Понедельник четвертой седмицы по Пасце

Оте́ц Мой не су́дит никого́же, но суд весь даде́ Сы́ну, да вси почита́ют Сы́на я́коже почита́ют Отца́.

Мно́гаго нам тре́ба есть тща́ния во всех, о́ люби́мицы. И́бо сло́во да́мы испыта́ния постра́ждем опа́сная и глаго́л, и веще́й. Не до настоя́щаго бо ве́щи на́ша стоя́т, но и и́но не́кое нас отсю́ду прии́мет живота́ устрое́ние, и суди́лищу предста́нем стра́шному. «Подоба́ет бо нам предста́ти пред суди́щем Христо́вым, жа прии́мет ко́ждо я́же с те́лом соде́я или́ бла́го или́ зло» .

Сие́ у́бо суди́лище да помышля́ем при́сно, и си́це возмо́жем вы́ну бы́ти доброде́тельни. И я́коже бо отри́нувый от души́ день он, я́коже узду́ растерза́в, на стремни́ны но́сится, «оскверня́ют бо ся, рече́, путие́ его́ на вся́ко вре́мя», и вину́ положи́в, наведе́: «и отъи́мутся судьбы́ Твоя́ от лица́ его́» . Си́це вы́ну сего́ име́я и стра́ха, целому́дрене ше́ствует: «Воспомина́й бо, рече́, после́дняя своя́, и во век не согреши́ши» . Оста́вивый бо нам согреше́ния, ны́не Сей ся́дет. Тогда́ умры́й за нас, Сей яви́тся па́ки судя́ естеству́ всему́: «Второ́е бо, рече́, без греха́ яви́тся, ожида́ющым Его́ во спасе́ние» . Те́мже и зде глаго́лаше:

Ева́нгелие: Оте́ц Мой су́дит ни еди́ному же, да суд весь даде́ Сы́нови, да вси почита́ют Сы́на я́коже почита́ют Отца́.

Толкова́ние: Те́мже у́бо и Отца́ Его́ нарече́м ли, рече́? Не бу́ди. Сего́ бо ра́ди рече́ «Сы́на», да пребыва́юще Его́ [Сы́на чтем, я́коже Оте́ц. Кто же глаго́лет Его́] Оте́ц, не ктому́ Сы́на я́коже Отца́ поче́л есть, [но] да все слия́в.

Поне́же бо благоде́тельствуеми челове́цы не си́це ощуща́ют, «весь суд» Ему́ даде́, рече́: да а́ще и страх в честь Свою́ привлече́ весь же, егда́ рече́т сие́, глаго́лет я́ко и му́чити и почести́ Госпо́дь есть всех и́хже у́бо хо́щет. А е́же «даде́» рече́ся, да не нерожде́нне Его́ вознепщу́еши, ниже́ два Отца́ бы́ти помы́слиши.

Вся бо ели́ка есть Оте́ц, и сия́ есть и Сын, роди́вся и пребыва́я во е́же бы́ти Бог Сын. И да навы́кнеши я́ко е́же «даде́» сие́ - е́же «роди́л» есть, услы́ши от ино́го сие́ само́е явля́емо: «Я́коже бо Оте́ц име́ет живо́т в Себе́, рече́, си́це даде́ и Сы́нови живо́т име́ти в Себе́» . Что у́бо? Пе́рвие ли Его́ роди́ и тогда́ даде́ живо́т? Дая́й бо су́щу не́коему дае́т. Не у́бо бе жи́зни кроме́ роди́вся? Но сие́ у́бо ниже́ де́мони помы́слят, с нече́стием бо, мно́го и неразу́мие име́ет. Я́коже у́бо е́же «даде́ живо́т» - род Его́ Живо́т есть, си́це е́же «даде́ суд» - Судию́ Его́ роди́. Да́же бо не услы́ша, я́ко вино́вна име́ет Отца́ премене́ние существа́, вознепщу́еши и че́сти умале́ние, Той прихо́дит тебе́ судя́й, благоро́дия и отсю́ду показу́я. Име́яй бо о́бласть му́чити и почита́ти и́хже хо́щет, та́яже мо́жет Отцу́. Поне́же а́ще не сие́ есть, но по́сле роди́вся прия́т честь, что бысть я́ко Ему́ по́сле почести́ся? От кото́раго преспея́ния на сие́ прии́де, я́ко бы досто́инства сие́ прия́ти и рукоположи́тися? Не стыди́телися, челове́ческая сия́ и худа́я разуме́ния нетле́нному Естеству́ и ничто́же чу́ждо име́ющему, безсту́дне си́це вводя́ще? Что у́бо ра́ди си́це веща́ет, рече́? Я́ко бы удо́бь прия́тно бы́ти сло́во и высо́ким предпутие́ сотвори́ти глаго́лом. Сего́ ра́ди смеша́ет сия́ о́нем, и о́на сим. Зри у́бо изнача́ла:

«Оте́ц Мой де́лает, рече́, и Аз де́лаю» - показа́ от сих единоче́стие. Но «хотя́ху Его́ уби́ти». Что у́бо твори́т па́ки? Рече́нием у́бо упуща́ет и разуме́ние же сия́ полага́ет глаго́ля си́це: «Не мо́жет Сын о Себе́ твори́ти ничто́же». Та́же па́ки на высо́кая возво́дит сло́во: «Я́же бо Он твори́т, сия́ и Сын та́коже твори́т» глаго́ля. Та́же па́ки на смире́ннейшее: «Оте́ц бо лю́бит Сы́на и вся показу́ет Ему́, я́же Сам твори́т, и бо́льша сих пока́жет Ему́». Та́же па́ки на высоча́йшее: «Я́коже бо Оте́ц воскреша́ет ме́ртвы и животвори́т, си́це и Сын и́хже хо́щет, животвори́т». Посе́м па́ки смире́нная вку́пе и высо́кая: «Ниже́ бо Оте́ц су́дит ни еди́ногоже, но весь суд даде́ Сы́нови». Та́же на высоча́йшее: «Да вси почита́ют Сы́на, я́коже почита́ют Отца́». Ви́дел ли еси́, ка́ко сло́во упещря́ет, высо́кими же смире́нными сие́ истыка́я имены́ и глаго́лы, я́кобы и су́щим тогда́ бы́ти удо́бь прия́тно, и су́щым по сих ничто́же вреди́тися от высо́ких, и о ины́х подоба́ющее прие́мшим разуме́ние? А́ще бо не сие́ есть ниже́ схожде́ния ра́ди реко́шася рече́нная, что ра́ди высо́кое прилежа́ху? И́же бо до́лжен ве́лие о себе́ веща́ти, егда́ ма́ло что рече́т и смире́нно, непщева́ние бла́го ли́чно име́ет, смотре́ния не́коего ра́ди сие́ творя́: А и́же худа́я глаго́лати до́лжен вы́ну, что ра́ди превосходя́щая его́ естество́ веща́ет? Сие́ бо не ктому́ смотре́ния не́коего, но после́дняго нече́стия есть. Я́коже мы у́бо пра́ведну и Бо́гу ле́пу вину́ рещи́ име́ем смире́нных глаго́л: схоже́ние, и е́же наказа́ти смиря́тися, и сею́ нам устрая́емое спасе́ние, и́же и Сам явля́я и́нде глаго́лаше: «Сия́ же глаго́лю да вы спасе́теся» .

Поне́же бо ко Иоа́ннову прибеже́ сведе́тельству, Свое́ оста́вль, е́же недосто́йно Его́ вели́чия бе, ху́дости толи́кия глаго́л положи́ вину́, глаго́лаше: «Сия́ же глаго́лю да вы спасе́теся». Вы же, глаго́лющии не име́ти ту же о́бласть и си́лу Ро́ждшему, что у́бо рече́те, егда́ услы́шите Его́ веща́юща и́миже ра́вну показу́ет ю́же ко Отцу́ и си́лу, и о́бласть, и сла́ву? Что же ра́ди и ту же честь истязу́ет, зело́ недоста́точен сый, я́коже глаго́лет? И ниже́ зде ста́ет то́кмо, но и наво́дит глаго́ля:

Ева́нгелие: И́же не чтет Сы́на, не чтет Отца́, посла́вшаго Его́.

Толкова́ние: Зри́ши ли, ка́ко сплета́ется честь Сыно́вня че́сти О́тчей. И что сие́ рече́? Сие́ бо и о апо́столех есть уви́дети: «Прие́мляй бо вас, рече́, Мене́ прие́млет» . Но та́мо у́бо поне́же ра́бское присвоя́ет Свои́м, сего́ ра́ди сие́ рече́.

Зде же поне́же есть еди́но существо́ и сла́ва. Сего́ ра́ди о апо́столех не рече́ся «да почита́ют». И́бо два от царе́й су́щых, еди́н досажда́емь, сдосажда́ется и други́й. И наипа́че а́ще досажда́емый сын бу́дет. Досажда́етбося и ору́жнику досади́вшуся, но не та́коже, но я́ко хода́таем. Зде же не си́це, но я́ко Собо́ю. Сего́ ра́ди предвари́в рече́: «Да почита́ют Сы́на, я́коже почита́ют Отца́», да егда́ рече́т «не почита́яй Сы́на, не почита́ет Отца́» - ту же вознепщу́еши честь. Не про́сте бо не почита́яй, но непочита́яй си́це, я́коже рех, рече́, не почита́ет Отца́. И ка́ко , рече́, того́же существа́ посыла́яй и посыла́емый?

Па́ки на челове́ческая прено́сит сло́во, и не помышля́еши, я́ко сия́ вся за ничто́же сие́ реко́шася, но я́ко да вино́вное уви́дим и да в Саве́ллиев не впаде́м неду́г, и иуде́йская не́мощь сим исцели́тся о́бразом, я́кобы непщева́тися ему́ богопроти́вну бы́ти: и́бо глаго́лаху: «Сей несть от Бо́га, [Сей от Бо́га] не прии́де». Ко е́же зазре́ние сие́ отъя́ти, не си́це высо́кое я́коже смире́нная слага́ше: сего́ ра́ди ча́сте до́лу и горе́ глаго́лаше «посла́тися», не я́ко да умале́ние не́кое Ему́ вознепщу́еши глаго́л, но да загради́ши оне́х уста́. Сего́ ра́ди и прибега́ет ча́сте ко Отцу́, положи́в посреди́ и Свое́ благоро́дство. А́ще бо всяк досто́инству своему́ глаго́лал бы, не бы у́бо прия́ли они́ глаго́лемая, иде́же у́бо и от ма́лых таковы́х глаго́л и гоня́ху его́, и ка́мением мно́жицею. А́ще же, ко о́нем зря, вся веща́л бы смире́нная, по сих мно́зи вреди́лися бы.

Те́мже примеша́ет и растворя́ет уче́ние, и си́ми е́же рех смире́нными, худо́е рече́нных отража́я разуме́ние от ум име́ющых, и показу́я ничто́же Ему́ прили́чно су́ще отню́д.

Воспро́с: Е́же бо «посла́тися» схожде́ния есть, Бог же везде́ близ есть. Что у́бо ра́ди рече́ «посла́тися»?

Отве́т: Дебеле́йше глаго́лет, е́же ко Отцу́ единомышле́ние явля́я. Си́це у́бо и я́же по сих вообразу́ет глаго́лы, сие́ состро́ити хотя́:

Ева́нгелие: Ами́нь, ами́нь, глаго́лю вам, рече́, слу́шаяй словеса́ Моя́ и ве́руя посла́вшему Мя, име́ет живота́ ве́чнаго.

Толкова́ние: Зри́ши ли, ка́ко ча́сте сие́ полага́ет, исцеля́я о́на зазре́ние, и отвсю́ду и про́чими, и стра́хом, и обеща́нием благодея́ния е́же к Нему́ любопре́ние заключа́я, и отсю́ду па́ки сходя́ мно́го глаго́лы? Ниже́ бо рече́: «Слу́шаяй словеса́ Моя́ и ве́руяй Мне», вои́стинну бо го́рдость вознепщева́ли бы вещь бы́ти и киче́ние глаго́л изли́шне, а́ще бо по толи́ком вре́мени и безчи́слеными чудесы́ сие́ непщева́ху веща́ющу Ему́, си́це мно́го па́че тогда́.

Ева́нгелие: Глаго́лют у́бо Ему́ тогда́: «Авраа́м у́мре и проро́цы умро́ша. Ка́ко Ты глаго́леши, я́ко слу́шаяй сло́во Мое́ и ве́руяй, не вку́сит сме́рти?».

Толкова́ние: Да и́же у́бо и не тогда́ возве́рятся, что рече́?

Ева́нгелие: Слу́шаяй сло́во Мое́ и ве́руяй Посла́вшему Мя, име́ет живота́ ве́чнаго.

Толкова́ние: Сие́ же нема́ло удо́бь прия́тно твори́т сло́во, е́же уве́дети им, я́ко Отцу́ ве́руют, слу́шающе Его́. Сие́ бо прие́мше со усе́рдием, и про́чая хотя́ху удо́бнейшая прия́ти. Я́коже и смире́нное не́что рещи́, высо́ким споспеша́ше.

Ева́нгелие: Сей у́бо, рече́, у́зрит живо́т ве́чный, и на суд не прии́дет, но пре́йдет от сме́рти в живо́т.

Толкова́ние: И двема́ си́ми удо́бь прия́тнейши твори́т сло́во: и тем е́же Отцу́ бы́ти ве́руему, и тем е́же наслади́тися благи́х покаря́ющемуся. А е́же «на суд не прии́дет» - сие́ есть: не му́чится. Смерть бо не сию́ рече́ я́же зде, но ве́чную. Я́коже у́бо и живо́т он - безсме́ртен.

Ева́нгелие: Ами́нь амин́ь глаго́лю вам: гряде́т час и ны́не есть, егда́ ме́ртвии услы́шат глас Сы́на Бо́жия, и услы́шавши, оживу́т.

Толкова́ние: И рек глаго́лы, глаго́лет и е́же де́лы показа́ние. Поне́же бо глаго́лаше: «Я́коже Оте́ц воскреша́ет ме́ртвых и животвори́т, си́це и Сын и́хже хо́щет животвори́т», да не возмни́тся киче́ние бы́ти ве́щи и го́рдость, подае́т и ю́же де́лы и́стинну, глаго́ля: «Гряде́т час». Та́же, да недо́лго вознепщу́еши вре́мя, рече́: «И ны́не есть, егда́ ме́ртвии услы́шат глас Сы́на Бо́жия и оживу́т». Ви́дел ли еси́ госпо́дьство зде и бла́гость неизрече́нную? Я́коже бо в воскресе́нии, си́це и ны́не бу́дет, рече́. И́бо тогда́, гла́са слы́шаще повелева́ющаго, воста́нем, «в повеле́нии бо Бо́жии, рече́, ме́ртвии воскре́снут» . И отку́ду я́вствено сие́, рече́, я́ко не киче́ние рече́нная? От ни́хже приведе́: «Я́ко ны́не есть».

А́ще бо в бу́дущее вре́мя отвеща́л бы то́кмо, хотя́ше сло́во зазо́рно бы́ти от них. Ны́не же подае́т указа́ние: «Мне бо, рече́, пребыва́ющу с ва́ми, сие́ бу́дет». Не бы у́бо не моги́й обеща́л во вре́мя о́но, я́ко бы не мно́жайшему сме́ху до́лжну бы́ти от обеща́ния. Та́же и по́мысла наво́дит рече́нных указа́тельна, глаго́ля:

Ева́нгелие: Я́коже бо Оте́ц име́ет живо́т в себе́, си́це даде́ и Сы́нови живо́т име́ти в Себе́.

Толкова́ние: Зри́ши ли непреме́нное и еди́нем то́кмо разли́чие явля́ющее, тем е́же у́бо Отца́ бы́ти, о́вем же е́же Сы́на? Е́же бо «даде́» рече́ние, сие́ вво́дит разделе́ние еди́но, ина́я же вся ра́вна и непреме́нна показу́ет. Те́мже я́вствено, я́ко с толи́кою о́бластию вся твори́т и си́лою, ели́кою Оте́ц, и не отъину́ду возмога́ет.

Си́це бо име́ет живо́т я́коже Оте́ц. Сего́же ра́ди и е́же на про́чее а́бие прилежи́т па́ки, да от сего́ и о́но разуме́ем. Ко́е ли у́бо сие́? Е́же «даде́ Ему́ суд твори́ти». И что ра́ди воскресе́ние и суд горе́ и до́лу обраща́ет? «Я́коже бо Оте́ц, рече́, воскреша́ет ме́ртвых и животвори́т, си́це и Сын и́хже хо́щет животвори́т». И па́ки: «Оте́ць су́дит ни еди́ногоже, но суд весь даде́ Сы́ну». «Я́коже Оте́ць име́ет живо́т в Себе́...». И па́ки: «Услы́шавшии глас Сы́на Бо́жия, оживу́т». И зде же рече́: «Суд даде́ Ему́ твори́ти». Что у́бо ра́ди сия́ обраща́ет ча́сте: суд, и живо́т, и воскресе́ние?

Я́ко сия́ вся па́че всех суть я́же и возводи́ти могу́ща и неосла́бна послу́шателя. Уве́ривыйбося, я́ко и воскре́снет, и сему́ даст испыта́ние прегреше́нных, а́ще и ничто́же и́но ви́дяше зна́мение, сие́ прие́мь, притече́т вся́чески, кро́тка устрая́я себе́ Судию́:

Ева́нгелие: Я́ко Сын Челове́чь есть, не чуди́теся сему́.

Толкова́ние: Па́вел у́бо Самоса́дский не си́це рече́, но ка́ко? «О́бласть даде́ Ему́ и суд твори́ти, я́ко Сын Челове́чь есть». Но ни еди́ноже после́дование сие́ си́це глаго́лемо. Не сего́ бо ра́ди прия́т суд, я́ко челове́к есть. Поне́же, что возбраня́ше всем челове́ком бы́ти судия́м? Но поне́же у́бо неизрече́ннаго существа́ о́ного есть Сый, сего́ ра́ди есть и Судия́. Си́це у́бо прочита́ти подоба́ет: «Я́ко Сын Челове́чь есть, не чуди́теся сему́». Поне́же бо ви́дяшеся зря́щым противля́тися глаго́лемому и вя́щше ничто́же непщева́ху бы́ти, ра́зве про́ста челове́ка, глаго́лемая же бо́льше не́жели по челове́ку бе́ша, па́чеже бо́льша не́жели по а́нгелу и Бо́га Еди́ного - сие́ разреша́я сопротивле́ние, наведе́: «Не чуди́теся, я́ко Сын Челове́чь есть».

Ева́нгелие: Я́ко гряде́т час, во́ньже вси су́щии во гробе́х услы́шят глас Его́, и изы́дут сотво́ршии блага́я в воскресе́нии живота́, сотво́ршии же зла́я в воскресе́ние суда́.

Толкова́ние: И что ра́ди не рече́: «Не чуди́теся, я́ко Сын Челове́чь есть, и́бо и Сын Бо́жий есть», но воскресе́ния воспомяну́? Положи́л есть у́бо сие́ высоча́йше, глаго́ля: «Услы́шат Сы́на Бо́жия». А́ще же зде умолча́, да не чуди́шися. Де́ло бо рек е́же Бо́гу сво́йствено бе, дае́т слы́шащым от сего́ смышля́ти про́чее, я́ко и Бог бе, и Бо́жий Сын. От Него́ у́бо глаго́лемо ча́сте, близ стои́т у́бо тогда́, о́нем от сложе́ния же чудес показу́емо, не тя́жеснейше уче́ние творя́ше. Ибо сложе́ния плету́щии, егда́ ча́сте положи́ша до́блествене пока́жут иско́мое, ниже́ наво́дят сами сконча́ние мно́жицею.

Но благоразу́мнейша устроя́юще послу́шателя и побе́ду светле́йшу творя́ще, само́го о́ного устроя́ют сопроти́в глаго́лющаго отве́т изнести́, я́ко бы наипа́че им усужда́ти предстоя́щых супе́рников, и́же о них нося́ших суд. Е́же у́бо о Ла́заре помяну́в воскресе́ния, суда́ умолча́. Не сего́ бо ра́ди воскре́се Ла́зарь. А е́же повсю́ду рек и сие́ приложи́л есть: «Я́ко сотво́ршии блага́я изы́дут в воскресе́нии живота́, зла́я же сотво́ршии в воскресе́нии суда́». Си́це и Иоа́нн принужда́ше послу́шателя суда глаго́ля: «И я́ко не ве́руяй в Сы́на, не у́зрит жи́зни, но гнев Бо́жий пребыва́ет на нем». Си́це и сам Никоди́ма: «Ве́руяй в Сы́на, глаго́лаше, к Нему́ не су́дится, не ве́руяй же уже́ осужде́н есть». Си́це и зде, и суди́лища, и му́ки помина́ет я́же о лука́вых де́йствах. Поне́же бо рече́ вы́шша: «Я́ко слу́шаяй словеса́ Моя́ и ве́руяй Посла́вшему Мя не су́дится», да не вознепщу́ет кто, я́ко сие́ довле́ет ко спасе́нию то́кмо, и я́же от жития́ приложи́л есть рек: «Я́ко блага́я сотво́ршии в воскресе́ние живота́, зла́я же сотво́ршии, в воскресе́ние суда́».

Поне́же у́бо рече́ Ему́ вселе́нней всей да́ти сло́во, и всем от гла́са Его́ воскре́снут, - вещь но́ву, и еще́ и ны́не не ве́руему от мно́гих, и мня́щихся ве́ровати, не у́бо тогда́ от иуде́й, - услы́ши, ка́ко сию́ устрая́ет па́ки, не́мощи нисходя́ послу́шателей:

Ева́нгелие: Не могу́ Аз о Себе́ твори́ти ничто́же. Я́коже слы́шу сужду́, и суд Мой пра́веден есть. Я́ко не ищу́ во́лю Мою́, но во́лю Посла́вшаго Мя.

Толкова́ние: И́бо не ма́ло пре́жде бе дав указа́ние, разсла́бленаго стягну́в. Те́мже ниже́ пе́рвие о воскресе́нии бесе́дова, до́ндеже о́но сотвори́, е́же воскресе́ния не зело́ оску́дно бе.

И суда́ назна́мена тогда́, по стягну́ти телеси́, рек: «Се здрав был еси́, не ктому́ согреша́й, да не го́рше что тебе́ бу́дет». Но оба́че и Ла́зарево провозглаша́ет, и е́же вселе́нныя и поне́же у́бо два сия́ воскресе́ния предрече́: и Ла́зарево, е́же а́бие па́че сбыва́емо, и е́же вселе́нныя, до́лгими по́слежде бу́дуще вре́мены. Сие́ у́бо от разсла́бленаго уверя́ет и бли́зости вре́мени глаго́ля: «Гряде́т час и ны́не есть», о́ноже от Ла́зарева воскресе́ния бы́вшими уже́ не у́ бы́вшая назре́ния приводя́. И сие́ везде́ творя́ща его́ есть уви́дети, два полага́юща прорече́ния или́ и три, и бу́дущая от быва́емых при́сно уверя́юща. Но оба́че, толи́ка рек и сотвори́в, поне́же еще́ не́мощнейши бе́ша, не довли́тся си́ми, но ины́ми глаго́лы их спря́тает любопре́ние, глаго́ля: «Не могу́ о Себе́ твори́ти ничто́же. Я́коже слы́шу сужду́, и суд Мой пра́веден есть, я́ко не ищу́ во́лю Мою́, но во́лю Посла́вшаго Мя». Поне́же бо стра́нна не́кая и премене́на от проро́к ви́дяшеся глаго́лати: они́ бо глаго́лаху, я́ко Бог есть судя́й зе́млю всю, си́речь, челове́ческий род. И сие́ Дави́д везде́ пропове́дая, глаго́лаше: «Су́дит лю́дем пра́востию» . И: «Бог судия́ пра́веден и кре́пок и долготерпели́в» . И проро́цы же вси и Моисе́й. Христо́с же глаго́лаше: «Оте́ц су́дит ни еди́ного, но Аз есмь судя́й». [Поне́же] дово́льно же сие́ смути́ти слы́шащаго тогда́ иуде́янина и устро́ити па́ки богопроти́вна Его́ непщева́ти, зело́ зде схо́дит сло́во и толи́ко ели́ко истяза́ше их не́мощь, я́кобы губи́тельное сие́ зазре́ние из корени́ отъя́ти. И рече́: «Не могу́ Аз о Себе́ твори́ти», си́речь, ничто́же стра́нно, ниже́ премене́но, ниже́ е́же не хо́щет Оте́ц быва́емо у́зрите или́ глаго́лемо услы́шите. И пе́рвее рек, я́ко Сын Челове́чь есть, и показа́, я́ко челове́ка Его́ еще́ непщева́ху, си́це и зде полага́ет. Я́коже у́бо вы́шше рек: «Е́же слы́шахом глаго́лем и е́же ви́дехом сведе́тельствуем» . И Иоа́нн: «Е́же ви́де и слы́ша, сие́ сведе́тельствует, и све́детельства Его́ никто́же прие́млет» - о изве́стных обоя́ глаго́лаху разуме́х, а не о слу́се и зре́нии. Си́це и зде, слу́ха рек, ничто́же и́но явля́я, ра́зве я́ко не мо́щно и́но не́что восхоте́ти Ему́, ра́зве е́же Оте́ц. Но не рече́ си́це я́вствене, не у́бо прия́ли бы от гото́ваго пре́жде си́це слы́шавше. Но ка́ко?

Сходи́тельне и челове́чне зело́: «Я́коже слы́шу, сужду́». Па́ки не уче́ние глаго́ля зде, не рече́ бо «я́коже учу́ся», но «я́коже слы́шу», но ниже́ «я́ко тре́буя слы́шания» сие́ рече́: не то́кмо бо е́же не учи́тися тре́бующе бе, но и е́же тре́бовати слы́шати - единомышле́ние е́же явля́яй непреме́нное суда́, а́ки бы глаго́лал: «Си́це сужду́, я́коже Сам Оте́ц судя́й был бы, та́же рече́». «И вем, я́ко суд Мой пра́веден есть, я́ко не ищу́ во́лю Мою́, но во́лю посла́вшаго Мя Отца́».

Что глаго́леши? Име́еши ли́бо во́лю и́ну па́че Отца́? И у́бо и́нде рече́: «Я́коже аз и ты еди́но есма́» . О хоте́нии глаго́ля и единомышле́нии: «Даждь им, да и ти́и в Нас еди́но бу́дут» , си́речь, в я́же о Нас ве́ре. Зри́ши ли, я́ко наипа́че ве́дящаяся бы́ти смире́но, сия́ суть я́же име́ют сокрове́нно высокоразуме́ние? Е́же бо гада́тельствует, таково́ есть: я́ко не и́но у́бо есть О́тче хоте́ние, ино́го же Его́, но я́коже еди́ныя мы́сли, еди́но хоте́ние, си́це Мое́ и О́тче. И не чуди́ся, а́ще толи́ко рех совокупле́ние. И́бо о Ду́се сим де́йствует указа́нием Па́вел, глаго́ля: «Кто бо ве́дяше от челове́к я́же челове́ка, ра́зве дух челове́ка я́же в нем, си́це и я́же Бо́жия никто́же весть, ра́зве Дух Бо́жий» . Ничто́же у́бо и́но, ра́зве сие́ рече́: я́ко несть Мне хоте́ние и́но и Свое́ па́че О́тча, но а́ще что Он хо́щет, сие́ и Аз, и а́ще что Аз, сие́ и Он. Я́коже у́бо Отцу́ никто́же у́бо порече́т судя́щу, си́це ниже́ Мне - от того́же бо изволе́ния обоя́ суд изно́сят. А́ще же челове́чнейше сия́ бесе́дует, не чуди́ся: челове́ка бо Его́ еще́ непщева́ху про́ста. Те́мже подоба́ет наипа́че в таковы́х не глаго́лемая истяза́ти то́кмо, но и непщева́ние слы́шащым прилага́ти, и си́це глаго́лемых слу́шати, я́ко ко о́ному рече́нных: поне́же мно́га после́дуют безме́стная. Смотри́ бо: «Не ищу́ во́лю Мою́, но во́лю О́тчу». Те́мже у́бо и́но есть Его́ во́ля, и зело́ недоста́точна, и ниже́ про́сте недоста́точна, но ниже́ поле́зна, рцы. А́ще спаси́тельна бе и соглаша́юща О́тчей, что ра́ди сию́ не взыску́еши? Челове́цы бо в ле́поту сие́ глаго́лют, я́ко мно́ги во́ли име́юще, па́че [не] уго́дных Бо́гу . Ты же что ра́ди сие́ глаго́леши, по всем уподо́бився Отцу́? Се бо ниже́ му́жа опа́снаго и распя́таго рече́т у́бо кто бы́ти глаго́л. А́ще бо Па́вел си́це себе́ сраствори́ во́ли Бо́жии, я́ко рещи́: «Живу́ же не ктому́ аз, живе́т во мне Христо́с» , ка́ко всех Влады́ка глаго́леши, «я́ко не ищу́ во́лю Мою́, но во́лю Посла́вшаго Мя», я́ко ино́му Су́щу о́ному? Что у́бо есть е́же рече́? Я́ко о челове́це произво́дит сло́во и ко мне́нию слы́шащих. Поне́же бо от пре́дних показа́ глаго́лемая, о́ва у́бо боголе́пне, о́ва же челове́чне бесе́довав, па́ки я́ко челове́к состроя́ет та́же и рече́: «Я́ко суд Мой пра́веден есть». Отку́ду я́вствено? «Я́ко не ищу́ во́лю Мою́, но во́лю Посла́вшаго Мя». Я́коже бо о челове́цех, самолю́бия свобожде́ный, не у́бо име́ет пра́ведне порица́тися, я́ко па́че потре́бнаго осуди́в, си́це ниже́ Мне ны́не мо́жете запреща́ти. Хотя́й бо своя́ соста́вити, не́гли зазри́тся у́бо от мно́гих си́це растлева́ти пра́ведное. Не смотря́яй же я́же своя́, кое́ у́бо име́ет непщева́ние е́же непра́ведное усужда́ти? Сего́ у́бо по́мысла и о Мне истязу́йте: а́ще бо глаго́лал бых не посла́тися от Отца́, ниже́ во О́ного сла́ву быва́емых возноси́л бых, не́гли у́бо кто от вас вознепщева́л бы, я́ко хотя́ Себе́ сотвори́ти све́тла, не глаго́лю су́щая. А́ще же ино́му вменя́ю и возлага́ю быва́емая, что ра́ди или́ отку́ду у́бо име́ет глаго́лемая? Зри́ши ли, иде́же сло́во сведе́ и отку́ду суд Свой пра́ведный рече́ бы́ти - те́мже у́бо и от мно́гих еди́н отвещава́я рек бы? Зри́ши ли, е́же мно́жицею рех, ка́ко сия́ет я́вствене? Что же ли есть е́же рех? Я́ко премно́жество смире́ния рече́ний, сие́ наипа́че увещава́ет ум име́ющих, не от гото́ваго прие́млющых глаго́лемая низлага́ти, но устрая́ет на высоту́ приити́ разуме́ний и до́ле влача́щихся тогда́ со мно́гим пома́лу воставля́ет удо́бством.

Нравоуче́ние три́десять девя́тое: о непамятозло́бии и ми́лостыни, и я́ко подоба́ет не то́кмо нам про́стым но му́дрым бы́ти в догма́тох и в житии́:

Сия́ у́бо вся помышля́ющи, да не претека́ем про́сте рече́нная, но со опасе́нием да истязу́ем вся, вину́ глаго́лемых везде́ сматря́ющи. И не непщу́ем довле́ти нам во отве́т неве́дение и простоту́: не про́стым бо повеле́ то́кмо бы́ти, но и му́дрым. Да удержи́м у́бо с простото́ю и мудрова́ние, и о догма́тех, и о исправле́ниих жития́. И су́дим себе́ зде, «да не с ми́ром осужде́ни бу́дем тогда́» . И такови́ да быва́ем о клевре́тех, якова́ хо́щет о нас бы́ти ⷡ҇Влады́ку на́шего: «Оста́ви бо нам до́лги на́ша, я́коже и мы оставля́ем должнико́м на́шым». И вем у́бо, я́ко не терпи́т кре́пце уязвля́ема душа́. Но а́ще помы́слим, я́ко не опеча́лившему, но са́ми себе́ да́руем, вско́ре оста́вим яд гне́ва. И́бо и́же сто дина́рий испове́дав прегреши́вшему, не клевре́та оби́дил есть, но себе́ безчи́сленым тала́нтом пови́нна сотвори́в, и́хже пе́рвее оставле́ние прия́т. Егда́ у́бо ины́м не оставля́ем, себе́ не оста́вим. Не у́бо Бо́гу глаго́лем то́кмо: «Не помяни́ грехо́в на́ших», но и к себе́ ко́ждо: «Да не помяне́м грехо́в клевре́тов и́же к нам бы́вших» - и́бо ты пе́рвее су́диши твои́м, и тогда́ после́дует Бог. Ты зако́н пи́шеши оставле́ний и муче́ний, и и́же о таковы́х изно́сиши суд. И е́же помяну́ти и е́же не помяну́ти Бо́га, ты госпо́дь еси́. Сего́ ра́ди Па́вел оста́вити повелева́ет, «а́ще кто к не́коему име́ет порече́ние» , и не про́сте оста́вити, но я́ко бы́ти ниже́ оста́нку пребы́ти. Поне́же и Христо́с, не то́кмо не изнесе́ на среду́ на́ших грехо́в, но ниже́ нас саме́х согреши́вших воспомяну́, ниже́ рече́: «сия́ и сия́ согреши́л еси́», но и оста́ви, и загла́ди рукописа́ние, ниже́ вмени́в прегреше́ния, я́коже и сие́ Па́вел рече́ . Сие́ у́бо затвори́м и мы, и от мы́сли да загла́дим вся. А́ще у́бо и бла́го не́что бы́вшее бу́дет от опеча́лившаго, сие́ да помышля́ем то́кмо. А́ще печа́льно и ско́рбно, да отри́нем и да загла́дим, я́ко бы ниже́ сле́ду оста́ти. А́щеже ничто́же бла́го нам бысть, толи́ко па́ки мзда бо́льши проща́ющим нам. И мно́жайших благоиску́ство. Ини́и бде́ньми и до́лу лега́ньми, безчи́слеными злострада́ньми заглажда́ют прегреше́ния. Ты удо́бнейшим путе́м е́же не памятозло́бствовати глаго́лю, вся леть есть погуби́ти прегреше́нная. Что у́бо на себе́ мечь вонжа́еши, я́коже бе́сящиися и шата́ющиися, и бу́дущия себе́ отрева́еши жи́зни? Потре́бно вся де́йствовати, я́кобы получи́ти. А́ще бо настоя́щая си́це жела́нна, что у́бо кто рече́т о о́ной, иде́же отбеже́ боле́знь, печа́ль и воздыха́ние? Та́мо убоя́тися сме́рти несть, ниже́ конца́ оне́х вознепщева́ти благи́х. Блаже́ни и треблаже́ни, и мно́жицею сие́, и́же блаже́ннаго о́ного наслади́вшеся жре́бия. Я́коже у́бо окая́нни и тма́ми сие́, и́же блаже́ннаго о́ного сие́ себе́ отве́ргша. И что есть, рече́, творя́щее нас наслади́тися жи́зни о́ноя? Услы́ши само́го Судя́щаго, с ю́ношою не́коим бесе́дующим о сих. Поне́же у́бо рече́: «Что сотвори́в живота́ ве́чнаго насле́дствую?» , рече́ ему́ ины́я за́поведи, сконча́в бли́жняго любо́вь.

И не́гли кто рече́т от слы́шащых по бога́тому о́ному, «я́ко и мы сия́ сохрани́хом: ниже́ бо украдо́хом, ни прелюбоде́йствовахом, ни уби́хом». Но не у́ и сие рещи́ возмо́жеши, я́ко возлюби́в бли́жняго я́коже люби́ти подоба́ше. А́ще бо зави́де кто, или́ оклевета́, или́ отмсти́ оби́димому, или́ не подаде́ су́щых - не возлюби́. Ны́не же не сие́ то́кмо повеле́ Христо́с, но и и́но. Ко́е ли у́бо? «Сие́ прода́й своя́ име́ния, рече́, и дай ни́щым. И прииди́, после́дуй Мне» . Е́же де́лы подража́ние глаго́ля после́дование. Что ли у́бо от зде навыка́ем? Пре́жде у́бо, я́ко не вся име́ющему сия́ несть пе́рвых получи́ти су́щых во жре́бии о́ном. Поне́же бо рещи́ ему́, я́ко вся сотвори́х, я́ко недоста́вшу вели́ку не́коему в соверше́ние благоиску́ство рече́. «А́ще хо́щеши соверше́н бы́ти, прода́й своя́ име́ния и дай ни́щым. И прииди́ после́дуй Мне». Пре́жде у́бо сие́ есть навы́кнути. Второ́е же я́ко и само́го о́ного обличи́ ту́не кича́щеся: и́же бо во име́нии толи́ком живы́й, и ины́х презира́я в нищете́, ка́ко у́бо бли́жняго возлюби́л есть? Не у́бо, ниже́ о́но и́стинствова.

Но мы и́но и сия́ да твори́м, и тщи́мся су́щее истощи́ти, и не́бо купи́ти. А́ще бо о досто́инстве кто жите́йстем бога́тство все издаде́ мно́жицею, досто́инство бу́дущему зде пребыва́ти, и́мже зде мно́го пребыва́ющу вре́мя - мно́зи бо и пре́жде мно́гия кончи́ны сего́ совле́кшеся нача́льства, ини́и же сего́ ра́ди и жи́зни самы́я мно́жицею, но оба́че и сия́ вся ве́дяще истоща́ют о сем. А́ще у́бо о сем толи́ка творя́т, о пребыва́ющем о́ном и неотъе́млемом что у́бо бу́дет нас окая́ннейше, ниже́ ма́ло произдаю́щых, ниже́ сия́ подаю́щых, я́же и ма́ло по́сле су́ще зде оста́вим? Кото́раго у́бо сия́ не бу́дут неи́стовства, я́же не хотя́ще отъе́млемся, сие́ в настоя́щее хотя́щим да́ти и с собо́ю прия́ти не восхоте́ти? Но а́ще у́бо на смерть кто вел бы ся, та́же предлежа́ло бы вся издае́мо свободи́ти, и благода́ти у́бо вещь вознепщева́ли бы́хом. Ны́не же предстоя́ще, и́же в гее́нну путь отводи́мых, по́лы даю́щим свободи́тися, изволя́ем и му́читися и удержа́ти ту́не я́же не на́ша, я́ко бы я́же на́ша изда́ти.

Ко́е у́бо прии́мем отвеща́ние, кою́ ми́лость, си́це удо́бь ше́ствену нам пути́ к жи́зни, по стремни́нам нося́щеся и безпло́дны ше́ствующе путь, и су́щых зде, и су́щых та́мо, всех себе́ лиша́юще, мо́щно обоя́ припло́дити со осла́бою? Но а́ще и не пе́рвие, ны́не у́бо да возни́кнем, и [в] нас саме́х быва́юще, настоя́щая да устро́им в потре́бная и бу́дущая со удо́бством да прии́мем, благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва, со Святы́м Ду́хом, и ны́не, и при́сно, и во ве́ки веко́в. Ами́нь.

А́ще Аз сведе́тельствую о Себе́, сведе́тельство Мое́ несть и́стинно. Ин есть сведе́тельствуя о Мне, и вем, я́ко и́стинен есть.

А́ще кто струну́ ру́дную копа́ти на́чнет, хи́трости сея́ не иску́сен сый, зла́то у́бо не соде́лает, вся же про́сте и вку́пе слива́я, труд неполе́зен претерпева́ет и вре́ден. Си́це и боже́ственых писа́ний после́довании неве́дящии, ниже́ сво́йство и зако́ны его́ истяза́юще, но про́сте и еди́ным о́бразом вся проходя́ще, зла́та с земле́ю смеша́юще, никогда́же внутрь лежа́щее ей сокро́вище обрета́ют. Сия́ же рех ны́не, поне́же у́бо предлежа́щее нам ме́сто име́ет мно́го зла́та, не у́бо я́вствено, но мно́гих посы́пано свы́ше утверже́нием. Те́мже подоба́ет копа́ющим и очища́ющым на при́сная разуме́ния приити́. Кто бо не а́бие смути́лбыся, слы́шав Христу́ глаго́лющу: «А́ще Аз сведе́тельствую о Себе́, сведе́тельство Мое́ несть и́стинно»? И́бо во мно́гих ме́стех явля́ется сведе́тельствовав о Себе́. Самаряны́ни у́бо бесе́дуя, рече́: «Аз есмь Христо́с». И слепо́му: «Глаго́ляй с тобо́ю, Он есть». И иуде́ем: «Ка́ко вы глаго́лете, я́ко ху́лит, зане́ рех Сын Бо́жий есмь», и друго́ицы же во мно́гих ме́стех сие́ твори́т. А́ще у́бо вся сия́ ло́жна бу́дут, ка́я нам бу́дет спасе́ния наде́жда? Отку́ду же и́стинну обря́щем, егда́ сама́я И́стинна глаго́лет: «Я́ко несть сведе́тельство Мое́ и́стинно»? Не сие́ же ви́дится сопротивле́ние быти то́кмо, но и и́но, не ме́ньши сего́. Происходя́ бо рече́: «И а́ще Аз сведе́тельствую о Себе́, сведе́тельство Мое́ и́стинно есть». Ко́е у́бо, рцы ми, прииму́? Ко́е бы́ти вознепщу́ю ло́жно? А́ще си́це прии́мем про́сте я́коже рече́ся, ни а́ще испыту́юще, ни вину́, ни и́но от таковы́х ничто́же - обоя́ бу́дут ло́жна. А́ще бо сведе́тельство Его́ несть и́стинно, ниже́ сие́ само́е и́стинно, не второ́е то́кмо, но и пре́жнее. Что у́бо есть рече́нное? Мно́гаго нам тре́ба есть бде́ния, па́чеже Бо́жия благода́ти, да не во глаго́лех пребу́дем про́стых. Си́це бо и еретики́ заблужда́ют, егда́ ниже́ ра́зума истеза́ют глаго́лющаго, ниже́ нра́ва глаго́лемых о слы́шащих. А́ще бо не сия́ приложи́м и ина́я же: си́речь, времена́, и мес́та, и изволе́ние послу́шателя, - мно́га после́дствуют безме́стная.

Что же у́бо есть рече́нное? Хотя́ху глаго́лати ему́ иуде́и: «А́ще Ты сведе́тельствуеши о Себе́ Сам, сведе́тельство Твое́ несть и́стинно». Сего́ ра́ди сия́ предвари́в, рече́, а́ки бы глаго́лал: «Не́гли рече́те Мне, я́ко Тебе́ не ве́руем, никто́же бо вско́ре себе́ сведе́тельствуя достове́рен в челове́цех».

Что у́бо? Несть ли и́стинно не про́сте прочита́ющему, но прилага́ющему оне́х непщева́ние, си́речь, я́ко «вам несть и́стинно», не у́бо к досто́инству Своему́, но к непщева́нию оне́х веща́ше сия́. И егда́ у́бо глаго́лет «сведе́тельство Мое́ несть и́стинно», ра́зум облича́ет оне́х и хотя́щее Ему́ о оне́х сопротивле́ние наводи́тися. Егда́ же «я́ко а́ще и Аз о Себе́ сведе́тельствую, и́стинно есть сведе́тельство Мое́» - само́е показу́ет ве́щи естество́, зане́ я́ко Бо́га достове́рна Его́ подоба́ше непщева́ти и о Себе́ глаго́люща.

Поне́же бо рече́ воскресе́ние ме́ртвых и суд, и я́ко ве́руяй ему́ не осу́дится, но в живо́т прии́дет, и я́ко ся́дет всех вины́ истязу́я, и я́ко ту же о́бласть име́ет О́тчу и си́лу, хотя́ па́ки вся си́я устрая́ти, и и́нако ну́жне спротивле́ние их положи́ пе́рвое. Рех, рече́, «зане́ я́коже Оте́ц воскреша́ет ме́ртвых и животвори́т, си́це и Сын и́хже хо́щет животвори́т». Рех, «я́ко Оте́ц ни еди́ного же су́дит, но суд весь даде́ Сы́нови». Рех, «я́ко подоба́ет почита́ти С́ына я́коже Отца́». Рех, «я́ко не почита́яй Сы́на, ниже́ Отца́ почита́ет». Рех, «я́ко слу́шаяй словеса́ Моя́ и ве́руя не у́зрит суда́, но пре́йдет от сме́рти в живо́т». Рех, я́ко глас Мой ме́ртвых воскреси́т, о́вех у́бо ны́не, о́вех же по сих. Рех, я́ко истяжу́ сло́во прегреше́нных всех. Рех, я́ко пра́ведне сужу́, и возда́рую исправля́ющих.

Поне́же у́бо сия́ вся изрече́ние бе, и глаго́лемая у́бо вели́ка, указа́ние же не бе не у́ рече́но я́вствено о́нех, но нея́снейше, пе́рвее полага́ет хотя нас строе́ние рече́нных устремля́тися си́це не́како глаго́ля: «А́ще и не глаго́лы си́ми, но не́гли рече́те «вся сия́ Ты глаго́леши, не́си же достове́рен сведе́тель Себе́ сведе́тельствуя»» - сим пер́вым разор́яя их любопре́ние е́же положи́ти, е́же хотя́ху рещи́, и показа́ти, я́ко ве́дяще их неизрече́нныя мы́сли. И сие́ пе́рвое показа́ние Своея́ си́лы подая́, по́слежде по сопротивле́нии, и ина́я указа́ния подае́т я́вствена и не сопроти́в рече́нна, трие́х привод́я сведе́телей глаго́лемых: де́ло я́же от него́ бы́вшая, сведе́тельство О́тче и Иоа́ннову про́поведь. И полага́ет пе́рвое ме́ньшее Иоа́нново, рек бо: «Ин есть, сведе́тельствуя о Мне, и вем, я́ко и́стинно есть сведе́тельство его́», наведе́:

Ева́нгелие: Вы посла́сте ко Иоа́нну и [той] сведе́тельствова и́стинну.

Толкова́ние: И́бо а́ще несть и́стинно сведе́тельство твое́, ка́ко глаго́леши, «Зане́ вем, я́ко и́стинно есть сведе́тельство Иоа́нново» и «сведе́тельствова и́стинну»? Зри́ши ли, ка́ко я́вствено и отсю́ду я́ко «е́же сведе́тельство Мое́ несть и́стинно», к непщева́нию оне́х рече́ся? Что у́бо а́ще он сведе́тельствова благода́тию, рече́? Да́же бо не сие́ глаго́лют, зри ка́ко и сие́ отъя́т непщева́ние. Не рече́ бо: «И Иоа́нн сведе́тельствова Мне», но пе́рвое: «Вы посла́сте ко Иоа́нну». Не бы же у́бо посла́ли бы́сте, а́ще недостове́рна вознепщева́ли бы́сте. И е́же у́бо бо́льше: не посла́ша бо его́ о Христе́ вопраша́юще, не о нем [саме́м]. А его́же в су́щих о себе́ достове́рна непщева́ху, мно́го па́че в су́щих о ино́м. Обыко́хом бо я́ко рещи́ вси челове́цы, не си́це ве́ровати о себе́ глаго́лющим, я́коже о ины́х. Сих же си́це достове́рна бы́ти непщева́ше, я́ко и в су́щих о себе́ не тре́бовати сведе́тельства ино́го. По́сланнии бо не ре́ша е́же «что глаго́леши о Христе́?», но «ты кто еси́, что глаго́леши о себе́ само́м?». Си́це ве́лие му́жа чу́до имя́ху. Сие́ у́бо все назна́мена за е́же рещи́: «Вы посла́сте ко Иоа́нну». Сего́ ра́ди евангели́ст не я́ко посла́ша рече́ то́кмо, но и о по́сланных опа́сно сло́вит, я́ко бе́ша иере́и и от фарисе́й, не прилу́чшиися, ниже́ отве́ржении, ниже́ якови́и растле́тися и прельсти́тися, но со опасе́нием дово́льни навы́кнути, я́же от о́ного глаго́лемая.

Ева́нгелие: Аз же от челове́ка сведе́тельства не прие́млю.

Толкова́ние: Что у́бо ра́ди Иоа́нна приве́л еси́? И́бо ниже́ о́ного челове́ка сведе́тельство бе: «Посла́вый бо мя, рече́, крести́ти водо́ю, Он мне рече́» - я́ко бы и Иоа́нново сведе́тельство, Бо́жие сведе́тельство бе. От О́ного бо навы́к глаго́лаше, я́же глаго́лаше. Но да не глаго́лют: «Отку́ду сие́ я́ко от Бо́га уве́дел есть», и о сих пребыва́ют, от преходя́щаго их зауща́ет еще́, к непщева́нию их бесе́дуя. Ниже́ бо бе ле́по сия́ мно́гим ве́дети, но, я́ко от себе́ глаго́лющу, еще́ внима́ху Иоа́нну. Сего́ ра́ди рече́: «Аз от челове́ка сведе́тельства не прие́млю». И а́ще не хоте́л бы еси́ от челове́ка сведе́тельства приима́ти и отсю́ду укрепля́тися, что ра́ди приве́л еси́ сведе́тельство его́? Да́же у́бо не сия́ глаго́лют, услы́ши, ка́ко сие́ испра́ви наведе́нием таково́е сопротивле́ние.

Рек бо, я́ко «от челове́ка сведе́тельство не прие́млю», наведе́:

Ева́нгелие: Но сия́ глаго́лю, да вы спасе́ни бу́дете.

Толкова́ние: А е́же глаго́лет, таково́ есть: Аз у́бо не тре́бовах сего́ сведе́тельства, Бог сый, челове́ческаго. Поне́же па́че ему́ внима́сте, и всех достове́рнейша непщева́сте, и о́ному у́бо я́ко проро́ку притеко́сте, - и́бо град на Иорда́н излия́ся, - Мне же ниже́ чудоде́йствующу ве́ровасте: сего́ ра́ди вам воспомина́ю сведе́тельства о́ного.

Ева́нгелие: Он бе свети́льник горя́ и светя́. Вы же восхоте́сте возра́доватися в час све́та его́.

Толкова́ние: Да́же бо не глаго́лют: что у́бо он рече́, мы же не прия́хом, - показу́ет, я́ко и прия́ша рече́нная, [и́бо ниже́ прилу́чшыхся посла́ша], и восхоте́ша возра́доватися. Си́це и му́жу чудя́хуся, и глаго́лемых сопроти́в рещи́ не имя́ху когда́. А е́же к «ча́су», ле́гкость их показу́ющаго есть, и я́ко во ско́ре его́ отскочи́ша.

Ева́нгелие: Аз же име́ю сведе́тельство бо́льше Иоа́ннова.

Толкова́ние: А́ще бо хоте́ли бы́сте по после́дованию веще́й приима́ти ве́ру, от дел па́че вас приве́л бых. Но поне́же не хо́щете, ко Иоа́нну вас привожу́, не я́ко о́ного тре́буя сведе́тельства, но поне́же вся творю́, яко бы вас спасти́.

Име́ю бо сведе́тельство Иоа́ннова бо́льше - еже от дел. Но не сие́ смотря́ю то́кмо, я́ко от достове́рных благоприя́тен вам был бых, но я́ко и от ближа́йшых вам и от вас чуди́мых. Та́же косну́вся их и рек, я́ко «к ча́су восхоте́ша возра́доватися во све́те его́», и привре́менное показа́в тща́ние и неутверже́нно, «свети́льника» его́ нарече́, явля́я, я́ко не от себе́ имя́ше свет, но от духо́вныя благода́ти. А е́же к разделе́нию его́ , сие́ не положи́л есть, я́ко Сам есть Со́лнце пра́вды, но еще́ гада́тельствуя сие́, косну́ся зело́ их, показу́я я́ко от того́же изволе́ния от него́же о́ного пренебрего́ша, ниже́ Христу́ ве́ровати возмо́гоша: и́бо чуди́маго от них «к ча́су почуди́шася» то́кмо. Я́ко а́ще не сие́ сотвори́ли бы, вско́ре у́бо их ко Иису́су наста́вил бы. Показа́ у́бо их отвсю́ду недосто́йных су́щых проще́ния, наведе́ глаго́ля: «Аз же име́ю сведе́тельство бо́льша Иоа́ннова». Ко́е ли у́бо? Сие́ е́же от дел, «дела́ бо, рече́, я́же дасть ми Оте́ц, да совершу́ сия́, сама́ та дела́ о мне сведе́тельствуют, я́ко Оте́ц мя посла́». Зде разсла́бленаго, неиспра́вленаго воспомя́ну и ины́х мно́жайшых.

Глаго́лы бо, рекл бы у́бо кто от них, киче́ние бы́ти и дру́жбы Иоа́нновы благода́ть, а́ще и ниже́ сие́ мо́щно бе им рещи́ о Иоа́нне – му́же, со опасе́нием любому́дрити ве́дящем и сиц́е от них чуди́мом. Ве́щи же [Христо́ве] не ктому́ ниже́ от неи́стовящых зело́ сие́ зазре́ние име́ти можа́ху. Сего́ ра́ди второ́е сие́ наведе́ рек сведе́тельство: «Де́ло я́же даде́ ми Оте́ц, да совершу́ сия́, та дела́ я́же Аз творю́ сведе́тельствуют о Мне, я́ко посла́ Мя Оте́ц». Зде ко оклевета́нию разреше́ние субо́ты стои́т. Поне́же бо глаго́лаху: «Ка́ко мо́жет бы́ти от Бо́га, я́ко суббо́ты не храни́т?». Сего́ ра́ди рече́: «Я́же даде́ Мне Оте́ц». А́ще и госпо́дство творя́ше, но показу́я со мно́гим вели́чеством, я́ко ничто́же сопроти́вно Отцу́ твори́т: сего́ ра́ди и е́же мно́го ме́ньше положи́л есть. Что бо ра́ди не рече́ та́ко: «Де́ла я́же даде́ Ми Оте́ц, сведе́тельствуют о Мне я́ко ра́вен есмь Отцу́?». Обоя́ бо бе́ша от дел уве́дети, я́ко [не твори́т ничесо́же проти́вно и я́ко] ра́вен есть Ро́ждшему, е́же и́нде устрая́я глаго́лаше: «А́ще Мне не ве́руете, дело́м ве́руйте, да позна́ете и ве́руете, я́ко Аз во Отце́, и Оте́ц во Мне». Обоя́ у́бо ему́ сведе́тельствоваху, я́ко ра́вен бе Отцу́ и я́ко ничто́же сопроти́вно творя́ше о Нем. Что у́бо ра́ди не си́це рече́, но бо́льшее оста́вль, сие́ положи́л есть? Я́ко потща́тельное сие́ пре́жде бе. А́ще же бо и мно́го ме́ньше е́же уве́ритися, я́ко от Бо́га прии́де, е́же уве́ритися, я́ко Бог есть ра́вен Ему́, [о́но бо и проро́ков бе, сие́ же не ктому́]ⷩ҇, оба́че о ме́ньшем мно́го полага́ет тща́ние, ве́дый я́ко сему́ рече́нну, и́но бу́дет про́чее удо́бь прия́тно. И бо́льшаго помяну́в сведе́тельства, ме́ньшее его́ де́ло полага́ет, да и сие́ прии́мут. И «посла́вый же Мя Оте́ц, рече́, и Той сведе́тельствует о Мне». И где сведе́тельствова о Нем? На Иорда́не: «Сей есть Сын Мой возлю́бленный, Того́ послу́шайте». Но и сие́ уготовле́ния тре́боваше. Иоа́нново бо я́вствено бе, са́ми бо посла́ша и отврещи́ся не имя́ху. И е́же от зна́мений та́коже, ве́дяху бо быва́емыя, и от исцеле́ннаго, слы́шаша и ве́роваша, те́мже и порица́ху. Оскудева́ше у́бо про́чее е́же о Оте́ческом сведе́тельстве показа́ти. Та́же хотя́ сие́ устрая́ти, рече́: «Ниже́ глас Его́ слы́шасте когда́». И ка́ко Моисе́й глаго́лет: «Моисе́й отвещева́ше, Бог же глаго́лаше» ? Ка́коже Дави́д рече́: «Язы́ка его́же не ве́дях услы́ша» . И па́ки Моисе́й: «А́ще есть язы́к тако́в, и́же слы́ша глас Бо́жий?» . «Ниже́ ви́де Его́ ви́десте», и́бо и ви́дети его́ глаго́лются и Иса́ия, и Иереми́я, и Иезекеи́ль, и ини́и мно́жайши. Что у́бо есть е́же рече́ Христо́с? В любому́дреное их возво́дит уче́ние пома́лу, показу́я, я́ко ниже́ глаго́л о Бо́зе, ниже́ вид, но высоча́йшь о́браз есть и веща́ние таковы́х.

Я́коже бо рек я́ко «ниже́ гла́са Его́ слы́шасте», не сие́ рече́, я́ко глас у́бо испуща́ет неслы́шателен же; си́це рек «ниже́ вид Его́ ви́десте», не сие́ рече́, я́ко вид у́бо име́ет незри́телен же - но я́ко ничто́же сих о Бо́зе. Да́же бо не глаго́лют: я́ко кичи́шися, Моисе́ю глаго́ла Бог еди́ному, [Сие́ у́бо и глаго́лаху: «Мы ве́мы я́ко Мои́сею глаго́ла Бог. Сего́же не ве́мы отку́ду есть»] ‐ глаго́лет, я́ко ниже́ глас о Бо́зе, ниже́ вид. И что глаго́лю, рече́, но то́кможе я́ко гла́са Его́ не слы́шасте, ниже́ вид Его́ ви́десте, ниже́ о нем же наипа́че хвали́теся и о не́мже наипа́че вси есте́ извеще́ни, я́ко повеле́ния Его́ прия́сте и держите́ - ниже́ сие вам мо́щно рещи́. Сего́ ра́ди наведе́: «Ниже́ сло́ва Его́ име́ете пребыва́юще в вас», си́речь, запове́дания, повеле́ния, зако́на, проро́ков. А́ще бо и Бог сия́ запове́да, но оба́че у вас несть, поне́же не ве́руете Мне. А́ще бо горе́ и до́лу сие́ глаго́лют Писа́ния, я́ко в Мя подоба́ет ве́ровати, вы же не внима́ете – благоявле́нно, я́ко и сло́во его́ отступи́ от вас. Сего́ ра́ди наведе́: «Я́ко Его́же посла́ Он, Сему́ вы не ве́руете», та́же, да не глаго́лют «ка́ко у́бо а́ще ни гла́са Его́ слы́шахом, ка́ко Ти сведе́тельствова?», глаго́ла: «Испыта́йте Писа́ния, и о́на суть сведе́тельствующая о Мне» - си́ми бо сведе́тельствова. И у́бо и на Иорда́не сведете́льствова, и на горе́: но не изно́сит на среду́ гла́са о́ного. Не́гли бо у́бо и не ве́ровали бы им: о́вого же у́бо ниже́ слы́шаша и́же на горе́, о́вогоже слы́шаша у́бо, не вня́ша же. Сего́ ра́ди посыла́ет их к Писа́ниям, показу́я я́ко и Оте́ческое сведе́тельство отту́ду есть. Пе́рвее у́бо дре́вняя отъя́т, они́ же велича́хуся, или́ я́ко ви́девше Бо́га, или́ я́ко гла́са Его́ слы́шавше. Поне́же бо ле́по бе Его́ гла́су не ве́ровати и и́же в Сина́йстей горе́ мечта́ти, исправля́я е́же о оне́х непщева́ние пре́жде и показа́в схожде́ние су́ще быва́емая, тогда́ их на сведе́тельство посла́ Писа́ний.

Нравоуче́ние четыредеся́тое: я́ко соверше́н есть в доброде́тели, и́же за́поведи вся творя́ Бо́га ра́ди, и о ми́лостыни:

И мы у́бо егда́ к еретико́м бо́ремся и вооружа́емся, отсю́ду укрепля́емся. «Вся́ко бо Писа́ние богодохнове́нно и поле́зно, ко уче́нию, ко обличе́нию, ко исправле́нию, и наказа́нию е́же в пра́вде, да соверше́н бу́дет Бо́жий челове́к, ко вся́кому благоуготовле́н» - не я́ко, да о́ва у́бо име́ет, о́ва же не име́ет: таковы́й бо несоверше́н. Ка́я бо по́льза, рцы ми, егда́ мо́лится у́бо приле́жне, не ми́лует же изооби́льне? И ни егда́ ми́лует изооби́льне, лихои́мствуя же и принужда́я? Или́ егда́ не лихои́мствуя ниже́ принужда́я, к показа́нию же челове́ка и любоче́стию зря́ще? Или́ егда́ ми́лует у́бо со вся́ким опасе́нием и ко уго́дному Бо́гови, взима́ет же ся [сим] в [себе́] само́м и велему́дрствует? Или́ егда́ смире́н у́бо бу́дет и посто́в внима́ет, сребролю́бець и купе́ц и земли́ пригвожде́н, и ма́тере злых привводя́ души́? Ко́рень бо всем злым есть сребролю́бие. Да ужасне́мся у́бо ве́щи, да бежи́м греха́. Сие́ вселе́нную смуще́нну сотвори́, сие́ вся слия́, сие́ блаже́ннейшия нас рабо́ты отво́дит Христо́вы. «Несть бо, рече́, рабо́тати Мне и мамо́не» - сопроти́вное бо повелева́ет Христу́. Ов бо глаго́лет: дава́й своя́ тре́бующим, о́ва же: похища́й я́же тре́бующих. Христо́с глаго́лет: и наве́тующим и оби́дящим проща́я, сия́ глаго́лет: устроя́й се́ти на ничи́мже оби́дящих. Христо́с глаго́лет: человеколюби́в бу́ди и кро́ток, сия́ же: лют бу́ди и же́сток, ничто́же непщу́й сле́зы бы́ти ни́щих - да в день он же́стока нам устроя́т Судию́. Тогда́ бо вся пред очи́ма прии́дет соде́янная: и оби́деннии и обнаже́ннии от нас, вся́ко отвеща́ние нам отрева́ющи. А́ще бо Ла́зарь оби́девся у́бо ничи́мже от бога́таго, не наслади́вжеся су́щих о́ного, го́рек стал есть оглаго́льник и ни еди́ного же оста́ви проще́ния, кото́рого отве́та получа́т, рцы ми, иж́е ко е́же не ми́ловати от себе́ и чужда́я прие́млюще и си́рых превраща́ющих до́мы?

А́ще не препита́вшии а́лчуща Христа́, толи́к на главу́ свою́ привлеко́ша огнь, и́же ничи́мже им предстоя́щая похища́юща, и безчи́сленыя плету́ще оби́ды, и я́же всех непра́ведне облага́ющеся, кото́раго насладя́тся утеше́ния? Да отри́нем у́бо сие́ жела́ние. Отри́нем же, а́ще помы́слим пре́жде нас оби́девших, лихои́мствовавших [и] отше́дших. Не име́ний ли у́бо их насладя́тся ини́и, ти́и же в му́це и томле́нии и неисце́льных злых? Та́ко у́бо не после́дняго сия́ безу́мия ссеца́тися и злострада́ти, да и живу́ще трудо́в простира́емся, и отше́дше, нестерпи́мыя постра́жем му́ки и томле́ния. Потре́бно и зде наслажа́тися, [ничто́же бо си́це сла́дость соде́ловает, я́коже ми́лостыни со́весть], и отше́дшим та́мо всех свободи́тися злых и безчи́сленых получи́ти благи́х.

Я́коже бо зло́ба и пре́жде гее́нны, зде де́йствующих ю́ му́чити обы́че, си́це и доброде́тель. И пре́жде Ца́рствия зде сию́ де́лающих, устроя́ет наслажда́тися наде́ждами благи́ми и сла́дости всегда́шней сожи́ти творя́щи. Да́же у́бо сия́ получи́м и зде и бу́дущей жи́зни, да держи́мся благы́х дел, си́це бо бу́дущих получи́м венце́в, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Муж не́кий Ана́ния и́менем с Сапфи́рою жено́ю свое́ю прода́ста село́, и утаи́ от цены́, све́дущи и жене́ его́. И принесе́ часть не́кую, пред нога́ма апо́стол положи́.

Амо́ниево толкова́ние: А́ще часть не́кую сребра́, украд от свои́х и не все при ногу́ апо́столом положи́в, у́мре, что рече́м о и́хже ника́коже принося́щих Бо́гови, но от ча́сти, а́ще что прилучи́тся, Бо́гу творя́щих, вся же свои́м похоте́м работа́ющим? И́хже сря́щет мно́жае бо́льша му́ка, я́ко си́льну су́щу Бо́гу ду́шу и те́ло в гее́нне погуби́ти.

Су́щее: Рече́ же Петр: «Ана́ние, почто́ испо́лни сатана́ се́рдце твое́ солга́ти Ду́ху Свято́му и утаи́ти от цены́ села́? Не су́щее ли твое́ бе и продано́ в твое́й о́бласти бя́ше? Что я́ко положи́ в се́рдцы свое́м вещь сию́? Не челове́ком солга́, но Бо́гу».

Толкова́ние Амо́ния презви́тера: Вопро́с: А́ще сатана́ се сотвори́, что той пови́нен бе, прие́мый его́ де́йство?

Отве́т: Подоба́ше ему́ испра́витися, рече́, но не испра́вися. Ви́дяй бо такова́я исправле́ния, не по́льзовася. Мно́жае па́че, и́нако не бы ся по́льзовал. Не подоба́ше бо про́сто оста́вити се бы́вшее, да не про́чее растли́тся те́ло. Ны́не же и сей по́льзовася, не прише́д на бо́льшую зло́бу, и про́чии стра́ха ра́ди тщаливе́йши бу́дут. Втори́цею обличе́н бысть, и показа́ ему́, я́ко не утаи́ся от него́ бы́вшее. Почто́ у́бо, ки́им прилежа́нием се сотвори́л еси́? Хотя́ше име́ти. Подоба́ше изнача́ла име́ти и не обещава́тися. Лю́тое не́кое есть святокраде́ние, возлю́бленне. Подоба́ше ти име́ти своя́ си. Почто́ у́бо та́я сотвори́л еси́ свята́я, и пото́м па́ки сия́ прия́л еси́? От мно́гаго небреже́ния се сотвори́л еси́, не и́мать бы́вшее поми́лование, но безотве́тно есть. Не собла́зняйтеся у́бо и́же ны́не свята́я краду́ще, но со стра́хом па́че исправля́йтеся. А́ще тогда́ бя́ше, мно́жае ны́не па́че, егда́ умно́жися зло́ба. Но облича́ем таковы́х, да и про́чии убоя́тся. А́ще пребыва́ше, рече́, вам пребыва́ше, и прода́сться се, в ва́шей о́бласти бе. Поне́же восхоте́сте искуси́ти Ду́ха Свята́го и на сие́ согласи́стеся, прия́ти и́мате искуше́ние е́же восхоте́сте. Еда́ ну́жда не́кая бе или́ беда́? Еда́ не хотя́щая вас привлачи́м? Почто́ таково́е положи́л еси́ в се́рдцы твое́м? Бла́го есть е́же не помоли́тися, не́же помоли́тися и не отда́ти.

Су́щее: Слы́шав же Ана́ния словеса́ сия́, пад и́здше. И бысть страх вели́к на всех слы́шащих сия́. Воста́вше же ю́ноша, истреби́ша его́, и изне́сше погребо́ша.

Златоу́ст: Мно́зи в не́ искуше́ни су́ще, па́че же в нече́стии, во списа́нии сем. И уби́йство вменя́ют верхо́вному апо́столом. Ана́ния ра́ди и Сапфи́ры бы́вшей сме́рти, осужде́ние у́бо не Петро́во, па́чеже Ду́ху приказа́ется Свято́му, пра́ведный на них суд сотво́ршему. Петр бо ничто́же и́но сотвори́, то́чию обличи́ лжу. Дух же Святы́й ве́дый вся, не то́чию тайная челове́ком, но и глубины́ Бо́жия, я́ко власть имы́й животу́ и сме́рти, согреши́вша Ана́нию уби́. Но рече́т кто па́ки, неблагочести́ве сопроти́вяся: ей, рече́, мни́ши се отве́т ве́рен бы́ти.

Вопро́с: То́же о Сапфи́ре глаго́лати и́маши: Не Петр ли ту уби́?

Отве́т: И да не бу́дет безме́стно се. Обои́м у́бо бысть прегреше́ние, е́же с на́ми и сам испове́си. Те́мже пра́ведный Судия́ обои́м ра́вен суд сотвори́. Не не уви́де же се верхо́вный апо́стол, и́же Святы́м Ду́хом повсю́ду глаго́ляй. Те́мже и сей глас от Него́ прии́мь, а́бие на де́ло изы́де глаго́лемое. А́щели кто опа́сно смо́трит бы́вшее, зрит мно́зех себе́ внима́ющих, да́же до днесь по́льзующихся. Весть бо Бог, мно́гащи му́чити согреши́вшаго, легча́йше та́мо творя́ ему́ муче́ние или́ до конца́ избавля́я его́, мно́зех же зде целому́дрейших творя́, стра́хом подъе́мшаго суд. Он уморе́н бысть, и и́ны по́лзовахуся, и́бо мно́га зна́мения сотвори́шася пре́жде, но не бысть страх тако́в. Си́це бысть и́стинно глаго́лемое: «Я́ко зна́ется Госпо́дь судбы́ творя́». Та́ко и о кио́те бысть: Оза́н убие́н бысть, и про́чим бысть страх. Но там у́бо явля́яся царь, отпусти́ кио́т, зде же сие́ целому́дрейши быва́ет.

Су́щее: Бысть же я́ко трем часо́м мину́вшым, и жена́ его́ не ве́дущи бы́вшаго вни́де. Отвеща́в же ей Петр: «Рцы ми, а́ще на толи́це село́ отда́ста?». Она́ же рече́: «Ей, натоли́це». Петр же рече́ к ней: «Что я́ко согласи́стася искуси́ти Дух Госпо́день? Се но́ги погре́бших му́жа твоего́ при две́рех, и изнесу́т тя». Паде́ же а́бие пред нога́ма его́ и и́здше. Вше́дше же ю́ноша, обрето́ша ю́ ме́ртву, и изне́сше, погребо́ша ю́ у му́жа ея́. И бысть страх вели́к на всей Це́ркви и на всех слы́шащих сия́.

Толкова́ние Златоу́стаго: Зри у́бо, я́ко не призва́ Петр жену́ его́, но пребы́сть, до́ндеже сама́ вни́де. Ниже́ от ины́х сме́яше кто изрещи́ ей бы́вшаго: се страх учи́тель, се честь ученико́в, се повинове́ние. Трие́м часо́м растоя́ние, и не уви́де жена́, и ниже́ изрече́ кому́ от су́щих ту е́же подо́бно бы по всех излия́тися, но боя́хуся. Се же евангели́ст дивя́ся глаго́лаше: «Я́ко не ве́дящи бы́вшаго, вни́де». Вопроше́не бы́вши, и не испове́давши свое́ согреше́ние, непоми́лованное зло, те́мже и дости́жет а́бие муче́ние. Си́це и о Ка́ине обрета́ем, и́же слы́шав: «Где есть А́вель?», рече́ «не вем», и про́чая кля́тва пото́м дости́же. «И бысть страх вели́к по всей Це́ркви». Кто ся про́чее не бы устраши́л? Кто ся не бы убоя́л апо́стола? Кто ся не бы удиви́л таково́му стра́шному чу́ду?