Пяток первой седмицы по Пятидесятнице

Фома́ же, един от двоюна́десять, глаго́лемый Близне́ц, не бе с ни́ми, егда́ прии́де Иису́с. Глаго́лаху у́бо ему́ ини́и ученицы́: «Ви́дехом Го́спода». Он же рече́: «А́ще не ви́жу на рука́х Его́ о́браза», и про́чая:

Я́коже е́же про́сте и я́ко прилучи́ся ве́ровати - удо́бства есть: си́це, е́же па́че ме́ры испы́товати и мно́го истязова́ти - дебеле́йшия мы́сли. Сего́ ра́ди и Фома́ порица́ется. Апо́столом бо ре́кшим «ви́дехом Го́спода», не ве́рова: не толи́ко оне́м не ве́руя, ели́ко вещь непщу́я не́мощну бы́ти, е́же есть от ме́ртвых воскресе́ние. Не рече́ бо я́ко «не ве́рую вам», но «а́ще не вложу́ не ве́рую вам». Ка́ко у́бо, всем собра́ным, той оста́ еди́н? Ле́по бе от разсе́яния уже́ бы́вшаго, не у́ и тогда́ ему́ возврати́тися. Ты же, егда́ уви́диши не ве́рующа ученика́, помы́сли Влады́чне человеколю́бие, ка́ко о еди́ной души́ показу́ет Себе́ я́звы име́юща и прихо́дит да спасе́т еди́наго, а́ще и други́х дебеле́йша су́ща. Те́мже и ю́же чу́вством дебеле́йшим иска́ше ве́ру, и ниже́ очесы́ ве́рова. Не рече́ бо: «а́ще не уви́жу», но «а́ще не осяжу́» рече́, да не ка́ко мечта́ние ви́димое бу́дет. И у́бо ученицы́ сия́ возвеща́юще, достове́рни тогда́ бе́ша, и Сам увещава́яся: но оба́че поне́же вя́щше иска́ше, ниже́ сих его́ лиши́ Христо́с.

И что ра́ди не а́бие ему́ явля́ется, но по днех осми́х? Я́ко бы посре́д оглаша́ему от ученико́в ему́ и то́жде слы́шащу, во мно́жайшее воспали́тися жела́ние и верне́йшу к хотя́щему бы́ти. Отку́дуже ве́дяше, я́ко и ребро́ прободе́ся? От ученико́в слы́шав. Ка́ко у́бо тому́ ве́рова, сему́ же не ве́рова? Зане́ сие́ мно́го пресла́вно и чу́дно бе. Смотри́ же ми любои́стинное апо́столов: ка́ко недоста́тков не скрыва́ют, ниже́ свои́х, ниже́ я́же други́х, но со мно́гою сих напису́ют и́стинною. Предстае́т же па́ки Иису́с, и не ожида́ет от о́ного умоле́н бы́ти, ниже́ слы́шати что таково́: но ничто́же ре́кшу, Сам предвари́в, я́же жела́ше исполня́ет, показу́я, я́ко внегда́ сия́ веща́ше, ученико́в близ бе. И́бо глаго́лы де́йствоваше си́ми, и зело́ запрети́тельне, и во е́же по сих наказа́тельне, рек бо: «Принеси́ перст твой се́мо и виждь ру́це Мои́. И вложи́ ру́ку твою́ в ре́бра Моя́», приведе: «И не быва́й неве́рен, но ве́рен». Зри́ши ли, я́ко неве́рия бе сомне́ние? Но пре́жде не́же Дух прия́ти, по сих же не ктому́: но соверше́нни прочее бе́ша. Не си́це же то́кмо запрети́л есть, но и су́щими по сих. Поне́же бо он отдхну́ извести́вся, и возопи́: «Госпо́дь мой и Бог мой», глаго́ла: «Я́ко ви́дев Мя, ве́ровал еси. Блаже́ни не ви́девшии и ве́ровавше». Сие́ бо есть ве́ры, е́же неви́димая прия́ти: «Есть бо ве́ра, упова́емых соста́в, веще́й обличе́ние неви́димых». Зде же не ученико́в ублажа́ет еди́ных, но и и́же по о́нех ве́рующих. И́бо, рече́, ученицы́ ви́деша и ве́роваша? Но ничто́же таково́ взыска́ша, но от сударе́й а́биеже о воскресе́нии прия́ша сло́во. И пре́жде не́же те́ло ви́дети, ве́ру прия́ша всю.

Егда́ у́бо глаго́леть кто ны́не: «Хоте́л бых во времена́ о́на бы́ти и зре́ти Христа́ чудоде́йствующа», да помышля́ет, я́ко блажени невидевшии и ве́ровавше. Досто́йно же взыска́ти, ка́ко те́ло нетле́нно о́бразы показова́ше гвозде́й и каса́емо бе руко́ю сме́ртною? Но да не смути́шися: схожде́ния бо бе быва́емое. Е́же бо си́це то́нко и ле́гко, я́ко затворе́нным две́рем вни́ти, дебе́лости вся́кыя свободи́ся. Но я́ко бы уве́ритися воскресе́нию, сие́ показу́ет. И я́ко бы уви́дети, я́ко Той бе Распя́тый, и не ин вме́сто Его воскре́се: сего́ ра́ди воскреса́ет, име́я зна́мения Креста́, и ясть сего́ ра́ди. Апо́столи у́бо горе́ и до́лу сие́ зна́мение творя́ху воскресе́ния, глаго́люще: «И и́же ядох́ом и пи́хом с Ним». Я́коже у́бо на волна́х ходя́ща зря́ще пре́жде креста́, не глаго́лем ина́го естества́ те́ло о́но, но на́шего: си́це по воскресе́нии зря́ще Его́ о́бразы име́юща, не рече́м Его́ тле́нна бы́ти про́чее - ученика́ бо ра́ди сия́ пока́зоваше.

«Мно́га же и и́на зна́мения сотвори́ Иису́с». Поне́же ме́ньша ины́х сей рече́ евангели́ст, глаго́лет, я́ко ниже́ про́чии вси вся ре́ша, но ели́ка дово́льна бе́ша привлещи́ к ве́ре слы́шащых. Поне́же «а́ще вся рече́ пи́сана была́ бы́ша, ниже́ ми́ру мню вмести́ти кни́ги». Отню́дуже я́вствено, я́ко не любоче́стия ра́ди написа́ша я́же ре́ша, но потре́бнаго то́кмо. И́же бо мно́жайшая оста́вльше, ка́ко зде любоче́стия ра́ди написа́ли бы́ша? Что у́бо ра́ди не вся изложи́ша? Наипа́че убо мно́жества ра́ди. Пото́м же и́но помышля́ху, я́ко не ве́ровавый рече́нным, ниже́ мно́жайшим во́нмет. Сия́ же прие́мый, ни еди́ного же потре́бует ина́го во сло́во ве́ры. Мне же зде еще́ ви́дится, я́же по воскресе́нии глаго́лати зна́мения, те́мже рече́: «пред ученики́ Свои́ми». Я́коже бо пре́жде воскресе́ния подоба́ше быти мно́га, да ве́руют я́ко Сын есть Бо́жий. Си́це и по воскресе́нии, да прии́мут я́ко воскре́се сего́ ра́ди. И приложи́: «Пред ученики́ Свои́ми», поне́же еди́ным им сопребыва́ше по воскресе́нии. Те́мже и глаго́лаше «мир не ктому́ Мя зрит». Та́же, да навы́кнеши я́ко ученико́в ра́ди то́кмо бы́ша бы́вшая, наведе́: «Да ве́рующе, живота́ ве́чнаго и́мате во и́мя Его́». Си́речь, Тем. Той бо есть Живо́т.

«По сих яви́ себе́ Иису́с ученико́м на мо́ри Тивериа́дстем». Зри́ши ли, я́ко не ча́сте с ни́ми пребыва́ет, ниже́ я́коже пре́жде. Яви́ся у́бо в ве́чер, и отлете́. Та́же по осми́х днех, па́ки еди́ною, и па́ки отлете́. Та́же по сих на мо́ри, и па́ки со мно́гим стра́хом. Что же есть е́же «яви́»? От сего́ я́вствено, я́ко не зря́шеся, а́ще не сходи́л бы, за е́же про́чее нетле́нну бы́ти те́лу и неуведа́ему. Что же ра́ди помяну́ ме́ста? Показу́ет, я́ко мно́жае отъя́т стра́ха, я́ко про́чее им проница́ти от хра́мины и всю́ду обходи́ти: не ктому́ бо в хра́мине заключе́ни бе́ша, но в Галиле́ю идо́ша, беды́ уклоня́ющеся иуде́йския. Прихо́дит у́бо Си́мон лови́ти. Поне́же бо ниже́ Сам им ча́сте сопребыва́ше, ниже́ Дух дан бе, ниже́ [во] что вруче́ни тогда́ случа́хуся: ничто́же бо име́юще де́йствовати, худо́жество прохожда́ху.

«И бе́ша Си́мон вку́пе, и Фома́, и Нафана́ил» от Фили́ппа зва́нный, «и сы́нове Зеведе́евы, и и́на два». Ничто́же у́бо име́юще де́йствовати, на лови́тву идо́ша: и в нощи́ сие́ са́мое творя́ху, за е́же пристра́шным бы́ти. Сие́ и Лука́ рече́, но несть сие́ о́но, но и́но сие́. Друзи́и же ученицы́ после́доваху за е́же сосвяза́тися про́чее друг дру́гу, и вку́пе хотя́ще ви́дети лови́тву, и упражне́ние до́бре устро́ити.

Тружда́ющимся у́бо и злостра́ждущим, предстае́т Иису́с: и не а́бие Себе показу́ет, я́кобы и в бесе́дование приити́. Глаго́ла у́бо им: «Еда́ что сне́дно и́мате?». Еще́ челове́чнейше бесе́дует, я́ко хотя́ не́что купи́ти от них. Егда́ отреко́ша ничто́же име́ти, повеле́ врещи́ на десна́я: и ве́ргше, получи́ша лови́твы. Егда́ же Его́ позна́ша, па́ки сво́йства свои́х нрав показу́ют ученицы́ Пе́тр и Иоа́нн: ов у́бо тепле́йшь, ов же высоча́йшь бе: и ов у́бо остре́йшь, ов же зри́тельнейшь. Сего́ ра́ди у́бо Иоа́нн пе́рвый позна́ Иису́са, Петр же пе́рвый приде́ к Нему́: и́бо не худа́я бы́вшая бе́ша зна́мения. Ка́я же ли бе́ша быва́емая? Пе́рвое у́бо, е́же мно́гим я́тися ры́бам. Пото́м же, е́же не раздра́тися мре́жи. Та́же, не́же пре́жде взы́ти обрести́ся у́глию, и ры́бе наложе́нне, и хле́бу. Не ктому́ бо от подлежа́щия ве́щи творя́ше, я́коже не́коего ра́ди смотре́ния творя́ше пре́жде Креста́. Егда́ у́бо позна́ Его́, вся пове́рже: и ры́бы, и мре́жа, - и препоя́сася Петр. Зри́ши ли и стыде́ние и жела́ние? А́ще и от двоюсо́т лакте́й не бе́ша, но ниже́ си́це жда́ше кораблю́ к Нему́ приити́, но пла́вая прии́де.

Что у́бо Иису́с? «Прииди́те, обе́дуйте» рече́. «И никто́же сме́яше вопроси́ти Его́». Не ктому́ бо то́же дерзнове́ние имя́ху, ниже́ подо́бне дерза́ху, ниже́ прихожа́ху к Нему́ сло́вом про́чее, но с молча́нием и стра́хом мно́гим и стыде́нием седя́ху, внима́юще к Нему́. Ве́дяху бо, я́ко Госпо́дь есть. Сего́ ра́ди не вопраша́ху: «Кто еси». Зрак у́бо премене́н зря́ще и мно́гаго у́жаса испо́лнен, зело́ бе́ша чудя́щеся: и хотя́ не́что о Нем вопроси́ти, но страх и е́же ве́дети им я́ко не ин не́кто бе, но Той, - отъе́мляху вопроше́ние. И то́кмо обра́довашася, я́же им соде́тельствова со мно́гою о́бластию. Зде бо не ктому́ взира́ет на не́бо, ниже́ челове́ческая о́на твори́т, показу́я я́ко и о́на схожде́ния ра́ди бы́ша. И я́ко не ча́сте пребыва́ше, ниже́ подобне, глаго́лет: «Я́коже тре́тие сие́ яви́ся им, егда́ воста́ от ме́ртвых». И повелева́ет от рыб принести́, показу́я я́ко зри́мое не бе мечта́ние. Но зде у́бо не глаго́лет, я́ко яде́ с ни́ми. Лука́ же и́нде Его́, я́ко рече́ «яды́й с ни́ми бе», а е́же ка́ко - не на́ше есть рещи́: о́бразом бо не́ким преди́вным сия́ быва́ху, не я́ко естеству́ тре́бующе сне́дей про́чее, но схожде́нию к показа́нию воскресе́ния быва́ему.

Нравоуче́ние о́смьдесять седмо́е: Я́ко подоба́ет вся́ко терпе́ти озлобле́ние любви́ ра́ди Христо́вы, и коли́ка зла любоиме́нию после́дуют, и о о́бразех блуднико́в:

Не́гли сия́ слы́шасте, разгре́стеся, и сопребыва́ющих Ему́ тогда́ ублажи́сте, и хотя́щих сопребыва́ти в день о́бщаго воскресе́ния. Те́мже у́бо вся да де́йствуем, я́ко бы лице́ О́но чу́дное уви́дети. А́ще бо ны́не слы́шаще, си́це распала́емся и жела́ем во днех о́нех бы́ти, в ни́хже на земли́ пребыва́ше, и гла́са слы́шати, и зре́ние уви́дети, приступи́ти, и косну́тися, и послужи́ти – помы́сли, ели́ко Его́ есть уви́дети, не ктому́ в ме́ртвенем телеси́, ниже́ челове́ческая творя́ща, но от а́нгел почита́ема, в нетле́ннем телеси́ и их су́щых, и ина́го благоде́нствия наслажда́ющихся, е́же вся́ко побежа́ющаго сло́во. Те́мже у́бо молю́, вся да де́йствуем, я́ко бы толикия не отпа́сти сла́вы. Ничто́же бо неудо́бно, а́ще восхо́щем. Ничто́же тя́жко, а́ще внима́ем. «А́ще бо претерпи́м - и соца́рствовати и́мамы». Что есть «претерпи́м»? А́ще ско́рби терпи́м, а́ще гоне́ния, а́ще те́сный ше́ствуем путь. Те́сный бо, естество́м есть притру́ден, произволе́нием же на́шим лего́к быва́ет, наде́ждею бу́дущых. «Е́же бо а́бие легко́ печа́ли, по премно́жеству в премно́жество, ве́чную тяготу́ сла́вы соде́ловает, не смотря́ющим нам ви́димая, но неви́димая».

Да преложи́м у́бо очеса́ на не́бо, и вы́ну о́на да мечта́ем и да зрим. А́ще бо по о́нех при́сно пребыва́ем, не к сла́достным су́щым зде постра́ждем, ни печа́льная тя́жце претерпи́м. Но и сих и подо́бных посмее́м, и ничто́же нас ниже́ взя́ти, ниже́ поработи́ти возмо́жет, то́кмо а́ще жела́ние та́мо простира́ем, а́ще к любви́ о́ной возри́м. И что глаго́лю: не боле́зновати и́мамы настоя́щыми злы́ми? Ниже́ бо зре́ти та возмни́м про́чее: таково́ бо есть жела́ние. Не сопребыва́ющих у́бо нам, но отходя́щих, жела́емых же на всяк мечта́ем день. Вели́ко бо любви́ томи́тельств: всех оставля́ет, и жела́емому привя́зует ду́шу. А́ще си́це Христа́ возлю́бим, вся я́же зде сень, вся о́браз явя́тся и сон. Рече́м и мы: «Кто нас разлучи́т от любви́ Христо́вы? Скорбь ли или́ теснота́?». Не рече́: име́ния, или́ бога́тство, или́ добро́та - сия́ бо зело́ ху́да и подсмея́тельна. Но ви́дящася тя́жка бы́ти положи́л есть: гла́ды, гоне́ния, сме́рти. Та́же он у́бо я́ко ничто́же су́ща и сия́ оплева́, мы же име́ний ра́ди разлуча́емся жи́зни на́шея и све́та разделя́емся. И Па́вел у́бо ни смерть, ни живо́т, ни настоя́щая, ни бу́дущая, ни тварь и́ну предпочита́ет су́щия к нему́ любви́: мы же, зла́та ма́ло а́ще уви́дим, распаля́емся и Его́ попира́ем зако́ны.

А́ще же неотра́дна сия́ бываема, мно́го па́че не быва́ема. Е́же бо лю́то сие есть, я́ко слы́шаще у́бо ужаса́емся, де́йствующе же не ужаса́емся, но и кляне́мся удо́бне, и кля́тву преступа́ем, и похища́ем, и ли́хвы истязу́ем, и о целому́дрии неради́м, и моли́твы опа́сныя отступи́хом, и множайшая преступа́ем от повеле́нных, и име́ний ра́ди о у́дех на́шых ни еди́ноже твори́м сло́во. Име́ний бо жела́яй, безчи́сленыя бли́жнему обложи́т зла́я, и себе́ со о́нем: и́бо гне́вается удо́бне, и укори́т, и уро́да нарече́т, и кляне́тся, и клятвопреступи́т, и ниже́ ве́тхаго ме́ры соблюда́ет зако́на - не возлюби́т бо бли́жняго, зла́то любя́й: и́бо мы и враго́в повелева́емся люби́ти Ца́рствия ра́ди небе́снаго. А́ще бо ве́тхая повеле́ния исполня́юще не мо́жем взы́ти в Ца́рствие небе́сное, «а́ще не преизбу́дет пра́вда на́ша» вя́щше оне́х - и́же и о́на преступа́юще, ко́его получи́м отве́та? Име́ний жела́яй, не то́кмо враго́в не возлюби́т, но и друго́м а́ки враго́м устро́ится.

И что глаго́лю друго́в? И́бо са́мое мно́жицею естество́ не позна́ша. Име́ний жела́ющий, таковы́й ни сро́дство весть, ниже́ обы́чая помина́ет, ни во́зраста стыди́тся, ни дру́га име́ет кого́: но ко всем враже́бне име́ет и устро́ится, и пре́жде ины́х всех - к себе́, не тем е́же то́кмо погуби́т ду́шу свою́, но и е́же безчи́сленым себе́ протяза́ти попече́ниям. И́бо отше́ствия, и вражды́, и беды́, и наве́ты, и все яково́ ни бу́ди постра́ждет, то́кмо да ко́рень злых име́ет у себе́ и мно́го зла́то чи́слит. Что у́бо бу́дет неду́га сего́ люте́йше? И́бо и наслажде́ния, и сла́дости вся́кия лише́н есть, ея́же ра́ди и мно́га согреша́ют челове́цы, и слав́ы, и че́сти. Име́ний бо жела́яй, и зазира́ется тма́ми, и оглаго́льников име́ет мно́гих, и зави́дящых, и оклеве́тающих, и наве́тующых. Оби́димии бо ненави́дят, а́ки зле пострада́вше. А и́же не у́ пострада́вше - боя́щеся, да не постра́ждут, не соболе́знующе пострада́вшим. Показу́ют рать ту́же бо́льшии же и мо́щнейши , ухапля́еми и негоду́юще о смире́ннейшых, еще́ зави́дяще. Подо́бне суть врази́, и ненави́дятся.

И что глаго́лю челове́ков? Егда́ бо и Бо́га возра́тованна и́мать, ка́я ему́ про́чее наде́жда бу́дет? Ко́е утеше́ние? Ко́е прохлажде́ние? Име́ний жела́яй, не владе́ти им возмо́жет когда́, но и раб бу́дет, и страж, а не влады́ка. Мно́жайша бо твори́ти тща́ся, нигде́же изнуря́ти восхо́щет: сосеца́ет же себе́, и всех убо́гих убо́жайше устроя́ется, нигде́ же вожделе́ния поставля́я. И́бо име́ния, не я́ко да соблюда́ем, но да де́йствуем бы́ша. А́ще же восхо́щем сия́ поко́повати ины́м, что у́бо бу́дет нас окая́ннейше, и́же обтека́ем я́же всех прия́ти, тща́шася да заключи́м внутрь и о́бщую да отсеце́м потре́бу? Есть и ин неду́г, сего́ не ме́ньши. О́ви бо в зе́млю погреба́ют, о́виже в чре́во, и сла́дость, и пия́нство, с непра́вдою и ю́же от блуже́ния прилага́юще себе́ му́ку. И о́ви у́бо тунея́дцем и ласка́телем, о́виже зе́рнием и блудни́цам, о́ви же ины́м таковы́м слу́жат прото́ром, и безчи́сленыя секу́ще себе́ в гее́нну веду́щая пути, пра́вый и узако́неный оста́вльше, и́же к небеси́ веду́щий. А́ще и не приобре́тение то́кмо, но и сла́дость бо́льшу рече́нных име́ет.

Блудни́цам у́бо да́вый, подсмея́телен бу́дет и сту́ден: и мно́ги име́ти бу́дет ра́ти, и ма́лу сла́дость, па́чеже ниже́ ма́лу. Ели́ка бо а́ще дасть блудни́цам жена́м, ни еди́ну же благода́ть ему́ ве́дят: «Де́лва бо сокруше́на есть, чужд дом». И и́накоже, лют род он, и а́ду приуподо́бися ея́ жела́ние, прия́т Соломо́н. И тогда́ стае́т то́кмо, егда́ всех обнаже́нна уви́дит рачи́теля. Па́чеже ниже́ тогда́ стае́т, но и краси́тся бо́льше, и наска́чет лежа́щу, и мно́го на него́ подвиза́ет смех: и толи́ка ему́ соде́ловает зла, ели́ка ниже́ прочести́ сло́во мо́щно.

Но сла́дость спаса́емых не такова́: ниже́ бо сопроти́в рачи́теля име́ет зде, но вси ра́дуются и веселя́тся: и бла́го прие́млющии, и зря́щии. Ни я́рость, ни печа́ль, ни студ, ни поноше́ние такова́го обседи́т ду́шу, но мно́го убо весе́лие со́вести, мно́га же бу́душих наде́жда, све́тла же сла́ва и мно́го объявле́ние: и мно́жае всех - Бо́жия любо́вь, и утверже́ние.

И стремле́ние ни еди́ноже, ниже́ зазре́ние, но приста́нище безволне́ное и тишина́. Сия́ у́бо вся помышля́юще и сла́дость сла́дости уподобля́юще, да избере́м лу́чшая, да и бу́дущых получи́м благи́х благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Во дни о́ны, бысть су́щу Аполло́су в Кори́нфе, Па́влу же, проше́дшу вы́шняя страны́, приити́ во Ефе́с. И обре́т не́кия ученики́, рече́ к ним: «А́ще у́бо Дух Свят прия́ли есте́ ве́ровавше?». Они́же ре́ша к нему́: «Ни, ниже́ а́ще Дух Свят есть слы́шахом». Рече́ же к ним: «Во что у́бо крести́стеся?». Они́же реко́ша: «Во Иоа́нново креще́ние». Рече́ же Па́вел: «Иоа́нн у́бо крести́ креще́нием покая́ния лю́дем, глаго́ля: во Гряду́щаго по нем да ве́руют, си́речь во Христа́ Иису́са». Слы́шавше же, крести́шася во и́мя Го́спода Иису́са. И возло́жьшу Па́влу на ня ру́це, прии́де Дух Святы́й на ня: глаго́лаху же во язы́ки и проро́чествоваху. Бя́ше же всех муже́й я́ко двана́десяте. Вшед же в со́нмище, дерза́ше не обину́яся, уча́ше по три ме́сяца, бесе́дуя и уверя́я я́же о Ца́рствии Бо́жии.

И я́коже не́цыи ожесточа́хуся и пря́хуся, злосло́вяще путь Госпо́день, отсту́пль от них, уча́ше учени́ки, по вся дни стяза́яся во учи́лищи мучи́теля не́коего.

Толкова́ние Аммо́ниево: Путь глаго́ля Христа́, ве́ру и́стинную Па́влом возвеща́емую, ея́же кто ше́ствуя, прихо́дит к Ца́рству небе́сному.

Су́щее: Се же бысть по две ле́те, я́ко всем живу́щим во Аси́и слы́шати сло́во Го́спода Иису́са, жидово́м же и е́ллином. Си́лы же не про́сты творя́ше Бог рука́ма Па́вловама, я́ко и на неду́жныя наноси́ти от по́та те́ла его́ главотя́жа и убру́сца , и исцели́тися им от неду́г, и духово́м лука́вым исходи́ти от них

Толкова́ние Аммо́ниево: Суда́рия и симики́нфия непщу́ю бы́ти обоя́ льняна́я, оба́че суда́рия у́бо на глава́х кладу́тся, симики́нфия же в рука́х держа́тся, не могу́щии ора́рии носи́ти, яцы́же суть нося́щии оде́жди ипа́тския. Или́ суда́рия потре́бна суть ко е́же оте́рти мокроты́ лица́ своего́, я́коже по́ты, плакнове́ния, сле́зы и сим подо́бная.

Су́щее: Нача́ша же не́цыи от скита́ющихся иуде́й обая́нник, именова́ти на иму́щая ду́хи лука́выя, и́мя Го́спода Иису́са, глаго́люще: «Заклина́ем вы Иису́сом, Его́же Па́вел пропове́дает». Бя́ху же не́цыи сы́нове Ске́вы иуде́янина архиере́я седмь, и́же се творя́ще. Отвеща́в же дух лука́вый рече́: «Иису́са зна́ю и Па́вла свем, вы же кто есте́?». И скача́ на них челове́к, в не́мже бе дух лука́вый. И одоле́в им, укрепи́ся на них, я́коже наги́м и ура́ненным избежа́ти от хра́ма о́ного. Се же бысть разу́мно всем живу́щим во Ефе́се иуде́ом же и е́ллином. И нападе́ страх на всех их, и велича́шеся и́мя Го́спода Иису́са. Мно́зи же от ве́ровавших прихожа́ху испове́дающе и сказу́юще дела́ своя́. Дово́льни же от сотво́рших чародея́ния, собра́вше кни́ги своя́, сжига́ху пред всеми: и сложи́ша це́ны их, и обрето́ша сребра́ пять тем. Си́це кре́пко сло́во Госпо́дне растя́ше и крепля́шеся.

И я́коже сконча́ша сия́, вложи́ Па́влови Дух , проше́д Македо́нию и Аха́ию, ити́ во Иеросали́м, рек: «Я́ко бы́вшу ми та́мо, подоба́ет ми и Рим ви́дети». Посла́в же в Македо́нию два от служа́щих ему́, Тимофе́я и Ера́ста. Са́мже пребы́сть ле́то во Аси́и.

Бысть же во вре́мя о́но молва́ нема́ла о пути́ Госпо́дни. Дими́трие бо не́кто и́менем, сребросе́чец творя́ хра́мы сре́бряны Артеми́де, дая́ше хитреце́м де́лание нема́ло. И́хже собра́в и я́же о сицевы́х де́лателя, рече́: «Му́жие, ве́сте я́ко от сего́ де́лания дово́льство житию́ на́шему есть. И ви́дите и слы́шите, я́ко не то́кмо Ефе́с, но ма́ло не всю Аси́ю Па́вел сей препре́в, и обрати́ мног наро́д глаго́ля: я́ко не суть бо́зи и́же рука́ма челове́ческима быва́емии. Не то́кможе се, беду́ прие́млет на́ша часть, во обличе́ние приити́: но и вели́кия боги́ня храм Артеми́дин, нивочто́же вмени́тися. Хо́щетже и разори́тися вели́чество ея́, ея́же вся Аси́я и вселе́нная почита́ет».

Слы́шавше же и бы́вше испо́лнени я́рости вопия́ху глаго́люще: «Вели́ка Артеми́да Ефе́сская». И испо́лни град весь мяте́жа: устреми́жеся единоду́шно в позо́рище, восхи́щше Га́ия и Ариста́рха македо́няны, дру́ги Па́вловы. Па́влу же хотя́щу вни́ти в наро́д, не оставля́ху его́ ученицы́. Не́цыи же от аси́йских нача́льник, су́ще ему́ любе́зни, посла́вше к нему́, моля́ху не вда́ти себе́ в позо́р. Друзи́и же у́бо и́но не́что вопия́ху: бе бо собра́ние смуще́но, и мно́жайшии не ве́даху, чесо́ ра́ди собра́шася. От наро́да же избра́ша Алекса́ндра, изве́дшим его́ иуде́ом. Алекса́ндр же помаа́в руко́ю, хотя́ше отвеща́ти наро́ду. Разуме́вше же я́ко иуде́янин есть, глас бысть еди́н от всех я́ко на два часа́ вопию́щим: «Вели́ка Артеми́да Ефе́сская». Уста́вль же кни́жник наро́д рече́: «Му́жие ефе́сстии. Кто бо есть челове́к иже не весть, я́ко ефе́сский град служи́тель есть вели́кия боги́ни Артеми́ды и Диопе́тови?».

Толкова́ние: Си́речь хра́ма, Ди́ева круглови́днаго, е́же и па́че и́стинно есть, Диопе́тес же нари́чется истука́нный Артеми́дин, и́же и Палла́дион нари́чется, его́же свы́ше от Ди́я сотворе́на бы́вша непщева́ху, а не от челове́к.

Су́щее: «Без вся́кого у́бо отве́та сим [си́це] су́щим, потре́бно есть вам без молвы́ бы́ти, и ничто́же безчи́нно твори́ти. Приведо́сте бо му́жа сия́, ни храм артеми́дин окра́дша, ниже́ боги́ни ва́шея ху́ляща. А́ще же Дими́трий сей и иже́ с ним худо́жницы и́мут к кому́ сло́во, суды́ суть и анфипа́ти суть, да пое́млют друг на дру́га. А́щели что о ины́х и́щете, по зако́ну це́ркви да разреши́тся. И́бо с бедо́ю и́мамы осужда́тися о дне́шней крамоле́, ни еди́ней вине́ су́щи, е́юже возмо́жем возда́ти сло́во стремле́ния сего́ ». И сия́ рек распусти́ собра́вшийся наро́д.

По уставле́нии же молвы́, призва́в Па́вел ученики́, уте́шив и целова́в их, изы́де ити́ в Македо́нию. Проше́дше же страны́ ты́я, и уте́шив их сло́вом мно́зем, прии́де во Елла́ду. Пожи́в же ме́сяца три, бы́вшу нань наве́ту от иуде́й, хотя́щу отвести́ся в Си́рию, бысть хоте́ние возврати́тися сквозе́ Македо́нию. После́дова же ему́ да́же до Аси́и Сосипа́тр Пи́рров , ве́риянин: селу́няне же, Ариста́рх и Секу́нд: и Га́ие де́рвянин: и Тимофе́й: асия́не же, Тихи́к и Трофи́м. Си́и пре́жде ше́дше, жда́ху нас в Троя́де. Мы же отвезо́хомся по днех опресно́чных от Фили́пп, и приидо́хом к ним в Троя́ду, до дний пять, иде́же пребы́хом дний седмь.