Понедельник третьей седмицы по Пасхе

На у́трии же восхоте́ изы́ти в Галиле́ю и обре́те Фили́ппа. И глаго́ла ему́ Иису́с: После́дуй Ми. Бе же Фили́пп от Вифсаи́ды, от гра́да Андре́ева и Петро́ва.

«Вся́кому пеку́щемуся, еди́но есть не́что изли́шне» - прито́чное рече́ сло́во. И Христо́с я́ко «ища́й обрета́ет» , те́мже ничто́же нахо́дит ми про́чее чуди́тися, отку́ду Фили́пп после́дова Христу́. Андре́й бо слы́шав от Иоа́нна, и Петр от Андре́я. Сей же ни от еди́наго и учи́вся, - сие́ то́кмо ре́кшу Христу́ к нему́: «После́дуй Ми», и послу́ша а́бие, и не отъи́де, но и пропове́дник ины́м быва́ет.

Прите́к бо к Нафана́илу, «Его́же писа́, рече́, Моисе́й в зако́не проро́цы обрето́хом». Зри́ши ли, ка́ко попечи́тельну мысль имя́ше, и ча́сте поуча́шеся Моисе́овым, и ча́яше Прише́ствия? И́бо е́же обрето́хом - и́щущим есть при́сно.

«На у́трии же изы́де Иису́с в Галиле́ю». Пре́жде бо да́же Ему́ не́коему прилепи́тися, и ни еди́наго же призыва́ет. Твори́т же сие́ непро́сте, но по Свое́й прему́дрости и ра́зуму. А́ще бо ни еди́ному же самово́льне прише́дшу Той бы привлача́л их, поне́ отскочи́ли бы не́гли. Ны́не же, о себе́ избира́юще сие́, утвержде́ни про́чее пребы́ша. Фили́ппа же призыва́ет, но и па́че сего́ зна́ема су́ща: а́ки бы в Галиле́и рожде́н быв и воспита́н, па́че [ины́х] Его́ зна́яше.

Прие́м у́бо ученико́в, гряде́т про́чее на уловле́ние ины́х и Фили́ппа и Нафана́ила привлача́ет. Но о сем у́бо не бе си́це чу́дно, егда́ и слух Иису́сов изы́де во всю Си́рию. А е́же чу́дно - е́же су́щих о Петре́, и Иа́кове, и Фили́ппе бе. Не зане́ то́кмо пре́жде зна́мений покори́шася, но зане́ и от Галиле́и су́ще, отню́ду же ниже́ проро́к воста́, ни мо́жет что бла́го бы́ти . Неразу́мнейша бо не́како, и ди́вийше, и де́белейше си́и пребыва́ху. Христо́с же и от зде Свою́ кре́пость вложи́, от земли́ ни еди́наго нося́щия пло́да ученико́в избра́нных избира́я. Ле́по у́бо Фили́ппу и су́щих о Петре́ ви́дящих, [и] Иоа́нна слы́шащим после́довати. Ле́по же и гла́су Христо́ву соде́лати в нем. Ве́дяше бо хотя́щих бы́ти прили́чных.

Евангели́ст же вся сия́ сокраща́ет. Я́ко у́бо Христо́с имя́ше приити́ ве́роваше, а я́коже Сей Христо́с бе - не ве́дяше: е́же ему́ или́ от Петра́, или́ от Иоа́нна слы́шати глаго́лю. Глаго́лет же и весь его́ Иоа́нн, да навы́кнеши, я́ко «не́мощная ми́ра избра́ Бог» .

Евангелие: Обре́те Фили́пп Нафана́ила и глаго́ла ему́: «Его́же писа́ Моисе́й в зако́не и проро́цы, обрето́хом Иису́са, сы́на Ио́сифова, и́же от Назаре́та».

Толкование: Глаго́ла же сия́, достове́рну творя́ про́поведь от Моисе́я и проро́к, моля́ послу́шателя отвсю́ду. Поне́же бо Нафана́ил опа́сен бе и вся́чески устро́ен со и́стинною, я́коже и Христо́с сведе́тельствова и де́ло показа́. В ле́поту его́ к Моисе́ю и проро́ком посла́, да си́це прии́мет Пропове́даннаго. А́щеже и сы́на Ио́сифова Его́ глаго́лет, да не смути́шися: а́ще бо сего́ Сын непщева́шеся бы́ти.

И отку́ду я́вствено, о́ Фили́ппе, я́ко Сей Он есть, что глаго́леши нам зна́мение? Не довле́е бо то́кмо изъясни́ти. Ко́е зна́мение ви́дел еси́? Ко́е чу́до? Несть безбе́дно ве́ровати про́сте о таковы́х ве́щех. Ко́е у́бо име́еши указа́ние? То же и Андре́ю рече́.

И́бо и он предста́вити бога́тство е́же обре́те не име́я, ниже́ глаго́лы показа́ти моги́й сокро́вище, приво́дит ко Обре́теному бра́та - си́це у́бо и сей: ка́ко у́бо Сей есть Он Христо́с и ка́ко Его́ проро́цы предпропове́даша не рече́, влече́т же его́ ко Иису́су, неотсту́пно про́чее ве́дый, а́ще глаго́л вкуси́т и О́ного уче́ния.

Ева́нгелие: Рече́ ему́ Нафана́ил: «От Назаре́та мо́жет ли что бла́го бы́ти?». Глаго́ла ему́ Фили́пп: «Прииди́ и виждь». Ви́дев же Иису́с Нафана́ила гряду́ща к Себе́ и глаго́ла о нем: «Сей вои́стинну изра́ильтянин есть, в не́мже льсти несть».

Толкова́ние: Сие́, поне́же у́бо рече́: «от Назаре́та мо́жет ли что бла́го бы́ти?», похваля́ет и чуднотвори́т челове́ка. И у́бо укаря́ти ли ся ему́ подоба́ше? Ника́коже. Не неве́рующаго бо бе́ша глаго́лы, ничто́же укори́зн досто́йно, но похва́л. Ка́ко ли и кото́рым о́бразом? Зане́ слыша от Фили́ппа, но и па́че сей устро́ен бе проро́ческим гласом. И́бо слы́ша от писа́ний, я́ко от Вифлее́ма подоба́ет приити́ Христу́ и от ве́си, в не́йже бе Дави́д. Сие́ у́бо и от иуде́й удержа́ся, и проро́к испе́рва пропове́даша, глаго́ля: «И ты Вифлее́ме, земле́ Иу́дова, ника́коже ме́ньши еси́ во влады́ках Иу́довых, от тебе́ бо изы́дет Вождь, И́же упасе́т лю́ди Своя́ и Изра́иля» . Поне́же у́бо слы́ша я́ко от Назаре́та, смути́ся и недоуме́ся, не обрета́я сбыва́ющеся Фили́ппово обеща́ние проро́ческому прорече́нию. Зри же его́ и в недоуме́нии ра́зум и кро́тость. Не рече́ бо а́бие: «Прельща́еши мене́, о́ Фили́ппе, и лже́ши, не повину́юся, не прихожду́. Уве́дех от проро́к, я́ко от Вифлее́ма Христу́ подоба́ет приити́, ты же ли глаго́леши от Назаре́та - не у́бо Сей Он есть». Но ничто́же от сих рече́. Но что? Прихо́дит и сей. Тем у́бо е́же не прия́ти его́ от Назаре́та бы́ти, опасе́ние е́же о писа́ниих явля́я и е́же нра́вов непреле́стное. Те́мже е́же не оплева́ти возвести́вшаго, мно́гую любо́вь я́же имя́ше о Христо́ве прише́ствии явля́я. Помы́сли бо, я́ко ле́по бе Фили́ппу о ме́сте соблазни́тися. Зри же мне и отрече́ния, ка́ко кро́тко сотвори́ чи́ном вопроше́ния: не рече́ бо «ничто́же бла́го Галиле́я прино́сит», но ка́ко? «От Назаре́та что мо́жет ли бла́го бы́ти?».

Зело́ же Фили́пп разу́мен. Не бо я́ко недоуме́вся и стужа́ет си, но пребыва́ет, му́жа хотя́ привести́, и от нача́л апо́столу подоба́ющую си́лу нам показу́я. Сих ра́ди Христо́с рече́: «Се и́стинен изра́ильтянин, в не́мже льсти несть». Я́коже есть и ло́жен изра́ильтянин. Но сей не тако́в - нелицеме́рен бо его́ рече́ суд: ничто́же ко благода́ти, ниже́ ко вражде́ веща́ет. А́ще иуде́и вопроше́ни бы́вше, где Христо́с ражда́ется, ре́ша, я́ко в Вифлее́ме, и сведе́тельство приведо́ша, глаго́люще: «И ты Вифлее́ме, ника́коже ме́ньши еси́ во влады́ках Иу́довых», но они́ у́бо пре́жде да́же уви́дети сведе́тельствоваху сия́. Егда́ же у́бо ви́деша, от за́висти сведе́тельство сокры́ша, глаго́люще: «Сего́ же не ве́мы, отку́ду есть» .

Нафана́ил же не си́це, но е́же изнача́ла о Нем изволе́ние имя́ше, сие́ пребы́сть соблюда́я, я́ко несть от Назаре́та. Ка́ко у́бо его́ Назаря́нина проро́цы нарица́ют? От воспита́ния и от е́же та́мо пребыва́ния. Е́же бо рещи́ «несмь от Назаре́та, я́коже возвести́ тебе́ Фили́пп, но от Вифлее́ма» оставля́ет, я́ко бы не а́бие сомни́тельно сотвори́ти сло́во. И кроме́ сих, я́ко а́ще не увеща́л бы сие́, не бы у́бо дово́льно зна́мение дал е́же Сам бы́ти Христо́с. Что бо возбраня́ше и не су́щу Христу́ от Вифлее́ма бы́ти, по ины́х та́мо рожде́нных? Сие́ у́бо оставля́ет, а е́же наипа́че его́ мо́жет привести́ - сие́ твори́т. Показу́ет Себе́ предстоя́ща, бесе́дующим им.

Ева́нгелие: Ре́кшу бо О́ному: «Отку́ду мя зна́еши?», глаго́ла, «Пре́жде тебе́ Фили́ппу возгласи́ти и су́ща под смоко́вницею, ви́дех тя».

Толкова́ние: Зри челове́ка благоустро́ена и утвержде́на. Ре́кшу бо Христу́ «се вои́стинну изра́ильтянин», не ослабе́ похвала́ми, не притече́ к похвале́ниям, но пребыва́я ища́, и опа́снейше испыту́я, и хо́щет не́что я́вствено уве́дети. Той у́бо я́ко челове́ка истяза́ше еще́, и Он же я́ко Бог отвеща́. Не рече́ бо «испе́рва тебе́ вем, и нрав твой, и кро́тость», ни я́ко челове́к ему́ после́довав; испе́рва позна́, я́ко ны́не «ви́дех тя у смоко́вницы», егда́ никто́же та́мо бе, но еди́н Фили́пп бе и Нафана́ил, и наеди́не вся сия́ ре́ша. За е́же сие́ рече́ся, зане́ ви́дев его́ издале́ча рече́: «се вои́стинну изра́ильтянин», да навы́кнеши, я́ко пре́жде, не́же прибли́житися Фили́ппу, сия́ веща́ше Христо́с, я́ко бы не зазо́рну бы́ти сведе́тельству. Те́мже и вре́мя рече́, и ме́сто, и дре́во.

А́ще бо рекл бы то́кмо: «Пре́жде не́же Фили́ппу приити́ к тебе́, ви́дех тя» - не́гли и зазре́л бы Cя, я́ко Сам его́ посла́в и ничто́же ве́лие глаго́ля. Ны́не же е́же ме́сто рещи́, в не́мже пребыва́ша глаша́емь от Фили́ппа, и дре́во нарече́ния, и рече́ния вре́мя - несомни́тельно показа́ прорече́ние су́ще. Не прорече́ние же то́кмо изъяви́л есть, но и и́нако его́ наказа́л есть, в воспомина́ние бо его́ приведе́ тогда рече́нных, си́речь, я́ко «от Назаре́та мо́жет ли бла́го что бы́ти», о не́мже наипа́че бо́льше его́ прия́т, я́ко и сия́ ему́ веща́ющу не зазре́но похвали́. Почуди́ся и от сего́ све́де, я́ко Христо́с вои́стинну есть: и от прорече́ния, и от е́же проуве́дети, и от е́же ра́зум истяза́ти со опасе́нием Нафана́илу е́же показу́ющаго бе, зане́ и я́же в мы́сли его́ ве́дяше.

И́накоже и по себе́ мня́щуся глаго́лати не укори́ти, но и похвали́ти. Я́ко у́бо возгласи́ его́ Фили́пп рече́, что же ему́ бесе́дова и что сей о́ному – попусти́, оста́вив его́ со́вести и не хотя́ и́ вя́щше облича́ти. Что у́бо пре́жде да́же Фили́ппу возгласи́ти ви́де его́ то́кмо? Не пре́жде ли сего́ зря́ше неусы́пным о́ком? Зря́ше, никто́же сопроти́в рече́т; но пре́жде сие́ принужа́ющее бе рещи́.

Что у́бо он? Поне́же зна́мение несомни́тельно прия́т проуве́дения, прии́де на испове́дание: и отложе́нием пе́рвым опасе́ние явля́я, и е́же по сих сложе́нием - благоразу́мие.

Ева́нгелие: Отвеща́ бо рече́ и глаго́ла Ему́: «Равви́! Ты еси́ Сын Бо́жий, Ты еси́ Царь Изра́илев».

Толкова́ние: Ви́дел ли еси́ ду́шу обра́дованну бы́вшу внеза́пу и глаго́лы обье́млющу Иису́са? «Ты, рече́, ча́емый Он, иско́мый». Ви́дел ли еси́ ужаса́ющася, чудя́щася, игра́юща, веселя́щася?

Нравоуче́ние двадеся́тое: Я́ко не сло́вом еди́ным подоба́ет люби́ти Бо́га, но и де́лы:

Си́це и нам ра́доватися подоба́ет, сподо́бльшимся уви́дети Сы́на Бо́жия: ра́довати же ся не в мы́сли то́кмо, но и о ве́щех саме́х сие́ показова́ти. Что же ли ра́дующихся есть? Повинова́тися позна́ному. Повину́ющих же ся есть - е́же твори́ти я́же у́бо Он хо́щет. Поне́же, а́ще хо́щем раздража́ющася Его́ де́йствовати, отку́ду изъяви́м я́ко ра́дуемся? Не зри́те ли и в доме́х егда́ кто не́коего прии́мет от люби́мых, ка́ко вся с ра́достию де́йствует, всю́ду обтече́т, а́ще тре́ба бу́дет вся произда́ти, ни еди́ного же щадя́, я́ко бы угоди́ти прише́дшему? А́ще же призыва́я кто, и не послу́шает, и я́же упокая́ющая его́ не де́йствует - а́ще и тма́ми глаго́лет прише́ствию ра́доватися, не у́бо уве́рится когда́ о́то учрежа́емаго пра́ведне - о де́лех бо сие́ показова́ти подоба́ет.

Прии́де и к нам Христо́с. Да пока́жем, я́ко ра́дуемся, и ничто́же раздража́ющих Его́ да и де́йствуем. Да укра́сим хра́мину, в ню́же прихо́дит: сие́ бо ра́дующихся есть. Да предложи́м обе́д, е́же хо́щет я́сти: сие́ бо веселя́щихся есть. Кото́рый же ли сей есть обед? Сам рече́: «Мое бра́шно есть, да творю́ во́лю Посла́вшаго» . Да препита́ем Его́ а́лчуща, да напои́м жа́ждуща. А́ще и студены́ воды́ да́си ча́шу, прие́млет - лю́бит бо тебе́: а я́же от люби́мых, а́ще и ма́ла прилуча́тся, ве́лия лю́бящему явля́ются. То́кмо ты да не облени́шися. А́ще и два пу́ла вложи́ши, не отвраща́ется, но я́ко мно́го прие́млет бога́тство. Поне́же бо не тре́буя есть и не потре́бы ра́ди сия́ прие́млет - в ле́поту, не ме́рою дае́мых, но в произволе́нии подаю́щаго все уставля́ет.

То́кмо покажи́, я́ко лю́биши приходя́шаго Его́, я́ко тщи́шися вся о Сем, я́ко ра́дуешися о прише́ствии. Зри Его́, ка́ко к тебе́ устроя́ется, и ду́шу положи́л есть за тя, и по сих ниже́ умоли́тися отрече́ся. «О Христе́ бо мо́лим, рече́, я́ко Бо́гу моля́щу на́ми» . И кто си́це неи́стов, рече́, я́ко не люби́ти Влады́ку своего́? Сие́ бо и аз реку́, и ве́мы, я́ко ко́йждо нас не у́бо отрече́тся сего́ глаго́лы и мы́слию. Но не от глаго́л то́кмо, но и от веще́й показа́ти хо́щет. Люби́мы сему́, а́ще бо глаго́лем, не твори́м же я́же лю́бящих - смех сие́ есть, не о Бо́зе то́кмо, но и о челове́цех, поне́же у́бо е́же словесы́ то́кмо испове́довати, де́лы же спротивля́тися, не несмы́сленно то́кмо, но и вре́дно нам. Е́же де́лы испове́дания приложи́м, да е́же от Него́ получи́м испове́дания в день он, егда́ пре́д Отце́м испове́сть досто́йных о Христе́ Иису́се Го́споде на́шем, И́мже и с Ни́мже Отцу́ сла́ва, со Святы́м Ду́хом, ны́не и при́сно, и во ве́ки веко́в. Ами́нь.

Отвеща́ Нафана́ил и глаго́ла Ему́: Равви́, Ты еси́ Сын Бо́жий, Ты еси́ Царь Изра́илев. Отвеща́ Иису́с и рече́ ему́: Я́ко рех тебе́, ви́дех тя под смоко́вницею, ве́руеши ли? Бо́льша сих у́зриши:

Мно́гаго нам, о́ люби́мицы, тре́ба есть попече́ния, мно́гаго бде́ния, я́кобы возмощи́ глубину́ созира́ти боже́ственых писа́ний. Не про́сте бо, ниже́ спя́щим есть ра́зум их обрести́, но тре́ба есть у́бо испыта́ния опа́снаго, тре́ба же моли́твы приле́жныя, да возмо́жем ма́ло не́что возре́ти к незаходи́мым боже́ственых слове́с. Се бо и днесь, не ми́ло нам взыска́ние предлежи́т, но и мно́гаго тре́бующе тща́ние и испыта́ния.

Ре́кшу бо Нафана́илу, я́ко Ты еси́ Сын Бо́жий, Христо́с рече́: «Я́ко рех тебе́ «ви́дех под смоко́вницею» ве́руеши ли сие́, бо́льши сих у́зриши». Что ли у́бо есть в рече́нных иско́мое? Я́ко Петр у́бо по толи́ких чудесе́х и уче́нии таково́м испове́дав я́ко «Сын еси́ Бо́жий» ублажа́ется, я́ко от Отца́ открове́ние прие́мь. Нафана́ил же и пре́жде зна́мений и пре́жде уче́ний - сие́ и́стое рек, ничто́же провеща́, па́чеже ничто́же таково́ слы́ша, но я́ко ничто́же рек, толи́ко ели́ко подоба́ше рещи́, на бо́льшее произво́дится. Что ли у́бо вино́вное? Я́ко глаго́лы у́бо тоя́же веща́й Петр и Нафана́ил, не с те́мже ра́зумом ко́йждо: но Петр бо испове́да Сы́на Бо́жия я́ко Бо́га и́стинна, ов же челове́ка про́ста. И отку́ду ли я́вствено сие́ нам? От и́же по сих рече́нных. Рек бо: «Ты еси́ Сын Бо́жий», наведе́: «Ты еси́ Царь Изра́илев». Сын Бо́жий не Изра́илев есть царь тоќмо, но и всея́ вселе́нныя. Не от сего́же то́кмо сие́ я́вьствено, но и от про́чих - Петру́ бо ничто́же по́сле приложи́л есть Христо́с, но, я́ко соверше́нне ему́ ве́ре, Це́рковь рече́ на испове́дании созда́ти о́ного. Зде же ничто́же таково́ сотвори́л есть, но и сопроти́вное. Я́ко бо мно́гия не́кия и лу́чшия ча́сти испове́данию оскудева́ющу, про́чее приложи́л есть. Что ли бо рече́?

Ева́нгелие: Ами́нь ами́нь глаго́лю вам, отсе́ле у́зрите не́бо отве́рсто, и а́нгелов Бо́жиих восходя́щых и низходя́щих над Сы́на Челове́ча.

Толкова́ние: Зри́ши ли, ка́ко его́ от земли́ возво́дит пома́лу и твори́т не ктому́ мечта́ти челове́ка про́сте? Ему́же бо а́нгели служа́т и на Него́же восхо́дят и нисхо́дят, ка́ко сей Челове́к бу́дет? Сего́ ра́ди рече́: «Бо́льша сих у́зриши». И показу́я ему́, наведе́ а́нгельскую мысль и их слу́жбу, а е́же глаго́лет - таково́ есть:

Ве́лие тебе́, рече́, о́ Нафана́иле, мне́ся бы́ти сие́. И сего́ ли ра́ди ли Мене́ царя́ Изра́илева испове́л еси́? Что у́бо егда́ уви́диши а́нгелов над Мене́ восходя́щих и низходя́щих? Си́ми увеща́яй а́нгельскаго Его́ испове́дати Влады́ку. Я́ко бо на Сы́на при́снаго Царе́ва си́це восхожда́ху и низхожда́ху служи́телие Царе́вы:

О́во у́бо во вре́мя креста́, о́во во вре́мя и воскресе́ния, и вознесе́ния. И пре́жде сего́, егда́ приступи́ша и служа́ху Ему́, егда́ благовествова́ху Его́ рождество́, егда́ вопия́ху: «Сла́ва в вы́шних Бо́гу и на земли́ мир» , егда́ к Мари́и приидо́ша, егда́ ко Ио́сифу. Е́же о мно́гих сотвори́л есть, сие́ и ны́не твори́т.

Два глаго́лят прорече́ния: и о́вому у́бо у́же обличе́ние дае́т, бу́дущее же от прише́ствия утвержа́ет. И́бо от рече́нных о́ва у́бо указа́ние прия́ша, си́речь, пре́жде Фили́ппу возгласи́ти «тебе́ под смоко́вницею ви́дех тя», о́ва же сбы́тися имя́ху, и отча́сти сбы́шася а́нгельское низхожде́ние и восхожде́ние, е́же при Кресте́, и Воскресе́нии, и Вознесе́нии, е́же и сие́ рече́нными достове́рно твори́т и пре́жде сбы́тия.

И́же бо от преше́дших его́ си́лу позна́в и о бу́дущих слы́ша, удо́бнейше прии́мет и сие́ прорече́ние. Что у́бо Нафана́ил? Ничто́же к сему́ отвещева́ет. Те́мже и Христо́с да́же до сего́ сло́ва поста́вил есть к нему́, попуща́я на еди́не исчести́ рече́нная и не хотя́ вся внеза́пу излия́ти, но, влага́я в благоно́сную зе́млю се́мена, попуща́ет ю́ на упражне́нии прозя́бнути про́чее. Е́же и и́нде глаго́лаше: «Подо́бно есть Ца́рство небе́сное челове́ку се́ющему до́брое се́мя, и внегда́ спа́ти ему́ прихо́дит враг и все́я пле́велы посреди́ пшени́цы…» .

Ева́нгелие: В тре́тий день брак бысть в Ка́на Галиле́йстей, и зван бысть Иису́с на брак. Бе же и Ма́ти Иису́сова та́мо и бра́тия Его́.

Толкова́ние: Рех и предвари́х, я́ко в Галиле́и па́че зна́емь бе. Те́мже и зову́т его́ на брак, и прихо́дит. Ниже́ бо к досто́инству зря́ше Своему́, но и ко благодея́нию на́шему. И́же бо не не сподо́бився зрак раба́ прия́ти, мно́го па́че не бы́ не сподо́бил на брак приити́ рабо́в. И́же с мытари́ и гре́шники возле́г, мно́го па́че не бы отрекся су́щым на бра́це совозлещи́. Не у́бо зва́вшии подоба́ющее о Нем непщева́ние имя́ху, ниже́ я́ко вели́ка не́коего зва́ху, но про́сте я́ко еди́наго от мно́гих и я́ко зна́ема. И сие́ назна́мена евангели́ст, рек: «Бе же Ма́ти Иису́сова та́мо и бра́тия Его́» - я́ко же у́бо О́ну и бра́тию Его́ зва́ша, си́це Иису́са.

Ева́нгелие: И не доста́вшу вину́. Глаго́ла Ма́ти Его́: «Вина́ не име́ют».

Толкова́ние: Досто́йно зде взыска́ти, отку́ду на́йде Ма́тери ве́лие не́что мечта́ти? […] Открыва́тися про́чее нача́т: и от Иоа́нна я́вствен бе, и от рече́нных ко ученико́м Ему́. И пре́жде сих же всех самое́ зача́тие, и я́же от зача́тия бы́вшее вся - вели́кое и о Сы́не вложи́ти непщева́ние. «Слы́шаше бо, рече́, вся я́же о Отроча́ти, и соблюда́ше в се́рдцы Свое́м». Что у́бо ра́ди, рече́, не пре́жде сего́ сия́ глаго́лаше? Зане́, е́же рех, тогда́ про́чее нача́ло е́же явля́тися прия́т. Пре́жде бо сего́ я́ко еди́н от мно́гих сый. Си́це пребыва́ше, ниже́ дерза́ше таково́ что к Нему́ Ма́тери рещи́. Егда́ же у́бо услы́ша, я́ко Иоа́нн Его́ ра́ди прии́де, и я́ко Ему́ сведе́тельствова, и я́ко ученико́в стяжа́- тогда́ про́чее дерза́ющи мо́лит.

И недоста́вшу вину́, глаго́ла: «Вина́ не име́ют». Хотя́ше бо и о́нем пода́ти благода́ть, и Себе́ светле́йшу сотвори́ти Сы́ном. И негли́ не́что и челове́ческо пострада́, я́коже и бра́тия Его́, глаго́люще: «Покажи́ Себе́ ми́рови». Хотя́ща ю́же от чуде́с сла́ву обоима́ти, сего́ ра́ди и Той зельне́йше

Ева́нгелие: Отвеща́, глаго́ля: «Что Мне и Тебе́, о́ же́но? Не у́бо прии́де час Мой».

Толкова́ние: Поне́же я́ко зело́ стыдя́шеся Ро́ждшия, услы́ши Луки́ пове́дающу, ка́ко покаря́яся роди́телем бе. И самому́ же сему́ евангели́сту глаго́лющу, ка́ко о Ней промышля́ше и в са́мое вре́мя креста́.

Иде́же бо ничто́же запина́ют, ниже́ пресеца́ют су́щих по Бо́зе веще́й роди́телие, ну́жно есть уступа́ти и до́лжно. И е́же не твори́ти сие́ беда́ есть вели́ка. Егда́ же безвре́менно что взыску́ют и отсеца́ют что от духо́вных, не небла́знено [есть] покаря́тися.

Те́мже и зде си́це отвеща́. И и́нде па́ки: «Кто есть ма́ти Моя́? И кото́рии суть бра́тия Моя́?» Не у́бо е́же подоба́ше о Нем непщева́ние имя́ху, но поне́же роди́ Его́, хотя́ше по про́чему матере́й обы́чаю си́це вся повелева́ти Ему́, потре́бна бя́ше я́ко Влады́ку почита́ти и кла́нятися. Сего́ ра́ди и тогда́ си́це отвеща́. Помы́сли бо, яково́ бе всем лю́дем и наро́ду обстоя́щему Его́, и мно́жеству услы́шания держа́щемуся и уче́ния происходя́щего, О́ной прише́дши посреди́, отвести́ Его́ у́бо от наказа́ния, осо́бь же бесе́довати и ниже́ внутрь претерпе́ти вни́ти, но влещи́ Его́ вон то́кмо о Не́й. Сего́ ра́ди глаго́лаше: «Кто есть ма́ти Моя́ и бра́тия Моя́?». Не досажда́я Ро́ждшей, не бу́ди!, но вельми́ по́льзуя и непщу́я смире́нная о Нем му́дрствовати.

А́ще бо о ины́х промышля́ше и вся де́йствоваше якобы́ вложи́ти им подоба́ющее о нем непщева́ние, мно́го па́че о Ма́тери, поне́же бо ле́по бе, слы́шавши от Сы́на, не хоте́ти удо́бне повину́тися, но моля́щу везде́ Себе́ пе́рвенства име́ти а́ки ма́тери су́щу: сего́ ра́ди си́це отвеща́ к ре́кшим. Ниже́ бо и́накою отве́л бы от смире́ния сего́ к высоте́ о́ной, а́ще начала́ бы я́ко от Сы́на при́сно почита́тися, а не я́ко ко Влады́це приходи́ти к Нему́.

И зде у́бо сего́ ра́ди непщева́ния глаго́лаше: «Что Мне и Тебе́, Же́но?». И ина́го ра́ди ну́жнаго не ме́ньше. Ко́е ли у́бо сие́? Якобы́ не зазре́тися бы́вшим чудесе́м. От тре́бующих бо умоли́тися подоба́ше, а не от Ма́тери. Что же ли у́бо? Я́ко я́же у́бо от свои́х умоле́ния быва́емая, а́ще и вели́ка бу́дут, сомнева́ются зря́щеи мно́жицею. Егда́ же потре́бу име́ющеи, си́и умо́лят, незазо́рно чу́до быва́ет, и чи́ста похвала́, и мно́га по́льза. И́бо врач, а́ще кто изря́ден в дом стра́ждущых мно́гих вшед, от неду́гующих а́ще ничто́же услы́шит, ниже́ о бли́жних о нем, от своея́ же ма́тери умоле́н буд́ет то́кмо, зазри́телен от стра́ждущих бу́дет, и тя́жек, и ско́рбен, и ниже́ от лежа́щих, и ниже́ от предстоя́щих им вознепщу́ет кто ве́лие не́что ему́ и до́блествено показа́ти мощи́. Те́мже и тогда́ запрети́ глаго́ля: «Что Мне и Тебе́, Же́но?», наказу́я Ю́ на бу́дущее не ктому́ такова́я твори́ти. Раде́ние бо бе́ше Ему́ и я́же к Ма́тери че́сти, мно́го же па́че спасе́ния душе́внаго и мно́гих благодея́ния, его́же ра́ди и пло́тию оде́яся. Не у́бо безсту́дствующаго к Ма́тери сия́ глаго́лы бе́ша, но смотре́ния мно́гаго устроя́ющаго Cа́мую О́ну и чудеса́ с подоба́ющим быва́ти уготовля́ющаго досто́инством.

Поне́же я́ко зело́ Ю́ почита́ша, и кроме́ ины́х, самое́ сие́ ви́дящееся запрети́тельне рещи́ся. Наипа́че дово́льно бе вразуми́ти е́же бо стужи́ти, показа́ я́ко зело́ Е́ю умаля́ется. Ка́ко ли и кото́рым о́бразом? На про́чее сие́ рече́м. Сия́ у́бо помышля́я, и егда́ услы́шиши жену́ не́кую глаго́лющу: «Блаже́нно чре́во носи́вшее Тя и сосца́, и́хже еси́ ссал», та́же Ему́ отвещева́ющу: «Наипа́че у́бо блаже́ни творя́щеи во́лю Отца́ Моего́» . И того́же ра́зума и о́на непщу́й рещи́ся глаго́лы. Не отрева́ющаго бо Ма́тери отве́т бе, но показу́ющаго я́ко ничто́же О́ну рождество́ по́льзовало бы, а́ще не зело́ была́ бы Бла́га и Верна́. А́ще же Ма́терию ничто́же по́льзует кроме́ душе́вныя доброде́тели е́же роди́тися от Нея́ Христу́, мно́го па́че нас, а́ще и отца́, а́ще и бра́та, а́ще и сы́на име́ем доброде́тельна и до́блествена, са́ми же дале́че бу́дем доброде́тели о́ного, ничто́же сие́ по́льзовати мо́жет. «Брат бо, рече́, бра́та не изба́вит, изба́вит ли челове́к?» Ни о еди́ном же бо ино́м, но о еди́ных свои́х исправле́ниих по благода́ти Бо́жии наде́жди спасе́ния име́ти подоба́ет. Поне́же, а́ще сие́ име́ло бы по́льзовати о себе́ Деви́цу, по́льзовало бы у́бо и иуде́ов, сро́дник бо бе им по пло́ти Христо́с. По́льзовало бы у́бо и гра́да, в не́мже роди́ся. По́льзовало бы у́бо и бра́тию. Ны́не же и бра́тия, до́ндеже са́ми о себе́ попече́ние твори́ли бы, ничто́же их сро́дства досто́инство по́льзовало бы, но с про́чим осужде́ни бы́ли бы́ша; ми́ром тогда́ же чу́дни бы́ша, егда́ от своея́ облиста́ша доброде́тели. Но град у́бо и паде́, и сожже́н бысть: ничто́же от сего́ приобре́т. Закла́ни же бы́ша и погибо́ша зело́ умиле́нне и́же по пло́ти сро́дницы: ничто́же от е́же к Нему́ сро́дства во е́же спасти́ся приобре́тше, поне́же у́бо е́же от доброде́тели предста́тельства не имя́ху.

Всех бо́льши яви́шася апо́столи: поне́же у́бо и́стинны ре́вности о́браз е́же к Нему́ усвое́ния проидо́ша: и́же послуша́нием. И отсю́ду бо навыка́ем, я́ко ве́ры нам везде́ потре́ба и жития́ сия́ющаго и све́тлаго: сие́ бо нас то́кмо спасти́ мо́жет. Поне́же и до мно́га сро́дницы Его́ чудя́хуся всю́ду, и́же и «влады́чни» глаго́лахуся, но оба́че их ниже́ имена́ ве́мы. Апо́столов же, и житие́, и имена́ сла́вятся всю́ду.

Нравоуче́ние два́десять пе́рвое: Я́ко тре́ба есть ко спасе́нию ве́ры и жития́ пра́ваго и я́ко не довле́ет е́же таковы́х стяжа́ти прароди́телев:

Да не у́бо ве́лие му́дрствуем о сро́дстве плотсте́м, но а́ще и безчи́сленых име́ем прароди́телей чу́дных, са́ми да потщи́мся превосходи́ти оне́х доброде́тели, ве́дяше, я́ко ничто́же от ины́х тща́ния бу́дущий суд приобрета́ем, но и сей суд бу́дет зельне́йшь, егда́ благи́х су́ще отце́в, и в дому́ име́юще указа́ние, ниже́ сим подража́ем учи́телей. Сия́ же глаго́лю ны́не, поне́же у́бо зрю е́ллин мно́гих, егда́ на ве́ру их приво́дим и мо́лим бы́ти христия́н, а к сро́дником и прароди́телем прибега́ющих и к хра́мине и глаго́лющих: «Вси сро́дницы мои́ и бли́жнии и соживу́щии ве́рнии христия́не суть». Что у́бо сие́ к тебе́, окая́нне и злостра́стне? Сие́ бо тебе́ наипа́че погубля́ет, я́ко ниже́ мно́жества соживу́щих устыде́вся, ко и́стинне прите́кл еси́. Па́ки ини́и, ве́рни у́бо су́ще, жития́ же неради́ваго прилуча́ющеся, моли́ми к доброде́тели, самое́ сие́ предлага́ют, глаго́люще: «Оте́ц мой, и дед, и пра́дед зело́ благочести́вии потща́тельни прилучи́шася су́ще». Сие́ бо тебе́ осужа́дет, ины́х наипа́че, зане́ таковы́х сый о́трод, недосто́йная своего́ коре́ни соде́лал еси́. Услы́ши у́бо и проро́к что рече́ ко иуде́ом: «Порабо́та Изра́иль о жене́, и о жене́ сохрани́ся» . И па́ки Христо́с: «Авра́ам оте́ц наш возра́довася да уви́дит день Мой: и ви́де, и возра́довася» . И всю́ду я́же прароди́телей исправле́ния не то́кмо в ме́сто похва́л, но и в ме́сто бо́льшего им осужде́ния прино́сят. Сия́ у́бо вся ве́дяще вся да де́йствуем, я́ко бы свои́ми де́лы спасти́ся возмощи́, да не всу́е себе́ я́же во ины́х наде́ждами прельща́юще, тогда́ уве́мы, я́ко всу́е прельсти́хомся, егда́ ра́зума на́шего по́льза ни еди́наже. «Во а́де бо рече́ кто испове́стся Тебе́?» . Те́мже у́бо зде да пока́емся, я́ко бы ве́чных получи́ти благ, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва, со Святы́м Ду́хом, во ве́ки веко́в. Ами́нь.

Вку́пе же Петр и Иоа́нн восхожда́ста во святи́лище на моли́тву в час девя́тый. И не́кий муж хром от чре́ва ма́тере своея́ сый, носи́мь быва́ше, его́же полага́ху по вся дни пред две́рьми церко́вными, реко́мыми кра́сными, проси́ти ми́лостыню от входя́щих в це́рковь.

Толкова́ние Златоу́ста: Повсю́ду ви́дится Петр и Иоа́нн иму́ще обще́ние, сего́ Петр на вече́ри руко́ю помаа́в, вку́пе на гроб приидо́ша, о не́мже Петр глаго́ла Христу́: «Сей же что?», я́коже сам Иоа́нн во Ева́нгелии возвеща́ет. «Не́кий муж хром из чре́ва ма́тере своея́», рече́ – я́ве, я́ко есте́ственна бе боле́знь его и неисце́льна хи́тростьми враче́вными, четы́редесять лет сотвори́в в Галиле́и, и никто́же исцели́ его́. Сия́ у́бо не́мощь па́че неудо́бь исце́льна есть, я́же от рожде́ния быва́ет.

Севи́ра, архиепи́скопа Антиохи́йскаго: Мни́тбося хромы́й сый о́браз бы́ти всего́ челове́чества, си́речь, безбо́жных и наде́жду неиму́щих язы́к. Со́бранной Це́ркви и снабде́нне бы́вши, я́коже есть пи́сано, я́ко не́кую у́бо умерщвле́нну оживотвори́ Христо́с Свое́ю сме́ртию, погребе́нну ю́же к пра́ведных дел и ше́ствовати отню́д не могу́щи, но вне святи́лища лежа́щи, ру́ку уче́нию просте́рши, воскреси́вше апо́столи, сребра́ и зла́та не пода́вши, а́ще и всих очи́ма взира́ше, кра́сныя же две́ри ей все отве́рзше, и́же есть Христо́с. «Красе́н бо добро́ю па́че сыно́в челове́ческих», я́коже глаго́лет проро́к. Вводя́ же ве́рующыя к своему́ ра́зуму, я́коже в Ева́нгелии глаго́лет: «Аз есмь дверь».

Су́щее: И́же ви́дев Петра́ и Иоа́нна хотя́щих вни́ти в це́рковь, проша́ше ми́лостыню. Воззре́в же Петр нань со Иоа́нном, рече́: «Воззри́ на ны». Он же прилежа́ше и́ма, мня не́что от нею́ прия́ти. Рече́ же Петр: «Сребра́ и зла́та несть у мене́, но е́же и́мам, се ти дам. Во и́мя Иису́са Христа́ Назоре́я воста́ни и ходи́». И ем его́ за десну́ю ру́ку, воздви́же и́.

Толкова́ние (того́жде): Мню, я́ко сего́ ра́ди хромы́й Петра́ моля́ше и Иоа́нна, да о́нех доброде́тель пока́жется, я́ко в моли́тву иду́щим ну́жнейше есть е́же к ни́щим посеще́ние и ми́лость. «Возри́ на ны» рече́, си́речь, уго́дно ли ти есть в попече́ние, и е́же от него́ здра́вие и исправле́ние, е́же то́чию возре́ти на ны. Оста́ви у́бо зла́то и сребро́, безду́шныя куми́ры язы́к: и́доли у́бо сребро́ и зла́то, и́же я́коже ты, но́зе и́мут и не хо́дят. Не рече́ «я́ко зла́та и сребра́ бо́льше па́че ти дам», но что глаго́лет? «И́менем Иису́с Христа́ Назоре́я воста́ни и ходи́». Что такова́го гла́са честне́йше? Ины́й бо от сопроти́вных ки́чется, глаго́люще: «И́мам толи́ко и толи́ко зла́та тала́нт, сел безчи́сленых, и до́мы и четвероно́гая». Се́й же, всех мирски́х наг сый, не стыди́тся убо́жества, я́коже безу́мнии стра́ждут. Слы́шах Петро́ва гла́са, показу́юща убо́жество бога́тства, ма́тере ничто́же не иму́щей, и диади́мы оде́янным бога́тнейши: сий бо, ничто́же иму́ще, ме́ртвыя воскреси́, и хромы́я испра́ви, и бе́сы изгна́, и такова́го добра́ дарова́, я́же червлени́цею и багры́ оде́яны, и вели́ка и стра́шна во́инства водя́ще, николи́же мого́ша дарова́ти.

Су́щее: А́бие же утверди́стеся ему́ плесне́ и гле́зне, и вскочи́в, ста и хожда́ше. И вни́де с ни́ма в це́рковь, ходя́, и скоча́, и хваля́ Бо́га. И ви́деша его́ вси лю́дие, ходя́ща и хва́ляща Бо́га. Зна́яху же его́, я́ко сей бя́ше и́же ми́лостыни ра́ди седя́й при кра́сных две́рех церко́вных. И испо́лнишася чу́да и у́жаса о приключи́вшихся ему́.

Толкова́ние Златоу́стаго: Та́ко и Христо́с творя́ше, мно́гащи сло́вом исцели́, мно́гащи же и ру́ку простира́ше, иде́же не́мощнейши ве́рою бя́ше. И ему́ «его́ за десну́ю ру́ку воздви́же», рече́. Се же явле́ние Христо́ву Воскресе́нию бе и о́браз бу́душаго. Но и ра́дуяся скака́ше, и вни́де с ни́ма во святи́лище. Вои́стинну чудеси́ досто́йно: не они́ его́ поведо́ша, но сам после́дует, после́дование благода́теля показу́я. И ходя́ хва́ляще, рече́, Бо́га, не о́нем дивя́ся, но и Бо́га имы́й де́йствовавшаго. Не́цыи же глаго́лют, я́ко ни ходи́ти ве́дяше. Коне́ц толкова́нию.