Вторник третьей седмицы по Пасхе

Что Мне и Тебе́, Же́но? Не у́ прии́де час Мой.

Име́ет у́бо не́кий труд е́же глаго́лати, и сие́ Па́вел явля́я, глаго́лаше: «Предстоя́щии до́бре презви́тери сугу́быя че́сти да сподобля́ются, наипа́че тружа́ющиися в сло́ве и уче́нии» . И труд сей вы госпо́дие и лего́к сотвори́те, и тя́жек. А́ще бо оплюе́те глаго́лемая, или́, не оплюе́те, у́бо в де́лех же не пока́жете - тя́жек труд нам, за е́же тружа́тися ту́не и всу́е. А́ще внима́ете и показа́ние де́лы подади́те - ниже́ чу́вство прии́мем пото́в: и́же бо от трудо́в рожда́емый плод, не оставля́ет явля́тися труда́ тя́жкое. Я́коже а́ще хо́щете нам усе́рдие воздви́гнути, и не угаси́ти, ниже́ немощне́йши сотвори́ти - покажи́те нам плод, да гобзу́юща зря́ще ни́вы, и наде́ждами гобзова́ния пита́еми, и бога́тство ва́ше исчита́юще, да не труди́мся купу́юще до́брую сию́ ку́плю. Ниже́ бо ма́ла нам и днесь предлежи́т взыска́ние. Ма́тери бо Иису́сове ре́кши: «Вина́ не име́ют», Христо́с рече́: «Что Мне и Тебе́, Же́но? Не у́ прии́де час Мой». И сие́ рек, творя́ше е́же рече́ Ма́ти. Сие́ же пре́жняго не ме́ньши есть взыска́ние. В недове́дение сло́во Сама́го у́бо сего́ чу́до соде́ловшаго умоли́вше, си́це да нисхо́дим в разреше́ние. Не зде бо сие́ то́кмо сие́ рече́ся, но и и́нде. Рече́ бо евангели́ст: «Я́ко не можа́ху Его́ я́ти, я́ко не у́ прии́де час Его́». И па́ки: «Прии́де час просла́ви Сы́на Своего́». Что у́бо есть рече́нное? Сего́ бо ра́ди мно́жайша собра́х, да всем еди́но наведу́ разреше́ние. Что ли у́бо есть глаго́лемое? Не ну́жди време́н Христо́с подлежа́, ниже́ часы́ наблюда́ет, глаго́лаше: «Не у́ прии́де час Мой». Ка́ко бо, и́же времене́м Творе́ц, и ле́том, и веко́м Соде́тель? Но что ли есть е́же назна́мена? Сие́ яви́ти хо́щет, я́ко вся со вре́менем пристоя́щим де́ло есть. Не вку́пе вся творя́, поне́же смуще́ние не́кое и безчи́ние имя́ше бы́ти, а́ще не прили́чными вре́мены вся соде́тельствовал бы, но вку́пе вся смеси́л бы: и рожде́ние, и воскресе́ние, и суд. Смотри́ же, подоба́ше бы́ти тва́ри, но не вку́пе всей; и челове́ку же с жено́ю, но ниже́ сим вку́пе. Подоба́ше сме́ртию осужде́ну бы́ти ро́ду челове́ческому, и воскресе́нию быти, но мно́го посре́дство обои́х, си́це бо подоба́ше да́тися зако́ну, но не вку́пе, и благода́ти, но ко́яждо вре́мены подоба́ющими устроя́ти.

Не у́бо Той подлежа́ше време́н ну́жди, но времене́м Той чин наложи́л есть, поне́же и Творе́ц их Сам есть. Те́мже и зде рече́: «Не у́ прии́де час Мой». А е́же глаго́лет тако́во есть: не я́вствен бе мно́гим, и ниже́ учени́к ли́ка всего́ имя́ше, но Андре́й Ему́ после́доваше и с ним и Фили́пп, ин же никто́же. Па́чеже ниже́ си́и вси я́коже подоба́ше Его́ ве́дяху, ниже́ Ма́ти, ниже́ бра́тия. По мно́гих бо чудесе́х сие́ о бра́тиях рече́ евангели́ст: «Я́ко ниже́ бра́тия Его́ ве́роваху в Него́». Но ниже́ су́щии на бра́це Его́ ве́дяху - вои́стинну бо си́и приступи́ли бы и умоли́ли, в потре́бе устро́ившеся.

Сего́ ра́ди рече́: «Не у́ прии́де час Мой», си́речь, «не у́ зна́ем есмь предстоя́щим», ниже́ ве́дят, я́ко недоста́ вино́. Оста́ви их проси́ти сие́ пе́рвых. Ниже́ бо от Тебе́ Мне сия́ слы́шати подоба́ше: Ма́ти бо еси́, и чу́до зазо́рно Христу́ сотвори́ши. Что у́бо бу́дет рече́нное?

Подоба́ше у́бо тре́бующим преступи́ти и моли́ти, не поне́же сего́ тре́бую, но да они́ быва́емое со мно́гим прии́мут усе́рдием. Поне́же ни́щии, егда́ благодея́ние прие́млют, вели́ко благодаря́т. А ко́и не потре́буют, не та́ко о нем разуме́ют . Чесо́ у́бо ра́ди рек: «Не у́ прии́де час Мой» и отре́кся, соде́я е́же рече́ Ма́ти? Наипа́че у́бо я́ко бы и сопроти́во глаго́лющим, вре́мени Его́ подлежа́ти непщу́ющим, дово́льно бы́ти указа́ние е́же не подлежа́ти Ему́ вре́мени. А́ще бо подлежа́л бы, ка́ко бы, у́бо подоба́ющу вре́мени не пребыва́ющу, соде́ял бо у́бо е́же соде́я? Поне́же у́бо и почита́я Ма́терь, да не всегда́ противоглаго́лати Ей мнят и посрами́т Ро́ждьшую прису́ществующим толи́ким, и да не не́мощи прии́мет мне́ние: и́бо принесо́ша Ему́ слуги́. Поне́же и ханане́и глаго́ля: «Несть добро́ взя́ти хлеб от чад и да́ти псом», даде́ хлеб, преседе́ния ея́ устыде́ся. И у́бо по о́ном и сие́ рече́: «Я́ко не по́слан бых, то́кмо ко о́вцам поги́бшим до́му Изра́илева». Но оба́че и сия́ рек, исцели́ дщерь жены́. Отсю́ду навыка́им, я́ко а́ще и недосто́йни бу́дем, мно́гащи преседе́нием твори́м досто́йны себе́ е́же прия́ти. Сего́ ра́ди и Ма́ти: и ожида́ше, и я́вственно слуги́ приведе́, якобы́ от множа́йших бы́ти проше́нию. Сего́ ра́ди и приложи́ е́же я́ко «а́ще что глаго́лет вам – сотвори́те», ве́дяше бо, я́ко не не́мощи отрече́ние бе, но некиче́ние и е́же не мне́ти про́сте отврещи́ Себе́ чудесе́: те́мже и слуги́ приведе́.

[Приложе́ние: Того́ ра́ди веща́: «Не у́ прии́де час Мой» - «се же есть ле́по вре́мя не наста́ло». Но еще́ ли проти́вится, а́риево бреха́ние яви́ти, покуша́яся Го́спода подлежа́ща часо́м и времене́м - навыка́й у́же о́ про́кляте: а́ще подлежи́т часо́м, ка́ко сотвори́ чу́до? Ле́по бо по твоему́ сло́ву: поне́же рабо́тает часо́м и времене́м, «не у́ при́де час Его́» - не мощи́ чудоде́йствовати. Но чудоде́йствова. Не рабо́тает часо́м. Виждь же ми, ка́ко не до конца́, ниже́ всегда́ проти́вится Ма́тери, но, попрети́в ма́ло, па́ки моле́ние Ея́ исполня́ет: ча́стию и нам о́браз дая́, к роди́телем гове́ние.]

Ева́нгелие: Глаго́ла Ма́ти Его́ к слуга́м: Е́же а́ще глаго́лет вам сотвори́те. Бе же ту водоно́с ка́мень шесть лежа́ще, по очище́нию жидо́вску вмеща́ющь по двема́ или́ трем ме́рам. Глаго́ла им Иису́с: Напо́лните водоно́сы воды́. И наполни́ша я́ до верха́. И глаго́ла им: Почерпи́те ны́не и принеси́те старе́йшине, и принесо́ша.

Толкова́ние: Не про́сте рече́ «по очище́нию иуде́ом», но да не не́цыи от неве́рных вознепщу́ют я́ко дро́жди внутрь оста́вленныя та́же от воды́ вложе́ныя и растворе́нныя в тонча́йшее вино́ бы́ша. Сего́ ра́ди глаго́лем «по очище́нию иуде́ов», показу́я, я́ко ниже́ когда́ о́ныя сосу́ды вину́ бы́ша прия́телища. Поне́же у́бо безво́дна есть Палести́на, и не бе повсю́ду кла́дезей и исто́чников обрести́, наполня́ху при́сно водоно́сы воды́, я́ко бы не притека́ти на ре́ки, да бы нечи́сти не бы́ли, но близ име́ти чище́ния о́браз. И что у́бо пре́жде не́же напо́лнити не сотвори́ зна́мения, е́же мно́го чудне́йше бе? И́но бо есть подлежа́щую вещь в ка́чество преложи́ти, и [и́но] - сие́ существо́ из не су́щих сотвори́ти. Чудне́йше у́бо о́но, но не си́це у́бо непщева́тельно бы́ти ве́рно мно́гим. Сего́ ра́ди у́бо мно́жицею чуде́с пресеца́ет вели́чество, хотя́й я́ко бы благоприя́тно наипа́че бы́ти. И чесо́ ра́ди, глаго́лет, и во́ду не Сам принесе́ и тогда́ вино́ показа́, но слуга́м повеле́? За сию́ па́ки вину́, и да си́ми свиде́тели и́мать бы́ти поче́рпшими, я́ко ни еди́наго мечта́ния бе соверша́емое. А́ще бы хотя́ху не́цыи безсту́дствовати, возмогли́ бы́ша к ним глаго́лати служа́щии: «Мы во́ду черпа́хом. Мы водоно́сы напо́лнихом». К рече́нным же и я́же по Це́ркви возвраще́нным догма́тов возобраща́ет: поне́же бо суть не́цыи и́же ми́ра Соде́теля ина́го бы́хом глаго́лют и не Его́ де́ла зри́мая, но ина́го не́коего сопроти́вна Бо́гу. И сих зауща́я неи́стовство, си́це мно́гая твори́т чуде́с от подлежа́щых суще́ств. А́ще бы сопроти́вный соде́тель был Ему́, не бы чужди́ми употребля́л к свое́й си́ле наказа́ние. Ны́не у́бо показу́я, я́ко Той есть и́же во виногра́дех во́ду пролия́й и дождь ко́ренем в вино́ обраща́яй, е́же в саду́ мно́гим вре́менем быва́ет - cие́ внеза́пу на бра́це соде́ла.

[Приложе́ние: Но мо́лимся у́бо сим, сверши́тися о нас бра́ку бы́ти, е́же счета́ние к Бо́гу на́шей души́, до́ндеже есмь в Ка́на Галиле́йсте се́ле, глаго́лю, до́ле всем и по́лзком ми́ру. Брак же той без прише́ствия Христо́ва, и Его́ Ма́тери, и Его́ учени́к не бу́дет. А́ще не ве́рует кто от Мари́я рожде́на, во апо́столех глаго́лавша, ка́ко счета́ется Бог? Ви́дим же у́бо что чудоде́йствует Госпо́дь в такове́м бра́це, и таково́ счета́ние Бо́гу к души́: во́ду в вино́ претваря́ет, и шесть водоно́с на́ших исполня́ет ка́менных. Во́ду у́бо разуме́й во́дно, и мо́кро, и разсла́блено на́ше в житии́ уче́ние. Водоно́с же шесть - пятию́ чувств, и́миже в дея́нии согреша́ем, и шесто́й бо водоно́с – слове́сное, и́мже во уче́нии согреша́ем. И́мже Госпо́дь наш Иису́с Христо́с сло́во Ева́нгельско рек, исцеля́я на́ша согреше́ния в дея́нии же, и уче́нии, и виде́нии: всех у́бо водны́х и удо́бь расходя́щихся в вино́ предлага́ет, стяза́юща, глаго́лю, и веселя́ща житие́ и сло́во. И та́ко наполня́ются шесть водоно́с на́ших: сего́ до́браго пития́ чу́вства реку́, да не поде́йствено согреша́ем подае́мый по́мысл, да не во уче́нии отпа́даем. Приложи́ же, я́ко ка́меннии водоно́си очище́ния ра́ди иуде́йска: «Иу́да» бо глаго́лется «испове́дание». Очища́ется, испове́даяся пяти́ ра́ди чувств. И́мже па́че согреша́ше о ви́де зле, но о́ко па́ки слези́т испове́данием и та́ко быва́ет чи́сто. Слы́ша у́бо блуда́ любодея́ния пе́сни, но а́бие прикланя́ются во глаго́лы уст Бо́жиих. Та́ко и о ине́х чу́вствех. Па́ки слове́сное согреша́ет во уче́нии, но а́бие очища́ется пе́рвыя зло́бы, в правоучи́тие прило́жься. Ка́мени же водоно́сы, зане́ от земли́ на́шея составле́ния или́ тве́рдым бы́ти, ле́по таково́му вину́ хотя́щим бы́ти приима́лищу и едва́ сокруши́ми. Ка́мень водоно́с бе - слове́сное Па́влу; и егда́ гоня́ше, ревни́в бо бе О́тчим преда́нием, па́че всех в ро́де Мое́м; и егда́ пропове́даше, толи́ку в сло́ве си́лу имя́ше, я́коже и лука́няном, Ерми́я мне́ти, и́же сло́ву ста́рей.]

Поне́же у́бо напо́лниша водоно́сы,

Ева́нгелие: глаго́лет: «Почерпи́те ны́не и принеси́те архитрикли́нови». И принесо́ша. Я́коже вкуси́ архитрикли́н во́ду вино́ быва́емое [не уве́де отку́ду есть: слуги́ же ве́дяху поче́рпшии во́ду], гласи́т жениха́ архитрикли́н и глаго́лет ему́: Всяк челове́к пре́жде до́брое вино́ полага́ет, и егда́ упию́тся, тогда́ ху́ждьшее: ты же соблю́л еси́ до́брое вино́ доны́не.

Толкова́ние: Па́ки зде не́цыи напа́дают глаго́люще: сие́ пия́ных челове́к собра́ние бе и чу́вством судя́щих растле́нным, и не дово́льно восприя́ти быва́емых, ниже́ суди́ти де́емым - я́ко ниже́ ве́дети, отку́ду вода́ или́ вино́ быва́емое бе. Я́ко бо упи́шася, сам архитрикли́н глаго́лет, показа́, и́миже рече́. Наипа́че у́бо и сие́ смехо́вное: но оба́че и сие́ их непщева́ние отсече́ евангели́ст, не бо пировнико́в бы́ти глаго́лет судя́щих о быва́емом, но архитрикли́на, трезве́на су́ща и ничто́же не у́ вкуси́вша. Ве́сте бо у́бо сие́: я́ко наипа́че всех таковы́х ве́черей служе́нию вве́рени, си́и наипа́че суть трезвя́щиися, еди́но де́ло иму́ще, е́же в красоту́ и в чин вся располага́ти: сего́ ра́ди тре́звое чу́вство сие́ во свиде́тельство быва́емых призва́. Не рече́ бо: «Вино́ ли́йте возлежа́щым», но: «Принеси́те архитрикли́ну». Я́коже вкуси́ архитрикли́н во́ду вино́ быва́емо [и не уве́де отку́ду есть: слуги́ же ве́дяху], гласи́т жениха́ архитрикли́н. И чесо́ ра́ди не слуги́ пригласи́? Си́це бо у́бо и чу́до откры́лося бы. Я́ко ниже́ Сам не откры́л бы быва́емо, но ти́хо и по ма́ло восхоте́ позна́ти зна́мении си́лу: а́ще бы у́бо тогда́ слуги́ сие́ испове́дали, не бы у́бо уве́рилося, но мне́ли у́бо неи́стовствовати, челове́ка про́ста бы́ти мно́гим мня́щим тогда́ сия́ свиде́тельствующим. Они́ бо у́бо и искуше́нием я́вственное позна́ша, [не бо у́бо их рука́ бя́ше не ве́ровати,] ины́м же ве́ровати не бе́ша досто́йни. Сего́ ра́ди ниже́ Сам откры́ всем, ниже́ наипа́че могу́щу све́дети быва́емое, я́вственнейший его́ ра́зум бу́дущему вре́мени соблюда́я, с про́чими бо зна́мении показа́ние и сие́ хотя́ше бы́ти ве́рно. Егда́ у́бо царе́ва сы́на Той шел исцели́ти, изъяви́ евангели́ст, я́ко и сие́ я́вственнейше бысть: сего́ бо ра́ди наипа́че призва́ он, поне́же зна́емо бе е́же и, предъявля́я, Иоа́нн глаго́лаше: «Прии́де Иису́с в Ка́ну галиле́йску, иде́же сотвори́ во́ду вино́», не про́сте же вино́, но вино́ добре́йшее. Такова́ бо Христо́ва чудеса́, мно́го от е́же по естеству́ соверша́емых красне́йша быва́ют и лу́чша. Си́це и о ины́х: егда́ уд телесе́ исправля́ет неду́гующий, здра́вствующих показа́ сие́ у́ньше. Я́ко бо у́бо вино́ и вино́ добре́йшее бе быва́емое. Не слуги́ еди́ни, и́же во́ду поче́рпшии, но и жени́х, и архитрикли́н свиде́тельствовати имя́ху: я́ко от Ду́ха быва́емое. Я́ко бы а́ще и не тогда́ откры́лося чу́до, но оба́че в коне́ц умолча́тися не имя́ше: си́це мно́гая и ну́жная Ему́ к бу́дущем предполага́ти свиде́тельство. О́во во е́же вино́ сотвори́ти - слуги́ свиде́тели имя́ше: о́во же до́брому бы́ти вину́ - архитрикли́на и жениха́. В ле́поту бо у́бо жениху́ отвеща́ти не́что к сим и рещи́: но, оба́че евангели́ст наводя́ к ну́жнейшим веще́й каса́яйся, зна́мение сие́ то́кмо позна́ти притече́ е́же бо ну́жное бе навы́кнути, я́ко во́ду вино́ сотвори́, и вино́ до́брое; что же ко архитрикли́ну рече́ жени́х, не ктому́ ну́жное помы́сли бы́ти. Мно́га бо зна́мений пе́рвейше су́ща не я́вственейша, вре́мени предъиду́щу, я́вственейша от изнача́ла ве́дящых сия́ изве́стнейше возвеще́нна.

[Приложе́ние: Мо́жеши разуме́ти вино́ у́бо - Ева́нгельское сло́во, во́ду же - вся пре́жде Ева́нгелия. Во́дна бо бя́ше к сим, соверше́нию не дости́гнуша, я́коже се вда, ре́ку зако́ны разли́чны, челове́ком Госпо́дь: пе́рвый в раи́, вторы́й при Но́и, тре́тий при Авраа́ме обре́зание, четве́ртый Моисе́ом, пя́тый проро́ки - вси же ти́и ко Ева́нгельскому сло́ву и си́ле слага́ем. Во́дни бе́яше, а́ще кто про́стых по гра́моте разуме́ет, во глубину́ же прини́к, ду́хом разуме́ет сокрове́ная, обря́щет во́ду вино́м быва́емую. Про́сте бо глаго́лемая по гра́моте, разумева́ем мно́зем вода́м су́щем. Духо́вне же разсужда́я, обря́щет вино́ до́брое последи́ пие́мо и блюдо́мо от Жениха́ Христа́, зане́ в после́дняя времена́ яви́ся Ева́нгелие.]

Нравоуче́ние два́десять второ́е: На объяда́ющихся и пия́нствующих:

Тогда́ бо у́бо вино́ от воды́ сотвори́ Иису́с: и тогда́ же, и ны́не произволе́ния немощны́х и расти́чующыхся прелага́я не престае́т. Суть бо, суть челове́цы, ничто́же воды́ ра́знствующе: студе́ни, и лени́ви, и никогда́ же стоя́ще. И́хже, си́це лежа́щых, приво́дим Го́споду, я́кобы их произволе́ния в вино́ преложи́тися нра́ву, якобы́ не ктому́ распещи́ся, но име́ти вве́ренное, и весе́лия и себе́, и ины́м бы́ти вино́вны. Ки́и же у́бо бу́дут сии́ студе́ни? И́же теку́щым настоя́щаго жития́ внима́юще ве́щем. И́же не посмева́ющеся зде наслажде́нию. И́же сла́вы и могу́тства рачи́телие. Сия́ бо вся теку́щая суть, и ника́коже постоя́тельна, ни́зу же при́сно обноси́ма со мно́гим стремле́нием. И́бо днесь бога́т - зау́тро убо́г. И́же днесь с пропове́дником и по́ясом и колясни́цею и мно́гими жезлоно́сцы явле́нный - мно́жицею по еди́ном дни во узи́лище всели́ся, ино́му не хотя́ мечта́ния о́на попусти́в. Наслажда́яйся па́ки и разтерза́яй, поне́же егда́ растерза́ет свое́ чре́во, да́же до еди́наго дне [не] мо́жет е́же от сих быва́емое ему́ дае́мое содержа́ти. Но нады́мшуся о́ному, понужда́ется па́ки и́на влага́ти, ничто́же ра́знствуя пото́ки. Я́коже бо та́мо, пе́рваго тече́ния проходя́щаго, и́но нахо́дит па́ки: си́це у́бо и зде, пе́рвыя истлева́емыя пи́щи, ины́я нам тре́бует па́ки. И таково́ жите́йских естество́: е́же никогда́ стоя́ти учини́ся, но при́сно тещи́ и привлачи́тися. О пи́щи же не сие́ то́кмо есть е́же притещи́ и притека́ти, но и мно́гия нам ины́я подае́т ве́щи. Тем бо, е́же преходи́ти со стремле́нием, тогда́ кре́пкое отонча́ет те́ла, та́ко му́жественное отвлека́ет души́. И не си́це зе́льная ре́чных тече́ний бре́ги обы́че те́рти и твори́ти отто́ргнутися, я́коже наслажде́ние и боте́ние я́же здра́вия на́шего утверже́ние вся отвлека́ет удо́бне. А́ще не прии́деши во враче́бницу и присту́пль вопроси́ши - вся́каго не́гли неду́гов вины́ отту́ду обря́щеши су́щу: и́бо у́бо худа́я и про́стая трапе́за здра́вия ма́ти есть. Сего́ ра́ди и враче́встии о́троцы си́це ю́ именова́ша, е́же у́бо не насыща́тися здра́вие наре́кше: ненасыще́ние бо пи́щи здра́вие, тогда́ ску́достно пита́тися ма́ти здра́вия ре́кше. А́ще же ску́дость ма́ти здра́вия ре́кше, благоявле́нно, я́ко насыще́ние ма́ти неду́га и нача́ло не́мощи есть, и ражда́ет стра́сти и их превосходя́щих враче́в худо́жество. И́бо ногобо́лие, и главотя́жестие, и окоболе́ние, и рукобо́лие, и трясе́ние, и разслабле́ния, желтя́ница и огни́цы до́лзии изно́си, и и́на сих мно́га вя́щшия, [не бо́ вре́мя вся изрещи́,] не оску́дныя и любому́дрыя трапе́зы, но от объяде́ния и насыще́ния ражда́тися обы́че. А́ще же хо́щеши души́ неду́ги ви́дети, я́же отсю́ду ражда́ющияся, у́зриши, я́ко лихои́мство, ща́пства, я́рости танми́чища , скве́рности, неве́жества вся́кая отсю́да и́мать нача́ло: по́льза бо ни еди́на у́ньше от сих трапе́з наслажда́ющимся быва́ет душа́м от толи́ких растерза́емых звере́й. Реку́ и печа́ли ели́ка и́мут, и безобра́зия приседя́ща наслажде́нию - но вся у́бо преити́ невозмо́жно; еди́ною же глави́зною все сотвори́ я́вственно: трапе́зы бо сея́, глаго́лю, многоце́нныя со сла́достию никогда́ же вкуся́т. Ску́дная бо у́бо, я́коже здра́вия, си́це и сла́дости ма́ти есть: насыще́ние я́коже неду́гов, си́це не сла́дости исто́чник и конь есть. Иде́же бо а́ще сы́тость бу́дет - вожделе́нию бы́ти несть. Вожделе́нию бо не су́щу - ка́ко у́бо бу́дет когда́ сла́дость? Сего́ ра́ди не то́кмо разу́мнейших и здраве́йших убо́гих от бога́тых обрета́ем у́бо, но [и] мно́жайша препло́жающих весе́лие. Я́же вся помы́сливше, да бежи́м пия́ньства же и наслажде́ния: не и́же от трапе́з то́кмо, но и ина́го всего́ и́же в ве́щех жите́йских. И вме́сто о́наго премени́м ю́же от духо́вных сла́дость. И по проро́ку наслади́мся Го́сподеви: «Наслади́ся бо Го́сподеви, рече́, и даст тебе́ проше́ния се́рдца твоего́», я́же и зде, и бу́дущих да восприи́мем благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва, вку́пе со Святы́м Ду́хом, ны́не и при́сно и во ве́ки веко́в. Ами́нь.

Сие́ сотвори́в нача́ток зна́мений Иису́с в Ка́не Галиле́и.

Мно́го дия́вол належи́т и зело́ отвсю́ду приступа́я на на́ша спасе́ния. Подоба́ет у́бо бо́дрствовати и трезве́тися, и вся́чески загради́ти ему́ исхожде́ние. А́ще бо и ма́ло прии́мет не́коего вины́, широ́к себе́ устроя́ет я́ко вход, и всю вво́дит пома́лу свою́ си́лу.

Того́ ра́ди, а́ще нам не́кое попече́ние о спасе́нии есть , ниже́ в ма́лых ему́ попу́стим к нам приходи́ти, да от сих ве́лия превозпосыла́ем. И́бо после́дняго бу́дет у́бо безу́мия - о́ному у́бо толи́ко показова́ти тща́ние я́ко бы на́шу погуби́ти ду́шу, нам же о на́шем саме́м спасе́нии ниже́ ра́вную вводи́ти ме́ру.

Сия́ мне не про́сте реко́шася; но не́же убоя́хся, да не когда́ в среду́ хра́ма и ны́не волк сей ста́нет незри́м на́ми, и звероя́тно от него́ бу́дут, оба́че ле́ности или́ наве́том лука́вым похище́но от ста́да и слы́шания.

А́ще бо у́бо бы́ша чу́вственныя я́звы, или́ те́ло [еди́но] я́звы приима́ше, не бя́ше де́ло позна́ти таковы́я наве́ты. Поне́же неви́дима душа́, и сия́ язв прие́млет: мно́гаго нам тре́ба есть бде́ния, якобы́ кому́ждо себе́ искуша́ти. Никто́же [весть челове́ка, то́чию] дух челове́ка, и́же в нем [есть].

Сло́во бо у́бо всем бесе́дует, и о́бще предлежи́т врачева́ние тре́бующим: еди́ному же коему́ждо от слы́шателей прия́ти есть уго́дное неду́гующему. Не вем аз неду́гующыя, не вем здра́вствующыя: сего́ ра́ди вся́каго сло́во дви́жу всем челове́ком сли́чно и всем прили́чное, и страсте́м врачева́ние вношу́. Ны́не у́бо лихои́мство оглаго́луя, по то́му же – наслажде́ние, па́ки нечистоте́ каса́яся, та́же ми́лостыни сослага́я похвалу́ и утеше́ние, та́же ины́м коего́ждо исправля́емых. Убоя́хся бо, да не когда́ о еди́ном глаго́лемых слове́с вам, не упражня́емым нам обря́щуся угожда́яй стра́стию не́коею, но тружа́ющимся вам. Я́кобы а́ще у́бо еди́н бе зде собира́емый, не у́бо си́це зело́ ну́жно бы́ти вознепщева́х многови́дно сло́во сотвори́ти; поне́же у́бо во мно́жестве толи́ком, мно́гим бы́ти и страсте́м ле́по, [д]а не неле́потно упещря́ем уче́нием: вся́чески бо обря́щет свою́ потре́бу сло́во, ко всем разширя́яся. Сих ра́ди и писа́ние многови́дно не́како есть, о безчи́сленных нам ве́щех бесе́дует, поне́же о́бщим естество́м бесе́дует челове́ком. Во мно́жестве же толи́ком, вся́чески ну́жда стра́стней души́ бы́ти, а́ще и не вся во всех. Сих у́бо саме́х себе́ очи́стивше, си́це боже́ственных слове́с да послу́шаем и со сокруше́нною мы́слию, и и́же днесь нам прочита́емых слы́шим. Ка́я же сия́ суть?

Ева́нгелие: Се сотвори́ нача́ло зна́мением Иису́с, в Ка́на Галиле́йстей и яви́ сла́ву Свою́, и ве́роваша Вонь и ученицы́ Его́.

Толкова́ние: Рех и пе́рвее, я́ко не́цыи не нача́ток сие́ бы́ти глаго́лют. Что бо глаго́лет? А́ще прилежи́т «в Ка́не Галиле́йстей» - «нача́ток» бо глаго́лет, сие́ сотвори́ в Ка́не. Аз же о сих у́бо ничто́же власносло́вих. Но я́ко у́бо по Креще́нии зна́мении нача́, и пре́жде Креще́ния ничто́же чудоде́йствоваше, пре́жде яви́хом. А́ще же сие́, а́ще же ино́е пе́рвое зна́мение бысть и́же по Креще́нии бы́вших - не зело́ укрепля́тися ну́жно бы́ти, мне мни́тся. «И яви́ сла́ву глаго́лет». Ка́ко и ко́им о́бразом? Ниже́ бо мно́зи внима́ху быва́емым, но слуги́ и архитрикли́н и жени́х. Ка́ко у́бо яви́ сла́ву Cвою́? Е́же у́бо часть. А́ще же и ни тогда́, но последи́ хотя́ше чу́до слы́шатися всем: до ны́не у́бо пропове́дуется и не таи́тся. Зане́ у́бо во он день не вси уве́деша от наводи́мых я́ко явле́нно, рек бо «яви́ сла́ву Свою́», наведе́: «и ве́роваша в Него́ ученицы́ Его́», и́же и пре́жде диви́шася сему́ . Зри́ши ли, я́ко зна́мения тогда́ наипа́че ну́жно бе твори́ти, егда́ благода́рни и внима́юще быва́емым я́вствене пребы́ша? Си́и бо хотя́ху и ве́ровати удо́бнейше, и со опасе́нием внима́ти быва́емым. И ка́ко у́бо бысть зна́ем, зна́мений кроме́? Я́ко и уче́ние дово́льно, и проро́чество, и е́же чу́до вложи́ти в слы́шащих ду́ши - я́ко бы с прилежа́нием внима́ти быва́емым, души́ приусвоя́щейся уже́. И́миже мно́гажды и и́нде глаго́лют евангели́сти не сотвори́ти зна́мения Ему́, ра́ди челове́ков безо́чства и́же та́мо пребыва́ющих.

[Примеча́ние: По Креще́нии у́бо нача́т зна́мения Иису́с, и, пре́жде реко́хом, досто́яше бо и пе́рвое зна́мение сотвори́ти о вине́: вя́щше бо се сотвори́ нача́ло зна́мений. Но рече́т кто: «А́ще и нача́ло зна́мение есть се, но не всем, но в Ка́на Галиле́йстей», разли́чна бо веща́ сотво́рь чудеса́ в Ка́не, се есть пе́рвое. Се у́бо рече́т кто. Мы же и мно́га иму́ще на ука́з, зане́ всем зна́мением есть нача́ло, е́же бо «яви́ сла́ву Свою́, и ве́роваша Вонь ученицы́ Его́» явля́ет, я́ко ино́го чу́да не соде́ла пред си́ми. О том бо яви́ сла́ву Свою́. Оба́че о том не спира́емся. А́ще же се пре́жде, а́щели и́но бысть, ка́коже у́бо яви́ сла́ву Свою́? Не бо мно́зи внима́ху быва́ему, ниже́ пред наро́дом бысть. Но а́ще и не тогда́, но последи́ хотя́ху слы́шати чу́до вси, и́мже и до ны́не пое́тся незабы́тно. А е́же «и ученицы́ Его́ ве́роваша Вонь», та́ко разуме́й, ре́кше ве́ру и ли́ше, и изве́стнейшу прия́ша Вонь, зане́ и вся́ко и пре́жде ве́роваху, но не та́ко изве́сто.]

Ева́нгелие: Посе́м вни́де в Капернау́м Сам, и Ма́ти Его́, и бра́тия Его́, и ученицы́ Его́, и ту пребы́ша немно́ги дни. И близ бе па́сха иуде́ом. И взы́де Иису́с во Иерусали́м, и обре́те в це́ркви продаю́ща овца́ и волы́ и го́луби, и пе́нязники седя́ща. И сотвори́в бичь от ве́рви, вся изгна́ из це́ркви овца́ же и волы́, и торжнико́м рассы́па ча́ты, и трапе́зы испромета́ и го́луби. Продаю́щим рече́: «Возми́те ю́ отсю́ду, не твори́те до́му Отца́ Моего́, до́му купле́ния». Помяну́ша же ученицы́ Его́, я́коже пи́сано есть: «Жа́лость до́ма Твоего́ снесть [Мя]».

Толкова́ние: Чесо́ ра́ди пребы́сть с Ма́терию в Капернау́ме? Ниже́ бо еди́но чу́до соде́ла та́мо, ниже́ живу́щии во гра́де о́ном от здра́во иму́щых бе́ша к Нему́, но и от зело́ растле́нных. И сие́ яви́ Христо́с рек: «И ты Капернау́ме, и́же до небесе́ возвы́сивыйся, да́же до а́да сни́деши». Чесо́ у́бо ра́ди пребы́сть? Мне мни́тся, поне́же ма́ло последи́ хотя́ше взы́ти во Иерусали́м, сего́ ра́ди тогда́ отъити́, я́кобы не всю́ду бра́тию влещи́ и ма́терь. Отше́д же, и ма́ло пребы́ вре́мя, ра́ди я́же к ма́тери че́сти, си́це па́ки пое́млется от чуде́с, устро́ив Ро́ждьшую: сего́ ра́ди глаго́лет: «Не по мно́гих днех взы́де во Иерусали́м». Пре́жде ма́лых у́бо дней па́схи креща́ше[ся], возше́дше же во Иерусали́м, что твори́т? Вещь, мно́гаго госпо́дства по́лну. Корче́мников бо о́ных и пе́няжников, го́луби продаю́щих, и волы́, и о́вцы, и сего́ ра́ди та́мо пребыва́ющих, изгна́. И ин у́бо евангели́ст глаго́лет, я́ко и изгна́в глаго́лаше: «Не твори́те до́му Отца́ Моего́ верте́п разбо́йником». Сей же «до́му ку́пли» глаго́лет, не сопроти́вная друг дру́гу глаго́люще, но наказу́юще, я́ко от втора́го сие́ сотвори́. И я́ко не по тому́жде вре́мени обоя́ бы́ша: овогда́ у́бо в нача́лех, овогда́ же ко е́же стра́сти прише́д сие́ твори́т. Те́мже и зельне́йше словесы́ употребля́я, верте́п нарица́ше разбо́йников. Зде же в нача́ле зна́мений не си́це, но смире́нне наипа́че запреще́нием употребля́ет: отню́ду же ле́по второ́му сему́ бы́ти. И чесо́ ра́ди, глаго́лет, Сам сие́ сотвори́ Христо́с, и толи́ко зе́льнейше употребля́ет на о́нех, е́же нигде́же явля́ется творя́: и си́це досажда́емь, укоря́емь, и «самаря́нином» и «бесну́ющимся» нарица́емый от них. [Но] ни́же бо удобле́ся словесы́ то́кмо, но и бич прие́мь, си́це их изгна́.

[Примеча́ние: Торжницы́ же суть, и́же дро́бныя ца́ты продаю́ще, ‐ мно́зи архиерее́ве, согреша́ют [бо] такова́я ку́пчины, тогда́ волы́ продаю́ща в це́ркви глаго́лю ‐ и́же в сло́ве уче́ния, ле́пы су́ща не поставля́юща, поста́вяще злоде́яти мы́слящая, [но о́вцы – не по́льзы о́бщая лю́ди] , и го́луби же – духо́вныя, реку́, да́ры продаю́ща, и бо́ле даю́ще, на лу́чших степе́нех вчиня́юще: и́хже Госпо́дь изго́нит из це́ркви, недосто́йны святи́тельства судя́. Но любокто́: и пе́нязь реку́, и сло́во, и уче́ние – продае́т, учи́телем бу́ди, не возвеща́ет сло́ву, а́ще не приобрете́ние и́мать, и сего́ трапе́зу опромета́ет Госпо́дь. Престо́л глаго́лю - уче́ния и сло́во, е́же он содержи́т, зло́бы же ра́ди не подава́ет всем, Госпо́дь Иису́с рассы́плет человекоуго́дия ра́ди и лю́дем раздае́т, того́же разори́т власть, ино́го же досто́йна на учи́тельстве столе́ посажда́ет.]

Ева́нгелие: Отвеща́ша иуде́и и реко́ша Ему́: что зна́мения явля́еши нам, я́ко се твори́ши. Отвеща́в Иису́с и рече́ им: Разори́те це́рковь сию́, и тре́ми де́ньми сози́жду ю́. Реко́ша бо иуде́и: Четы́редесяты и шестию́ лет созда́ся це́рковь сия́, и Ты треми́ де́ньми воздви́гнеши ю́? Он глаго́лаше о це́ркви те́ла Его́. Егда́ же воста́ от ме́ртвых, помяну́ша ученицы́, я́ко се глаго́лаше, и ве́роваша писа́нию словеси́, е́же рече́ Иису́с.

Толкова́ние: Иуде́и же, ины́м у́бо благоде́тельствуемым, порица́ют и свире́пеются. Егда́ же ле́по бе возве́рствоватися запреща́ющимся, не таковы́м употребля́ют к нему́ о́бразом: не бо запрети́ша, ниже́ досади́ша, но что глаго́лют? «Ко́е зна́мение показу́еши нам, я́ко сия́ твори́ши?». Зри́ши ли за́висти премно́жество и ка́ко ины́х благодея́ния наипа́че их раздражи́ша? Овогда́ бо у́бо верте́п разбо́йников храм бы́ти глаго́лаше от них, показу́я, я́ко продае́мая от татьбы́ бе́ша и хище́ния и лихои́мства, и от чу́ждих обогаща́хуся па́костей. Иногда́ же дом ку́пли, от безсту́дных их ко́рмчеств по́льзуяй. Но чесо́ ра́ди сие́ сотвори́? Поне́же хотя́ше в субо́ту исцеля́ти и мно́га такова́я твори́ти, я́же мне́ти от них законопреступле́ния бы́ти: да не возмни́тся я́ко богопроти́вен не́кто и от сопроти́внаго прише́д Отцу́ сия́ твори́ти, отсю́ду такова́го непщева́ния им твори́т исправле́ние. Не бо у́бо толи́ку ре́вность показа́л о до́му, е́же до́му Влады́це и всем служи́мым хотя́ше сопроти́витися. Бе́ша у́бо дово́льна и пе́рвая ле́та, в них же и по зако́ну живя́ше, показа́ти к Законополо́жнику стыде́ние и я́ко не от сопротивозаконополо́жных прии́де. Поне́же леть бе о́но забве́нию преда́ти вре́мени, я́же не всем су́ща Зна́ема, зане́же в дому́ пита́тися ни́щем и худо́м, настоя́щим всем про́чее [и́бо мно́зи прибы́ша, ю́же пра́зднику близ су́щу] сие́ твори́т и прибе́дствуя. Ниже́ бо про́сте изгна́на, и трапе́зы испрове́рже, и сре́бренники разсы́па: дая́ им от сих непщева́ти, я́ко не у́бо И́же в беды́ Себе́ вверг о благоукраше́нии До́му, Влады́ки до́му пренебреже́ у́бо. А́ще бо лицеме́рствуяй сия́ творя́ше, поуча́ти подоба́ше то́кмо, а е́же и в беды́ устроя́тися зело́: ниже́ бо слу́чай бе. И я́рости толи́ких торжнико́в Себе́ отдая́ти, и наро́да мно́гаго испо́лнена безслове́сия корче́мников челове́ческ на себе́ раздражи́ти досажда́юща, отщетева́юща: не лицеме́рствующаго бе, но вся изволя́ющаго страда́ти о благоукраше́нии До́му. Сего́ ниже́ и́миже твори́т то́кмо, но и и́миже глаго́лет, показу́ет е́же к Нему́ согла́сие: ниже́ бо рече́ Дом святы́й, но дом Отца́ Моего́. Сей Отца́ нарица́ет, и не гне́ваются: мня́ху бо про́сте Его́ глаго́лати. Поне́же у́бо происходя́, я́вственнейше веща́ше, я́ко о́ною предста́вити мысль ра́вности, тогда́ свире́пеются. Что у́бо они́? «Ко́е зна́мение показу́еши нам, рече́, я́ко сия́ твори́ши». О́ после́дняго неи́стовства! Зна́мения тре́ба бе, я́ко бы я́же зло быва́емая утоли́ти и Дом свободи́ти толи́каго студа́! Ре́вность же такову́ прия́ти о до́му Бо́жии, не ве́лие ли зна́мение доброде́тели бе? Ученицы́ у́бо благода́рни и отсю́ду показа́шася, и́бо воспомяну́ша тогда́, я́ко есть пи́сано: «Ре́вность до́му Твоего́ снеде́ Мя». Но они́ проро́чество не воспомяну́ша, но «Ко́е зна́мение показу́еши нам?» глаго́лаша. Вку́пе у́бо о злоприобрете́ниих свои́х боле́знующе, ссеца́еми и ожида́юще сие́ возбрани́ти Его́. Вку́пе же и призыва́ти Его́ на чу́до хотя́ше и извести́ти быва́емым. Сего́ ра́ди ниже́ даст им зна́мение. Поне́же и пе́рвее приходя́щим и прося́щим то́жде отвеща́ше: «Род лука́в и прелюбоде́ив зна́мения про́сит, и зна́мение не да́стся ему́ то́кмо зна́мение Ио́ны». Но тогда́ у́бо я́вственнейше, ны́не же гада́тельнейше. Твори́т же сие́, после́дняго ра́ди их нечу́вствия. Не бо у́бо непрося́щим прие́млющим и зна́мения дая́й, Сей прося́щыя у́бо [не] отвраща́л бы, а́ще не мысль бы их ви́дел лука́ву су́щу и ле́стну и зло́е произволе́ние. Сие́ бо а́бие проше́ние, помы́сли, ели́кия зло́бы по́лно бе. Подоба́ше бо Ему́ восприима́ти тща́нием и ре́вностию. Подоба́ше ужаса́тися, я́ко толи́ко промышле́ние о До́му твори́т. Порица́ют же они́, корчемствова́ти досто́йно глаго́люще, разруша́ти же корче́мство недосто́йно бы́ти, а́ще не зна́мение не́кое пока́жет. Что у́бо Христо́с? «Разори́те храм сей и треми́ де́ньми воздвигну́ его́». Мно́га такова́ веща́ет, су́щим у́бо тогда́ слы́шащим не су́ща явле́нна, су́щим же по сих быва́ема. Чесо́ же ра́ди сие́ твори́т? Да пока́жется, я́ко предве́дый свы́ше я́же по сих, егда́ из́ыдет и предрече́ния коне́ц: е́же бо и о проро́честве сие́ бысть. «Егда́ бо, рече́, воста́ от ме́ртвых, тогда́ помяну́ша ученицы́ я́ко сие́ глаго́лаше: и ве́роваша писа́нию и словеси́ е́же рече́ Иису́с». Егда́ же глаго́лаше, о́ви у́бо недоумева́хуся что у́бо бу́дет рече́нное, о́ви же спротивля́хуся глаго́люще: «Четы́рьмидесять и шестию́ ле́ты со́здан бысть храм сей, и Ты ли треми́ де́ньми воздви́гнеши его́?» Четы́редесят же и шесть лет глаго́лаху, после́днее зда́ние явля́юще: пе́рвое бо в два́десятих ле́тех соверши́ся вре́мя. Что у́бо ра́ди не разреши́ гада́ние и рече́, я́ко не о хра́ме глаго́лю сем, но о пло́ти Мое́й? Но евангели́ст у́бо по́сле пи́ша Ева́нгелие сказу́ет рече́нное: умолча́ тогда́. Что ли у́бо ра́ди сие́ умолча́л есть? Зане́ не бы у́бо сло́во прия́ли. А́ще бо ученицы́ недово́льни е́же ка́ко разуме́ти рече́нное бе́ша, мно́го па́че наро́ди. «Егда́ бо, рече́, воскре́се от ме́ртвых, тогда́ воспомяну́ша и ве́роваша сло́ву и писа́нию». Двоя́ бо им представля́ема еще́: еди́но у́бо во е́же Воскресе́ния, друго́е же е́же всего́ бо́льши - а́ще Бог бе внутрь живы́й, я́же обоя́ назна́мена рек: «Разори́те хра́ма сего́ и треми́ де́ньми воздви́гну его́».

[Примеча́ние: Да слы́шат же ариа́не ка́ко, я́ко Госпо́дь и сме́рти Разори́тель веща́ воста́влю. Не бо рече́ я́ко воста́вит Оте́ц, но я́ко воста́влю Аз, свою́ Си́лу явля́я и не и́но извну́ тре́буя.

Иуде́и же о безду́шней це́ркви мня́ще Ему́ глаго́лати, смею́тся Ему́: «Четы́редесяти и шестью́ лет созда́ся, ка́ко веща́, глаго́леши Ты, в три дни воздви́гнути?». Ве́сто же, я́ко егда́ у́бо от Соломо́на созда́на бысть це́ркви пе́рвая два́десятими лет, неску́дне сверши́ся. По́слеже по плене́нии, взе́мше евре́и власть созда́ти ю́. Нача́ша у́бо при Ки́рове ца́рстве зда́ти ту, запина́еми от зави́дящих им, продолжи́ша зда́ние до Артаксе́рксова ца́рства. При то́м же, в сея́ пра́здни насла́ждьшеся, со мно́гим тща́нием возмого́ша сконча́ти де́ло. Тогда́ же глаго́лется, иуде́ом зи́ждущим, па́костими бя́ху. Та́ко веща́ во стра́се мно́зе, окре́стных стран боя́щеся: Идуме́и и перс. От тех бо, я́ко реко́х перс, вся́ко празднь прия́ша. Сему́же зда́нию по плене́нии веща́ша четы́редесяти и шестью́ лет бы́ти, я́ко ставля́емым продолжи́ти: от Ки́рова ца́рства, да́же и до Артаксе́рксова ца́рства.

И несть чу́до, а́ще иуде́и не разуме́ша. Где же и ученицы́? И́бо дво́е им весе́лие запина́ше: еди́но у́бо о воскресе́нии, и одва́ пости́жно и́но же - я́ко Бог есть Жи́в, и в те́ле. По воскресе́нии бо разуме́ша ученицы́ и ве́роваша Писа́нию, и вся я́же о воскресе́нии приима́ют. Проявле́на же, я́ко «не оста́виши души́ моея́ во а́де», и «Госпо́дь хо́щет очи́стити от я́звы», «И яви́ти Ему́ свет»: я́ве бо си о Воскресе́нии рече́на. Аполина́рий же зде куша́ется по́мощи обрести́ своея́ е́реси: хотя́ бо соста́вити, я́ко безду́шна бе Госпо́дня плоть, Це́ркви же безду́шна. Безду́шна ли у́бо и си, ши́бене и многонра́ве? Ты же дре́во и ка́мение сотвори́ Госпо́дню плоть, поне́же от тех Це́ркви. Егда́ услы́ши Го́спода, я́ко «ны́не душа́ Моя́ смяте́ся», я́ко и «власть име́ю положи́ти ду́шу Мою́», ка́ко се разумева́еши? А́щеже не о сло́ве ве́рне и разу́мне, и души́ Си веща́в глаго́лется, е́же «О́тче, в ру́це Твои́ прелага́ю дух Мой». Не бо́ где о безслове́сней души́ се разуме́еши. А е́же «не оста́виши душа́ Моея́ во а́де», что ти мни́тся? Но ты у́бо погиба́й со свои́ми.]

Е́же и Па́вел нема́ло зна́мение бы́ти рече́ Божества́ си́це глаго́ля: «Нарече́ннаго Сы́на Бо́жий в си́ле по ду́ху святы́ни, от воскресе́ния ме́ртвых Иису́са Христа́». Что же ра́ди и та́мо, и зде сие́ дает зна́мение, и везде́ си́е глаго́лаше: «Егда́ вознесе́те Сы́на челове́ча, тогда́ разуме́ете я́ко Аз есмь», «Ны́не же ниже́ да́стся вам зна́мение то́кмо зна́мение Ио́ны проро́ка», и зде па́ки: «Я́ко треми́ де́ньми воздви́гну его́»? Я́ко сие́ наипа́че бе показу́юще Его́ не су́ща челове́ка про́ста, е́же мощи́ на смерть одоле́ние поста́вити, е́же томи́тельство ея́ до́лгую и лю́тую разреши́ти брань си́це вско́ре. Сего́ ра́ди рече́: «Тогда́ уве́сте». Тогда́, когда́ егда́ воскре́с, привлеку́ вселе́нную. Тогда́ уве́сте, зане́ и сия́ я́ко Бог и Бо́жий Сын При́сный творя́х, отомща́я, ю́же ко Отцу́ доса́ду. Что же у́бо не рече́ и кото́рых зна́мений тре́ба есть ко е́же уста́вити зле быва́емое, но обеща́ да́ти зна́мение? Зане́ о́но у́бо их раздражи́ло бы, сие́ же па́че ужаси́ло бы. Но оба́че ничто́же к сему́ ре́ша; и́бо непщева́ся им неве́рно глаго́лати и ниже́ вопроси́ти терпя́ху, но я́ко не́мощно су́ще претеко́ша. А́ще же ум име́ли бы, [а́ще и тогда́ им неве́рно мне́лося бы бы́ти, егда́ мно́гая сотвори́л есть зна́мения,] тогда́ у́бо приступи́вше вопроси́ли бы, тогда́ у́бо умоли́ли бы недоуме́ние им разреши́ти сие́. Но, несмы́сленни су́ще, о́вем у́бо ниже́ отню́д внима́ху от глаго́лемых, о́важе с лука́вою послу́шаху по́мыслию. Те́мже и Христо́с гада́тельствене к ним веща́ше. Но иско́мое о́но есть: ка́ко ученицы́ не ве́дяху, я́ко подоба́ет ему́ воскре́снути от ме́ртвых? Зане́ не у́ Ду́ха сподо́бившеся благода́ти. Те́мже, ча́сте я́же о воскресе́нии слы́шаще словеса́, ничто́же разуме́ша я́вственно, но размышля́ху в себе́, что сие́ есть. И́бо мно́го стра́нно и пресла́вно бе глаго́лемое, е́же себе́ кому́ мощи́ возста́вити и возста́вити си́це. Сего́ ра́ди и Петр запреще́н бысть, поне́же, ничто́же ве́дый о Воскресе́нии, глаго́лаше: «Ми́лостив Ты». И ниже́ Христо́с пре́жде ве́щи откры́л есть сие́ им я́вствене, да не соблазня́тся в нача́ле, не ве́рующе глаго́лемому, мно́гаго ра́ди пресла́внаго и не у́ я́вствене Его́ ве́дети, Кто есть. О́вем у́бо ве́щьми вопию́щим, никто́же у́бо не ве́рует; о́вем же словесы́ глаго́лемым, ле́по бе не́ким не ве́ровати. Сего́ ра́ди изнача́ла оста́ви спокрове́нно бы́ти сло́во. Егда́ же иску́сом ко и́стинне приведе́ рече́нная, тогда́ про́чее даде́ глаго́л ра́зум и толи́ку Ду́ха благода́ть, я́ко внеза́пу вся восприя́ти. «Он бо вам воспомяне́т, рече́, вся». И́же бо и е́же к Нему́ стыде́ние, во еди́н то́кмо отве́ргше ве́чер, и бежа́вше, и ниже́ ве́дети Его́ ре́кше, упражне́нием у́бо и́же во вре́мя бы́вших же и рече́нных воспомяну́ли бы, а́ще не мно́гия наслади́лися бы́ша Ду́ха благода́ти.

И а́ще от Ду́ха, рече́, слы́шати имя́ху, ка́я потре́ба бы́ти им со Христо́м, хотя́ще не держа́ти глаго́лемых? Зане́ не научи́л есть Дух, но воспомяну́л, я́же предвари́в ,Христо́с рече́. Нема́ло же во сла́ву споспе́шествоваше Христо́ву, е́же посла́ти к па́мяти рече́нных их. В нача́ле бо Бо́жия благода́ти бысть е́же налете́ти Ду́ха благода́ти си́це изоби́льной и мно́гой, по́сле же - их доброде́тели е́же удержа́ти дар. Житие́ бо показа́ша све́тло, и мно́го любому́дрие, и вели́кия труды́, и посмея́шеся у́бо настоя́щей жи́зни, ничто́же вознепщева́ша челове́ческая, но высоча́йши всех бы́ша, и я́коже не́цыи о́рли ле́гцы, высо́кое лета́юще де́лы, к само́му достиза́ху небеси́: и си́ми стяж́аша Ду́ха благода́ть неизрече́нную.

Нравоуче́ние два́десять тре́тие: О ми́лостыни:

Сих у́бо да и мы подража́ем и да не угаси́м свети́льников, но да соблюде́м све́тлых ми́лостыню. Сего́ огня́ сия́ние си́це соблюда́ется: да собере́м у́бо в сосу́ды еле́й, до́ндеже зде есмы́, ниже́ бо есть сего́ купи́ти отше́дшим та́мо, ниже́ отъину́ду сего́ прия́ти, но ра́звее руко́ю ни́щих. Да собере́м у́бо зде у́же со мно́гим изооби́лием, а́ще у́бо хо́щем с Женихо́м вни́ти. А́щеже ни вне пребыва́ти черто́га ну́жда есть, немо́щно бо, немо́щно, а́ще и безчи́сленная испра́вим блага́я, ми́лостыни кроме́, взы́ти на преддве́рия Ца́рствия. Те́мже да со мно́гим сию́ пока́жем изоби́лием, я́кобы наслади́тися неизрече́нных благи́х, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва, со Святы́м Ду́хом, ны́не и при́сно и во ве́ки веко́в. Ами́нь.

Держа́щу же ся исцеле́вшему хромо́му Петра́ и Иоа́нна, притеко́ша к ни́ма вси лю́дие в притво́р нарица́емый Соломо́нов, ужа́сни. Ви́дев же Петр, отвещева́ше к лю́дем: «Му́жие изра́ильтяне, что чудите́ся о сем? Или́ на ны что взира́ете, я́ко свое́ю ли си́лою или́ благоче́стием сотвори́хом его́ ходи́ти?

Толкова́ние Златоу́ста: От ве́ры ю́же име́яше к ни́ма и лю́бве не отлуча́шеся от них, благода́ря и хваля́ их. Та́же Петр к лю́дем, не поне́же досто́йны есмы́, рече́, привлеко́хом Бо́жию ми́лость. Бог Авраа́мов, и Бог Исаа́ков, и Бог Иа́ковль, Бог оте́ц на́ших: зри, ка́ко ча́сто прибега́ет к пра́отцем, да [не] непщу́ют но́вое не́кое уче́ние приноси́ти. Та́мо о патриа́рсе Дави́де воспомяну́, зде же о Авраа́ме. А́ще се смущает вы, рече́, научи́теся, кто сотвори́ вы, и не ужаса́йтеся. Зри всю́ду, я́ко егда́ к Бо́гу прибе́гает, глаго́лет, я́ко от Бо́га быва́ют вся. Мно́жае их запреща́ет и повсю́ду облича́ет им беззако́ние е́же на Христа́, и Воскресе́ние Его́ утвержда́ет.

Ина́го: Притво́р же сый то́чию еди́н оста́ся от сооруже́ния Соломо́нскаго, сожже́ бо святи́лище Навходоносо́р, и но́ва сооружи́ е́ Кир, пе́рсский царь.

Су́щее: Бог Авраа́мов, и Исаа́ков, и Иа́ковль, Бог оте́ц на́ших просла́ви о́трока Своего́ Иису́са, Его́же у́бо вы преда́сте и отверго́стеся Его́ пред лице́м Пила́товем, су́ждьшу О́ному пусти́ти, вы же свята́го и пра́веднаго отверго́стеся.

Толкова́ние Златоу́стаго: Что глаго́леши, Пе́тре, Его́же пропове́дуеши Иису́са, несть ли Бог Авраа́мов, и Бог Исаа́ков, и Бог Иа́ковль? И ка́ко глаго́лет писа́ние о Христе: «Аз есмь Бог Авраа́мов, и Бог Исаа́ков» . И и́нде па́ки: «Аз Бог пе́рвый, Аз и по сих, и кроме́ Мене́ ин несть» . И в Ева́нгелии па́ки богобо́рцем иуде́ом Сам глаго́лет: «Ами́нь, ами́нь глаго́лю вам, я́ко пре́жде Авраа́ма Аз есмь» . Его́же вы а́ки Бо́жия сопроти́вника и престу́пника распя́сте, я́ко не живу́щаго в зако́не - Сей Бог есть и Бо́жий Сын, И́же зако́н дасть и проро́ки посла. Те́мже не диви́теся о сем, ни на ны взира́йте, я́ко свое́ю си́лою сотво́ршим ходи́ти ему́: Бог у́бо посла́в Сы́на Своего́, И́мже нача́льства и престо́л соста́ви, с Ни́мже и И́мже госпо́дьства сочета́ и го́рний вообрази́ Иеросали́м, с Ни́мже и небеса́ простре́, и зе́млю основа́, и мо́ре соста́ви, и челове́ка по о́бразу Своему́ и по подо́бию сотвори́. Тем у́бо и ны́не сего́ сотвори́ ходи́ти пред все́ми ва́ми: не на нас у́бо взира́йте, но О́ного позна́йте, Его́же Оте́ц просла́ви, Его́же Оте́ц вам яви́ся и Дух Святы́й свиде́тельствова, Его́же Оте́ц дарова́ вам, Тому́ поклони́теся, Того́ прииме́те и просла́вите, ко О́ному приступи́те и от Него́ просвети́теся, Его́же Оте́ц Святы́й посла́ в мир, Его́же вы распя́сте, суди́вшу Пила́ту отпусти́ти возбрани́сте, ине́х у́бо уби́вшаго испроси́сте отпусти́тися, а ме́ртвыя Животворя́щаго не восхоте́сте.

Су́щее: И испроси́сте му́жа уби́йцу да́ти вам, Нача́льника жи́зни уби́сте, Его́же Бог воскреси́ от ме́ртвых, Ему́же мы свиде́теле есмы́, и о ве́ре и и́мени Его́, сего́, его́же ви́дите и ве́сте, утверди́ и́мя Его́. И ве́ра я́же Его́ ра́ди даде́ ему́ всю це́лость сию́ пред все́ми ва́ми.

Толкова́ние Златоу́стаго: Я́коже у́бо во упива́ющихся ничто́же глаго́лем; егда́ же истрезвя́тся и воспря́нут от пия́нства, тогда́ с преще́ньми глаго́лем. Си́це же и Петр, егда́ возмого́ша разуме́ти глаго́лемым, тогда́ язы́к свой поостри́ и мно́гими запреще́ньми глаго́лет: я́коже Его́ Бог просла́ви, си́и преда́ша, и я́ко Его́же Пила́т отпусти́, отверго́шася и уби́йцу испроси́ша.

«Его́же Бог из ме́ртвых воскреси́» рече́ - зде ве́ру воскресе́нию составля́ет. И не ктому́ к проро́ком прибега́ет, но к себе́, поне́же про́чее достове́рен бе. Тогда́ у́бо рече́ я́ко воскресе́, Дави́да приведе́ свиде́теля. Ны́не же рек, приведе́ лик апо́стольский: «Ему́же мы, рече́, свиде́тели есмы́» и про́чее. И пре́жде да́же ничто́же рек, а́бие зна́мение приво́дит, всецеле́ние : «Се пред все́ми ва́ми» рече́.

Су́щее: И ны́не му́жие бра́тие вем, я́ко по неве́дению се сотвори́сте я́коже и кня́зи ва́ши. Бог же, я́коже провозве́сти усты́ всех проро́к Свои́х, пострада́ти Христу́ сконча́ та́ко.

Толкова́ние Златоу́стаго: Поне́же зело́ прикосну́ся им и показа́в воскре́сша Распя́таго, па́ки возвраща́ется, дав им вла́сть покая́ния. «И ны́не, рече́, бра́тие, вем, я́ко в неве́дении сотвори́сте», и про́чая. Е́же испе́рва покрове́нне глаго́лаше: «Пронарече́нным сове́том Бо́жиим пре́дана прии́мше» , се простира́ет зде глаго́лы е́же «на кресте́ поноша́юще глаго́лаху, назна́менуя, а́ще хо́щет [Ему́] да спасе́т Его́: рече́ бо, я́ко Сын Бо́жий есмь: а́ще упова́ет Нань да сни́дет с Креста́» - «си́це у́бо подоба́ше бы́ти, рече́, я́ко проро́цы свиде́тельствуют» полага́ется в чин отве́та иуде́йскаго: «И сконча́, рече́, си́це». Ви́диши ли, ка́ко та́мо вся возво́дит? Да не у́бо глаго́лют па́ки, ка́ко ны́не Его́ прославля́ет, И́же тогда́ не моги́й, приво́дит проро́ки свиде́тельствующих, я́ко та́ко подоба́ше бы́ти. Не́цыи от проро́к провозвести́ша прише́ствие Госпо́дне и стра́сти я́же от челове́к хотя́ше прия́ти. Те́мже у́бо я́же от них прорече́нная сбы́шася: распе́ншуся Христу́, испо́лнил есть Бог. Коне́ц толкова́нию.