Среда второй седмицы по Пасхе

Не́гли чрез потре́бы яви́хомся вам ско́рбни и тя́жцы пре́жде, уязви́тельнейше де́йствование сло́вом и до́лго на ле́ность мно́гих простира́юще сло́во осужде́ния. Но а́ще у́бо само́е сие́ опеча́лити произволя́ще вам то́кмо сия́ соде́яли бы́хом, в ле́поту у́бо ко́ждо вас стужа́л бы. А́ще же к поле́зному вам то́кмо зря́ще, ю́же в словесе́х благода́ть презре́хом, а́ще и не прия́ти восхо́щете благоразу́мия на́шего, но прости́ти толи́каго у́бо бу́дете пра́ведни любле́ния.

И́бо зело́ убоя́хомся, не тща́щимся у́бо нам, вам же не хотя́щим то же показа́ти о послуша́нии трудолю́бие. Испыта́ния бу́дущих люте́йша бу́дут. Те́мже и ча́сте принужа́емся воздвиза́ти вас и возбужа́ти, я́ко вы ничему́же от глаго́лемых претещи́. Си́це бо вам со мно́гим дерзнове́нием и ны́не леть бу́дет жи́ти, и во он день предста́ти суди́щу Христо́ву.

Поне́же у́бо дово́льне вас косну́хомся пе́рвее, принеси́ днесь от нача́л, в самы́я ре́чи да вложи́м: «Ви́дехом, рече́, сла́ву Его́, сла́ву я́ко Единоро́днаго от Отца́». Рек я́ко ча́да Бо́жия бы́хом, и показа́в, кото́рым о́бразом Сло́во плоть бы́ти . Па́ки и с того́ глаго́лет и и́но приобрете́ние. Ко́е же ли сие́ есть? «Ви́дехом, рече́, сла́ву Его́, сла́ву я́ко Единоро́днаго от Отца́, испо́лнь благода́ти и и́стинны». Не бы у́бо ви́дели, а́ще не вку́пе воспита́тельным с на́ми те́лом яви́л бысть. А́ще бо Моисе́я, того́же нам причаща́ющагося естества́, не стерпе́ша и́же по о́ному вре́мени лице́ то́кмо просла́влено уви́дети, но и прикрове́ния потре́бова пра́ведному, могу́щаго сла́вы кра́йнее спокры́ти и ти́хо и присту́пно проро́ческое им зре́ние показа́ти, ка́ко Божество́ на́го и Свет непристу́пный и саме́м го́рним си́лам, мы бе́рнии и земни́и возмогли́ бы́хом претерпе́ти? Сего́ ра́ди всели́ся в ны, я́ко и приступи́ти к Нему́, и бесе́довати, и сожи́ти возмо́жем со осла́бою мно́гою. Что же есть «сла́ву я́ко Единоро́днаго от Отца́»? Поне́же мно́зи и от проро́к просла́вишася, си́речь, сам сей Моисе́й, Илия́, Елисе́й. Ов у́бо от о́гненыя окружа́емь колесни́цы, ов же си́це взима́емь. И по о́нех: Дани́л, и трие́ о́троцы, и ини́и же мно́зи, ели́цы и чудеса́ показа́ша [и] просла́вишася. И а́нгели же близ челове́к яви́вшеся и сия́юще свет своего́ естества́ откры́вше зря́щим. Не а́нгели же то́кмо, но и херуви́ми со мно́гою яви́шася проро́ку сла́вою и серафи́ми та́коже. Всех же сих нас отводя́ евангели́ст, и тва́ри, и единора́бных све́тлости, воздви́г мысль к самому́ нас благи́х верху́. Наставля́ет ниже́ бо от проро́ка, рече́, ниже́ а́нгела, ниже́ арха́нгела, ниже́ го́рнейших сил, ни ины́я не́коея тва́ри естества́, а́ще у́бо ка́я есть и и́на ‐ но ⷭ҇Самого́ Влады́ки, Самого́ Царя́, Самого́ При́снаго Единоро́днаго Сы́на, Самого́ всех нас Го́спода сла́ву в́идехом. Сие́ же я́ко зде не уподоби́тельне есть, ниже́ при́тчи, но утверже́ния и несомне́ннаго разделе́ния - а́ки бы глаго́лал: «Ви́дехом сла́ву, якову́ подоба́ше и в ле́поту име́ти Единоро́дному и При́сному Сы́ну, су́щему всех Царя́ Бо́га». И мно́гим же обы́чай, не отреку́ бо ся и от мно́гих обы́чай сие́ утверди́ти. Кото́рой же есть обы́чай мно́гих? Царя́ мно́жицею зело́ укра́шена зря́ще не́цыи и честны́ми сия́юще каме́ньми отвсю́ду, егда́ у́бо к не́ким пове́дуют добро́ту о́ну, красоту́, сла́ву глаго́лют у́бо, ели́ко а́ще мо́гут: багряни́цы цвет, ка́меней вели́чество, бе́лость меко́в , су́щее на спряже́нии зла́та, посте́лю мя́гкую и сия́ющую. Егда́ же у́бо есть и сия́, и ина́я к сим наче́тше, не смо́гут всю све́тлость сло́вом предста́вити - а́бие сие́ наво́дят: «Что подоба́ет мно́гое глаго́лати - еди́ною я́ко царь», я́ко мне подо́бие царя́ бы́ти хотя́ще показа́ти сие́, о не́мже сия́ глаго́лют , но е́же самого́ царя́ при́сное бы́ти.

Си́це у́бо и евангели́ст, е́же я́ко положи́л есть премене́ное сла́вы и преиме́ющее, несосу́дне предста́вити хотя́, ини́и бо вси и а́нгели, и проро́цы повелева́еми вся творя́ху - То́йже со о́бластию Царю́ и Влады́це подоба́ющею, е́же у́бо и наро́ди чудя́хуся, зане́ уча́ше их я́ко о́бласть име́я. Яви́шася у́бо, е́же рех, и а́нгеле со сла́вою мно́гою на земли́, си́речь, о Дани́ле, о Дави́де, при Моисе́и, но я́ко раби́ и Влады́ку име́юще си́це вся творя́ху. То́йже я́ко Влады́ка и все́ми владе́я, и наипа́че с худы́м о́бразом и смире́нным яви́ся. Но оба́че и си́це тварь Влады́ку позна́ своего́.

Звезда́ у́бо от небеси́ волхво́в призыва́ше, покланя́ющихся Ему́. А́нгелом же мно́жество мно́го повсю́ду по вселе́нней излия́ся, Влады́ку осеня́ющих и воспева́ющых Его́. Ини́и же внеза́пу прозяба́ху пропове́дники, и вси друг дру́гу срета́ющеся, благовествова́ху неизрече́нное сие́ та́инство: па́стырей у́бо - а́нгели, су́щих же во гра́де – па́стырие, и Мари́ю - у́бо Гаврии́л, - и Елисаве́ть, еще́ же и во святи́лищи прише́дших - А́нна с Симео́ном. Не му́жие же и жены́ то́кмо от сла́дости впери́шася, но и́же не у́ на свет изше́д младе́нец, и́же пусты́ни жи́тель и сего́ тезоимени́тый евангели́ста, взыгра́ся в ложесна́х ма́тери еще́ сый, и вси высо́цы наде́ждею бы́ша. Сия́ убо в рождестве́ а́бие. Егда́ же наивя́щшее Себе́ изъяви́л есть, па́ки ина́я чудеса́ пе́рвых яви́шася бо́льша. Не ктому́ бо звезда́ и не́бо, ниже́ а́нгели и арха́нгели, ниже́ Гаврии́л и Михаи́л, но Сам Его́ свы́ше от небе́с пропове́даше Оте́ц и со Отце́м Уте́шитель, сходя́ у́бо Нань со гла́сом и пребыва́я на Нем. Вои́стинну сих ра́ди глаго́лаша: «Ви́дехом сла́ву Его́, сла́ву я́ко Единоро́днаго от Отца́». Не за сия́ же то́кмо, но и за е́же по сих сие́ рече́. Не ктому́ бо па́стыри то́кмо, ниже́ вдови́цы жены́, ниже́ му́жие ста́рцы нам благовеству́ют, но са́мый веще́й глас вся́кий трубы́ светле́йше вопия́, и си́це быва́я, я́ко и зде Его́ а́бие услы́шатися шу́му. «Отъи́де в Си́рию слух Его́» .

Тогда́ не́бо бе земля́, небе́снаго име́ющи Влады́ку, и всем Его́ откры́, вся отвсю́ду вопию́щи, я́ко Царь небе́сный прии́де. Бе́сове бо отвсю́ду бе́гаху и отскака́ху, и дия́вол посрами́вся отъи́де, и смерть пострада́ тогда́, и по сих коне́чное исчеза́ше. И вся́кого неду́га вид разреша́шеся. И ме́ртвых у́бо испуща́ху гро́бы, неи́стовящих же ся бе́сове, неду́жных же неду́зи. И бе ви́дети ве́щи пресла́вны и чу́дны, я́же в ле́поту вожделе́ша проро́цы ви́дети и не ви́деша.

Бе бо ви́дети очеса́ назида́емы, и желае́мое о́но е́же вси возжеле́ли бе́ша уви́дети, - ка́ко Ада́ма от земли́ созда́л есть Бог, - сие́ вкра́тце всем показу́юще, и в лу́чшей телеси́ ча́сти. Разсла́бленыя и расточе́нныя скле́ены у́ды и друг дру́гу счи́нены, ру́ки ме́ртвыя дви́жущася, но́ги разсла́блены внеза́пу ска́чуща, ушеса́ за́ткнутая отверза́ема, и язы́к глася́щь вельми́, безгла́сием пре́жде свя́занный, свы́ше сосотроя́емы у́ды: я́коже бо не́кий худо́жник изря́ден хра́мину от вре́мени согни́вшую восприе́м, о́бщее тогда́ челове́ческое естество́, си́це его́ и сломле́нныя напо́лни у́ды, и разстоя́щая, и разреше́нныя связа́, и соверше́нне па́дшее воздви́же. Что у́бо кто рече́т души́ назда́ние, мно́го чудне́йше е́же в телесе́х су́ще?

Ве́лие у́бо и теле́с здра́вие, мно́го же бо́льше душе́вное. И толи́ко бо́льше, ели́ко душа́ телеси́ лу́чши, не си́це же то́кмо. Но я́ко и теле́с естество́, иде́же а́ще есть Соде́тель привести́ хо́щет, си́це после́дует и сопротивля́ющиися ничто́же, душа́ же, госпожа́ себе́ бы́вши и де́йственых о́бласть име́ющи, не вся у́бо, но, а́ще не хо́щет, не повину́ется Бо́гу. Не хотя́щу же ю́же и ну́ждею, и принужде́ну не хо́щет сотвори́ти до́бру и доброде́тельну, - поне́же у́бо ниже́ есть сие́ доброде́тель, - но подоба́ет изволя́ющу и хотя́щу увеща́ти бы́ти такову́.

Те́мже люте́йше сие́ есть о́ноя врачева́ния, но оба́че и сие́ исправля́шеся, и всяк вид зло́бы отгоня́шеся. И я́коже телеса́ врачу́ема, не ко здра́вию то́кмо, но и ко здра́вию го́рнейшему преустро́и, си́це и ду́ши, не зло́бы после́дния свободи́ то́кмо, но и к самому́ доброде́тели верху́ приведе́. И мыта́рь - апо́стол показова́шеся. И гони́тель, и ху́льник, и досади́тель - пропове́дник вселе́нныя бысть. И волсви́ - учи́тели иуде́ом. И разбо́йник - рая́ жи́тель явля́шеся. И блудни́ца мно́гою ве́рою облиста́. И ханане́я и самаряны́ни жена́, и́на блудни́ца и сия́ – о́ва у́бо про́поведь еди́но племе́нных прия́т и всеце́л град си́це улови́вше приведе́ Христо́ви, о́важе ве́рою и приседе́нием бе́са лука́ваго отгна́ти дще́рины душы́ устро́ила есть. Ини́и же, мно́го сих го́рше, в чин учени́к а́бие вочто́шася, и вся стра́сти внеза́пу преобража́хуся теле́с, душе́вная неду́гования - и ко здра́вию и ко опа́снейшей доброде́тели пресозида́хуся. И сих не два и три челове́цы, ниже́ пять, и де́сять, и два́десять, и сто и еди́ни - но гра́ды всеце́лы и язы́цы со мно́гим удо́бством престроя́хуся.

Что у́бо кто рече́т веще́й любому́дрие, небе́сных зако́нов доброде́тель, а́нгельскаго жи́тельства благочи́ние? Таково́ бо нам введе́ житие́, таковы́х нам положи́л есть зако́нов, таково́ устро́и граже́нство, я́ко и́же си́ми де́йствующим - а́нгелом а́бие бы́ти и подо́бным Бо́гу по си́ле на́шей, а́ще и всех челове́к зле́йши прилуча́тся су́щи.

Сия́ у́бо вся собра́в евангели́ст чудеса́ - я́же в телеси́, я́же в душа́х, я́же во стихи́ях повеле́ния, да́ры неизрече́нныя о́не, и небе́с высоча́йшая, зако́ны, жи́тельство, повинове́ние, бу́дущая обетова́ние, страда́ния Его́ - чу́днаго сего́ и высо́ких испо́лненаго догма́т испусти́ гла́са, глаго́ля: «Я́ко ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стинны». Не чуде́с бо ра́ди то́кмо Ему́ диви́мся, но и страда́ний ра́ди - и́миже поне́же пригвозди́ся ко кресту́ и му́чен бысть, поне́же зауше́н бысть поне́же оплева́н бысть, поне́же прия́т на скра́нии я́звы от саме́х благоде́тельствованных. И́бо и о сих у́бо саме́х ви́дящихся поно́сных бы́ти, то́йже глаго́л па́ки досто́йно веща́ти, поне́же и сам сла́ву вещь нарече́. Не то́кмо промышле́ния и любви́ бе́ша быва́емая, но и си́лы неизрече́нныя. Тогда́ бо и смерть исчеза́ше, и кля́тва раздруша́шеся, и бе́сове посрамля́хуся и показова́хуся облича́еми, и рукописа́ние греху́ кресту́ пригвожда́шеся.

Та́же, егда́ сия́ чудоде́йствовахуся, бы́ша не́кое и ви́димо показу́юще, егда́ у́бо ра́спят бысть и к дре́ву пригвозди́ся. И в саме́х сих у́же показа́, я́ко Единоро́дный Сын бе Бо́жий и тва́ри всея́ Влады́ка. Еще́ бо блаже́нному телеси́ ви́сящу, отврати́ у́бо со́лнце луча́, зыбля́шеся земля́ и помрача́шеся вся, и гро́би у́бо растерза́хуся, и помо́ст тряса́шеся, и ме́ртвых наро́д безчи́сленный скака́ше и во град вхожа́ше. Гро́ба же Его́ ка́мению приложе́нным [к] ра́це, зна́мением належа́щим воста́ Ме́ртвый, Распя́тый, Пригвожде́нный, и си́лы мно́гия тогда́ двана́десяте ученико́в испо́лнив, посла́ су́щим по вселе́нней челове́ков, враче́й о́бших естества́ быва́ющих всего́ и житие́ исправля́ющих, небе́сных догма́т ра́зум всю́ду разсева́ющих, и мучи́тельство де́монское разруша́ющих, и вели́кое и неизрече́нное науча́ющих блага́я, и благовеству́ющих нам души́ безсме́ртие, те́лу живо́т ве́чный, я́же и ум превосходя́ще по́чести и никогда́же име́ющее конца́.

Сия́ у́бо и сих мно́жайша помы́слив блаже́нный сей, я́же ве́дяше у́бо сам, писа́ти же не терпя́ше за е́же не вмеща́ти ми́ру: «Вся бо, - а́ще кто рече́т, глаго́ла, - ниже́ самому́ мню ми́ру вмести́ти пи́шемыя кни́ги». Сия́ у́бо размы́слив, возопи́ я́ко «ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стинны».

Нравоуче́ние дванадеся́тое: о до́бре житии́ и ве́чней му́це:

И́же у́бо толи́ких зре́ний, таковы́х же сподо́бльшихся слы́шаний, толи́каго же наслади́вшимся да́ром - и житие́ досто́йно догма́т показа́ти подоба́ет, я́ко бы и та́мо наслади́тися благи́х. Сего́ бо ра́ди и прии́де Госпо́дь наш Иису́с Христо́с, да не то́кмо зде́шнюю сла́ву уви́дим Его́, но да и бу́дущую.

Сего́ ра́ди рече́: «Хощу́ да иде́же есмь Аз, и си́и бу́дут, да у́зрят сла́ву Мою́». А́ще же сия́ сла́ва си́це бысть све́тла и объявле́нна, что у́бо кто рече́т о о́ной? Не на земли́ бо яви́тся тле́нной, ниже́ во уведа́емых телесе́х су́щих нам, но в нетле́нней и нестаре́ющейся тва́ри - и с толи́кою све́тлостию, с ели́кою ниже́ сло́вом соста́вити возмо́жно.

О́, блаже́ннии, и треблаже́ннии, и сие́ мно́жицею, и́же сла́вы сподо́бльшеся о́ноя зри́тели бы́ти! О сей рече́ проро́к: «Да во́змется нечести́вый, да не уви́дит сла́вы Госпо́дня» . Но нам ни еди́ному же бу́ди взя́тися, ниже́ не зри́телю ея́ бы́ти когда́. А́ще бо не хоте́л бы наслади́тися нам сея́, благовре́менно и о нас рещи́: Добро́ бы бы́ло а́ще не роди́лися бы́хом. Что бо живе́м и ды́шем? Что же есмы́, а́ще зре́ние не получи́м о́ноя, а́ще Влады́ку на́шего никто́же нам попу́стит уви́дети тогда́?

А́ще бо и́же све́та со́лнечнаго неви́дящии, вся́кия сме́рти горча́йшу претерпева́ют жизнь, что пострада́ти ле́по све́та о́ного лиши́вшимся? Зде бо в сем то́кмо тщета́, та́може не до сего́ то́кмо - и́бо а́ще и сие́ то́кмо бы́ло бы лю́тое, ниже́ си́це ра́вное же му́ки бя́ше, но толи́ко люте́йше, ели́ко со́лнце о́но сего́ лу́чше несосу́дне есть.

Ны́не же и и́но есть ожида́ти томле́ния: о́ного бо све́та не зря́щему, ниже́ во тму подоба́ет отвести́ся тоќмо, но сгара́ти вы́ну, и истаява́ти, и скрежета́ти зубы́, и безчи́сленная ина́я страда́ти лю́тая. Да не у́бо пре́зрим са́ми себе́ ма́лыя ра́ди сея́ ле́ности и осла́бы в ве́чную впа́дающих му́ку, но да бдим, да трезви́мся, вся да де́йствуем и да промышля́ем, я́кбы о́ного получи́ти наслажде́ния и дале́че бы́ти реки́ о́гненыя, влеку́ющияся со мно́гим клокота́нием пред стра́шным суди́лищем Еди́ною бо впа́дшему та́мо, та́мо подоба́ет пребыва́ти вы́ну и от му́ки изъима́яй ни еди́н же: ни оте́ц, ни ма́ти, ни брат.

И сия́ са́ми проро́цы вопию́т: Ов бо глаго́ля: «Брат не изба́вит, изба́вит ли челове́к?» . Езекии́ль же и сего́ не́что вя́щше изъяви́л есть, рек: «А́ще ста́нет Но́е, и И́ов, и Дании́л, сыно́в свои́х и дще́рей не и́змут».

Еди́ного заступле́ния то́кмо е́же де́лы есть та́мо, и сего́ лише́нному и́нако спасти́ся несть. Сие́ у́бо вы́ну обраща́юще, и соблюда́юще, и размышля́юще, да очи́стим на́ше житие́ и све́тло да сотвори́м, я́ко бы со дерзнове́нием уви́дети Го́спода и обеща́нных получи́ти благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом, во ве́ки веко́в. Ами́нь.

Еда́ не вотще́ тече́м и тружа́емся? Еда́ не при пути́ и те́рниях нам утая́ются семена́ па́дающая? Бою́бося и страшу́ся зе́ло, да не неполе́зно нам земледе́лание бу́дет - и сия́ глаголю ничто́же хотя́ сам свою́ же труда́ сего́ врежа́тися мзду. Не бо якова́ земле́ тру́дников, такова́ и уча́щих есть. Де́латель бо по ле́тних мно́жицею труде́х и злострада́нии о́ном, и по тех а́ще ничто́же изнесе́т трудо́в досто́йно земля́, ни от еди́наго же ина́го мо́жет трудо́в утеше́ния обрести́, но возвраща́ется со студо́м и уничиже́нием от гумна́ в дом, и жену́, и де́ти ни еди́ного же име́я трудолю́бия до́лгаго истяза́ти возда́ние. О нас же ничто́же таково́ есть. И́бо а́ще и де́лаемая земля́ ни еди́наго же изнесе́т плода́; нам всяк показу́ющим труд, И́же и тоя́, и наш Госпо́дь не пре́зрит тщи́ми нас отходя́щим наде́ждами, но и даст воздарова́ния. «Ко́ждо бо, рече́, свою́ мзду прии́мет по своему́ труду́» , не по сбы́тию веще́й. «И ты, рече́, Сы́не челове́чь, засвиде́телствуй лю́дем сим, а́ще у́бо услы́шат, а́ще у́бо разуме́ют» . Иезекии́ль же рече́, а́ще стражь предрече́т, что у́бо бежа́ти, что же избра́ти тре́ба есть - ду́шу свою́ и́змет, а́ще и внима́я и ни еди́н же бу́дет. Но оба́че и кре́пко утеше́ние сие́ име́юще и о е́же к нам воздарова́нии дерза́юще, егда́ ва́ше де́ло уви́дим непреспева́юще, ничто́же лу́чше о́нех устро́имся де́лателей, воздыха́ющых и рыда́ющых, покрыва́ющыхся и стыдя́щыхся. Сие́ у́бо учи́теля сострада́ние, сие́ - промышле́ние оте́ческое, поне́же и Моисе́й, мо́щно ему́ неблагоразу́мия свободи́тися иуде́йскаго, и светле́йше нача́льство язы́ка ина́го прия́ти, и мно́го бо́льшаго, [«Оста́ви бо мя, рече́, и потреблю́ их и сотворю́ тебе́ в язы́к ве́лий» , не́жели сей, поне́же свят бе и Бо́жий раб бе, зело́ раб при́сный и до́блественый,] - ниже́ слы́шати претерпе́ сего́ гла́са, но изволя́ше па́че поги́бнути еди́ною со дарова́нными ему́ насле́дия, не́жели кроме́ оне́х спасти́ся и в досто́инстве бы́ти бо́лшем.

Такову́ бы́ти подоба́ет предста́телю душ. И́бо безме́стно дете́й у́бо име́ющему худы́х, ниже́ у́бо хоте́ти ины́х нарещи́ся отцу́, но и́же от него́ прозя́бших. Ученико́в же вруче́нному ины́х вме́сто ины́х пременя́ти при́сно, и ны́не у́бо сих, а́бие же о́нех, и по сих па́ки ины́х предста́тельство нам похища́ти и ни еди́ному же сво́йственне пребыва́ющым. Но о нас не бу́ди сия́ зазре́тися когда́. Наде́яхом бо ся, я́ко наипа́че избы́точествуете ве́рою я́же в Го́спода на́шего Иису́са Христа́ и любо́вию я́же друг к дру́гу и ко всем.

Сия́ же глаго́лем, хотя́ще тща́ние ва́ше простре́ти и возрасти́ти жи́тельства доброде́тель. Си́це бо и предлежа́щих нам слове́с в са́мую глубину́ вложи́ти возмо́жете разуме́ния, а́ще ниже́ еди́н вред зло́бы очесе́м помрача́ет мы́сли и прозри́тельное ея́ вас и ско́рое смуща́ет.

Что ли у́бо есть глаго́лемое на́ми днесь? «Иоа́нн сведе́телствует о нем и возопи́, глаго́ля: «Сей бе во след мене́ гряды́й, И́же пре́до мно́ю бысть, я́ко пе́рвее мене́ бе»». Мно́го есть сей евангели́ст, горе́ и до́лу Иоа́нн обраща́я и свиде́телства его́ во мно́гих ме́стех обнося́, твори́т же не про́сте сия́, но зело́ разу́мно. Поне́же бо мно́го чу́до имя́ху му́жа сего́ иуде́и вси, [и́бо и Ио́сиф сего́ сконча́нию рать вменя́ет, его́же ра́ди несть иуде́йский град я́же не́когда ма́ти градово́м су́щи и до́лгия взима́ет о нем словеса́ похва́л,] от себе́ иуде́ев подви́гути хотя́, ча́сте им воспомина́ет Предте́чева сведе́тельства.

И ини́и у́бо евангели́сти древне́йших помина́ют проро́ков и по коему́ждо и́же о Нем быва́емых та́мо посыла́ют послу́шателя. И егда́ ражда́ется, глаго́люще: «Сие́ же все бысть, да соверши́тся рече́нное Иса́ием проро́ком, глаго́лющим: «Се Де́вая во чре́ве прии́мет, и роди́т Сы́на, и нареку́т и́мя Ему́ Иису́с»» . Егда́ наве́туется и отвсю́ду опа́сне си́це взыску́ется, я́ко и безвре́менному во́зрасту закала́тися от И́рода - Иереми́ю на среду́ приводя́ще, глаго́лющаго: «Глас в ра́ме слы́шан, плачь, и рыда́ние, и вопль мног. Рахи́ль пла́чущи ча́да своя́» . И Оси́и воспомина́юще, егда́ от Еги́пта па́ки восхо́дит: «От Еги́пта бо, рече́, призва́х Сы́на Моего́» . И везде́ сие́ творя́т.

Сей же ясне́йше свиде́тельство соде́ловаяй, и нове́йше па́ки, и велегла́снейши ины́х веща́я, не отше́дших, ниже́ сконча́вшихся то́кмо - но и живу́щаго, и приходя́щаго, и показа́вшаго, и крести́вшаго Его́, сего́ на среду́ приво́дит ча́сте, - не Влады́ку от раба́ сотвори́ти достове́рна тща́ся, но не́мощи младе́нец сходя́, я́коже бо а́ще не раба́ зрак прия́л бы, не бы у́бо удо́бь прия́тен бысть, си́це а́ще не бы зра́ку раба́ слу́хи клевре́т предъобучи́л бы, не бы у́бо си́це мно́зи от иуде́й сло́во прия́ли.

К сему́ же и и́но состро́яше ве́лие и чу́дно, поне́же бо е́же самому́ не́коему о себе́ ве́лие не́что глаго́лати зазо́рно твори́т сведе́тельство и представля́ет мно́гим от слы́шащих, мно́жицею ин о нем прихо́дит сведе́тельствуя. И кроме́ сих, обыко́ша не́како мно́зи ко обы́чнейшему и совоспита́тельному им притека́ти па́че гла́су, а́ки сего́ па́че ины́х познава́юще.

Сего́ ра́ди и́же у́бо от небеси́ бысть еди́ною или́ два́жды, Иоа́нново же мно́жицею и ча́сте. О́ви бо возводя́ще часть людску́ю, и чу́вственых всех свободи́вшеся, и и́же свы́ше слы́шати можа́ху гла́са, и не зело́ челове́ческаго тре́боваху, но о́ному вся покаря́хуся и о о́ном вожа́хуся. О́ви же еще́ до́лу обраща́еми и мно́гими покрыва́лы сокрыва́ющеся, смире́ннейшаго сего́ тре́боваху.

Си́це у́бо и Иоа́нн, поне́же всех себе́ обнажи́ чу́вственных, не тре́боваше учи́телей и ины́х, но от небе́с наказова́шеся: «Посла́вый бо мя, рече́, крести́ти водо́ю, Он ми рече́: На Него́ же а́ще уви́диши Дух Бо́жий сходя́щь - Сей есть». А и́же еще́ де́ти иуде́и, и к высоте́ о́ной не могу́ще дости́гнути, челове́ка имя́ху учи́теля, челове́ка у́бо не своя́ же глаго́люща, но я́же свы́ше возвеща́юща. Что ли у́бо сей рече́? «Той сведе́тельствует о Нем и возва́ глаго́ля». Что есть е́же возва́? Со дерзнове́нием, со свобо́дою. Кроме́ обинове́ния вся́кого прише́ствие пропове́дует. Что же ли сведе́телсвтует и возва́? «Сей бе, рече́, Его́же рех по мне гряды́й, пре́до мно́ю бысть, я́ко пе́рвее мене́ бе». Сокрове́нно сведе́тельство еще́, мно́го смире́ние име́юще. Не рече́ бо: «Сей есть Сын Бо́жий Единоро́дный, При́сный Сын». Но что? Сей бе, Его́же рех по мне гряды́й, И́же пре́до мно́ю бысть, я́ко пе́рвее мене́ бе».

Я́коже бо ма́тери от птиц птенца́, не а́бие, ниже́ во еди́ном дни лета́ние изуча́ют все, но ны́не у́бо толи́ка изво́дят, ели́ко вне бы́ти гнезда́. Ны́не же их упоко́ити пе́рвее прилага́ют лета́ния. Нема́ло па́ки и су́щему по сему́ дню и́но мно́го вя́щше совоку́пляют и си́це ти́хо и пома́лу на подо́бящую приво́дят высоту́. Те́мже о́бразом и блаже́нный Иоа́нн, не а́бие на высо́кая иуде́ев возведе́, но пре́жде ма́ло от земли́ возлете́ти научи́л есть рек, я́ко его́ бо́льши бе Христо́с.

Ниже́ бо сие́ ма́ло бе пре́жде уве́рити слы́шащих, е́же си́це чу́дному и Иоа́нну глаго́лю и пресве́тлому, к нему́же вси теча́ху и его́же а́нгела непщева́ху бы́ти, И́же не у́ я́вльшагося, ниже́ чудоде́йствовашаго возмощи́ увеща́ти бо́льши бы́ти.

Пре́жде у́бо сие́ испра́вити потща́ся в мы́слех слы́шателей, я́ко сведе́тельствующаго Сведе́тельствуемый бо́льши есть, прише́дшаго пе́рвие И́же по сих прише́д, я́вственаго и пресве́тлаго И́же не у́ яви́вся. И зри ка́ко разу́мно вво́дит сведе́тельство. Не бо яви́вшагося то́кмо показу́ет, но и пре́жде да́же яви́тися пропове́дует. Е́же бо Сей есть - сие́ явля́ющаго есть, я́коже у́бо и Матфе́й глаго́лет, я́ко всем приходя́щим к нему́ глаго́лаше: «Аз у́бо вас креща́ю водо́ю, Гряды́й же по мне - крепча́йше мене́ есть, Его́же несмь дово́лен разреши́ти реме́нь сапога́» . Что же ли у́бо ра́ди и пре́жде яви́тися сие́ сотвори́л есть? Да благоприя́тно сведе́тельство бу́дет Я́вльшагося, мы́сли у́же слы́шавших предъудержа́вшися и́же о Нем рече́ньми и ничто́же худа́го вели́чества врежда́юща Ему́, но со осла́бою могу́щу душа́ мно́гих удержа́ти.

А́ще бо ничто́же ниже́ отню́д слы́шати ви́деша Го́спода и вку́пе сведе́нием слове́с сведе́тельство прия́ша, е́же си́це чу́дно и ве́лие и вели́ко, а́бие у́бо о́браза ху́дость близ есть вели́честву глаго́лемых. Си́це бо худ облежа́ще о́браз и общь всем Христо́с, я́ко и самаряны́ням жена́м, и блудни́цам, и мытаре́м со мно́гим безстра́шием дерза́ти Ему́ приступи́ти и бесе́довати, е́же у́бо рех, а́ще вку́пе и глаго́л услы́шали, и Его́ уви́дели у́бо, и подсмея́ли бы сведе́тельство Иоа́нново. Ны́не же пре́жде не́же яви́тися Христу́, мно́жицею слы́шаще и раздража́еми глаго́лемыми о Нем, сопроти́вное страда́ху: не е́же от глаго́л учи́тельство, от зре́ния сведе́тельствующаго отрева́юще, но от ве́ры у́же рече́нных и его светле́йша бы́ти непщу́юще. А е́же «во след мене́ гряды́й» - по мне пропове́дуяй, не «и́же по мне быв». Рече́ сия́ у́бо и Матфе́й, гада́тельствуя глаго́ля: «Во след мене́ гряде́т Мужь» - не о е́же от Мари́и рожде́ние Его́ глаго́ля, но о прише́ствии е́же по про́поведи.

А́ще бо о рожде́нии бы глаго́лал, не у́бо рекл бы гряде́т, но прии́де, рожде́н бо бе, егда́ сия́ глаго́лаше. Что ли у́бо есть «И́же пре́до мно́ю бысть»? Светле́йшь, честне́йшь. «Не поне́же бо пе́рвый приидо́х сведе́тельствуя аз, рече́, от сего́ бо́льши о́ного мене́ непщу́йте, мно́го бо ме́ньши аз, и толи́ко ме́ньши, я́ко ниже́ в ра́бий чин досто́ин бы́ти вчести́ся». Сие́ бо есть «И́же пре́до мно́ю бысть», е́же и́нако изъявля́я Матфе́й глаго́лаше: «Несмь досто́ин разреши́ти реме́нь сапога́ Его́».

Зане́же ниже́ е́же «пре́до мно́ю бысть» и я́ко не о е́же во е́же бы́ти прише́ствия сие́ рече́ся, наведе́нием я́вствено есть. А́ще бы сие́ хоте́л бы рещи́, изли́шне наведе́ние бы́ло бы, я́ко «пе́рвее мене́ бе». Кто бо си́це ка́менен и несмы́слен, я́ко не ви́дети, я́ко пе́рвее его́ бы́вый пе́рвее его́ бе. А́ще бо о бытии́ бы́ло бы преве́чно, ничто́же и́но есть глаго́лаемое, но ра́зве я́коже «во след мене́ гряды́й, пре́до мно́ю бысть, зане́ пе́рвее мене́ бе». Но и непремы́слимо таково́е, и вина́ всу́е прирази́ся. Сопроти́вное бо а́ще сие́ хоте́л бы изъяви́ти, подоба́ше рещи́, я́ко «И́же во след мене́ гряды́й, пе́рвее мене́ бе, поне́же и пре́до мно́ю бысть». Е́же бо пе́рвому бы́ти, в ле́поту у́бо кто сию́ дасть вину́ е́же роди́тися. А е́же пе́рвому бы́ти, не ктому́ е́же пе́рвее бы́ти вино́вно. А е́же мы глаго́лем, зело́ у́бо име́ет сло́во. Ве́сте бо не у́ сие́ вси, я́ко не я́же я́вствено, но безве́стная при́сно виносло́вия тре́бует.

А́ще же о существе́ сло́во бы́ло бы, не бы я́вствено бы́ло, я́ко пе́рвее бы́вшему пе́рвому подоба́ше бы́ти. Но поне́же о че́сти беседу́ет, в ле́поту мня́щееся недоуме́нием раздреша́ет. И́бо ле́по бе мно́гим недоуме́тися, отку́ду и от ко́его непщева́ния по́сле Гряды́й пре́жде бысть, си́речь, честне́йшь яви́ся.

Сего́ у́бо взыска́ние полага́ет а́бие вину́. Вина́ же е́же пе́рвому бы́ти Ему́: «Ниже́ бо от не́коего, рече́, преспея́ния пе́рваго мене́ су́ща, назади́ пове́рг, напреди́ бысть, но пе́рвее мене́ бе, а́ще и по́сле прихо́дит». И ка́ко рече́, а́ще о я́же от явле́ния в челове́це и бу́дущей последова́ти от них сла́ве глаго́лет, е́же не у́ коне́ц прия́ я́ко у́же бы́вшее глаго́лет? Не рече́ бо бу́дет, но бысть.

Зане́ обы́чай се проро́чествующим испе́рва есть, я́ко о бы́вших мно́жицею о бу́дущих бесе́довати. Иса́ия у́бо о закла́нии Его́ глаго́ля: не рече́ я́ко «овца́ на заколе́ние веде́н бу́дет», е́же бе бу́душаго, но веде́ся . А́ще и не у́ ниже́ воплоще́н бе, но оба́че бу́дущее проро́к я́ко бы́вшее глаго́лет. И Дави́д, Крест явля́я, не рече́ «ископа́ют р́уце мои́ и но́зе мои́», но «ископа́ша ру́це мои́ и но́зе мои́, и раздели́ша ри́зы моя́» и «о оде́жди мое́й мета́ша жре́бия» . И о преда́тели глаго́ля, и́же не у́ ро́ждьшемся, си́це глаго́лаше: «Яды́й хлеб мой, возвели́чил есть на мя запина́ние» .

И о и́же при Кресте́ бы́вших: «Да́ша в снедь мою́ желчь, и в жа́жду мою́ напои́ша мя о́ксоса » . Хо́щете ли и про́чее приведе́м или́ сия́ довле́ют? Аз у́бо мню, а́ще бо и немно́го воскопа́ем ме́сто, но во глубине́ воскопа́ем, не ме́ньши же сие́ о́ного труда́ име́ет; и́же у́бо и убоя́хомся, да, не безме́рне са́ми себе́ протя́гше, сотвори́м возлещи́. Те́мже коне́ц да наложи́м сло́ву подоба́ющий. Кото́рый ли у́бо есть подоба́ющий? Славосло́вия ле́пое Бо́гу подоба́ет же не е́же глаго́лы то́кмо, но мно́го па́че е́же ве́щьми.

Нравоуче́ние тринадеся́тое: [о нищелю́бии, я́ко наибо́льшая же́ртва Бо́гу есть:]

«Да восия́ет бо рече́ свет ваш пред челове́ки, да уви́дят ва́ша до́брая де́ла, и просла́вят Отца́ на́шего Су́щаго на небесе́х». Вои́стинну бо ничто́же светле́йше изря́днаго жи́тельства есть, я́коже и от прему́дрых не́кто глаго́лаше: «Пути́ е́же пра́ведных подо́бне све́ту сия́ют». Сия́ют же не саме́м то́кмо свет вжига́ющым де́лы и наставля́ют к пра́вому пути́, но и бли́жним су́щим о́нех сия́ющия.

Да возлее́м у́бо еле́й свети́льником сим, я́ко бы высоча́йшу бы́ти огню́, я́ко бога́тному яви́тися све́ту, еле́й бо сей не ны́не то́кмо име́ет кре́пость, но, егда́ и же́ртвы цветя́ху, преодоле́ мно́гою ме́рою о́нех си́лу: «Ми́лость бо хощу́, а не же́ртву» , рече́. И па́че в ле́поту: он бо - безду́шен же́ртвеник, сей же - одушевле́н. И та́мо у́бо возложе́нное все огню́ быва́ет изнуре́ние, искончева́ется в прах, и разлива́ется в пе́пел, и в возду́шное естество́ дым разреша́ется. Зде же ничто́же таково́, но ины́я но́сит пло́ды.

И сие́ Па́вел явля́ше глаго́ля, ни́ще бо лю́бия кори́нфян сокро́вища пове́дуя, си́це писа́ше: «Я́ко слу́жба служе́ния сего́ не то́кмо есть наполня́ющи лише́ния святы́х, но и преизбы́точествующи мно́гими благодаре́нии Бо́гови». И па́ки: «Сла́вяще Бо́га о покоре́нии испове́дании ва́шего во благовествова́нии и простото́ю обще́ния в них и во всех, и тех моли́твою в нас жела́ющих вас» .

Зри́ши ли во благодаре́нии разреша́емо сие́, и похвалу́ Бо́жию, и ча́стыя моли́твы бла́го прие́млющих, и тепле́ющую любо́вь? Да пожре́м у́бо возлю́блении, да пожре́м на само́м же́ртвенице на всяк день. Сия́ и моли́твы, и поста́, и мно́гих ины́х есть бо́льши же́ртва. То́кмо а́ще от пра́ведных быва́ет трудо́в и приобрете́ния такова́ и вся́кого лихоима́ния чи́сто, и хище́ния, и ну́жи. Такова́я бо прие́млет приноше́ния Бог, ина́я же отвраща́ет и ненави́дит, ниже́ бо хо́щет от чужди́х почита́тися напа́стей. Нечи́ста бо и скве́рна такова́я же́ртва и раздража́ти бо па́че, не́жели уми́лостивити Бо́га.

Те́мже вся́ким де́йствовати подоба́ет тща́нием, я́ко бы не чи́ном угожде́ния почита́емому досажда́ти. А́ще бо пра́ведная прине́с Ка́ин и наипа́че и ни еди́наго же оби́дев ина́го, пострада́ казнь после́нюю - егда́ же и от похище́ния, и от лихоима́ния прино́сим, ка́ко не постра́жет люте́йшая? Сего́ бо ра́ди и вид за́поведи сея́ показа́л есть Бог. Да ми́луем, а не да му́чим клевре́т. Ины́х же взима́яй и ино́му дая́, не поми́лова, но и му́чи, и оби́де оби́дою после́днею.

Я́коже у́бо еле́й не у́бо ражда́ет ка́мень, си́це ниже́ лю́тость - человеколю́бие. Егда́ бо таќов име́ет ко́рень, не ктому́ ми́лостыня таково́е есть.

Те́мже молю́ не́коему зре́ти то́кмо, я́ко да подади́м тре́бующим, но и я́ко да и не о похище́ния ины́х. «Еди́н бо моля́ся, и еди́н проклина́я» - что по́льзоваше ра́зве труды́? А́ще си́це себе́ со опасе́нием во́дим, возмо́жем Бо́жиею благода́тию мно́гаго человеколю́бия, и ми́лости, и проще́ния прилучи́ти о ни́хже согреши́хом все до́лгое сие́ вре́мя и о́гненыя реки́ избежа́ти, ея́же бу́ди всем нам свободи́вшимся в небе́сное вни́ти Ца́рствие благода́тию и человеколю́бием Го́спода на́шего Иису́с Христа́, с Ни́мже Отцу́ сла́ва, со Святы́м и Животворя́щим Его́ Ду́хом, ны́не и при́сно во ве́ки веко́в. Ами́нь.

И егда́ сконча́шася дни́е Пятидеся́тницы, бе́ша вси апо́столи единоду́шно вку́пе. И бысть внеза́пу с небесе́ шум, я́ко носи́му дыха́нию бу́рну. И испо́лни весь дом, иде́же бя́ху седя́ще.

Толкова́ние Златоу́ста: Подоба́ше у́бо пра́зднику су́щу сия́ бы́ти, да су́щии в распя́тии Христо́ве и сия́ зрят. Поне́же у́бо в день Пятьдеся́тницы да́сться зако́н, Бо́гу я́вльшуся и зако́но положи́вшу, и Моисе́ю скрижа́ли прие́мшу, - подоба́ше в то́йже день и Ду́ха Свята́го благода́ть Христо́вым ученико́м и апо́столом ниспосла́тися, да и госпо́дьство Ду́ха пока́жется, и Бо́жие явле́ние яви́тся, и пока́жется неразде́льно естество́ Бо́жия соста́ва: в Ве́тсем заве́те и Но́вем, и в разли́чных времена́х еди́но содева́я согла́сие боже́ственных слове́с. Я́коже Спас наш Иису́с Христо́с, хотя́ испо́лнити святу́ю стра́сть, не изво́ли во и́но вре́мя Себе́ вда́ти на страсть, но в не́же вре́мя дре́вним да́сться зако́н, да яви́тся я́ко Святы́й Дух и тогда́ зако́н положи́, - и ны́не зако́н полага́ет.

Северия́на. Христо́с Бог наш пострада́в во́льное страда́ние пло́тию, и воскре́се из ме́ртвых, и воскреси́в с Собо́ю грехо́м умерщвле́нных нас, и дия́волю держа́ву разруши́в, - сего́ ра́ди да́же до Пятьдеся́тницы на земли́ не покланя́емся, моля́щеся, но на вразе́х на́ших пое́м, глаго́люще: «Ти́и спя́ти бы́ша и падо́ша, мы же воста́хом и испра́вихомся» . О́гнеными же язы́ки Ду́ху Свято́му боголе́пно я́вльшуся нам, коле́но прекланя́ем, виде́ния не терпя́ще, явля́я, я́ко Ду́хом Святы́м Тро́ичное соверше́ное поклоне́ние научи́хомся: «Дух бо Бог, и покланя́ющимся Ему́, ду́хом и и́стинною подоба́ет кла́нятися» . И испо́лни, рече́, весь дом, иде́же бя́ху седя́щеи, дом - всему́ ми́ру о́браз бе.

Су́щее: И яви́шася им разделе́ни язы́цы, разделя́юще, я́ко о́гнени.

Толкова́ние: И я́ко о́гнени рече́, да не еди́но чу́вственно, но о Ду́се помы́слиши. Егда́ бо Иоа́нну Крести́телю Святы́й Дух позна́тися хотя́ще, виде́нием голуби́нным на главу́ Христо́ву сни́де. Ны́не же, егда́ все мно́жество обрати́ти подоба́ше, я́ко язы́цы о́гнены яви́шася.

Севериа́на: Не рече́ о́гнени, но я́ко о́гнени. И́бо не бя́ше огнь ви́димое, но огнь Ду́ху Свято́му предте́ча бе, да в страх подви́гнет апо́столы Ду́ха Свята́го виде́ние. И да не в доса́ду прии́меши тогда́ свято́е и покланя́емое естество́, я́ко о́гненое виде́ние яви́ся. Сказа́ет но́вая бы́вша дре́вле Моисе́ом: глаго́лет Моисе́й виде́ние Бо́га Изра́илева в горе́ Сина́йстей я́ко огнь горя́. Зри сказа́ние согла́сно су́ще, сла́ва о́на Изра́илева я́ко огнь. Не рече́ «огнь», но «я́ко огнь». И зде яви́шася язы́цы я́ко о́гнени разделя́юще, не рече́ «разделя́ющеся», но «разделя́юще». Внима́й ма́ло, ка́ко се бысть. Не яви́шася а́бие язы́цы, но огнь мно́го, та́же я́ко сломя́шеся огнь, и разделя́шеся язы́цы. Кто разделя́ше или кто разделя́емый? Не естество́ Ду́ха разделя́шеся, но бе Дух Святы́й разделя́яй. Разделя́емо е́же бе дарова́ние Свята́го Ду́ха. Дух бо не разделя́ется, но разделя́ет. Яви́шася, рече́, разделя́юще язы́цы, я́ко о́гнени. Почто́ я́ко о́гнени, почто́ язы́цы? Поне́же пропове́данием бе спасе́ние; да о́браз ска́жет де́йство, я́ко ничи́м же ины́м не дае́тся Дух Святы́й виде́нием язы́к, но о е́же пропове́данию процвести́ апо́стольским уче́нием. И я́же лиша́еми бы́ша ры́бари не навыче́нием свое́ю гру́бостию, сия́ даде́ся им их ра́ди, да те́ми глаго́лемая разли́чными язы́ки, и преиме́ние дарова́ние иму́ще просвеща́ти слы́шащих. Подоба́ше же и о́гненую си́лу име́ти, во е́же сне́сти су́щий по всему́ ми́ру тиме́нный грех. И я́коже огнь и́мать све́тлостную и горя́щую си́лу, си́це и сло́во апо́стольское просвеща́ше ве́рующая и снеда́ше сопроти́вящаяся. Тако́в имя́ше о́гненный язы́к Па́вел, и́мже и анфипа́та просвети́ и Ели́ма волхва́ ослепи́. То́юже си́лою мно́гия просвети́, и сего́ омрачи́.

Севериа́на епи́скопа Антиохи́йскаго: По е́же на небеса́ восхожде́ние вели́каго Бо́га и Спа́са на́шего Иису́са Христа́, по обеща́нии нело́жнаго гла́са о́наго, о́гнеными язы́ки на апо́столы Дух Святы́й сни́де, и́мже вся́ческими язы́ки по всей вселе́нней глаго́люще и Ца́рство небе́сное пропове́дающе: явля́ху, я́коже дре́вле челове́ческому гла́су, еди́ну су́щу, на мно́ги раздели́в, ны́не всех язы́к во еди́но дыха́ние сочета́.

Сущее: И се́де же на еди́ном кого́ждо их, и испо́лнишася вси Ду́ха Свя́та.

Толкование Иоанна Златоуста: И се́де на еди́ном кого́ждо их рече́, си́речь, пребы́сть, почи́. Е́же бо се́сти, спожи́ти и спребыва́ти назна́менует. У́бо ли на двунадесятих то́чию сни́де? Ни, но на сто и два́десятих. Не про́сто у́бо приведе́ свиде́тельство проро́ка Петр глаго́ля: «И бу́дет в после́дняя дни, глаго́лет Бог, излию́ от Ду́ха Моего́ на вся́ку плоть» , и про́чая.

Севериа́на епи́скопа Габа́льскаго: И бе ви́дети над глава́ми их огнь не попаля́я, но освяща́я и просвеща́я. Почто́ у́бо язы́ки во усте́х свои́х не прия́ша, но на главы́? Подо́бно, я́ко не в язы́це, си́речь, в есте́ственный орга́н да́стся Дух Святы́й, да не мнят я́ко свои́ми бо́ки или́ свои́ми усты́ глаго́лют, я́же не име́яху. Но я́коже во́ды на не́бо взе́млеми верху́ гор достиза́ют, и от высо́т в де́бры схо́дят, та́ко верх апо́стольский, я́ко го́ры благода́ть Свята́го Ду́ха дости́гнеши, про́чее пода́ст се по всей главе́, та́же во усте́х и в се́рдцы и вся́ко, всего́ челове́ка испо́лни. Почто́же па́ки на главу́ сни́де Святы́й Дух? Поне́же апо́столы рукоположе́ние прия́ша, е́же бы́ти всей вселе́нней учи́телие. Прия́ша бо от Спа́са Иису́са Христа́ рукоположе́ние е́же бы́ти апо́столы не всей вселе́нней, но то́чию во Иуде́и. Те́мже запреща́ше им Спас глаго́ля: «В путь язы́к не иде́те, и во град Самари́йский не вни́дете». Дух же Святы́й соше́д, рукоположи́ апо́столы всей вселе́нней. И а́ще не бы́ша прия́ли Ду́ха Свята́го благода́ть, не бысть подало́ им апо́стольство всего́ ми́ра. Свиде́тельствует сих глаго́л Влады́ки рече́: «И приими́те си́лу прише́дшу Свято́му Ду́ху на вы. И бу́дете Ми свиде́телие во Иеросали́ме и по всей Иуде́и и Самари́и и до после́дних земли» . Нача́ло у́бо от Спа́са прия́ша апо́столы, коне́ц же, си́речь, соверше́ние, прише́ствием Свята́го Ду́ха. «И испо́лнишася вси Свята́го Ду́ха», рече́, испо́лнишася и нача́ша глаго́лати, я́коже Дух Святы́й дая́ше им провещева́ти. Не рече́ веща́ти, но провещава́ти. И́бо не о себе́ глаго́лаху, но Святы́м Ду́хом. Про́чее, Бо́жия благода́ть дая́ше смотри́ изнача́ла, апо́столом искуше́но бы́ти сло́во. Ка́я бе потре́ба пропове́дник, слы́шащих не су́щих, ка́я потре́ба се́мени, земли́ неора́не? Поне́же у́бо подоба́ше нача́ток язы́к от самы́х ученико́в и апо́стол чин прия́ти, приво́дит списа́тель, «и нача́ша глаго́лати ине́ми стра́нными язы́ки», и про́чая.

Су́щее: И нача́ша глаго́лати ине́ми язы́ки, я́коже Дух дая́ше им провещева́ти.

Толкова́ние: Почто́ у́бо пре́жде ине́х даро́в язы́ки дарова́ние прия́ша апо́столы? Повсю́ду проходи́ти хотя́ху. Я́коже во вре́мя столпотворе́ния еди́н язы́к на мно́ги разделя́шеся, си́це тогда́ мно́ги язы́цы мно́гажды в еди́ного челове́ка бя́ше, и то́йже челове́к, пе́рский, гре́ческий, инди́йский, и ины́х мно́гих язы́к глаго́лаше, Ду́ху внуша́ющу ему́. И дар нарица́шеся «дарова́ние язы́к», поне́же мно́гими внеза́пу можа́ше глаго́лати гла́сы.

Су́щее: Бя́ху же во Иеросали́ме живу́ще иуде́и, му́жие благогове́йни, от всего́ язы́ка и́же под небесе́м. Бы́вшу же гла́су сему́, сни́деся наро́д и размеси́ся, я́ко слы́шаху еди́ного кого́ждо свои́м язы́ком глаго́лющим им.

Толкова́ние: Е́же от всех язы́к та́мо жи́ти, благогове́инства зна́мение бе. Оте́чества оста́вивше, и дом, и сро́дники, да пока́жет им по дре́внему зако́ну, три́жды на год в це́ркви явля́тися. Сего́ ра́ди та́мо живя́ху от всех язы́к. Поне́же в хра́ме сотвори́ся бы́вшее, подо́бно отвну́ наро́ды стеко́шася. Бысть, рече́, внеза́пу с небеси́ глас, да бы́вшаго ра́ди гла́са мно́жество собере́тся та́коже, я́коже есть обы́чай челове́ком, друг дру́га вопроша́ху, глаго́люще: «Трус ли бысть? Ветр ли бысть? Бо́жие ли смотре́ние се бысть?». Та́же глаго́лет: Ни, но ученицы́ Распя́таго Дух Святы́й прия́ша и нача́ша вси не я́ко дру́зи су́ще, но я́ко самови́дцы стра́ннаго виде́ния та́мо собира́тися. Бы́вшу же, рече́, гла́су тому́, сни́деся наро́д и размеси́ся стра́ха ра́ди, и да пока́жет, я́ко размеше́ние страх сотвори́, и стра́нное виде́ния: «Размеси́шася, рече́, стра́хом», есть бо размеше́ние устрое́ние содева́я, егда́ страх Бо́жий смуща́ет тя, во умиле́ние тя прино́сит. Смути́лся еси́ сове́стию грехо́вною? Устро́ился еси́ упова́нием покая́ния.

Су́щее: Дивля́хужеся вси, и чужда́хуся глаго́люще друг ко дру́гу: «Не се ли си́и вси суть глаго́лющеи галиле́яне. И ка́ко мы слы́шим ко́ждо свои́м язы́ком на́шим, в не́мже роди́хомся, парфя́не и ми́дяне и елами́те, и живу́щеи между́ река́ма, во Иуде́и же и Каппадоки́и, в По́нте и во Аси́и, во Фриги́и же и Памфили́и, во Еги́пте и страна́х Ливи́йсках, и́же по Кирини́и? И приходя́щеи ри́мляне, иуде́и же и прише́льцы, кри́тяне и ара́влян, слы́шим глаголю́щим им на́шими язы́ки вели́чия Бо́жия». Толкова́ние Севи́ра епи́скопа Габа́льскаго: Помышля́ху у́бо в себе́ глаго́лаху друг ко дру́гу вси, и́же от язы́к: «Не се ли вси глаго́лющеи суть галиле́яне?», - познава́ху бо ся ученицы́ от пребыва́ния Спа́сова, и от глаго́лания пе́рваго. Пятна́десятим язы́ком у́бо прия́ша дарова́ния: ели́ко к настоя́щему тогда́ наро́да. Ка́я у́бо потре́ба бя́ше пе́рскаго язы́ка, пе́рсян не су́щих? Но я́коже во бране́х вся́ко ко́зньство стро́ится, и вся́ко ухищре́ние ко́ждо сих де́йствует в потре́бе и ну́жди бы́вшей, си́це толи́цы язы́цы яви́шася тогда́, ели́ко бе́ша язы́ком нача́тки, да и Тро́ичное де́йство яви́тся, и слуги́ двана́десяте. Бя́ше бо ви́дети галиле́янина Петра́, ри́мски глаго́люща, язы́ком его́же не зна́яше, да испо́лнится сло́во проро́ческое: «Язы́ка его́же не ве́деша, услы́шаша» . Сматря́ет же Дух Святы́й, да не бу́дет ра́спря во апо́столех, где подоба́ет кому́ждо их поити́, дае́тся кому́ждо язы́к я́коже пра́вило: Ри́мски ли глаго́леши? Иди́ в Рим. Пе́рски ли глаго́леши? Иди́ в Пе́рсию. И я́коже рукоположе́ние свяще́нническо пове́дует рукоположе́наго досто́инство: или́ дия́кон, или́ презви́тер, или́ епи́скоп, не мо́жет по оглаше́нии са́на своего́ похи́тити и́но досто́инство, си́це и апо́столы Ду́хом Святы́м прия́ша пра́вило: и како́в язы́к кому́ дая́шеся, на такову́ страну́ идя́ше. Но поне́же па́ки, до́ндеже хотя́ху поити́ ко́ждо в свою́ страну́, имя́ху проходи́ти сквозе́ мно́гих язы́к, того́ ра́ди приима́ху я́ко помо́щники и́ни язы́ки, от рукоположе́ния иму́ще. Обрета́ется у́бо ко́ждо от апо́стол разли́чными язы́ки глаго́ля, поне́же и посреде́ мно́гих язы́к прохожда́ху. И бысть пра́вило и преде́л, ему́же ко́е отлуче́но бе: сей да взы́дет восто́чныя стра́ны, сей же на за́пад, ов у́бо на се́верныя, ов же на ю́жныя. И растека́хуся пропове́дницы, я́коже мо́лние внеза́пу, я́коже о них глаго́ланно бысть проро́ческим язы́ком: «Просвети́ша мо́лния Твоя́ вселе́нную ви́де, и подви́жеся земля́» . И́бо мо́лния не подвиза́ют зе́млю, но трус; но поне́же апо́столское пропове́дание свободи́ язы́ки от беззако́нных обы́чаев, ви́де и подви́жеся земля́. И ка́ко подвиза́шеся? Егда́ вни́де Па́вел в Македо́нию, подвиза́ся земля́: нача́ша бо е́ллини глаго́лати: «Я́ко и́же вселе́нную смуща́ющеи, си́и зде приидо́ша». Сия́ же о́браз нам бы́ша, да никогда́ же, слы́ша досажде́ния, сло́во поскорби́ши. Не оскудева́ет бо доброде́тель за́вистию, ни Бо́жие уче́ние злых муче́нием.

Сущее: Ужаса́хужеся вси и не домышля́ху еди́н ко друго́му глаго́люще, что у́бо хо́щет се бы́ти. Ини́иже руга́ющеся глаго́лаху: «Я́ко мстом испо́лнени суть».

Толкование Златоустаго: О безу́мию и несту́дству! Тре́тий час дню бе, и глаго́лаху: «Вино́м пия́ни суть». И что чу́дно? И́же бо и Самого́ Влады́ку, бе́сы изгоня́ща, бе́са име́ти глаго́лаху. Иде́же бо зло́ба и за́висть, не и́щет, что рещи́, толи́ко бы рещи́ .

Севериа́на: Бог де́йствоваше, и пия́нству сия́ воспомина́ху, пия́нству вмени́ся Ду́ха Свята́го плод! Позри́ зло́бу, и вре́менем, и ча́сом облича́ему. В Пятдеся́тницу отку́ду есть мсто? Но лжа сле́па есть, и не весть, ка́ко лжет. Та́же егда́ пия́нство ли разли́чныя язы́ки дае́т, или́ и су́щаго безве́стна твори́т? Зри у́бо что сотворя́ет Бог: оставля́ет доброде́тель на поруга́ние, да пре́жде сни́дет мно́жеству поруга́тель, и тогда́ просия́ет си́ла святы́х, и та́ко де́йство яви́тся, разруша́я лжу. А́ще бо и не помышля́ху иуде́е руга́ние бы́ти, оба́чеже не хотя́ху приити́ и слы́шати. Попусти́ у́бо Бог, да мне́ние поруга́ния мно́зех на таково́е виде́ние собере́т. Апо́столом у́бо ева́нгельское уче́ние принося́щим обновле́нием Ду́ха, а не обетша́нием пи́смени; и се зна́мение, е́же глаго́лати им вся́кому ро́ду их язы́ком, и́же в гресе́х состаре́вшиися иуде́е и́стинну, и не хотя́ще, глаго́лаху, «я́ко мстом испо́лнени суть»: вино́ бо но́во бе соверше́на Ду́ха Свята́го благода́ть, е́юже апо́столы, о́гнеными язы́ки очи́стившеся, испо́лнишася. Коне́ц толкова́нию.