Среда третьей седмицы по Пасхе

Я́коже бе во Иерусали́ме на Па́сху в пра́здник, мно́зи ве́роваша в Него́:

Челове́к су́щих тогда́, о́ви у́бо заблуже́нию внима́ху, о́ви же и́стинны держа́хуся: но и от сих не́цыи на ма́ло сея́ восприе́млюще, па́ки ея́ отпа́даху. Сих и Христо́с, гада́тельствуя се́менем, уподо́бил есть не в глубине́ лежа́щим, но ко́рения наверху́ земли́ име́ющим, и́мже и вско́ре погиба́ти рече́. Сих и евангели́ст зде нам изъяви́л есть, си́це глаго́ля: «Егда́ же бе во Иерусали́мех на па́сху в пра́здник, мно́зи ве́роваша в Него́, зря́ще Его́ зна́мения я́же творя́ше». О́ни бо опа́снейше бе́ша ученицы́, ели́цы не от зна́мений прихожда́ху то́кмо, но и от уче́ния. Де́белейших бо зна́мения влача́ху, слове́снейших же - проро́чества и уче́ния. Ели́цы у́бо от уче́ния удержа́ни бы́ша, сии́ су́щых от зна́мений бе́ша опа́снейши. И́хже и Христо́с ублажи́л есть глаго́ля: «Блаже́ни не ви́девшии и ве́ровавше». А я́коже не от при́сных бе́ша сии́, показу́ет и наведе́ние. Сам бо рече́: «Иису́с не вверя́ше себе́ им». Что ра́ди? «Зане́ же Ему́ ве́дети вся, и я́ко не имя́ше потре́бу, да кто свиде́тельствует о челове́це: Сам бо ве́дяше, что бе в челове́це». А е́же глаго́лет, таково́ есть: Не внима́ше и́же от вне глаго́лом, на се́рдца их находя́, и к мы́сли входя́: и привре́менную их теплоту́ ве́дый я́вственне, не наде́яся на них я́ко на ученико́в соверше́нных, не вруча́ше вся догма́ты им я́ко у́же опа́сне ве́рным бы́вшим. А е́же я́же в се́рдцы челове́к ве́дети, «Созда́вшаго се́рдца на еди́не» есть – Бо́га: «Ты бо, рече́, све́си се́рдце уедине́но». Не тре́боваше у́бо свиде́телей, якобы́ Свои́х зда́ния уве́дети мысль. Те́мже ниже́ от привре́менныя ве́ры и́ми дерза́ше.

Челове́цы бо, ниже́ настоя́щая, ниже́ бу́дущая ве́дяще, мно́жицею и су́щим ле́стне прихо́дят, и отступа́ющим ма́ло по́сле, вся кроме́ не́коего обинове́ния и глаго́лют, и вруча́ют. Христо́с же не си́це: ве́дяше бо их неизрече́нная вся я́вствене. Такови́ мно́зи и ны́не суть, ве́ры у́бо име́юще, верообрета́тельни же и удо́бне отводи́ми. Сего́ ра́ди ниже́ ны́не им Христо́с Себе́ вверя́ет, но мно́жайшая сокрыва́ет.

Я́коже бо мы не про́сте друго́м, но бли́жним дерза́ем, си́це и Бог. Услы́ши у́бо, что рече́ ученико́м Христо́с: «Не ктому́ вас глаго́лю рабы́.., вы дру́зи Мои́ есте́». Отку́ду и что ра́ди? «Я́ко вся, ели́ка слы́шах от Отца́, откры́х вам». Сего́ ра́ди ниже́ иуде́ом зна́мения дая́ше прося́щим, зане́ искуша́юще проша́ху, у́бо е́же зна́мения проси́ти - искуша́ющих есть и тогда́, и ны́не. И́бо и ны́не суть и́щущеи и глаго́люще: Что ра́ди зна́мения не быва́ют? А́ще бо ве́рен еси́, я́ко бы́ти подоба́ет, и лю́биши Христа́, я́коже люби́ти подоба́ет, - не востре́буеши зна́мений: сие́ бо неве́рным даю́тся. Ка́ко у́бо иуде́ом не дана́ бы́ша, рече́? Наипа́че у́бо дана́ бы́ша. А́ще же есть иде́же прося́ще не прия́ша, поне́же не от е́же неве́рия свободи́тися сия́ проша́ху, но и о е́же па́че утверди́ти свое́ лука́вство.

Ева́нгелие: И бе челове́к от фарисе́й, Никоди́м и́мя ему́, князь иуде́йский. Сей прии́де но́щию к Нему́.

Толкова́ние: Сей и посреде́ Ева́нгелия явля́ется, е́же о Христе́ творя́ сло́во. Глаго́ла бо: «Зако́н наш не су́дит ни еди́нагоже, а́ще не пе́рвее услы́шит от него́». И разуме́ет, что твори́т. К сему́ иуде́и стужи́вше глаго́лаху: «Вопроси́ и виждь, я́ко проро́к от Галиле́я не воста́». И по Кресте́ же явля́ется я́ко мно́го попече́ние о погребе́нии Влады́чняго телеси́ сотвори́л есть. «Прии́де бо, рече́, и Никоди́м, прише́дый ко Иису́су но́щию, нося́ смеше́ние сми́рны и ало́е, литр сто». И ны́не же любе́зне пребыва́ше о Христе́, не я́коже подоба́ше и́же с мы́слию подоба́ющею, но еще́ от иуде́йския держа́шеся не́мощи. Сего́ ра́ди и но́щию прии́де, боя́ся в день сие́ твори́ти. Но человеколюби́вый Бог ниже́ си́це его́ отри́ну, ниже́ обличи́, ниже́ уче́ния его́ лиши́, но и со мно́гою ему́ кро́тостию бесе́дует и догма́ты ему́ отверза́ет зело́ высо́ки. Гада́тельствене у́бо отверза́ет же, оба́че мно́го бо па́че сей ми́лости досто́ин бе, [от] и́же лука́вством сие́ творя́щих. Они́ бо вся́каго суть кроме́ отве́та, сей же и сам зазре́ния у́бо пови́нен бе, [но] не у́бо толи́каго. Ка́ко у́бо евангели́ст ничто́же таково́ рече́ о нем? Рече́ у́бо и́нде: «Я́ко и от князе́й мно́зи ве́роваша в него́, иуде́й же ра́ди не испове́доваху да не от со́нмища изгна́ни бу́дут». Зде же все прише́ствием е́же в нощи́ назна́мена. Что у́бо сей рече́? «Равви́! Ве́мы я́ко от Бо́га прише́л еси́ Учи́тель. Никто́же бо мо́жет сия́ зна́мения твори́ти, я́же Ты твори́ши, а́ще не бу́дет Бог с ним». Еще́ до́лу обраща́ется Никоди́м. Еще́ челове́ческую о нем име́ет мысль и я́коже о проро́це бесе́дует, ничто́же ве́лие от зна́мений мечта́яся. «Ве́мы, рече́, я́ко от Бо́га прише́л еси́ Учи́тель». Что у́бо но́щию прихо́дит и тая́ся ко и́же Бо́жия Глаго́лющему, ко и́же отту́ду Приходя́щему? Что не с дерзнове́нием бесе́дует? Но ничто́же от сих рече́ Иису́с, иже́ обличи́ его́: «Тро́сти бо сокруше́нны не преломи́т, рече́, и льна воспале́вшася не угаси́т». Не пререче́т бо, рече́, ниже́ возопие́т. И Сам па́ки: «Не приидо́х, рече́, да сужу́ ми́рови, но да спасу́ мир».

Ева́нгелие: Никто́же мо́жет сия́ зна́мения твори́ти, я́же Ты твори́ши, а́ще не бу́дет Бог с ним.

Толкова́ние: Он у́бо еще́ по ерети́цех веща́ет, де́йствуемаго и ины́х по́мощи тре́бующа сия́ твори́ти, я́же творя́ше, глаго́ля. Что у́бо Христо́с? Зри схожде́ния вели́чество. Рещи́ у́бо, я́ко «ничто́же тре́бую ины́х по́мощи, но со о́бластию вся де́йствую, и́бо Сын есмь При́сный Бо́жий и тоя́же си́лы Роди́телю» отрече́ся еще́, за е́же тя́жно бы́ти слы́шащему. Е́же бо при́сно глаго́лю, сие́ и ны́не реку́: я́ко е́же потща́тельное бе Христу́, не си́це пре́жде досто́инство откры́ти Свое́, я́ко е́же показа́ти и уве́рити, я́ко ничто́же сопроти́вно де́йствоваше Отцу́. Сего́ ра́ди во глаго́лех у́бо во мно́гих ме́стех смиря́яся, явля́ется в ве́щех же не си́це творя́: егда́ бо чудоде́йствует со о́бластию вся твори́т. Глаго́лю: «Хощу́, очи́стися», «Тави́фа, воста́ни», «Простри́ ру́ку», «Оставля́ются тебе́ греси́», «Молчи́, [преста́ни]», «Обузда́йся, возми́ одр свой и иди́ в дом свой», «Тебе́ глаго́лю, лука́вый бе́се, изы́ди от него́», «Да бу́дет тебе́ я́коже хо́щеши», «А́ще кто к вам рече́т что, рцы́те, я́ко Госпо́дь его́ тре́бует», «Днесь со Мно́ю бу́деши в раи́», «Слы́шисте, я́ко рече́но бысть дре́вним: не убие́ши. Аз же глаго́лю вам, я́ко гне́ваяйся на бра́та своего́ ту́не, пови́нен бу́дет суду́», «Прииди́те в след Мене́, и сотворю́ вас ловца́ челове́ком». И везде́ мно́го зрим госпо́дство су́ще Его́. В ве́щех у́бо ни еди́н же зазри́т быва́емым. Ка́ко бо? А́ще бо не сбы́шася глаго́лемая, ниже́ коне́ц прия́ша, яко́в же повеле́, - име́л бы у́бо кто рещи́ оне́х, я́ко го́рдости бе повеле́ния; но поне́же сбы́шася и не хотя́щих их заусти́ конца́ быва́емых и́стинна. О словесе́х же можа́ху мно́жицею по своему́ безсту́дию горде́ние зазре́ти Ему́. Те́мже и о Никоди́ме, ны́не я́вственне у́бо ничто́же веща́ет, гада́тельствене же его́ возво́дит от смире́ния, науча́я я́ко самодово́лен Сам есть Себе́ в чуде́с показа́ние, соверше́нно бо Его́ роди́л есть Оте́ц и самодовле́юще Себе́ и ничто́же име́юща несоверше́нно. Но да уви́дим, ка́ко само́е сие́ устроя́ет, рече́ он: «Равви́! Ве́мы, я́ко от Бо́га прише́л еси́ Учи́тель, и я́ко никто́же мо́жет твори́ти, я́же Ты твори́ши, а́ще не бу́дет Бог с ним». И помы́сли вели́кое не́кое рещи́, сия́ рек о Христе́. Что у́бо Христо́с? Показу́я, я́ко ниже́ не преддве́рия подоба́ющаго ра́зума взы́де, ниже́ на предвра́тиих стал есть, но вне не́где ца́рствия заблужда́ет еще́: и той, ниже́ кто ин сия́ глаго́лет - и не у́ ко и́стинному прини́че ра́зуму, и́же сие́ о Единоро́днем име́я непщева́ние, что рече́?

Ева́нгелие: Ами́нь, ами́нь глаго́лю тебе́: А́ще кто не роди́тся свы́ше, не мо́жет уви́дети Ца́рствия Бо́жия.

Толкова́ние: Си́речь, а́ще ты не роди́шися свы́ше и опа́ство догма́т прии́меши - вне не́где заблужда́еши и дале́че не́где Ца́рствия еси́ небе́снаго. Но си́це у́бо я́вствене не рече́, да́же не тя́жестнейше сотвори́т сло́во. Не к нему́ простира́ет я́вствене, но неуста́влене глаго́лет: «А́ще кто не роди́тся», то́чию не глаго́ля: «Я́ко а́ще и ты, а́ще и ин кто у́бо бу́дет такова́я о Мне непщу́я - вне не́где Ца́рствия есть», поне́же, а́ще не сие́ хотя́ устро́ити сия́ глаго́лал бы, нестро́йно к рече́нным отвеща́ние бы́ло бы.

Иуде́и бо, а́ще сия́ слы́шали бы, посмея́вшеся у́бо отшли́ бы; сей же и всем любоуче́нное показу́ет. Сего́ ра́ди бо и не я́вственне во мно́гих ме́стех веща́ет Христо́с, к вопроше́нию слы́шащих воздви́гнути хотя́ и внима́тельнейших соде́лати. Я́вствене бо рече́нное претека́ет мно́жицею послу́шателя, нея́вственное же - испыта́тельнейше его́ твори́т и потща́тельна. А е́же глаго́лет, таково́ есть: А́ще не роди́вся свы́ше, а́ще не причасти́шися Ду́ха ба́нею пакибытия́ - не мо́жеши о Мне непщева́ние подоба́ющее прия́ти». Сие́ бо [твое́] не духо́вно непщева́ние [есть], но душе́вно. Но си́це у́бо не рече́, отрица́яся его́ уязви́ти я́же от Себе́ совносяща и ели́ко мо́щно веща́юща. Возво́дит же незазо́рно на бо́льший ра́зум его́, глаго́ля: «А́ще кто не роди́тся свы́ше». Зде о́ви у́бо от небеси́ глаго́лют, о́ви же изнача́ла . И́же бо не си́це рожде́нному невозмо́жно ви́дети, рече́, Ца́рствие Бо́жие, Себе́ зде показу́я и явля́я, я́ко сие́ есть зри́мое то́кмо, но ины́х оче́с тре́ба есть, я́ко бы уви́дети Христа́. Сия́ слы́шав,

Ева́нгелие: Никоди́м рече: «Ка́ко мо́жет челове́к роди́тися, стар сый?».

Толкова́ние: Учи́теля Его́ нарица́еши и от Бо́га приити́ глаго́леши, и не прие́млеши ли глаго́лемая, и мно́гия молвы́ привводя́щее рече́ние веща́еши ко Учи́телю? Е́же бо ка́ко сие́ не зело́ ве́рующих есть недоуме́ние, от земли́ су́щих еще́. Поне́же и Са́рра сего́ ра́ди посмея́ся. Поне́же е́же «ка́ко?» рече́. И и́ни мно́зи сие́ взыска́вше, ве́ры отпадо́ша, си́це и еретики́ пребыва́ют о е́реси. Сие́ во мно́гих ме́стех рече́ние взыску́юще: о́ви у́бо глаго́люще: «Ка́ко воплоти́ся?», о́виже глаго́люще: «Ка́ко роди́ся?» - и свои́х по́мысл не́мощи неизрече́нное о́но подлага́юще Существо́. Я́же у́бо ве́дящим бе́гати подоба́ет безвре́менного сего́ мно́го испыта́ния: ниже́ бо е́же «ка́ко» ве́дят, сия́ взыску́ющии, и ве́ры отпа́дут пра́выя.

Сего́ ра́ди и сей недоуме́ния ра́ди о́браза взыску́ет. И́бо разуме́, я́ко и к нему́ глаго́лется глаго́лемое: и смуща́ется, и недоумева́ется, и в размышле́нии есть. Прише́д бо я́ко к челове́ку, слы́ша же бо́льша не́жели от челове́ка, и я́же никто́же слы́шал никогда́же. И воздвиза́ется у́бо к высоте́ глаго́лемых, еще́ помрача́ет же ся и не стае́т, всю́ду обноси́мь, и ча́сте отпа́дая ве́ры. Те́мже и пребыва́ет, состроя́я невозмо́жное, я́ко бы в я́вственейше Е́го призва́ти уче́ние.

Ева́нгелие Еда́ бо мо́жет, рече́, во утро́бу ма́тере своея́ второ́е кто вни́ти и роди́тися?

Толкова́ние: Зри́те ли, ка́ко, егда́ свои́м по́мыслом попуща́ет кто духо́вная: и подсмея́тельное веща́ет, и лга́ти ви́дится, и пия́ньствовати - егда́ ли испыту́ет па́че уго́днаго Бо́гу рече́ная и не прие́млет е́же от ве́ры сложе́ние. Слы́шал есть рожде́ние, но духо́вна не помы́слил есть, но в смире́ние пло́ти привлече́ рече́нное, и ве́лию до́гму и си́це высо́ку есте́ственому после́дованию обе́си. Сего́ ра́ди бляде́ния назида́ет про́чее, и недоуме́ния подсмея́тельная. Те́мже и Па́вел глаго́лаше: «Я́ко душе́вен челове́к не прие́млет я́же Ду́ха». Но оба́че и в сем стыде́ние е́же о Христе́ сохраня́ет. Не поруга́ бо ся, рече́, ино́му, но невозмо́жно бы́ти непщу́я, умолча́. Двоя́ бо бе недоуме́ния: и рожде́ние таково́, и ца́рствие. Ниже́ бо ца́рствия и́мя слы́шася от иуде́й когда́, ниже́ рожде́ния такова́го. Но еще́ о пе́рвом стои́т, и́мже па́че его́ потрясе́ мысль.

Нравоуче́ние два́десять четве́ртое: О е́же не по́мыслы истяжа́ти боже́ственыя, но ве́рою, и о пра́вости жития́:

Сия́ у́бо ве́ще , не по́мыслом я́же о Бо́зе да взыску́ем, ниже́ под после́дование е́же у нас да приво́дим я́же отту́ду, ниже́ ну́жди естество́ да подлага́ем - но благоче́стне вся да разумева́ем, ве́рующа я́ко ре́ша писа́ния. Испыту́яй бо и мно́го истязу́я приобрета́ет у́бо ничто́же, к сему́ же е́же взыску́емое не обрести́, и казнь постра́ждет после́днюю. Слы́шал ли еси́, я́ко роди́л есть [Оте́ц]? Ве́руй е́же слы́шал еси́, а е́же ка́ко - не взыску́й, ниже́ сего́ ра́ди отъе́мли рожде́ние: не благоразу́мия бо сия́ после́дняго. А́ще бо сей, слы́шав рожде́ние, не оно́ неизрече́но, но сие́ е́же по благода́ти, но, поне́же ничто́же ве́лие о Нем вознепщева́, но челове́ческая и земна́я, сего́ ра́ди помрачи́ся и недоуме́ся - и́же гро́знейшее о́но и вся́ко превосходя́щее и сло́во, и ум испыту́юще и мно́го истязу́юще, коли́кого у́бо бу́дут досто́йни томле́ния? Ничто́же бо си́це твори́т тму лю́тую, я́коже челове́ческий по́мысл, от земли́ вся веща́я и не прие́мля просвети́тися свы́ше, мно́го бо име́ет бре́ние земно́е по́мыслов. Сего́ ра́ди свы́ше нам исто́чников тре́ба есть, да́ тиме́ния уседа́ющагося, ели́ко его́ чи́сто, сие́ свы́ше но́сится, и су́щим отту́ду уче́ниям смеша́ется. Быва́ет же сие́, егда́ и ду́шу благоразу́мну, и пра́во пока́жем житие́: есть бо, есть, и от нра́вов растле́нных, и от многоиспыта́ния то́кмо безвре́меннаго помрачи́ти мысль. Те́мже и Па́вел глаго́лаше кори́нфеном: «Млеко́м вас напои́х, а не бра́шном: не у́бо можа́сте, но ниже́ еще́ ны́не мо́жете, еще́ бо пло́тсти есте́. Иде́же бо в вас, рече́, рве́ние, и за́висти, и ра́спря - не пло́тсти ли есте́?». И в су́щем же ко евре́ом, и во мно́гих ме́стех, лука́во и догма́т сию́ у́бо уви́дит кто вину́ глаго́люща: стра́стной бо души́ не мощи́ ве́лие не́что и до́блествено уви́дети, но я́коже от не́коего бельма́ помуща́емей, ту позре́ние претерпева́ти люте́йшее. Да очи́стим у́бо себе́, да просвети́мся светом ра́зума, не се́ем в те́рнии. Что ли те́рнии мно́жество: ве́сте, а́ще и мы не глаго́лем, и́бо мно́жицею слы́шасте Христа́: Печа́ль настоя́щаго жития́ и лесть бога́тства - те́рнии нарица́ющаго и́менем. И в ле́поту: я́коже о́ни безпло́дни, си́це и сия́. Я́коже о́ни каса́ющихся растерза́ют, си́це и сия́ стра́сти. Я́коже удо́бь е́млеми огне́м и ненави́дими де́лателю те́рния, си́це и мирски́я ве́щи. И я́коже [в] те́рниих зве́рие кры́ются, и ехи́дны, и скорпи́и, си́це и в пре́лести бога́тства. Но да воспусти́м огнь Ду́ха, да и те́рния изнури́м, и звере́й да отго́ним, да чи́сту подади́м Де́лателю ни́ву. И по е́же очи́стити, духо́вными сию́ да напои́м исто́чники, да насади́м плодоно́сную ма́слину, кротча́йший сад, присноцвету́щий, просвети́тельный, пита́тельный, здра́во твори́тельный. Сия́ вся ми́лостыня име́ет, я́ко печа́ть су́щу стежа́вшими ю́. Сего́ ниже́ смерть наше́дши изсуша́ет са́да, но стал есть, при́сно просвеща́я мысль, пита́я жи́лы душе́вныя, кре́пость си́льнейшею соде́ловая. А́ще сию́ име́ем вы́ну, возмо́жем со дерзнове́нием и Жениха́ уви́дети, и в неве́стник вни́ти, его́же бу́ди всем нам получи́ти благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва, со Святы́м Ду́хом, во ве́ки веко́в. Ами́нь.

Отвеща́ Иису́с: Ами́нь глаго́лю тебе́: а́ще кто не роди́тся водо́ю и Ду́хом, не мо́жет вни́ти в Ца́рствие Бо́жие.

Де́ти ма́лые, на всяк день ко учи́телем приходя́щая, и прие́млют уче́ния, и отдаю́т: и никогда́ же престаю́т сего́ стяжа́ния, но есть когда́ и но́щи прилага́ют ко днем: и наипа́че о увяда́ющих и привре́менных ве́щех у вас принужа́ются сия́ твори́ти. Но вас, в во́зрасте бы́вших, мы толи́каго не истязу́ем труда́, ели́ко вы дете́й ва́ших. Не на всяк бо день, но два то́кмо дни мо́лим внима́ти глаго́лемым, ма́лей ча́сти дни, я́кобы ле́гку бы́ти вам труду́. Сего́ ра́ди и пома́лу рече́м вам, я́же в Писа́ниих рече́нная, да со удо́бством лет бу́дет прия́ти вам сия́ и в сокро́вищех положи́ти ра́зума. И толи́ко па́мяти твори́м промышле́ние, я́ко мощи́ и возвеща́ти сия́ со опасе́нием вам, ра́зве аще зело́ сонли́в бу́дет и лени́в, и отроча́ти ма́лаго лени́вейши!

Да и́мемся у́бо после́дования напреди́ рече́нных. Никоди́му бо па́дшу, и зде́шне рожде́ние взыску́ющу, и глаго́лющу: «Не мо́щно бы́ти ста́ру роди́тися свы́ше», зри, ка́ко па́ки Христо́с я́вственейше открыва́ет рожде́ния о́браз. Име́ющь бо и си́це неудо́бство душе́вне вопроша́ющему, могу́ще же па́че от смире́ния возвести́ послу́шающаго.

Что бо рече́? «А́ще кто не роди́тся водо́ю и Ду́хом, не мо́жет вн́ити в Ца́рствие Бо́жие». Ты у́бо невозмо́жно сие́ глаго́леши бы́ти. Аз же си́це сие́ зело́ мо́щно бы́ти глаго́лю, я́ко и ну́жно бы́ти. И ниже́ мо́щно и́нако спасти́ся: зело́ бо ну́жная, и удо́бно сотвори́л есть Бог. Земно́е бо рожде́ние е́же по пло́ти от пе́рьсти есть: те́мже и загради́ся, я́же на небесе́х сему́. Что бо о́бще земли́ к небеси́? О́но у́бо, от Ду́ха су́ще, удо́бне нам круги́ отверза́ет. Го́рняя услы́шите, ели́цы есте́ просвеще́ния кроме́: Ужасни́теся, воздохни́те! Стра́шно преще́ние, стра́шно изрече́ние! «Несть, рече́, нерожде́нному водо́ю и Ду́хом вни́ти в Ца́рствие небе́сное». Но Никоди́м ниже́ си́це разуме́, ничто́же бо го́рше е́же к по́мыслом духо́вная попуща́ти. Сие́ и сего́ не попусти́ высо́ко не́что и ве́лие мечта́ти.

Сего́ ра́ди и мы ве́рнии нарица́емся, да по́мысл не́мощь оста́вльше до́лу, к высоте́ ве́ры да взы́дем: и мно́жайше благи́х на́ших уче́нию сему́ да попуща́ем. Е́же а́ще и Никоди́м сотвори́л бы, не бы у́бо ему́ вещь невозмо́жна бы́ти непщева́лася. Что у́бо Христо́с? Отводя́ его́ от разуме́ния сего́ до́лу влеко́маго и показу́я я́ко не о сем бесе́дует рожде́нии, рече́: «А́ще кто не роди́тся водо́ю и Ду́хом, не мо́жет вни́ти в Ца́рство небе́сное». Сия́ же веща́ше, стра́хом преще́ния привлещи́ к ве́ре его́ хотя́, и увеща́ти непщева́ти вещь бы́ти невозмо́жну и е́же о плотско́м рожде́нии мечта́ния оста́вити тща́ся. «Ино́е глаго́лю рожде́ние, рече́, о́ Никоди́ме, что сло́во привлача́еши к земли́? Что естества́ ну́жди вещь подлага́еши? Высоча́йши есть таковы́х рожде́ний. И сие́ рождество́ ничто́же о́бще име́ет к вам. Рожде́ние бо и сие́ глаго́лется: но и и́менем приобща́ется: ве́щию же ра́знствова. Отста́ви себе́ о́бщаго обы́чая. И́но ввожу́ рожде́ние в мир, и́нако хощу́ ражда́тися челове́ком. Стра́нен приидо́х, нося́ соде́тельства о́браз. Созда́х от земли́ и воды́: не бысть потре́бно созда́нное, но разврати́ся сосу́д. Не ктому́ про́чее от земли́ и воды́ созда́ти хощу́, но от воды́ и Ду́ха.

А́ще же кто вопроша́ет: «Ка́ко от воды́?», вопрошу́ и аз: «Ка́ко от земли́?». Ка́ко кал в различны́я ча́сти раздели́ся? Ка́ко у́бо подлежа́щее единови́дно, [земля́ бо бе еди́на,] а я́же от нея́ быва́емая ‐ разли́чно и вся́ческая? Отку́ду ко́сти и жи́лы, и жи́лицы крова́выя? Отку́ду смеше́ния, и сосу́ды де́лательныя, и де́белыя ри́зы, пе́чень, и спли́на, и се́рдце? Отку́ду ко́жа, и кровь, и распале́ние, и желчь? Отку́ду толи́кия де́йства? Отку́ду ша́ры разли́чныя? Сия́ бо не земли́ ниже́ кал. Ка́ко земли́, прие́млющи се́мена, прозяба́ет, плоть же, прие́млющи се́мена, - растлева́ет и гнои́т? Ка́ко земля́ пита́ет влага́емая: плоть же пита́ется от сих, а не пита́ет сих? Земля́, прие́млющи во́ду, вино́ твори́т: плоть мно́жицею прие́млющи вино́ в во́ду преложи́ло есть? Отку́ду у́бо я́ко от земли́ сия́, земли́ сопроти́вне име́ющеся к те́лу по рече́нным? По́мыслом у́бо обрести́ не могу́, ве́рою же еди́ною прие́млю. А́ще у́бо я́же на всяк день быва́ема и осяза́ема ве́ры тре́буют, мно́го па́че неизрече́ннейши сих и духо́внейша. Я́коже бо земля́ безду́шная, неподви́жимая, возмо́же Бо́жиим хоте́нием и толи́ка от нея́ чудеса́ бы́ша. Си́це и Ду́ху и воде́ су́щи, пресла́вная сия́ и по́мысла превосходя́щая удо́бне вся быва́ют. Не бо поне́же не зри́ши не ве́руеши. Поне́же ниже́ ду́шу зри́ши, но оба́че ве́руеши бы́ти ду́шу и име́ти, и бы́ти не́что па́че телеси́. Но Христо́с не от сего́ указа́ния его́ возведе́, но от ино́го. Сие́ бо а́ще и безтеле́сна есть душа́ глаго́лю, сего́ ра́ди не приведе́ ему́, поне́же еще́ дебеле́йше он пребыва́ше, полага́ет и́но указа́ние е́же ниже́ к теле́сной име́ет де́белости, ниже́ в безтеле́сных взы́де естество́. Е́же есть ве́тра ноше́ние. Пре́жде от воды́ начина́ет, тонча́йши у́бо земли́, дебеле́йши я́же ве́тра. Я́коже бо в нача́ле подлежа́ше соста́в земля́, все же Созда́вшаго бе, си́це и ны́не, подлежи́т у́бо соста́в вода́, все же Ду́ха есть благода́ти. И тогда́ у́бо в «ду́шу живу́щу» бысть челове́к, ны́не же «в дух животворя́щь». Мно́го же посре́дство: душа́ бо не ино́му подае́т е́же жи́ти, Дух же не сам живе́т то́кмо, но и ины́м подае́т сие́. Си́це у́бо и ме́ртвых воскреси́ша апо́столи. И тогда́ у́бо тва́ри бы́вши, челове́к по́сле зи́ждется. Ны́не же сопроти́вное: пре́жде бо но́выя тва́ри, челове́к нов соде́тельствуется и пе́рвый сей ражда́ется, и тогда́ мир преобразу́ется. И я́коже изна́чала всеце́ла созда́, си́це и ны́не всеце́ло его́ соде́тельствует. И тогда́ у́бо рече́: «Да сотвори́м ему́ помо́щника». Зде́же ничто́же таково́: и́же бо Ду́ха прие́м благода́ть, кото́раго потре́бует помо́щника ино́го? И́же в те́ло Христо́во соверша́емь, кото́раго име́ет про́чее посо́бие потре́бу? Тогда́ по о́бразу Бо́жию сотвори́л есть челове́ка: ны́не самому́ Бо́гу совокупи́л есть. Тогда́ ры́бам и зве́рем нача́льствовати повеле́: ны́не превы́ше небе́с нача́льство на́ше возведе́. Тогда́ рай даде́ пребыва́ние: ны́не же не́бо нам отве́рзе. Тогда́ созда́ в шесты́й день, поне́же хотя́ше исконча́тися век: ны́не же в пе́рвый день, и в нача́тцех явля́й свет. От ни́хже всех я́вствено [есть], я́ко ины́я жи́зни лу́чшия соверша́емыя бе́ша и устрое́ния конца́ не име́ющаго. Пе́рвое у́бо созда́ние от земли́ е́же Ада́мово: и от ребра́ е́же по о́ном жены́: и от се́мени е́же по сем А́велево. Но оба́че ниже́ еди́наго дости́гнути мо́жем сих, ниже́ предста́вити сло́во быва́емая. А́ще и дебеле́йша су́ща, ка́ко у́бо у́мным е́же креще́нием рожден́ии возмо́жем да́ти испыта́ния, е́же мно́го сих высоча́йша, по́мыслов истяза́ти чу́днаго сего́ и преди́внаго рождества́? Поне́же и а́нгели рожде́нию сему́ быва́ему предста́ша: рещи́ же о́браз не у́бо име́ют чу́днаго сего́ пресла́вно творе́ния. Но предста́ша то́кмо ничто́же у́бо соверша́юще, зря́ще же быва́емая: Оте́ц бо и Сын и Святы́й Дух вся соде́ловает. Повине́мся у́бо изрече́нию Бо́жию: зре́ния бо есть сие́ верне́йше. Зре́ние бо во мно́гих ме́стех и соблажня́ется: о́ному же не мо́щно отпа́сти. Повине́мся у́бо сему́. Е́же бо су́щее от не су́щых приве́дше, достове́рнейше у́бо бу́дет и о естестве́ их бесе́дующе. Что ли у́бо сие́ рече́? Я́ко рожде́ние есть соверша́емое. А́ще же кто глаго́лет: ка́ко?, заусти́ его́ изрече́нием Бо́жиим, е́же есть вели́ко и я́вствено указа́ние. А́щеже кто вопроша́ет: «Что ра́ди вода́ прия́та есть?», - вопроси́м и мы: Что же ра́ди земля́ вся нача́ло в созда́ние челове́ка приведе́ся? Я́ко и земли́ кроме́ сотвори́ти челове́ка возмо́жно бе, вся́ческому я́вствено есть. Но та́мо, рече́, имя́ше от земли́ те́ло, зде же от воды́ ничто́же. Но и зде нема́лу вво́дит вода́ потре́бу. Ничто́же у́бо испыту́й, я́ко бо ну́жна и неотро́чна воды́ потре́ба. Не радя́ше не́когда о Ду́се соше́дшу пре́жде воды́ , не ста до сего́ апо́стол: но я́ко ну́жно и сей, и неизли́шно, и что рече́? «Еда́ во́ду мо́жет кто возбрани́ти е́же не крести́ти сих, и́же Дух Святы́й прия́ша, я́коже и мы?» . Ка́я ли у́бо есть воды́ потре́ба? И сию́ у́же про́чее реку́, та́инство открыва́я вам сокрове́нное. Суть бо не́цыи и ини́и неизрече́ннии словеса́, пре́жде же от мно́гих вам еди́но реку́. Ко́е ли сие́ есть? Боже́ственыя соверша́ются в ней о́бразы: гроб и умерщве́ние, воскресе́ние и живо́т - и сия́ вку́пе быва́ют вся. Я́коже бо в не́коем гро́бе, в воде́ погружа́емым на́шим глава́м, ве́тхий челове́к погреба́ется до́лу и истопля́ется в коне́ц весь, та́же возница́ющим нам но́вый восхо́дит па́ки. Я́коже бо удо́бно крести́тися и возница́ти, си́це удо́бно Бо́гу погрести́ ве́тхаго челове́ка и показа́ти но́ваго. Три́жды же сие́ быва́ет, да навы́кнеши я́ко си́ла Отца́ и Сы́на и Свята́го Ду́ха вся сия́ соверша́ет. И я́ко не уга́дка рече́нное, услы́ши Па́вла глаго́люща: «Спогребо́хомся Ему́ креще́нием в смерть». И па́ки: «Дре́вний наш челове́к сраспя́тся». И па́ки: «Сра́спяни бы́хом подо́бию сме́рти Его́». Не то́кмо же креще́ние крест глаго́лется, но и крест креще́ние: «Креще́нием бо и́мже Аз креща́юся, рече́, крести́теся». И: «Креще́нием име́ю крести́тися, его́же вы не ве́сте». Я́коже бо мы удо́бне погружа́емся и возница́ем, си́це и Той удо́бне, у́мер, егда́ восхоте́, воскре́се: па́че же и мно́го удо́бнейше, а́ще и три дни та́инством не́коего смотре́ния пребы́сть.

Нравоуче́ние два́десять пя́тое: я́ко некреще́ный, а́ще и безчи́сленая име́я исправле́ния у́мрет, в гее́нну отхо́дит:

Толи́ких у́бо та́инств сподо́бльшеся, житие́ да пока́жем досто́йно да́ра, жи́тельство наро́чито. А и́же не у́ сподо́бльшеся, вся де́йствуют я́ко бы сподо́битися, да бу́дем те́ло еди́но, да бу́дем бра́тия. До́ндеже бо по сему́ ра́знствуем, а́ще и оте́ц кто бу́дет, а́ще и сын, а́ще и брат, а́ще и и́же кто ни бу́ди: не у́ сро́дник есть при́сный, е́же свы́ше рожде́нию расте́рзану.

Что бо по́льза от бе́рненаго ро́да совокупля́тися, егда́ духо́внаго совоку́плени не бу́дем? Ко́е же приобрете́ние е́же на земли́ сро́дства, егда́ не небесе́х очужде́ни бу́дем? Чуждь бо ве́рнаго оглаше́нный: не име́ет бо главу́ ту́юже, не име́ет отца́ того́же, не име́ет бо гра́да того́же, ни пи́щу, ни оде́жду, ни трапе́зу, ни хра́мину: но вся премене́на. И́бо я́ вся на земли́ сему́, и вся на небесе́х о́ному: царь сему́ Христо́с, о́ному же грех и дия́вол. Пи́ща сему́ у́бо Христо́с, о́ному же - гри́ющая и растлева́ема. И одея́ние па́ки: сему́ у́бо де́ла че́рвей, о́ному же а́нгельский Влады́ка. Град сему́ у́бо не́бо, о́ному же земля́. Егда́ у́бо ничто́же име́ет о́бще, по чему́ приобща́емся, рцы ми? Но та́яже ли разреши́хом рожде́ния и от еди́ныя проидо́хом утро́бы? Но ничто́же сие́ ко опа́снейшему сро́дству.

Да потщи́мся у́бо го́рняго гра́да бы́ти гра́ждане. Доко́ле в чужде́й стране́ пребыва́ем, потре́бно есть нача́льное оте́чество восприя́ти. Ниже́ бо от прилу́чшихся беда́ есть, но а́ще бу́дет, е́же не бу́дет! , не нача́янному сконча́нию наше́дшу, не креще́нным от зде́шних отъити́: а́ще и безчи́сленая име́ем блага́я, ничто́же нас и́но прие́млет, ра́зве гее́нна, и червь ядови́тый, и огнь негаси́мый, и ю́зы нереши́мыи.

Но не бу́ди не́коему от слы́шащих сия́ о́ною искуси́тися му́кою! Сие́ же [не] бу́дет, а́ще, святы́х сподо́бившеся та́инств, зла́то и сребро́, и ка́мения честна́я назиду́ем по апо́столу на основа́ние. Си́це бо возмо́жем отше́дше та́мо яви́тися бога́ти, егда́ не зде име́ния оста́вим, но принесе́м к некра́домым сокро́вищам рука́ми ни́щих, егда́ взаи́м дади́м Христу́. Мно́го до́лжни есмы́ та́мо: не име́ньми, но грехи́. Дади́м у́бо Ему́ взаи́м име́ния, да восприи́мем грехо́в проще́ние. Той бо есть Судя́й: да не пре́зрим Его́ зде а́лчуща, да и Той там опрепита́ет нас. Зде да облече́м Его, да не оста́вит нас наги́х, от утверже́ния е́же от Него́. А́ще зде Его́ напои́м, не рече́м я́коже бога́тый: «Посли́ Ла́заря, да кра́ем пе́рста прохлади́т язы́к мой пря́жемь». А́ще зде в до́мы на́ша Его́ прии́мем, та́мо мно́ги угото́вит оби́тели нам. А́ще отъи́дем к Нему́ в темни́цы су́щу, и Той нас свободи́т от юз. А́ще стра́нны су́ща собере́м, не пре́зрит стра́нных су́щих нас Ца́рствия небе́снаго, но причасти́т нас гра́да го́рняго. А́ще не́мощна су́ща посети́м, вско́ре свободи́т нас и Той не́мощей на́ших, я́коже у́бо вели́кое прие́млюще и ма́лое даю́ще. Поне́ ма́лое дади́м, да ку́пльствуем вели́кая.

Я́ко еще́ вре́мя, се́ем, да по́жнем. Егда́ зима́ пости́жет, егда́ мо́ре не ктому́ пла́вается: не ктому́ госпо́дие ку́пли сея́ есмы́. Когда́ же бу́дет зима́? Егда́ день предста́нет вели́кий тогда́ он и объявле́нный, тогда́ бо не ктому́ пла́ваем мо́ре вели́кое сие́ и простра́нное.

Сему́ бо настоя́щее уподо́бися житие́. Ны́не е́же се́яти вре́мя: тогда́ е́же жа́ти и приобрета́ти. А́ще кто во вре́мя се́яния не положи́т се́мена, в жа́тву сея́, подсмея́телен бу́дет. А́ще же се́яния есть настоя́щее вре́мя, не е́же собира́ти, но расточа́ти есть вре́мя сие́.

Да расточи́м у́бо, да́же собере́м. Не восхо́щем собира́ти ны́не, да не жа́тву погуби́м. Сие́ бо, е́же рех, вре́мя о е́же се́яти призыва́ет, и расточа́ти, и изнуря́ти. а не о е́же собира́ти и полага́ти. Не у́бо да предади́м бла́го вре́менство, но изоби́льно се́яние да не излага́ем и ни еди́наго же да пощади́м су́щих внутрь, да со мно́гим сия́ восприи́мем воздая́нием и изоби́лием благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва со Святы́м Ду́хом, во ве́ки веко́в. Ами́нь.

[Во дни о́ны рече́ Петр к лю́дем]: Пока́йтеся у́бо и обрати́теся, да очи́ститеся от грех ва́ших. Я́ко да прии́дут времена́ прохла́дна от лица́ Госпо́дня, и после́т пронарече́ннаго вам Христа́ Иису́са. Его́же подоба́ет небеси́ у́бо прия́ти, да́же до лет устрое́ния, я́же глаго́ла Бог усты́ всех святы́х свои́х проро́к от ве́ка.

Толкова́ние Златоу́стаго: Зде бо у́бо о воскресе́нии то́нце бесе́дует, вои́стинну отдыха́ния времена́ бя́ше о́на, я́же иска́ше Па́вел глаго́ля: «И мы су́щии в те́ле ста́нет отягча́еми» . Мно́го бо ре́ша проро́цы бы́ти, я́коже вся еще́ не испо́лнишася , но еще́ быва́ют и бу́дут да́же до сконча́ния ве́ка. Воста́в бо, рече́, Спас из ме́ртвых, вознесе́ся на не́бо и пребыва́ет та́мо да́же до сконча́ния ве́ка, приити́ хотя́ тогда́ с си́лою и сла́вою благоле́пною суди́ти живы́м и ме́ртвым. Те́мже иде́же глаго́лет «да́же до вре́мени устрое́ния», не до того́же устрое́ния вре́мени назна́менает и ктому́ несть, да не бу́дет: Безсме́ртен бо и Присносу́щен есть Бог. Но я́коже ре́хом, «приити́ хо́щет тогда́ с си́лою и сла́вою мно́гою», устро́енным су́щим про́чее всем, и́хже пронареко́ша проро́цы, си́речь, егда́ прии́дет коне́ц и преста́нут чу́вствия, тогда́ Христо́с бу́дет небе́с превы́шши: не на небеси́ устро́ен бу́дет, но превы́ше небе́с, в ню́же сла́ву имя́ше от Отца́, пре́жде ве́ку не бы́ти .

Су́щее: Моисе́й у́бо ко отце́м рече́: «Я́ко проро́ка вам воздви́гнет Госпо́дь Бог вам от бра́тии ва́шея, я́коже мене́ Того́ послу́шайте о всем, ели́ка а́ще речет к вам».

Толкова́ние Кири́ллово: Проро́к нарече́н бысть вочелове́чения ра́ди Госпо́дь наш Иису́с Христо́с, И́же бысть по чи́ну Моисе́ову хода́тай Бо́гу и челове́ком и простира́я к нам Отца́ Своего́ неизглаго́ланный сове́т.

Толкова́ние Златоу́ста: Е́же глаго́лет «я́ко проро́ка воздви́гнет Госпо́дь Бог ваш от бра́тии ва́ших я́ко мене́», проро́ка нари́чет Го́спода вочелове́чения ра́ди, и не по естеству́, но по де́ланию сие́ приима́ти досто́ит, никто́же [бо] от проро́к законода́вец бысть от Моисе́я до Христа́. Того́ ра́ди Моисе́й глаго́лет «я́ко мене́», явля́я я́ко не то́чию проро́к, но и законоположи́тель прише́дый бу́дет. Не то́чию же Моисе́й, но и про́чии проро́цы е́же к челове́ком Его́ провозвести́ша прише́ствие: назна́менаша у́бо о́браз рожде́ния, я́ко от Де́вы и ме́сто, я́ко от Вифлие́ма, и вре́мя е́же на земли́ пребыва́ния Его́, ели́ка соде́я, о́чи глаго́люще отве́рсти слепы́м, и и́на вся богодея́ния, и ели́ка постра́дати хотя́ше от нечести́вых, и смерть Его́, и воскресе́ние, [и вознесение].

Того́же Златоу́стаго: И па́ки что есть «я́ко мене́»? Моисе́й ражда́ется в Еги́пте, убие́ным же бы́вшим евре́йским младе́нцем от фарао́на. Взят ма́ти его́ и сотво́ршися я́ко не су́щи ма́ти его́, но чу́жда, ковче́жец сотво́рши и смоло́ю пома́завши, метну́ с бре́га реки́ и про́чая. Госпо́дь наш Иису́с Христо́с, вторы́й Моисе́й, уподобля́ется Моисе́ю в при́тчи и се́ни, И́стинна, Влады́ка рабу́, созда́нию Созда́тель, земно́му Безнача́льный. Се бо Моисе́й предвозве́сти, нера́вен ся творя́ Влады́це раб, не Творцу́ творе́ние, не Созда́телю созда́ние, не Хитрецу́ бре́ние, но вре́мени вре́мя уподобля́я. И не существо́м, но вещьми́ глаго́лет «я́ко мене́», а́ще бо существо́м глаго́лал бы, не еди́н воста́, но мно́зи до сего́. И глаго́лет и́стинну, сень воспису́я и начина́я челове́ческая, предустроя́ющу Бо́жию смотре́нию. Ражда́ется в Вифлее́ме Христо́с, я́коже Моисе́й во Еги́пте. И израильтяни́н бысть Моисе́й, и Христо́с по пло́ти от ро́да Дави́да. Фарао́н тогда́ младе́нца убива́ет, и И́род младе́нцы изби́. Ма́терию спаса́ется от сме́рти Моисе́й, в ковче́зе в реку́ вме́тнут бысть, и Госпо́дь с ма́терию бе́гает от И́рода. В ковче́зе Моисе́й в реку́ вме́тнут бысть, и Госпо́дь при то́йже реце́ в Еги́пте бысть. От иноплеме́ницы жены́ Моисе́й пита́шеся, и Христо́с при то́йже реце́ во гра́де еги́петстем пита́шеся.

Су́щее: Бу́дет же вся́ка ду́ша я́же а́ще не послу́шает проро́ка того́, потреби́тся от люде́й. И вси же проро́цы от Самуи́ла и про́чих. Ели́цы глаго́лаша и возвести́ша дни сия́.

Толкова́ние Златоу́стаго: Безсме́ртна су́щи душа́ челове́ческая, не еди́ною потреби́тся со всем, но от не́коего чи́на блага́го, иде́же бе счета́на пре́жде. Си́це Иу́да потреби́лся есть от ли́ка апо́столькаго.

Су́щее: Вы есте́ сы́нове проро́к и заве́та, и́миже завеща́ Бог ко отце́м ва́шим, глаго́ля ко Авраа́му. И о се́мени его́ возблагословя́тся вся оте́чествия земна́я. Вам пе́рвее Бог воздви́г о́трока своего́ Иису́са. По́сле Его́ благословя́ща вас, отврати́тися кому́ждо от злоб свои́х.

Толкова́ние Златоу́стаго: «Вы есте́ сы́нове проро́к» рече́, си́речь, я́ко вам глаго́лах и вам ра́ди вся бы́ша. Поне́же у́бо Христа́ распя́ша иуде́и, мня́хуся отчужде́ни бы́ти. Ны́не па́ки я́коже свои́х прия́т их, зане́ и о́но по проро́честву бысть. И се: «и заве́та его́же завеща́ Бог сы́нове [есте́]» рече́, си́речь, насле́дницы. Да не у́бо мнят я́ко благода́тию Петро́вою сия́ хоте́вше приима́ти, показу́ет я́ко изнача́ла им до́лжно бя́ше, да па́че ве́руют, я́ко изволе́нием Бо́жиим се есть. И Моисе́я приво́дит глаго́люща, я́ко вся бу́дут е́же рече́ Христо́с. Та́же и́нако похваля́ет их глаго́ля: «Сы́нове проро́к и заве́та су́ще», си́речь, насле́дницы вы, я́ко о тужди́х ва́ших прилежите́. А́ще бо и досто́йна осужде́нию соде́ясте, мо́жете поми́лование получи́ти: «Вам пре́жде, рече́, воздви́же О́трока Своего́». Посла́, а́ще и ине́м, но к вам пре́жде, от распе́шних Его́: «Благословя́щая вы», рече́, «возвраща́тися, рече́, кому́ждо вас от злоб свои́х». Не рече́ про́сто: «вам посла́ О́трока Своего́», но и по воскресе́нии, и егда́ ра́спят бысть, толи́ко рече́ отстоите́ приобще́ния сих, я́ко и ине́х вам вино́вны нача́льники хо́щет бы́ти. Коне́ц толкова́нию.