Пятница второй седмицы по Пасхе

Лю́то за́висть, о́ возлю́бленне, лю́то и губи́тельно зави́дящым, а не зави́димым. Пе́рвых бо их врежа́ет и растлева́ет, я́коже яд не́кий смертоно́сный седя́ в душа́х их. А́щеже где и зави́димых врежа́ет, ма́ло и ниеди́нагоже досто́йно вреже́ния и приобрете́ния бо́льше тщеты́ име́юще. И не о за́висти же то́кмо, но и о ины́х всех: не пострада́вый зле, сей есть и́же вред прие́м. Ниже́ бо а́ще сие́ бы́ло бы оби́детися, но и па́че не́жели оби́дети повеле́ Па́вел ученико́м: «Что ра́ди не па́че оби́дени бысть? Что ра́ди не па́че лиши́стеся?» - ве́дяше бо изве́стно нестра́ждущему зле, но творя́щему зле губи́тельство после́дующе всю́ду.

Сия́ же ми вся за́висти ра́ди иуде́йския рече́ся. Су́щии бо от градо́в излия́вшеся ко Иоа́нну и грехо́м свои́м зазре́вше и креща́ющеся. Они́же и по е́же крести́тися, я́коже от не́коего покая́ния, посыла́ют, вопроша́ющи его́: «Ты кто еси́?». Вои́стинну рожде́ние ехи́дново, и зми́я, и а́ще что сих люте́йше. Род лука́в, и прелюбоде́ивый, и развраще́нный, по е́же крести́тися, тогда́ Крести́теля испыту́еши и мно́го истязу́еши? И что сего́ безслове́сия безслове́снейши бу́дет у́бо? Ка́ко исхо́дисте? Ка́ко испове́дасте согреше́ния? Ка́ко притека́сте ко креще́нию? Ка́ко его́ вопроша́сте о де́йствах? Сия́ бо вам безслове́сне де́йствовашася, все нача́ло и вину́ неви́дящим.

Но ничто́же сих рече́, ниже́ порече́ блаже́нный Иоа́нн, ниже́ поноси́, но с кро́тостию вся́кою отвещева́ет к ним. Что у́бо ра́ди сие́ творя́ше - о́но уве́дети досто́йно, я́ко всем их я́вствено злоде́йство бы́ти и явле́но. Мно́жицею сведе́тельствова Иоа́нн Христу́ и, егда́ креща́ше их, ча́сте Его́ к предстоя́щим помина́ше и глаго́лаше: «Аз у́бо вас креща́ю водо́ю. Во след же мене́ гряды́й крепча́йшь мене́ есть. Той вас крести́т Ду́хом Святы́м и огне́м» . И пострада́ша не́кую к нему́ челове́ческую страсть: сла́ве бо мирско́й устраше́ни и я́же на лица́ зря́ще, недосто́йно бы́ти непщева́ху покаря́тися ему́ Христу́. Иоа́нна бо мно́га показу́ющая све́тла бы́ти: и пе́рвее - род наро́чит и пресве́тел, архиере́ев бо сын; пото́м же - пребыва́ние и же́стокое житие́, челове́ческих презре́ние всех, и́бо оде́жди, и трапе́зы, и хра́мины, и пи́щи самы́я презира́я, в пусты́ни пре́жнее вре́мя живя́ше. О Христе́ же все сопроти́вное бе: и род бо худ, его́же и мно́жицею Ему́ произноша́ху глаго́люще: «Не се ли есть текто́нов Сын? Не ма́ти ли Его́ глаго́лется Мария́м и бра́тия Его́ Иа́ков и Оси́я?» . И мня́ще я́же ся Ему́ оте́чество бы́ти поно́сно бе, я́ко и Нафана́илу глаго́лати: «От Назаре́та мо́жет ли что бла́го бы́ти?» . И пи́ща же о́бща, и ри́зы же ничто́же вя́щше мно́гих име́юща: не обложе́н бо бя́ше по́ясом ко́жаным, ниже́ о́то влас одея́ние имя́ше, ниже́ мед и акри́ды ядя́ше - но всем подо́бне пита́шеся и на пи́ршества приходя́ше лука́вых челове́к и мытаре́й, я́кобы их привлещи́. Е́же не све́дяще иуде́и, и сих ра́ди ему́ поноша́ху. И Сам рече́: «Прии́де Сын челове́чь, яды́й и пия́й. И глаго́лют - сей челове́к я́дца и винопи́йца, мытаре́м друг и гре́шником» . Поне́же у́бо ча́сте Иоа́нн от себе́ ко О́ному их посыла́ша, ви́дящемуся от них худе́йшу бы́ти, срамля́ющеся и стужа́юще и хотя́ще па́че сего́ име́ти учи́теля, я́вственне у́бо не сме́яху сие́ рещи́ - посыла́ют же к нему́, ча́юще ласка́нием его́ привлещи́ во е́же себе́ испове́дати Христа́. Не у́бо не́ких удо́бь пренебрего́мых посыла́ют я́коже о Христе́. О́наго у́бо хотя́ща я́ти, слуг посла́ша, иродия́н па́ки и таковы́х не́ких - зде же свяще́нников и леви́т, и не про́сте свяще́нников, но су́щих от Иерусали́ма, си́речь, честне́йших, [ниже́ бо про́сте назна́менася евангели́ст]. И посыла́ют, да вопрося́т: «Ты кто еси́?».

И у́бо рожде́ние его́ всем я́вственне бе, я́ко и глаго́лати всем: «Что у́бо сие́ отроча́ бу́дет?» , и во все обселе́ние сло́во изы́де сие́. И егда́ прии́де на Иорда́н, все гра́ды воспери́шася, и от Иерусали́ма, и от всея́ Иуде́и идя́ху крести́тися к нему́. Что у́бо вопроша́ют? Ка́ко бо толи́кими о́бразы бы́вшаго я́вствена? Но хотя́ще, е́же рех, в сие́ его́ привести́.

Услы́ши у́бо, ка́ко и блаже́нный сей к мы́сли, с не́юже вопроша́ху, не ктому́же вопроше́нию отвещева́ше, ре́кшим бо: «Ты кто еси́?». Не рече́ а́бие е́же гото́во бе рещи́: «Аз глас вопию́щаго в пусты́ни» , но что? Е́же непщева́ху они́ - сие́ отъя́т. Вопроше́н бо быв, рече́: «Ты кто еси́?» - «И испове́да, и не отве́ржеся испове́да, я́ко аз несмь Христо́с» .

И зри прему́дрость евангели́ста. В тре́тии то же глаго́лет, и доброде́тель крести́теля явля́я, и лука́вства и безу́мие оне́х. И Лука́ же рече́, непщу́ющим наро́дом ему́ бы́ти Христу́, па́ки отъе́млет непщева́ние.

Сие́ раба́ благоразу́мнаго - не то́кмо не похища́ти сла́ву влады́чню, но и отража́ти дае́му от мно́гих. Но наро́ди у́бо от простоты́ и неве́дения на сие́ приидо́ша мне́ние; си́и же от лука́ваго изволе́ния и, и́мже рех, вопроша́ху его́, ча́юще, е́же рех, от ласка́ния его́ привлещи́ во е́же тща́хуся. А́ще бо не сие́ ча́яли бы, не бы у́бо а́бие на и́но пришли́ вопроше́ние, но вознегодова́ли бы у́бо, я́ко несогла́сная отвещава́ющу и к не вопроше́нию. И рекли́ бы у́бо: Еда́ бо сие́ вознепщева́хом? Еда́ бо сие́ приидо́хом вопроша́юще? Но я́ко ска́чуще и обноси́тельни быва́юще, на и́но прехо́дят и глаго́лют: «Что у́бо Илия́ ли еси́ ты? И глаго́лет: Несмь» . И́бо и сему́ ча́яху приити́, я́коже и Христо́с рече́. Вопроша́ющым бо ученико́м: «Ка́ко у́бо кни́жницы глаго́лют, я́ко Илии́ подоба́ет приити́ пре́жде?», Той глаго́лаше: «Илия́ у́бо прии́дет и устро́ит вся» . Та́же вопроша́ют: «Проро́к ли еси́ ты?». И отвеща́: «Ни». И у́бо проро́к бе, что у́бо ра́ди отмета́ется. Па́ки к мы́сли зря вопроша́ющих. Ча́яху бо не́коему проро́ку изря́дну приити́ за е́же глаго́лати Моисе́ю: «Проро́ка вам возста́вит Госпо́дь Бог от бра́тий ва́ших я́ко мене́. Того́ послу́шайте» . Сей же бе Христо́с. Сего́ у́бо ра́ди не глаго́лют: «Проро́к ли еси́ ты?», еди́ного от мно́гих непщу́юще, но со а́рфром: «Гряды́й ли проро́к еси́ ты он, от Моисе́я пропове́данный?». Сего́ ра́ди и сей отве́ржеся, не е́же проро́к бы́ти, но е́же он проро́к.

Ре́ша у́бо ему́: «Кто еси́ ты? Да отвеща́ние дади́м посла́вшим нас. Что глаго́леши о себе́?». Зри́ши ли зе́льнейше у́бо належа́щих, и приводя́щых, и вопроша́ющых па́ки, и не отступа́ющих. О́ного же с кро́тостию ясне́йше не су́щая непщева́ния отъе́млюща и тогда́ су́щее полага́юща: «Аз бо рече́ глас вопию́щаго в пусты́ни: испра́вите путь Госпо́день, я́коже рече́ Иса́ия проро́к» .

Поне́же у́бо ве́лие не́что и высо́ко веща́ше о Христе́, я́ко к непщева́нию оне́х к проро́ку а́бие прибеже́ достове́рно и отсю́ду сло́во творя́. «И по́слании бе́ша от фарисе́й, рече́. И вопроси́ша его́ и ре́ша ему́: Что у́бо креща́еши, а́ще ты еси́ не Христо́с, ниже́ Илия́, ниже́ проро́к?» . Зри́ши ли, я́ко не всу́е глаго́лах, я́ко вси сего́ превести́ хотя́ху? И от нача́ла у́бо сие́ не глаго́лаху, да не обноси́тельни бу́дут всем. Та́же, егда́ у́бо рече́, я́ко несмь Христо́с, па́ки они́ спокры́ти хотя́ще я́же внутрь соблюда́ху, на Илию́ прихо́дят и проро́ка. Егда́ же рече́ ниже́ оне́х кто бы́ти, недоуме́ющеся про́чее и обли́чие пове́ргше, наго́ю главо́ю ле́стный их ра́зум изъявля́ют, глаго́люще: «Что у́бо крести́ши, а́ще ты не́си Христо́с?». Та́же, па́ки спокры́ти хотя́ще, и ины́х прилага́ют: Илию́ и проро́ка. Поне́же у́бо ласка́нием не возмого́ша запя́ти, укори́зною ча́яше его́ мощи́ прину́дити рещи́, е́же не бе - но не возмого́ша.

О презо́рства! О безу́мия и безвре́меннаго испыта́ния! По́слани бысте уви́дети от него́, кто бу́дет и отку́ду, а не и зако́нов ему́ полага́юще. Сие́ бо па́ки принужда́ющых бе испове́дати себе́ Христа́. Но оба́че ниже́ ны́не негоду́ет, ниже́ глаго́лет что таково́ к ним, яково́ ле́по: «Вы ли мне повелева́ете и законополага́ете?» - но мно́гу па́ки кро́тость показу́ет: «Аз у́бо рече́ креща́ю водо́ю. Среди́ же вас стои́т, Его́же вы не ве́сте. Сей есть во след мене́ гряды́й, И́же пре́до мно́ю бысть, Ему́же несмь досто́ин разреши́ти реме́нь сапога́» . Что к сим про́чее име́ют рещи́ иуде́и? Не отро́чно бо [и отсю́ду] е́же на них осужде́ние, непроще́нно оглаго́лание - са́ми на себе́ суд изнесо́ша. Ка́ко ли и кото́рым о́бразом? Достове́рна непщева́ху бы́ти Иоа́нна и си́це и́стинна, я́ко не то́кмо ины́м сведе́тельствующу, но и само́му о себе́ глаго́лющу ве́ровати. Ниже́ бо, а́ще не си́це пребыва́ли бы, посла́ли бы уве́дати от него́ я́же о нем. Ве́сте бо, я́ко еди́нем о́нем, но и па́че о себе́ глаго́лющим ве́руем, и́хже у́бо всех и́стиннейших бы́ти непщу́ем. И не сие́ то́кмо есть загражда́ющее их уста́, но и ра́зум, с ни́мже к нему́ приступи́ша: и́бо со мно́гим изыдо́ша усе́рдием к нему́, а́ще и по́сле преложи́шася - я́же обоя́ явля́я Христо́с, глаго́лаше: «Он бо свети́льник горя́й, и вы восхоте́сте ра́доватися в час све́та его́» .

И отвеща́ние же его́ па́ки достове́рнейша его́ творя́ше, не взыску́яй бо сла́вы своея́, рече́: «И́стинен есть и непра́вды в Нем несть». Се́и же не иска́ше, но ко Ино́му их посыла́ет. И по́слании и́же от достове́рных у них и пе́рвая име́ющих, я́ко бы им ниотку́ду же избежа́ти, ниже́ отрече́ние в неве́рие, и́мже не ве́роваша Христу́.

Что бо ра́ди не прия́сте рече́нная о нем от Иоа́нна? Вы посыла́сте пе́рвое име́ющих, вы вопроси́сте и́ми, вы слы́шасте я́же отвеща́ Крести́тель; вся́ко они́ испыта́ние показа́ша, вся истяза́ша и и́хже мне́сте всех ре́ша. И оба́че со дерзнове́нием мно́гим испове́да не бы́ти ниже́ Христо́с, ниже́ Илия́, ниже́ проро́к. И ниже́ зде ста, но и научи́, Кто бу́дет. И бесе́довати о естестве́ своего́ креще́ния, я́ко ма́ло и ху́до и воды́ вя́щше ничто́же име́юще. Рече́ вели́чество креще́ния е́же от Христа́ даемаго. Приведе́ и Иса́ию проро́ка, сведе́тельствующа испе́рва и пре́жде мно́гаго вре́мени - и Го́спода Его́ нарица́юща, и сего́ - служи́теля Его́ и раба́ имену́юща. Что про́чее подоба́ше? Не ве́ровати ли сведе́тельствуемому, и поклони́тися, и испове́дати Бо́га? Я́ко бо не ласка́ния бе сведе́тельство, но и́стинны, пока́зоваше у́бо и о́браз, и любому́дрие сведе́тельствующаго. Я́вствено же и отню́ду: никто́же бли́жняго пре́жняго пре́жде себе́ полага́ет, ниже́, от него́же себе́ дарова́ти честь, ино́му сея́ попусти́ти восхо́щет. И толи́кой су́щи, я́ко не у́бо ниже́ Иоа́нн, не Бо́гу су́щу Христу́, сего́ убо уступил бы сведетельства.

А́ще бо и от себе́, сие́ я́ко бо́льша су́ща своего́ естества́ отража́ше, но не у́бо ино́му естеству́ па́ки сие́ возложи́л бы смире́ннейшему. «Посреде́ же вас стои́т, Его́же вы не ве́сте». Ле́по бо бе ему́ и смеси́тися с людьми́, я́ко еди́ному от мно́гих, а́ки везде́ него́рдостное и не велича́вое уча́щу. Ве́дение же зде глаго́лет опа́сное, си́речь, кто есть и отку́ду. А е́же «во след мене́ гряды́й» ча́сте полага́ет, то́чию не глаго́ля: «Не помышля́йте е́же все лежа́ти в мое́м креще́нии. Не у́бо а́ще сие́ соверше́нно бы́ло бы, Ин прише́л бы по мне, подая́ ино́е. Но уготовле́ние сие́ есть о́ному и предпу́тие. На́ша - сень и о́браз. Ино́го тре́ба есть, и́стинну налага́ющему, приити́». Я́коже сие́ е́же «во след мене́ приити́», сие́ наипа́че Его́ показу́ет досто́инство. А́ще бы сие́ бы́ло бы соверше́нно, не бы у́бо второ́му иска́лося ме́сто. «Пре́до мно́ю бысть», си́речь, честне́йшь.

Та́же, да не вознепщу́ют от сосужде́ния бы́ти вели́чество, несосу́дное предста́вити хотя́, рече́ не про́сте напреди́, но си́це я́ко мне ниже́ в после́дних Сего́ служи́телех вчи́слитися досто́йну бы́ти: е́же бо «сапо́г разреши́ти» - после́днее слу́жбы есть.

Нравоуче́ние шестнадеся́тое: о го́рдости, и бога́тстве, и ми́лостыни:

А́ще же Иоа́нн недосто́ин реме́н разреши́ти Иоа́нн, «его́же в рожде́нных бо́льши не бысть» , где вчини́м мы себе́? А́ще и́же вселе́нныя сопротивоме́рен, па́че бо́льши, [«не бе бо их досто́ин весь мир» ,] ниже́ в после́дних служа́щих себе́ причита́тися рече́ досто́йна бы́ти - что возглаго́лем и́же безчи́сленых по́лни су́ще злых, и́же толи́ко отстоя́ще доброде́тели Иоа́нновы, ели́ко же земля́ от небеси́? Сей у́бо ниже́ реши́ти реме́нь сапога́ досто́йна бы́ти себе́ глаго́лет. И́стинны же врази́ толи́ким неи́стовством неи́стовствоваша, я́ко и е́же ви́дети Его́ я́коже Сам весть Себе́ досто́йным бы́ти глаго́лати себе́.

Что сего́ изумле́ния го́ршее? Что горды́ни сея́ неи́стовственейши? До́бре не́кто глаго́лаше мужь мудр: «Нача́ло горды́ни - е́же не ве́дети Го́спода» . Не бы у́бо низведе́н был и низпа́л дия́вол, не сый дия́вол пре́жде, а́ще не бы сим неду́гом неду́говал. Сие́ его́ от дерзнове́ния отве́рже о́ного. Сие́ в гее́нну посла́. Сие́ всех злых вино́вно ему́ бысть. Дово́льно бо и о себе́ растли́ти вся́ку доброде́тель души́: а́ще и ми́лостыню обря́щет, а́ще и моли́тву, а́ще и пост, а́ще и е́же что ни бу́ди. Высо́кое в челове́цех не чи́сто, рече́, пред Го́сподем. Не у́бо блуд то́кмо, ниже́ прелюбодея́ние оскверня́ти обы́че де́йствующих е́, но и горды́ня - и мно́га вя́щше о́нех. Что ли ра́ди? Я́ко блуд у́бо а́ще и непроще́нно зло, но оба́че име́ет кто вожделе́ние рещи́. Горды́ня же ниже́ вину́ у́бо обря́щет не́кую, ниже́ яково́ у́бо непщева́ние, его́же ра́ди у́бо получи́ти се́ни проще́ния. Но ничто́же и́но есть, ра́зве развраще́ние души́, неду́г люте́йший, ниотку́ду ину́ду ражда́емь ра́зве от безу́мия.

Ничто́же бо несмы́сленнейше гордели́ваго челове́ка. А́ще и бога́тством бу́дет обложе́н, а́ще и мно́гою вне́шнею прему́дростию и могу́тством устро́ен, а́ще и вся я́же в челове́цех бы́ти мня́щеся ре́вностна обно́сит нося́, - а́ще бо и́же о су́щих до́брых гордя́йся, – окая́нен, и злостра́стен, и всех оне́х мзду погубля́ет. А и́же нивочто́же су́щих взима́яйся: и се́ни ра́ди, и цве́та травна́го [сие́ бо есть настоя́щая сла́вы], надыма́я себе́ ‐ како не у́бо бу́дет всех подсмея́тельнейши, то́же творя́, е́же а́ще кто сотвори́т нищь и убо́г, все у́бо вре́мя гла́дом та́емь, а́щеже случи́тся когда́ во еди́ну нощь сон благ уви́дети, сего́ ра́ди велича́яся. Окая́нне и злостра́стне! Души́ твое́й растлева́еме люте́йшим неду́гом и после́днею нищетству́я нището́ю, ве́лие ли му́дрствуеши, я́ко зла́та тала́нты име́еши толи́ки и толи́ки, яко́ли мно́жество пле́нник? Но сия́ не твоя́. И а́ще не покаря́ешися мои́м глаго́лом, от и́скуса предва́рших навы́кни.

А́ще же си́це пия́н еси́, я́ко ниже́ от случа́ющихся ины́м сия́ научи́тися, потерпи́ ма́ло и уве́си случа́ющимися о тебе́, я́ко тебе́ сих по́льза ни еди́на же, егда́ от души́ разделя́яся, и ниже́ часа́ еди́наго, ниже́ часца́ ма́лаго госпо́дь сый, не хотя́ в предстоя́щих по́слеши и всих мно́жицею, и́хже не хо́щеши. Мно́зи бо ниже́ запове́дати о них попуще́ни бы́ша, но отъидо́ша внеза́пу, хотя́ще у́бо их наслажа́тися, не попуща́еми же, но влачи́ми и ины́м их оставля́юще и с ну́ждею попуща́юще и́мже не хотя́ху.

Е́же да не постра́жем, отсю́ду уже́ возмога́еми и здра́вствующе, да препо́слем сия́ ко гра́ду на́шему. Си́це бо их наслади́тися возмо́жем еди́ных, ин́ых же ника́коже. Си́це в некра́домое же и утверже́нное ме́сто сия́ положи́м. Несть бо, несть ничто́же та́мо от могу́щих сия́ отъя́ти: несть смерть, не суть заве́ти, не суть насле́дницы жре́биям; ни клевета́ния, ни наве́ты - но отше́дшему отсю́ду, мно́га приноси́мо, всегда́ есть сия́ обоима́ти. И кто си́це окая́нен, я́ко не хоте́ти име́ньми свои́ми наслажа́тися вы́ну?

Да пренесе́м у́бо на́ше бога́тство и да преложи́м. Та́мо ни осло́в нам тре́ба бу́дет, и велбу́дов, и колесни́ц, ниже́ корабле́й к таково́му преложе́нию - и́бо и сего́ нас неудо́бства свободи́л есть Бог. Но ни́щих нам тре́ба еди́ных, хромы́х, бе́дных, неду́жных - си́и таково́му суть вруче́ни преложе́нию, си́и име́ния препосыла́ют на не́бо, си́и таковы́х име́ний госпо́дие, в насле́дие ве́чных благи́х вво́дят, его́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, со Святы́м Ду́хом, ны́не и при́сно и во ве́ки веко́в. Ами́нь.

Ве́лие благодерзнове́ние - и е́же свобо́дна име́ти уста́, и вся во вторы́х полага́ти испове́дания е́же во Христа́. Си́це ве́лие и чу́дно, я́ко Сы́ну Бо́жию Единоро́дному такова́го пропове́дати при Отце́, а́ще и не ра́вно воздая́ние. Ты бо испове́даеши на земли́ - Той же на небесе́х. И ты у́бо челове́ком предстоя́щим - То́йже пред Отце́м и а́нгелех всех. Тако́в Иоа́нн бе: ни мно́жества, ни сла́вы, ни ина́го ничего́же челове́ческих убоя́ся, но сия́ вся попира́я, и с подоба́ющею свобо́дою я́же о Отце́ всем пропове́да. Сего́ бо ра́ди и ме́сто назна́менует ева́нгелист, да дерзнове́ние пока́жет велегла́снаго пропове́дника: не в хра́мине бо, ниже́ во у́гле, но [на] Иорда́н дости́г посреде́ мно́жеству предстоя́щих всех от него́ креща́емых, [креща́ющу бо наста́ша иуде́и,] и чу́дное о́но пропове́да испове́дание о Христе́, е́же высо́ких оне́х и неизрече́ных испо́лненое догма́т, и я́ко не буд́ет дово́лен разреши́ти реме́нь сапога́ Его́.

Сего́ ра́ди рече́: «Сия́ бы́ша в Вифа́нии». Ели́ка же списа́телей опа́снейша име́ют – «в Вифава́ре» рече́, Вифа́ние бо не об он пол Иорда́на, ниже́ при пусты́ни бе, но близ не́где Иерусали́му, по́весть же и ины́я ра́ди вины́ назна́менует.

Поне́же по́вести не дре́вния повествова́ти хотя́ше, но пре́жде ма́ла вре́мени случа́ющагося, предстоя́щих и ви́дящих твори́т сведе́телей глаго́лемых, и указа́ния и предстоя́щих подае́т, дерза́я бо я́ко ничто́же от себе́ прилага́ет ко глаго́лемым, но су́щая про́сте вся со и́стинною повествова́ше: е́же от мест сведе́тельство прие́млет, указа́ние, е́же рех, не ху́до и́стинны быва́юще.

Е: «На у́трии зрит Иису́са к нему́ гряду́ща и глаго́ла: Се А́гнец Бо́жий, взе́мляй грехи́ ми́ра». Т: Раздели́ша времена́ евангели́сти: и Матфе́й у́бо я́же пре́жде да́же свя́зану бы́ти крести́телю Иоа́нну времена́ назна́менав, тщи́тся к про́чим; евангели́ст же Иоа́нн, всих наипа́че пребыва́ет. И он у́бо, по е́же приити́ Иису́су от пусты́ни, посреде́ умолча́в, ели́ка Иоа́нн веща́ше, ели́ка иуде́и по́слани бы́вше глаго́лаху, и, ина́я вся сократи́в, прескочи́ а́бие на юзи́лище. «Слы́шав бо, рече́, Иису́с, я́ко пре́дан бысть Иоа́нн, отъи́де отту́ду» . Иоа́нн же не си́це, но и́же у́бо в пусты́ню путь умолча́, а́ки от Матфе́я рече́н, а я́же по сше́ствии бы́вша от горы́ повеству́ет и мно́га про́чее тогда́ наво́дит: «Не у́бо бе Иоа́нн вве́ржжен в темни́цу» . И что ра́ди, рече́, ны́не прихо́дит к нему́ Иису́с, и не еди́ною, но и второ́е сие́?

Матфе́й бо ну́жно Его́ прише́ствие бы́ти рече́, креще́ния ра́ди. Приво́дит бо: «Отвеща́ Иису́с и рече́, я́ко си́це ле́по есть нам испо́лнити вся́ку пра́вду» . Иоа́нн же и па́ки Ему́ приити́ глаго́лаше по креще́нии. И сие́ отсю́ду изъяви́л есть: «Аз бо рече́ ви́дех Дух сходя́щь я́ко голуби́цу, и пребы́сть на Нем» . Что у́бо ра́ди прихо́дит ко Иоа́нну? Ниже́ бо про́сте прии́де, но к нему́ прихожа́ше. «Гряду́ще, рече́, к нему́, ви́де Его». Что ли у́бо ра́ди идя́ше? Поне́же той Его́ крести́ со мно́гими, я́ко бы еди́ному же зазре́ти, я́ко от тоя́же вины́, от нея́же и ини́и ко Иоа́нну прихожда́ше, си́речь, я́ко грехи́ испове́дуя и в покая́ние омыва́яся в реце́ - прихо́дит, дая́ Иоа́нну сие́ па́ки испра́вити непщева́ние. И́бо е́же рещи́: «Се А́гнец Бо́жий, взе́мляй грех ми́ра» - все сие́ отъе́млет непщева́ние. И́же бо си́це чист, я́ко и ины́х грехи́ отмыва́ти мощи́, благоявле́нно, зане́ не я́ко испове́дати грехи́ прихо́дит, но я́ко да́ти вину́ о́ному чу́дному пропове́днику – и, второ́му гла́су пе́рвое слы́шащим, изве́стнейше вложи́ти рече́нная и приложи́ти ина́я па́ки. А е́же се рече́ся, за е́же мно́гим мно́жицею взы́сковати Его́ от рече́нных и от до́лгаго вре́мени. Сего́ ра́ди предстоя́ща Его́ показу́я, глаго́лаше: «Се сей есть, и́же дре́вле взыску́емыи, Сей А́гнец». А́гнца же Его́ нарица́ет, проро́чества Иса́ина воспомина́я иуде́ем и се́ни Моисе́йския, да о́то о́браза па́че их приведе́т ко и́стинне. Он бо а́гнец, ни еди́наго же еди́ною греха́ взя, Сей же - вселе́нныя вся, бе́дствующи бо ей поги́бнути, вско́ре свободи́ гне́ва Бо́жия. «Сей бе, о Нем же рех: Во след мене́ гряды́й, пре́жде мене́ бысть» . Зри́ши ли и зде, ка́ко е́же «пре́жде» сказу́ет? Рек бо А́гнца, я́ко взе́млет грех ми́ра. Тогда́ рече́, я́ко пре́жде мене́ бысть – я́вствено, я́ко сие́ есть е́же пре́жде, е́же грехи́ взя́ти ми́ра, е́же крести́ти Ду́хом Святы́м. «Мое́ бо прише́ствие, мно́жае ничто́же имя́ше е́же пропове́дати о́бщаго вселе́нныя Благода́теля и е́же водно́е креще́ние пода́ти. Сего́же е́же очи́стити всех челове́к и дарова́ти Уте́шителя де́йство. Сей пре́жде мене́ бысть, си́речь, показа́ся мене́ светле́йшь, зане́ пе́рвее мене́ бе».

Да посра́мятся и́же Па́вла Самоса́тскаго неи́стовство прие́мшии, к си́це я́вственей и́стинне противля́ющеся. И «аз не ви́дех Его́» рече́. Не зазо́рно зде сведе́телство соде́ловает, показу́я сие́ не челове́ческия су́ще дру́жбы, но о́то открове́ния боже́ственаго бы́вше. «Не ве́дех бо Его́» рече́. Ка́ко у́бо бу́деши достове́рен свиде́тель? Ка́ко у́бо ины́х научи́ши, сам не ве́дый? И не рече́ «не вем Его́», но: «не ве́дях Его́», я́ко си́це наипа́че достове́рен бу́дет. Ка́ко бы у́бо дарова́л не зна́емому? Но да яви́тся Изра́илю, сего́ ра́ди приидо́х крестя́ водо́ю. Не у́бо Сам креще́ния тре́боваше, ниже́ и́ну не́кую вину́ имя́ше о́на ба́ня, ра́зве е́же предпу́тие сотвори́ти я́же во Христа́ ве́ре про́чим всем. Не рече́ бо «да очи́щу креща́емых», ни «да свобожу́ грехо́в», приидо́х крестя́, но «да яви́тся Изра́илю». Что бо, рцы ми, креще́ния кроме́ немо́щно ли пропове́дати и привести́ наро́дов? Удо́бне си́це ника́коже, ниже́ бо си́це стекли́ бы ся вси, а́ще креще́ния кроме́ про́поведь была́ бы. Не бы у́бо ве́дели е́же от сосужде́ния вели́чество, мно́жество бо исхожда́ше не послу́шающе, и́хже глаго́лаше, но что? Крести́тися испове́дующе грехи́ своя́. Приходя́ще же науча́хуся я́же о Христо́ве креще́нии посре́дству, и́бо и сие́ иуде́йскаго честне́йше бе, и сего́ ра́ди вси притека́ху - но оба́че и си́це не соверше́нно бе. Ка́ко ли у́бо позна́л еси́ Его́? Соше́ствием Ду́ха рече́. Да́же не кто вознепщу́ет па́ки, я́ко в потре́бе устро́ен бысть Ду́хом, я́коже мы, услы́ши, ка́ко и сие́ отъе́млет зазре́ние, показу́я, я́ко наше́ствие Ду́ха о е́же пропове́дати Христа́ прии́де. Рек бо: «И аз не ве́дях Его́», наведе́: «Но посла́вый мя крести́ти водо́ю, Он ми рече́: На Него́же а́ще уви́диши Дух сходя́щь и пребыва́ющь на Нем - Он есть крестя́й Ду́хом Святы́м» .

Зри́ши ли, я́ко сие́ де́ло Ду́ха бе, е́же показа́ти Христа́? Бе бо и Иоа́нново сведе́тельство незазо́рно. Хотя́ же сие́ достове́рнейше сотвори́ти, возведе́ сие́ на Бо́га и Ду́ха Свята́го. Поне́же бо сведе́тельствова си́це ве́лие не́что, и чу́дно, и дово́льно слы́шащых ужаси́ти всех, [я́ко вселе́нныя всея́ грехи́ взе́млет еди́н Той и к толи́кому искупле́нию довле́ет мно́жества да́ра вели́чество,] устроя́ет про́чее сие́ изрече́ние. Сострое́ние же я́ко Сын есть Бо́жий, и я́ко не тре́боваше креще́ния, и я́ко де́ло Ду́ха наше́ствие бысть е́же я́вствена Его́ сотвори́ти то́кмо. Не бе бо Иоа́нновы си́лы е́же Ду́ха дая́ти. И явля́ют креща́емии от него́, глаго́люще: «Но ниже́ а́ще Дух Свят есть слы́шахом» . Не у́бо креще́ния тре́боваше Христо́с: ни о́ного, ни ино́го не́коего - но креще́ние потре́бно бе́яше си́лы Христо́вы. Е́же бо оскудева́юще сие́ бе, - глави́зна всех благи́х, е́же Ду́ха сподо́битися креща́емому, - сие́ у́бо Ду́ха дарова́ние приложи́л есть, прише́д:

Е: И свиде́тельствова Иоа́нн, глаго́ля: «Я́ко ви́де Ду́ха сходя́ща а́ки голуби́цу и пребыва́ющь на Нем. И аз не ве́дях Его́. Но посла́вый мя крести́ти водо́ю, Той ми рече́: На Него́же а́ще уви́диши Ду́ха сходя́ща и пребыва́юща на Нем - Сей есть крестя́й Ду́хом Святы́м. И аз ви́дех и свиде́тельствовах, я́ко сей есть Сын Бо́жий».

Т: Ча́сте же е́же «не ве́дях Его́» полага́ет. Что ра́ди и за что? Сро́дник бе Ему́ по пло́ти. Се бо рече́ «Елисаве́т, сро́дница твоя́, и сия́ заче́нши сы́на» . Да́же у́бо не возмни́тся угажа́ти сро́дства ра́ди, рече́: «не ве́дях Его́». И по сло́ву сие́ сбы́сться. И́же бо все вре́мя в пусты́ни пребыва́ше и оте́ческаго до́ма кроме́. Ка́ко у́бо, а́ще не ве́дяше Его́ пре́жде наше́ствия Ду́ха и а́ще тогда́ пе́рвие его́ позна́, пре́жде креще́ния возбраня́ше Ему́, глаго́ля: «Аз тре́бую от Тебе́ крести́тися»? Сие́ бо зна́мение, е́же зело́ Его́ ве́дети бе, но не пре́жде и пред мно́гим вре́менем, и в ле́поту.

Я́же у́бо чудеса́, ели́ка о́троку су́щу бы́ша, си́речь, я́же о волсве́х и ина́я ели́ка такова́, пре́жде мно́гаго случи́шася вре́мени, Иоа́нну зело́ и самому́ о́троку су́щу. В посре́дстве же мно́гаго бы́вшаго вре́мени в ле́поту всем не зна́емь бе. Поне́же а́ще зна́ем был бы, не бы́ у́бо рек «да яви́тся Изра́илю сего́ ра́ди приидо́х крестя́». Отсю́ду нам я́вствено, я́ко и зна́мения о́на, я́же де́тская бы́ти ре́ша Христу́, ло́жно и притво́рно от не́ких приводя́щих суть. А́ще бо от пе́рваго заче́н во́зраста чудоде́йствовал бы, не бы у́бо ниже́ Иоа́нн Его́ не ве́дал, ниже́ про́чее мно́жество потре́бовало бы учи́теля явля́ющаго Его́.

Ны́не же той рече́ сего́ ра́ди прии́де, «да яви́тся [Сей] Изра́илю». Ка́ко у́бо глаго́лаше «аз тре́бую от Тебе́ крести́тися»? По́слежде, а́ки я́вственейше уве́дев, наро́дом его́ пропове́даша, глаго́ля: «Сей бе, Его́же рех: во след мене́ гряде́т Муж, И́же пре́жде мене́ бысть». Я́ко и «Посла́вый мя крести́ти водо́ю», и сего́ ра́ди посла́в мя, «да яви́тся Изра́илю» - Сам ему́ и пре́жде наше́ствия Ду́ха Себе́ откры́л есть, те́мже и пре́жде да́же приити́ глаго́лаше: «Во след мене́ гряде́т, И́же пре́жде мене́ бысть».

Не у́бо ве́дяше Его́ пре́жде е́же приити́ на Иорда́н и всех крести́ти, но егда́ хотя́ше крести́тися, тогда́ Его́ позна́. И наипа́че Отцу́ Его́ откры́вшу проро́ку, и Ду́ху показа́вшу креща́емаго иуде́ом, и́хже ра́ди и наше́ствие Ду́ха бысть. Да́же бо Иоа́нново не пренебреже́тся сведе́тельство глаго́лющаго я́ко «пе́рвее мене́ бе», я́ко Ду́хом креща́ет и я́ко су́дит вселе́ную - и Оте́ц глас испуща́ет, пропове́дующе Сы́на, и Дух схо́дит, гла́са привлача́я на главу́ Христо́ву. Поне́же бо ов у́бо креща́ше, ов же креща́шеся. Да не кто от предстоя́щых о Иоа́нне вознепщу́ет глаго́латися рече́нному, прихо́дит Дух, исправля́я таково́е непщева́ние. Я́ко егда́ глаго́лет «не ве́дях Его́», пре́жнее глаго́лет вре́мя, а не е́же близ креще́ния.

Поне́же ка́ко Его́ возбраня́ше, глаго́ля: «Аз тре́бую от Тебе́ крести́тися»? Ка́ко такова́я о Нем глаго́лаше? Ка́ко у́бо не ве́роваше иуде́и, рече́, ниже́ бо еди́н Иоа́нн ви́де Ду́ха в виде́нии голуби́не?

Зане́ такова́я не теле́сных оче́с тре́буют то́кмо, но пре́жде сих е́же в мы́сли зре́ния, я́ко бы не мечта́ние изли́шне вещь вознепщева́ти. А́ще бо чудоде́йствующа зря́ще, и прикаса́ющася Свои́ми рука́ми неду́гующих и уме́рших и си́це их к жи́зни возводя́ща и здра́вию - толи́ко пия́нствоваху от за́висти, я́ко сопроти́вная зря́щим явля́тися. Ка́ко у́бо от наше́ствия Ду́ха еди́наго отрази́ли бы́ша неве́рие?

Не́цыи же ре́ша, ниже́ всем им зре́ти, но ра́зве Иоа́нну то́кмо, и благода́рственейше пребыва́ющим. А́ще бо и чу́вственными очесы́ мо́щно бе уви́дети я́ко в виде́нии голуби́не Дух сходя́щь, но оба́че не сего́ ра́ди вся́ка ну́жда всем я́вствене бы́ти ве́щи. И́бо и Заха́рия в чу́вственом виде́нии мно́го ви́де, и Дании́л, и Езеки́иль, и о́бщаго виде́ния ни еди́нагоже имя́ху. И Моисе́й же мно́га ви́де, якова́ от про́чих ни еди́н же. И преображе́ния же су́щаго на горе́ не вси наслади́шася ученицы́, но ниже́ зре́ния по воскресе́нии приобщи́шася вси, и сие́ явля́ет я́вствене Лука́, рек: «Я́ко показа́ Себе́ сведе́телем, и́же пре́жде избра́нным от Бо́га» . «И аз ви́дех, и свиде́тельствовах, я́ко сей есть Сын Бо́жий». А́гнца бо его́ нарече́ и я́ко Ду́хом крести́тися имя́ше, рече́, Сы́на же Бо́жия нигде́же. А́ще и по креще́нии ничто́же ему́ ре́кшу воспису́ют про́чии евангели́сти, но я́же посреди́ умолча́вше, я́же по вверже́нии Иоа́ннове в темни́цу бы́вшее Христо́ва чудеса́ глаго́лют, от ни́хже уга́дывати ле́по, я́ко и сия́, и и́на мно́га мно́жайша оста́влена бы́ша - и сие́ сам сей евангели́ст к концу́ писа́ния изъяви́л есть, рек.

Толи́ко бо оша́яхуся е́же мечта́ти не́что ве́лие о Нем, я́ко ви́дящаяся у́бо поно́сна бы́ти - вси единогла́сне и со опасе́нием вся́ким положи́ша. И не у́бо обря́щеши ни еди́наго же их оста́вивша ничто́же от таковы́х чуде́с же, о́ва у́бо друг дру́гу оста́виша, о́ва же вси умолча́ша.

Сия́ же мне не про́сте рече́ся, но к е́ллинскому безсту́дию: дово́льно бо сие́ любои́стиннаго их нра́ва указа́ние и е́же ничто́же ко благода́ти глаго́лати. И мо́жете и сею́ со ины́ми вооружи́тися вино́ю слове́с к ним.

Нравоуче́ние седмьнадеся́тое: я́ко подоба́ет ве́дети опа́сне о ве́ре, я́ко бы мощи́ к вопроша́ющим отвещава́ти:

Но внима́йте: и́бо безме́стная врачу́ у́бо о хи́трости подвиза́тися свое́й, и сапо́жнику, и тка́телю, и всем про́сте худо́жником, - христиани́ну же бы́ти ре́кшу, не мощи́ сло́ва пода́ти о свое́й ве́ре. А́ще и о́на у́бо презре́на во име́ния тщету́ принесе́, сия́ же небрего́ма саму́ю нань растлева́ет ду́шу.

Но оба́че си́це окая́нне пребыва́ем, я́ко о́нем у́бо вся́ко отдая́ти тща́ния, ну́жных же и я́же спасе́ния на́шего вина́ суть, сих я́ко ни еди́наго же досто́йных пренебрега́ти. Сие́ не попуща́ет е́ллином вско́ре своему́ посмея́тися заблуже́нию.

Егда́ бо они́ лже́ю составля́юще вся де́йствуют, я́кобы спокры́ти догма́т студ, мы же, и́стинны служи́телие, ниже́ разврести́ уста́ мо́жем - ка́ко не мно́гу не́мощь зазря́т уче́нию? Ка́ко не лесть и бу́йство на́ша ве́щи вознепщу́ют? Ка́ко не поху́лят Христа́ я́ко досади́теля и лестца́ и мно́гих безу́мием ко льсти де́йствовавша? Сего́ мы вино́вни хуле́ния, не хотя́ще бде́ти во я́же о благоче́стии словесе́х, но изли́шна полага́юще сия́ и земны́ми пеку́щеся. И плесца́ у́бо кто жела́я, и вса́дника, и со зверьми́ борю́щагося, вся подвиза́ет и промышля́ет, я́ко бы в по́двизех су́щых о́нем не ме́ньше име́я отъити́, и до́лги слага́ют похвалы́, ко оклевета́ющим их отве́т слога́юще и безчи́слеными бию́ща укори́знами сопроти́вных.

О христия́нстве же предлежа́щых словес, вси до́лу зрят, и леня́тся, и зия́ют, и посмея́вшеся отхо́дят. И ка́ко не досто́йно сия́ безчи́сленнаго гне́ва, егда́ Христо́с безче́стнейшь плесца́ явля́ется пред на́ми? А́ще и о соде́янных о́неми безчи́сленым отве́том поучи́стеся, а́ще и всех студне́йшых, о Христо́вых же чудесе́х, а́ще и вселе́нную привлеко́ша, ниже́ помы́слити что и попещи́ся творите́.

Ве́руем во Отца́ и Сы́на и Свята́го Ду́ха. В воскресе́ние теле́с, в жизнь ве́чную. А́ще вопроси́т кто от е́ллин: Кто есть Сей Оте́ц? Кто же Сын? Кто же Святы́й Дух? Три ли глаго́лете бо́ги и нам порица́ете многобо́жество? Что рече́те? что отвеща́ете? Ка́ко отрази́те прираже́ние слове́с сих? Что же у́бо, молча́щим вам, па́ки принесе́т ино́е взыска́ние: что же есть вся́чески воскресе́ние, вопроша́ет - еда́ в сем телеси́ па́ки воста́нем, еда́ во ино́м па́че сего́? И а́ще в сем, ка́я потре́ба сему́ разреши́тися? Что к сим рече́те? Что же а́ще возглаго́лете: что ра́ди ны́не, а не в пре́жних времене́х прии́де Христо́с? Ны́не ли Ему́ изво́лися промы́слити о челове́цех, про́чее же все вре́мя нас пренебрежа́ше? И ина́я к сим сих мно́жайша истя́жет. Ниже́ бо ну́жно мно́гое взыска́ния полага́ющу разреше́ния умолчава́ти, я́коже не просте́йших си́це вреди́ти - довле́ют бо и рече́нное ко е́же оттрясти́ ваш сон. Что у́бо, а́ще сия́ истя́жут, вы же ниже́ глаго́л сих послу́шати мо́жете? Еда́ ма́лу постра́жем казнь, рцы ми, толи́кия льсти вино́вни быва́юще и́же во тме седя́щым? Хоте́х а́ще у́бо упражне́ния восприи́мете мно́гаго, на среду́ всех нас скве́рна е́ллина не́коего филосо́фа кни́гу на нас рече́нную принести́ и ина́го па́ки, старе́йшаго сего́, да си́це у́бо вас воста́вил бых и мно́гие ле́ности отве́л бы. А́ще бо они́, я́кобы на нас рещи́, толи́ка бо́дрствоваша, ко́его у́бо мы бу́дем проще́ния досто́йни, а́ще ниже́ прираже́ния я́же на нас ве́мы отража́ти?

Что же ра́ди и приведе́ни бы́хом? Не слы́шиши ли апо́стола глаго́люща: «Гото́ви бу́дете ко отве́ту вся́кому вопроша́ющему вас сло́во о су́щей в вас наде́жди» . И па́ки та́яже наказу́ет, глаго́ля: «Сло́во Христо́во да вселя́ется в вас бога́тно» . Но что глаго́лют к сим ше́ршней безслове́снейшии? «Душа́ благослове́на вся́ка проста́». И «ходя́й про́сте, ше́ствует наде́яся» . Сие́ бо всех злых вино́вно есть, я́ко ниже́ сведе́тельство писа́ний к потре́бному ве́дят приводи́ти мно́зии. Не несмы́сленнаго бо зде рече́, ниже́ ничто́же ве́дящаго, но не лука́ваго, не злоде́я, разу́мнаго. Поне́же а́ще сие́ бы́ло бы, изли́шне бе глаго́лати: «быва́йте му́дрии я́ко зми́и и це́ли я́ко голу́бие» .

Но что сия́ подоба́ет глаго́лати, в ничто́же потре́бно срета́ющуся сему́ сло́ву? К рече́нным бо, ниже́ ина́я нам испра́вятся я́же жития́ и жи́зни, но отвсю́ду окая́нни и подсмея́тельни. И обвинова́ти у́бо друг дру́га при́сно гото́ви, исправля́ти же о ни́хже обину́ем и порица́ем - лени́ви. Те́мже молю́ ны́не у́бо, нам саме́м быва́ющим, не до осужде́ния стоя́ти то́кмо. Не довле́ет бо сие́ уми́лостивити Бо́га. Но изря́дное отвсю́ду показа́ти преложе́ние, я́ко да в сла́ву Бо́жию жи́вше, и са́ми бу́дущия наслади́мся сла́вы, ея́же бу́ди всем нам получи́ти благода́тию и человеколю́бием Го́спода на́шего Иису́са Христа́, Ему́же сла́ва во ве́ки веко́в. Ами́нь.

Во дни о́ны, рече́ Петр к лю́дем: Му́жие изра́ильстии, слы́шите словеса́ сия́. Иису́са назоре́я, му́жа от Бо́га, изве́ствованна в вас, си́лами и чудесы́ и зна́мении, я́же сотвори́ Тем Бог посреде́ вас, я́коже и са́ми ве́сте.

Толкова́ние Златоу́ста: Изра́ильтяны их нарече́, пра́отец их ра́ди, приводя́ их о́нех ве́ру воспомяну́ти. Не суть бо ласка́ния глаго́лы, но поне́же прикосну́ся их зело́, возво́дит их и воспомина́ет пра́отца. Поне́же хотя́ше им о Иису́се глаго́лати, да испе́рва не бы ся смути́ли, проро́ка су́ща Его́ слы́шаще: те́мже Иису́сово и́мя а́бие предста́ви. И не рече́ «ве́руйте», но «слы́шите», да не та́ко яви́тся им сло́во. Зри у́бо, ка́ко не глаго́лет высо́ких, но от зело́ смире́нных начина́ет, и а́бие оте́чество Его́ глаго́лет, е́же мня́шеся ху́до бы́ти. И ничто́же вели́ко о нем глаго́лет, «Иису́са, рече́, назоре́я, му́жа от Бо́га, изве́ствована в вас». Зри, ко́е у́бо вели́ко бе, е́же рещи́ я́ко от Бо́га по́слан бысть. Се у́бо горе́ и до́лу: и сам тща́шеся Иоа́нном, и апо́столом то сказа́ти. Слы́ши у́бо Иоа́нну глаго́лющу: «Он ми рече́: на не́мже ви́диши Дух сходя́щь и пребыва́ющь на нем, Той есть». Сам же Христо́с и со преиме́нием твори́тся, глаго́ля: «От Себе́ не приидо́х, но Он Мя посла́».

Толкова́ние Афана́сия, патриа́рха Александри́йскаго: Поне́же бо тогда́, иуде́е прельсти́вшеся, непщева́ху Христа́ челове́ка про́ста бы́ти, то́чию от се́мене Дави́дова и по подо́бию е́же от Дави́да про́чих чад бы́вших: ни бо Бо́га Его́, ниже́ Сло́во плоть бысть ве́роваху. Сего́ ра́ди со мно́зем ра́зумом блаже́нный апо́стол челове́ческая Спа́сова пре́жде глаго́ла иуде́ом, да вся́ко уве́рит их от ви́димых бы́вших зна́мений, прише́дшаго с небеси́ Христа́. Про́чее и о Божестве́ Его́ ве́ру приво́дит, показу́я бы́вша де́ла я́же не суть челове́ческая, но Бо́жия. Те́мже глаго́ляй Петр: «Му́жа, стра́сти прие́мша, Христа́», а́бие совокупля́ше, глаго́ля: «Сей Нача́льник жи́зни есть». Во Ева́нгелии же испове́дует, глаго́ля: «Ты еси́ Христо́с, Сын Бо́га Жива́го». В посла́нии же глаго́лет Его́ Посети́теля душа́м и Го́спода, себе́ же и а́нгелом и си́лам су́ща. Па́ки же Па́вел глаго́ля «му́жа от се́мени Дави́дова бы́ти Христа́». Сие же пи́шет евре́ом: «И́же есть сия́ние [сла́вы] и о́браз соста́ву О́тчу» . Филиписе́ом же: «И́же зра́ком Бо́жиим сый, не хище́нием непщева́ бы́ти ра́вен Бо́гу» . Е́же глаго́лати Нача́льника жи́зни, и Сы́на Бо́жия, и Сия́ние, и О́браз, ра́вна Бо́гу и Го́спода, Посети́теля душа́м - что у́бо бы́ло и́но, то́чию в те́ле Сло́во Бо́жие бе, И́мже вся бы́ша, и есть Неразде́лен Отцу́, я́коже есть сия́ние к све́ту.

Толкова́ние Златоу́ста: Поне́же Сын Бо́жий есть и Бог Сло́во бысть челове́к, прие́м ра́бий зрак, я́коже бы́ти прише́дшаго Христа́ челове́ка вку́пе и Бо́га. Я́коже бо егда́ Христо́с глаго́лется «Бо́жия Си́ла» и «Бо́жия Прему́дрость», о Божестве́ Его́ глаго́лемая прие́млется. Си́це па́ки егда́ Христо́с глаго́лется «у́мре о гресе́х на́ших», о пло́ти Его́ глаго́лемое прие́млется, я́же прия́т от Де́вы. Зри у́бо самого́ Христа́ глаго́люща: «И́щете Мя уби́ти, Челове́ка, И́же и́стинну вам глаго́лах». И па́ки: «Аз и Оте́ц еди́но есве́». Е́же бо рещи́: изве́стованнаго си́лами и чудеса́ми и зна́меньми, и́хже сотвори́ Им Бог, Тем бо благоле́пно и ве́ки сотвори́.

Су́щее: Сего́ нарече́нным сове́том и поразу́мением Бо́жиим, про́дана прие́мше рука́ма беззако́нных, пригво́ждьше уби́сте. Его́же Бог воскреси́ из ме́ртвых, разре́шив боле́зни сме́ртныя, я́коже не бя́ше мо́щно держа́ну бы́ти Ему́ от нея́.

Толкова́ние Златоу́стаго: А́ще и пре́жде на рече́нно бе, рече́, оба́че му́жие уби́йца есте́. Я́коже Ио́сиф к бра́тиям свои́м глаго́лаше: «Не гне́вайтеся друг на дру́га, Бог мя посла́ зде». Рече́: «Бо́жие де́ло бысть»; да не у́бо глаго́лют до́бре сотвори́хом, приложи́: «рука́ма безако́нныма, пригво́ждьше уби́сте». Зде бо Иу́ду назна́менует, вку́пеже и тем назна́менает, я́ко и не тех кре́пости бе, а́ще Сам не бы попусти́л. А е́же глаго́лет «я́ко воскреси́ Его́ Оте́ц», слы́шащих не́мощи ра́ди благоприя́тно твори́ти сло́во. Иде́же бо Оте́ц де́йствует, си́речь, Свое́ю си́лою - ка́я есть О́тчая си́ла?, - то́чию Христо́с: Христо́с бо Бо́жия Си́ла и Бо́жия Прему́дрость. Те́мже Христо́с Себе́ воскреси́, и Отце́м воскре́се, глаго́лется. С пло́тию сплете́н быв, сме́рти дости́г да́же до са́мых а́довых врат, воскре́се в тре́тий день, разреши́в боле́зни сме́рти , я́коже не бе возмо́жно держа́тися от нея́: бе бо по естеству́ безсме́ртен, а́ще и теле́сне пострада́ти во́лею восприя́т.

Су́щее: Дави́д бо глаго́лет о Нем: «Предзре́х Го́спода пре́до мно́ю вы́ну, я́ко одесну́ю мене́ есть, да ся неподви́жу. Сего́ ра́ди возвесели́ся се́рдце мое́, и возра́довася язы́к мой, еще́ же и плоть моя́ всели́тся на упова́ние. Я́ко не оста́виши ду́шу мою́ во а́де, ниже́ да́си преподо́бному Своему́ ви́дети истле́ния. Сказа́л ми еси́ пути́ живота́, и испо́лниши мя весе́лия с лице́м Твои́м» .

Толкова́ние Григо́рия Ни́сскаго: Си́це апо́столу Петру́ глаго́лемое Дави́дом сказа́вшу, я́ко ниже́ душа́ Его́ оста́вися во а́де, ниже́ плоть Его́ ви́де истле́ния: и́бо Божество́ и пре́жде воплоще́ния, и во пло́ти, и по страда́нии всегда́ то́жде, е́же бе естество́м всегда́ су́ще и всегда́ пребыва́юще. Во стра́сти же по челове́ческому естеству́ е́же от нас смотре́ние испо́лни, раздели́вшися ко вре́мени, души́ от те́ла отлучи́вшися, ника́коже Ему́ приобщи́ся, я́ко после́дованию и нача́лу да́тися вся́кому челове́ческому естеству́: из ме́ртвых в нетле́ние и сме́ртное в безсме́ртие. Нача́тку на́шему е́же к Бо́гу растворе́нию, в боже́ственное естество́ претвори́вшуся, е́же одесну́ю Отца́ ста́ти Сы́ну. И па́ки одесну́ю Отца́ Сы́на нам назна́менует: «Предзре́х Го́спода пре́до мно́ю вы́ну», Го́спода своего́ Отца́ нари́чет, зане́же прия́ти Его́ ра́бий зрак. И «испо́лниши мя весе́лия с лице́м Твои́м», лице́ Госпо́дне - разуме́й боголе́пное богоявле́ние и на́ше посеще́ние, е́же нас тогда́ соверше́ннейше посети́.

Су́щее: Му́жие бра́тия, досто́ит рещи́ со дерзнове́нием к вам о патриа́рсе Дави́де, я́ко у́мре и погребе́н бысть, и гроб его́ есть в нас да́же до дне сего́. Проро́к у́бо сый и ве́дый, я́ко кля́твою кля́тся ему́ Бог, от плода́ чресл его́ по пло́ти воздви́гнути Христа́ и посади́ти Его́ на престо́ле Его́, предви́дев, глаго́ла о воскресе́нии Христо́ве, я́ко не оста́вися душа́ Его́ во а́де, ни плоть Его́ ви́де истле́ния. Толкова́ние Златоу́стаго: «Му́жие бра́тия» рече́. Егда́ что хо́щете вели́ко глаго́лати, сие́ предисло́вие прие́млет. Вели́ко смиреному́дрие! Не рече́ бо «сия́ не о Дави́де глаго́лашеся, но о Христе́». Ина́ко же мно́го о блаже́ннем Давы́де че́стне запрети́ их. И к сему́ не про́сто о Дави́де глаго́лет, но о патриа́рсе я́ко у́мре и погребе́н бысть, и гроб его́ в нас есть и до дне сего́, си́речь, не воскре́се. И та́ко, по хвала́х Дави́довех, на Христа́ прехо́дит. Сия́ глаго́лет, да поне́ о́наго че́стию и благоро́дием прии́мут воскресе́ния сло́во. А е́же «не ви́дети пло́ти Иису́сове истле́ния», явля́ет, е́же не разы́тися. И «в тре́тий у́бо день воскре́се», подоба́ше у́бо та́ко воскресе́нию бы́ти. А́ще бо бы плоть его́ разсы́пашася по ме́ртвых чи́ну, неве́рно бы бы́ло воскресе́ние Его́. Но да вся́ко неве́рие разруши́тся, тридне́вно воскре́се, неразтле́нна еще́ су́щи, и в но́вем гро́бе, иде́же никто́же пре́жде положе́н бысть: да не мни́тся ин, а не Иису́с воста́л есть.

Су́щее: Сего́ Иису́са воскреси́ Бог, Ему́же вси мы есмы́ свиде́теле. Десни́цею у́бо Бо́жиею вознесе́ся, и обетова́ние Свята́го Ду́ха прие́м от Отца́. Излия́ се, е́же вы ны́не ви́дите и слы́шите.

Толкова́ние Амо́сово: Не ино́го Бо́га пропове́даху апо́столы, ниже́ ино́го у́бо пострада́вша, ино́гоже воскре́сша, и стра́стна пребы́вша - но еди́ного Того́, и Бо́га, и Спа́са Иису́са Христа́ воскре́сшаго из ме́ртвых, и е́же к Нему́ ве́ру пропове́даху неве́рующим в Сы́на Бо́жия, и от проро́к утвержа́ху их, я́ко Его́же обетова́ Бог посла́ти Христа́, посла́ Иису́са, Его́же ти́и распя́ша, и Бог воскреси́. Апо́столи, Ева́нгелие пропове́дающе, глаго́лаху Христа́ от Отца́ воскре́сша, не́мощи ра́ди слы́шащих благоприя́тно творя́ху сло́во. Слы́ши у́бо Па́вла глаго́люща: «Ча́юще блаже́ное упова́ние и явле́ние сла́вы вели́каго Бо́га и Спа́са на́шего Иису́са Христа́» . И па́ки: «О и́мени Иису́сове вся́ко коле́но поклони́тся небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с во сла́ву Бо́гу Отцу́» . Ви́диши ли еди́ну си́лу и ра́вность Отца́ и Сы́на? Те́мже и Сам ся воскреси́ Христо́с, и от Отца́ воскре́се глаго́лется.

Су́щее: Не бо Дави́д взы́де на небеса́, глаго́лет бо сам: «Рече́ Госпо́дь Го́сподеви Моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма». Тве́рдо у́бо да разуме́ет весь дом Изра́илев, я́ко и Го́спода, и Христа́ Бог сотвори́л есть сего́ Иису́са, Его́же вы распя́сте.

Златоу́стаго: Ревну́юще про́чее по дарова́нии Ду́ха Свята́го, о е́же на небеса́ Вознесе́нии глаго́лет не про́сто, но па́ки свиде́теля приводя́ и о́ного воспомина́я, о не́мже Христо́с рече́. Не взы́де бо Дави́д не небеса́, про́чее не ктому́ обину́яся глаго́лет, имы́й дерзнове́ние о глаго́лемых. Не глаго́лет «досто́йно есть рещи́», ни ели́ко такова́я. Глаго́лет же сам: «Рече́ Госпо́дь Го́сподеви Моему́», и про́чая, равноче́стна Отца́ и Сы́на сим глаго́лом разуме́ем. Безтеле́сному бо существу́ не мо́щно есть разуме́ти десно́ или́ шу́е. Ничто́же бо о Божестве́ я́ве навы́кнути иуде́е можа́ху, сего́ ра́ди о плотсте́м смотре́нии глаго́лет им, да си́ми бесе́ды слу́хи их обуча́тся, про́чее уче́ние приугото́вит им. Рек бо: «Сего́ Иису́са, Его́же вы распя́сте», вели́к страх предста́ви им. Коне́ц толкова́нию.