Суббота третьей седмицы по Пасхе

Свы́ше гряды́й, на́до все́ми есть, сый от земли́, от земли́ есть и от земли́ глаго́лет:

Лю́та сла́вы жела́ние, лю́та, и мно́гих самоиспо́лнена те́рний, и неудо́бь исто́ржена, и зверь неукроти́мый и многогла́вный, напита́ющых его́ вооружа́яся. Я́коже бо червь древеса́ от ни́хже ража́ется снеда́ет, и ржа желе́зо отню́дуже происхо́дит изнуря́ется - си́це и тщесла́вие пита́ющую погубля́ет ду́шу. И мно́гаго нам тре́ба есть тща́ния, я́ко бы погуби́ти страсть. Зри у́бо и зде, ели́ка нам оглаша́ет, ученико́м сие́ стра́ждущым, Иоа́нн, и едва́ их утеша́ет, с пре́жде бо рече́нными и ины́ми возчерпа́ет словесы́. Которы́ми же ли си́ми?

Ева́нгелие: Свы́ше Гряды́й рече́, на́до все́ми есть. И́же от земли́ сый, от земли́ есть и от земли́ глаго́лет.

Толкова́ние: Поне́же бо горе́ и до́лу мое́, рече́, обраща́ете сведе́тельство, и си́це мене́ достове́рнейша бы́ти глаго́лете - о́но вам ну́жно уве́дети: я́ко несть от небе́с гряду́щему достове́рну от и́же на земли́ живу́щаго бы́ти. А е́же «на́до все́ми» что есть, и что хо́щет нам показа́ти рече́ние? Я́ко ни еди́ного же тре́бует, но довле́я есть Сам Себе́, и всех бо́льши. «От земли́ же су́щаго и глаго́лющаго» - себе́ рече́, не я́ко от своея́ мы́сли веща́ше; но я́коже Христо́с рече́: «а́ще земна́я рех вам, и не ве́руете», креще́ния си́це нарица́я, не поне́же земно́ бе, но поне́же к неизрече́нному Своему́ рожде́нию приложи́л есть рече́нное, - си́це и зде от земли́ глаго́лати себе́ Иоа́нн рече́, ко Христо́ву уче́нию своя́ прилага́я. Ничто́же бо и́но явля́ет «е́же от земли́ глаго́лати», ра́зве я́ко ма́ла и смире́нна и ху́да, о́ного су́щим прилага́ема моя́ и такова́, якова́ ле́по земно́му прия́ти естеству́. У О́ного бо вся сокро́вища прему́дрости сокрове́на. Я́ко бо не о по́мыслех челове́ческих глаго́лет, я́вствено отту́ду:

Ева́нгелие: «И́же от земли́ сый рече́ от земли́ глаго́лет».

Толкова́ние: А́ще и не от земли́ бе ему́ все, но госпо́дственейшая: и́бо ду́шу имя́ше и Ду́ха приобраща́шеся не от земли́, ка́ко у́бо от земли́ бы́ти рече́? Зри́ши ли, я́ко ничто́же и́но рече́, ра́зве я́ко аз мал и ни еди́наго же досто́ин сло́ва а́ки до́лу ходя́й на земли́ роди́вся; Христо́с же свы́ше к нам дости́же. Си́ми у́бо все́ми погаси́в страсть, тогда́ про́чее со мно́жайшим дерзнове́нием веща́ет о Христе́. Пре́жде бо сего́ изли́шне бе глаго́лы происпуща́ти, никогда́ же ме́сто в мы́сли слы́шащых име́ти могу́щия. Егда́ же те́рние восто́рже, тогда́ со осла́бою про́чее влага́ет се́мена глаго́ля:

Ева́нгелие: Свы́ше гряды́й на́до все́ми есть. И е́же слы́ша глаго́лет и е́же ви́де свиде́тельствует, и свиде́тельство Его́ никто́же прие́млет.

Толкова́ние: Ве́лие не́что и высо́ко рек о Нем, па́ки на смире́ннейшее сло́во возво́дит. То бо «е́же слы́ша и е́же ви́де» челове́чнейше рече́ся, не от е́же бо прия́ти зре́нием, ниже́ от е́же слы́шати ве́дяше я́же вед́яше, но в естестве́ все имя́ше, Соверше́н от Оте́ческих произше́д недр и не тре́буя уча́щего, я́коже бо рече́: «Знает Мя Оте́ц, и Аз зна́ю Отца́». Что ли у́бо есть «е́же слы́ша глаго́лет и е́же ви́де свиде́тельствует»?. Поне́же у́бо чу́вствы си́ми мы вся навыка́ем опа́сне, и достове́рни мни́мся бы́ти учи́тели о ни́хже или́ зре́нием прии́мем или́ слу́хом, а́ки не мечта́юще ниже́ ло́жно глаго́люще, сие́ и зде состро́ити хотя́ Иоа́нн глаго́лаше «я́же слы́ша и ви́де»: си́речь, ничто́же су́щых от Него́ ло́жно есть, но вся и́стинна. Си́це у́бо и мы испыту́юще мно́жицею вопраша́ем: Ты ли слы́шал еси? Ты ли ви́дел еси? И а́ще пока́жется сие́ - несомне́нно свиде́тельство. И Сам же егда́ глаго́лет: «Я́коже слы́ша сужу́», и: «Я́же слы́шах от Отца́ Моего́ глаго́лю», и: «Я́же ви́дехом глаго́лем», и ели́ко у́бо и́на такова́ веща́ет, не я́ко да навы́кнет я́ко науча́ем глаго́лет: сие́ бо после́дняго безу́мия есть непщева́ти, - но да ничто́же глаго́лемых поза́зрится от безсту́дных иуде́й. Поне́же бо не у́ подоба́ющую о нем сла́ву имя́ху, ча́сте ко Отцу́ прибега́ет, отту́ду достове́рна творя́ глаго́лемая. И что чуди́шися а́ще ко Отцу́, иде́же у́бо и Сам к проро́ком и к писа́нию мно́жицею прихо́дит глаго́ля: «Они́ суть свиде́тельсвующеи о Мне»? Еда́ у́бо и проро́к ме́ньше Его́ бы́ти рече́м, поне́же я́же отту́ду привлача́ет свиде́тельства? Не бу́ди! Не́мощи бо ра́ди слы́шащих си́це ухищря́ет сло́во, и от Отца́ слы́шав рече́ глаго́лати я́же глаго́лаше, не я́ко учи́теля тре́буя, но я́ко да они́ ве́руют ничто́же бы́ти ло́жно от глаго́лемых.

А е́же глаго́лет Иоа́нн, таково́ есть: аз тре́бую слы́шати су́щих от О́ного, свы́ше бо гряде́т, я́же отту́ду возвеща́я, я́же еди́н Cам ве́дяше я́вствене. «Е́же бо ви́де и слы́ша» - сие́ есть явля́ющаго. «И свиде́тельство Его́ никто́же прие́млет». И́бо и ученико́в имя́ше, и мно́зи внима́ху глаго́лемым, ка́ко у́бо рече́ я́ко никто́же? Вме́сто е́же «ма́ли» и сие́ ны́не.

Поне́же а́ще ни еди́ного глаго́лал бы, ка́ко наве́л бы?

Ева́нгелие: Прие́мый Его́ свиде́тельство запечатле́в, я́ко Бог и́стинен есть.

Толкова́ние: Зде и свои́х каса́ется ученико́в, я́ко не хотя́щих Ему́ ве́ровати еще́. Я́ко бо ниже́ по сих ве́роваша ему́ глаго́лы, явля́ют и от и́же по сих рече́нных.

Сего́ бо ра́ди их и в темни́цы живы́й отту́ду посла́ к Нему́, да Ему́ совокупи́т па́че. Они́ же и тогда́ едва́ ве́роваху, е́же и Христо́с гада́тельствуя глаго́лаше: «И блаже́н и́же а́ще не соблазни́тся о Мне». И сего́ ра́ди и ны́не глаго́лаше: «И свиде́тельство Его́ никто́же прие́млет», и ученико́в утвержа́я свои́х, и то́кмо не глаго́ля: не поне́же у́бо хотя́т ему́ ма́ли еще́ ве́ровати, сего́ ра́ди ло́жна непщу́йте бы́ти глаго́лемая, е́же бо «ви́де» глаго́лет, Сия́ же глаго́ла, вку́пе иуде́йскаго каса́яся неи́стовства и нечу́вствия, е́же у́бо и евангели́ст начина́я воспрети́ им глаго́ля: «Во своя́ прии́де, и свои́ Его́ не прия́ша». Сие́ же не Его́ согреше́ние, но неприе́мших осужде́ние. «Прие́мый Его́ свиде́тельство запечатле́, я́ко Бог и́стинен есть». Зде их устраша́ет, показу́я я́ко сему́ не ве́руяй, не Ему́ то́кмо, но и Отцу́ не ве́рует.

Ева́нгелие: Его́же бо посла́ Бог, рече́, глаго́лы Бо́жия глаго́лет.

Толко́вание: Поне́же у́бо я́же О́ного веща́ет, и ве́руяй и не ве́руяй, О́ному ве́рует и не ве́рует. А е́же «запечатле́», си́речь показа́, та́же прибавля́я стра́ха рече́, «я́ко Бог и́стинен есть». Не у́бо и́нако кто не ве́рует Сему́, а́ще не ложь поза́зрит посла́вшему Его́ Бо́гу. Поне́же бо ничто́же кроме́ Отца́ глаго́лет, но вся я́же О́ного, преслу́шаяй Сего́, преслу́шает Посла́вшаго. Зри́ши ли, ка́ко их и си́ми ужаса́ет? Еще́ бо ничто́же ве́лие непщева́ху бы́ти преслу́шати Христа́. Сего́ ра́ди толи́ку беду́ обе́си неве́рным, да уве́дят, я́ко Самого́ Бо́га преслу́шают, Христа́ преслу́шающеи. Та́же и прохо́дит сло́вом сим, к ме́ре не́мощи их сходя́ и глаго́ля:

Ева́нгелие: Не по ме́ре бо дае́т Бог Ду́ха.

Толкова́ние: Па́ки е́же рех, на смире́ннейшее приво́дит сло́во, упещря́я сие́ и удо́бь прия́тнейше творя́ слы́шащим. Тогда́ не бе бо и́нако возвы́сити и возрасти́ти стра́ха. А́ще бо что о Не́м ве́лие рекл бы и высо́ко, не бы уве́рилися, но и пренебрегли́ бы.

Сего́ ра́ди и на Отца́ возво́дит все, па́ки я́ко о челове́це о Христе́ еще́ бесе́дуя. Что ли есть е́же рече́ «не ме́рою дае́т Бог Ду́ха»? Мы у́бо вси рече́ ме́рою де́йство Ду́ха прия́хом. Дух бо зде, де́йства рече́, сие́ бо есть ме́римо. Сей же безме́рно име́ет все де́йство. А́ще же де́йство Его́ безме́рно, мно́го па́че существо́. Зри́ши ли и Ду́ха безме́рно? И́же у́бо Ду́ха все прие́мь де́йство, И́же Бо́жия ве́дый, глаго́ляй «е́же слы́шахом глаго́лем и е́же ви́дехом сведе́тельствуем», ка́ко у́бо бу́дет пра́веден зазре́тися? Ничто́же бо рече́ е́же не Бо́жие есть, ниже́ е́же не Ду́ха есть. И еще́ о Бо́жием Сло́ве ничто́же веща́ет, но от Отца́ и Ду́ха достове́рно твори́т уче́ние, я́ко бо Бо́жие есть ве́дяху, и я́ко Дух есть зна́яху, а́ще и не подоба́ющую о нем сла́ву имя́ху. Я́ко у́бо Сын есть не ве́дяху, сего́ ра́ди при́сно ко Отцу́ и Ду́ху прибега́ет, отту́ду уверя́я глаго́лемая.

Поне́же, а́ще кто сию́ отъе́м вину́, по себе́ истя́жет сло́во, зело́ недоста́точествует досто́инство Христо́во. Не сего́ бо ра́ди достове́рен им, поне́же де́йство Ду́ха име́ет, не отту́ду бо тре́бует по́мощи, но Сам есть довле́я Себе́ – еще́ к непщева́нию несоверше́ннейших веща́ет. Сия́ же глаго́лю да не про́сте я́же в писа́ниих лежа́щая да претека́ем, но и ра́зум глаго́лющаго, и не́мощь слы́шащих, и мно́га ина́я же в них да навы́кнем. Не вся бо я́коже хотя́т учи́тели веща́ет, но мно́гая я́коже нрав немощны́х истязу́ет. Те́мже и Па́вел глаго́лет: «Не возмого́х вам глаго́лати я́ко духо́вным, но я́ко плотяны́м, млеко́м вас напои́х, а не бра́шном» . Хоте́х бо рече́, я́ко духо́вным глаго́лати, не возмого́х бо: не поне́же у́бо той не́мощне имя́ше, но поне́же они́ не можа́ху си́це слы́шати. Си́це и Иоа́нн хотя́ше вели́ко не́кое научи́ти ученико́в, но не у́ терпя́ху они́ прия́ти: сего́ ра́ди во смире́ннейших пребыва́ет наипа́че.

Нравоуче́ние тридеся́тое: [О е́же истяза́ти писа́ния со опасе́нием]:

Подоба́ет у́бо истяза́ти со опасе́нием вся. И́бо ору́жия суть я́же от писа́нии духо́вна. Но а́ще не уве́дим сочета́ти ору́жия и вооружи́ти до́бре ученико́в, сия́ у́бо име́ют свою́ кре́пость, прие́млющихже ничи́мже по́льзовати мо́гут. Да положи́м у́бо бы́ти па́нсырь кре́пок, и шлем, и щит, и ору́жие. Та́же да во́змет кто сия́ ору́жия, и па́нсырь да положи́т на но́ги, шлем же вме́сто главы́ зре́нию, и щит не пред пе́рсьми да предложи́т, но любопри́тся пове́сити на нога́х - еда́ возмо́жет что от ору́жий сих? А не вреди́тся? Вся́ческому я́вьствена есть, но не от не́мощи ору́жий, но от неиску́ства неве́дящаго и́ми де́йствовати до́бре. Си́це и о писа́ниих: а́ще чин их смеси́м, свою́ у́бо они́ си́лу име́ют и си́це, нас же ничи́мже по́льзуют. Сия́ же осо́бь и в наро́де бесе́дуя вам, ничто́же соверша́ю вя́щше, но жите́йским во все вре́мя пригвожде́нных вас зрю, духо́вных же ниже́ во сне причаща́ющихся. Сего́ ра́ди и житие́ ва́ше неради́во есть, и о и́стинне подвиза́ющеся не мно́гу име́ем кре́пость, но подсмея́тельне быва́ем от е́ллинн и иуде́и и еретико́в. И а́ще у́бо и по ины́х не радя́ще, ту же зде ле́ность показу́ет[е], бе у́бо ниже́ си́це отве́та досто́йно быва́емое. Ны́не же в жите́йских у́бо ко́йждо меча́ есть жесточа́йше, и́же хи́трости проходя́ще и гража́нския де́йствующе ве́щи. В ну́жных же и духо́вных, всех есми́ лени́вейши. Чрезде́льными у́бо я́ко де́лы де́йствующе, а я́же всех нужне́йша полага́ти подоба́ше, сия́ ниже́ чреде́льна бы́ти непщу́юще. Или́ не ве́сте, я́ко не пе́рвых челове́к ра́ди то́кмо писа́шеся пи́санное, но и вас ра́ди? Не слы́шиши ли Па́вла глаго́люща: «Я́ко сия́ в наказа́ния на́ша написа́шася в ни́хже концы́ век достиго́ша, да терпе́нием и утеше́нием книг наде́жу име́ем »?. И вем у́бо ту́не глаго́ля: оба́че не преста́ну глаго́ля. Сие́ бо творя́ отвеща́ю Бо́гу, а́ще и послу́шаяй не бу́дет. Глаго́ляй бо внима́ющим име́ет утеше́ние е́же глаго́лати, повинова́ние слы́шащих. Глаго́ляй же ча́сте и не послу́шаемь, та́же не преста́я е́же глаго́лати - мно́жайшия у́бо бу́дет че́сти досто́ин за е́же Бо́гови уго́дная и ни еди́ному же внима́ющу, свое́ все исполня́я. Но оба́че а́ще и нам мзда бо́льша от ва́шего преслуша́ния, оба́че жела́ем сей ума́литися па́че, и ва́шему возрасти́ спасе́нию, мзда вели́ка ва́ше благоиску́сство. бы́ти непщу́юще. Сия́ глаго́лем ны́не, не я́ко да ско́рбно и тя́жко сотвори́м сло́во, но я́ко боле́знь вам да пока́жем, ю́же име́ем ва́шея ра́ди ле́ности. Ея́же бу́ди всем нам свободи́вшимся, духо́внаго держа́тися тща́ния и небе́сных получи́ти благи́х благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва со Святы́м Ду́хом во ве́ки веко́в. Ами́нь.

Я́ко у́бо приидо́ша к Нему́ самаря́не, моля́ху Его́ пребы́ти у них. И пребы́сть та́мо два дни. И мно́ги мно́жайшии ве́роваша в Него́ за сло́во Его́. Жене́ же глаго́лаху: «Я́ко не ктому́ бесе́ды ра́ди твоея́ ве́руем, са́ми бо слы́шахом и ве́мы, я́ко Сей есть вои́стинну Спас ми́ру Христо́с». По двою́ же дню изы́де отту́ду и отъи́де в Галиле́ю.

Толкова́ние Ничто́же за́висти и не́нависти го́рше, ничто́же тщесла́вия люте́йше. Сия́ безчи́сленая обы́че растлева́ти блага́я. Иуде́и у́бо мно́жайши самаря́н ра́зум име́юще и с проро́ки воспита́вшеся, после́днии от сих яви́шася отсю́ду. Сии́ у́бо и от сведе́тельства ве́роваша жены́ и зна́мение ви́девше ничто́же, изыдо́ша моля́ше Иису́са пребы́ти у них. Иуде́и же и чудеса́ зря́ще, не то́кмо не держа́ху Его́ у себе́, но и отгоня́ху, и вся де́йствоваху, я́кобы от страны́ своея́ отри́нути. А́ще и сие́ прише́ствие оне́х ра́ди быва́ше, но они́ у́бо отгоня́ху, си́и же и пребыт́и моля́ху у себе́.

Сих у́бо не подоба́ше ли прия́ти моля́щих, рцы ми, и тре́бующих, но нав́етующим у́бо и отража́ющия приседе́ти, лю́бящим же ли и хотя́щим Его́ держа́ти не дая́ти Себе́? Но не бе сие́ досто́йно Его́ промышле́ния. Сего́ ра́ди и прия́т, и пребы́сть у них два дни.

Сии́ бо хотя́ху вы́ну Его́ держа́т, сие́ бо изъяви́л есть евангели́ст рек: «Я́ко моля́ху Его́ пребы́ти у них». Той же не прие́мляше, но два дни то́кмо пребы́сть. И в сех и мно́го мно́жайши ве́роваша в Него́. А́ще у́бо сим и не ле́по бе ве́ровати, и зна́мения ни еди́ного же узре́ти, и е́же ко иуде́ем враже́бне име́ти, но оба́че поне́же у́бо глаго́лемым со и́стинною сужда́ху, не близ стоя́ще сие́ им, но высоча́йшее возбране́ний прия́ша разуме́ние. И любоче́ствовахуся о е́же бо́льши чуди́тися Ему́. Жене́ же рече́ глаго́лаху:

Ева́нгелие: Не ктому́ бесе́ды ра́ди твоея́ ве́руем Ему́. Са́ми бо мы слы́шахом и уве́дехом, я́ко Сей есть вои́стинну Спас ми́ру Христо́с.

Толкова́ние: Ученицы́ учи́теля превзыдо́ша. Сии́ иуде́и осу́дят у́бо пра́ведне, и тем е́же ве́ровати, и тем е́же прия́ти. Они́ бо, о ни́хже вся́ко промышле́ние поста́више, ча́сте Его́ ка́мением побива́ху. Си́и же, ниже́ к ним устремля́ющася, привлача́ху к себе́. И они́ у́бо со зна́мении неиспра́влени пребыва́ют, си́и же кроме́ зна́мений мно́гу о Нем ве́ру показова́ху. И сим Его́ любоче́ствуют, е́же кроме́ зна́мений ве́ровати. Они́же не престаю́т и зна́мения прося́ще и искуша́юще.

Си́це благоразу́мныя души́ везде́ потре́ба. А́ще и прии́мется таковы́я и́стинны, облада́ет удо́бне. А́ще и не облада́ет, не от не́мощи ея́, но от неразу́мия сия́ си́це быва́ет.

Поне́же и со́лнце, егда́ прии́мет чи́стое очеса́, просвеща́ет удо́бне. А́щеже не просвеща́ет, о́нех неду́га согреше́ние есть, а не не́мощи сего́. Услы́ши у́бо, что си́и глаго́лют: «Ве́мы, рече́, я́ко сей есть вои́стинну Спас ми́ру Христо́с». Зри́ши ли, ка́ко а́бие разуме́ша, я́ко вселе́нную привлещи́ хотя́ше, я́ко о исправле́нии о́бщаго прии́де спасе́ния, я́ко не во иуде́ех хотя́ше заключи́ти Свое́ промышле́ние, но везде́ се́яти сло́во? Но иуде́и не си́це, но «и́щуще свою́ пра́вду соста́вити, пра́вде Бо́жией не покори́шася» . Си́и же испове́дуют всех в запреще́ниих бы́ти, о́но апо́стольское явля́юще: «Я́ко вси согреши́ша и лиша́ются сла́вы Бо́жия, оправда́еми ту́не Того́ благода́тию» . Ре́кше бо я́ко «Спас есть ми́ру», показа́ша, я́ко поги́бшаго, и не про́сте Спас, но зело́ в вели́ких. Приидо́ша бо мно́зи спасти́: и проро́цы, и а́нгели, - но «и́стинный Спас» есть, рече́, и́же и́стинное спасе́ние подая́, а не привре́менное. Сие́ ве́ры це́лыя! И́бо суть от обою́ду чу́дни: и я́ко ве́роваша, и я́ко кроме́ зна́мений. И́хже и Христо́с ублажа́ет глаго́ля: «Блаже́ни неви́девше и ве́ровавше». Я́ко всеце́ло сие́, и́бо жене́ сомни́тельне глаго́лющей, услы́шавше: «Еда́ сей есть Христо́с?». Не ре́ша и са́ми «я́ко и мы непщева́хом», ниже́ «я́ко непщу́ем», но я́ко «ве́мы», [и] не про́сте, но я́ко «Сей есть вои́стинну Спас ми́ру».

Не я́ко бо еди́наго от мно́гих Христа́ испове́даху, но вои́стинну Спа́са. И у́бо кого́ ви́деша спа́сшася? Глаго́л слы́шаше, и ре́ша я́же ре́ша. А́ще и чу́до ви́дели бы, мно́го и вели́ко рекли́ бы. М что ра́ди сия́ не глаго́лют вам благове́стницы глаго́лы и я́ко чу́дне бесе́дова? Да навы́кнеши, я́ко мно́го от вели́ких претека́ют, от конца́ же все изъяви́ша: увеща́ бо наро́да всеце́ла и гра́да всего́ рече́нными. А иде́же не покаря́ются, тогда́ принужда́ются глаго́лати рече́нная, да не от неразу́мия слы́шащых усужда́ет кто наро́да Уча́щему.

Ева́нгелие: И по двою́ дню изы́де отту́ду и отъи́де в Галиле́ю. Сам бо Христо́с сведе́тельствова, я́ко проро́к во свое́м оте́честве и че́сти не име́ет.

Толкова́ние: Сего́ у́бо ра́ди предлежи́т, я́ко в Капернау́м не отъи́де, но в Галиле́ю, и отту́де в Ка́ну. Да́же бо не истя́жеши, что ра́ди у свои́х не пребы́сть, у самаря́н же пребы́сть, полага́ет вину́, глаго́ля: Я́ко не вня́ша Ему́. Сего́ ра́ди не отъи́де та́мо, я́ко не бо́льшему им бы́ти суду́. И́бо оте́чество Его́ зде непщу́ю глаго́лати Капернау́ма. Я́ко не наслади́ся та́мо че́сти, услы́ши Его́ глаго́люща: «И ты Капернау́м до небеси́ возвы́сивыйся, до а́да низведе́шися» . Оте́чество свое́ нарица́ет, смотре́ния же явля́я сло́во и в сем мно́жая пребыва́я. Что у́бо? Не зри́м ли, рече́, и от свои́х мно́гих чуди́мых? Но и па́че у́бо, и от ре́тких такова́я подоба́ет усужда́ти. А́щеже не́цыи во свое́м почита́хуся, мно́го па́че в чужде́м: обы́чай бо удо́бь пренебрего́мых твори́ти весть.

Ева́нгелие: Я́коже прии́де в Галиле́ю, прия́ша Его́ галиле́яне вся, зря́ще я́же сотвори́л есть во Иерусали́мех в пра́здник, - и си́и бо приидо́ша в пра́здник.

Толкова́ние: Зри́ши ли, я́ко злосло́вими, си́и наипа́че Ему́ приступа́юще обрета́ются? О́в бо глаго́лаше: «От Назаре́та мо́жет ли то бла́го бы́ти?». Ин же: «Вопроси́ и виждь, я́ко от Галиле́и проро́к не воста́». Сия́ же и досажа́юще глаго́лаху, поне́же от Назаре́та мно́гим ви́дяшеся бы́ти. И е́же самаряни́ну бы́ти непщева́ху: «Самаряни́н бо еси́ и бе́са име́еши» рече́. Но се, и самаря́не, и галиле́яне ве́руют во студ иуде́ем. Обрета́ютжеся и галиле́ев самаря́не лу́чши, они́ бо от глаго́л жены́ прия́ша, си́и же ви́девше зна́мение я́же сотвори́.

Ева́нгелие: Прии́де у́бо Иису́с па́ки в Ка́ну Галиле́йскую, иде́же сотвори́л есть во́ду вино́.

Толкова́ние: Воспомина́ет чудеси́ послу́шателю, самаря́н похвале́ние взима́я. Си́и бо и от су́щых во Иерусали́мех, и от бы́вшых та́мо зна́мений Его́ прия́ша. Самаря́не же не си́це, но от уче́ния еди́наго. Я́ко у́бо прии́де та́мо рече́, вину́ же не приложи́л есть, ея́же ра́ди прии́де. В Галиле́и у́бо за́висти ра́ди иуде́йския прии́де, в Ка́ну же что ра́ди? В нача́ле у́бо зово́мь на брак. Ны́не же что ра́ди и за что? Мне ви́дится, ю́же от чудеси́ ве́ру прибы́вшую крепча́йшу творя́ прише́ствием, и наипа́че их привлача́я, е́же самозва́н приити́ и Свое́ у́бо оста́вити оте́чество, предпоче́сти же оне́х.

Ева́нгелие: Бе же не́кто царе́в муж, ему́же сын боля́ше в Капернау́ме. Сей слы́шав, я́ко Иису́с прихо́дит от иуде́я, прии́де к Нему́ и моля́ше Его́, да прии́дет и исцели́т сы́на его́.

Толкование: Или́ у́бо ро́да сый ца́рска, или́ досто́инством нача́льства и́но име́ет си́це нарица́емо.

Не́цыи у́бо того́ о́ного непщу́ют, су́щаго в Матфе́и. Показу́етжеся, и ин сый от о́ного, не от са́на то́кмо, но и от ве́ры. Он бо и хотя́щу Христу́ приити́, мо́лит пребы́ти. Сей же ничто́же таково́ обеща́ющу, в дом влеча́ше. И он у́бо рече́ «несмь досто́ин, да под кров мой вни́деши». Сей же принужа́ет: «Сни́ди, глаго́ля, пре́жде не́же умре́ти сы́ну моему́». И та́мо у́бо от него́ сшед в Капернау́м вхожда́ше. Зде же от Самари́и: и не в Капернау́м, но в Ка́ну прише́дшу прии́де Сей. И о́ного у́бо сын разслабле́нием держа́шеся, сего́ же о́трок – огни́цею: «И прише́д, моля́ше, да исцели́т сы́на его́, хотя́ше бо умре́ти».

Что у́бо Христо́с? «А́ще зна́мения и чудеса́ уви́дите, рече́, не ве́руете». И у́бо сие́ ве́ры бе: и е́же приити́, и е́же умоли́ти. И по сих же Ему́ свиде́тельствует евангели́ст, глаго́ля, я́ко ре́кшу Иису́су:

Ева́нгелие: Иди́, зане́ сын твой жив есть. Ве́рова сло́ву Его́ и идя́ше.

Толкова́ние: Что у́бо есть е́же рече́? Зде или́ самаритя́ном чудя́ся глаго́лаше сия́, зане́ кроме́ зна́мений ве́роваша. Или́ ви́дящася Его́ гра́ду бы́ти каса́яся Капернау́ма, отну́дуже сий бе. Поне́же и ин не́кто в Луце́ глаго́ля: «Ве́рую Го́споди, помози́ моему́ неве́рию», глаго́лаше па́ки, я́ко а́ще и сей ве́рова, но непр́аве, ни здра́ве. И сие́ явля́ет от е́же вопраша́ти, в кий час оста́ви его́ огни́ца. Хотя́ше бо уве́дети, или́ самово́льне, или́ от повеле́ния Христо́ва сие́ бысть. Я́ко у́бо уве́де, зане́ вчера́ в седмы́й час, ве́рова и сам, и дом его́ весь.

Зри́ши ли, я́ко тогда́ ве́рова, егда́ о́троцы ре́ша, а не егда́ Христо́с? Мысль у́бо его́ облича́я, с не́юже прише́д сия́ глаго́лаше. Си́це бо па́че и в ве́ру его́ привлача́ше: пре́жде бо зна́мения не зело́ бе ве́рова. А́щеже и прии́де, и умоли́, ничто́же чу́дно: обыко́ша бо отцы́ от мно́гия любви́ не то́кмо и́мже наде́ются враче́м приходи́ти, но и и́мже не наде́ются бесе́довати, и ни еди́номуже отню́д оста́вити хотя́ще. Поне́же я́ко от преизли́шия приступи́, егда́ прии́де в Галиле́ю, тогда́ Его́ ви́де. Я́ко а́ще бы зело́ ему́ увере́но бы́ло о Христо́ве си́ле, не бы у́бо облени́лся, о́троку хотя́щу сконча́тися, во Иуде́ю приити́. А́ще же боя́шеся, ниже́ сие́ добро́. Зри у́бо и самы́я глаго́лы та́ко явля́ют не́мощь му́жа. Подоба́ше бо, а́ще и не пе́рвее, но оба́че по е́же мысль обличи́ти, ве́лие не́что мечта́ти о Нем. Услы́ши, ка́ко еще́ до́лу влачи́тся: «Сни́ди бо, рече́, пре́жде не́же умре́ти сы́ну моему́»: и я́ко не могу́щу по сме́рти его́ воскреси́ти, и я́ко не ве́дящу и́миже ве́щи о́трока уста́ви - сего́ ра́ди его́ облича́ет и со́вести каса́ется, показу́я я́ко зна́мения предвари́тельне души́ ра́ди бы́ша. Зде бо не ме́ньша сы́на отца́ немощну́юща мы́слию исцеля́ет, увещава́я нас не от зна́мений, но от уче́ния внима́ти Ему́: зна́мения бо не ве́рным, но неве́рующым и дебеле́йшим. Тогда́ у́бо от стра́сти не зело́ внят глаго́лемым, ра́зве еди́ным и́же о о́троце. По́слежде хотя́ше рече́ное восприима́ти и велича́йшее, и отсю́ду приобрета́ти: е́же у́бо и бысть.

Что же у́бо о со́тнице са́мо обеща́ся приити́, зде же ниже́ зово́мь прихо́дит? Зане́ то́кмо у́бо ве́ра соверше́нна бе. Те́мже и обеща́ся приити́, да навы́кнем му́жа благоразу́мие: зде же еще́ сей несоверше́н бе. Поне́же у́бо горе́ и до́лу принужда́ше Его́ глаго́ля: «Сни́ди», и не уве́дяше я́вствено, я́ко и не и сый исцели́ти мо́жет, показу́ет я́ко и сие́ возмо́жно Ему́, да е́же от себе́ со́тник имя́ше, сие́ сей от е́же не приити́ Иису́су уве́сть. Егда́ у́бо рече́т «а́ще не зна́мения и чудеса́ уви́дите, не ве́руете», сие́ глаго́лет, я́ко подоба́ющую ве́ру не у́ име́ете, но еще́ я́ко о проро́це пребыва́ете. Открыва́я у́бо Себе́ и показу́я, я́ко кроме́ зна́мений подоба́ше ве́ровати Ему́, глаго́лаше я́же и Фили́ппу: «Ве́руеши ли, я́ко Оте́ц во Мне, и Аз во Отце́. А́щеже ни, за дела́ ве́руйте Мне» .

Ева́нгелие: Уже́ же ему сходящу, сретоша его раби глаголюще: «Я́ко сын твой жив есть». А вопраша́ше у́бо от них часа́, во́ньже отра́днее имя́ше, и ре́ша ему́: «Я́ко вчера́ в седмы́й час оста́ви его́ огни́ца». Позна́ у́бо оте́ц, я́ко он час, во́ньже рече́ ему́: сын твой жив есть. И ве́рова сам и дом его́ весь.

Толкова́ние: Зри́ши ли, ка́ко чу́до я́вствено бысть? Не про́сте бо, ниже́ я́ко прилучи́ся свободи́ся беды́, но внеза́пу, я́ко явля́тися не ктому́ естества́ после́дование бы́ти быва́емое, но де́йства Христа́. К саме́м бо прише́д врато́м сме́рти, я́коже и оте́ц изъяви́л есть рек: «Сни́ди пре́жде, не́же умре́ти сы́ну моему́», внеза́пу свободи́ся от неду́га, е́же у́бо и рабо́в воздви́же. Они́ бо не́гли не я́ко благовеству́юще то́кмо, но и я́ко изли́шне про́чее Госпо́дне прише́ствие непщу́юще бы́ти. Срето́ша, и́бо ве́дяху они́ [его́] приходя́ща: те́мже и на само́м пути́ ему́ прилучи́шася. Челове́к, свободи́вся стра́ха про́чее, к ве́ре преклони́ся. Хотя́ показа́ти я́ко пути́ его́ де́ло бысть, и похваля́ется про́чее, я́ко бы не мне́ти ту́не воздви́гнутися, те́мже со опасе́нием вся навыка́ше. И ве́рова сам и дом его́ весь. И́бо бе несомне́тельно сведе́тельство про́чее. И́же бо не су́ще, ниже́ слы́шаще Христу́ бесе́дующу, ниже́ вре́мя ви́дяще, си́и от влады́ки своего́ уве́девше, я́ко сие́ бе вре́мя, несомне́тельно имя́ Христу́ указа́ния си́лы Его́: сего́ ра́ди и они́ ве́роваша.

Нравоуче́ние три́десять пя́тое: Я́ко о всех случа́ющыхся нам подоба́ет благодари́ти Бо́га:

Что ли у́бо от сих наказу́емся? Не чудеса́ ожида́ти, ниже́ зало́ги иска́ти Бо́жия си́лы. Зрю бо и ны́не мно́гих тогда́ благове́йнейшых быва́ющих, егда́ или́ сы́ну злостра́ждущу, или́ жене́ неду́гующей утеше́ния не́коего насладя́тся. Подоба́ет же и не случа́ющимся, пребыва́ти та́коже благодаря́щим [и] сла́вящим. Сие́ бо рабо́в благоразу́мных есть, сие́ кре́пких же и лю́бящых, я́коже подоба́ет Влады́ку. Не то́кмо во осла́бе пребыва́ющым, но и му́чимым притека́ти к Нему́, и́бо и сия́ Бо́жия промышле́ния дела́. «Его́же бо лю́бит Госпо́дь наказу́ет. Бие́т же вся́кого сы́на, его́же прие́млет» .

Егда́ же во осла́бе кто Ему́ угожда́ет то́кмо, не мно́гия показу́ет любви́ зна́мения, ниже́ чи́сте лю́бит Христа́. И что глаго́лю здра́вие и име́ний изооби́лие, или́ нищету́, или́ неду́га? А́ще бо гее́нну услы́шиши, а́ще и и́но что лю́то, ниже́ си́це отступа́ти подоба́ет е́же о Влады́це благохвале́ния: но вся страда́ти и де́йствовати о я́же к Нему́ любви́. Сие́ бо рабо́в благода́рных и души́ неукло́нны. И́же сим о́бразом пребыва́яй и настоя́щее устро́ит удо́бне, и бу́дущих получи́т всех, и мно́гаго наслади́тся от Бо́га дерзнове́ния, его́же бу́ди всем получи́ти благода́тию и человеколю́бием Го́спода на́шего Иису́с Христа́, с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Отпуще́на бы́вша апо́стола, приидо́ста ко свои́м и возвести́ста, ели́ка к ним архиере́и и ста́рцы ре́ша.

Толкова́ние: Не любоче́стия ра́ди пове́даша, но Бо́жия благода́ти зна́мение показа́ху. «Приидо́ша, рече́, к свои́м». Зри у́бо их: не попуща́ются са́ми ко искуше́нием, но приходя́ща до́блественно терпя́т, а́ще и безчи́сленна зла бу́дут.

Су́щее: Они́же слы́шавше, Единоду́шно воздвиго́ша глас к Бо́гу и реко́ша: «Влады́ко, Ты еси́ Бог, Сотвори́вый не́бо и зе́млю, и мо́ре и вся я́же в них, И́же Ду́хом Святы́м, усты́ отца́ на́шего Дави́да о́трока Твоего́ реки́й: Вску́ю шата́шася язы́цы, и лю́дие поучи́шася тще́тным. Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́».

Толкова́ние: Зри у́бо, ка́ко моли́твы их со вся́цем опаса́нием быва́ют. Егда́ досто́йнаго на апо́стольство моля́хуся яви́ти им, си́це глаго́лаху: «Ты Го́споди Сердцеве́дче всех, покажи́…» - проразуме́нию у́бо бя́ше та́мо потре́ба. Зде же, поне́же наусти́тися на супроти́вных подоба́ше, о влады́чествии глаго́лют. Те́мже и си́це нача́ша, «Влады́ко, Ты еси́ Бог, Сотвори́вый не́бо и зе́млю, и мо́ре» и про́чая.

Я́коже тогда́ рече́ «поучи́шася тще́тным», си́це и ны́не «тще́тным поучи́тися, Влады́ко, дай», си́речь, да не на де́ло изы́дут преще́ния их. Сия́ же глаго́лаху, не я́ко не хотя́ще сопроти́вное не́кое или́ приско́рбное пострада́ти, но о пропове́дании се реко́ша: не глаго́лаху бо «изба́ви ны от бед», но «дай рабо́м Свои́м со дерзнове́нием глаго́лати сло́во Твое́». Ви́диши ли, ка́ко вся Бо́га ра́ди про́сят, а ничто́же в свою́ во́лю или́ любоче́стие.

Иринея, епископа Лугдонскаго: Си́и гла́сове Це́ркви, из нея́же прия́ша нача́ло вся Це́ркви, си́и гла́сове митропо́лии гра́жданом но́ваго заве́та, си́и гла́сове святы́х апо́стол, си́и гла́сове учени́к Го́спода Иису́са Христа́, вои́стинну соверше́нных, по вознесе́нии Госпо́дни Ду́хом Святы́м соверше́ным бы́вшим, и призыва́ющих Бо́га, Сотво́ршаго не́бо и зе́млю и мо́ре, Пропове́даннаго проро́ками, и Пома́завшаго о́трока Своего́. Не бе бо тогда́ Уале́нтие ерети́к та́мо, ни Маркио́н, ни про́чии себе́ и повину́ющихся им развра́тницы. Те́мже и послу́ша их вся́ческих Творе́ц Госпо́дь Бог, «подвиза́ся, рече́, ме́сто иде́же бя́ху со́брани, и испо́лнишася вси Ду́ха Свя́та, и глаго́лаху сло́во Бо́жие со дерзнове́нием» вся́кому хотя́щему ве́ровати. Я́коже обеща́ния не́кия прося́ще от Бо́га, проро́чество посреде́ приво́дит, вку́пе же и себе́ утеша́юща, я́ко врази́ всу́е вся поучава́ются: «О́на, рече́ в коне́ц, приведи́, покажи́ я́же тще́тная поуча́хуся».

Су́щее: «Собра́шабося вои́стину во гра́де сем на свята́го О́трока Твоего́ Иису́са, Его́же пома́за, И́род же и понти́йский Пила́т с язы́ки и людьми́ Изра́илевыми, сотвори́ти ели́ка рука́ Твоя́ и сове́т Твой пре́жде нарече́ бы́ти».

Толкование Кирилово: На смире́ние на любо́вь собра́шася тогда́ И́род и понти́йский Пила́т, враждова́ху бо ся пре́жде, и безако́нное суди́ще собра́ша на Христа́ Госпо́дня, си́речь, на Сы́на и Сло́ва Бо́жия. Зли́и, зле погибо́ша, и о уби́йствии Госпо́дни истя́зани бы́ша: е́же бо на Христа́ наважде́ние и на Самого́ Отца́ восхо́дит. А́ще бо Оте́ц в Сы́не, и Сы́н во Отце́, ка́ко не еди́на и́же в Них доса́да бысть?

Су́щее: «И ны́не, Го́споди, при́зри на преще́ния их и даждь рабо́м Твои́м со вся́цем дерзнове́нием глаго́лати сло́во Твое́, внегда́ ру́ку Твою́ простре́ти Ти во исцеле́ния, и зна́мения, и чудеса́ быва́ти и́менем святы́м О́трока Твоего́ Иису́са». И помоли́вшемся им, подви́жеся ме́сто, иде́же бя́ху со́брани, и испо́лнишася вси Ду́ха Свя́та, и глаго́лаху сло́во Бо́жие с дерзнове́нием.

Толкование Златоу́стаго: Си́це навы́кнем и мы моли́тися. И ка́ко у́бо кто не испо́лнится гне́ва, в челове́ки впад, уби́ти его́ хотя́ще и глаго́лати такова́я? Ка́ко у́бо вражды́ не исполни́тся? Но святи́и не таковы́. А́ще и́менем Христо́вем де́йства и зна́мения быва́ют, вели́ко дерзнове́ние ученико́м есть. «И помо́льшемся им, подвиза́ся земля́» рече́. Почто́же си́це бысть? Слы́ши проро́ка глаго́люща: «Призира́я на зе́млю и творя́й ю́ трясти́ся». И па́ки: «Подвиза́ся и тре́петна бысть земля́ от лица́ Госпо́дня». Я́ко бо приима́ше Бог моли́тву их показа́ се. Сотвори́ же се бо́льшаго стра́ха ра́ди и во дерзнове́ние их приводя́: поне́же у́бо нача́ло бе и чу́вственаго тре́боваху зна́мения е́же ве́ровати, посе́м же ника́ко се быва́ет. «И испо́лнишася, рече́, Ду́ха Свя́та», си́речь, распаля́шеся и раздиза́шеся в них благода́ть.

Су́щее: Наро́ду же ве́ровавшему, бе се́рдце и ду́ша еди́на, и име́ние еди́но. И ни еди́н же что от име́ния своего́ глаго́лаше свое́ бы́ти, но бя́ху им вся о́бща. И ве́лию си́лою воздая́ху свиде́тельство апо́столи Воскресе́нию Го́спода Иису́са Христа́.

Толкова́ние: «Мно́жеству же ве́ровавшу, бе се́рдце и ду́ша еди́на» рече́.

Вопро́с: У́бо рцы ми, любо́вь ли нестяжа́ние роди́ или́ нестяжа́ние любо́вь?

Отве́т: Мне ся мнит, я́ко любо́вь нестяжа́ние роди́. Позна́ние бо зло́бе - размеше́ние язы́к, позна́ние же доброде́тели - я́ко бе всем ве́рующим се́рдце и ду́ша еди́на. И та́ко сматря́я Писа́ния обря́щеши: иде́же бо во мно́жестве лю́дий быва́ют ра́спря и разделе́ния и несогла́сие и ели́ка и́на такова́ - зло́бе позна́ния суть, а иде́же едине́ние и обще́ние и си́ла духо́вная в словесе́х - доброде́тели позна́ния суть.

Су́щее: Благода́ть же бе ве́лия на всех их. Не бя́ше бо нищ ни еди́н в них, но ели́цы бо госпо́дие се́лом или́ домово́м бя́ху, продаю́ще приноша́ху це́ны продае́нных, и полага́ху при нога́х апо́стол: дая́ше же ся коему́ждо е́же а́ще кто что тре́боваше.

Толкова́ние: Сего́ ра́ди бе благода́ть Свята́го Ду́ха в них, я́ко никто́же не бе нищь. Ны́не исполня́ется во Второ́м Зако́не глаго́лемое: «Я́ко не бу́дет в тебе́ ни́ща, я́ко благослови́т тя Госпо́дь Бог твой». Зде на де́ло изы́де Го́сподем глаго́лемое: «И́же оста́вит се́ла, или́ до́мы и́мени Моего́ ра́ди, стори́цею прии́мет в ве́це сем, и в бу́дущем живо́т ве́чный насле́дит». Трость бо и мре́жию оста́вльше апо́столы, всех име́ния под вла́стию име́яху, це́ны сел и домо́в, и сама́ телеса́ ве́ровавших, и умре́ти бо их ра́ди мно́гажды изво́лиша, я́коже и Па́вел в мно́зех свиде́тельствует. Зри благогове́инство: «При ногу́, рече́, апо́столом полага́ху», ниже́ в руку́ сме́яху да́ти, ниже́ с го́рдостию приноша́ху, но при ногу́ полага́ху, тех строи́тели сих и госпо́ды творя́ху, да о́бща вся про́чая бу́дут: «И никто́же свое́ ктому́ не нарече́».

Су́щее: Иоси́й же, нарече́нный Варна́ва от апо́стол, е́же есть сказа́емо «Сын утеше́ния», и леви́т, ки́прянин ро́дом, име́я село́, прода́в принесе́ це́ну, и положи́ пред нога́ма апо́стол.

Толкова́ние Златоу́стаго: Мню бо, я́ко несть он Иоси́й, и́же бе с Матфе́ем: он у́бо Иу́ст нарица́шеся. «Нареки́йся Варна́ва, рече́, и́же есть «Сын утеше́ния»». Мню, я́ко и от доброде́тели Варна́ва нарече́ся, я́ко пре́жде сего́ дово́лен бе и прили́чен, повсю́ду смотря́й Ве́тхий Зако́н упражня́емь. Я́коже и ки́прянин бе, си́речь, я́коже и прише́льцы и леви́тяне непотре́бны быва́ху, хо́щет пове́дати я́коже и о Ана́нии про́чее и Сапфи́ры; хотя́ показа́ти му́жа го́рша согреши́вша, пре́жде воспомина́ет ины́х исправле́ния: я́ко толи́ку мно́жеству су́щу и творя́щу такова́я, толи́ки благода́ти, толи́ких зна́мений, и ни от еди́наго сих нака́зан быв, но сребролю́бием помрачи́вся, погубле́ние наведе́ свое́й главе́.

Коне́ц толкова́нию.

Человеколю́бец Благи́й Госпо́дь наш Иису́с Христо́с, не то́кмо душа́м, но и те́лом врачь прии́де. Нас бо ра́ди челове́к восхоте́ бы́ти, да обое́ вку́пе исцели́т, я́коже и о сем разсла́бленем сотвори́. Рече́ бо евангели́ст: «Бе́яше пра́здник жидо́вский, и взы́де Иису́с во Иерусали́м», да не мни́тся проти́вник зако́ну: ку́пно же да и мно́га зна́мения сотвори́т и тем беззло́биваго наро́да к себе привлече́т: в пра́здник бо обы́чай собира́тися бе́яше мн́огим.

«Бе́яше же ту купе́ль нарица́ющися О́вчая», - и́мже омыва́яху же́ртвеных ове́ц утро́бы, - «и та́мо бо еди́ною лета приходя́ а́нгел возмуща́яше ю́, и и́же пе́рвее вла́зяше по возмуще́нии приима́ше исцеле́ние, я́це́м же неду́гом одержи́мь бе́яше». Се же бе о́браз креще́ния: и́мже не всегда́ вода́ та исцеля́ше, но по а́нгелове прихо́де. Та́коже и о нас креще́ния вода́: прие́мши духо́вную благода́ть, душе́вныя исцеля́ет неду́ги.

А́ще слеп есть душе́вныма очи́ма, а́ще ли хром и недви́жимь на доброде́тель или́ сух отча́янием, то всех вода́ креще́ния целит. Тогда́ бо еди́ного то́чию целя́ше, ны́не же а́ще и вся вселе́нная прии́дет ко креще́нию, не ума́лится благода́ть.

«Бе́яше же ту разсла́блен челове́к, три́десяти и осми́ лет лежа́ в боле́зни». Ди́вно бысть разсла́бленаго того́ терпе́ние: я́ко на вся́ко ле́то избы́тие неду́га ча́яше. И запина́емь от си́льных, и не отступи́, ни отча́яся.

Вопроси́ же и́ Госпо́дь: «Хо́щеши ли здрав бы́ти?». Вопраша́ет да ви́дит терпе́ние его́, я́ко ни гне́вается к вопро́су. Кто бо не весть, я́ко хо́щет здра́вия. Той же с кро́тостию отвеща́: «Го́споди, хотел бых, но не и́мам челове́ка вложа́щаго мя в купе́ль». И ничто́же ху́льна отвеща́. И глаго́ла ему́ Госпо́дь: «Возми́ одр свой и ходи́». Того́ ра́ди и повеле́ ему́, да не вмени́тся привиде́нием чу́до. А́ще бо не ве́рою утверди́лися бы́ша у́дове, то не бы могл одра́ носи́ти. Виждь ка́ко: и слы́ша, и ве́рова. «Три́десять и осмь лет не исцели́вся и́мам, и ка́ко ны́не внеза́пу воста́ти и́мам?», - не рече́ такова́го ничто́же, но ве́ровав воста́.

«Бе́яше же суббо́та, егда́ его́ исцели́». Жи́дове же преща́ху ему́ глаго́люще: «Не досто́ит ти в субо́ту взя́ти одра́ своего́». Виждь зависть жидо́в. Не реко́ша: «Кто есть исцели́вый тя?», но о благода́тели умолкну́ша, суббо́ту же зле предложи́ша. Иису́с же уклони́ся пе́рвее, да не а́ки стыдя́ся его́ исцели́вый и по благода́тели возглаго́лет, и мно́жае раждеже́т жидо́вскую я́рость: весть бо лице́ зави́дящаго воставля́ти на гнев зави́димаго.

«Пото́м обре́те его́ Иису́с в це́ркви и глаго́ла ему́: «Се цел еси́ ктому́ не согреша́й, да не горе́й что тебе́ бу́дет»». Научи́мся от него́, я́ко от грех бысть тому́ челове́ку неду́г той. Та́ко и мы: а́ще получи́м проще́ние пе́рвых грех и па́ки в ты́ же впаде́м, то и го́ршая постра́ждем. Виждь добро́ты челове́ка того́: я́ко по исцеле́нии, не в объяде́ние, ни в питие́ вдасть себе, но в це́ркви пребыва́ше и Христа́ доброу́мне пропове́даше жидо́м: «Иису́с есть сотвори́вый мя це́ла», его́же они́ слы́шати не хотя́ху.

Бу́ди же и нам получи́ти здра́вие, на вся́ко дело бла́го разсла́бленым, не иму́ще же челове́ка е́же есть целому́дреный ум, да вве́ржет ны в сле́зную покая́ния купе́ль. Сию́ бо купе́ль покая́ния а́нгел возмуща́ет. Сам же Христо́с Спас наш, да прико́снется се́рдца на́шего боже́ственным Свои́м стра́хом, да́же не предвари́т нас смерть неисце́льных: по той бо несть отпу́ста, ни исцеле́ния грехо́м, но ве́чная му́ка, ея́же бу́ди всем нам убежа́ти, уго́дно зде Бо́гу рабо́тающим, и беззло́бием и кро́тостию да поживе́м. И покая́нием исцеле́вше от грех, и пото́м не оскверни́тися нечис́тыми по́мыслы, да не го́ршее нам бу́дет в безконе́чней му́це, но да сподо́бимся ве́чных благ улучи́ти о Христе́ Иису́се Го́споде на́шем, Ему́же сла́ва и держа́ва, честь и покланя́ние, со безнача́льным Отце́м и Святы́м Ду́хом, ны́не и при́сно и во ве́ки веко́в. Ами́нь.

Мно́гим и вели́ким злым хода́тай быва́ет грех: и ду́шу поврежда́ет и погубля́ет зело́, мно́жицею же и те́лу каса́ется. Умно́жшися зло́ба греха́, и изоби́льна бы́вши, поне́же бо мно́жае ду́ши зле су́щи, безчу́вствени пребыва́ем мно́жайши, те́лу же не здра́вствующу, вся́кими нра́вы промышля́ем укрепи́ти е́, и сокруша́ющаго неду́га, тщи́мся свобожде́ние дарова́ти ему́. Сего́ ра́ди и спасе́ние на́ше многоразли́чно ища́ Госпо́дь, те́лу попуща́ет в неду́г впа́дати, и язви́тися ему́ твори́т, о ни́хже согреша́ющи впа́дает душа́, да́же теле́сными ра́нами и неду́ги души́ исцеле́ти и греха́ свобожда́тися. Ели́ко бо вне́шний наш челове́к растлева́ет, толи́ко вну́трений обновля́ется. Сим бо о́бразом соблу́ждьшаго в Кори́нфе, вели́кий Па́вел испра́ви. Преда́ти его рече́ сатане́, на озлобле́ние те́ла, да́же дух спасе́тся, на го́ршее посече́ние и томле́ние принесе́, да́же бо́льшее спасе́тся. И вра́чеве бо иску́снии, ели́кия неду́ги исцеля́ют, не боле́знеными ли и лю́тыми цельба́ми, жже́нием и ре́заньми исцеля́ют. Я́кобо та́ко есть, и и́стина суть глаго́лемая, яви́ти ве́де и́муть днесь ева́нгельская словеса́, си́це глаго́люща:

Ева́нгелие: Во вре́мя о́но, рече́ Богосло́в евангели́ст Иоа́нн, взы́де Иису́с во Иерусали́м. Есть же во Иерусали́мех на О́вчей купе́ли, я́же глаго́лется евре́йски Ви́фезда, пять притво́р иму́щи, в тех слежа́ще мно́жество боля́щих, слепы́х, хромы́х, сухи́х, ча́ющих движе́ния воде́: а́нгел бо Госпо́день на вся́ко ле́то схожда́ше в купе́ль, и возмуща́ше во́ду. И и́же пе́рвее вла́зяше по возмуще́нии воде́, здра́в быва́ше, яце́м же неду́гом одержи́мь быва́ше.

Толкова́ние: Три пра́здники пра́здноваху иуде́и. Пе́рвый пра́здник па́схи, ме́сяца ма́рта, свобожде́ния ра́ди их, и исхожде́ния е́же из Еги́пта, и прехоже́ния ра́ди Чермна́го мо́ря. Вторы́й же пра́здник пятьдеся́тничный, апри́ля ме́сяца, на воспомина́ние зако́ннаго преда́ния. И поне́же изба́вишася от пусты́нных озлобле́ний, и в зе́млю обетова́нную внидо́ша, и вкуси́ша тогда́ плода́ пе́рвое. Тре́тий же пра́здник, составле́ние ски́нии пра́здноваху, септе́мврия ме́сяца, благодаря́ще о собра́нии плод седми́х ме́сяц, и ски́нии водружа́ху, си́речь коли́бы, по се́лах свои́х ходя́щим, и точи́ла своя́, тогда́ собира́юще плоды́, наполня́ху, и о сих ра́довахуся и веселя́хуся, воспомина́юще и пусты́нное житие́, поне́же бо четы́редесять лет сотвори́ша та́мо, в коли́бах пребыва́юще, и многоразли́чно устроя́еми Бо́гом. В пра́здник же у́бо пятьдеся́тный взы́де Иису́с во Иерусали́м. Восхо́дит у́бо, да не яви́тся я́ко супроти́вен есть зако́ну. Оба́че же явля́ется, спра́здновающь ку́пно с про́чими. Ктому́ же я́ко и мно́гия зна́меньми и поуче́нием приведе́т, и па́чеже мно́жество неле́стное. В пра́здник бо име́яху обы́чай собира́тися, живу́щеи во граде́х и се́лех и страна́х, и рукоде́лателие: в про́чия же дни о рукоде́лиях упражня́еми быва́ху. О́вчая же глаго́лется купе́ль, поне́же бо отлуча́емая овча́та, на же́ртву собира́ху та́мо и вну́треняя их измыва́ху в ней. И а́нгелу приходя́щу на во́ду сию́, я́ко избра́нну чу́до де́яше в ней. Бо́жия бо прему́дрость, путь сотвори́ иуде́ом, издале́ча приводя́щи на ве́ру Христо́ву. Даде́ бо им во́ду очища́ющу скве́рны. Даде́ же и купе́ли сие́ чу́до, прия́тия ра́ди креще́ния. Сего́ ра́ди а́нгел на вся́ко вре́мя сходя́, возмуща́ше во́ду и влага́ше сей целе́бную си́лу, ни бо́ естество́ водно́е са́мо от себе́ исцеля́ет. А́ще бы та́ко, при́сно де́ялося бы се: но а́нгеловем устрое́нием все быва́ше. Та́ко же и в нас свята́го Креще́ния вода́: вода́ у́бо есть про́ста, прие́млющи же освяще́ние и дарова́ние духо́вно, боже́ственым призыва́нием, и моли́твами иере́йскими, душе́вныя неду́ги вся разреша́ет. И тогда́ у́бо неможе́ние повреди́ мно́гия, от исцеле́ния неду́га. Ны́не же крести́тися ни еди́наго поврежде́ния и́мамы. Ниже́ бо еди́ному исцеле́вшу, про́чии без исцеле́ния остаю́т. Но а́ще бо и вся вселе́нная собере́тся, не оскудева́ет благода́ть, изоби́льна бо есть, и неоску́дна пребыва́ет, и излива́ема изоби́лует: всегда́ истоща́ема, и николи́ же оскудева́ема.

Ева́нгелие: Бе же ту не́кий челове́к, три́десять и осмь лет имы́й в неду́зе свое́м. Сего́ ви́дев Иису́с лежа́ща, и разуме́в, я́ко мно́га ле́та у́же имя́ше в неду́зе, глаго́ла ему́: Хо́щеши ли здрав бы́ти? Отвеща́ Ему́ неду́жный: Ей, Го́споди, челове́ка не и́мам, да егда́ возмути́тся вода́, вве́ржет мя в купе́ль. Егда́ же прихожу́ аз, ин пре́жде мене́ сла́зит.

Толкова́ние: Мно́го бо и ве́лие терпе́ние явля́ется, разсла́бленаго о́ного. Лет бо имя́ше три́десят и осмь, и на вся́ко ле́то свободи́тися от неду́га ча́яше: поврежда́ше же ся от сильне́йших, не отступа́ше же оба́че, ни отчаява́шеся. Сего́ ра́ди и Госпо́дь вопраша́ет и́, хотя́ показа́ти нам терпе́ние челове́ка о́ного: ни бо́ я́ко уве́дети хотя́ше вопроша́ше и́, вся бо ве́деше я́ко Всеве́дец Бог. Кто же и неду́жен сый, и не хо́щет здра́вие свое́? Неду́жный же он отвеща́, мно́гим сокруше́нием се́рдца, и кро́тостию, и смире́нием: «Ей Го́споди, хощу́ у́бо исцеле́ти, но не и́мам челове́ка могу́щаго мя в во́ду внести́». Не уничижи́ бо Христа́ вопроси́вшаго и́, ниже́ хуло́ю и го́рестию отвеща́, ниже́ прокля́ день рожде́ния своего́, якова́же быва́ют от малоду́шных, ктому́ же па́че и в мале́йшия неду́ги впа́дающих: но кро́тко и ти́хо, и уми́льно отвеща́ние твори́т. Е́же бо не ве́деше, кто есть вопроша́яй его́, разуме́ же то́кмо, я́ко помощи́ ему́ хо́щет Христо́с, и внести́ и́ в купель. Христо́с же не рече́ ему́: «Хо́щеши ли исцелю́ тебе́?», да́же не яви́тся хваля́ся и велере́чевая.

Ева́нгелие: Глаго́ла ему́ Иису́с: «Воста́ни, и возми́ одр твой, и ходи́». И а́бие здрав бысть челове́к. И взем одр свой, и хожда́ше.

Толкова́ние: О́ле повеле́ния си́ла! Вои́стину бо глас си́лы глас Бо́жий, по свято́му Дави́ду: «Я́коже се даст глас свой, глас си́лы» . Се же и ны́не рече́ Христо́с разсла́бленому: «Востани́». И а́бие де́ло бысть повеле́ние. Ку́пно бо прие́мшу сло́ва си́лу, а́бие востае́т и хо́дит разсла́бленый. Глаго́лет же и нам Христо́с, разсла́бленым душе́ю бра́тие: «Воста́ните и ходи́те», си́речь, не дово́льно бо есть вам то́кмо воста́ти от паде́жа, но и ходи́ти, успе́нием доброде́тельным соверша́юще тече́ние доброде́тели.

Ева́нгелие: Бе же суббо́та в той день. Глаго́лаху же жи́дове исцеле́вшему: «Суббо́та есть, и не досто́ит ти взя́ти одра́ своего́».

Толкова́ние: Хотя́ Христо́с уве́рити бы́вшее чу́до, повеле́ разсла́бленому взя́ти одр. И а́бие усыри́шася у́ди его́, и укрепи́шася. И нося́ше одра́ своего́ и хожда́ше. Повелева́ет ти и ны́не Христо́с, челове́че, глаго́ля: Я́ко вчера́ пове́ржен на одре́ слежа́ше и разсла́блен, и не имя́ше челове́ка, да́же егда́ возмути́тся вода́ вве́ржет тя в купе́ль. Днесь обре́л еси́ Челове́ка, Того́ же и Бо́га. Воста́л еси́ от одра́, па́че же ты взял еси́ одр. И яви́л еси́ благи́й дар. Не па́ки на одр пове́ржешися, согреша́я злым поко́ем теле́сным, и разслабля́емь сластьми́ жите́йскими, но ели́ку си́лу и́маши ше́ствуй, воспомина́я за́поведи. Се у́же здрав еси́, ктому́ не согреша́я, да́же го́ршее что тебе́ не бу́дет, злу я́вльшуся по благо́му де́лу. В суббо́ту же исцеле́ние сотвори́ Христо́с, науча́я челове́ки николи́же пра́здновати доброде́лати и дарова́ти. Належа́щим же жидо́м, и глаго́лющим разслабле́ному:

Ева́нгелие: Не подоба́ет ти взя́ти одра́ своего́, суббо́ты ра́ди. Он же отвеща́ им: И́же мя сотвори́ здра́ва, Той мне рече́: «Возми́ одр твой, и ходи́. Вопроси́ша же его́, кто есть челове́к глаго́ляй ти, возми́ одр твой и ходи́». Исцеле́вый же не ве́деше, Кто есть: Иису́с бо укло́нься, наро́ду су́щу на ме́сте.

Толкова́ние: Со дерзно́вением мно́гим пропове́да благода́теля, разсла́бленый сей, глаго́ля: «Сотвори́вый мя здра́ва, Той ми рече́». Иуде́и же не вопроша́ют его́: «Кто есть сотвори́вый тя здра́ва?», но: «Кто есть ре́кший ти взя́ти одра́ своего́?». На до́брое у́бо не взира́ху, за́вистию растаява́еми и непра́ведно сопротивля́ющеся. Мня́щеежеся им преступле́ние суббо́ты, горе́ и до́лу привожда́ху на осужде́ние и уничиже́ние Христо́во. Иису́с же уклони́ся и́намо, да́же не уве́стно бу́дет, е́же о чудеси́ сведе́тельство. И да не яви́тся, я́ко на лице́ благодари́т его́ исцеле́вший челове́к он. Оста́ви у́бо де́ло, са́мо собо́ю истяза́емо бы́ти и сведе́тельствовати и́стину: и́бо уничижа́юще и истяза́юще иуде́и, слы́шано и я́вейше чу́до Христо́во творя́т.

Ева́нгелие: Пото́м же обре́те его́ Иису́с в це́ркви и рече́ ему́: «Се здрав еси́, ктому́ не согреша́й, да не го́рше ти что бу́дет».

Толкова́ние: Познава́ем у́бо, я́ко пре́жде от грех роди́ся челове́ку неду́г. Вси бо неду́зи от грех случа́ются быва́ти. Не́кои же и от объяде́ния, и пия́нства, и от поко́я быва́ют. Не то́кмо бо в бу́дущий суд, храни́т Бог челове́ком грехи́, но и я́звит разли́чно, еще́ живы́м су́щим в телеси́, и пре́жде вели́каго и све́тлаго дне, егда́ всем суди́ти и́мать. Оба́че же вся зла́я случа́ющася, не́кая у́бо грех ра́ди быва́ют, не́кая же на исправле́ние нра́ва стра́ждущих. К тому́ же и о затре́нии отча́явшихся, я́коже и на фарао́не бысть.

И́бо исце́льными прегре́шеньми неду́гующим, запреща́ет сло́во глаго́ля, посеща́ти па́лицею прегреше́ния их и ра́нами непра́вды их. Боля́щим же неисце́льно глаго́лет: Что же ктому́ ра́ними бу́дете? Вся́кий бо грех ку́пно, сла́сти ра́ди быва́ет, и сего́ погубле́ние страда́нием и ско́рбию, или́ во́льною, или́ нево́льною, покая́нием, или́ попуще́нною напа́стию, промышле́нием боже́ственым нахожда́емою. И егда́ прии́дет к тебе́ напа́сть ненаде́янна, не о́ного пови́нна твори́, от него́же ти прии́де, но чесо́го ра́ди ищи́, и обре́тшу ти испра́ви: поне́же бо или́ от о́ного, или́ от и́наго, испи́л бы ве́де Бо́жияго суда́ пелы́нь. Ели́ко у́бо злонра́в еси́, е́же страда́ти не отрица́йся, да́же страда́нием смири́вся, зло́бу изблева́еши. Напа́стнии бо нахо́ди, о́вым у́бо о пре́жде бы́вших гресе́х погубле́ния быва́ют, о́вым же о ны́не де́емых, ины́м же о хотя́щих де́ятися, отсече́ние прино́сится, кроме́ е́же искуше́ния ра́ди случа́ющихся, я́коже на И́ове. Име́яй же ра́зум боже́ственых суде́б, целе́ния смышля́я благода́рно терпи́т, е́же сих ра́ди находя́щая ему́ напа́сти, никого́же ино́го пови́нна творя́, но своя́ прегреше́ния то́кмо смышля́я. Безу́мнии же, неве́дяще Бо́жию прему́друю мысль, согреша́юще и наказу́ема, или́ Бо́га, или́ челове́ки о свои́х гресе́х пови́нных творя́т. Я́коже бо злопита́ющих пелы́нь го́ркий по́льзовает, та́коже бо и злонра́вым зло страда́ти поле́зно есть. О́вым у́бо ублажа́ет утро́бу, о́вых же пока́ятися творя́т такова́я целе́ния. И в нево́льных власте́х ми́лость Бо́жия ди́вно сокрове́на есть, терпя́щаго на покая́ние привлача́, и избавля́я от ве́чных мук. И се ве́мы, я́ко и́стинно есть, е́же о гее́нне сло́во и о му́ках бу́дущих, и я́ко присносу́щна есть му́ка о́на и безконе́чна. И глаго́лющии, я́ко еди́нем днем соблуди́хом, да ка́ко безсме́ртно му́чими бу́дем?, - прельща́ются я́ве и облича́еми быва́ют. Се у́бо и разсла́бленый сей, не в толи́цех ле́тех согреши́, в ели́цех му́чимь бя́ше, но все соверше́но житие́ челове́ка изнури́ в долготе́ томле́ния его́: не вре́менем бо суди́ма быва́ют прегреше́ния Бо́гом, но са́мое то изволе́ние греха́, и по изволе́нии де́яющаго неподо́бная, быва́ет и томле́ние. Обрета́ем же и се: А́ще бо и зло и ве́лие томле́ние прии́мем о пре́жде бы́вших гресе́х, та́же па́ки в ты́я же грехи́ впаде́м, лю́тейше па́ки му́чими бу́дем и го́ршее томле́ние прии́мем. Неиспра́вльший бо ся пред ним томле́нием, ниже́ уцелому́дрствовався Бо́жиим наказа́нием и судо́м, на го́ршая му́ки прихо́дит, я́ко безчу́вственый презри́тель. А́щели же и мно́гия челове́ки злы́я ви́дим богате́ющих, и благодне́вных, и здра́вих, и свире́пеющих, и сла́вимых, и разширя́ющихся, и ничто́же стра́ждуще в житии́ сем - но о́но ве́дети до́лжни есмы́, е́же бо не прия́ти му́ки зде таковы́м и ничто́же зло пострада́ти, вина́ быва́ет томле́нию ве́лию и му́кам лю́тым в ве́це бу́дущем. Сего́ ра́ди и боже́ственый апо́стол Па́вел глаго́лаше: «Я́ко суди́ми от Го́спода наказу́емся, да́же с ми́ром неосужде́ни бу́дем». Зде бо суди́ми от Го́спода и наказу́еми от Го́спода, не осужде́ни бу́дем та́мо с ми́ром, ниже́ по́слани бу́дем в му́ки. Я́же бо зде наказа́ния поуче́ния суть, а я́же та́мо томле́ния, и му́ки ве́чныя и безконе́чныя. Ели́цы же мно́го согреша́ем и не наказа́емся в ве́це сем, па́че боя́тися и трепета́ти до́лжни есмы́, поне́же мно́жатся нам томле́ния и му́ки, немуче́ния ра́ди, и долготерпе́ния Бо́жия. Бла́го у́бо есть бра́тие наказа́тися ны́не и очи́ститися в житии́ сем, а не му́кам о́ным по́сланым бы́ти, егда́ вре́мя Суда́ бу́дет, а не очище́ния. Несть у́бо зло е́же зде му́читися, но е́же быти досто́йным му́кам о́ным. Сего́ ра́ди молю́ся, не ропта́ти ни о чем же о случа́ющихся нам ско́рбных и злых. Не стужа́ем си на Бо́га, но со благодаре́нием вся терпи́м и после́дуем благоразу́мием во всех приходя́щих нам от Бо́га. Той бо вся я́же на по́льзу нам устрая́ет и на исправле́ние на́ше лю́тая и ско́рбная попуща́ет быва́ти. Поне́же бо подаю́щу нам Бо́гу дарова́ния Своя́, да́же к Нему́ зрим, и благодари́м, и сла́вим, и велича́ем и́мя Его́ свято́е. Мы же презира́ем, и ле́ностно прилежи́м е́же благодари́ти и испове́датися Ему́, и неразуме́ем благода́ти Его́, и да́ры безчи́сленыя и́хже прия́хом, но презира́ем боже́ственая повеле́ния и запове́дания, и превозноша́емся, и вы́симся, и по во́ли се́рдца на́шего хо́дим, и согреша́юще пред Ним безсту́дно и безсра́мно, прегорчева́ем и прогне́ваем Бо́га. Сего́ ра́ди посыла́ет ра́ны и я́звы. Сего́ ра́ди и стужа́ет нам, искуше́ньми разли́чными и пле́ны, и напа́стьми, и скорбьми́, да́же внима́ние прии́мем, и прибега́ем к Нему́, и упова́ем на спасе́ние Его́, и на си́лу, и на мно́жество благода́ти Его́ и промышле́ния Его́, и и́щем Ца́рствие Его́ и пра́вду, и ве́руем кре́пко, я́ко блага́я вся и спасе́ная пода́ти и́мать нам изоби́льно. Не то́кмо бо егда́ подае́т блага́я Бог, тогда́ то́кмо Благ есть и Человеколюби́в. Но и му́ки Его́ и томле́ния, ве́лия часть благода́ти есть. Поне́же бо и врачь, не то́кмо егда́ во ово́щники и цве́тия изво́дит неду́жныя, ниже́ егда́ в ба́ню и купе́ли водны́я приво́дит, тогда́ благ есть. Но и егда́ без пи́щи им пребыва́ти вели́т, егда́ ре́жет, и егда́ го́ркая напая́ния напая́ет, и тогда́ врачь есть иску́сен та́коже и свою́ любо́вь показу́ет бо́льше. Естество́м же благи́й Бог, и благи́х ве́де Пода́тель быва́ет. Сво́йство бо есть блага́го Бо́га на́шего, е́же по́льзовати и промышля́ти Своя́ де́ла. И я́коже Врачь душа́м и телесе́м на́шим, показа́ти нам хо́щет неизрече́нныя ми́лости Своего́ ми́лования и благода́ти и изба́вити нас от настоя́щаго гне́ва, и стра́шныя ну́жди, и преще́ния сме́ртнаго, и плене́ния, и ско́рби. И мир и тишину́ пода́ст, потопля́ющимся и стра́ждущим вра́жиими напа́стьми и прило́ги. И е́же на нас поше́ствие их и зло́бу, и непра́вду ея́же ра́ди стра́ждем отврати́т. Того́ бо еди́ного ми́лости и человеколю́бия и си́лы есть де́ло, е́же изба́витися нам от таковы́х зол, и беды́, и ско́рби, и на́ше исцели́ти ослепле́ние. Я́ко к Тому́ прибега́ем, и припа́даем, и припла́каемся. И разсла́блени су́ще, и во глубине́ зол слежа́ще, мольбы́ и моле́ния приноша́ти Ему́ сподо́бимся. И ве́де пода́ти и́мать ру́ку по́мощи, воскреси́ти нас от греха́, и на во́лю боже́ственых свои́х за́поведей наста́вит ходи́ти, и на непополза́емый путь безконе́чнаго Ца́рствия Своего́ тещи́ укрепи́т нас и ве́чным благи́м сподо́бит, я́ко Тому́ подоба́ет сла́ва и держа́ва, И́стинному Бо́гу и Спа́су на́шему, ны́не и при́сно, и во ве́ки веко́в. Ами́нь.