждо ле́пое да́ избере́м. Си́це бо возмо́жем досто́инства дости́гнути славосло́вия, досто́инства же глаго́лю по на́шей си́ле. А́ще бо кто к Cамому́ вои́стинну досто́инству рещи́ возмощи́ непщу́ет и любопри́тся глаго́ля - cи́це ви́дети Бо́га не ве́дя.
Нравоуче́ние седмо́е о е́же не мно́го испы́товати, но ве́ровати от писа́ния рече́нным и помина́ти свои́х грехо́в:
Сия́ у́бо ве́дяще да пребыва́ем держа́ще со опасе́нием я́же преда́ша нам «и́же от нача́ла самови́дцы и служи́тели бы́вшии Словеси́» , и ничто́же дале́йше испыту́ем. Два бо неду́гующим таковы́м неду́гом облада́ют лю́тая: е́же не у́ злострада́ти и́щущим я́же обрести́ невозмо́жно и е́же раздража́ти Бо́га я́же от Него́ положе́нныя преде́лы превраща́ти начина́ющим.
Ели́к же сей подвиза́ет гнев, ничто́же подоба́ет от нас уве́дети, всем ве́дящим нам. Те́мже го́рдости их отста́вльшися, да трепе́щем Его́ слове́с, да вы́ну нас защити́т. «На кого́ бо призрю́, рече́, но ра́зве на смире́ннаго и молчали́ваго и трепе́щущаго Мои́х слове́с?» . Оста́вльше у́бо губи́тельное сие́ испыта́ние, да сокруши́м сердца́, да пла́чем о согреше́нных нам я́коже повеле́ Христо́с, да умили́мся о прегреше́ниих на́шых, да изочте́м со опасе́нием я́же по пре́жнему вре́мени нам вся дерзну́тая.
Да потщи́мся сия́ отри́нути вся́чески. Мно́ги бо в сие́ Бог отверз пути́. «Глаго́ли бо ты грехи́ твоя́ пе́рвие, рече́, да оправди́шися» . И па́ки: «Беззако́ние возвести́х Тебе́, и Ты оста́вил еси́ нече́стие се́рдца моего́» . Ниже́ бо ма́ло нам споспеша́ет ко е́же ума́лити грехо́в вели́чество ча́стое тех оглаго́лание и па́мять. Есть и ин сего́ поспеши́тельнейшь путь, е́же ни еди́ному от согреша́ющих к нам зло по́мнити, е́же всем прегреши́вшим к нам проща́ти прегреше́ния. Хо́щеши ли тре́тий уве́дети?
Услы́ши Дани́ла глаго́люща: «Те́мже грехи́ твоя́ ми́лостынями искупи́ и прегреше́ния твоя́ щедро́тами ни́щих» . Есть же и ин с си́м – моли́тв ча́стость и е́же приседе́ти с терпе́нием к Бо́гу моле́ньми. Прино́сит не́кое утеше́ние нам нема́ло и разреше́ние согреше́нных и пост, егда́ с человеколю́бием е́же ко ины́м быва́ет, погаша́ет зе́льность гне́ва Бо́жия. «Огнь бо воспаля́емь погаша́ет вода́, и ми́лостыня очища́ет грехи́» .
Сия́ у́бо вся да ше́ствуем пути́. А́ще бо всих бу́дем вы́ну, а́ще в сия́ упражне́ние изнуря́ем - не то́чию преше́дшая отмы́ем прегреше́ния, но и в бу́дущее ве́лие приобря́щем.
Не подади́м у́бо диа́волу упражне́ние приложи́тися к нам и и́же в ле́ность жития́, ниже́ в губи́тельное испыта́ние па́сти. И́бо и сим со ины́ми, и отсю́ду ниотку́дуже отъину́ду неполе́зных взыску́ет и словопре́ния вре́дная наво́дит, но ра́зве от е́же упраздне́ных зре́ти и пра́здных и ни еди́но же су́щия в житии́ доброде́тели промышле́ние творя́щих.
Но мы ему́ сие́ привхоже́ние да загради́м, бо́дрствуем, трезви́мся, да в кра́тцем сем вре́мени потруди́вшеся ма́ло - безсме́ртных и в безчи́сленных ве́цех да получи́м благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом ны́не и при́сно и во ве́ки веко́в. Ами́нь.