Пятница третьей седмицы по Пасхе

Не посла́ бо Бог Сы́на Своего́ да су́дит ми́ру, но да спасе́т ми́ра:

Мно́зи от лени́вейших, в грехо́в вели́чество и ле́ности премно́жество человеколю́бием Бо́жиим де́йствующе, сия́ веща́ют глаго́лы: Несть гее́нна, несть му́ка, вся Бог оставля́ет нам грехи́. И́хже зауща́я прему́др не́кто муж рече́: «Да не рече́ши: щедро́тство Его́, мно́го мно́жество грехо́в мои́х очи́сти; зане́ ми́лость и гнев у Него́, и на гре́шных почива́ет я́рость Его́» , «По мно́жеству ми́лости Его́, мно́го и обличе́ние Его́» .

Где у́бо, рече́, я́же человеколю́бия, а́ще я́же по досто́инству восприи́мем грехо́в? Я́ко у́бо яже по досто́инству восприи́мем, слы́ши проро́ка и Па́вла глаго́люща: о́вого у́бо «Я́ко Ты возда́си кому́ждо по дело́м его́» , о́вогоже «И́же возда́ст кому́ждо по дело́м его́» . А я́коже и си́це мно́го человеколю́бие Бо́жие, и сие́ отсю́ду я́вствено: в две бо жи́зни ве́чныя на́ша ве́щи раздели́в Бог: и настоя́щаго, и бу́дущаго живота́; и о́вого у́бо в чи́ну по́двигов, о́вого же в ра́дости венцо́в сотвори́в бы́ти, мно́го и от зде показа́ человеколю́бие. Ка́ко ли и кото́рым о́бразом? Соде́яхом мно́га и лю́та согреше́ния, и не оскуде́хом от ю́ности в после́днюю страсть безчи́слеными злы́му ду́шу оскверня́юще - ни еди́ного же от сих истяза́ от нас вин грехо́вных, но даде́ их оставле́ние ба́нею пакибытия́, и пра́вду, и освяще́ние дарова́. Что у́бо рече́, и́же от пе́рваго во́зраста та́инств сподо́бивыйся, и по сих безчи́сленое согреша́ем? И се́й у́бо бо́льшия му́ки досто́ин. Грехо́в бо свои́х не та́яже стра́ждем ка́зни, но мно́го люте́йшая, егда́ по тайноуче́нию согреши́м. И явля́ет Па́вел, си́це глаго́ля: «Отве́ргся кто зако́на Моисе́ова без ми́лости при двою́ или трие́х свиде́телех умира́ет, коли́ко мни́те бо́льшия сподо́битися му́ки, и́же Сы́на Бо́жия попра́в и Кровь заве́т о́бщу непщева́в и благода́ть Ду́ха укори́в?» . Бо́льшия у́бо бу́дет му́ки досто́ин таковы́й. Но оба́че и сему́ покая́ния отве́рзе две́ри, и мно́гими о́бразы даде́ отмы́ти прегреше́ния. Сия́ у́бо помы́сли, коли́ка человеколю́бия указа́ния - е́же и благода́тию оста́вити, и по благода́ти согреши́вшаго и досто́йна су́ща му́ки не му́чити, но да́ти вре́мя и завеща́ние отве́та. Сих ра́ди всех Христо́с к Никоди́му глаго́лаше: «Не посла́ Бог Сы́на своего́ да су́дит ми́ру, но да спасе́т ми́ра». Два бо суть Христо́ва прише́ствия: у́же бы́вшее, и бу́дущее. Но не о те́хже о́ба: но пе́рвое у́бо бысть не я́ко да истя́жет соде́ланное на́ми, но да оста́вит; вто́рое же - не я́ко да не оста́вит, но я́ко да истя́жет. Сего́ ра́ди о пе́рвом у́бо рече́: «Не приидо́х да сужу́ ми́ру, но да спасу́ ми́ра», о второ́м же: «Егда́ прии́дет Сын Челове́чь во сла́ве Отца́ Своего́, поста́вит у́бо овца́ от десны́х, ко́злища же от шу́их» и ели́ки ины́я таковы́я рече́ при́тчи, и́бо и пе́рвое прише́ствие, суда́ бе по пра́ведного сло́ву.

Что ли ра́ди? Я́ко пре́жде прише́ствия Его́ зако́н бе есте́ствен, и проро́цы, и пи́санный па́ки зако́н, и уче́ния, и безчи́сленныя обе́ты и зна́мений показа́ния, и му́ки, и томле́ния, и мно́га и́на исправля́ющая нас - и после́довательна бе сих всех истяза́ти вины́.

Но поне́же Человеколю́бец есть - не твори́т истяза́ние, но проще́ние сих. Поне́же а́ще сие́ сотвори́л бы, вси внеза́пу восхи́тили бы ся. «Вси бо согреши́ша, рече́, и лиша́ются сла́вы Бо́жия» . Ви́дел ли еси́ человеколю́бия неизрече́нное премно́жество? [«Ве́руяй Вонь несть осужде́н: а неве́руяй уже́ осужде́н есть, я́ко не ве́рова во и́мя Единоро́днаго.»] И у́бо а́ще не сего́ ра́ди прише́л бы да су́дит ми́ру, ка́ко неве́руяй у́же осужде́н есть, а́ще не у́ предста́ суда́ вре́мя? Или́ сие́ у́бо рече́ я́ко е́же не ве́ровати не раска́янна му́ка есть, е́же бо кроме́ бы́ти све́та и посему́ вели́ко име́ет муче́ние. Или́ е́же бу́дущее провозглаша́ет. Я́коже бо уби́вый и а́ще и не судо́м судя́щаго осужде́н бу́дет, естество́м ве́щи осужде́н есть - си́це и неве́рный. Поне́же и Ада́м во́ньже день яде́ от дре́ва у́мре, си́це бо изрече́ния имя́ше: «Во и́же день я́сте от дре́ва, у́мрете» . А́ще и живя́ше, ка́ко ли у́бо у́мре? Изрече́нием и ве́щи естество́м. И́же бо пови́нна себе́ му́це сотвори́в - под муче́нием есть, а́ще и не ве́щию еще́, но судо́м. Да́же бо не услы́шав кто «я́ко не приидо́х суди́ти ми́ру» без муче́ния вознепщу́ет согреша́ти и лени́вейшь бу́дет, и сие́ обраща́ет ле́ность глаго́ля: «Уже́ осужде́н есть». Поне́же у́бо имя́ше суд и не близ бе, близ приво́дит стра́ха томле́ния и показу́ет уже́ му́ку. И сие́ же самое́ мно́гаго человеколю́бия есть, е́же не то́кмо да́ти Сы́на, но и вре́мя суда́ отложи́ти, да бу́дет о́бласть согреши́вшим и неве́рующим отмы́ти прегреше́нная.

«Ве́руяй в Сы́на не осу́дится». Ве́руяй, а не испыту́яй. Ве́руяй, а не многоистязу́яй. Что у́бо а́ще нечи́сто житие́ име́ет и дея́ния небла́га? Наипа́че у́бо таковы́х ниже́ при́сных бы́ти ве́руя И́ Па́вел рече́: «Бо́га бо испове́дают ве́дети, де́лы же отме́щутся» .

Оба́че зде оно́ рече́, я́ко по сему́ и́стому не осу́дится, но дел у́бо люте́йшую постра́жет казнь; неве́рияже ра́ди не му́чится за е́же ве́ровати еди́ною. Зри́ши ли, ка́ко от стра́шных начина́я в то же па́ки сло́во сконча́? Начина́я бо рече́. «А́ще кто не роди́тся водо́ю и Ду́хом, не вни́дет во Ца́рствие Бо́жие». Зде́же па́ки: «Не ве́руяй в Сы́на уже́ осужде́н есть». Не у́бо вознепщу́еши, рече́, отложе́ние по́льзовати что, пови́ннаго у́же бы́вшаго, а́ще не преложи́тся, и́же бо уже́ осужде́н бысть и му́чимых ничто́же отра́днее пребыва́ет, не ве́ровавый.

«Сей же есть суд, зане́ прии́дет свет в мир, и возлюби́ша челове́цы па́че тму не́же свет». А е́же глаго́лет, таково́ есть: сего́ ра́ди му́чатся, зане́ тму оста́вити и к све́ту притещи́ не восхоте́ша. Зде же бо про́чее и отве́та вся́кого их лиша́ет.

А́ще бо прише́л бых му́ча, рече́, и истязу́я вины́ соде́янных, име́ли бы рещи́: Я́ко сего́ ра́ди отскочи́хом. Ны́не же приидо́х свободи́ти от тмы и к све́ту привести́. Кто у́бо нехотя́щаго от тмы к све́ту приити́ поми́лует? Ничто́же бо име́юще нам порица́ти, но тма́ми благоде́тельствуеми, рече́, отска́чут нас. Сие́ и и́нде глаго́лаше: «Я́ко возненави́деша мя ту́не», и па́ки: «А́ще не бы прише́л и глаго́лал им, греха́ не бы́ша име́ли». И́же бо в небытии́ све́та во тме седя́, не́гли у́бо проще́ние име́ти бу́дет. А и́же по прише́ствии его́ тме приседя́, развраще́ннаго ра́зума и любопри́тельнаго зна́мение изно́сит на себе́. Та́же поне́же ви́дяшеся рече́нное неве́рно бы́ти мно́гим, [никто́же бо тму препочте́т све́та,] полага́ет и вину́, от нея́же сие́ пострада́ша. Ка́я же ли сия́ бе?

Ева́нгелие: Бе́ша бо, рече́, лука́ва их дела́, всяк же зла́я дела́яй ненави́дит све́та, и не прихо́дит к све́ту, да не явя́тся его́ дела́.

Толкова́ние: Не у́бо судя́ ниже́ истязу́я приидо́х, но проща́я и оставля́я согреше́ния, и от ве́ры спасе́ние дая́: ка́ко у́бо сего́ ра́ди бежа́ша? А́ще бо суди́лище прише́л посади́л бы, име́ло бы не́кое сло́во рече́нное. И́же бо лука́вое све́дый себе́, осужда́ющаго бе́гати обы́че; проща́ющему же и притека́ют согреши́вшии. А́ще у́бо проща́я прии́де, к сему́ наипа́че притека́я ти ле́по бе, мно́гая све́дящим себе́ прегреше́ния. Е́же у́бо и о мно́гих бысть: и́бо мытари́ и гре́шницы прише́дша, возлежа́ху со Иису́сом.

Что ли у́бо есть глаго́лемое? О изъявля́ющих вы́ну в зло́бе пребыва́ти сия́ рече́, той бо сего́ ра́ди прии́де, да пре́жняя у́бо оста́вит прегреше́ния, к бу́дущим же утверди́т. Поне́же суть не́цыи си́це осла́би и разреше́ни к доброде́тельным трудо́м, я́ко и в после́днее издыха́ния хоте́ти присе́дети зло́бе и никогда́же ея́ отступа́ти, сим руга́яся зде рече́. Поне́же бо христиани́н с пра́востию догма́т и жи́тельства здра́ваго истя́зан бу́дет, боя́тся, рече́, приложи́тися к нам, поне́же не хотя́т житие́ пра́во показа́ти.

В е́ллинстве бо живу́щаго, никто́же у́бо обличи́т вско́ре: и́же бо бого́в таковы́х име́я, праз́дники подо́бни бого́м студны́ и подсмея́тельны, - досто́йная догма́т и де́ло показу́ет. А и́же Бо́жии ле́ностно живу́ще, всех истязу́ющих име́ют и оглаго́лющих: толи́ко и от враго́в и́стинно есть чу́до!

Зри у́бо ка́ко со опасе́нием полага́ет вся. Не рече́ бо «де́йствуя зла́я не прихо́дит ко све́ту», но «де́йствуяй при́сно»: си́речь, и́же при́сно хотя́ оскверня́тися ка́лом поги́бели, не хо́щет зако́ном себе́ подложи́ти Мои́м, но, вне пребыва́я, блуди́т со осла́бою и ина́я вся де́йствует возбране́ная. Зде бо прише́д, я́ко во све́те тать объявле́н быва́ет: сих ра́ди нача́льства бе́гает Моего́. Мно́гих у́бо есть слы́шати е́ллин глаго́лющих: с его́ ра́ди не мощи́ к ве́ре ва́шей приступи́ти, за е́же не мощи́ пия́нства и блу́да и таковы́х отступи́ти прегре́шений.

Что у́бо, рече́, не суть ли христиа́не зла́я де́йствующеи и е́ллини в любому́дрии живу́ще? Христиа́не у́бо я́ко зла́я де́йствующеи суть, вем и аз. А́ще же и е́ллини пра́ве живу́ще: сие́ не ктому́ вем я́вствене. Не у́бо ми от естества́ рече́ши кро́тких и укра́шеных, несть бо сие́ доброде́тель! Но рцы мно́гу ну́жду от страсте́й претерпева́ющаго и любому́дрствующаго - но не у́бо име́еши. А́ще бо Ца́рствия обеща́ние, и гее́нны преще́ние, и и́но попече́ние толи́кое едва́ держа́т челове́ков в доброде́тели, упражне́ние бо, и́же о ни еди́ном же сих уве́рили прохо́дят доброде́тель. А́ще же не́цыи и лицеме́рствуют, сла́вы ра́ди сие́ творя́т. Творя́й же сла́вы ра́ди сие́, егда́ леть бу́дет утаи́тися, не пощади́т е́же де́йствовати вожделе́ньми лука́выми.

Но оба́че да не возмни́мся не́ким бы́ти любопри́тель, ни, да попу́стим пра́ве живу́щим бы́ти в е́ллинех: никогда́ же бо сие́ спротивля́ется сло́ву. Е́же бо на мно́зе случа́ется, рече́, а не ре́тко быва́емое.

Зри же ка́ко отъину́ду вся́кого лиша́ет их отве́та. Рек я́ко «прии́де свет в мир». Еда́ бо са́ми, рече́, его́ взыска́ша? Еда́ бо труди́шася? Еда́ боле́зноваша да обря́щут? Сам свет прии́де к ним, и ниже́ си́це притеко́ша. А́ще же не́цыи и от христиа́н бу́дут лука́ве живу́ще, о́но у́бо рече́, зане́ не о и́же изнача́ла бы́вше христиа́нех и от прароди́тели науче́нных благоче́стию сие́ рече́, [а́ще и я́же наипа́че и си́и мно́жицею от жития́ лука́вых от опа́ства догма́т поколеба́шася;] но оба́че не о сих ему́ мню глаго́лати, но о су́щих от е́ллин или́ иуде́й до́лжных су́щих пра́вой приложи́тися ве́ре. Показу́ет бо, я́ко никто́же у́бо изво́лит в заблужде́нии живы́й к ве́ре приити́, не пе́рвее подписа́в себе́ житие́ пра́во; и никто́же у́бо в неве́рии пребу́дет, не пе́рвее изво́лив вы́ну бы́ти зол. Не у́бо мне сие́ рече́ши, я́ко целому́друет и [не] похища́ет: не сия́ у́бо еди́на суть доброде́тель. Что бо по́льза, егда́ сия́ у́бо име́ет, сла́вы же тщи́я бу́дет раб и друго́в дру́жбою стыдя́ся в заблужде́нии пребыва́ет? Сие́ бо несть пра́ве жи́ти. И́же бо сла́вы раб, блудя́щаго не ме́ньши есть: си́це мно́го вя́щшая и люте́йшая соде́ловает о́ного зла́я. Но рцы мне не́коего всех свобожде́на страсте́й и вся́кия зло́бы свобо́дна, и пребыва́юща в е́ллинех: но не у́бо и́маши. И́бо и́же вели́кое у них кича́щеся, и име́ний, и чре́во преодолева́юще я́коже рече́ - сла́ве наипа́че всех челове́к поработи́шася, е́же всех есть вино́вна. Си́це иуде́и пребы́ша, е́же и порица́я им глаго́лаше: «Ка́ко мо́жете ве́ровати, сла́ву от челове́к прие́млюще?». И что у́бо Нафана́илу, ему́же и и́стинну свиде́тельствовав, не бесе́дова о сих, ниже́ простре́ сло́во добро́? Я́ко ниже́ он с толи́ким прии́де тща́нием. Сей бо сие́ де́ло положи́, и е́же ини́и вре́мя упокое́ния имя́ху, сие́ вре́мя се[й] послуша́ния творя́ше. О́н же, от о́ного уве́рився, дости́же. Оба́че ниже́ о́ного претече́. Ко о́ному бо рече́:

Ева́нгелие: Отны́не у́зрите небеса́ отве́рсты и а́нгелов Бо́жиих, восходя́щих и нисходя́щих:

Толкова́ние: Сему́же сих у́бо ничто́же рече́, о смотре́нии же и ве́чном животе́ бесе́дует, разли́чне коему́ждо к произволе́нию подлежа́щему веща́я.

О́ному у́бо, поне́же и проро́ческая ве́дяше, и ниже́ боя́знен си́це бе, довля́ше толи́ко услы́шити то́кмо. Сей же, поне́же у́бо боя́знию еще́ держа́шеся, я́вствене у́бо ему́ все не откры́. Потрясе́ же его́ ра́зум, я́ко бы стра́хом стра́ха отри́нути, неве́рующе ему́же глаго́ля осуди́тися, и е́же не ве́ровати от лука́выя бы́ти со́вести. Поне́же бо и я́же от челове́к сла́вы мно́го творя́ше сло́во, и сея́ па́че, не́жели му́ки. «Мно́зи бо рече́ от челове́к ве́роваху в Него́, иуде́й же ра́ди не испове́даху» . И от сея́ его́ каса́ется глаго́ля, я́ко не мо́щно есть Мне неве́рующему за и́но что не ве́ровати, но ра́зве за е́же житие́ име́ти нечи́сто.

И происходя́ у́бо рече́: «Аз есмь свет ми́ру», зде же: «Прии́де свет в мир». В нача́тцех бо спокрове́нне па́че веща́ше, происходя́ же - я́вственейше. Но оба́че от сла́вы челове́к держа́шеся мно́гих: те́мже у́бо ниже́ дерза́ти сме́яше, я́коже подоба́ше.

Нравоуче́ние два́десять осмо́е: О тщесла́вных:

Да бежи́м у́бо тщесла́вия: сия́ бо есть страсть всех томи́тельнейши. Отсю́ду лихоима́ние и име́ний жела́ние. Отсю́ду не́нависть, и ра́ти, и бра́ни. И́же бо мно́жайшаго жела́я, нигде́же ста́ти возмо́жет. Жела́ет же ниотку́ду ину́ду, но [от] е́же сла́вы жела́ти тщи́я. Что бо ра́ди, рцы ми, мно́жеством е́внухов и пле́нников, ста́дом и мно́гым мно́зи облага́ются мечта́нием? Не потре́бы ра́ди, но о е́же сведе́телей име́ти безвре́меннаго сего́ мечта́ния срета́ющих. А́ще у́бо сию́ отсече́м со главо́ю, и про́чая зло́бы отъи́мем у́ды, и ничто́же возбраня́ет на земли́ си́це нам я́коже на небеси́ жи́ти. Ниже́ бо к зло́бе то́кмо порева́ет я́тых, но и доброде́телем приуподо́бися. И егда́ нас отту́ду отри́нути не возмо́жет, в само́й доброде́тели мно́гу тщету́ соде́ловает, труды́ у́бо претерпева́ти принужда́ющи, плодо́в же лиша́ющи. И́же бо к сей зря, и постя́ся, и моля́ся, и ми́луя - погубля́ет мзду свою́. Что сея́ тщеты́ окая́ннейше бу́дет у́бо, но ра́зве егда́ случи́тся сокруша́тися ту́не и всу́е, и подсмея́тельну бы́ти, и го́рняя отпа́сти сла́вы? Несть бо обои́х жела́ющему, обои́х получи́ти. Получи́ти бо есть обои́х, егда́ не обои́х, но еди́ныя жела́ет су́щия от небе́с. Обои́х же жела́ющему: несть обои́х получи́ти. Те́мже а́ще хо́щем сла́вы получи́ти, да бежи́м челове́ческия сла́вы и су́щия от Бо́га еди́ныя да жела́ем. Си́це бо сея́ и о́ноя получи́м, ея́же бу́ди всем нам наслади́тися благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, во ве́ки веко́в. Ами́нь.

Изы́де же во иудейскую зе́млю, Сам и ученицы́ Его́, и та́мо пребыва́ше с ни́ми и креща́ше:

Ничто́же и́стинны я́вственнейше и крепча́йше бу́дет у́бо, я́коже лжи ничто́же немощне́йше, а́ще и безчи́слеными покрове́ньми спокрыва́ется. - удо́бь уловля́ема бо, и си́це быва́ет и истека́ет удо́бне. И́стинна же обнажена́ предлежи́т всем, хотя́щим ея́ красоту́ созира́ти; и ниже́ утаи́тися хо́щет, ниже́ беды́ убоя́ся, ни наве́товав трепе́щет, ни сла́вы жела́ет я́же от мно́гих, ни ино́му не́коему челове́ческих есть пови́нна, но всех стои́т вы́шши, прие́млющи у́бо безчи́сленныя наве́ты, пребыва́ющи же неодолева́ема, и и́же к ней прибега́ющих я́коже во утвержде́нней стене́ храня́щи вели́чеством своея́ си́лы, и та́йныя у́бо отвраща́ющи захоже́ния, всем же на среду́ предлага́ющи я́же от себе́. Сие́ у́бо и Христо́с Пила́ту бесе́дуя явля́ше, глаго́ля: «Аз всегда́ дерзнове́нием учи́х и в та́йне глаго́лах ничто́же» . Сие́ и тогда́ рече́, и ны́не соде́ла.

Ева́нгелие: По сих бо рече́ изы́де во иуде́йскую зе́млю Сам и ученицы́ Его́, и та́мо пребыва́ше и креща́ше. Бе же Иоа́нн крестя́ во Ено́не, близ Сали́ма, зане́ во́ды мно́ги бе́ша та́мо: и прихожда́ху, и креща́хуся.

Толкова́ние: В пра́здники у́бо во град восхожда́ше, я́ко бы на среду́ им предложи́ти догма́ты и ю́же от чуде́с по́льзу. А по е́же разреши́тися пра́здником, на Иорд́ан мно́жицею идя́ше, поне́же и зде мно́зи стека́хуся. Мно́го стужа́ющих же при́сно достиза́ше мест, не показу́яся, ниже́ тщесла́вяся, но мно́жайшим ю́же подая́ти от себе́ по́льзу тща́ся. И́бо происходя́, рече́ ева́нгелист, я́ко [не] Иису́с креща́ше, но ученицы́ Его́. Отню́ду же я́вствено я́ко и зде сие́ рече́, зане́ они́ креща́ху еди́ни.

И что ра́ди Сам не креща́ше, предвари́в Иоа́нн рече́: «Я́ко Той вас крести́т Ду́хом Святы́м и огне́м» . Дух же не у́ бе дан - в ле́поту у́бо не креща́ше. Ученицы́ же сие́ де́йствоваху, хотя́ще мно́гих приводи́ти спаси́тельным уче́нием. И что у́бо, ученико́м Иису́совым креща́ющим, не преста́ Иоа́нн сие́ творя́, но пребы́сть той креща́я, и да́же до введе́ния во юзи́лище сие́ де́йствоваше? Е́же бо рещи́:

Ева́нгелие: Не у́ вве́ржен в темни́цу Иоа́нн.

Толкова́ние: Явля́ющаго бе, я́ко до тогда́ не преста́ креща́я. Что у́бо ра́ди до тогда́ креща́яше? И́бо честне́йших изъяви́л бы ученико́в Иису́совых, а́ще у́бо оне́м наче́ншим, той преста́л бы. Что ли у́бо ра́ди той креща́ше? Да не свои́х ученико́в во мно́жайшую ре́вность приведе́т и любопри́тельнейших соде́лает. А́ще бо тма́ми вопия́ и пе́рвство при́сно Христу́ попуща́я, и толи́ко себе́ охужа́я, не увеща́ их к нему́ притещи́, а́ще и сие́ приложи́л бы - мно́го любопри́тельнейших сотвори́л бы. Сего́ ра́ди и Христо́с тогда́ наипа́че нача́т пропове́дати, егда́ от среды́ Иоа́нн бысть. Мню же и сего́ ра́ди попусти́ти сконча́ние Иоа́нново скоре́йше бы́ти ему́, я́ко бы всему́ мно́жества изволе́нию на Христа́ прейти́ и не ктому́ о обои́х себе́ раздира́ти ра́зумы. Кроме́ же сих, и внегда́ креща́ти не преста́ ча́сте наказу́я, и вели́кая и че́стная показу́я Иису́сова. Креща́ше бо ничто́же и́но глаго́ля, ра́зве «в Гряду́щаго по нем да ве́руют» . И́же у́бо сие́ пропове́дуя, ка́ко у́бо честне́йших изъяви́л бы ученико́в Христа́? Преста́в бо, сопроти́вное возмне́л бы ся, за́вистию или́ гне́вом сие́ твори́ти. А е́же пребы́ти пропове́дующу, крепча́йше сия́ изъяви́л есть. Не себе́ бо сла́ву стяжева́ше, но Христу́ посыла́ше послу́шающих, и не ху́жше ученико́в ему́ соде́ловаше, но и мно́го па́че, ели́ко и незазо́рно сие́ сведе́тельство бе. И мно́гу бо́льше сла́ву от всех имя́ше оне́х, е́же у́бо и Матфе́й евангели́ст гада́тельствуя глаго́лаше: «И я́ко исхожа́ху и креща́хуся к нему́ иерусали́мляне, и Иуде́я вся, и окре́стная Иорда́нова. И креща́хуся во Иорда́не от него́, испове́дующе грехи́ своя́». И ученико́м же креща́ющим не оскудева́ху мно́зи к нему́ теку́ще. А́ще же кто истя́жет: и что вя́щше имя́ше креще́ние ученико́в Иоа́ннова? Рече́м, я́ко ничто́же. Обоя́ бо подо́бне я́же от Ду́ха благода́ти неприча́стны бе́ша, и вина́ еди́на обои́м бе е́же креща́ти - е́же Христу́ приводи́ти креща́емых. Да́же бо не при́сно о́бще ка́юще си́це собира́ют до́лжных ве́ровати: е́же о Си́моне брат сотвори́, и о Нафана́иле Фили́пп - креще́нию настава́ху, я́ко бы тем всех отводи́ти безтру́дно и бу́дущей ве́ре предпутие́ твори́ти. Я́коже ничто́же вя́щше имя́ху между́ собо́ю креще́ния, содержа́щаяся явля́ют. Ка́я ли у́бо сия́?

Ева́нгелие: ⷠ҇ⷠ҇Бысть рече́ взыска́ние от ученико́в Иоа́нновых со иуде́и о очище́нии.

Толкова́ние: Зави́стне бо име́юще при́сно ко ученико́м Христо́вым ученицы́ Иоа́ннови, и к Самому́ Христу́. Поне́же ви́дяху их креща́ющых, нача́ху же бесе́довати ко креща́емым, я́ко креща́емому от них вя́щше не́что ученико́в Христо́вых име́ющу, и прие́мше еди́ного от креще́ных, начина́ху сего́ увеща́ти, но не увеща́ша. Я́ко бо си́и притека́ющии суть, а не он взыска́ – услы́ши, ка́ко сие́ евангели́ст назна́мена. Не рече́ бо «иуде́янин не́кто с ни́ми взыска́», но я́ко «взыска́ния от ученико́в Иоа́нновых бысть со иуде́янином не́коим о очище́нии». Смотри́ же ми и неско́рбное евангели́ста: не тя́жестне бо де́йствоваше сло́вом, но ели́ка си́ла утека́ет согреше́ния, «взыска́нию» бы́ти про́сте глаго́ля. Поне́же я́ко у́бо от за́висти глаго́лаша глаго́лемая, про́чее явля́ют, я́же и сия́ неско́рбне положи́.

Ева́нгелие: Приидо́ша бо рече́ ко Иоа́нну и глаго́лаху: Учи́телю! И́же бе с тобо́ю об о́ну страну́ Иорда́на, Ему́же ты свиде́тельствовал еси́ - се Сей крести́т, и вси гряду́т к Нему́.

Толкова́ние: Си́речь, «Его́же крести́л еси́ ты» - сие́ бо гада́тельствуют глаго́люще: «Ему́же ты свиде́тельствовал еси́», си́речь «Его́же ты све́тла показа́л еси́ и обозри́тельна сотвори́л еси́, та́яже тебе́ дерза́ет». Но не ре́ша «Его́же ты крести́л еси́». Вои́стинну бо прину́дилися бы, и гла́са воспомяну́ти снесе́ннаго свы́ше, и Ду́ха наше́ствия. Но я́ко «И́же бе с тобо́ю об он пол Иорда́на, Ему́же ты свиде́тельствовал еси́», си́речь, И́же ученика́ чин имя́ше, И́же нас вя́щше имя́ше ничто́же - Сей у́бо отдели́вся креща́ет.

Не сие́ же то́кмо непщева́ху ухапля́ти его́, но и е́же я́же их преодолева́ти про́чее: Вси бо рече́ гряду́т к Нему́. Отню́ду же я́вствено, я́ко ниже́ иуде́янина преодоле́ша с ни́мже взыска́ние имя́ху. Сия́ же глаго́лаху, и несоверше́ннейше пребыва́юще, и не у́ тщесла́вия су́ще чи́сти. Что у́бо Иоа́нн? Ниже́ той им зе́льне запрети́, убоя́вся, да не и его́ па́ки отдели́вшеся, и́но не́что зло соде́лают. Но что рече́?

Ева́нгелие: Никто́же мо́жет от челове́к прия́ти ничто́же, а́ще не бу́дет дано́ ему́ от небеси́.

[…] Толкова́ние: А́ще бо отну́д держи́теся моего́ свиде́тельства рече́ и и́стинно сие́ непщу́ете, навы́кните, я́ко сего́ ра́ди наипа́че не мене́ от О́ного, но О́ного от мене́ предпочита́ти подоба́ше.

Что бо свиде́тельствовах? Вас призыва́ю сего́ свиде́телей.

Ева́нгелие: Са́ми бо вы мне свиде́тельствуете, зане́ рех: я́ко несмь аз Христо́с, но по́слан есмь пред Ним.

Толкова́ние: А́ще у́бо, держите́ся моего́ свиде́тельства, сие́ бо предлага́ете ны́не глаго́люще: «Ему́же ты свиде́тельствовал еси́» - не то́кмо не умаля́ется от е́же мое́ прия́т свиде́тельство, но и изоби́лует па́че от сего́. И́накоже, ниже́ мое́ сведе́тельство, но Бо́жие бе. А́ще бо достове́рен вам мню́ся бы́ти со ины́ми и сие́ рех: «зане́ по́слан есмь пред О́нем». Зри́ши ли, ка́ко показу́ет пома́лу боже́ственаго гла́са су́ща. Е́же бо глаго́лет, таково́ есть: служи́тель есмь, и я́же Посла́вшаго глаго́лю, не челове́ческою благода́тию ласка́я Его́, но Отцу́ Его́ посла́вшему мя служа́. Не у́бо дарова́х сведе́тельство, но е́же по́слан бых рещи́ рех, да не у́бо сего́ ра́ди непщу́йте вели́ку бы́ти мне: сие́ бо О́ного показу́ет вели́ка, Госпо́дь бо веще́й Он есть. Те́мже и наво́дит глаго́ля:

Ева́нгелие: Име́яй неве́сту жени́х есть. Друг же женихо́в, стоя́й послу́шая его́, ра́достию ра́дуется гла́са ра́ди женихо́ва.

Толкова́ние: Ка́ко глаго́ляй «несмь Ему́ досто́ин разреши́ти реме́нь сапога́» дру́га Ему́ рече́ себе́ бы́ти? Не вознося́ся е́же по себе́, ниже́ велича́яся, но показа́ти хотя́, я́ко и сам сие́ наипа́че тщи́тся, не не хотя́щу ему́, ниже́ скорбя́щу сия́ быва́ют, но жела́ющу и тща́щуся, и сия́ суть о ни́х же наипа́че вся де́йствоваше. И сия́ вся нарече́нием дру́га изъяви́л есть, не си́це бо служи́телие женихо́вы, я́коже дру́зи ра́дуются и веселя́тся в таковы́х. Не у́бо единоче́стное, не бу́ди!, но е́же мно́го сла́дости предста́вити хотя́, вку́пе же исходя́ их не́мощи, дру́га себе́ рече́ бы́ти. Поне́же и служе́ние изъяви́л есть рек я́ко «по́слан есмь пре́д О́нем». Сих у́бо ра́ди и е́же непщева́ти им ухапля́тися быва́емыми, дру́га себе́ нарече́ Женихо́ва, показу́я, я́ко не то́кмо не ухапля́ется, но и зело́ ра́дуется. «Сие́ бо приидо́х соверши́ти» рече́, и толи́ко оша́юся е́же боле́зновати де́йствуемыми, я́ко тогда́ наипа́че боле́зновал бы, а́ще сие́ не бы́ло бы. А́ще не пришла́ бы неве́ста к жениху́, тогда́ у́бо уязви́л бых ся, а ны́не рече́, егда́ соверши́шася на́ша ве́щи, - и́бо О́ного преспева́ющих, мы есмы́ благоиску́ствующии, е́же бо хоте́хом бысть, и позна́ неве́ста Жениха́, и вы свиде́тельствуете сие́ глаго́люще: я́ко вси гряду́т к нему́, - сие́ бо и потща́хся, и сего́ ра́ди вся де́йствовах; и сие́ ны́не сбы́вшееся зря, ра́дуюся и веселю́ся и игра́ю. Что же ли есть «стоя́ и послу́шая его́»? От при́тчи сло́во преведе́ на предлежа́щее. Поне́же бо Жениха́ и неве́сты воспомяну́л есть, показу́ет неве́стово жене́ние ка́ко быва́ет: я́ко гла́сом и уче́нием. Си́це бо и Це́рковь обруча́ется Бо́гу. Те́мже и Па́вел глаго́лаше: «Ве́ра от слу́ха, слух же глаго́лом Бо́жиим» . Сего́ ра́ди аз ра́дуюся гла́са. И е́же «стоя́» не про́сте положи́л есть, но показу́я, я́ко я́же его́ преста́ша, и я́ко ему́ про́чее стоя́ти подоба́ет и послу́шати, О́ному преда́вшу неве́сту, и я́ко служи́тель есть и слуга́, и я́же благи́я наде́жи ему́ и я́же весе́лия, и изы́де сло́во в де́ло. Сего́ ра́ди рече́:

Ева́нгелие: Сия́ у́бо моя́ ра́дость испо́лнися.

Толкова́ние: Соверши́ся от мене́ де́ло, е́же бы́ти подоба́ше, и вя́щше ничто́же мо́жем де́лати про́чее. Та́же не настоя́щия то́кмо, но и бу́дущия стра́сти возвраще́ние бы́ти возбраня́я, и о бу́дущих изъявля́я глаго́ля от рече́нных же и бы́вших, уже́ и сия́ уверя́я. Те́мже и наво́дит глаго́ля:

Ева́нгелие: О́ному подоба́ет расти́, мне же ма́литися.

Толкова́ние: Си́речь я́же у́бо на́ша ста́ша и преста́ша, про́чее возраста́ют же я́же О́ного. Сие́ бо е́же бои́теся ны́не, не ны́не бу́дет то́кмо, но и мно́го па́че происходя́ще. Сие́ бо есть е́же наипа́че све́тлы показу́ет на́ши ве́щи. Сего́ ра́ди у́бо приидо́х и ра́дуюся, я́ко е́же Его́ мно́го прия́ша прибавле́ние и бы́ша сия́, за е́же у́бо вся я́же от нас бы́ша. Ви́дел ли еси́, ка́ко ти́хо и со мно́гою прему́дростию тогда́ страсть их украща́ше, и за́висть погаси́, и невозмо́жным начина́ющих показа́, и́мже наипа́че престае́т зло́ба? Сего́ бо ра́ди и устро́ися, еще́ жи́ву су́щу ему́ и креща́ющу сим бы́ти, да его́ сведе́теля вели́чества име́ют, и ни еди́но е́же а́ще не покоря́тся отвеща́ние име́ти. Ниже́ бо от себе́ на е́же сия́ рещи́ прии́де , ниже́ ины́м вопроси́вшим: ти́и бо бе́ша пыта́юще и́ и слы́шаще и́. Ниже́ бо си́це от себе́ глаго́лющему повинова́хуся, я́ко самоосужде́н суд имя́ху, по вопроше́нии слы́шаще отвеща́ющу. Я́коже у́бо иуде́и, сего́ ра́ди наипа́че за е́же от себе́ посла́ти к нему́ и слы́шати я́же слы́шаша и уве́ритися, вся́кого их отве́та изве́рже.

Нравоуче́ние два́десять девя́тое: О тщесла́вных:

Что ли у́бо от зде наказу́емся? Я́ко всех злых вино́вно славонеи́стовство. Сие́ у́бо их на за́висть приведе́. Сие́ па́ки их ма́ла любому́дрствовавших воздви́же, и приступи́вше Иису́су глаго́лют: «Что ра́ди ученицы́ Твои́ не постя́тся?».

Да бежи́м у́бо, о́ возлю́блении, стра́сти. А́ще бо сея́ избежи́м, гее́нны свободи́мся. Сие́ бо наипа́че ея́ воспаля́ет огнь; и всю́ду нача́льство простре́ свое́, и во́зраст всяк и досто́инство вся́ко держи́т мучи́тельне. Сия́ це́ркви до́лу и горе́ сотвори́ла есть. Сия́ и гражда́нским врежа́ет ве́щем: сия́ и хра́мы всеце́лы разврати́ла есть, и гра́ды, и наро́ды, и язы́ки. Иде́же у́бо и на зе́млю пу́сту изше́дши, мно́го свою́ си́лу злу же показа́. И́же бо многоиме́ньми ра́доватися ре́кше, и мирски́м мечта́нием вся́ким, и ни еди́ному спребыва́юще, и томи́тельнейшими теле́с держа́щеся вожделе́ньми - си́и мно́жицею е́мшеся от тщесла́вия, вся погуби́ша. Сея́ ра́ди стра́сти и́же мно́га страда́в, и́же ни еди́ноже страда́вшаго, но безчи́сленая согреши́вшаго, фарисе́й мытаря́, сего́ ра́ди неду́га ме́ньши име́я отъи́де. Но е́же у́бо оглаго́лати страсть, ничто́же де́ло есть - вси бо та́яже усужда́ют. Иско́мое же, ка́ко сию́ преодоле́ем. Ка́ко ли у́бо сию́ преодоле́ем? А́ще сопроти́в поста́вим сла́ву сла́ве. Я́коже бо земна́го бога́тства пренебреже́м, егда ко иному возрим богатству. И жизни сея презираем, егда помы́слим мно́го сея́ бо́льшую. Си́це и сла́ву оплева́ти возмо́жем, егда́ сея́ помы́слим вельми́ честне́йшую и́стинную сла́ву.

Я́же бо тща не́кая есть и су́етна, и́мя име́ющи ве́щи пу́сто. Она́ же и́стинная я́же от небе́с, не челове́к, но а́нгел и арха́нгел, и а́нгельскаго Влады́ку, па́че же с Ним и челове́ком похва́льников име́ющи. А́ще ко о́ному позо́рищу возри́ши, а́ще су́щих там уве́си венцо́в, а́ще к та́мошней похвале́ себе́ приложи́ши - никогда́ же тебе́ возмо́гут зде́шнее удержа́ти, ниже́ быва́емое вознепщу́еши вели́ка, ниже́ не су́щее взы́щеши. И́бо в ца́рских сих никто́же от предстоя́щых царе́ви оружиено́сцев оста́вль угоди́ти вене́ц име́ющему и на престо́ле седя́щему, волну́ющих испыту́ет гла́сы, или́ му́хам и комаро́м обстоя́щим, и бу́чащих, молва́: ничто́же бо сих лу́чше челове́ческая благохвале́ния пребыва́ют.

Ве́дяще у́бо челове́ческих ху́дость, вся в некра́домое да собира́ем сокро́вища и пребыва́ющую и неподви́жную сла́ву да взыску́ем, ея́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом во ве́ки веко́в. Ами́нь.

Ви́дяще иуде́и Петро́во дерзнове́ние и Иоа́нново и разуме́вше, я́ко челове́ка некни́жна еста́ и проста́, дивля́хуся, зна́юще же их я́ко со Иису́сом бе́ста. Челове́ка же ви́дяще с ни́ма стоя́ща исцеле́вшаго, ничто́же имя́ху проти́ву рещи́.

Златоу́ст, толкова́ние: И о́ба бе́ста безкни́жна, и победи́ша их и первосвяще́нников их, и́бо не та глаго́ласта, но благода́ть Свята́го Ду́ха. «Зна́ху бо я́ рече́ я́ко со Иису́сом бе́ста», во вре́мя стра́сти сия́ у́бо еди́на бе́ста тогда́, во дворе́ архиере́ове. Ви́дяху же их тогда́ смире́ние и молча́ние, и се па́че их ужаса́ше мно́гое преложе́ние. Та́мо бо бя́ше и слуги́ архиере́овы, и ужаса́ше их дерзнове́ние их. Зна́ху бо я́ко со Иису́сом бе́ста, и я́ко О́ного ученицы́, и вся творя́ху. «Челове́ка же ви́дяще с ни́ма стоя́ща» рече́, мно́го челове́ка дерзнове́ние я́ко и в само́м суди́щи не оста́ви их. А́ще бо бы́ша рекли́ я́ко несть та́ко, он у́бо осуди́л бы их.

Су́щее: Повеле́вше же и́ма вон из со́нмища изы́ти, стяза́хуся к себе́, глаго́люще: «Что сотвори́м челове́кома си́ма? Я́ко у́бо разу́мно зна́мение бысть и́ма, всем живу́щим во Иерусали́ме я́ве, и не мо́жем отврещи́ся. Но да не бо́лее простре́тся в лю́дех, преще́нием да зепрети́м и́ма ктому́ не глаго́лати о И́мени сем ни еди́ному от челове́к». И призва́вше их, запове́давше и́ма отню́д не провещева́ти, ни учи́ти о и́мени Иису́сове.

Толкова́ние: «Что сотвори́м челове́кома си́ма?» рече́. Чу́днейше у́бо се есть, я́ко держа́щая и под руку́ иму́ще в недоуме́нии бы́ша, ниже́ бесо́вския полки́, ниже́ сам дия́вол победи́ти их возмо́же, но от мно́гаго вси побежда́хуся мно́жества: я́же на ня хи́троствоваху, вся на себе́ привлеко́ша. «Что сотвори́м челове́кома си́ма?» рече́. Ви́диши ли в недоуме́нии их су́ща? Что же чу́днейшее и но́вейшее: ты держи́ши и в недоуме́нии еси́, ты под руко́ю свя́заны и́маши и что сотвори́ти не ве́си? И вся́ко в ле́поту: поне́же бо на песце́ вся основа́ша, сего́ ра́ди и немощне́йши всех бы́вша. А́ще ло́жная суть я́же глаго́лем, запрети́, а́ще ли и́стинна, что возбраня́еши? - такова́я прему́дрость апо́стол. Они́ в недоуме́нии, а си́и - в весе́лии. Они́ - мно́га испо́лнени студа́, а си́и со дерзнове́нием вся творя́т. Они́ - в стра́се, а сии - в безпеча́лии.

Су́щее: Петр же и Иоа́нн, отвеща́вше к ни́м ре́ста: «А́ще пра́ведно есть пред Бо́гом вас послу́шати па́че, не́жели Бо́га - суди́те. Не мо́жем бо мы, я́же ви́дехом и слы́шахом, не глаго́лати». Они́ же призапре́щьше и́ма, пусти́ша их, ничто́же обре́тше, ка́ко му́чити их, люде́й ра́ди, я́ко вси прославля́ху Бо́га о бы́вших. Ле́ты бо бя́ше множа́йшими четы́редесяте челове́к той, о нем же бысть чу́до сие́ исцеле́ния.

Толкова́ние: Ви́д[ит]е ли высо́к ра́зум? Ви́дите ли ка́мень волна́м смею́щься? Ви́дите ли хра́мину непоколеби́му? И е́же чу́днейшее: я́ко не то́чию не страша́хуся от наве́тник, но множа́йшее прие́млюще дерзнове́ние, о́нех в бо́льшее малоду́шие влага́ху. Возража́яй бо адама́нта, сам возража́ется. И скоча́ на те́рние, сам боде́тся и лю́тыя ра́ны прие́млет. Ничто́же обрета́юще, ка́ко му́чити их, люде́й ра́ди, науча́ху бо их зна́мения, и ничто́же можа́ху сотвори́ти. Но ви́дехом я́же изнача́ла глаго́лемая: пе́рвое у́бо сла́вы ра́ди челове́ческия все творя́ху, ны́не же и друго́е прилага́ют, да не явя́тся уби́йцами бы́ти, [е́же и пото́м глаго́лаху: «Хо́щете на ны навести́ кровь Челове́ка сего́»]. О́ безу́мию! Ве́дяще, я́ко воскре́се, и зна́мение прие́мше, я́ко Бог есть, И́же сме́ртию не удержа́н бысть, - и свои́ми хи́тростьми непщева́ху покрыва́тися. Что такова́го безу́мия го́рши? Такова́ бо есть зло́ба, ничто́же не ви́дит, но повсю́ду смуща́ется.

Коне́ц толкова́нию.