Вторник второй седмицы по Пасхе

Челове́колюби́в Сый Бог, о́ возлю́бленнии, благоде́тель вся твори́т и промышля́ет, я́ко бы и нам по доброде́тели сия́ти. И хотя́ нам благоиску́сным бы́ти, и сего́ ра́ди ну́ждею бо ни еди́ного же, ниже́ си́лою - увещева́ет же и тем, е́же благотвори́ти. Хотя́щих всех привлача́ет, и к Себе́ приторгу́ет, и сего́ ра́ди, прише́дша Его́, о́ви у́бо прия́ша, о́ви же не прия́ша. Ни еди́ного же бо хо́щет не хотя́ща, ниже́ принужде́нна име́ти раба́, но хотя́щих всех и произволя́ющих и благода́ть Ему́ рабо́ты ве́дящих.

Челове́цы бо а́ки в потре́бе устрои́вшеся рабо́в слу́жбы и ниже́ хотя́щих мно́гих влады́чества держа́т зако́ном. Бог же, не тре́буя Сый ни еди́ногоже от на́ших, к потре́бе устро́и вся, на́шего ра́ди спасе́ния то́кмо вся де́йствуя, нас сами́х твори́т госпо́дей всего́.

И сего́ ра́ди не хотя́щих у́бо ни еди́ному же си́лу налага́ет, ниже́ ну́жду - к поле́зному бо нам зрит то́кмо, а не к потре́бному Ему́. И́накоже и е́же не хотя́щих к сей привлача́ти рабо́те ра́вно тому́ е́же ниже́ отну́дь работа́ли есть. Что у́бо му́чит, рече́, не хотя́щих повинова́тися Ему́? Что же и гее́нну воспре́ти не прие́млющие повеле́ний Его́? Я́ко и не покаря́ющимся нам Ему́, вельми́ промышля́ет, зело́ Сый благ и отска́чущих и бе́гающих не отступа́ет. Но поне́же пре́жний путь благодея́ния отверго́ша не хотя́ще и́же покоре́нием и е́же благоприя́тно, ин нам привведе́, - му́ками и томле́нии, - горча́йшь у́бо сущь, потре́бен же оба́че, егда́ пе́рвый обезче́стится. Поне́же и законополо́жницы мно́га у́бо лю́тая на согреши́вших налага́ют томле́ния, и оба́че их не отвраща́емся сих ра́ди, но и па́че почита́ем мук ра́ди и я́ко ни еди́ного же тре́бующе су́щих у нас, [па́че же ниже́ ве́дуще, кото́рии бу́дут хотя́щии уже́ ве́щи сами́ми наслади́тися по́мощи], оба́че попеко́шася е́же в житии́ о на́шем благочи́нии, почита́юще у́бо живу́щих в доброде́тели, возбраня́юще же муче́ньми, не удержи́мся и молча́нием про́чих врежа́емых.

А́ще же сим чуди́мся и лю́бим, не мно́го ли па́че Бо́га ужаса́тися подоба́ет и люби́ти толи́каго ра́ди промышле́ния? О́ни у́бо неблагоразу́мни и скве́рни па́че всех яви́шася, и́бо безме́рно посре́дством есть о́нех и сего́ промышле́ния я́же о нас. Неизрече́нно бо вои́стинну и вели́чество вся́ко побежа́юще бога́тство бла́гости Бо́жия. Смотри́ же: Во Своя́ прии́де, не Своея́ ра́ди потре́бы, [не тре́бующе бо я́коже предре́х Божество́,] но Свои́х ра́ди благодея́ния. И ниже́ лице́ Его́ Свои́ во Своя́ Ему́ прише́дшее по́льзы их ра́ди прия́ша, но отрази́ша. И не сие́ то́кмо, но и вне виногра́да изве́дше уби́ша. И ниже́ си́це от покая́ния их отве́рже, но даде́ а́ще восхоте́ли бы́ша по толи́ком законопреступле́нии вся отмы́ти прегреше́ния ве́рою я́же в Него́, ниже́ ничто́же таково́ сде́лавшим, но и наипа́че всем Ему́ любе́зным сравни́тися. И я́ко не про́сте, ниже́ ублаже́ния ра́ди сия́ веща́ю, све́тел о сих испуща́ю глас у́же по блаже́нному Па́влу вся.

Сей бо, Христа́ гоня́ по́сле креста́ и сведе́теля О́ного мно́гими побива́я рука́ми, егда́ у́бо пока́яся и зазре́ о согреше́нных ему́ пе́рвее и к Гони́мому притече́, в дру́ги его́ а́бие и пе́рвое име́ющих причте́ и пропове́дника и учи́теля всея́ вселе́нныя изъяви́в его́: ху́льника, гони́теля, досади́теля, я́коже и сам веселя́ся о Бо́жием спасе́нии и человеколю́бии сия́ воспропове́да. И не стыдя́шеся, но я́коже на сто́лпе писа́ньми дерзну́тое ему́ пе́рвое изложи́в, всем показова́ше, лу́чше бы́ти непщу́я е́же пе́рвее его́ житие́ от всех му́читися о е́же яви́тися вели́честву Бо́жияго да́ра, не́жели спокры́ти неизрече́нное Его́ и неисповеди́мое человеколю́бие, леня́щеся свое́ все обличи́ти заблужде́ние. Сего́ ра́ди горе́ и до́лу обраща́ет гоне́ния наве́ты. Ра́тия же на це́рковь, овогда́ у́бо глаго́ля: «Несмь досто́йно нарещи́ся апо́стол, зане́же гони́х Це́рковь Бо́жию» , овогда́ же я́ко: «Прии́де Христо́с Иису́с гре́шников спасти́ от ни́хже пе́рвый есмь аз» , и па́ки: «Слы́шасте мое́ житие́ не́когда во иуде́йстве я́ко по премно́гу гони́х Це́рковь Бо́жию и разруша́х ю́» - я́коже не́кое се́ и воздарова́ние отдая́ Христу́ е́же в него́ долготерпе́ния, тем е́же показа́ти, ко́его су́ща и ка́ко врага́ и ра́тника спасе́, си́це со мно́гим дерзнове́нием пропове́дует рать, е́юже со усе́рдием вся́ки в нача́ле боря́шеся Христо́ви. Посе́мже и отча́явшимся себе́ благи́я простира́ет наде́жди, и́бо и Христу́, рече́, сего́ ра́ди прия́ти себе́, да в нем пока́жет пе́рвем долготерпе́ние и премно́го бога́тство благода́ти Свое́й во о́браз хотя́щих ве́ровати Ему́ в жизнь ве́чную, и́бо бе вся́кия им ми́лости бо́льшая дерзну́тая. И уже́ у́бо и евангели́ст явля́я, глаго́лаше: «Во Своя́ прии́де и Свои́ Его́ не прия́ша». Отку́ду прии́де, И́же вся исполня́я и везде́ Сый? Кото́рое истощи́в ме́сто Своего́ прише́ствия, И́же вся руко́ю содержа́й и владе́я? Ме́сто у́бо ни еди́но же пре́мени. Каќо же? Схожде́нием бо е́же к нам сие́ соде́ла.

Поне́же бо, в ми́ре Сый, не мня́шеся близ бы́ти, тем е́же не узна́тися, по́слежде Себе́ изъяви́л есть, в на́шу плоть облещи́ся сподо́бився, явле́ние сие́ и схожде́ние прише́ствие нарица́ет. Почуди́т же ся не́кто ученику́ несрамля́ющется о Учи́телеве безче́стии, но со дерзнове́нием ю́же в Него́ бы́вшую доса́ду. И сие́ же нема́ло любои́стиннаго их нра́ва зна́мение и и́накоже срамля́ющемуся о досажда́ющих. Не о и́же от вины́ доса́ды стыде́тися подоба́ет. Сей бо си́це наипа́че облиста́ и по доса́де толи́ко о досади́вших творя́ промышле́ние. Они́ же неблагода́рни и скве́рни па́че всех яви́шася, о толи́ких прише́дшему благи́х я́ко врага́ отве́ргше и ра́тника. Не си́це же то́кмо вреди́шася, но и е́же не получи́ти, и́хже получи́ша прие́мшии Его́.

Коего́же ли получи́ша сии́? «Ели́цы же прия́ша Его́, даде́ им о́бласть ча́дом Бо́жиим бы́ти» , рече́. Что у́бо не глаго́леши нам, о́ блаже́нне, «и не прие́мшим Его́ – му́ку», но я́ко у́бо «Свои́ бе́ша и во Своя́ прише́дша не прия́ша» рекл еси́? Что же в ме́сто сих постра́ждут и кото́рую прии́мут му́ку - сие́ не ктому́ приложи́л еси́. А́ще и бо́льше бы их си́це устраши́л еси́ и же́стокое непоко́рства умягчи́л бы еси́ преще́нием. Что у́бо ра́ди умолча́л еси́? И коя́ [сея́ ра́ти] му́ки бо́льши бу́дет и́на, егда́ предлежа́щи о́бласти им ча́дом Бо́жиим бы́ти, не бу́дут, но хотя́ща, себе́ такова́го лиша́т благоро́дия и че́сти.

Но оба́че ниже́ зде то́кмо им я́же томле́ния ста́нут до е́же ничто́же прия́ти бла́го, но и негаси́мый их прии́мет огнь, е́же происхо́да я́вственнейше откры́л есть.

Пре́жде же глаго́лет неизрече́нная блага́я прие́мших Его́. И в ма́лех представля́ет сия́, глаго́лет си́це, глаго́ля: «Ели́цы же прия́ша его́, даде́ им о́бласть ча́дом Бо́жиим бы́ти» - а́ще и раби́, а́ще и свобо́дни, а́ще и е́ллины, а́ще и ва́рвари, а́ще и ски́фи, а́ще и не му́дри, а́ще и прему́дрии, а́ще и жены́, а́ще и му́жие, а́ще и отроча́та, а́ще и ста́рцы, а́ще и безче́стнии, а́ще и че́стни, а́ще и бога́тии, а́ще и ни́щии, а́ще и нача́льницы, а́ще и прости́и - вси та́яже сподо́бятся че́сти. Ве́ра бо и благода́ть Ду́ха е́же от мирски́х несла́дость отъе́млют, во еди́н зрак всех назда́ и во еди́н о́браз ца́рский. Что у́бо Его́ бу́дет человеколю́бия ра́вно?

Царь у́бо и́же от того́же соверше́н нам ка́ла единоро́дных и того́же ему́ причаща́ющихся естества́ мно́жицею же и о́браза лу́чших су́щих не сподобля́ет причасти́ в во́инство ца́рское, а́ще раби́ прилуча́тся су́ще. Единоро́дный же Бо́жий сын не несподоби́ и мытаре́й, и волхво́в, и рабо́в, и и́же всех безче́стнейши и ни́щетнейших, мно́гих же и телесы́ напа́ствованных и безчи́сленое име́ющих вреже́ние в лик чад причасти́. Толи́ка су́щия в Него́ ве́ры кре́пость. Толи́ка благода́ти вели́чество. И я́коже естество́ огня́, земли́ руд соживу́ще, зла́то сие́ а́бие сотвори́: си́це и мно́го па́че в ме́сто бе́рненых - святы́х креще́ние соде́лает омы́вшихся, Ду́ху огня́ подо́бие во о́но вре́мя в на́ша впада́ющу ду́ши.

И о́браза у́бо пе́рьсти сжега́ющу, о́браза же небе́снаго новоутвержде́нна , и све́тла, и я́коже от горни́ла блиста́юща вознося́щу. И что у́бо не рече́, я́ко «сотвори́м и ча́да Бо́жия», но: «даде́ им власть ча́дом Бо́жиим бы́ти»? Показу́я, я́ко мно́гаго тре́бует тща́ния я́ко бы и́же во креще́нии сыноположе́ния нам вообра́жнный о́браз неоскверне́н отню́д соблюсти́ и неприкоснове́н. Вку́пеже и явля́я, я́ко о́бласть сию́ от нас никто́же отъя́ти возмо́жет, а́ще, не предвари́вше, са́ми себе́ отъи́мем.

А́ще бо и́же от челове́к о́бласть не́ких ве́щей прие́мша, толи́ку име́ют кре́пость, ели́ко про́сту да́вшии са́ми - мно́го па́че и́же от Бо́га сея́ получи́вше че́сти, а́ще ничто́же о́бласти сея́ недосто́йно де́йствуем, всех бу́дем силне́йши за е́же и всех бы́ти бо́льшу же и блажа́йшу И́же сию́ нам Да́вшему честь.

Вку́пе же и показа́ти хо́щет, я́ко не про́сте ниже́ благода́ть после́дует, но хотя́щим и потща́вшимся, и́бо и во о́бласти лежи́т сих е́же бы́ти ча́да. А́ще бо не произволя́т са́ми пе́рвие - не после́дует дар, ниже́ соде́ловает что, всю́ду у́бо принужда́ющее отрева́я, самоизво́льно е́же и самовла́стно показу́я. Сие́ и ны́не рече́, и́бо в саме́х сих неизрече́нных благи́х Бо́жие у́бо есть да́ти благода́ть, челове́ческое же - е́же пода́ти ве́ре. И в су́щем же по сим вре́мени мно́гаго тре́ба есть про́чее тща́ния. Не довле́ет бо к хране́нию чистоты́ нам е́же крести́тися и ве́ровати то́кмо, но тре́ба есть, аще хо́щем сея́ вы́ну наслажда́тися све́тлости, досто́йно ея́ житие́ подая́ти. Сие́ же о нас сотвори́л есть Бог. Е́же бо роди́тися та́йнственым рожде́нием и всех очи́ститися пре́жде них согреше́ний нам от креще́ния быва́ет, а е́же бы́ти на про́чее чи́стым и ниже́ по сим прия́ти скве́рну - па́ки на́шея есть о́бласти тща́ние.

Сего́ у́бо ра́ди и о́браза рожде́ния нам воспомяну́л есть и от сосужде́ния плотски́х рожде́ний вели́чество показа́л есть, рекл: «И́же ни открове́н, ни от похоте́ния му́жеска, но от Бо́га роди́шася» . Сие́ же сотвори́л есть, да худо́е и смире́нное пе́рвое Рождества́ уве́девше, е́же кровьми́ и похоте́нием плотски́м, и высо́кое и благоро́дное втора́го, е́же благода́тию позна́вше, вели́ко не́кое и отсю́ду да прии́мем разуме́ние и да́ра Роди́теля досто́йно и мно́го по сих да пока́жем тща́ние. Страх бо нема́л, да не́когда до́брую сию́ оскверни́вше оде́жду я́же по сих ле́ностию и прегреше́ньми, изве́ржени бу́дем черто́га и Неве́стника, я́коже пять дев о́не юро́дивыя [или́] по неиме́ющему одея́ния бра́чна: и́бо и он от обе́дников бе, зван бо бысть и сей. Но поне́же по зва́нии и по толи́кой че́сти досади́л есть Зва́вшему, услы́ши, якову́ стра́ждет казнь, ка́ко окая́нну и мно́гих слез досто́йну. Прише́д бо во е́же све́тлыя причасти́тися трапе́зы о́ноя, не то́кмо возбраня́ется от пи́ршества, но и рука́ми свя́зан и нога́ми та́коже, во тму отво́дится кроме́шную, ве́чную и неизрече́нный плачь и скре́жет зубо́м претерпева́я.

Нравоуче́ние деся́тое, о е́же ничи́мже от свята́го креще́ния по́льзоватися и́же не до́бре живу́щим:

Да не у́бо, возлю́блении, ниже́ мы непщу́ем довле́ти нам ко спасе́нию ве́ры. А́ще бо не житие́ пока́жем чи́сто, но в недосто́йныя зва́ния сего́ ри́зы обле́кшеся прии́дем, ничто́же возбрани́т и нам пострада́ти та́яже, я́же и он окая́нный.

И́бо безме́стно есть Ему́, у́бо Бо́гу су́щу и Царю́, челове́ков худы́х и стро́ев , и ничесо́гоже досто́йных не стыде́тися, но су́щых от распу́тия к трапе́зе приво́дит о́ной - нам же толи́ко нечу́вствие показова́ти, я́ко ниже́ толи́кою че́стию бы́ти лу́чшим, но по зва́нии в то́й же пребыва́ти зло́бе, в Самого́ Зва́вшаго досажда́ющим человеколю́бие.

Ниже́ бо сего́ ра́ди нас на духо́вное сие́ и стра́шное та́инство призва́ о́бщее, да с пе́рвою вни́дем зло́бою, но да совле́кшеся студа́ да облече́мся в я́же су́щим в ца́рских пи́ршествующим в ле́поту облача́тися подоба́ет. А́ще же не восхо́щем зва́нию о́ному де́йствовати, не ктому́ сия́ от Поче́тшаго, но от нас. Ниже́ бо от нас отрева́я чу́днаго обе́дников ли́ка, но мы са́ми себе́. Он бо свое́ все соверши́л есть: и́бо бра́ки сотвори́л есть, и трапе́зу угото́вил, и зва́таев посла́, и прише́дших прия́т, и ино́ю вся́кою почте́ че́стию.

Мы же и в Него́, и в предстоя́щих, и в брак досади́вше скве́рными ри́зами, си́речь нечи́стыми дея́ньми, в ле́поту изве́ржемся про́чее. Си́це бо и бра́ка почита́я и зва́нных, отгоня́ет лю́тых и безсту́дных о́нех: а́ще бо оста́вил бы облече́нных во о́ну ри́зу, Сам у́бо возмне́лся бы и ины́м досажда́ти.

Но ни еди́ному же бу́ди такова́го и́скуса прия́ти Зва́вшаго: ниже́ нам, ниже́ ины́м не́ким. Сего́ бо ра́ди пре́жде да́же бы́ти сия́, вся напи́сана суть, да в преще́нии писа́ний уцелому́дрившеся, не попу́стим в де́ло приити́ безче́стие и му́ку сию́, но о глаго́лех сию́ да поста́вим то́кмо и со све́тлою ко́йждо оде́ждею на зва́ние о́но да прии́дем, ея́же наслади́тися бу́ди всем нам благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом во ве́ки. Ами́нь.

И Сло́во плоть бысть и всели́ся в ны.

Еди́ну испроси́ти хощу́ благода́ть от всех вас, пре́жде да́же ева́нгельских косну́тися глаго́л: но оба́че не отрецы́теся ко вопроше́нию. Ниже́ бо тя́жко не́что и ско́рбно прошу́; ниже́ мне прие́мшему то́кмо потре́бно будет, но и вам пода́вшим, и мно́го вя́щше вам. Что ли у́бо есть е́же прошу́? Во еди́ну от субо́т бу́дущую в вас прочести́ся благовестова́ний вели́чество сие́: пре́жде сих дней, их в руце́ прие́мь, ко́йждо вас в дому́ си́дя, да прочита́ет ча́сте и мно́жицею, да созира́ют со опасе́нием внутрь лежа́щее и да истязу́ет вся до́бре: и что у́бо я́вствено, что́ же не я́вствено, и что к сопроти́вному бы́ти мня́щееся, не су́ще же - и вся про́сте искуша́юще, си́це достиза́йте к послуша́нию. Не ма́ло бо такова́го тща́ния и нам и вам бу́дет приобрете́ние: мы бо немно́гаго востре́буем труда́ ко е́же я́вствену сотвори́ти глаго́лемых си́лу мы́сли, вам - уже́ предусво́ившеся вино́ю рече́ний - вы же остре́йши и зри́тельнейши сим о́бразом бу́дете: не к послуша́нию то́кмо, ниже́ ко уче́нию, но и ко е́же научи́ти ины́х. Поне́же я́ко у́бо ны́не мно́зи от су́щих зде приходя́щих слы́шат вку́пе вся принужа́ющеся навы́кнути глаго́лы и я́же от нас в сия́ глаго́лема, не у́бо, ле́то все сие́ творя́ще соверши́м, ве́лие не́кое обоиму́т приобре́тение. Ка́ко бо, егда́ от преизли́шества и зде то́кмо по ма́лому сему́ вре́мени глаго́лемым упражня́ются?

А́ще же не́цыи ве́щи обину́ют и попече́ния, и мно́гое и гражда́нских и про́стых упражне́ние - пре́жде у́бо са́мое сие́ согреше́ние нема́ло, е́же окружа́тися толи́ких веще́й мно́жеством и жите́йским си́це пригвожда́тися вы́ну, я́ко ниже́ ма́ло во всех нужне́йшея приводи́ти упражне́ние. Пото́м же и непщева́ния сия́, и изве́т - оклеве́щут у́бо их и друго́в сожи́тельства, и я́же на позо́рищах пребыва́ния и собо́рища, я́же зре́ния ра́ди ко́нскаго рыска́ния творя́т, в ни́хже мно́жицею дни все це́лы изнури́ша и нигде́же веще́й упражне́ние обвину́ кто сих саме́х. Та́же, в худы́х у́бо безнепщева́ние везде́ и упражне́ние води́ти глубо́ко мо́жете. А́щеже стра́хом Бо́жиим внима́ете, толи́ко вам сия́ изли́шнейше и безче́стнейше всех бы́ти ви́дятся, я́ко ниже́ ма́ло мне́ти подоба́ти отдая́ти упражне́ние. И ка́ко досто́йно cи́це пребыва́ющим воздыха́ти, не́жели со́лнце сие́ зре́ти?

Есть и и́но не́что упражне́ние, и́же си́це лени́вым безслове́снейше - е́же не стяжа́ти, ниже́ име́ти книг - и к бога́тым у́бо смех протяза́ти о непщева́нии сем.

Поне́же ни́щетнейшим мно́гих мню де́йствовати им ча́сте. О́но у́бо сла́дости не вопроси́л бы их: а́ще не вся худо́жества сосу́ды, его́же ко́йждо есть соде́тель, соверше́ны и всеце́лы име́ет, а́ще и безчи́сленое возбрани́т нищета́?

Ка́ко у́бо не безме́стно: та́мо ничи́м же обвинова́ти нищету́, но вся де́йствовати ко е́же ничему́ же быти преткнове́нию; ниотку́дуже хотя́щим же толи́ку по́льзу объима́ти - упражне́ние рыда́ти нищету́.

Но оба́че а́ще и не́цыи си́це ни́щи бу́дут, мо́щно есть от ча́стаго зде быва́емаго прочита́ния ничто́же [не] невиде́ти внутрь лежа́щих в боже́ственных писа́ниих.

А́щеже немо́щно вам сие́ бы́ти ви́дится, в ле́поту сие́ мни́тся. Ниже́ бо со мно́гим усе́рдием мнози прихо́дят, глаго́лемых послу́шающе, но са́мое сие́ то́кмо отда́ти хотя́ще дню, а́бие возвраща́ются в дом.

А́щеже не́цыи и пребу́дут, отше́дших ничи́мже отра́днее пребыва́ют, те́лом то́кмо зде предстоя́ще нам. Но да́же не на мно́зе вина́ми вас отягча́ем и во укори́знах вре́мя да изнуря́ем все - да и́дем про́чее на ева́нгельския глаго́лы: вре́мя бо про́чее на предлежа́щее возвести́ сло́во. Но воздви́гнитеся, я́кбы ничему́ же вас глаго́лемых прейти́.

«И Сло́во плоть бысть и всели́ся в ны». Рек, я́ко от Бо́га роди́шася прие́мшии Его́ и ча́да Бо́жия бы́ша, неизрече́нныя сея́ че́сти полага́ет вину́ и изве́т. Сия́же есть, е́же бы́ти плоть Сло́во и ра́бий зрак восприя́ти Влады́це. Бысть бо Сын челове́чь, Бо́жий При́сный и Сын Сый, да сыно́в челове́ческих ча́да сотвори́т Бо́жия. Высо́кое бо, смире́нному совокупи́вшеся, то у́бо ничи́мже врежа́ется во свою́ сла́ву: о́ноже от мно́гаго воставля́ет смире́ния, е́же у́бо и о Го́споде бысть. Свое́ бо естество́, ничи́мже от сего́ схожде́ния ума́лил есть, нас же, вы́ну в безсла́вии седя́щих и тме, к сла́ве неизрече́нней возведе́. Си́це же и царь, ни́щему и убо́гому бесе́дуя со тща́нием и прия́зньством, - себе́ у́бо ничи́мже посрами́, о́ногоже пред все́ми обозри́тельна сотвори́ бы́ти и све́тла. А́щеже о чужде́м челове́к досто́инстве ничто́же честне́йшаго совокупле́ние к худе́йшему повреди́, мно́го па́че о нетле́нном и блаже́нном о́ном Cуществе́ чу́ждее у́бо ничто́же име́ющем, ниже́ быва́емо и отходя́ще - вся же име́юще неподви́жна, водруже́нна в коне́ц блага́я. Я́коже егда́ услы́шиши, я́ко Сло́во плоть бысть - да не смути́шися, ниже́ ни спаде́ши. Ниже́ бо Существо́ преложи́ся в плоть, сие́ бо после́дняго нече́стия есть помы́слити, но Пребыва́ющее е́же есть зрак ра́бий восприя́т.

Что ли у́бо ра́ди тем е́же бысть де́йствует глаго́лом? Ерети́ческая загража́я уста́. Поне́же бо суть глаго́лющи и я́ко мечта́ние не́кое бе, и лицеме́рие, и непщева́ние я́же смотре́ния вся - испе́рва их предъотъе́млет хуле́ние, е́же бысть положи́л есть не преложе́ние существа́, не бу́ди!, но пло́ти и́стинныя прия́тие предста́вити хотя́.

Я́коже бо глаго́лет: «Христо́с нас искупи́л есть от кля́твы зако́нныя, быв о нас Кля́тва», - не сие́ рече́, я́ко существо́ Его́ от Своея́ отступи́вше сла́вы, в Кля́тву осуществи́ся, [сие́ бо ниже́ бе́сове помы́слят, ниже́ зело́ несмы́слении и по естеству́ ра́зумов лише́нии: толи́ко име́ет с нече́стием и досаже́ние,] ‐ не сие́ у́бо глаго́лет, но я́коже ю́же на нас кля́тву вземь, не оставля́ет нас про́клятых бы́ти про́чее. Си́це у́бо и зде: плоть рече́ Сло́во бы́ти, не преложи́вше в плоть Существо́, но восприе́мше сие́, неприкоснове́нну пребыва́ющу О́ному. А́щеже глаго́лет, я́ко Бог Сый вся мо́жет, я́ко и в плоть приложи́тися можа́ше – о́но и к ним рече́м, я́ко вся мо́жет, до́ндеже у́бо пребыва́ет Бог Сый: в плоть же преложи́выйся не у́бо бу́дет Бог, преложе́ние бо прия́т, и преложе́ние на го́ршее. Е́же бо прелага́тися дале́че нетле́ннаго естества́ о́ного. Те́мже и проро́ку глаго́лаше: «Вси я́ко [ри́за] обетша́ют и я́ко оде́жду свие́ши их, и изменя́тся. Ты же То́йже еси́, и ле́та Твоя́ не оскуде́ют» . Вся́ко бо высоча́йше преложе́ния Существо́ сие́, ниже́ бо лу́чше что Его́ [есть], я́ко бы предуспе́вшу ему́ на сие́ приити́.

Что глаго́лю лу́чше? Но ниже́ ра́вно, ниже́ ма́ло близ. Но у́бо подоба́ет на го́ршее ему́ преложе́ние, а́ще у́бо преложи́тся. Сие́ же не у́бо бу́дет Бог, но хула́ да обрати́тся на глаго́лющих сия́ главу́. Я́ко сего́ ра́ди то́кмо рече́ся е́же бысть, да не мечта́ние возмни́ши, услы́ши су́щими по сих, ка́ко очища́ет сло́во и мне́ние превраща́ет лука́вое. Что бо наво́дит? «И всели́ся в ны». То́чию не глаго́ля: Ничто́же безме́стно вознепщу́еши от е́же бысть. Не превраще́ние бо рех непревра́тнаго естества́ о́ного, но вселе́ние и обита́ние. Вселя́ющее же ся не то же у́бо бу́дет вселе́нию, но и во ино́м вселя́ется. Поне́же не у́бо бу́дет селе́ние, ничто́же бо в себе́ вселя́ется. И́ноже рех по существу́. Соедине́нием бо и сокупле́нием Еди́н есть Бог Сло́во и плоть, ни смеше́нию бы́вшу, ниже́ погубле́нию суще́ств, но соедине́нию неизрече́нну не́коему и несказа́нну. И е́же я́ко бысть изве́стне - весть Сам. Ко́е же ли у́бо есть селе́ние, в не́же всели́ся? Услы́ши проро́ка, глаго́люща: «Воздви́гну ски́нию Дави́дову па́дшую», паде́ бо вои́стинну, паде́ паде́нием неисце́льным естество́ на́ше и кре́пкия о́ноя тре́бующа руки́. И не бе и́нако воздви́гнути е́, не и́же в нача́ле Созда́вшему есть, ру́ку пода́вшу и вообрази́вшу изнача́ла, порожде́нием е́же водо́ю и Ду́хом.

И зри ми стра́шное и неизрече́нное та́инство: вы́ну бо в сем живе́т селе́нии. Во плоть бо на́шу оде́яся не я́ко па́ки ю́ оставля́я, но я́ко всегда́ име́я с Собо́ю. Ниже́ бо, а́ще не сие́ бы́ло бы, и престо́лу сподо́бил бы ю́ ца́рскому и, нося́ ю́, покланя́шеся от всего́ во́инства: от а́нгел, от арха́нгел, от престо́лов, госпо́дьств, нача́л, власте́й. Ко́е сло́во, ка́я ли мысль толи́ку честь ю́же к ро́ду на́шему бы́вшу, си́це преесте́ствену и гро́зну, предста́вити возмо́жет? Кото́рый а́нгел? Кото́рый арха́нгел? Нигде́же никто́же. Ни су́щих на небеси́, ни су́щих на земли́. Такова́ бо Бо́жия исправле́ния, си́це ве́лия и преесте́ствена благодея́ния Его́, я́ко не то́кмо челове́ческаго язы́ка, но а́нгельскую си́лу превосходи́ти их изве́стному пове́данию.

Те́мже и мы в молча́ние сло́во да заключи́м, толи́ко вам препоручи́вше воздарова́ти толи́кого на́шего Благода́тая воздарова́ньми, я́же па́ки в нас приобрете́ние преста́вят все.

Нравоуче́ние единонадеся́тое, о попече́нии души́:

Сия́ же суть е́же о души́ нам свое́й со опасе́нием попече́ние твори́ти.

И́бо и сие́ Его́ человеколю́бия де́ло есть, е́же ни еди́наго же в потре́бе на́ших устро́ившуся, Ему́ глаго́лати приима́ти воздарова́ния, егда́ мы о души́ свое́й прилежи́м. Те́мже и после́дняго безу́мия и безчи́сленных мук досто́йно - толи́кия че́сти наслади́вшимся, ниже́ я́же по си́ле совноси́ти, и наипа́че я́же от сих по́льзе в нас па́ки преходя́щей и безчи́сленым от сих лежа́щим нам благи́м. О сих у́бо всех сла́ву да возсле́м Человеколюби́вому Бо́гу, не глаго́лы еди́ными, но мно́го па́че ве́щьми, да и су́щих по сих получи́м благи́х, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ним Отцу́ сла́ва, со Святы́м Ду́хом во ве́ки веко́в. Ами́нь.

Тогда́ возврати́шася, во Иерусали́м от горы́ нарица́емыя Елео́н, я́же есть близ Иерусали́ма, суббо́те иму́ще путь.

[Иси́хиево: Путь суббо́ты по́прище есть еди́но, ели́ко жидови́н и́дет в суббо́ту.

Ориге́ново: Ло́коть две ты́сячи свята́я ски́ния и ковче́г идя́ше напре́д пред полки́: и хотя́щим поклони́тися свято́й ски́нии во́льно бысть толи́ко ити́ в суббо́ту. Толи́ко же ло́коть дале́че и от полко́в ски́ния стоя́ше - ели́ко и идя́ше.]

Златоу́стаго толкова́ние: Тогда́ возврати́шася рече́. Тогда когда́? Егда́ слы́шаша. Не бы́ша у́бо ве́ровали, а́ще не бы им ино́го прише́ствия обеща́л. Мню бо, я́ко и в субо́ту сия́ бы́ти, не бы у́бо си́це растоя́ние ме́ста яви́л, рек: «От горы́ нарица́емыя Елео́н е́же есть близ Иеросали́ма, субо́те иму́щи путь», а́ще не бы́ша уме́рену не́кую должину́ ше́ствия ше́ствовали в день субо́тный. Седмь у́бо ста́дий, глаго́лет, отстоя́ше от Иеросали́ма гора́ Елео́нская, иде́же бо, я́коже рещи́, во еди́н час мо́жет кто сни́ти с горы́ в Иеросали́м. Отстои́т у́бо я́ко по́прище еди́но, е́же есть ста́дий седмь, си́речь, толи́ко отстоя́ше вне гра́да, ели́ко есть иуде́ю в суббо́ту проходи́тися.

Су́щее: И егда́ внидо́ша, взыдо́ша на го́рницу, иде́же бя́ху пребыва́юще: Петр же, и Иа́ков, и Иоа́нн, и Андре́й, и Фили́пп, и Фома́, и Варфоломе́й, и Матфе́й, и Иа́ков Алфе́ов, и Си́мон Зило́т, и Иу́да Иа́ковль.

Толкова́ние Зило́тово: Не ктому́ со Иоа́нном Иа́ков сочета́ется, но с Петро́м, обои́ до́бре ученики́ помяну́л есть, да яви́т, я́ко кроме́ преда́теля вси бы́ша це́лы.

Су́щее: Си́и вси бя́ху, терпя́ще единоду́шно моли́твою и моле́нием, с жена́ми, и Мари́ею, Ма́терию Иису́совою, и с бра́тиею Его́.

Златоу́стаго: Вели́ко у́бо се ко искуше́нием ополче́ние е́же всем воеди́но со́бранным бы́ти, зело́ бо боя́хуся иуде́й. Со жена́ми бо, рече́, и Мари́ею, Ма́териею Иису́совою, и со бра́тиею Его́. Ка́ко у́бо глаго́лет, я́ко в своя́ си прия́ ю́? Иоа́нн тогда́ и бра́тия Его́ пре́жде не ве́роваша к Нему́, я́ве я́ко по воскресе́нии па́ки собра́ их. Ты же смотря́й, егда́ кто терпи́т в моли́тве, егда́ мо́лится, егда́ любо́вь и́мать, тогда́ Дух Святы́й прихо́дит.

Су́щее: И во дни сия́, воста́в Петр посреде́ учени́к, и рече́, [бе же наро́д имени́тых вку́пе, я́ко сто и два́десяте]: му́жие бра́тия, подоба́ше сконча́тися писа́нию сему́, е́же пре́жде рече́ Дух Святы́й усты́ Дави́довы о Иу́де, бы́вшем вожди́ е́мшым Иису́са: я́ко причте́н бе с на́ми, и прия́л бя́ше жре́бий слу́жбы сея́.

Толкова́ние: Петр тепл быв, и я́ко пре́дано ему́ от Христа́ ста́до, и я́ко предпочте́н, при́сно нача́льствует сло́во, исполне́ние апо́стол глаго́лемым Дави́дом творя́, бра́тию нарече́ всех. Се церко́вное а́бие досто́инство и ева́нгельское устрое́ние. Никто́же разлуче́ние име́яше та́мо, ни му́жеский ни же́нский пол. Таковы́ хощу́ це́ркви и ны́не бы́ти, никто́же жите́йское что вменя́ше, никто́же о до́му печа́шеся. Толи́ко бла́го суть искуше́ния, толи́ко ско́рби, при́сно утеша́ет их от проро́чества. Си́це и Христо́с повсю́ду твори́т, то́йжде о́браз и той показу́ет. Я́ко ничто́же стра́нно бысть, но еже бе проречено. И не рече «Давид глаголет», но «тем Дух Святы́й». Зри а́бие в нача́ле кни́ги сия́, отку́ду прие́млет поуче́ние и получи́, рече́, жре́бий слу́жбы сея́: показу́ет, я́ко Бо́жия благода́ти все бысть. Та́же и о дре́вних воспомина́ет им: я́ко Бог сочета́ Иу́ду апо́стола, я́коже и дре́вле леви́тяны.

Су́щее: Сей у́бо стяжа́ село́ от мзды непра́ведныя. И ниц быв, просе́деся посреде́ и излия́ся вся утро́ба его́. И разу́мно бысть всем живу́щим во Иеросали́ме: я́ко нарещи́ся селу́ тому́ свои́м их язы́ком Акелдама́, е́же есть «село́ кро́ве».

Толкова́ние: Стяжа́ бо, рече́, от мзды непра́ведныя село́. Зри, ка́ко смотре́ние Бо́жие бысть. Непра́ведныя, рече́. Мно́ги у́бо непра́вды, рече́. Се́йже ничто́же непра́веднейше нигде́же бысть.

Аполина́риево: Не у́мре во удавле́нии Иу́да, но пожи́т, снят пре́жде удавле́ния. Се же я́вственнейше пи́шет Па́пий, учени́к Иоа́ннов, глаго́ля си́це: «Вели́ко безче́стие показа́нию в ми́ре сем походи́ Иу́да, оте́к толи́ко те́лом, ели́ко иде́же кола́ удо́бно мину́ют, о́номуже не возмо́жно мину́ти, но ни самы́я главы́ его́. Вежди бо о́чию его́, глаго́лет, толи́ко надве́шени бя́ху, я́ко сам у́бо ника́коже све́та гляда́ти можа́ше. О́чи же толи́ко глубо́ко бя́ху, ели́ко ни враче́вным зерца́лом возмощи́ ви́дети их. Кипя́ше же все те́ло его́ гно́ем и че́рвием, я́ко ни возре́ти нань челове́ку мощи́». По мно́зе же муче́нии и томле́нии во свое́м селе́ глаго́лют его́ сконча́вшася. И отто́ля пу́сто и ненаселе́нно село́ о́но бысть, да́же и до ны́не. Но и до ны́нешнего дне невозмо́жно есть никому́же от челове́к мину́ти ме́ста о́ного, а́ще не но́здри свои́ма рука́ма загради́т. Толи́ко пло́ти его́ ра́ди, и на земли́ суд показа́ся ему́.

Су́щее: Пи́шет бо в кни́зе псало́мстей: «Да бу́дет двор его́ пуст, и да не бу́дет живы́й в нем , и епи́скопство его́ прии́мет ин ».

Златоу́стаго : Си́речь, нача́льство и свяще́нство Иу́дино да прии́мет ин, и я́ко не мое́ю во́лею, рече́, сия́ глаго́лана бы́ша, но О́ного проре́кшаго сия́ жре́бий служе́ния. «Епи́скопство да прии́мет ин», рече́: зри, я́ко и дия́кони нарица́хуся ученицы́ и епи́скопи.

Су́щее: Подоба́ет у́бо от сходи́вшихся с на́ми муже́й, во вся́ко ле́то, в не́же вни́де и изы́де в нас Госпо́дь Иису́с, наче́н от креще́ния Иоа́ннова, до него́же дне вознесе́ся [на не́бо] от нас, свиде́теля воскресе́нию Его́ бы́ти с на́ми еди́ному от сих.

Толкова́ние Златоу́стаго: Почто́ приобща́ет их? Да не вражда́ в ве́щи будет и в ра́спрю впа́днут. А́ще бо са́ми се пострада́ша, кольми́ па́че о́бщий наро́д. Сего́ ра́ди, начина́я сло́во, глаго́лаше: «му́жие бра́тие, подоба́ет избра́ти от себе́», мно́жеству лю́дий и разсуди́ти повелева́ет, бы́вших же че́стных творя́, и сам от вра́жды удаля́яся, не рече́нных ве́щи свиде́теля, но Воскресе́нию. И́бо достове́рнейшее бе е́же рещи́, я́ко Он яды́й и пи́вый и распны́йся, Той воста́: и́бо иско́мое о Воскресе́нии бе, поне́же о́на явле́на бя́ше, Воскресе́ние же о́тай бысть и ученико́м то́кмо явле́но.

Су́щее: И поста́виша два: Иоси́ю, нарица́емаго Варса́ву, и́же нарече́н бысть Иу́ст, и Матфе́я. И помоли́вшеся ре́ша: «Ты, Го́споди, Сердцеве́дче всех, покажи́, его́же избра́ от сею́ обою́, еди́наго прия́ти приче́т служе́ния сего́ и посла́ния, из него́ же испаде́ Иу́да ити́ в ме́сто свое́».

Толкова́ние: Не Петр поставля́ет их, но нача́ло сло́ву [и во́лю] той вложи́, показа́в, я́ко ни сие́ не бе от него́, но испе́рва пронарече́нно. Те́мже я́ко сказа́тель бысть, а не учи́тель, «Ты, Го́споди, Сердцеве́дче всех» рече́, и не ре́ша «избери́», но «яви́ избра́ннаго,» ве́дяще вся пронарече́нна от Бо́га суть. До́бре у́бо воспомина́ют Иуди́но согреше́ние, не я́ко умно́жити число́ учени́к хотя́ще, но ума́литися не оставля́юще.

Су́щее: И да́ша жре́бия и́ма. И паде́ жре́бий на Матфе́я, и причте́н бысть ко единому на́десяте апо́столу.

Толкова́ние: До́ндеже бо не бя́ху Ду́ха Свята́го прича́стни апо́столы, жре́бьми и вещьми́ повелева́ху бы́ти, се у́бо жре́бий есть не е́же хо́щет кто, но ему́же благода́ть пода́ст. Жре́бий нелицеме́рна есть вещь. Жре́бий сро́дства не и́мат, ни любо́вна, ни вражду́, поне́же бо мно́гим су́щим по всех жре́бие мета́ти несть, подо́бно от мно́гих ма́лых избира́ет.

[Та́же Феодори́т, ука́з чесо́ ра́ди покланя́емся на восто́к: К восто́ку стоя́ще мо́лимся сего́ ра́ди, я́коже рече́ вели́кий Васи́лие: я́ко дре́внее оте́чество взыску́ем, рай, его́же насади́ Бог на восто́це. Сие́ же твори́м, иде́же о́браз Госпо́день обрета́ем, ту покланя́емся. Коленопоклоне́ние же твори́м сего́ ра́ди: я́ко на ко́емждо поклоне́нии низпаде́ние на́ше и воскресе́ние де́лом показу́ем. Я́ко греха́ ра́ди на зе́млю низпадо́хом, человеколю́бия же ра́ди Созда́вшаго нас на не́бо возва́ни бы́хом. В суббо́ту же и в неде́лю коленопоклоне́ния не твори́м, ни в пятьдеся́тницу, но про́сто стоя́ще мо́лимся сего́ ра́ди: я́ко воскре́сше со Христо́м, вы́шних иска́ти до́лжни су́ще. Но и зна́менуем бу́дущаго ве́ка о́браз невече́рний день. Та́коже и вся Пятьдеся́тница, сие́ е́же в ве́це о́ном ча́емаго воскресе́ния есть воспомина́ние. Я́ко да ча́стым воспомина́нием неконча́емыя жи́зни е́же к ней и о напу́тии [не] неради́м, возвыша́юще ум наш на бу́дущая. Четверодеся́тный у́бо пост есть предве́рие бу́дущих благ, и назна́менует е́же в пло́ти тру́дное на́ше житие́, и́мже получи́м безтру́дный живо́т бу́дущих благ, ему́же о́браз есть Пятьдеся́тница, в не́йже узако́нися ни коленопоклоне́ние, ниже́ пости́тися, ни зло страда́ти: еди́н же мне́ти день все вре́мя о́но, по подо́бию бу́душаго ве́ка, несть у́тро или́ ве́чер ви́дети. Се бо и прему́дрый Лука́ назна́менуя рече́: «Внегда́ сконча́тися дню Пятдеся́тницы», не рече́ днем, но дню, еди́н день нарече́ все вре́мя. То по о́бразу бу́душаго ве́ка, ему́же бу́ди всем нам получи́ти. Ами́нь.] Коне́ц толкова́нию.