Четверг второй седмицы по Пасхе

Пе́рвее глаго́лахом я́ко о Иоа́нне, - недоуме́ние разреша́я хотя́щих к себе́ взыскова́ти, отку́ду Госпо́дь по́сле дни́й на про́поведь прише́д, Пе́рвый его́ бысть и светле́йшь, - наведе́, я́ко «Пе́рвее мене́ бе». И еди́на у́бо сия́ вина́. Полага́ет же и втору́ю па́ки, ю́же ны́не рече́. Ка́я же ли есть сия́? «От исполне́ния Его́ мы вси прия́хом и благода́ть вме́сто благода́ти». И с си́ми па́ки глаго́лет и ину́ю: «Я́ко зако́н Моисе́ом дан бысть, благода́ть и и́стинна Иису́с Христо́м бысть» . И что есть, рече́, е́же «От исполне́ния Его́ мы вси прия́хом»? На пе́рвое бо возводи́ти подоба́ет сло́во. Не по прича́стию, рече́, име́ет дар, но Сам исто́чник и Сам ко́рень есть благи́х, Сам живо́т и Сам свет и Самая́ и́стинна. Не в себе́ содержа́ благи́х бога́тство, но и во ины́х всех истача́я е́, и по е́же источи́ти пребыва́я испо́лнен, и ничи́мже умаля́емь от е́же во ины́х подая́ния, но, при́сно истача́я и всем сих преподава́я до́брых, в то́мже пребыва́ет сверше́нии. А е́же аз ношу́ прича́стно есть, от ина́го бо прия́х сие́, - ма́ло не́что вся́ческаго, и а́ки ка́пля худа́ к бе́здне неизрече́нней и пучи́не безме́рней.

Па́чеже, ниже́ сие́ указа́ние предста́вити возмо́жет у́бо е́же начина́ем рещи́. Ка́плю бо от пучи́ны а́ще и́змеши, саме́м сим пучи́ну ума́лил еси́, а́ще и не я́вствено умале́ние. О исто́чнице же о́ном несть сие́ рещи́, но ели́ко а́ще кто поче́рпет, пребыва́ет ничи́мже умаля́ем. Те́мже подоба́ет наипа́че на и́но указа́ние приити́: немо́щно у́бо и сие́ и не могу́щее же взыску́ем предста́вити, па́чеже пе́рвому руково́дствующу нас к разуме́нию, предложе́нному нам ны́не.

Предположи́м бо бы́ти о́гненому исто́чнику. Та́же от исто́чника о́ного безчи́сленым возжещи́ся свети́лником, и два́жды коли́ким, и три́жды, и мно́жицею. Еда́ не в то́мже пребыва́ет исполне́нии огнь и по е́же да́ти толи́ким благодея́ния своего́? Вся́ческому я́вствено есть.

А́ще же о телесе́х разу́мных умаля́емых отъя́тия обрета́ется не́что таково́, е́же и по е́же да́ти ины́м я́же от тебе́, ничи́мже врежа́ются - мно́го па́че о безтеле́сней и нетле́нней си́ле о́ной сие́ случи́тся. А́ще бо иде́же существо́ есть подлежа́щее те́ло, - и разделя́ется, и не разделя́ется, - мно́го па́че егда́ о де́йстве сло́во бу́дет и де́йстве е́же от безстеле́снаго существа́, ничто́же ле́по таково́ пострада́ти. Сего́ ра́ди Иоа́нн глаго́лаше: «От исполне́ния Его́ вси прия́хом». Не Предте́чев есть глаго́л, но ученико́в. А е́же глаго́лет, таково́ есть: не непщу́йте, рече́, я́ко мы бы́вшии с ним мно́го вре́мя, и соле́й, и трапе́зы приобщи́вшеся, благода́тию свиде́тельствуем. И́бо Иоа́нн и́же ниже́ ве́дев Его́ пре́жде сего́, ниже́ сопребы́в, но толи́ко то́кмо егда́ креща́ше со ины́ми Его́ ве́дев, вопия́ше: «Пе́рвый мене́ бе», отту́ду вся прие́м.

И мы же вси: двана́десять, три́десятнии, пятьдеся́тнии, ты́сящнии, пятиты́сящнии, мно́гия иуде́й тмы, все исполне́ние ве́рных, и су́щих тогда́, и ны́не, и и́же па́ки бу́дущих - от исполне́ния Его́ прия́хом. Что же ли прия́хом? Благода́ть вме́сто благода́ти, рече́. Вме́сто коея́ кою́? вме́сто дре́вния но́вую. Я́коже бо бе пра́вда и пра́вда, [«по пра́вде бо, рече́, зако́нней быв непоро́чен» ,] и ве́ра и ве́ра, [«от ве́ры бо, рече́, в ве́ру» ,] и сыноположе́ние и сыноположе́ние, [«и́хже бо сыноположе́ние» , рече,] и сла́ву и сла́ву, [«а́ще бо упражня́емое, сла́вою, мно́го па́че пребыва́ющее во сла́ве» ,] и зако́н и зако́н, [«зако́н бо, рече́, ду́ха жи́зни свободи́ мя» ,] и слу́жба и слу́жба, [«и́хже бо слу́жба» , рече́. И па́ки: «ду́хом Бо́гови служа́ще» ,] и заве́т и заве́т, [«завеща́ю бо вам заве́т нов, не по заве́ту его́же завеща́х отце́м ва́шим» ,] и освяще́ние и освяще́ние, и креще́ние и креще́ние, и же́ртва и же́ртва, и храм и храм, и обре́зание и обре́зание - си́це и благода́ть и благода́ть.

Но о́на у́бо я́ко о́брази, сия́ же я́ко и́стинна. Вку́по име́нства не́кое, а не соименства соблюда́юща. Поне́же и во о́бразех, и в се́нех, и и́же писа́ньми бе́лыми, и на че́рном шару́ начерта́нная - челове́к глаго́лется и прие́мый шаро́в и́стинну. И на о́бразех, и зла́то, и бе́рнен - о́браз нарече́ся. Но то у́бо а́ки о́браз, то же я́ко и́стинна. Не у́бо я́ко от обще́ния име́н то́ждество веще́й вознепщу́еши, но ниже́ очуже́ние. А́ще бо о́браз был бы, не бы отчуже́ние [и́стинны]. А́ще же сень сохрани́л был, ме́ньши и́стинны был бы. Что у́бо посре́дство сих всех? Хо́щете ли да истя́жем еди́но или́ два от рече́нных предначе́нше? Си́це бо и ина́я вам бу́дут я́вствена, и у́зрим вси, я́ко о́на у́бо де́тское бе уче́ние, сия́ же - филосо́фов до́блественых и вели́ких муже́й; и о́ва у́бо я́ко а́нгелом, о́важе я́ко челове́ком узаконоположи́шася.

И отку́ду ли у́бо подоба́ет сотвори́ти нача́ло? Хо́щете ли от сыноположе́ние самого́? Что ли у́бо посре́дство самого́ и о́ного? О́на глаго́ла бе честь, зде же и вещь после́дует. И о о́ной у́бо рече́: «Аз рех бо́зи есте́ и сы́нове Вы́шняго вси» , о сей же я́ко «от Бо́га роди́шася» . Ка́ко ли и кото́рым о́бразом? Ба́нею пакибытия́ и обновле́ния Ду́ха Свята́го. И они́ у́бо по нарече́нии сыно́в еще́ дух рабо́ты имя́ху, раби́ бо пребыва́юще, си́це почита́хуся зва́нием сим. Мы же свобо́дни бы́вше тогда́, не и́менем, но ве́щию честь прия́хом.

И сие́ Па́вел явля́я глаго́лаше: «Неприя́сте бо дух рабо́ты в страх, но прия́сте дух сыноположе́ния, о Нем же зове́м: А́вва Оте́ц» . Роди́вше бо ся свы́ше и, а́ки бы рекл кто созда́ни бы́вше, си́це нареко́хомся сы́нове. Но святы́ни о́браз аще кто навы́кнет, кото́рый у́бо сей, кото́рый же он - мно́го у́зрит па́ки и зде разли́чия.

Они́ бо, внегда́ не у́ и́долу служа́ху, ниже́ блужа́ху, ниже́ прелюбоде́йствоваху, сим нарица́хуся и́менем. Мы же не оша́янием сих, не во стяжа́нии бо́льших быва́ем святи́и. И пе́рвие у́бо от самого́ наше́ствия Ду́ха сего́ получа́ем да́ра. Пото́м же и от жи́тельства мно́го бо́льшаго иуде́йскаго. И я́ко не киче́ние глаго́лы, услы́ши о нем у́бо что рече́м, «Не очи́стистеся, но очи́стите чад ва́шых, я́ко лю́дие свя́ти есте́» . Я́коже у о́нех сие́ святы́ня - и́дольских свободи́тися зако́нов, у нас же не си́це. Но «да бу́дет свя́та, рече́, и те́лом, и ду́хом» . «Мир гони́те и святы́ню, ея́же кроме́ никто́же у́зрит Го́спода» . И: «Соверша́юще святы́ню в о стра́се Бо́жии» .

Зри́ши ли, я́ко сие́ есть освяще́ние, егда́ внутрь име́ет Ко́рень и Исто́чник. Не довле́ет во свято́е и́мя о всех, о ни́хже у́бо глаго́лется, то́же разуме́ние предста́вити. Поне́же и Бог Свят глаго́лется, но не я́коже мы. Егда́ у́бо услы́ша гла́са сего́, от серафи́м носи́маго, проро́к, что рече́? «Увы́ мне, окая́нный, аз я́ко челове́к сый и нечи́сты устне́ име́я, посреде́ люде́й нечи́сты устне́ име́ющих аз живу́» . И́бо и свя́т, и чист бе, но, а́ще ко святы́ни мы су́димся го́рней, нечи́сты есмы́. Свя́ти и а́нгели, свя́ти и арха́нгели, и са́ми херуви́ми и серафи́ми - но и сия́ святы́ни и́но па́ки разли́чие: и к нам, и к преиме́ющим си́лам. Мо́щно бе и ины́м всем испыта́ние сотвори́ти, но до́лго сло́во быва́ет и мно́го долгота́. Те́мже довле́йше происше́дше вам оста́вим оста́вшая вручи́ти, леть бо есть вам в дому́ сия́ собира́ющим созира́ти разли́чие и про́чее та́коже истяза́ти. «Дава́й бо, рече́, прему́дрому вину́, и прему́дрейше бу́дет» . Нача́ло бо от нас, коне́ц же да бу́дет от вас. Нам же ну́жно есть про́чее истяза́ти.

Рек бо: «От исполне́ния Его́ мы вси прия́хом», наведе́, «и благода́ть вме́сто благода́ти». Благода́тию и иуде́и спаса́хуся. Не за е́же бо мно́го умножа́тися вам, рече́, но от оте́ц ва́шых избра́х вас, и́же у́бо от свои́х исправле́ний избра́ни бы́вше от Бо́га, благода́тию сея́ получи́ша че́сти. И мы же благода́тию вси спасо́хомся, но не та́коже.

Не о те́хже бо, но о мно́го бо́льши и высоча́йше. Не сие́ бо от нас благода́ть то́кмо, е́же грехо́в проще́ния нам дано́ бысть, [но сему́ бо приобща́емся о́нем, вси бо согреши́ша,] но и пра́вда, и освяще́ние, и сыноположе́ние, и Ду́ха благода́ть светле́йша мно́го и изоби́льнейша. Но сея́ и́на бо́льши благода́ть, я́же от Ду́ха, е́же от примире́ния бы́вшее дерзнове́ние. Сею́ благода́тию быва́ем Бо́гу любез́ни не ктому́ то́кмо я́ко раби́, но я́ко сы́нове и я́ко дру́зи. Сего́ бо ра́ди рече́: «Благода́ть вме́сто благода́ти». Но я́же зако́на и сия́ благода́ти бе́ша, и са́мое е́же бы́ти челове́ку от не су́щих. Ниже́ бо исправле́ние пре́жде бы́вшим сие́ прия́хом воздарова́ние. Ка́ко бо, и́же ниже́ су́ща? Но Бо́гу везде́ де́лания начина́ющу, не е́же бы́ти то́кмо от не су́щих, но и е́же бы́вшим а́бие уви́дети де́йственая и неде́йственая, и всих в естестве́ прия́ти зако́на, и со́вести суди́лище неумы́тно нам предложи́ти - Сотво́ршему благода́ти бе вели́кия.

И по о́ной благода́ти ина́я па́ки, и я́же зако́на сего́ растле́вшая па́ки стяжа́ти пи́санным - благода́ть бе. После́дующее бо бе пречерта́вшим да́нную за́поведь еди́ною му́читися и томи́тися. Быва́емое же сие́ бе, но па́ки исправле́ние не до́лжное, но от ми́лости и от благода́ти дае́мо, я́ко бо благода́ти бе и ми́лости. Услы́ши, что рече́ Дави́д: «Творя́й ми́лостыню Госпо́дь и судбы́ всем оби́димым. Сказа́ пути́ своя́ Моисе́ови сыново́м Изра́илевым хоте́ния своя́». И па́ки: «Благ и Прав Госпо́дь, сего́ ра́ди законоположи́т согреша́ющим на пути́». Ми́лостыни у́бо, и щедро́т, и благода́ти е́же законоприя́ти. Сего́ ра́ди рече́ и «благода́ть вме́сто благода́ти», еще́ я́вственейше подвиза́яйся вели́честву да́нных.

«Зако́н, рече́, Моисе́ом дан бысть, благода́ть и и́стинна Иису́с Христо́м бысть». Уви́десте ли, ка́ко ти́хо и пома́лу Крести́тель Иоа́нн и учени́к высоча́йшему слы́шателей возво́дят ра́зуму, пе́рвее смиренне́йшими обучи́вше. Он бо, к себе́ сосуди́в, несосу́дне всех Преиме́ющаго си́це Его́ по сих показу́ет вели́чество, глаго́ля: «Крепча́йше мене́ и И́же пре́до мно́ю бысть». Та́же, наводя́, я́ко «Пе́рвее мене́ бе». Сей же, о́ного у́бо мно́го бо́льше сотвори́л есть, досто́инства же Единоро́днаго ме́ньши: не ко Иоа́нну бо, но к чу́дному па́че о́ного от иуде́й твори́т сосуже́ние Моисе́ю, глаго́ля: «Зако́н бо, рече́, Моисе́ом дан бысть. Благода́ть же и и́стинна Иису́с Христо́м бысть». И зри разу́м. Не лица́ твори́т истяза́ния, но веще́й высо́ких. Сим бо показа́нным мно́го бо́льши, от ну́жди и не благоразу́мным ле́по бе прия́ти суд и непщева́ние о Христе́. Егда́ бо ве́щи сведе́тельствуют, ни еди́ну же име́ющия вину́, я́ко ко благода́ти не́коего, не́жели ко вражде́ сие́ творя́ща, несомне́телен и неблагоразу́мным суд представля́ет. Якова́ бо сия́ устро́ят сотво́ршии, такова́ пребу́дут явля́ема.

Те́мже наипа́че всех незазо́рно е́же от сих есть сведе́тельство. Зри же и ка́ко неско́рбно твори́т приложе́ние и от не́мощнейших. Не состроя́ет бо сло́вом преиме́ние, но от име́н наги́х разли́чие показу́ет, благода́ть и и́стинну, сопроти́в положи́в зако́ну и е́же бысть, тому́ - е́же дано́ бысть. Мно́го же посре́дство. О́во бо служи́мо бе, е́же дан бысть, прие́мшу отъину́ду и да́вшу и́мже повеле́н бысть да́ти. А е́же бысть благода́ть и и́стинна – Царя́, со о́бластию вся оставля́ющаго согреше́ния и Свое́ устроя́щаго дарова́ние.

Те́мже и глаго́лаше: «Оставля́ют ти ся грехи́». И па́ки: «Да́же уви́дите, я́ко о́бласть име́ет Сын Челове́чь на земли́ оставля́ти грехи́, глаго́ля разсла́бленному: Воста́в, возми́ одр свой и иди́ в дом свой ».

Зри́ши ли, ка́ко благода́ть быва́ет Им? Смотри́ же и и́стинну. Благода́ть у́бо и сия́, и я́же по разбо́йнику, и креще́ния дар, и Ду́ха благода́ть я́же Тем дае́ма показу́ет, и и́на мно́го. И́стинну же я́вственейше уве́мы, а́ще о́бразы навы́кнем.

Име́ющаяся бо соверша́тися в нем смотре́нии, предприе́мше, преднаписа́ша о́брази, а́ки о́брази. Прише́д же, сверши́л ю́ есть Христо́с. Да уви́дим же, а́ще мни́тся и о́бразов во словесе́х. Ниже́ бо вся почести́ настоя́щаго есть вре́мени. От ма́лых же все уве́девше и про́чее разуме́ете. Хо́щете ли у́бо от самы́я стра́сти начне́м? Что у́бо рече́ о́браз? «Приими́те о́вен на дом, и пожри́те, и сотвори́те я́коже повеле́ и законоположи́л есть» . Христо́с же не си́це сему́ повелева́ет бы́ти, но Сам сие́ быва́ет, же́ртву Себе́ и приноше́ние Отцу́ прине́с. Зри́ши ли, ка́ко у́бо о́браз дан бысть Моисе́ем, и́стинна же бысть Христо́м? Па́ки на горе́ сина́йстей, да амали́к нам во́инствующих победя́т, ру́це подкрепля́хуся Моисе́овы от Ааро́на и Ио́ра от обою́ду стоя́щих. Христо́с же прише́д, Сам ру́це просте́рл есть на Кресте́.

Ви́дел ли еси́, ка́ко о́браз у́бо показова́шеся, и́стинна же бысть? Па́ки зако́н глаго́лаше: «Про́клят всяк, и́же не пребу́дет во всех пи́санных в кни́зе сей» . Благода́ть же что рече́? «Прииде́те ко мне вси тружда́ющиися и обремене́ннии, и Аз поко́ю вас» . И: «бысть о нас кля́тва» .

Нравоуче́ние четыринадеся́тое: подвиже́ние доброде́тельнаго жития́ и разли́чие да́нных нам [и] иуде́ом от Бо́га дарова́ний:

Поне́же у́бо толи́кия наслади́хомся благода́ти и и́стинны, молю́, да не вели́чества да́ра бу́дем лени́вейши. Ели́ко бо бо́льшия сподо́бихомся че́сти, толи́ко и мно́жайшия есмы́ доброде́тели до́лжни. Ма́лым бо благодете́льствованный, а́ще и ма́ла пока́жет, не того́ же зазре́ния досто́ин, а и́же к высоча́йшему верху́ че́сти возше́л, та́же худа́я вся и смире́нная показу́я, мно́го бо́льшия бу́дет му́ки досто́ин.

Но не бу́ди о вас вознепщева́ти такова́я когда́. Наде́яхом бо ся о Го́споде, я́ко к небеси́ душа́ ва́ша воспери́сте, и от земли́ отступи́сте, и, в ми́ре су́ще, не мирска́я прие́млете. Но оба́че и наде́ющеся, не престае́м ча́сте та́яже моля́ще. Поне́же и на вне́шних по́двизех, не па́дших, ниже́ взначь лежа́щих, но де́йствующых еще́, теку́щих, вси подвиза́ют зри́телие. О о́нех бо, я́ко неполе́зная творя́ще и не могу́ще моле́ньми их возста́вити, отрази́вшихся еди́ною от побе́ды, си́це престаю́т, отчаява́ющися. Зде же не о вас еди́ных трезвя́щихся, но и о па́дших, а́ще хотя́ преложи́тися, есть не́что ча́яти бла́го.

Те́мже вся де́йствуем, моля́ще, поноша́юще, подвиза́юще, похваля́юще, я́ко бы о ва́шем промы́слити спасе́нии, и ничто́же отну́д оставля́ем от возмо́жных нам.

Да не у́бо ча́стым е́же о жи́тельстве стужа́йте си наказа́нием. Не ле́ность бо отча́янных есть глаго́лемая, но благи́я зело́ име́ющих наде́жди о вас. Не к вам же то́кмо, но и к нам глаго́лющим сия́ рече́ся и реку́тся: и́бо и са́ми того́же тре́буем уче́ния, и наказа́ния, воспомина́ния, сове́тования. А́ще бо и от нас глаго́лется, но и к вам ничто́же возбраня́ет бы́ти сия́. Су́щих бо зря пови́нных сло́во испра́вило есть. Су́щих же вне и свобожде́нных, я́ко далеча́йше па́ки отведе́. Ниже́ бо са́ми есмы́ от грехо́в чи́сти. И врачева́ние у́бо о́бще, и чарова́ния всем предлежа́т. Слугова́ние же про́чее не о́бще, но от произволе́ния де́йствующих быва́ет.

Ов бо, хотя́ вручи́ти напое́ние, наслади́ся слугова́ния. Ов же ,не наложи́в я́зве, бо́льшее соде́ла зло и в люте́йшую преврати́ му́ку. Да не у́бо боле́знуем, врачу́еми, но мно́го па́че ра́дуемся, а́ще и го́рькия прино́сит боле́зни уче́ния хи́трость. Мно́го бо сла́достнейшь вам по́сле пока́жет плод, вся у́бо вси не де́йствуем и глаго́лем, я́ко да чи́сты язв и ран, я́же грехо́внии зубы́ налага́ют души́, к ве́ку устреми́мся о́ному, да досто́йни зре́ния быва́юще Христо́ва, не мучи́тельным и отсече́ным си́лам в день он пре́дани бу́дем, но могу́щим к насле́дию ввести́ нас небе́сному, угото́ванному лю́бящим Его́, Его́же бу́ди всем нам получи́ти благода́тию и человеколю́бием Го́спода на́шего Иису́са Христа́, Ему́же сла́ва и держа́ва во ве́ки веко́в. Ами́нь.

Име́н и глаго́л, лежа́щих в писа́ниих, не про́сте нам Бог послу́шати хо́щет, но со мно́гим ра́зумом. Сего́ ра́ди блаже́нный у́бо Дави́д во мно́гих ме́стех псалмо́в свои́х преднаписа́в е́же в ра́зуме, и глаго́лаше: «Откры́й о́чи мои́ и разуме́ю чудеса́ от зако́на Твоего́» . Посе́м же и его́ сын глаго́лаше, зане́ подоба́ет я́коже сребро́ взыскова́ти прему́дрость и я́коже сокрови́ще испы́товати. Госпо́дь же иуде́ем совещева́ше: испыта́йте писа́ния. Не бы у́бо рек испыта́йте, а́ще у́бо от себе́ и от пе́рваго прочита́ния мо́щно бы́ло бы сия́ прия́ти. Е́же бо посреде́ лежа́ще и гото́во никто́же у́бо истя́жет, но спокрове́нное и со мно́гим обрета́емое взыска́нием.

Сего́ ра́ди и сокро́вище сокрове́но сия́ бы́ти рече́, ко взыска́нию нас воздвиза́я. Сия́ же на́ми рече́ся, да не про́сте, ниже́ я́ко прилучи́ся приступа́ем ко глаго́лом писа́ний, но со опасе́нием мно́гим. А́ще бо не истяза́тельне кто послу́шает глаго́лемых в них и прии́мет вся си́це, я́коже рече́ся по писа́нию, мно́га безме́стна вознепщу́ет о Бо́зе. И́бо и челове́ку Ему́ бы́ти, и от ме́ди соста́витися, и гневли́ву, и я́ростну, и мно́га еще́ сих го́рша о нем прии́мет непщева́ния. А́ще же ра́зум во глубине́ лежа́щих навы́кнет, всего́ сего́ свободи́тся безме́стия. Поне́же и ны́не предложе́нное нам чте́ние не́дра рече́ Бо́гу име́ти, е́же теле́с есть сво́йствено. Но никто́же си́це возбеси́ся, я́коже те́ло вознепщева́ти безтеле́снаго бы́ти.

Да́же у́бо досто́йне духо́внаго разуме́ние все прии́мем, принеси́ свы́ше ме́сто да испыта́ем. «Бо́га никто́же ви́де никогда́же». От коего́ после́дования на сие́ прии́де еванге́лист? Показа́в Христо́вых даро́в мно́гое вели́чество и посре́дство безме́рно сих; и устрое́нных Моисе́ем наво́дит и вину́ благосло́вну разли́чия, глаго́ля досто́инства лица́, и́мже бо́льшая бы́ша. Он бо служи́тель сый, рече́, в ле́поту смире́ннейших веще́й бысть служи́тель. Сей же Влады́ка и Царь, и Царе́в Сын Сый, мно́го бо́льшая нам принесе́, сопребыва́я при́сно Отцу́ и зря Его́ вы́ну. Сего́ ра́ди глаго́лаше: «Бо́га никто́же ви́де никогда́же», но ра́зве Единоро́дный Сын.

Что у́бо рече́м велегла́снейшему Иса́ии, глаго́лющу: «Ви́дех Го́спода на престо́ле высо́це седя́ща» . И Иоа́нну же сведе́тельствующу ему́, я́ко сия́ рече́: «Егда́ ви́де сла́ву Его́» и глаго́ла о нем. Что́ же Иезекии́лю? И́бо и той на херуви́мех седя́ща его́ зря́ше. Что же и Дани́лу? И́бо и сей рече́ «ве́тхий де́ньми седя́ше» . Что же само́му Моисе́ю? «Покажи́ бо мне, глаго́лющу, сла́ву Твою́, разу́мно да уви́жу Тебе́». Иа́ков же от сего́ и нарече́ние прия́т: Изра́иль назва́н бысть, Изра́иль бо «Бо́га зряй» есть. И ини́и же его́ ви́деша. Что у́бо Иоа́нн рече́: «Бо́га никто́же ви́де никогда́же»? Явля́я, я́ко вся о́на схожде́ния бя́ше, не самого́ существа́ нага́го бе́ша. А́ще бо само́е узре́ли бы естество́, не бы у́бо разли́чне сие́ ви́дели: про́сто бо не́кое, и необра́зно, и несло́жно, и неопа́сно. Не седи́т, ниже́ стои́т, ниже́ хо́дит - сия́ бо вся теле́с. Ка́коже есть - Сам ве́дяше Еди́н и сия́ проро́ком не́коим глаго́лаше, явля́я: «Аз виде́ние умно́жих и в рука́х проро́к уподоби́хся» , си́речь, снидо́х, не сие́, е́же бых, яви́х.

Поне́же бо имя́ше и Сын Его́ и́стинною яви́тися пло́тию, испе́рва их предъобучи́ зре́ти Бо́жие существо́, я́коже им мо́щно бе ви́дети. Поне́же само́е е́же есть Бог, не то́кмо проро́цы, но ниже́ а́нгели ви́деша, ниже́ арха́нгели; но а́ще вопроси́ши их, услы́шиши о существе́ ничто́же отвещева́ющых, «сла́ву же в вы́шних» возсыла́ющих Бо́гу «и на земли́ мир, в челове́цех благоволе́ние» . А́ще и от херуви́м или́ от серафи́м вожделе́еши что уве́дети, та́инственую освяще́ние песнь услы́шиши и я́ко «испо́лнь не́бо и земля́ сла́вы Его́» . А́щеже го́рняя си́лы истя́жеши, отвеща́ют тебе́ па́ки, я́ко еди́но де́ло им есть е́же хвали́ти Бо́га: «Хвали́те бо, рече́, вся си́лы Его́» .

Еди́н же Его́ зрит Сын и Дух Святы́й. А́ще бо созда́нно естество́ всека́ко и уви́дети возмо́жет Несозда́ннаго? А́ще бо про́сте безтеле́сныя си́лы, а́ще и рожде́ннаго существа́, не мо́жем прия́ти зре́ние я́вствено, и сие́ мно́жицею о а́нгелех показа́ся, мно́го па́че и о Безтеле́сном и Нерожде́нном существе́. Сего́ ра́ди и Па́вел рече́: «Его́же ви́де ни еди́н же от челове́к, ниже́ ви́дети мо́жет» . Еда́ у́бо Отцу́ еди́ному изря́дное сие́ ле́по есть, Сы́ну же не ктому́? Слы́ши у́бо само́го пре́жняя ре́кшаго глаго́люща, я́ко «О́браз есть Бо́га Неви́димаго» . Неви́димаго же о́браз и той неви́димь есть, поне́же не у́бо бу́дет о́браз изве́стен. Сего́ ра́ди рече́: «И́же яви́ся пло́тию» . Явле́ние бо е́же пло́тию не у́бо по существу́ бысть. Я́ко бо и Той неви́димь не то́кмо челове́ком, но и го́рним си́лам, рече́ Па́вел, я́ко яви́ся во пло́ти [и] наведе́: «я́ко показа́ся а́нгелом». Я́коже и а́нгелом тогда́ показа́ся, егда́ пло́тию обложи́ся. Пре́жде же сего́ не зря́ху Его́ си́це, поне́же у́бо и тем неви́димо существо́ бе.

Ка́ко у́бо «не пренебрези́те, рече́, еди́наго от ма́лых сих. Глаго́лю бо вам, я́ко а́нгели их, и́же вы́ну ви́дят лице́ Отца́ Моего́ Су́щаго на небесе́х» . Что у́бо? И лице́ ли Бог име́ет и в челове́цех опису́ется? Но не у́бо кто си́це вознеи́стовится, я́ко бы сия́ рещи́. Что у́бо есть глаго́лемое? Я́ко егда́ глаго́лет: «Блаже́ни чи́стии се́рдцем, я́ко ти́и Бо́га у́зрят» . Е́же в мы́сли зре́ние, рече́, возмо́жное нам и разуме́ние е́же о Бо́зе. Си́це и о а́нгелех приима́ти ле́по есть, чи́стаго ра́ди их и бо́драго естества́, ничто́же и́но, но ра́зве Бо́га мечта́ющых при́сно.

Сего́ ра́ди и Христо́с рече́: «Никто́же зна́ет Отца́ то́кмо Сын» . Что у́бо? Вси́ ли в невиде́нии есмы́? Не бу́ди. Но си́це никто́же весть, я́коже Сын. Я́коже ве́дяху у́бо Его́ мно́зи по вме́стному их зре́нию, существо́ же никто́же ви́де - си́це ве́мы мно́зи Бо́га. Существо́ же никто́же ве́дяше, е́же что есть, то́кмо еди́н Роди́выйся от Него́.

Ве́дение бо зде опа́сное глаго́лет зре́ние и постиже́ние и толи́ко, ели́ко Оте́ц име́ет о Сы́не. «Я́коже бо зна́ет Мя Оте́ц, рече́, и Аз зна́ю Отца́» . Те́мже и евангели́ст, зри, со ели́ким веща́ет вели́чеством. Рек бо, я́ко «Бо́га никто́же ви́де никогда́же», не рече́, я́ко Сын ви́де и испове́да, но и́но не́что вя́щше е́же уви́дети положи́л есть, рек: «Сый в не́драх О́тчих».

Того́ бо е́же уви́дети того́ е́же в ло́не пребыва́ти - мно́го вя́щше есть. И́же бо про́сте зряй, не вся́чески опа́сно явля́емаго разуме́ние име́ет. А и́же в не́дрех пребыва́ет, ничто́же не нев́есть когда́. Слы́ша я́ко «никто́же зна́ет Отца́ то́кмо Сын», да́же бо не глаго́леши, я́ко а́ще и мно́жае всех ви́дяше Отца́, но ели́к есть не ве́дяше. Сего́ ра́ди евангели́ст в ло́не Ему́ пребыва́ти рече́.

Сам же Христо́с толи́ко Его́ ви́дети рече́, ели́ко Оте́ц Сы́на. Вопроси́ у́бо сопроти́в глаго́лющаго: Еда́ у́бо и весть Сы́на Оте́ц? Рече́т вся́чески, а́ще не бесну́ется, я́ко ей. Посе́м же и о́но рече́м па́ки. Что же? Опа́сным ли зре́нием и ра́зумом Его́ зрит и весть, и сие́ е́же есть зна́ет я́вствене? Вся́чески и сие́ рече́т. От сего́ у́бо сбери́ опа́сное сыно́вне об Отце́ постиже́ние. Сам бо рече́: «Зане́, я́ко весть Мя Оте́ц, си́це и Аз Его́ зна́ю» . И и́нде: «Не я́ко Бо́га кто ви́де, то́кмо Сый от Бо́га» . Сего́ ра́ди, е́же рех, и евангели́ст не́дра помина́ет, вся еди́ным глаго́лом сим нам явля́я: я́ко мно́го существа́ сро́дство и приближе́ние, я́ко неизме́нно позна́ние, я́ко ра́вна о́бласть. Не бо иносу́щнаго в не́дрех у́бо име́л бы Оте́ц, но ниже́ у́бо сам дерзну́л бы, раб сый и от мно́гих еди́н, в не́дрех жи́ти Влады́чних. Сие́ бо Сы́на при́снаго то́кмо, и мно́го дерзнове́ние к Роди́телю име́ющаго, и ничто́же ме́нша име́ющаго - сия́ и позна́ние изравня́ющися показу́ет.

Хо́щеши ли и присносу́щное уве́дети? Услы́ши что рече́ Моисе́й об Отце́. Вопроси́в бо, а́ще вопроше́н буд́ет от иуде́й, кто посла́вый его́ есть, что повелева́ет отвеща́ти к ним? Слы́ша, рцы я́ко «о́ Он, си́речь, Сый посла́ мя» . То́же Сый е́же при́сно бы́ти знамена́тельно бысть, и е́же безнача́льне бы́ти, и е́же вои́стинну бы́ти, и е́же в ресноту́ бы́ти. Сие́ и е́же в нача́ле бы́ти явля́ет - е́же при́сно бы́ти я́вствено су́ще. Сим же и зде де́йствует рече́нием Иоа́нн, показу́я, я́ко безнача́льно и соприсносу́щно в ло́не О́тчи есть Сын. Да́же не обще́ния ра́ди име́ни Еди́наго не́коего благода́тию быва́емых сыно́в бы́ти вознепщу́еши, пе́рвее у́бо прилежи́т а́рфра (о́), разделя́ющее Его́ от и́же по благода́ти. А́ще же ниже́ сие́ довле́ет тебе́, но еще́ до́ле ни́чиши, сего́ госпо́дственейше и́но слы́ши и́мя е́же Единоро́дный. А́щеже и посе́м до́лу зри́ши, не отреку́ся рече́ и челове́ческое не́кое рече́ние, рещи́ о Бо́жии не́дре, глаго́лю - то́кмо да ничто́же вознепщу́еши смире́нно. Ви́дел ли еси́ человеколю́бие и промышле́ние Влады́чне? Недосто́йныя глаго́лы облага́ет Себе́ Бог, да поне́ си́це возри́ши, и ве́лие не́что и высо́ко помы́слиши - и ты до́лу ни́чиши?

Рцы бо мне, что ра́ди не́дро зде прия́то бысть, де́белое сие́ и́мя и плотско́е? Да те́ло ли Бо́га вознепщу́ем? Не бу́ди. Ника́коже рече́. Что у́бо ра́ди рече́ся? А́ще бо ниже́ при́сность Сыно́вня представля́ется сим, ниже́ те́ло бы́ти Бо́га - изли́шне приложе́но есть рече́ное, ниже́ еди́ну потре́бу исполня́юще. Что у́бо ра́ди рече́ся? Не отступлю́ бо тебе́. Сие́ вопроша́ем: да что вознепщу́ем сим? Не благоявле́нно ли, я́ко ничто́же и́но, но ра́зве при́сность Единоро́днаго и соприсносу́щное Отцу́? Вся́ческому я́вствено есть.

«Он испове́да» рече́. Что ли испове́да? Я́ко «Бо́га никто́же ви́де никогда́же»? Но я́ко ли Еди́н есть Бог? Но сие́ у́бо и про́чии проро́цы, и Моисе́й горе́ и до́лу вопие́т: «Госпо́дь Бог твой, Госпо́дь Еди́н есть» . И Иса́ия: «Пре́до Мно́ю не бысть ин Бог и по Мне несть» . Что у́бо мно́жае уве́дехом от Сы́на, я́ко о не́дрех вои́стинну Оте́ческих? Что ли от Единоро́днаго? Пе́рвое у́бо и сама́я сия́: де́йства суть о́ного. О то́мже мно́го ясне́йше прия́хом уче́ние и я́вственейше, си́речь, я́ко Дух Бог и покланя́ющимся Ему́ ду́хом и и́стинною подоба́ет кла́нятися. И я́ко само́е сие́: Бо́га уви́дети невозмо́жно, зане́ никто́же Его́ весть то́кмо Сын, зане́ Оте́ц есть при́снаго Единоро́днаго и ина́я ели́ка о Нем бесе́дова. А е́же «испове́да» - ясне́йше и я́вственейше показу́ет уче́ние, е́же не ко иуде́ом то́кмо, но и ко всей сотвори́ вселе́нней и испра́ви. Проро́ком бо ниже́ иуде́и вси внима́ху, Единоро́дному же Сы́ну Бо́жию вся вселе́нная и уступи́, и покори́ся. Е́же бо испове́дание зде - я́вственнейше уче́ния явля́ет. Те́мже и Cло́во глаго́лется и вели́каго сове́та А́нгел. Поне́же у́бо и соверше́ннаго сподобле́ни бы́хом уче́ния, не ктому́ проро́ки, но Сы́ном глаго́лавшу нам Бо́гу напосле́док дней сих, мно́го бо́льше и досто́йно жи́тельства да пока́жем че́сти. И́бо безме́стно Ему́ у́бо сни́ти толи́ко, я́ко не ктому́ рабы́ нам хоте́ти бесе́довати, но Собо́ю, нам же пре́жних ничто́же показова́ти вя́щше. Они́ бо Моисе́я, мы же Моисе́ова Влады́ку Учи́теля име́ем.

Нравоуче́ние пятнадеся́тое: О я́же друг дру́гу любви́ и я́ко не подоба́ет своя́ то́кмо иска́ти, но и бли́жняго:

Сея́ у́бо че́сти досто́йно любому́дрие да пока́жем, и ничто́же да име́ем о́бще к земли́. Сего́ ра́ди нам свы́ше от небе́с жи́тельство уче́нием прине́сл есть, да подража́тели Учи́телю бу́дем по си́ле на́шей. Ка́ко же есть подража́телем бы́ти Христо́вым? Во е́же во о́бщую по́льзу вся де́йствующи, а не своя́ взыску́ющим, и́бо и Христо́с рече́: «Не себе́ угоди́, но я́коже пи́сано есть: поноше́ние понося́щих Тя нападо́ша на Мя» .

Никто́же е́же свое́ да взыску́ет, но е́же бли́жняго смотря́ет - и́бо на́ша я́же о́нех. Те́ло есмы́ еди́но и друг дру́гу ча́сти и у́дове. Да не у́бо я́ко расте́рзани да пребыва́ем. Никто́же да глаго́лет: «О́нсица мне несть друг, ниже́ сро́дник, ниже́ сосе́д, ниже́ име́ю что о́бще к нему́: Ка́ко приступа́ю, ка́ко бесе́дую?» А́ще бо ниже́ сро́дник, ниже́ друг есть - но челове́к есть, того́же тебе́ приобща́яйся естества́, Того́же име́я Влады́ку, единонра́вен есть, и единохра́мен, и единокро́вен, в то́мже бо бысть ми́ре. А́щеже и ве́ры тебе́ приобща́ется та́яже, се тебе́ и уд бысть. Ка́я бо дру́жба толи́ко соедине́ние соде́лати возмо́жет, ели́ко ве́ры сро́дство? Не ели́ко бо друг ко друго́м показова́ти подоба́ет приближе́ние, толи́ко нам име́ти подоба́ет е́же ко друг дру́гу присвое́ние, но ели́ко уд ко удо́м. Сего́ бо о́браза и дру́жбы, и промышле́ния и́но бо́льше присвое́ние не у́бо кто обря́щет когда́.

Я́коже не у́бо могу́ глаго́лати: отку́ду мне присвое́ние и приближе́ние? - к себе́ подсмея́тельно бо сие́ есть. Си́це ниже́ о бра́те возмо́жеши сие́ рещи́. И́же бо «вси во еди́но те́ло крести́хомся» , рече́. Что ли есть е́же «во еди́но те́ло»? Я́ко бы не растерза́тися, но собира́ние е́же ко друг дру́гу и дру́жбы те́ла еди́ного после́дование соблюда́ти.

Да не у́бо пренебреже́м друг дру́га, да на са́ми себе́ презри́м. «Никто́же бо когда́ свою́ плоть возненави́де, но пита́ет и согрева́ет ю́» . Сего́ ра́ди дом еди́н нам, – мир, - дал есть Бог и вся ра́вно раздели́л есть. Еди́но воспали́ со́лнце всем нам. Еди́н простре́ кров - не́бо. Еди́ну положи́л есть трапе́зу - зе́млю. Даде́ и и́ну, сея́ мно́го бо́льшу, Трапе́зу. Но и сию́ еди́ну ве́дят таи́нницы глаго́лемое. Еди́н о́браз рожде́ния всем дарова́л есть - духо́вен. Еди́но всем оте́чество, е́же на небесе́х. От тоя́ же ча́ши вси пие́м. Не бога́тому у́бо вя́щше и честне́йше, ни́щему же худе́йше и ме́ньше дарова́л есть - но всех ра́вно нарече́, плотска́я единоче́стне, духо́вная подо́бне даде́. Отку́ду ли у́бо нера́вность мно́га в житии́? От лихоима́ния бога́тых и го́рдости. Но ни, бра́тие, не ктому́ сия́ да быва́ют. Ниже́ собо́рных и ну́жных в то же собира́ющих нас, - бога́тства глаго́лю, и нищеты́, и сро́дства теле́снаго, и вражды́, и дру́жбы, - сия́ бо вся сень и се́ни худе́йша, соу́з име́ющим любви́. Испе́рва сего́ у́бо да сохраня́ем неразру́шно и ничто́же привни́ти возмо́жет от страсте́й лука́вых, разделя́ющих толи́кое соедине́ние, его́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом, ны́не и при́сно и во ве́ки веко́в. Ами́нь.