Вторник четвертой седмицы по Пасце

Испыта́йте писа́ния, я́ко вы мни́те в них живо́т ве́чный име́ти. И о́на суть сведе́тельствующая о Мне, и не хо́щете приити́ ко Мне, да живо́т ве́чный име́ете.

Мно́го да твори́м, о́ возлю́бленнии, о духо́вных сло́во, ниже́ довле́ти нам непщу́ем ко спасе́нию, е́же и я́ко у́бо сия́ проходи́ти. А́ще бо в жите́йских ничто́же ве́лие наслади́тися мо́жет кто чрезде́льне, я́коже прилучи́ся и́ми де́йствуя, мно́го па́че в духо́вных сие́ прилучи́тся, поне́же у́бо и мно́жайшаго сия́ тре́буют тща́ния. Сего́ ра́ди и Христо́с посыла́я иуде́ев к писа́ниям, не в про́стое прочита́ние, но во испыта́ние опа́сное и разу́мное их посла́. Не рече́ бо «прочита́йте писа́ния», но: «испыта́йте писа́ния». Поне́же бо я́же о Нем глаго́лема, мно́гаго тре́буют прилежа́ния, спокрове́на бо свы́ше поле́зне су́щым тогда́. Сего́ ра́ди копа́ти их со опасе́нием повелева́ет, я́ко да во глубине́ лежа́щее возмо́гут обрести́. Не бо́ на верху́ поко́пано, ниже́ на явле́не пове́ржено, но я́коже не́кое сокро́вище, во мно́гой глубине́ лежа́ще. Ища́й же до́лу лежа́щее, а́ще не со опасе́нием и́щет и трудо́м, и никогда́ же возмо́жет обрести́ иско́мое. Те́мже глаго́лаше «испыта́йте писа́ния, вы бо мни́те в них живота́ ве́чнаго име́ти». Не рече́ «име́ете», но «мни́те», показу́я, я́ко ниже́ отту́ду припложа́ху что ве́лие и до́блествено от прочита́ния, спасти́ся ча́юще, еди́ной ве́ре не су́ще. А е́же у́бо глаго́лет, таково́ есть: Не чуди́телися писа́нию? Не всея́ ли жи́зни непщу́ете вины́ бы́ти? От сих и Сам укрепля́юся ны́не, сия́ бо суть сведе́тельствующа о Мне, и «не хо́щете приити́ ко Мне да живота́ ве́чнаго име́ете». В ле́поту у́бо глаго́лаше е́же «мни́те», за е́же не хоте́ти и́ми повинова́тися, но о прочита́нии про́стом еди́ном хвали́тися. Та́же да не от мно́гаго промышле́ния любосла́вия прии́мет от них зазре́ния, и за е́же хоте́ти уве́ритися от них е́же свое́ смотри́ти вознепщу́ется, (и́бо Иоа́ннова гла́са воспомяну́, и сведе́тельства Бо́жия, и дел Свои́х, и вся глаго́лаше, я́ко бы их привлещи́ и живо́т обеща́), - поне́же у́бо мно́гим ле́по бе зазре́ти я́ко сла́вы жела́я сия́ глаго́лаше, услы́ши что рече́: «сла́ву от челове́к не прие́млю», си́речь, не тре́бую, несть естество́ Мое́ таково́, я́ко бы тре́бовати от челове́к сла́вы. А́ще бо со́лнце от свети́льничнаго све́та не у́бо прии́мет приложе́ния, мно́го па́че Аз челове́ческия оша́юся тре́бовати сла́вы.

Что у́бо ра́ди сия́ глаго́леши рече́? «Да вы спасе́теся». Но сие́ у́бо вы́шше рече́на. Зна́мена же сия́ и зде рек: «Да живо́т име́ете». Полага́ет же и ину́ю вину́. Кою́ ли у́бо сию́?

Ева́нгелие: Но позна́х вас, я́ко любви́ Бо́жия не име́ете в себе́, рече́.

Толкова́ние: Поне́же бо, я́ко не́гли Бо́га лю́бяща, гоня́ху Его́, зане́ ра́вна Себе́ сотвори́л есть Отцу́. Ве́дяше же, я́ко не хотя́ху Ему́ покаря́тися. Да не́кто рече́т: «Что у́бо ра́ди сия́ глаго́леши?», глаго́ла: «Да не облича́ю вас, я́коже любви́ ра́ди Бо́жия Мене́ го́ните». А́ще бо Той сведе́тельствует Мне и де́лы, и писа́ньми, я́коже бо пре́жде сего́, непщу́юще богопроти́вну бы́ти изгоня́сте, си́це ны́не, отне́лиже сия́ показа́х, притещи́ вам подоба́ше, а́ще бо лю́бите Бо́га: но не лю́бите. Сего́ ра́ди сия́ рех, да покажу́ вас изли́шнее киче́ние име́ющых, и велича́ющихся ту́не, и свою́ за́висть спокрыва́ющых. Не от сих же то́кмо, но от бу́дущых сия́ устрая́ет.

Ева́нгелие: Аз бо приидо́х, рече́, во и́мя Отца́ Моего́, и не прия́сте Мя. А́ще ин прии́дет во и́мя свое́, о́ного прии́мете.

Толкова́ние: Зри́ши ли, я́ко горе́ и до́лу сего́ ра́ди рече́ посла́тися, и от Отца́ прия́ти суд, и ничто́же мощи́ твори́ти о Себе́, да все отсече́т непщева́ние неблагодаре́ния? Коему́ же рече́ «приити́ во и́мя свое́»? Анти́христа зде гада́тельствует, и несопротиворе́чное неблагодаре́ния их полага́ет указа́ние. А́ще бо я́ко любя́ще Бо́га мене́ го́ните, мно́го па́че о анти́христе бы́ти сему́ подоба́ше. Он бо ничто́же таково́ рече́т: ниже́ посла́тися от Отца́, ниже́ по изволе́нию приити́ о́ного, но сопроти́вное все, мучи́тельне ничи́мже ему́ пристоя́щая похища́я, и́же на́до все́ми бо́га себе́ бы́ти рече́т, я́коже Па́вел рече́: «На́до все́ми глаго́лемаго или́ чти́лища показу́юща себе́ я́ко той есть Бог» . Сие́ бо есть «во и́мя свое́ приити́». Аз же не си́це, но во и́мя Отца́ Моего́ приидо́х. Дово́льно у́бо бе и сие́ показа́ти их не лю́бящих Бо́га, зане́ глаго́лющаго посла́тися от О́ного не приима́ху.

Ны́не же от сопроти́внаго показу́ет их безсту́дия - от анти́христа глаго́ля. Егда́ бо глаго́лющаго от О́ного посла́тися не прие́млют, а и́же ниже́ ве́дети О́ного велича́ющая и глаго́люща себе́ бы́ти на́до все́ми бо́га хотя́ поклони́тися, благоявле́нно я́ко за́висти гоне́ние бе и е́же ненави́дети Бо́га. Сего́ у́бо ра́ди две полага́ет вины́ рече́нных. И пе́рвие у́бо блажа́йшую: «да спасе́теся» и «да живо́т име́ете». Но поне́же хотя́ху Его́ нахухна́ти , полага́ет и уязви́тельнейшую, показу́я, я́ко а́ще и не покаря́ются слы́шащеи, Своя́ бо везде́ твори́ти обы́че. Па́вел у́бо, о анти́христе бесе́дуя, проро́чески рече́: «Я́ко по́слет им Бог де́йство льсти, да осу́дятся вси неве́ровавшии и́стине, но благоволи́вшии непра́вде» . Христо́с не рече́, я́ко «прии́дет», но «а́ще прии́дет», щадя́ слы́шащых, поне́же у́бо не у́ всесоверше́но бе их неблагодаре́ние. Сего́ ра́ди Сам у́бо вину́ умолча́ прише́ствия его́. Па́вел же, могу́щим све́дети со опасе́нием, сие́ назна́мена, и́бо он есть, и́же все отвеща́ние их отъе́мля. Та́же и вину́ неве́рия их полага́ет, глаго́ля:

Ева́нгелие: Ка́ко мо́жете ве́ровати, сла́ву друг от дру́га прие́млюще и сла́ву ю́же от еди́ного Бо́га не взыску́юще?

Толкова́ние: И отсю́ду показу́ет па́ки, я́ко не я́же Бо́жия смотря́ху, но во о́бразе таково́м свою́ хотя́ху страсть отмща́ти. И толи́ко оша́яхуся Его́ ра́ди сла́вы сия́ твори́ти, зане́ они́ челове́ческую изволя́ху па́че, не́жели о о́ной. Ка́ко у́бо хотя́ху о сей приима́ти толи́ку вражду́, ея́же си́це пренебрежа́ху, я́коже челове́ческую предпочита́ти ея́? Ре́к же, я́ко «любо́вь Бо́жию не име́ют» и показа́в сие́ си́ми обои́ми: и быва́емыми в Него́, и бу́дущыми во анти́христа. И обличи́в я́вствене, я́ко вся́кия суть лише́ни ми́лости, про́чее им надставля́ет Моисе́я оглаго́льника, си́це глаго́ля:

Ева́нгелие: Не мни́те, я́ко Аз оглаго́лю вас ко Отцу́: есть оглаго́ляяй вас Моисе́й, на него́же упова́ете. А́ще бы ве́ровали бы́сте Моисе́ови, ве́ровали бысте и Мне: о Мне бо он писа́. А́щеже о́ного писа́ния не ве́руете, ка́ко Мои́м глаго́лом ве́ру и́мете?

Толкова́ние: А е́же глаго́лет таково́ есть: пре́жде Мене он есть досажде́нный в су́щих ко Мне. Моисе́ю бо па́че не ве́ровасте, не́жели Мне. Зри, ка́ко отвсю́ду вся́кого их изве́рже отве́та. Бо́га ли глаго́ласте люби́ти внегда́ гони́те мя? Показа́х, я́ко ненави́дяща Его́, сия́ твори́те. Глаго́лете разреша́ти Ми субо́ту и разоря́ти зако́на? Совлеко́хся и сего́ оклевета́ния. Обеща́етеся ве́ровати Моисе́ю, и́миже на Мя дерза́ете? Показу́я наипа́че, я́ко сие́ у́бо есть не ве́ровати Моисе́ю. Толи́ко бо тре́бую сопроти́в приити́ зако́ну, я́ко ниже́ есть ин кто оглаго́луяй вас, но ра́зве той зако́н вам да́вый. Я́коже у́бо о Писа́ниих глаго́лаше: «В них мни́те живо́т ве́чный име́ти», си́це и о Моисе́и рече́: «На него́же вы упова́ете», от свои́х их е́мля везде́. И отку́ду я́вствено, рече́, я́ко оглаго́лет Моисе́й и не велича́ешися? Что бо тебе́ и Моисе́ю о́бще? Суббо́ту разори́л еси́, ю́же он узако́нил есть держа́ти. Ка́ко у́бо он нас оглаго́лет? Отку́ду же я́вствено, я́ко и во ино́го ве́руем, свои́м и́менем прише́дшаго? Сия́ бо вся без сведе́тельства глаго́леши.

И у́бо сия́ вся свы́ше име́ют сострое́ние, егда́ бо испове́дан бысть я́ко от Бо́га приидо́х: от дел, от гла́са Иоа́ннова, от сведе́тельства О́тча. Благоявле́нно, я́ко Моисе́й их оглаго́лет. Что бо он рече́? А́ще кто прии́дет зна́мения явля́я, и к Бо́гу приводя́, и буд́ущая предлага́я со и́стинною вся́кою - послу́шати его́ подоба́ет со вся́ким усе́рдием. Христо́с же вся сия́ сотвори́л есть: и́бо зна́мения соде́ла со и́стинною вся́кою, и к Бо́гу всех влеча́ше, и прорече́нием коне́ц наведе́. Но отку́ду я́вствено, я́ко ино́му ве́ру и́мут? От е́же Христа́ ненави́дети. И́же бо с Бо́жиим повеле́нием приходя́щаго отвраща́ющеся, благоявле́нно, я́ко и анти́христа прии́мут. А́ще же Моисе́я предлага́ет, глаго́ля «Аз от челове́ка сведе́тельства не прие́млю» - не чуди́ся, ниже́ бо от Моисе́я, но от Бо́жия Писа́ния посыла́ет их. Но оба́че поне́же писа́ния ме́ньше их устраша́ху, на само́е лице́ обво́дит сло́во, законополо́жника само́го им предста́вити оглаго́лника, изъяви́телнейше си́це стра́ха творя́ и ко́еждо от него́ глаго́лемых облича́ет.

Смотри́ же: глаго́лаху любви́ ра́ди я́же к Бо́гу гони́ти Его́, - Показу́ет, я́ко за е́же ненави́дети Бо́га сие́ творя́т. Глаго́лаху держа́тися Моисе́я показу́ет, - Я́ко за е́же не ве́ровати Моисе́ю сия́ де́йствоваху. А́ще бо зако́ну ревнова́ли бы, подоба́ше прия́ти о́ного исполня́ющаго. А́ще Бо́га люби́ли бы, подоба́ше покаря́тися ко о́ному влеку́щему. А́ще Моисе́ю ве́ровали бы, подоба́ше поклони́тися от о́ного проро́чествованному. А́ще же он не ве́руется пре́жде Мене́, ничто́же не ле́по и Мне от него́ пропове́данному изгоня́тися от вас. Я́коже у́бо чудя́щыхся Иоа́нну, показа́ пренебрегу́щых Иоа́нна, бы́вшими в него́, си́це непщу́ющих ве́ровати Моисе́ю, и показу́ет неве́рующих, и при́сно на главу́ их обраща́ет вся, я́же непщева́ху о себе́ предлага́ти. Толи́ко бо оша́юся, рече́, отводи́ти вас от зако́на, я́ко и само́го призыва́ю оглаго́лника ва́шего законополо́жника.

Я́кобо Писа́ния сведе́тельствуют, рече́. Где же сведе́тельствуют? Не ктому́ приложи́л есть, стра́ха бо́лшаго им вложи́ти хотя́, и во испыта́ние посла́ти, в ну́жди устро́ити вопроше́ния. А́ще бо рекл бы от гото́ваго и ниже́ вопроша́ющим им, отве́ргли бы у́бо сведе́тельство. Ны́не же, а́ще внима́ли бы глаго́лемым, подоба́ше пре́жде ины́х сие́ вопроси́ти и уве́дети от Него́. Сего́ бо ра́ди и во изрече́ниих, и во преще́ниих изли́шествует наипа́че, не во указа́ниих то́кмо - да поне́ си́це их возведе́т стра́хом глаго́лемых. Они́ же молча́т. Такова́ бо есть зло́ба: ели́ка а́ще глаго́лет и твори́т, не воздвиза́ется, но пребыва́ет свой яд соблюда́ющи.

Нравоуче́ние четы́редесять пе́рвое: я́ко ничто́же си́це му́дрых твори́т, я́коже доброде́тель, и́ я́ко вся́ка зло́ба от неве́дения име́ет гне́ва:

Те́мже подоба́ет вся́ку зло́бу от души́ отложи́вшим ни еди́ну же плести́ никогда́ же лесть. «Ко стропо́тным бо, стропо́тныя путя́ посыла́ет» и «Святы́й Дух прему́дрости бежи́т льсти, и возстае́т от по́мысл неразу́мных» . Ничто́же бо си́це твори́т бу́их, я́коже лука́вство. Егда́ бо проме́глив бу́деши, егда́ неблагода́рен, егда́ неблагода́тель, (сия́ же лука́вства ви́да), егда́ ничи́мже оби́димь печа́лится , егда́ плете́т льсти - ка́ко не после́дняго безу́мия изво́дит указа́ния? Ничто́же у́бо си́це твори́т разу́мных я́коже доброде́тель: и́бо благода́рных и благоразу́мных соде́ловает, человеколюби́вых, кро́тких, смире́нных, ти́хих, и ина́я вся блага́я сия́ ража́ти обы́че. Что же си́це пребыва́ющаго разу́мнейше? Исто́чник бо, и ма́ти, и ко́рень мудрова́ния есть доброде́тель, я́коже у́бо и вся́ка зло́ба от безу́мия име́ет нача́ло. Ибо презо́рливый и гневли́вый от ску́дости мудрова́ния от страсте́й изнуря́ется. Сего́ ра́ди и проро́к глаго́лаше: «Несть исцеле́ния в пло́ти мое́й от лица́ безу́мия моего́» , показу́я я́ко всяк грех нача́ло от безу́мия име́ет. Доброде́тельный бо и страх име́я Бо́жий - всех есть разу́мнейши.

Те́мже и не́кто глаго́лаше: «Нача́ло прему́дрости - страх Госпо́день» . А́ще у́бо е́же боя́тися Го́спода, прему́дрость есть име́ти; лука́вый же сие́ не име́ет - и́стинныя прему́дрости лише́н есть; а и́же и́стинныя прему́дрости лише́н, всех есть несмы́сленнейше. А́ще у́бо и мно́зи лука́вым чудя́тся, я́ко дово́льным су́щым оби́дети и врежа́ти, не ве́дяще, я́ко наипа́че всех их ока́яти подоба́ет, я́ко непщу́юще ины́х врежа́ти, са́ми на себе́ мечь вонжа́ют: е́же безу́мия после́дняго есть себе́ уязвля́ющему, ниже́ само́е ве́дети, но ина́го мне́ти оби́дети, внегда́ закала́ти себе́. Сего́ ра́ди и Па́вел, ве́дый я́ко внегда́ уязвля́ти ины́х, себе́ уби́я, рече́: «Что ра́ди не па́че оби́дестеся? Что ра́ди не па́че лиши́стеся?» . Е́же бо не оби́детися, в том е́же не оби́дети лежи́т; я́коже у́бо е́же не страда́ти зле, во е́же не твори́ти зле - а́ще и гада́ние ви́дится бы́ти мно́гим и любому́дрити не хотя́щым.

Сия́ у́бо ве́дяще, не оби́димых, ниже́ напа́ствуемых, но творя́щих сия́ да ока́ем и да слези́м: си́и бо суть и́же наипа́че оби́дими, и́же Бо́га себе́ ра́тника сотворя́юща, и безчи́сленых оглаго́лалник отверза́юще уста́, и лука́вое стяжава́юще зазре́ние в настоя́щее житие́, и вели́кую в бу́дущий век привлача́юще му́ку. Я́коже оби́димии у́бо и вся терпя́ще до́блествене, и Бо́га име́ют ми́лостива, и всех сболе́знующых им, похваля́ющых и подъе́млющых, и в настоя́щем житии́ мно́гаго насладя́тся благохвале́ния, любому́дрия велича́йше указа́ния и в бу́дущей жи́зни ве́чных прича́стие благи́х, и́хже бу́ди всем нам получи́ти благода́тию и человеколю́бием Го́спода на́шего Иису́с Христа́, с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

По сих отъи́де Иису́с об он пол мо́ря Галиле́йскаго во страны́ Тивериа́дския. И после́доваша Ему́ наро́д мног, зане́ ви́дяху зна́мения я́же творя́ше на неду́жных. Отъи́деже на го́ру Иису́с, и та́мо седя́ше со ученики́ Свои́ми. Бе же близ па́сха иуде́йска.

Лю́тым муже́м не дерза́юще спребыва́ем, возлю́бленнии, но да навы́кнем, егда́ ничи́мже врежда́ется на́шая доброде́тель, дая́ти ме́сто их лука́вым наве́том. Си́це бо преста́нет вся́ка де́рзость. И я́коже копия́: егда́ в зе́льно впаде́т что и же́стоко, и сопроти́в ударя́емо, со мно́гим устремле́нием обраща́ется на посла́вшых па́ки, егда́ же зе́льное оставле́ния не име́ет сопроти́в па́дающее, разреша́ется вско́ре и скончева́ется. Си́це о де́рзостных челове́цех: егда́ у́бо им дерза́ющых спребыва́ем, свере́пеют наипа́че, егда́ же уступа́ем и отхо́дим, ослабля́ем удо́бне вся́ко их неи́стовство. Сего́ у́бо ра́ди и Госпо́дь, егда́ слы́ша, я́ко слы́шаша фарисе́и, я́ко Иису́с мно́жайших ученико́в твори́т и креща́ет, не́жели Иоа́нн, прии́де Иису́с в Галиле́ю, за́висть их погаша́я и я́рость, е́йже ле́по бе от сих роди́тися слове́с, отхоже́нием украща́я и в Галиле́ю па́ки отходя́. Не на те же нахо́дит ме́ста: не в Ка́ну бо прии́де, но об о́ну страну́ мо́ря. «После́доваху же ему́ наро́ди мно́зи, зря́ще Его́ зна́мения я́же творя́ше». Ко́я зна́мения? Что ра́ди не глаго́леши по ви́ду? Я́ко вя́щшее сей наипа́че евангели́ст в словесе́х и народоуче́ниях изнури́ти потща́ся.

Зри у́бо: в ле́те всеце́ле, и́бо и ны́не в пра́зднице Па́схи, ничто́же вя́щше нас научи́ зна́мений ра́ди, ра́зве я́ко разсла́бленаго исцели́ и сы́на царе́ва челове́ка. Не сие́ бо потща́ся вся исчита́ти, поне́же ниже́ мо́щно бе, но от мно́гих и вели́ких ма́лая.

«После́доваху ему́ наро́ди мно́зи, зря́ще зна́мения я́же творя́ше». Не зело́ любому́драго ра́зума рече́нное. Толи́каго бо уче́ния наслади́вшеся, от зна́мений возвожда́хуся па́че, е́же дебеле́йшаго ра́зума бе: «Зна́мения бо, рече́, неве́рным, но не ве́рующым» . Но он наро́д и́же в Матфе́и не тако́в, но та́ко: «Ужаса́хуся вси о уче́нии Его́, зане́ уча́ше их я́ко о́бласть име́я» . Что же у́бо го́ру постиза́ет ны́не и та́мо седи́т со ученики́? За хотя́щее бы́ти зна́мение. А е́же ученико́в взы́ти еди́нем, осуже́дние мно́жеству бе, не после́довавшу Ему́. Не сего́ же ра́ди то́кмо сие́ твори́т, го́ру достиза́я, но и наказу́я нас упоко́ятися от молв и су́щаго посреди́ смуще́ния: прили́чно бо к любому́дрию пусты́ня. Мно́жицею же и еди́н Сам го́ру достиза́ет, и обнощу́ет та́мо, и мо́лится, науча́я нас я́ко наипа́че к Бо́гу приходя́щему вся́кого свободи́тися подоба́ет смуще́ния и ме́сто от смуще́ния чи́сто иска́ти.

Ева́нгелие: И бе близ па́сха, пра́здник иуде́йский.

Толкова́ние: Ка́ко у́бо не восхо́дит на пра́здник, всем тща́щымся во Иерусали́м, Той в Галиле́ю прихо́дит, и не Сам то́кмо, но и ученико́в во́дит и отту́ду в Капернау́м? Ти́хо про́чее разреша́я зако́на, вину́ прие́мля от иуде́йския зло́бы.

Ева́нгелие: И возре́в очи́ма, зрит наро́д мног.

Толкова́ние: Показу́ет, я́ко никогда́ же про́сте седя́ше со ученики́, но не́гли [в] опа́сне сло́ве не́что к ним, и внима́я, и обраща́я их к Себе́. Е́же наипа́че Его́ промышле́ние показу́ет, и смире́нное и сходи́тельное по оне́м: соседя́ху бо Ему́, друг ко дру́гу зря́ще. Та́же возре́в, зрит наро́да прише́дша к Нему́. Ини́и у́бо евангели́сти, ученико́м ре́ша приступи́вшым вопроси́ти и умоли́ти, я́ко бы не отпусти́ти их гладны́х. Сей же рече́ Фили́ппу вопроси́тися от Христа́. И мне ви́дится обоя́ бы́ти и́стинна. Не в те́хже бы́вше вре́менех, но о́на сих бы́ти старе́йша: я́коже и́на у́бо о́на, и́на же сия́. Что у́бо ра́ди Фили́ппа вопроша́ет? Ве́дяше ученико́в, и́же и наипа́че мно́жайшаго тре́бующе уче́ния. Сей бо есть, по сих глаго́ляй: «Покажи́ нам Отца́ и довле́ет нам» . Сего́ ра́ди испе́рва его́ устрая́ше. А́ще бо про́сте зна́мение бы́ло бы, не бы у́бо толи́ко яви́лося чу́до. Ны́не же пе́рвее его́ принужда́ет испове́дати су́щую ску́дость, да уве́дев, в кото́рых бе, опа́снейше навы́кнет хотя́щаго бы́ти чудеси́ вели́чество. Сего́ ра́ди:

Ева́нгелие: Рече́ [Фили́ппу]: «Отку́ду нам хле́би толи́ки да ядя́т си́и?».

Толкова́ние: Си́це и в дре́внем Моисе́и рече́: не пе́рвее бо зна́мение сотвори́, до́ндеже его́ вопроси́: «Что есть в руце́ твое́й?» . Поне́же бо пресла́вная и внеза́пу случа́ющаяся, пре́жних нас в забы́тии влага́ти обыко́ша. Пе́рвее его́ во испове́дание настоя́щаго связа́, да ужасе́нию бы́вшу па́мятию испове́данных, не возмощи́ про́чее отврещи́. Та́же си́це от сосужде́ния навы́кнет зна́мения вели́чество, е́же бо и зде быва́ет.

И вопроше́н быв он, рече́:

Ева́нгелие: Двухсо́т дина́рий хле́бы не довле́ют, да ко́ждо ма́ло что во́змет. [Сие́ же глаго́лаше искуша́я его́, Сам бо ве́дяше, что хо́щет сотвори́ти].

Толкова́ние: «Сие́ же глаго́лаше искуша́я его́» - еда́ не ве́дяше хотя́щее от Него́ рещи́ся? Несть сие́ рещи́. Но ка́я рече́ния си́ла? От дре́вняго мо́щно сию́ уве́дети. И́бо та́мо рече́: «И бысть по глаго́лех сих, и искуша́ше Бог Авраа́ма и рече́: Возми́ сы́на своего́ возлю́бленнаго, его́же возлюби́л еси́ Исаа́ка» . Ниже́ та́мо сие́ глаго́ля явля́ется, я́ко от и́скуса ожида́ше уви́дети коне́ц, или́ послу́шати, или́ ни, [ка́ко бо: «вся Ве́дый пре́жде бытия́ их» ?]: но челове́чески обоя́ реко́шася. Я́коже бо егда́ глаго́лет «испыта́ти сердца́ челове́ческая», не неве́дения испыта́ние бы́ти рече́, но опа́снаго ве́дения. Си́це у́бо и егда́ глаго́лет я́ко «искуша́ше», и ничто́же и́но рече́, но ра́зве я́ко ве́дяше изве́стне. И́ноже есть рещи́, я́ко иску́снейше его́ соде́ловаше.

Я́коже у́бо Авраа́ма, си́це и сего́ вопроше́нием возводя́ его́ во опа́сное ве́дение зна́мения. Сего́ у́бо ра́ди и евангели́ст, да не в не́мощи рече́ния пребы́в, вознепщу́еши что безме́стно о рече́нных, рече́: «Сам бо ве́дяше, что хотя́ше твори́ти».

Оба́че о́но соблюда́ти ну́жно есть, я́ко егда́ бу́дет зазре́ние лука́во, ка́ко сие́ евангели́ст со мно́гим тща́нием отража́ет. Я́коже у́бо зде да не́что таково́ вознепщу́ют слы́шащии, преложи́ исправле́ние рек: «Сам бо ве́дяше, что хотя́ше твори́ти». Си́це и та́мо глаго́ля: «Я́ко гоня́ху Его́ иуде́и, не то́кмо я́ко разоря́ше суббо́ту, но я́ко и Отца́ Своего́ глаго́лаше Бо́га, ра́вна себе́ творя́ Бо́гу» . А́ще не изрече́ние бы́ло бы само́го Христа́ де́лы утверже́нно, приложи́л бы у́бо и та́мо исправле́ние сие́. А́ще бо в ни́хже Сам рече́ зазира́ет евангели́ст, да не кто позазри́т, мно́го па́че, в ни́хже ини́и о Нем сие́ глаго́лаху, зазре́л бы у́бо, а́ще не подоба́ющее узре́л бы о Нем держа́щеся непщева́ние. Но не сотвори́л есть, ве́дяше бо Его́ изволе́ние су́ще сие́ и суд неподви́жим, сего́ ра́ди рек «ра́вна Себе́ творя́ Бо́гу», не потре́бова исправле́ние не́ким таковы́м, не бе бо о́ному непщева́ние растле́нно глаго́лемое, но изрече́ние Его́ утверже́но де́лы. Вопроше́ну у́бо Фили́ппу, рече́ Андре́й брат Си́монов:

Ева́нгелие: Есть зде о́трочищь, и́же име́ет пять хлебо́в ячме́нных и две ры́бицы.

Толкова́ние: Но сия́ что суть в толи́ких? Вⷡ҇ысоча́йши у́бо Фили́ппа Андре́й, не у́бо во все дости́же. Мню бо его́ вше́дша в проро́ческая чудеса́ и ка́ко Елисе́й сотвори́л есть е́же о хле́бех зна́мения. Сего́ у́бо, ра́ди взы́де да́лейше, не возмо́же же самому́ дости́гнути верху́.

Да навы́кнем у́бо, и́же наслажде́ние внима́юще, кото́рыми пита́хуся чу́днии мужи́ о́нии вели́цыи: и коли́чеством, и како́вством, ху́дость трапе́зы их да уви́дим и да подража́ем. Про́чая же мно́гия не́мощи. По е́же бо рещи́ «име́ет пять хлебо́в ячме́нных», наведе́: «но сия́ что суть в толи́ких?» - непщева́ше бо я́ко от ма́лых у́бо ма́лая, от мно́жайшых же мно́жайшая имя́ше твори́ти чудоде́йствуя. Е́же не бе. Та́коже бо бе удо́бно и от мно́жайшых и от ма́лых твори́ти и истека́ти хлебо́в естеству́: не ве́щи бо тре́боваше подлежа́щия. Но я́ко бы не мне́ти тварь чу́жду бы́ти Его́ прему́дрость, [я́коже по сих оклевета́ющии Маркио́нова неду́гующии глаго́лаху], ‐ са́мою тва́рию де́йствует к вине́ чуде́с. Поне́же у́бо отча́яшася обои́ ученицы́, тогда́ чудоде́йствует, про́чее си́це па́че приобрета́ху: пе́рвее испове́давше ве́щи неудо́бьство, да егда́ бу́дет, уве́дят Бо́жию си́лу. Поне́же бо бы́ти зна́мения глаго́лаше, е́же и проро́ки испра́влено, а́ще и не таково́же. Хотя́ше же и благодари́в его́ пе́рвее твори́ти, да не в не́мощно не́кое впаду́т непщева́ние: зри, ка́ко сие́ о́бразом все́ми взят и разли́чие показа́. Не у́бо хле́бом я́вльшымся, да навы́кнеши, я́ко не су́щее я́ко су́щее Ему́ предста́ша. Я́коже Па́вел рече́: «Призыва́яй не су́щее я́ко су́щее» . А́ки гото́ве и приготовле́не трапе́зе, повеле́ им а́бие возлещи́, си́ми мысль ученико́в воздви́г. Я́ко бо приобрета́ху от вопроше́ния, а́бие послу́шаша и не смути́шася: Что сие́ есть? Ка́ко повелева́еши возлещи́, ни еди́ному же насреди́ явля́ющуся? Си́це и пре́жде зре́ния зна́мения ве́ры нача́ша, и и́же в нача́ле толи́ко не ве́роваша я́ко рещи́: отку́ду ку́пим хле́бы?, - со усе́рдием посади́ша наро́ды.

Но что у́бо разсла́бленаго хотя́ испра́вити не мо́лится, ниже́ ме́ртваго воздвиза́я, ниже́ мо́ре обуздова́я? Зде же сие́ твори́т, показу́я я́ко пи́щи начина́ющым, благодари́ти подоба́ет Бо́га. И и́накоже, о ме́ньшых сие́ наипа́че соде́ловает, да навы́кнеши, я́ко не тре́буя сие́ твори́т. А́ще бо тре́буя, мно́го па́че о бо́льшых сие́ сотвори́л бы. А и́же о́на госпо́дьством сотвори́л бы, благоявле́нно, я́ко и сия́ сходи́тельне творя́ше. И́накоже, и наро́д мног бе предстоя́ и подоба́ше их увеща́ти, я́ко по изволе́нию Бо́жию прии́де. Сего́ ра́ди, егда́ у́бо твори́т еди́н зна́мения, ничто́же таково́ показу́ет; егда́же при мно́гих сие́ твори́т, я́ко бы уве́рити их, я́ко не богопроти́вен не́кто есть, ниже́ сопроти́вен Роди́телю - благодаре́нием отъе́млет зазре́ние.

Ева́нгелие: И даде́ возлежа́щым, и насы́тишася.

Толкова́ние: Ви́дел ли еси́, коли́ко раба́ и Влады́ки посре́дство? Они́ у́бо от ча́сти име́юще благода́ть, си́це чудоде́йствоваху, Бог же от реше́нною си́лою творя́, со мно́гим вся соде́ловаше вели́чеством.

Ева́нгелие: И избы́ша, рече́, преломле́ния.

Толкова́ние: Не показа́ние бе сие́ изли́шьство, но я́ко бы не мечта́ние непщева́ти вещь. Сего́ у́бо ра́ди и от подлежа́щия ве́щи соде́тельствует. Что же ра́ди не наро́дом даде́ нести́, но ученико́м? Я́ко наипа́че сих наказа́ти хотя́ше, име́ющых бы́ти учителе́й вселе́нныя. Мно́жество бо ничто́же ве́лие хотя́ше припложа́ти от чуде́с, еще́ а́бие у́бо забыва́ху и проша́ху ино́е чу́до, си́и же не худа́я приобрета́ти хотя́ху. Бе же и Иу́де осужде́ние нема́ло, нося́щему ко́шницу. Я́ко бо их ра́ди наказа́ния сия́ бы́ша, рече́нное по́сле явля́ет, е́же воспомяну́ им глаго́ля: «Не у́ ли разумева́ете коли́ко ко́шниц взя́сте?». И е́же равночи́сленым бы́ти ученико́м ко́шницы оста́тков. По́слежде, егда́ у́бо наказа́шеся, не ктому́ толи́ким, но спири́д седмь . Аз не мно́жеству дивлю́ся бы́вшых хлебо́в то́кмо, но со мно́жеством и опа́ству избы́вшаго, я́ко ни мно́жае, ниже́ ме́ньше сотвори́ избы́точествовати, но толи́ко ели́ко хотя́ше, прове́дый, коли́ко изнуря́т, е́же неизрече́нныя си́лы бе. Уве́ряху бо преломле́ния бы́вшее, обоя́ явля́юща, я́ко ниже́ мечта́ния бе́ша бы́вшая, и от оне́х бе, и́хже напита́ша. А е́же рыб, тогда́ у́бо не бысть. По́слежде по Воскресе́нии, не ктому́ от ве́щи подлежа́щия. Что ли ра́ди? Да навы́кнеши, я́ко и ны́не ве́щи тре́боваша, не оскуде́ния ра́ди, ниже́ тре́буя по́мощи, но я́ко бы еретико́в загради́ти уста́. Наро́ди же глаго́лаху: «Сей есть вои́стинну проро́к». О́ чре́во объяде́ния! Премно́жество безчи́сленное сих соде́ла чу́днейша, и нигде́же сие́ испове́даша, но егда́ насы́тишася, от сего́же я́вствено я́ко проро́ка не́коего ча́яху изря́дна. И́бо они́ глаго́лаху: «Ты еси́ вои́стинну Проро́к». И си́и [я́же о Иоа́нне]: «Сей есть проро́к» .

Ева́нгелие: Позна́ у́бо Иису́с, я́ко хотя́т приити́ и восхи́тити Его́, да сотворя́т Его́ царя́, отъи́де на го́ру.

Толкова́ние: Коли́ко ра́зума удо́бство! Не ктому́ зако́на отмща́ют, не ктому́ им о преступле́нии и суббо́ты раде́ние есть, не ктому́ ревну́ют о Бо́зе: но вся поверза́ют, чре́ву им насы́тившуся. И проро́к бе пред ни́ми, и царя́ поста́вити хотя́ху. Христо́с же бе́гает. Что ли у́бо? Наказу́я нас мирски́х пренебрега́ти сано́в и показу́я, я́ко ни еди́ного же тре́буют су́щых на земли́. И́же бо вся худа́я избра́: и ма́тере, и хра́мину, и гра́да, и воспита́ние, и риз оде́жду, - не хотя́ше по́сле от су́щых на земли́ явля́тися.

Я́же бо от небе́с, и све́тла бе́ша, и вели́ка: а́нгели же и звезда́, и Оте́ц вопия́, и Дух сведе́тельствуя, и проро́цы издале́ча пропове́дающе; а я́же на земли́ - вся ху́да, да и си́це бо́льши си́ла яви́тся. Прии́де же и наказу́я нас пренебрега́ти су́щых зде, и не диви́тися, ниже́ ужаса́тися све́тлым жития́м, но посмея́тися всем сим и бу́дущих жела́ти. Чудя́йбося су́щим зде, не чуди́тся су́щим на небесе́х. Сего́ ра́ди и Пила́ту рече́: «Мое́ Ца́рствие несть от земли́» , да не возмни́тся про́чее челове́ческим стра́хом и наси́льством ко е́же увеща́ти [не] тре́бовати. Что у́бо рече́ проро́к? «Се Царь твой гряде́т к тебе́ кро́ток и всед на подъяре́мника» . Ца́рствие О́ного глаго́лет, су́щее на небесе́х, но не сие́. Сего́ у́бо ра́ди рече́: «и сла́вы от челове́к не прие́млю».

Нравоуче́ние четы́редесять второ́е: о е́же ничто́же бы́ти жите́йскую сла́ву, и о зле собира́ющых и зле изнуря́ющых:

Да навы́кнем у́бо, о́ возлю́бленнии, че́сти су́щия от челове́к пренебрега́ти и не жела́ти. Почто́хом бо ся че́стию велича́йшею, и к ней же сия́ уподобля́ема – доса́да, и смех, и укори́зна бы́ти ви́дится. И я́коже у́бо бога́тство сие́ ко о́ному – нищета́, и живо́т сей кроме́ о́ного - умерщве́ние. «Оста́ви бо ме́ртвых погребсти́ своих́ мертвецо́в» , си́це и сла́ва сия́ ко о́ной - студ и смех есть. Да не у́бо сию́ го́ним. А́ще бо подаю́щи и сию́, се́ни и снов суть худе́йши, мно́го па́че сама́я сла́ва: «Сла́ва бо челове́ческая я́ко цвет травны́й» . Что же цве́та травна́го худе́йши бу́дет у́бо? А́ще же и пребы́тна была́ бы, чим ду́шу по́льзовати возмогла́ бы? Ничи́мже, но и врежа́ет велича́йшии, рабо́в творя́щии, рабо́в среброку́пленых го́рши, рабо́в, не еди́ному влады́це то́кмо, но и двема́, и трема́, и тмам, разли́чныя повелева́ющым, покаря́ющыхся. Коли́ко лу́чши свобо́дну бы́ти или́ рабу́: свобо́дну у́бо челове́ческия рабо́ты, рабу́ же Бо́жияго влады́чества!

Отну́д же, а́ще хо́щеши сла́вы жела́ти, жела́й сла́вы, но безсме́ртныя, и́бо светле́йши ея́ позо́рище и бо́льши приобрете́ние. Си́и бо повелева́ют тебе́ изнуря́ему угажда́ти им, Христо́с же сопроти́вное все: и́бо сто сугу́бицею тебе́ дае́т дае́мых от тебе́ и живо́т ве́чный сим прилага́ет. Что у́бо лу́чше, на земли́ или́ на небесе́х? От челове́к или́ от Бо́га чуди́тися? О тщете́ или́ о приобре́тении? Венча́тися ко еди́ному дни или́ к безчи́сленым веко́м? Даждь тре́бующему и не дава́й пля́шущему, да не с твои́ми име́ньми и ду́шу погуби́ши о́ного. Ты бо вино́вен еси́ поги́бели о́ного, безвре́менным изоби́лием. А́ще бо су́щии на пляси́лищи ве́дели бы, я́ко начина́ние их без приобрете́ния хотя́ше бы́ти, дре́вле у́бо преста́ли бы сия́ ухищря́юще. Егда́ же тебе́ пле́щуща, споспеша́юща, изнуря́юща вся своя́ и изжива́юща у́зрят, а́ще и не хотя́ сие́ де́йствовати, вожделе́нием приобрете́ния держа́тся. А́ще же уве́дели бы́ша, я́ко никто́же похвали́т я́же оне́х, вско́ре у́бо отступи́ли бы́ша от трудо́в неприобрете́ния ра́ди. Егда́ же уви́дят вещь от мно́гих чуди́му, быва́ет льще́ния их ины́х похвала́.

Да отступи́м у́бо безприобрете́ннаго изнуре́ния. Да навы́кнем, о кои́х изнуря́ти и когда́ подоба́ет, не у́бо от обою́ду да раздража́ем Бо́га: и собира́юще отне́леже не подоба́ет, и растача́юще в я́же не досто́ит. Коли́каго бо не у́бо досто́йно бу́дет гне́ва, егда́ блудни́цы дае́ши, претека́юще ни́щаго? А́ще бо и от пра́ведных трудо́в по́дал еси́, не согреше́ние ли бе вещь, мзду зло́бы подая́ти? О ни́хже му́чити подоба́ше, о сих ли почита́ти? Егда́ же и си́рых совлача́я, и вдови́ц оби́дя, пита́еши блуже́ние, помы́сли, ели́к такова́я дерза́ющим бу́дет огнь. Услы́ши что рече́ Па́вел: «Не то́кмо са́ми творя́т, но и соблаговоля́ют творя́щым» . Не́гли зе́льне нас косну́хомся? Но а́ще и мы не ко́снемся, я́же ве́щи пребыва́ют томле́ния, не исправле́ное согреша́ющым, ка́я у́бо по́льза в словесе́х обра́доватися, де́лы му́читися хотя́щим?

Соблаговоля́еши ли пля́шущему? Похваля́еши ли и чуди́шися? Те́мже у́бо о́ного был еси́ го́рши. О́ному бо нищета́ поще́ние дае́т, а́ще и сло́во не име́юще. Ты же и сего́ лиши́лся еси́ отве́та. Ино́го у́бо, а́ще вопрошу́: «Что у́бо, ины́я хи́трости оста́вль, на сию́ прише́л еси́ сту́дную и скве́рную?», - рече́т: «Я́ко леть есть ма́ло труди́вшемуся мно́го припло́дити». Тебе́ же, а́ще вопрошу́: «Что у́бо чуди́шися в нечистоте́ живу́щему и о вре́де мно́гим живу́щему?», - не име́еши на то́же непщева́ние прибежа́ти, но ну́жа до́лу пони́кнути, устыде́тися и срамля́тися. А́ще же от нас вину́ истязу́ем, ничто́же у́бо име́еши рещи́ - егда́ стра́шное о́но и нео́трочное прии́дет Суди́лище, иде́же умышле́ний, и веще́й, и всех дае́м испыта́ния, ка́ко ста́нем? Кото́рыми очесы́ Судию́ у́зрим? Что рече́м, что отвеща́ем? Ко́е благосло́вно, ко́е безслове́сно предложи́м непщева́ние, е́жели изнуре́ния, е́жели услаже́ния или́ ины́х поги́бель, и́хже ины́х худо́жеством погубля́ем? Несть ничто́́же рещи́, но ну́жда му́читися, му́кою конца́ не име́ющею, сконча́ния несве́дящею. Е́же да не бу́дет, от зде у́же вся да сохрани́м, да со благо́ю наде́ждею отше́дше, получи́м ве́чных благи́х, и́хже бу́ди всем нам получи́ти благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Рука́ма апо́стольскима бы́ша зна́мения и чудеса́ в лю́дех мно́га. И бя́ху единоду́шно вси в притво́ре Cоломо́ни. От про́чих же никто́же сме́яше прилепля́тися их, но велича́ху их лю́дие. Па́чеже прилага́хуся, ве́рующе Го́сподеви, мно́жество муже́й и жен.

Толкова́ние, Златоу́ста: По бы́вшему стра́ху мно́жайша зна́мения творя́т, Петр и про́чии. И не ктому́ в до́му, но и во святи́лище прише́дше, ту пребыва́ху. Не ктому́ нечи́стых не прикаса́тися храня́ху, но про́сто ме́ртвым прикаса́хуся. И зри, ка́ко в свои́х ско́ри зело́ быва́ют, в стра́нных же не такову́ и́мут си́лу. Петр же чудне́йши бе, той бо зна́мение сотвори́л есть, и пе́рвое, и второ́е, и тре́тие. И е́же о Ана́нии сугу́бо бе я́же о смы́сле обличи́ти и е́же умертви́ти повеле́нием. Никто́же рече́ сме́яше возбрани́ти их, не ктому́ про́чее в небреже́нии бя́ху. Я́коже и пре́жде, в ма́ле вре́мени внеза́пу толи́ка бя́ше от ры́барей и от мытаря́: не́бо бысть земля́ тех житие́м, и си́лами, и чудеса́ми, и ины́х мно́гих ра́ди. Я́ко а́нгели та́ко дивля́хуся, я́ко безпло́тнии велича́хуся: ни в чесо́м же ми́ра сего́ обраща́ющеся, ни к сме́ху, ни к гне́ву, ни к ско́рбем, человеколю́бни бо бе́ша и посети́тели. Зри у́бо, ка́ко явля́ется им житие́: малоду́шие пе́рвое бысть вознесе́ния ра́ди Христо́ва, та́же благоду́шие соше́ствия Ду́ха Свята́го ра́ди, па́ки малоду́шие досажда́ющих ра́ди, та́же и благоду́шие ве́ровавших ра́ди и бы́вшаго зна́мения, па́ки малоду́шие есть темни́ца и уз ра́ди, та́же и благоду́шие отве́та ра́ди, па́ки зде малоду́шие и благоду́шие, я́ко откры́ их Бог. И повсю́ду све́тлы яви́шася, я́коже гоня́ху и убива́ху малоду́шие. И а́ще опа́сно смо́триши, си́це и в дре́вних обря́щеши.

Су́щее: Я́ко на распу́тиях износи́ти неду́жныя и полага́ти на посте́лях и на одре́х, да гряду́щу Петру́, поне́ сень его́ осени́т не́коего от них. Схожда́шежеся мно́жество наро́да от окре́стных градо́в во Иерусали́м, принося́ще неду́жныя и стра́ждущая от дух нечи́стых, и́же исцелева́хуся вси.

Толкова́ние Златоу́стаго: Мно́га бысть ве́ра и бо́льша не́же на Христа́. Отню́дуже бысть се я́же глаго́ла Христо́с: «Я́коже ве́ровавше в Мя, дела́ я́же Аз творю́, и ти́и сотворя́т». «Приноша́ху рече́ неду́жныя и стра́ждущия от неду́г нечи́стых». Зри у́бо, не ктому́ про́чее число́ глаго́лет ве́рующих, мно́жества безчи́сленнаго ра́ди.

Су́щее: Воста́в же архиере́й и вси и́же с ним су́щая е́ресь саддуке́йская, и испо́лнишася за́висти, и возложи́ша ру́ки своя́ на апо́столы, и посла́ша их в соблюде́ние о́бщее. А́нгел же Госпо́день но́щию отве́рзе две́ри темни́цы, изве́д же их, рече́: «Иди́те и ста́вше глаго́лите в це́ркви лю́дем вся глаго́лы жи́зни сея́».

Толкова́ние: «Воста́в же архиере́й» рече́, си́речь, подви́гнуся на гнев о бы́вших. Ны́не мно́жае их нападо́ша и ника́коже су́дят их, ни истязу́ют, но а́бие в темни́цы всажда́ют. Что же быва́ет? А́»нгел же Госпо́день но́щию отве́рзе две́ри темни́цы и изведе́ я́» рече́, се на о́нех утеше́ние бысть и ве́ровавшим по́льзу и поуче́ние.

Коне́ц толкова́нию.

Я́коже све́тел ме́сяц нощну́ю тму обеля́я, и́же по земли́ ходя́щим и по мо́рю плову́щим свет освеща́ет, безобла́зны хожде́ние твори́т кому́ждо, та́коже и в суббо́ту Госпо́дь к разсла́бленому глаго́лаше: «Воста́, возми́ одр свой и иди́ в дом твой». И сего́ ра́ди к жидо́м глаго́лаше: «Мое́ уче́ние несть Мое́, но посла́вшаго Мя Отца́». И я́ко о разсла́бленаго ра́ди самовла́стия исцеле́ния, Госпо́дь же к жидом си́це рече, словеса́ от ны́не почте́ных прие́мли указаний. И от сего́ бо Госпо́дь па́че я́ве пове́да и́же непреме́нно Самого́ и Отца́. А́ще бо рекл бы Христо́с: «Мое́ уче́ние несть О́тче, но Мое́ есть», разлуча́ше себе́ от Отца́, чужда́го су́ща творя́ Его, отделя́яся устрое́ния. Рек же «Мое́ уче́ние несть Мое́, но посла́вшаго Мя Отца́», показа́ же и́же непреме́нно су́щаго, и я́ко еди́но уче́ние есть Отца́ и Сы́на и Свята́го Ду́ха. Еди́но бо Сло́во Сын, и Оте́ц, и Дух. Несть се, несть по боже́ственому Па́влу глаго́лющу: «Никто́же весть челове́ка, но дух челове́ка вселя́яся в нем» . Та́ко же Бо́жия никто́же весть, но Бо́жий Дух И́же в Нем.

И яко разсла́бленаго ра́ди самовла́стия исцеле́на, его́же пе́рвее рех Госпо́дь прия́т сия́ словеса́, слы́шали Его́ ны́не глаго́люща: «И вси чудите́ся, сего́ делма́ не Моисе́й дасть вам обре́зание. Не я́ко от Моисе́я есть, но от оте́ц. И в суббо́ту обре́заете челове́ка. А́ще обре́зание взе́млет челове́к в суббо́ту, да не разори́тся зако́н Моисе́ов, на Мя почто́ гне́ваетеся, я́ко всего́ челове́ка це́ла сотвори́х в суббо́ту? Не суди́те на лица́, но пра́веден суд суди́те». Я́коже разсла́бленаго ра́ди целе́ния Госпо́дь сия́ словеса́ прия́т, от зако́на указа́в их безако́нники. Я́коже слы́шасте глаго́лет к ним: А́ще обре́зание взе́млет челове́к в суббо́ту, и в суббо́ту обре́зовается младе́нец, да не без отверже́ния будет осмы́й день зако́н, зако́на законом возбраня́юще. Вы бо возбраня́ете закон и на Мя гне́ваетеся, я́ко всего́ челове́ка здра́ва сотвори́х в суббо́ту, и не воспоти́вся, но чу́до соде́лав.

В суббо́ту не бысть де́лати, но о всем без деле́с бы́ти. Что ра́ди от вас жи́дове в суббо́ту ража́ет, и ба́ба говори́т, и корми́лица доя́щия гото́вится ко млекопита́нию? Жена́ ражда́ет младе́нца, и естество́ зако́ну удолева́ет. А Госпо́дь в чу́до не соде́лает ли, рцы ми? А́ще в суббо́ту обре́зается челове́к, да не разори́тся зако́н, и на Мя гне́ваетеся, я́ко всего́ челове́ка здра́ва сотвори́х в суббо́ту.

«Не суди́те на лица́, но пра́веден суд суди́те». Прииму́ ва́ми  враги́ кото́раны бы́ти, я́ко и́мже судо́м су́дите осу́дитеся. Кто разоря́ет суббо́ту? Вы, в субо́ту обре́зающии, и ножь остря́щии, и крое́ние приводя́ще, и уд разлуча́юще, и ме́сто крова́во устрая́юще, или Аз И́же реко́х сло́во к разсла́бленому глаго́ля: «Воста́ни, возми́ одр свой и иди в дом твой»? А́ще бы не сбы́лося сло́во Мое́, разори́л бых суббо́ту, всу́е глаголав. А́ще ли сло́во се сбы́лося де́лом, почто́ суббо́тою спира́етеся и Творца́ отме́щетеся? Не насы́тистелися, о́ жидо́вския де́ти, в три́десять и осмь лет ви́дяще разсла́бленаго лежа́ща ко одру́ пригвожде́на, и на посте́ли боля́ща, и разслабле́ния бре́мя день и нощь нося́ща? Не ока́ясте, ни страстова́сте, да и еди́н час. Разсла́бленый одр но́сит, и проти́ву мзде стека́етеся. Не подоба́ше ли се возопи́ти: «Обрати́ одр мой в неду́г мой». И све́даю, о́ фарисе́и, чесо́ ра́ди ка́етеся. Не того́ бо ра́ди гне́вастеся я́ко исцеле́ разсла́бленый, но я́ко не мого́сте одра́ сокры́ти? Сего ра́ди нрав ваш ве́дая, повеле́х ему́ понести́ одр, да а́ще вы умолчите́, то одр сей чу́до возопие́т. Что крамолу́ете, о́ фарисе́и? Несть чуждь разсла́бленый, несть маловре́менен, но вси вы зна́ете его́. И́же три́десять и осмь лет в купе́ли ва́шей пита́шеся, на крова́ти лежа́ боля́ше. Не и́мате глаго́лати о нем, я́ко о слепце́: «Сей ли есть? Ни, но подо́бен есть ему́, несть сей». А́ще не одоле́л вам слепе́ц, и сего́ и́мете, и на суди́ще повлеце́те, я́ко да о всем сра́ма испо́лнитеся.

«Не суди́те на лица́, но пра́веден суд суди́те». И а́ще мни́и ма́лым, к самому́ ука́зу разсла́бленаго потеце́те, Го́споду воспомяну́вшу ра́ди разсла́бленаго. А́ще бо Бог его́ воспомяну́л, ка́ко мы забы́ти сотвори́м? Кто ся не диви́т тогда́, егда́ Госпо́дьска чудеса́ сказу́ют? Госпо́дьский бо и прише́дший пра́здник. [Хода́та и́ Госпо́дь, сре́дний пра́здник] . Всегда́ же сре́днее крайми́ затвори́тся. Сего́ ра́ди и прии́де Госпо́дь в сре́дний пра́здник в Преполове́ние, сугу́бу Воскресе́нию благода́ть сотвори́: от Воскресе́ния бо и Пентико́стия, преполовя́щися Воскресе́ния показа́ Пентико́стию персто́м, сказа́ восхо́да .

Поведает что у́бо все разсла́бленаго де́ло? Ука́жет у́бо сло́ву и любви́ и ку́пчи , я́ко да о всем духо́вному успе́ху бога́тство распло́дите. Носи́ па́мяти си́це Иоа́нна евангели́ста вопию́ща: «А пото́м бе пра́здник жидо́вский, и взы́де Иису́с во Иерусали́м. Бе́яше же во Иерусали́ме купе́ль, нарица́ема жидо́вски Вифезда́, пять притво́р иму́щи. В тех лежа́ше мно́жество больны́х, слепы́х, хромы́х сухи́х». Бе́яше же не́кто челове́к три́десяти и осми́ лет лежа́ше в посте́ли в неду́зе свое́м. Сего́ ви́де Госпо́дь И́же вся ве́дый пре́жде бу́дущаго, и разуме́в я́ко мно́га ле́та и́мать в боле́зни, и рече́ ему́: «Хо́щещи ли здрав бы́ти?». О́ле Госпо́дне нетщесла́вное исцеле́ние! Не ждет умиле́ния о боля́щих, но Сам и́дет ко стра́жущим. Со́лнце бо Сый пра́ведное, ко всем распростира́ет лучи́ благодея́ния.

«Бе́яше же ов́чая купе́ль, в не́йже лежа́ше мно́жество больны́х». Прикла́дно се жидо́вской не́мощи, пять притво́р я́же по́лны бе́яху неду́жных. Неду́гуют бо жидо́встии лю́дие пятию́ чувств: взо́ру реку́, объюха́нию, вкуше́нию, слы́шанию, осяза́нию. Вся́чески бе́яху жи́дове, не имяху чи́ста о́ка ви́дяще чудеса́. И презира́юще не имя́ху вкуше́ния, благода́тную ма́нну яду́щии, смо́квей прося́ще. Не име́яху объюха́ния чи́ста Влады́чняго ми́ра, но диа́вольскаго смра́да изво́ливше. Не име́яху слу́ха чи́ста, но змии́нска свиста́ния послу́шающе, а не проро́ческу уче́нию покаря́ющеся. Не имя́ху осяза́ния соде́лательника, куми́ры богосло́вяще, а И́стиннаго Бо́га преоби́дяще. Но обаче прише́д пло́тским прише́ствием Влады́ка Христо́с, И́же чу́вством Творе́ц и созда́нием Де́латель, вку́пе и пло́тных страсте́й и самохо́тным грехо́м управле́ние сотвори́. Сей бо разсла́бленый предлежа́, сугу́бы ра́ны терпя́ще, душу омрача́ше, плоть же неду́гом разслабля́ше. Тем Госпо́дь я́коже обои́м Врачь, [да] и те́ло стягне́т и ду́шу освяща́ет, пло́ти же одр понести́ повеле́.

Что у́бо? Ви́де Госпо́дь сего́ разсла́бленаго и рече́ к нему́: «Хо́щеши ли здрав бы́ти?». То от сего́ вину́ взе́мше жидо́вския дети, ху́ляще Бо́га глаго́лаху: «А́ще бы Бог был Христо́с, то что ра́ди вопраша́ше разсла́бленаго, глагол́я «хо́щеши ли цел бы́ти?»?. И́же неду́гом содержа́шеся три́десят и осмь лет имя́ше в неду́зе, и у купе́ли пребыва́ше да вред отве́ржет, и вопраша́ше же его́: «Хо́щещи ли цел бы́ти?». Кото́рый Бог вопраша́ет? О́ жидови́не! Послу́шай, супроти́вниче. Зде Госпо́дь не я́ко не разуме́я вопраша́ше, но сего́ ра́ди управле́ние мы́сля дарова́ти. А́ще те́лу еди́ному неду́г бы был, не бы глаго́лал Госпо́дь к разсла́бленому: «Хо́щеши ли цел бы́ти», ве́дый я́ко хо́щет его́же жела́ет. Но елма́ духо́вным бла́зном бе́яше поползе́ние, сего́ ра́ди вопраша́ше разсла́бленаго, глаго́ля: «Хо́щеши ли здрав быти?». Даждь обеща́ние и возми́ цельбу́, елма́ же ничто́же сотворю́ немо́щно. Аз бо есмь проро́ком возопи́вый пре́жде мно́га вре́мене глаго́ля: «А́ще хо́щете и послу́шаете Мене́, блага́я земна́я сне́сте. А́ще ли не хо́щете ни послу́шаете Мене́, мечь вы изъя́сть» . Елма́ у́бо самовла́стно и живо́тно челове́к, душе́вне же разсла́бленый бе́яше разсла́блен, сего́ ра́ди Госпо́дь, да не без мзды ему́ исцеле́ние дасть, вопраша́ше сего́ глаго́ля: «Прошу́ обеща́ния, хо́щеши ли цел бы́ти». О пло́тных бо страсте́х ника́коже Госпо́дь вопраша́ет, хо́щеши ли цел быти. Я́коже ни кровоточи́вицы, ни прокаже́наго, ни обою́ прокаже́нику вопроси́. Иде́же бо душе́вную страсть ви́дя, вопраша́ше, обеща́ние прия́ти хотя. А́ще ли не приимет обеща́ния, то не дасть целбы.

Есть же уже́ то рещи кому́: «Что у́бо и два слепца́? Что, грехо́м зна́мение ноша́ста, я́ко тою́ Госпо́дь вопра́ша[ше] глаго́ля: «Что хо́щета да сотворю́ ва́ма?»». Лю́бо ити́ в Писа́нии, в Бо́жиих Ева́нгелиих. Два слепца́ слепля́стася пло́тныма очи́ма, а душе́вный взор не о́стро ли зря́ста о Го́споде? Не име́яста ли до конца́ ра́зума, распе́ншеся о испове́дании? Тем и Госпо́дь отлага́ет цельбу́, да укрепи́т и́ма веру.

Есть же уже́ рещи́ то кому́: «Похуля́ет слепца́». Ве́рна ли бе́яста му́жа? Ни. Но то́чию слышаста, я́ко Госпо́дь мимохо́дит, возопи́ста глаго́люща: «Поми́луй ны, Сы́ну Дави́дов». Ка́ко у́бо гре́шни, и́же той глас возопи́вшии? Послу́шай того́ гла́са ра́ди проти́вяйся, и́же пе́рвое зва́ста и отложе́ния исцеле́нию сотвори́. Елма́ же моля́щася глаго́ласта: «Поми́луй на́ю, Сы́ну Дави́дов». Кий Сын Дави́дов толи́ку дае́т си́лу и толи́ка чудодея́ния? Избра́нный Авесоло́м, Сын Дави́дов? Но отцу́ уби́йца яви́ся. Возлю́бленник Аммо́н? Но свою́ сестру́ оскверни́. Прему́дрый Соломо́н? Но наконе́ц поползе́ся. Елма́ у́бо два слепца́, а́ки к Сы́ну Дави́дову приидо́ша, а не Бо́га кре́пка мня́ща Его́ и хи́тра Врача́, и не е́же славна Бо́га. Сего́ ра́ди вопию́щема слепце́ма: «Поми́луй на́ю, Сы́ну Дави́дов», и не даде́ и́ма отве́та, да ве́ру и́ма поспеши́т и устро́ит. Тем отложе́ние слепца́ прии́мша, по души́ освети́стася и прия́ста свети́ло ве́ры.

Вопраша́ше по сем Госпо́дь, глаго́ля и́ма: «Ве́руета ли я́ко могу́ се сотвори́ти?». Что у́бо слепца́? Поспе́вша о ве́ре, отвеща́ста: «Ей, Го́споди». Уже́ не реко́ста: «Ей, Сы́ну Дави́дов», но: «Ей, Го́споди». Воспомяну́ста отложе́ние то, ту а́бие испове́дание твори́ста, глаго́люща: «Ей, Го́споди, ве́руеве, яко мо́жеши се сотвори́ти». Та́же показа́в Госпо́дь, я́ко ве́ру поспеши́ста, отвещава́ше и́ма глаго́ля: «По ве́ре ва́ю бу́ди ва́ма». А́ще не бы́ста поспеши́ла ве́рою, зре́ния не бы́ста прия́ла.

Сего́ ра́ди и зде Госпо́дь, елма́ же разсла́бленый па́че душе́ю бе́яше изступи́л грехо́вным истле́нием, вопраш́аше его́ Госпо́дь глаго́ля: «Хо́щеши ли цел быти?». Разсла́бленый же не ве́дый, а́ще кто есть глаго́ляй, отвещева́ше к Бо́гу глаго́ля: «Хощу́ цел бы́ти». До́бре вопраша́, хо́щеши ли: уже́ бо не хощу́. Мно́гажды бо хоте́в, ничто́же успе́х. Что же хощу еже не возмогу́? Хощу́ цел бы́ти. У́же бо состаре́хся на одре́ сем. Гроб есмь многоглаго́лен, умро́х жив. Ничто́же еди́но по сме́рти претерпе́ти ми бы́ти, кля́твою мя вси взе́млют. Три́десять и осмь лет есть лежа́щу ми у о́вчая купе́ли, и никто́же поми́лует мене́. Продае́тся дар, ко́рмчествуют жидо́встии о́троцы. Еди́н ле́том очи́стится, и ле́по. Пе́рваго пре́жде очи́стити, но па́че бога́тый пре́жде почте́тся, безде́льная купе́ль, без пра́вды ны́нешняя. Да а́ще ли бы присеще́ние не́кое пра́ведно, то не бы дар исцеле́нием продава́емь, но всем без за́висти да раздае́тся.

Госпо́дь же к разсла́бленому рече́: «Что на еди́ном ме́сте лежа́ пла́ваеши мы́слию и а́ки к неве́дущу глаго́леши? О́вчею купе́лию облада́ю, то не ве́даю ли бу́дущаго? Разуме́х жидо́вскую ку́плю. Сего́ ра́ди приидо́х премени́ти о́вчая купе́ли. И ны́не сию́ купе́ль пресушу́, и креще́нию воды́ отве́рзу. В сей купе́ли еди́н на ле́то очища́ется, а креще́нием безчи́слени породя́тся. В сию́ а́нгела посыла́х, в о́ну же Аз И́же а́нгелом Творе́ц снидо́х. Тем к вопро́су отвеща́й Ми: хо́щеши ли здрав бы́ти?, ре́кше: ве́руеши ли, я́ко всех есмь сильне́е глаго́ляй тебе́?».

Разсла́бленый же ма́ло возре́в и влады́чество Госпо́дне позна́, нау́ком еще́ содержа́ся, отвещава́ше глаго́ля, я́же ве́сть я́ве: «Ей, Го́споди, челове́ка не и́мам, да егда́ возмути́тся вода́ и вве́ржет мя в купе́ль. До́ндеже аз пойду́, ин пре́жде мене́ вла́зит». Госпо́дь же рече́ к разсла́бленому: «Что сомни́шися, о́ разсла́блениче? Довлеет ти позна́ти Мя Го́спода. Не мечта́й о мно́зе, не взира́й на возмуще́ние купе́льное, возмути́шабося жидо́вская сердца́. Моего́ исто́чника, о́ смире́нне, име́й, я́коже про́сиши. Ве́де, а́ще бо и челове́ка не и́маши, но приста́х ти Бог вочелове́чився. Тем послу́шай Мене́: Воста́в, возми́ одр свой, и иди́ в дом свой. Обостри́ жиды́, угаси́ бе́сы, покори́ проти́ву глаго́лющая, извести́ зло мы́слящая, разреши суббо́тное обре́зание».

То слы́шав сло́во разсла́бленый, боле́знь ту ско́ро отложив, Госпо́дним сло́вом за́поведь скончева́ше и одр нося́ше. И жидо́м хотя́щим возбрани́ти ему́ суббо́ты ра́ди, глаго́лющим «не досто́ит ти взя́ти одра́ я́ко субо́та есть», он же отрева́ше их, Госпо́дне повеле́ние скончева́ше, повеле́вшаго одр взя́ти, а́ки им глаго́ла: «И́же мя сотвори́ це́ла, Той ми́ рече́: возми́ одр свой и ходи́». Безако́ннии же жи́дове, вину́ прилага́юще, глаго́лаху: «Кто есть исцелив́ый его́ в суббо́ту и повеле́вый ему́ взя́ти одр?», и а́ки пси ла́юще на исцеле́вшаго. И прилежа́ше исцеле́вый, му́ченически пострада́ на уби́йцы . Пото́м же обре́те его́ Иису́с и глаго́ла ему́: «Виждь се, цел еси́, ктому́ не согреша́й, да не пу́ще ти не́что бу́дет». Ви́диши ли любле́ниче, я́ко грех ра́ди толи́ко неду́гом содержа́шеся.

Обрати́мся у́бо и мы, я́ко да и ны́нешняго томле́ния изба́вимся, и ве́чнаго огня́ и му́ки избу́дем, о Христе́ Иису́се Го́споде на́шем, Ему́же сла́ва в ве́ки веко́в. Ами́нь.

Ши́пок, я́блоко, фи́никс, и про́чиих древе́сных плоды́, теле́сный услажда́ют горта́нь, боже́ственная же словеса́ святы́х учи́тель, любо́вию срастворе́нии, к слу́ху учи́тельством препосыла́ема, душе́вный услажда́ют горта́нь. И я́коже и́же плоды́ древе́сныя обра́вый и в плодо́в вкуше́нных [ме́сто] похвалы́ древесе́м отдае́т, та́коже и и́же боже́ственная словеса́ учи́тельская, в слусе ушесном прием, та́же к уму мыслию препусти́в и си́лу словеси́ сла́дку вкуси́в, учи́телю похвалу́ посыла́я от усте́н, глаго́лет: «Коль сла́дка горта́ни моему́ словеса́ твоя́, па́че ме́да усто́м мои́м» . И прему́дрый Соломо́н, до́брая словеса́ со́том ме́двеным приложи́в, рече́: «Со́тове медо́внии словеса́ до́брая» . Я́коже бо горта́нь устны́ бра́шна вкуша́я, весть до́брая от злых разсужда́ти , та́коже и ум душе́вный, благия глаго́лы от злых весть разлучи́тия, я́коже рече́ и во И́ове: «Горта́нь бо у́бо бра́шна вкуша́ет, ум же глаго́лы разсужда́ет» .

И да никто́же непщу́ет име́ти у́бо до́му влады́це во свое́м огра́де древеса́ вся́кая, фи́ники глаго́лю, и я́блони, и ма́сличие, Го́споду же во Свое́м огра́де церко́внем не име́ти разли́чныя о́трасли оте́ц, коему́ждо по свое́й добро́те, проти́ву входя́щему ко услажде́нию, от среды́ се́рдца плоды́ слове́с произнося́щу. О́в же у́бо их есть я́коже ма́сличие, благоцвету́щее ли́ствием ве́ры и де́лы благогове́йны плодови́то. Други́й же есть я́ко фи́никс, по́честьми и́же на диа́вола побе́ды венча́н и сладча́йший плод благотворе́ния ни́щим предлага́я, о не́мже рече́ Писа́ние: «Пра́ведный я́ко фи́никc процвете́т». Други́й же есть, я́коже я́блоко, две насажде́нии подая́ челове́ком: благово́ние глаго́ля и сла́дость горта́ню. И такова́го похваля́щи, Пе́сньми пе́снем , неве́ста Церкви что рече́? - «Я́ко я́блонь по дре́ве дубра́внем, си́це братуча́д мой посреде́ сыно́в Изра́ильтеск». И рече́: «Под сень его́ восхоте́х и седо́х, и плод Его́ сла́док в горта́ни мое́м».

Что же сотворю́ аз, возлю́блении, малоли́ствие слове́сное и плод име́я, и ниже́ пали́мых жа́ждею прохлади́ти моги́й, ниже́ вас а́лчных плоды́ слове́сными напита́ти моги́й? У́нее бо ми бе с ва́ми навы́кнути оте́ческая свята́я уче́ния! Но поне́же страх Бо́жий и любы́ ва́ша ко е́же глаго́лати нас воставля́ет, две или́ три словеса́ сладчайшаго Ева́нгелия, я́коже фи́никс взе́мше и вкуси́вше, вас воздви́гнем: та́ко бо усе́рдно на доброплодная древеса́ святы́х оте́ц, горя́ще ду́хом приведе́теся.

Ны́не слы́шахом Ева́нгелие глаго́люще: «Преполовля́ющуся пра́зднику, взы́де Иису́с в це́рковь и уча́ше». Не пре́йде сло́во Ева́нгельское, поне́же настоя́ше пра́здника вре́мя: подо́бно настоя́щему Ева́нгельское чте́ние, ключи́мая дню пове́сть, сестра́ бо есть настоя́щему пра́зднику слове́сная си́ла. «Преполовля́ющуся пра́зднику, взы́де Иису́с в це́рковь и уча́ше». Но преполовля́ющуся у́бо пра́зднику, взы́де Иису́с в це́рковь. Сконча́вшужеся пра́зднику, уже́ не взы́де в це́рковь, но на не́бо востече́.

«Преполовля́ющуся пра́зднику, взы́де Иису́с в це́рковь». Пра́здник же глаго́лет, не и́же от е́ллин и от жидо́в быва́юще, в не́мже пия́нства, и и́гры, и пе́сни блу́днии, сла́дость доброгла́сия и пляса́ний многовие́ния, - но пра́здник свят в ле́поту христиа́ном, в не́мже ни игр, ни пия́нства, но моли́твы, моле́ния и песнопе́ния, иде́же не блу́дныя пе́сни, раздража́ющие телеса́, но пе́сни боже́ственныя, ду́шы укрепля́юща, иде́же не пляса́ний многовие́ния, но душа́м святы́м в весе́лии взыгра́ния.

А́ще ли хо́щеши ви́дети и́же у нас пою́щих, и ска́чущих, и взыгра́ющихся, кото́рии суть, виждь ми Иса́ию пою́ща и глаго́люща: «Воспою́ у́бо Возлю́бленному песнь Возлю́бленнаго моего́ виногра́ду моему́» . Зри же и лик святы́х жен: Мариа́м сестру́ Моисе́ову, и со ины́ми жена́ми Изра́ильтескими, побе́дныя пе́сни пою́ще и глаго́люще: «Пои́м Госпо́деви, сла́вно бо и просла́вися», и́хже помина́ет Дави́д глаго́ля: «Посреди́ дев тимпа́ниц в це́рквах благослови́те Бо́га». И блаже́нный же Дави́д, не стыди́тся пред богоно́снным ковче́гом пляса́ти, я́коже есть слы́шати его́ глаго́люща: «Поигра́ю, и посмею́ся, и сопляшу́ пред Го́сподем» . И младе́нец же Елиса́ветин Иоа́нн, ви́дев богоно́сный Гро́зд в небра́чных ложесна́х еди́наче, еще́ кры́ющься в небра́чней утро́бе, лику́я игра́яше.

«Преполовля́ющужеся пра́зднику, взы́де Иису́с в це́рковь и уча́ше». Це́ркви же есть Бо́гу еди́ному жи́лище. Глаго́лют бо е́ллини име́ти це́рковь, не разуме́юще, я́ко ту несть святи́лище, но скверни́лище. Где бо кро́вем излия́ние, и же́ртвы, и сква́ры идольския, и службы бесо́вская, - ту несть це́ркви, но скверни́лище бесо́вское.

«Преполовля́ющужеся пра́зднику, взы́де Иису́с в це́рковь и уча́ше». Де́ло бо сло́ву е́же глаго́лати, учи́телю е́же учи́ти, и Христу́ ‐ поле́зныя послу́шающим произноси́ти глаго́лы.

«Преполовля́ющужеся пра́зднику, взы́де Иису́с в це́рковь и уча́ше». О́ пренеизрече́ннаго человеколю́бия! Иде́же ма́ло пре́жде ка́мением побива́емь бя́ше, та́мо сло́вом учи́тельства ка́мением Того́ поби́ти хотя́щих обогати́.

«Взы́де Иису́с в це́рковь и уча́ше». Иде́же Моисе́ов прочита́шеся зако́н, ту благода́ти предлага́ше учи́тельства, не упраздня́я зако́н, но исполни́тель зако́ну быва́я: Сам бо во Ева́нгелии возопи́: «Не приидо́х разори́ти зако́н, но испо́лнити». И Па́вел и́же во усте́х име́я Влады́ку веща́юща, «коне́ц, рече́, зако́ну Христо́с впра́вду». Мно́зем у́бо слы́шащим, никому́же от иуде́й навы́кнущу: о них бо проро́к предглаго́ля, взыва́ше: «О́чи и́мут и не ви́дят, у́ши и́мут и не слы́шат».

«Преполовля́ющужеся пра́зднику, взы́де Иису́с в це́рковь и уча́ше», богобо́рцем иуде́ом безу́мие облича́я.

«Взы́де Иису́с в це́рковь», да небе́снаго учи́тельства просте́р мре́жу, слове́сный от челове́к сотвори́т лов.

«Взы́де Иису́с в це́рковь», но жи́дове снидо́ша от ве́ры.

Уже́ бо «преполовля́ющужеся пра́зднику, взы́де Иису́с в це́рковь и уча́ше», дивля́хужеся у́бо иуде́е глаго́люще: «Ка́ко Сей весть кни́ги не учи́вся?», чужда́хуся, но не ве́роваху. Удивля́хуся прему́дрости зе́льству, но не познава́ху зло́бою помраче́ннии лю́тостия. Зря́ху Врача́ предло́жша лечбы́, неду́гующе врачева́ние не приима́ху. Зря́ху изба́вити могущаго, и плене́ние любля́ху. Иму́ще посреде́ блага́го рая, те́рние собира́ху. В приста́нищи су́ще, потопи́шася окаяннии. Исто́чнику точа́щу боже́ственная учи́тельства, за́висти отмы́ти смрад не хотя́ху. Христу́ криле́ человеколю́бия просте́ршу, под Того́ про́мыслом покры́тися не хотя́ху, зми́ина исча́дия. «Коли́жды бо рече́ Го́споди во Ева́нгелиих восхоте́х собра́ти чад́а ва́ша я́коже ко́кошь птенца́ своя́, и не восхоте́сте!». Чужда́хуся иуде́и глаго́люще: «Ка́ко Сей весть не научи́вся?». О вещи! Зако́н прочита́еши, иуде́е, и не ве́си зако́нная учит́ельства? Глаго́леши «ка́ко Сей весть кни́ги не научи́вся». Рцы ми, И́стинне вра́же, ка́ко Ада́м писа́ния не навы́к, звере́м ключи́ме именова́ние положи́. Раба́ не вопраша́еши, а Влады́ки сло́во истя́жеши: «Ка́ко Сей весть»?

Отвеща́ Иису́с рече́: «Мое́ уче́ние несть Мое́, но Посла́вшаго Мя Отца́». И когда́ Бог по прехожде́нию уступа́ет ме́ста, когда́ же И́же все исполня́яй и в не́мже есть прихо́дит. Ко иуде́ом есть сло́во, а не ко и́же благочести́вне навы́кнути хотя́щим. Рече́ние «Мое́ уче́ние несть Мое́, но Посла́вшаго Мя Отца́».

«Преполовля́ющужеся пра́зднику, взы́де Иису́с в це́рковь и уча́ше». Це́ркви же есть Богу еди́ному жили́ще возло́жено, иде́же любы́ и мир, иде́же ве́ра и целому́дрие водворя́ется. Сего́ ра́ди иере́ю Бо́жию, служа́щему Бо́гу, ми́рну подоба́ет бы́ти и ти́ху, некра́дливу, не сребролю́бцу, да пе́рвее Бог в того души́ всели́тся, и та́ко лю́ди к Того о́бразу приведе́т. Мо́жет у́бо «це́ркви» глаго́латися и коего́ждо ве́рна челове́ка душа́ очи́щена, иде́же живе́т Христо́с: «Вселю́бося в вас, рече́, и похожду́» . Це́ркви же вои́стинну свята́я, и Иере́й Сам есть Христо́с, в нейже по боже́ственному апо́столу: «Вся́ко исполне́ние Божества́ Его́ живе́т теле́сне» . К Нему́же рече́ Оте́ц: «Ты еси́ иере́й по чи́ну Мелхиседе́кову» . Ны́не впад от неначая́ннаго в бо́льшее иска́ние, недоуме́ю, где приклони́ти о́ко мы́сленное, ка́мо преложу́ корми́ло учи́тельства не вем.

А́ще бо апо́стол в глави́зну е́же о Мелхиседе́це пришед, облени́ся тонкоче́стне пове́дати, [ле́гце] рек: «О не́мже мно́го сло́во и неудо́бь сказа́емо» , что у́бо реку́ аз, и́же толи́ко отстоя́й от апо́стола, ели́ко а́нгел проти́ву челове́ку подо́бием. И я́коже пу́тьшественик, до́ндеже у́бо не́кий у пого́рь ра́вен путь ше́ствует, безбе́дне ше́ствие твори́т, егда́ же прии́дет до не́коего ме́ста жесто́ка и лю́та и неудо́бь ше́ствуема, иде́же есть холм к небесе́м высок, став и труд к горшему ше́ствию помы́слив, пома́лу ше́ствовати начина́ет, да не ско́ростию отпа́днет. Та́коже и мы, до́ндеже име́хом Ева́нгельское низпого́рие и равни́ну, ше́ствием сло́ва усе́рдно ше́ствовахом, егда́ же приидо́хом к холму к небеси́ высо́кому разуме́нием, ти́се наступа́ти на небе́сную ле́ствицу, сказанием начина́ем.

Что же есть, е́же от всех христиа́н иско́мое виде́ние? Чесо́ ра́ди рече́ апо́стол, воспомяну́в Мелхиседе́ка, пове́да сего́ без отца́ и без ма́тере, и безро́дна, ниже́ нача́ло днем, ниже́ жи́зни коне́ц иму́ща ? Сей несть у́бо челове́к, но Бог. Мно́зи же не разуме́вше о нем рече́наго, бо́льша Христа́ бы́ти реко́ша и соста́виша са́ми себе́ изволе́ние, [сиречь е́ресь,] и глаго́лются такови́и мелхиседекиа́не. И пря́щеся с на́ми и хотя́ще указа́ти, якоже бо́лий есть Христа́ Мелхиседе́к, прино́сят ны Писа́ние в послу́шество глаго́люще: «Ты еси́ иере́й во век по чи́ну Мелхиседе́кову». Ка́ко бо рече́ несть бо́лий Мелхиседе́к, ему́же по о́бразу и чи́ну свяще́нствует Христо́с? Ини́и же прельсти́вшеся, глаго́лют ему́ бы́ти Ду́ха Свята́го. Мы же глаго́лем бы́ти челов́ека подобостра́стна нам, и ниже́ бо́льша того́ бы́ти Христа́. Что же глагол́ю Христа́? Но ниже́ Иоа́нна Крести́теля. И́стинно бо есть сло́во Христо́во: «Ами́нь глаго́лю вам, не воскре́се в рожде́нии жена́ми бо́лий Иоа́нна Крести́теля» . Но ниже́ бы́ти ему́ Ду́ха Свята́го. Я́коже несть бо́лий Христа́ Мелхиседе́к, да пове́дят нам ти́и, и́же се глаго́лющии, «от ко́его ме́ста или́ от ко́ея страны́ того́ бы́ти глаго́лют? Еда́ небе́снаго, еда́ земна́го, или́ преиспо́дняго?» А́ще у́бо реку́т я́ко небе́сныя есть Мелхиседе́к или́ ины́я ко́ея страны́, да слы́шат, я́коже и той коле́не преклони́т Христу́: глаго́лет бо апо́стол, «я́ко Тому́ покло́нится вся́ко коле́но, и всяк язы́к испове́сть, небе́сных и земны́х, и преиспо́дних» , си́речь Христу́. А́ще у́бо преклони́т коле́но Мелхиседе́к Христу́, ме́ньший бу́дет поклони́выйся Мелхиседе́к покланя́емому от него́ Христу́. Что у́бо окая́ннии и про́чий стих рече́нный от апо́стола не слы́шат, да навы́кнут ме́ньша того́ бы́ти от Христа́? Прино́сит бо, глаго́ля: «Уподо́блен же Сы́ну Бо́жию» , я́коже и мы по о́бразу и по подо́бию Бо́жию бы́хом. Но оба́че кто привопраша́ет от послу́шающих и рече́т: «Что у́бо есть без отца́ того́ глаго́лати, и без ма́тере, и в ро́де ненарече́на Мелхиседе́ка?». К нему́же рече́м, «я́ко жи́дове у́бо того́ ре́ша от блуда́ рожде́на, и сего́ ра́ди не родосло́вится от Писа́ния». К ни́мже речем, «я́ко зле реко́сте, обрета́ем бо и и́ных от блуда́ ро́жденных, и родосло́вимых. А́бие Соломо́н от Ури́ины жены́ ро́ждься, родосло́вимь есть. Та́же Авимеле́х, сын Гедео́нь, и́же от блуда́ роди́ся, в ро́де нарица́ется. Чесо́ у́бо ра́ди не родосло́вится Мелхиседе́к?». Но елма́ о́браз бя́ше Христу́ Мелхиседе́к, и о́браз ноша́ше Того́, сего́ ра́ди Писа́ние оста́ви ему́ отца́ и ма́тере, и не рече́ ниже́ отца́ ниже́ ма́тере, но в ро́де ненарече́на его́ испове́да, да в нем я́коже во о́бразе И́стиннаго без отца́ и без ма́тере и в ро́де Ненарече́наго Христа́ у́зрим: без отца́ бо Христо́с на земли́ по пло́ти и без ма́тере в небесе́х по ду́ху и по Боже́ству, тако́в бо есть, «И́же ниже́ нача́ла днем, ниже жи́зни коне́ц име́я» .

Не бо в ро́де нарече́ Писа́ние Мелхиседе́ка, но оста́ви ему́ и рожде́ние, и сконча́ние, да я́коже пре́жде ре́хом, в о́ном Сего́ у́зрим, И́стиннаго Мелхиседе́ка. «Царь ми́рный » толку́ется Мелхиседе́к, И́же есть Христо́с, ни нача́тка днем, ниже́ жиз́ни коне́ц име́я. Ниже́ бо в нача́ло днем Бог сло́во роди́ся, ниже́ почи́ когда́ или́ сконча́ся: вы́ну бо Христо́с пребыва́ет. Приреку́т у́бо к нам мелхиседекиа́не, глаго́люще: «Что у́бо е́же глаго́лет к Нему́ Оте́ц: «Ты еси́ иере́й во ве́к по чи́ну Мелхиседе́кову?». К ни́мже глаго́лем, «я́ко той муж пра́веден бысть и вои́стинну Христо́в о́браз нося́ в себе́, проро́ческим у́бо Ду́хом подви́жимь, хотя́щее от Христа́ приноше́ние к Бо́гу приноси́тися разуме́в, хле́бом и вино́м Бо́га почита́ше, подо́бяся бу́дущему Христу́. Елма́ у́бо во иуде́йском со́нмищи чин Ааро́ни же́ртвы приноша́шеся к Бо́гу, не хле́бом и вино́м, но тельцы́, и а́гнцы, и кро́вными же́ртвами сла́вляше Бо́га, Бог же к хотя́щему роди́тися от Де́вы Мари́и Иису́су взыва́ше глаго́ля: «Ты еси́ иере́й во ве́к по чи́ну Мелхиседе́кову»: не по чи́ну Ааро́ню, и́же тельцы́ и а́гнцы и кро́вными же́ртвами служа́щих, но «Ты еси́ жрец во ве́ки по чи́ну Мелхиседе́кову», хле́бом и вино́м иноязы́чным принося́ приноше́ние вы́ну. Но да не мни́мся многосло́вити возлю́блении, протя́жуще сло́во, зде соста́вльше сло́во, ко оте́ческому исто́чнику учи́тельства по́слем вас, и́же и жа́жду душ ва́ших утоли́т, и сердца́ ва́ша возвесели́т, Ду́ха Свята́го испо́лнивше о Христе́ Иису́се Го́споде на́шем, Ему́же подоба́ет вся́кая сла́ва, честь и поклоне́ние, ку́пно со Отце́м и Святы́м Ду́хом, ны́не и при́сно, и во ве́ки веко́в. Ами́нь.