Суббота первой седмицы по Пятидесятнице

Егда́ у́бо бесе́доваша, глаго́ла Си́мону Петру́ Иису́с: «Си́моне Ио́нин, лю́биши ли Мя мно́жае сих?». Глаго́ла Ему́: «Ей, Го́споди, Ты ве́си, яко люблю́ Тя».

Мно́га у́бо суть и и́на могу́щая да́ти дерзнове́ние нам к Бо́гу, и показа́ти све́тлых и благоиску́сных: а е́же наипа́че всех - подаю́ще нам ю́же свы́ше прия́знь, еже о бли́жних есть промышле́ние: е́же у́бо и Христо́с истязу́ет Петра́. Поне́же бо коне́ц имя́ше им я́же сла́дости, «глаго́лет Си́мону Петру́: «Си́моне Ио́нин, лю́биши ли Мя мно́жае сих?». Глаго́лет ему́: «Ей, Го́споди, Ты ве́си я́ко люблю́ Тя». Глаго́лет ему́: «Паси́ о́вцы Моя́»». И что у́бо сих прете́к, сему́ о тех бесе́дует? Избра́н от апо́стол бе, и уста́ ученико́м, и верх ли́ку. Сего́ ра́ди и Па́вел взы́де тогда́ его́ повествова́ти па́че ины́х. Вку́пе же и показу́я ему́, я́ко подоба́ет дерза́ти про́чее, я́ко отверже́нию изгна́ну, вруча́етжеся предста́тельству бра́тии. И отверже́ние у́бо не прино́сит, ниже́ поноша́ет бы́вшее, глаго́лет: «Я́ко лю́биши ли Мя?». Предста́тельствовал еси́ бра́тиям и те́плую любо́вь ю́же все́ми показова́л еси́: и о не́йже ра́довался еси́, ны́не покажи́ и ду́шу ю́же глаго́лал еси́ положи́ти за Мя, сию́ о овца́х даждь Мои́х. Поне́же у́бо еди́ною вопроше́н быв и второ́е, Самого́ неизрече́нныя мы́сли и се́рдца Ве́дящаго сведе́теля нарече́. Та́же, вопроше́н бысть и тре́тие, смути́ся па́ки, убоя́вся пре́жних: и́бо тогда́ укрепля́яся, облича́ше по сих. Сего́ ра́ди па́ки к Нему́ прибега́ет, е́же бо рещи́ «Ты ве́си вся», си́речь, настоя́щая и бу́дущая. Зри́ши ли, ка́ко бысть лучши и целому́дренейшь? Не безстуд́ствуя про́чее, ниже́ сопроти́в глаго́ля. Сего́ ра́ди смути́хся, да не когда́ аз у́бо непщу́ю люби́ти, не люблю́ же: я́коже и пе́рвее мно́га непщу́я и кре́пко изъявля́я, обличи́хся по́сле.

Тре́тие е́же его́ вопроша́ет, и тре́тие та́яже показу́я, ели́каго почита́ет предста́тельством Свои́х овец, и я́ко сие́ наипа́че су́щия к Нему́ любви́ зна́мение. Рек же ему́ о я́же к Нему́ любви, нарица́ет ему́ и сведе́тельство е́же хотя́ще страда́ти: явля́я, я́ко не невер́уя ему́ глаго́лаше я́же глаго́лаше, но и зело́ ве́руя, и су́щия к нему́ любви́ указа́ние показа́ти хотя: и научи́ти нас, кото́рым наипа́че о́бразом подоба́ет Его́ любити. Те́мже рече́: «Егда́ был еси́ юн, поя́сался сам и ходи́л еси́, иде́же хоте́л. Егда́ же состаре́ешися, воздеже́ши ру́це твои́, и ин тебе опоя́шет, и веде́т, а́може не хо́щеши». И у́бо сие́ хотя́ше и жела́ше, те́мже и я́вьствено ему́ сие́ сотвори́л есть. Поне́же бо горе́ и до́лу глаго́лаше «ду́шу мою́ за Тебе́ положу́» и «а́ще потре́ба бу́дет ми с Тобо́ю умре́ти, не отве́ргуся Тебе́» - отдаде́ ему́ вожделе́ние.

Что у́бо есть «иде́же не хо́щеши»? Естества́ глаго́лет сострада́тельное, и пло́тскую ну́жду, и я́ко не хотя́щи отверза́ет от телеси́ душа́. Те́мже я́же произволе́ния здра́ва, но оба́че и си́це естество́ облича́шеся: никто́же безстра́стне те́ло отлага́ет. Сие́ Бо́гу, е́же и напреди́ рех, поле́зне устро́ившу, я́ко бо не мно́гим быва́ти ну́ждным смерте́м. А́ще бо, сим су́щым, возмо́же диа́вол сие́ соде́лати, и безчи́сленных на стремни́ны и я́мы наведе́ - а́ще не толи́ко бы́ло бы вожделе́ние души́ к те́лу, поне́ от прилучи́вшияся ско́рби, вско́ре у́бо мно́зи к сему́ устреми́лися бы́ша. Е́же у́бо «иде́же не хо́щеши» - есте́ственое явля́ющаго есть сострада́ние. Ка́коже, рек «егда́ был еси́ юн», па́ки глаго́лет «егда́ состаре́ешися»? Сие́ бо показу́ющаго есть не су́ща тогда́ ю́на, ниже́ бо бе, ни ниже́ состаре́вся, но муж соверше́н. Что у́бо ра́ди воспомяну́ ему́ перваго жития́? Явля́я я́ко такова́ я́же Его́. В жите́йских у́бо: ю́ный у́бо потре́бен, состаре́выйжеся непотре́бен. В Мои́х же не си́це: но егда́ на́идет ста́рость, тогда́ храбо́рство светле́йше, тогда́ му́жество объявле́ннейше и исправле́ние ничто́же от во́зраста возбраня́емо. Сия́ же глаго́лаше, не ужаса́я его́, но воздвиза́я: ве́дяше бо его́ жела́ние и я́ко сие́ па́ки боле́зноваше до́брое. Вку́пеже и о́браз явля́ет сме́рти. Поне́же бо Петр вы́ну хотя́ше бы́ти в су́щых о Нем беда́х, «дерза́й, рече́, та́ко бо испо́лню твое́ жела́ние, я́ко я́же не пострада́л еси́ юн сый, сия́ тебе́ подоба́ет пострада́ти состаре́вшуся».

Та́же воздвиза́я послу́шателя евангели́ста, наведе́: «Сия́ же глаго́лаше, назна́менуя, ко́ею сме́ртию просла́вит Бо́га». Не реч́е «у́мрет», но «просла́вит Бо́га», да навыкнеши, я́ко е́же страда́ти о Христе́ - сла́ва стра́ждущему [есть] и честь. «И сия́ рек, рече́, глаго́ла: после́дуй Ми». Отсю́ду па́ки промысли́телное гадательствует и е́же зело́ к нему́ сво́йственне пребыва́ти. А́ще же глаго́лет кто: «ка́ко у́бо Иа́ков престо́л прия́т Иерусали́мский?», - о́но у́бо реку́, яќо сего́ вселен́ныя рукоположи́л есть учи́теля.

«Обрати́вся у́бо, Петр зрит ученика́, его́же любля́ше Иису́с после́дующа, и́же и нападе́ на ве́чери на пе́рси Его́, и глаго́ла: «Го́споди, сей же что?».

Чесо́ де́ля воспомяну́л есть нам возлежа́ния о́ного? Не про́сте, ниже́ я́ко прилучи́ся, но показу́я ели́ко Петр дерзнове́ние стяжа́ по отверже́нии. И́же бо тогда́ не сме́я вопроси́ти, но ино́му сия́ повелева́я, сей и предста́тельству вве́рен бысть бра́тии. Не то́кмо ино́му я́же о себе́ не повелева́ет, но и сам о ино́м прино́сит Учи́телю вопроше́ние прочее́: и Иоа́нн у́бо молчи́т, он же бесе́дует. Показу́ет же и зде любо́вь, ю́же к нему́ имя́ше: и́бо зело́ любля́ше Иоа́нна Петр. И сие́ от су́щих по сих я́вствено, и чрез все же Ева́нгелие показует сих соу́з, и в Дея́ниих.

Поне́же у́бо вели́ка ему́ прорече́, и вселе́нную вручи́, и сведе́тельство провозгласи́, и любо́вь сведе́тельствова вя́щшу ины́х - хотя́ и того́ прия́ти обе́щника, рече́: «Сей же что?». Не то́йже ли путь нам име́ти бу́дет? И я́коже тогда́ сам не моги́й вопроси́ти, того́ предлага́ет: си́це и ны́не, отда́в ему́ воздарова́ние и вознепщева́в ему́ хоте́ти вопроси́ти я́же по нем, та́же не дерза́ти, той восприя́т проше́ние.

Что у́бо Христо́с? «А́ще ему́ хощу́ пребыва́ти, до́ндеже прииду́, что к тебе́?». Поне́же у́бо зело́ промышля́я глаго́лаше и не хотя́ его́ отто́ргнутися, показу́я Христо́с, я́ко ели́ко а́ще возлюби́т, любви́ Его́ - не достиза́ти, рече́: «А́ще ему́ хощу́ пребыва́ти, доне́леже прииду́, что к тебе́?». Си́ми наказу́я нас не тужи́ти, ниже́ мно́го испы́товати да́ле уго́дных Ему́. Поне́же бо при́сно Петр в такова́я вопроше́ния тепл бе и предска́каше, отсеца́я его́ па́ки теплоту́ и наказу́я да́лейше ничто́же испы́товати, сие́ рече́.

«Изы́де у́бо сло́во в бра́тию, я́ко учени́к он не у́мрет. И не рече́ ему́ Иису́с, я́ко не у́мрет, но «а́ще хощу́ ему́ пребыва́ти доне́леже прииду́»». Да не вознепщу́еши бо Мне, рече́, еди́ным о́бразом я́же по вас устроя́ти. Сие́ же творя́ше, безвре́меннаго сострада́ния е́же к друг дру́гу отсеца́я, поне́же бо хотя́ху вселе́нныя строи́тельство прия́ти, и не подоба́ше соплета́тися про́чее друг с дру́гом: вои́стинну бо вели́ка сие́ вселе́нней тщета́ была́ бы. Те́мже ему́ рече́: де́лу вручи́лся еси, то смотри́ и соверша́й, стражди́ и подвиза́йся. Что бо, а́ще и хощу́ ему́ пребыва́ти зде? Ты своя́ смотри́ и пеки́йся.

Ты же ми и зде невелича́вое смотри́ евангели́ста. Рек бо, мнение ученико́в исправля́ет, сие́ я́ко не соузре́вшим им, е́же рече́. «Не глаго́ла бо рече́ Иису́с, я́ко не у́мрет, но «я́ко а́ще хощу ему́ пребыва́ти». Сей есть учени́к сведете́льствуяй о сих, и написа́ сия́. И вем, я́ко и́стинно есть сведе́тельство его́». Что у́бо, от ины́х ни еди́ному же сие́ творя́щу, се еди́н сие́ рече́ и второ́е сие́ твори́т сведе́тельствуя себе́ ви́дитбося слы́шателем? Что ли у́бо есть вино́вное? Глаго́лется после́дний ко е́же писа́ти приити́, Христу́ подви́гшу его́ на сие́ и воздви́гшу. Сего́ ра́ди показу́ет Его́ любо́вь, ча́сте гада́тельствуя вину́, от нея́же на е́же писа́ти устреми́ся. Сего́ ра́ди и ча́сте помина́ет , достове́рно творя́ отсю́ду сло́во и явля́я, яко подви́гнут быв отту́ду, приидет на сие. «И вем, рече́, я́ко и́стинная глаго́лет». А́ще же не ве́руют мно́зи, леть есть им от сего́ ве́ровати. От ко́его? По сих рече́ннаго.

«Суть бо рече́ и и́на я́же сотвори́л есть Иису́с, я́же а́ще по еди́ному пи́сана была́ бы́ша, ниже́ самому́ мню ми́ра вмести́ти, пи́шемии кни́ги». Отню́ду же я́вствено, я́ко не у́бо угожда́л бых. И́же бо толи́ким су́щым, ниже́ толи́ка рек ели́ка про́чии, но, сих убо мно́жайшая оста́вль, и наве́ты иуде́йския, разруше́ния, не́нависть, доса́ды, укори́зны на среду́ предложи́в и яв́ив, ка́ко бесну́ющася и лестьца́ нарица́ху, - благоявле́нно, я́ко не у́бо угожда́х. Угожа́ющему бо сопроти́вное подоба́ше твори́ти: поно́сная у́бо скрыва́ти, све́тлая же предлага́ти.

Поне́же у́бо от мно́гаго извеще́ния написа́ я́же написа́, не отрица́ется и своего́ сведе́тельства на среду́ приноси́ти, предвзыва́я по коему́ждо испыта́ти и истяза́ти бы́вшая. Обы́чай бо нам, егда́ зело́ и́стинствовати ве́руем, ниже́ их сведе́тельства отрица́тися. А́ще же мы сие́ твори́м, много паче он, Ду́хом пи́шай. Е́же у́бо и про́чии апо́столи пропове́дующе глаго́лаху: «Мы есмы́ сведе́тели» рече́, и́хже глаго́лем «и Дух, его́же даде́ повину́ющимся ему́». И все́мже близ бе: и ниже́ распина́ему оста́яше, и Ма́терь вручена́ бысть - я́же вся зна́мения су́щия к нему́ любви́ и е́же со опасе́нием ве́дети вся. А́ще же толи́ка рекл есть бы́ти зна́мения, да не чуди́шися, но помы́слив творя́щаго неизрече́нную си́лу, приими́ с ве́рою рече́нное. Я́коже бо нам удо́бно вещати, си́це О́ному, па́чеже мно́го удо́бнейше, твори́ти я́же хотя́ше. Довля́ше бо восхоте́ти то́кмо, и - вся после́доваху.

Нравоуче́ние о́смьдесять осмо́е: [О де́лании духо́внем и врачева́нии души́:]

Да внима́ем у́бо опа́сне рече́нным, и да не оскудева́ем, разгиба́юще себе́ и истязу́юще. От ча́стаго бо прочита́ния бу́дет не́что вя́щше вам: та́ко житие́ свое́ очи́стити возмо́жем, та́ко те́рния отсещи́. Тако́в грех и жите́йское попече́ние - безпло́дно и боле́знено. И я́коже ре́пий , отку́ду у́бо держи́тся бу́дет держа́щаго, та́ко и жите́йская, отню́дуже а́ще удержи́ши, опеча́ляет стягнувшаго сия́ и гре́ющаго. Но духо́вная не такова́: но би́серу не́коему уподо́бися, и отню́дуже а́ще обрати́ши, услажда́ет очеса́. Яково́ что глаго́лю: сотвори́л есть кто ми́лостыню? - Не то́кмо наде́ждею бу́дущаго пита́ется, но и зде́шними благи́ми наслажда́ется, дерза́я всю́ду и со мно́гим вся творя́ дерзнове́нием. Преодоле́ лука́ваго вожделе́ния? - И пре́жде Ца́рствия уже́ плод взят, похваля́емь, удивля́емь, пре́жде ины́х всех от своея́ со́вести. И ко́еждо же от благи́х дел таково́ есть, я́коже у́бо зла́я и пре́жде гее́нны зде му́чат со́весть. И а́ще бу́дущая помы́слиши согреша́я - пристра́шен и тре́петен, и ни еди́ному же му́чащу был еси́. И а́ще настоя́щая - мно́гих име́еши враго́в, и со зазре́нием живе́ши, и ниже́ сопроти́в возре́ти возмо́жеши оби́денным про́чее, па́чеже и не оби́денным. Не толи́ку бо на них объе́млем сла́дость, ели́ку печа́ль: со́вести вопию́щи, вне́шним человеком зазирающим, Бо́гу раздража́ему, гее́нне боле́знующей нас прия́ти, помысло́м [не] безмо́лвствующим .

Тя́жек бо, тя́жек и бре́менен грех, и свинца́ вся́каго люте́йше. Ощути́вый у́бо его́, ниже́ ма́ло возре́ти возмо́жет, а́ще и зело́ нечу́вствен бу́дет. Си́це у́бо и Аха́в, аще и зело́ нечести́в сый, егд́а у́бо сего́ ощути́, до́лу ни́ча хожда́ше, сокруше́н и зло остраствова́н. Сего́ ра́ди и вре́тищем обложи́ся, исто́чники испуща́ше слез. А́ще сие́ твори́м мы и пла́чем я́коже он, совлече́мся грехо́в, я́коже Закхе́й - и мы получи́м не́коего проще́ния. Я́коже бо телесе́х и сверилех , а́ще не пе́рвее уста́вит мокро́ту востека́ющую и я́звы сокруша́ющую, ели́ка а́ще наложи́т целе́ния, исто́чнику зла́го невосхлаще́нну, - ту́не и всу́е вся твори́т. Та́ко и мы, а́ще не ру́ку соста́вим от лихоима́ния и лука́вое сие́ востека́ние да спряту́ем, а́ще и ми́лостыню да́мы - ту́не вся твори́м. Уврачева́нное бо е́ю - наше́дше лихоима́ние, разреши́, и повреди́, и люте́йша соде́ла пре́жняго.

Да преста́нем у́бо похища́юще, и си́це да ми́луем. А́ще же по стремни́нам себе́ но́сим, ка́ко возмо́жем отдохну́ти? И́бо а́ще кто хотя́щаго пода́ти свы́ше привлече́т, [е́же есть ми́лостыня,] и́нже от до́лу принужда́ется - ничто́же бу́дет вя́щше от таковы́я ра́ти, ра́зве е́же расто́ргнутися челове́ку. Да́же у́бо не сие́ постра́ждем, ниже́ отягча́ющу лихоима́нию от до́лу, или́ ми́лостыня оста́вльши нас отъи́дет - да облегча́ем себе́ и да возлета́ем, да свобожде́нием злых и де́йством благи́х соверши́вшеся, получи́м ве́чных благи́х благода́тию и человеколю́бием Го́спода на́шего Иису́са Христа́, с Ни́мже Отцу́ со Святы́м и Поклоня́емым Его́ Ду́хом, сла́ва и держа́ва и честь, и вели́чие, и поклоне́ние, ны́не и при́сно и во ве́ки веко́в. Ами́нь.

Во дни о́ны, спасе́ни бы́вше и́же о Па́вле от корабля́, тогда́ разуме́ша я́ко о́стров Мелети́й нарица́ется. Ва́рвари же творя́ху нема́ло милосе́рдие нам: возгне́щше бо огнь прия́ша всех нас, за настоя́щий дождь и зи́му. Сграма́ждьшу же Па́влу ро́ждия мно́жество и возло́жьшу на огнь, ехи́дна от теплоты́ изше́дши, секну́ в ру́ку его́. Я́коже ви́деша ва́рвари ви́сящу змию́ от руки́ его́, глаго́лаху друг ко дру́гу: «Вся́ко уби́йца есть челове́к сей, его́же спасе́на от мо́ря, суд Бо́жий жи́ти не оста́ви». Той же у́бо отря́с змию́ во огнь, не постра́да ничто́же зла. Они́же ча́яху его́ хотя́ща возгоре́тися или́ па́сти внеза́пу ме́ртва: на мно́зе же того́ ча́ющим, и зря́щим ничто́же зла в нем бы́вша, претво́ршеся глаго́лаху бо́га того́ бы́ти. О́крест же ме́ста о́ного бя́ху села́ пе́рвому во о́строве и́менем Попли́я, и́же прии́м нас, три дни любе́зне и серде́чне учреди́. Бысть же отцу́ Попли́еву огне́м и водны́м трудо́м одержи́му лежа́ти: к нему́же Па́вел вшед и помоли́вся, и возло́жь ру́це свои́ нань, исцели́ его́. Сему́ же бы́вшу, и про́чии иму́ще неду́ги во о́строве прихожа́ху и исцелева́хуся: И́же и мно́гими честьми́ почто́ша нас. И отвозя́щимся нам дарова́ния мно́га возне́сше, полага́ху я́же на потре́бу.

По тре́хже ме́сяцех отвезо́хомся в корабли́ алекса́ндрьстем, подпи́саном Диоско́ры, презиме́вшим во о́строве. И доплы́вше в Сираку́сы, пребы́хом дни три. Отту́ду же отплы́вше, приидо́хом в Риги́ю: и по еди́ном дни возве́явшу ю́гу, во вторы́й день приидо́хом в Потио́лы: иде́же обре́тше бра́тию, умоле́ни бы́хом от них пребы́ти дний седмь. И та́ко в Рим приидо́хом, и ту бра́тия слы́шавше я́же о нас. Изыдо́ша во сре́тение на́ше да́же до А́пиева торга́ и трие́х корче́мниц. И́хже ви́дев Па́вел и благодари́в Бо́га, прия́т дерзнове́ние.

Толкова́ние Златоу́стаго: Па́вла ра́ди вся сия́ бы́ша, я́ко да у́зницы ве́руют пре́жде глаго́лемым Па́влом, и во́ини, и со́тник. Толи́ко бе простра́нно пропове́дание я́ко до Сике́лия, и да́же до Ри́ма прикосну́ся.

«В Потио́лех обрето́хом бра́тию» рече́. Та́же и друзи́и пред Ри́мом срето́ша. Зри у́бо Па́вла челове́ческо что пострада́вшаго, толи́ко зна́мение творя́щего: «и дерзнове́ние прия́т, ви́дев бра́тию» рече́.

Су́щее: Егда́ же приидо́хом в Рим, со́тник преда́ст у́зники воево́де: Па́влу же повеле́ пребыва́ти о себе́ , соблюда́ющим его́ во́ином.

Бысть же по днех трех, созва́ти Па́влу су́щая иуде́ом пе́рвыя: сше́дшемжеся им, глаго́лаше к ним: «Му́жие бра́тие, аз ничто́же сопроти́вно сотвори́х лю́дем или́ обы́чаем оте́ческим. У́зник от иеросали́млян, пре́дан бых в ру́це ри́мляном. И́же разсуди́вше я́же о мне, хотя́ху пусти́ти, зане́ ни еди́ней вине́ сме́ртней бы́ти во мне. Сопроти́в же глаго́лющем иуде́ом, ну́жда ми бысть нарица́ти ке́саря: не я́ко язы́к мой име́я что оклевета́ти. Сея́ ра́ди у́бо вины́ умоли́х вас ви́дети и бесе́довати: наде́жды же ра́ди Изра́илевы вери́гами си́ми обложе́н есмь».

Толкова́ние Златоу́стаго: «Оста́вивша его́, рече́, о себе́ пребыва́ти». Нема́ло и се зна́мением и чудесе́м его́: не со други́ми у́зники счета́ху и́: про́чее че́стен бе Па́вел, я́ко о себе́ пребыва́ти оста́виша.

«С во́ином стрегу́щим его́» рече́: не я́ко боя́щеся его́, но да не не́кое сопроти́вно постра́ждет - не подоба́ше про́чее в такове́м гра́де и царю́ су́щу бы́ти что неподо́бно.

«Ничто́же сопроти́вно сотвори́в, рече́: ни в зако́не, ниже́ во оте́ческих обы́чаех. Свя́зан, в ру́це ри́мляном пре́дан бысть». Ви́дев Па́вел, я́ко по непра́вде суди́м бысть от иуде́й, и па́че от суде́й неве́рных: о обои́х сих отве́тует, я́ко не беззако́нно что сотвори́х, ниже́ во́лею ке́саря нареко́х: но от них вина́ бысть, поне́же не ве́роваша мно́ю глаго́лемых.

«Аз рече́ упова́ния ра́ди Изра́илева вери́ги сия́ ношу́»: Упова́ние спасе́ния иуде́ом, пронарече́нное проро́ки - Христо́с бысть, Его́же аз пропове́даю, рече́, в сих у́зах есмь.

Су́щее: Они́же к нему́ ре́ша: «Мы ни писа́ния о тебе́ прия́хом от иуде́й, ни прише́д кто от бра́тии возвести́ или́ глаго́ла что о тебе́ зло. Мо́лим же ся от тебе́ слы́шати, я́же му́дрствуеши. О е́реси же сей ве́домо есть нам: я́ко всю́ду сопроти́в глаго́лема есть».

Толкова́ние Златоу́стаго:

Пре́жде не приити́ Па́влу в Рим, запове́дано бя́ше иуде́ом не прия́ти я́же о Христе́ пропове́дание: не ри́мляном то́кмо, но и су́щим по всей вселе́нней. И се в дре́вних списа́ниих обрето́хом, я́ко живу́щии в Иеросали́ме первосвяще́нницы и кни́жницы и старе́йшины иуде́йстии, посла́ния написа́ша су́щим иуде́ом по всех язы́цех посла́вше, оболга́юще я́же о Христе́ пропове́дание чу́ждее бы́ти от Бо́га, запове́дающе писа́ньми не приима́ти. Сего́ ра́ди и е́ресь нарица́ют иуде́и е́же к Христу́ ве́ру, я́ко повсю́ду сопроти́вится им.

Су́щее: Уста́вивше же ему́ день, приидо́ша к нему́ в странноприе́мницу мно́жайшии, и́мже сказа́ше свиде́тельствуя Ца́рствие Бо́жие и уверя́я их я́же о Иису́се, от зако́на Моисе́ова и проро́к, от у́тра да́же и до ве́чера. И о́ви у́бо ве́роваху глаго́лам, о́виже не ве́роваху. Несогла́сни же су́ще, друг ко дру́гу отхожа́ху, ре́кшу Па́влу глаго́л еди́н: «Я́ко до́бре Дух Святы́й глаго́ла Иса́ием проро́ком ко отце́м ва́шим, глаго́ля: Иди́ к лю́дем сим и рцы: Слу́хом услы́шите и не и́мате разуме́ти. И ви́дяще у́зрите, и не и́мате ви́дети. Одебеле́ бо се́рдце люде́й сих, и уши́ма тя́жко слы́шаша, и о́чи свои́ смежи́ша: да не ка́ко ви́дят очи́ма, и уши́ма услы́шат, и се́рдцем уразуме́ют, и обратя́тся, и исцелю́ их».

Толкова́ние Златоу́ста: Зри па́ки Па́вла: не от зна́мений, но от зако́на и проро́к взуща́я их, и повсю́ду та́ко им творя́ща. Те́мже к неве́рующим я́ко злонра́вны и сопроти́вны то са́мое проро́чество приво́дит, к ни́мже глаго́лет: «Уши́ма свои́ма тя́жко слы́шат, и о́чи свои́ смежи́ша», показу́я я́ко в виде́нии су́ще и́стинны не хотя́ху ве́ровати.

«И о́вы ве́роваху глаго́лемым, рече́, о́виже не ве́роваху, и несоглаша́ющеся, отхожда́ху». И досажда́ются от него́, и ничто́же сме́ют рещи́: не под о́бластию их про́чее бе. Егда́ же отхожда́ху проти́вящеся, тогда́ досажда́ет: не о́нех досади́ти хотя́, но ве́ровавшая утверди́ти. А е́же рече́ «до́бре Дух Святы́й глаго́ла», се явля́ет: я́ко не мне не ве́рует, но и́хже изнача́ла глаго́лемых Бо́гом. Ви́диши ли проро́ка, с коли́цем опасе́нием осужда́ет их? Не рече́ «ника́коже не ви́дите», но «я́ко ви́дите и не у́зрите». Ниже́ па́ки: «Ника́коже не слы́шите», но «слу́хом слы́шите, и не и́мате разуме́ти». Са́ми себе́ отъе́мляху, и у́ши свои́ затыка́ху, и о́чи смежи́вше, и се́рдце отягча́вше: не то́чию не слы́шавше, но и тя́жко слы́шаще сотвори́вша же се, рече́, егда́ ка́ко обратя́тся и исцелю́ их: продолже́ние лука́вства их показу́я.

Су́щее: «Ве́домо у́бо да бу́дет вам, я́ко язы́ком посла́ся спасе́ние Бо́жие, си́и и услы́шат ». И сия́ тому́ ре́кшу, отъидо́ша иуде́е, мно́гое иму́ще в себе́ взыска́ние .

Толкова́ние Златоу́ста: Ре́вность язы́ком, е́же к ве́ре показу́ет глаго́ля: я́ко язы́ком дано́ бысть разуме́ти та́йну сию́, ти́и, рече́, услы́шат. И я́коже пре́жде глаго́лаше: я́ко иуде́ом не прие́млющим сло́во, обраща́емся в язы́ки.

Су́щее: Пребы́сть же Па́вел две ле́те, испо́лнь свое́ю мздо́ю, и приима́ше вся приходя́щая к нему́, пропове́дуя Ца́рствие Бо́жие и уча́ я́же о Го́споде на́шем Иису́се Христе́, со вся́ким дерзнове́нием невозбра́нно.

Толкова́ние Златоу́ста: Показу́ет свобо́ду Па́влову, глаго́ля: про́чее невозбра́нно пропове́даше в Ри́ме, е́же в Иуде́и возбране́но бе: «и на две ле́те по́лно» рече́.

По двою́ же ле́ту, «в Испа́нию рече́ ити́ хощу́, и упова́ю мимои́дя ви́дети вас». Зри, ка́ко вся пропове́даша свята́я и боже́ственая глава́, высоча́йших всех небе́с, и́же душе́ю вся́ческая проити́ моги́й, и́же ве́дящим его́ и́менем то́чию довле́ет в подвиза́ние души́ и ко трезве́нию, е́же вся́ку ле́ность оттрясти́.

Прия́т его́ Рим свя́зана, от мо́ря восходя́ща, от потопле́ния спасе́на. И изба́вленна преле́стнаго потопле́ния, я́коже бо не́кий царь ра́товав и победи́в: си́це восхожда́ше к ца́рскому о́ному гра́ду. О сем в посла́нии глаго́лет: «Прииду́ и спочи́ю с ва́ми, во исполне́ние благовествова́нию Ева́нгелия».

Прия́т его́ свя́зана Рим и ви́де я́ко царя́ венча́на, и испо́лнися сло́во рече́нное им, е́же «спочи́ю с ва́ми». И мзду дая́ше до́му, иде́же за две ле́те пребы́сть, «свое́ю мздо́ю» рече́. И́же и́на трудне́йшая твори́ти можа́ше, множае па́че се . «Со дерзнове́нием рече́ и невозбра́нно»: есть у́бо со дерзнове́нием глаго́лати, но и возбра́нно.

Па́влово же дерзнове́ние никто́же мо́жет отсещи́. В посла́нии к Тимофе́ю глаго́лет: «В пе́рвый мой отве́т вси мя оста́виша». Кий пе́рвый отве́т? Отве́т глаго́лет, предста́ пе́рвее Неро́ну и избеже́. Второ́е же, егда́ его́ крести́, тогда́ Неро́н его́ посече́. Бя́ше же и Ариста́рх пре́жде с ним, его́же и сопле́нника в не́коем от посла́нии нари́чет, и Лука́ иде́же дея́ния святы́х апо́стол писа́нию преда́ст. И́же сия́ да́же до зде пи́шет, во вре́мя о́но написа́в кни́гу сию́, и вся я́же о Па́вле по́ ряду зна́я.

Муче́ние же его́ то́чию не прило́жь кни́зе сей: оста́вив же его́ в Ри́ме Лука́ и Ариста́рх, изыдо́ша. Евсе́вий же по не́ких ле́тех опа́сно испыта́в, написа́ нам во второ́й кни́зе церко́вных спи́сано муче́ние Па́влово, и глаго́лет его́ в Ри́ме свобо́дно пожи́вша и сло́во Бо́жие невозбра́нно пропове́дающа.

Тогда́ бо при Неро́не, отве́тующу Па́влу и попуще́нну бы́вшу, па́ки ко служе́нию пропове́дания в други́х десяти́х ле́тех Ду́хом Святы́м благовествова́ти посыла́ется.

Неро́ну же разъяри́вшуся, уби́ пре́жде Агри́ппу свою́ ма́терь и Окта́ию жену́ свою́, еще́ и сестру́ отца́ своего́, зане́же Па́влом науче́ни бы́вше, ко Христу́ ве́роваша: и ины́х безчи́сленных мно́жества. Пото́м же о́бще гоне́ние на христиа́ ны подви́гну, и та́ко на апо́стольская взя́тся заколе́ния.

Посла́в у́бо и приве́д Па́вла, суди́щу па́ки представля́ет. Прии́де же па́ки Лука́ к Па́влу, егда́ прилучи́ся муче́ние свое́ приня́ти. Посече́н же бысть Неро́ном Па́вел в тридеся́тое и шесто́е ле́то по вознесе́нии Христо́ве, Неро́ну же тринадеся́тое ле́то во вла́сти иму́щу.

Пи́шет бо апо́стол Па́вел к Тимофе́ю, о пе́рвом отве́те си́це глаго́ля: «В пе́рвом мое́м отве́те вси мя оста́виша, да не вмени́тся им. Госпо́дь же ми предста́, и си́лу ми дасть, да мно́ю пропове́дание извести́тся, и услы́шат вси язы́цы, и изба́влен бых от уст льво́вых». Сего́ Неро́на, льва нари́чет.

О второ́м же отве́те, в не́мже и коне́ц прие́млет глаго́лет: «Добро́ свое́ служе́ние испо́лни: аз бо у́же жру́ся, и вре́мя преставле́ния моего́ прибли́жися». И я́ко Лука́ бе с ним, к концу́ посла́ния глаго́лет: «Целу́ет тя Лука́, и́же со мно́ю».

Есть же вре́мя пропове́дания Па́влова, два́десять и еди́но ле́то и друга́я две ле́те, я́же сотвори́ в Кесари́йстей темни́цы. И па́ки посе́м в Ри́ме други́х две, и после́дняя ле́та, де́сять. Я́ко бы́ти всех лет от зва́ния его́, да́же до сме́рти, три́десять и пять.

Но да никто́же о сих мне поноша́ет, ка́ко по́ряду в Дея́ниих сия́ Лу́ка не глаго́лет, - а́ще во двои́х сих ле́тех то́чию е́же в Ри́ме Лука́ счета́в все житие́ Па́влово, - и муче́ние его́ нам [не] испове́да ни еди́нагоже какова́го. Подоба́ше нам ле́том испыта́ния : но поне́же муче́ние его́ нам сий не пи́шет, ве́руй про́чее Евсе́вию летопи́сцу, и списа́ния его я́ко любе́зный друг прие́мли благоразу́мно. Христо́вы бо ученицы́, ве́рны су́ще ве́рою, оте́ческая уче́ния и преда́ния прие́млюще, небе́снаго Ца́рствия насле́дницы быва́ют.

При Неро́не ке́сари ри́мстем, му́чен бысть апо́стол, мече́м в главу́ усече́н бысть в Ри́ме гра́де. В три́десять и шесто́е ле́то спасе́ныя стра́сти, [в] до́брый по́двиг подви́гсяу в два́десять и девя́тый день ию́ния ме́сяца. Есть же все время́ его́, от воплоще́ния Христо́ва, шестьдеся́ть и де́вять лет.

Коне́ц дея́ний святы́х апо́стол, и́хже списа́ Лука́ Евангели́ст, еди́н сый от седми́десяти.