Фомина неделя

О светоно́сней неде́ле, и честне́м и святе́м дни Воскресе́ния, и о спасе́нем побежде́нии Влады́ки на́шего торжествова́вше све́тло, и со гла́сом хвале́ния ра́достная поже́рше, и побе́дныя пе́сни воспе́вше, и всем везде́ вся прости́вше, и друг дру́га объима́вше и лобза́вше, и я́коже день еди́н, и пра́здник еди́н, неде́лю всю проводи́вше. Днесь па́ки са́мое то Воскресе́ние обновля́ем, но́вую неде́лю нарица́ему, пра́здника преложе́ние иму́ще. Но́вая же неде́ля нарица́ется, поне́же бо в све́тлую неде́лю и день Воскресе́ния, нача́ло прия́т е́же нарица́тися неде́ли. В сию́ же дне́шнюю неде́лю, нача́ло торжества́ прия́т. Я́коже пре́жде созида́ется це́рковь, пото́м же освяща́ется. Та́коже и Господоимени́тый день, пре́жде бысть я́коже есть, и пото́м обнови́ся. Глаго́лет же ся и па́ки и́нако но́вая неде́ля, поне́же бо в сию́ хо́щет обновля́тися уме́рших телесе́м. Есть бо осма́я ку́пно и пе́рвая: осма́я у́бо от пресла́внаго Воскресе́ния Христо́ва, пе́рвая же я́же по сей, о́браз су́щи е́же по седмочи́сленом сем ве́це, осмо́му же ку́пно и пе́рвому, и еди́ному и неразру́шному дню ве́ка бу́дущаго о́браз. В мимоше́дшую же неде́лю све́тлую, Христо́с от ме́ртвых воскре́се, нача́ток нетле́ния уме́ршим бысть. В сию́ у́бо но́вую неде́лю, вся́кого челове́ческаго созда́ния, хотя́щее бы́ти нетле́ние пра́зднуем. Она́ у́бо све́тлая неде́ля, пе́рвое прише́ствие Христо́во знамену́ет. Сия́ же но́вая неде́ля, второ́е Христо́во прише́ствие я́ве показу́ет. В пе́рвое же явле́ние Христо́во ко ученико́м, Фома́ нарица́емый близне́ц не быв та́мо неве́рова. Во второ́м же явле́нии и тому́ су́щу та́мо, и руку́ зна́мения ви́девшу, неве́рие на ве́ру преложи́.

Ева́нгелие: Су́щу ве́черу, глаго́лет богосло́в и евангели́ст Иоа́нн, в день он, во еди́ну от субо́т, и две́рем затворе́ном, иде́же бе́яху ученицы́ Его́ со́брани стра́ха ра́ди иуде́йска, прии́де Иису́с, и ста посреде́ их, и глаго́ла им, мир вам.

Толкова́ние: Поне́же бо Мари́я Магдалы́ни возвести́ ученико́м, я́ко воскре́се Госпо́дь, я́ве я́ко она́ пе́рвая ви́де Его́ воскре́сша, и виде́ние Его́ возвести́, и ра́достная глаго́лания извеща́я, дово́льна же бя́ше сия́ ученики́ уте́шити. Ну́жда же бя́ше и неве́ровати им я́ко жене́, или́ ве́ровавшим оскорби́тися я́ко несподо́бишася и ти́и виде́нию Христо́ву. Того́ ра́ди в той день, во́ньже яви́ся и глаго́ла с Мари́ею, в той день и тем святы́м апо́столом яви́ся Госпо́дь. Сей у́бо день еди́н от субо́т нарица́ет евангели́ст. Субо́ты бо те вся дне́вы неде́льския нарица́ют жи́дове. Еди́ну же от субо́т пе́рвый день, си́речь неде́лю нарица́ют субо́ту, яви́жеся ученико́м Христо́с, ве́черу су́щу, поне́же жда́ше всем собра́тися, поне́же разсе́яни бы́ша стра́ха ра́ди иуде́йскаго. Внеза́пу же и пресла́вно яви́ся, затворе́ным у́бо две́рем, без наде́яния посреди́ учени́к ста. Да́же пока́жет, я́ко Бог вся сотворя́ше вла́стию ели́ка хотя́ше. А е́же пресла́вным и напра́сным воше́ствием, затворе́ным су́щим две́рем, показа́ я́ко Бог сый естество́м и вся мо́жет ели́ка хо́щет. Обнаже́нием же ребра́ теле́снаго и зна́мения гвозди́нная показа́вшу, извеща́я всем, я́ко и́же на кресте́ пове́шену бы́вшу хра́му теле́сному, воздви́же Христо́с. Я́сноже и кро́тко явле́ние Свое́ показа́ ученико́м, и гла́сом Свои́м укроти́ сердца́ их, и смуще́ние ути́ши ре́кшу им: «Мир вам», си́речь, не смуща́йтеся, ниже́ бо́йтеся, о́ ученицы́, но дерза́йте, я́ко Аз победи́х ми́ра и миродержи́теля, поне́сшу ми грехи́ ми́ра, и смерть упраздни́вшу, и живота́ ве́чнаго пода́вшу вам. Сия́ у́бо и пре́же распя́тия глаго́лаше им: «Мир оставля́ю вам, и о мне мир име́йте». Не то́кмо бо глаго́лом ми́ра утоли́ Христо́с смуще́ние и страх, е́же име́яху апо́столи, но и показа́нием, е́же показа́ им кре́стная зна́мения и извеща́ им от ме́ртвых воскресе́ние. Я́коже бо воево́де возврати́вшуся от бра́ни и ра́нами побе́дными сия́ющу, не срамля́ется сих ра́ди, поне́же бо па́че венца́ суть красне́йша, та́ко бо и Спас ра́ны о о́бщем спасе́нии прие́м, не сокрыва́ет страда́ния, но открыва́ет, я́ко да пока́жет Cвою́ хра́брость и си́лу Госпо́дь и е́же нас ра́ди неизрече́нное Cвое́ схоже́ние и милосе́рдие. Посреди́ же стоя́щу, ви́димь есть все́ми ученики́ Христо́с, мир подая́ им, и безмо́лвие всеконе́чно, и безстра́стие.

Сего́ ра́ди а́ще и мы хо́щем бра́тие и к нам приити́ Го́споду, я́коже ко апо́столом и ученико́м, затворе́ным две́рем, потщи́мся затвори́ти две́ри, си́речь, вся чу́вствия на́ша: Уста́ у́бо кре́пким и до́брым молча́нием, поне́же бо всяк глаго́л тще́тен, его́же а́ще глаго́лют челове́цы, да́ти сло́во и́мут о нем в день Суда́. Очеса́ держа́ти, е́же непристра́стно и испы́тно зре́ти, но целому́дрено и благогове́йно - и́бо воззре́вый на жену́ я́ко вожделе́ти ю́, уже́ прелюбоде́йствова ея́ в се́рдцы свое́м. Слу́хи же возбраня́юще, глаго́лы тле́нныя и ме́рзкия послу́шати. И не оставля́ти на послуша́ние язы́ка оболга́ющаго и клевета́ющаго на бра́тию ‐ но запреща́ти им па́че, да́же сугу́бо с ни́ми не согреша́ем: себе́ у́бо злой стра́сти поуча́юще, оне́х же непра́вдующих не возбраня́юще, ничто́же бо мни́тся пред очи́ма оболга́ющих, и оклевета́ющих, и злу ра́дующихся уби́йство. Ру́ки же чи́сты и нескве́рны име́ти, и простира́ти к Бо́гу, и на де́ла пра́ведная и блага́я, а не похища́юще чужа́я, и мы́та прие́млюще, я́ко покрыва́ти пра́вды. Но́ги же направля́юще на путь ми́рен, и на соверше́ние боже́ственых за́поведей Христо́вых, а не де́рзи и ско́ры иму́ще их и теку́щих име́ти на проли́тие кро́ви. Обоня́ние же и осяза́ние отвраща́ти от плотски́х похоте́й и сласте́й.

Ева́нгелие: И се рек, показа́ им ру́це, и но́зе, и ре́бра Своя́. Возра́доваша же ся ученицы́, ви́девше Го́спода.

Толкова́ние: Показа́ Христо́с ученико́м ру́це и но́зе и ре́бра Своя́, уверя́я па́че и извеща́я осяза́нием, я́ко не мечта́ние не́кое су́щее, но вои́стину те́ло се́ су́щее ви́димое. И я́ко Той Сам есть вои́стину распе́ншийся и уме́рший, я́коже прорече́ и воскре́се. И е́же пре́жде распя́тия глаго́лаше, я́ко «Па́ки у́зрю вас и возра́дуется се́рдце ва́ше» - сие́ ны́не де́лом соверша́ет, ра́дость сотвори́ ученико́м и укрепи́в их на ве́ру изве́стну, поне́же бо брань име́яху неотло́жну к жидо́м ученицы́ и апо́столы Христо́вы.

Ева́нгелие: Па́ки глаго́ла им: «Мир вам».

Толкова́ние: Супроти́вно и ра́вно бра́ни подая́ им утеше́ние. Я́коже бо жена́м рече́ Госпо́дь: «Ра́дуйтеся», поне́же бо в ско́рби бя́ше род же́нский, прельще́ния ра́ди пра́бабняго, е́же в раи́ бысть иногда́ - и она́ па́ки пе́рвая прие́млет ра́дование от Христа́, да́же от пе́рвыя ско́рби о́ноя свободи́тся. Та́коже и ученико́м мир подае́т, бра́ни ра́ди е́же к себе́ име́яху и е́же хотя́ху пото́м име́ти вси пропове́дания ра́ди ‐ сугу́ба же благослове́ния подае́т Христо́с, хотя́ всади́ти и укрепи́ти да́ры благода́тныя, я́коже и на Авраа́ме бысть: «Благословя́ благословлю́ тя, и мно́же умно́жу тя». Лобыза́ет же па́ки обы́чным о нем сло́вом, глаго́ля: «Мир вам», я́коже не́кий зако́н полага́я ча́дом церко́вным, е́же бо мирова́ти нам друг со дру́гом и к Бо́гу, я́коже исто́чник есть не́кий и нача́ло вся́кому бла́гу. Несть бо и́но ничто́же па́че ми́ра и любве́ превы́ше и сладча́йше. Несть же и́но поле́знейше и красне́йше па́че совокупле́ния и соедине́ния. Любо́вь у́бо Сам Той Бог есть, и нарица́ется, и есть. И е́же о Бо́зе, и Бо́жий мир вся́ка ума́ преиме́яй, я́коже прия́хом. Утеша́я же ученики́ Госпо́дь и дерзнове́нных творя́ их, глаго́лет:

Ева́нгелие: Я́коже посла́ Мя Оте́ц, и Аз посыла́ю вас.

Толкова́ние: Се у́бо Мое́ де́ло восприе́млете вы, ученицы́. Те́мже дерза́йте, я́ко с ва́ми ку́пно бу́ду и нико́е же поврежде́ние име́ти хо́щете. Я́коже бо Аз соде́ях вся, ели́ко челове́ком на спасе́ние, напосле́док же и пострада́ти их ра́ди восхоте́х и сме́ртное томле́ние разруши́х. Та́ко и вам подоба́ет, на пропове́дание посыла́емым, со усе́рдием вселе́нную всю объити́ и всем челове́ком толи́ка и такова́я бла́га пропове́дати и благовести́ти и до сме́рти о сем потща́тися и подвиза́тися.

Ева́нгелие: И се рек ду́ну, и рече́ им: «Приими́те Дух Свят. И́мже оста́вите грехи́, оста́вятся им. И и́мже держите́, держа́тся».

Толкова́ние: Све́тлых соде́яв Госпо́дь учени́к Свои́х, вели́ким са́ном апо́стольским и боже́ственым устрое́нием и та́инством, и свяще́нники показа́в их, и пропове́дники. Освяща́ет их а́бие и дае́т им Дух Свят, явле́ным по дунове́нием, подо́бных сотворя́я их на прия́тие Ду́ха Свята́го. И власть подае́т им, не я́ко ме́ртвыя воскреша́ти, или́ и́на не́кая твори́ти, но грехи́ оставля́ти. По вознесе́нии же, и Той Сам Дух Святы́й соше́д, си́лы и де́йства вся́кая подаде́ им. Поду́ну же Христо́с, явля́я я́ко Той есть на́шего естества́ Соде́тель. Глаго́лет же Моисе́й: «И созда́ Бог челове́ка, персть взем от земля́, и вду́ну в лице́ его́ дыха́ние жи́зни». Поне́же бо преслуша́нием к сме́рти спаде́ Ада́м, и от дре́вняя че́сти о́ноя поползе́ся и паде́ - обнови́ его́ па́ки Христо́с, сме́ртию те́ла Своего́ упраздни́в смерть, и на пе́рвую честь о́ну возведе́ по дунове́нием.

Ева́нгелие: Фома́ же, еди́н от обою́ на́десяте, нарица́емый близне́ц, не бя́ше ту с ни́ми, егда́ прии́де Госпо́дь. Глаго́лаху же ему́ про́чии ученицы́: «Ви́дехом Го́спода». О́нже рече́ им: «А́ще не ви́жу на рука́х Его́ зна́мения гвозде́й, и вложу́ пе́рста моего́ в зна́мение гвозди́нное, и вложу́ ру́ку мою́ в ре́бра Его́ - не иму́ ве́ры».

Толкова́ние: Влады́ка Христо́с прии́де, раб же Фома́ не обре́теся. Мир ученико́м подава́шеся, и сей учени́к не бысть с ни́ми. Они́ у́бо малоду́шествие отложи́ша, Фома́ же па́че малоду́шествием содержи́м бя́ше. Всем со́браным, Фома́ еди́н оста́влен бя́ше. Отбежа́ния бо и разсе́яния, бы́вшаго тогда́ на апо́столех стра́ха ра́ди иуде́йскаго, не пости́гл бя́ше возврати́тися Фома́. Бе́ше же и се вои́стину боже́ственаго устрое́ния де́ло: не всу́е бо оста́влен бысть Фома́, но неве́рствия ра́ди его́ ве́рнейша и крепча́йша, я́же Госпо́дним Воскресе́нием, та́йна яви́тся. А́ще бо бы был та́мо с ни́ми, не бы сомне́лся, и не иска́л бы осяза́ти. А́щели же не бы осяза́л, не бы ве́ровал. А́щели же не бы ве́ровал, не бы научи́л ве́ровати. Сего́ бо ра́ди и неве́рствие Фомино́, на́шей ве́ре вина́ бысть.

Ева́нгелие: И по осми́х днех па́ки бя́ху внутрь ученицы́ Его́ и Фома́ с ни́ми. Прии́де Иису́с, две́рем затворе́ным, и ста посреди́ их, и рече́: «Мир вам». Та́же глаго́ла Фоме́: «Принеси́ перста́ своего́ зде и виждь ру́це Мои́, и принеси́ ру́ку свою́ и вложи́ в ре́бра Моя́, и не бу́ди неве́рен, но ве́рен».

Толкова́ние: Па́ки возсия́ ученико́м Свои́м пресла́вно Госпо́дь, и вхо́дит затворе́ным две́рем, и посреди́ стае́т, и мир дае́т им. Та́же всех про́чих учени́к презира́ет и, я́коже Оте́ц благ и чадолю́бец, на сомнева́ющагося Фому́ прихо́дит, извеща́ти ему́ хотя́ е́же из ме́ртвых Свое́ свято́е Воскресе́ние. Вои́стину ве́лие Влады́чнее человеколю́бие! Ка́ко ду́ши ра́ди еди́ны показа́ет Себе́ ра́ны иму́ща и прихо́дит спасти́ еди́ного ученика́ неве́рствующа. Показа́ти же хотя́, поне́же я́ко Бог веща́ше вся неве́рствия Фомина́, ели́ка изрече́ веща́ния ко ученико́м, я́ко Всеве́дец уве́де. Не жда того́ пре́жде слы́шати что от него́, но Сам предвари́в я́же иска́ше Фома́, а́бие веща́ет: «Принеси́ перста́ своего́ рече́ зде, и виждь ру́це Мои́, и принеси́ ру́ку свою́, и вложи́ в ре́бра Моя́». Поне́же у́бо не ве́руеши рече́, о́ Фомо́, и осяза́ти хо́щеши, и чу́вством то́кмо еди́ным извеща́тися на увере́ние хо́щеши. Сия́ глаго́лющу ти, несть Ми ся утаи́ло. Косни́ся руко́ю, и осяза́в, приими́ искуше́ние. И уве́ждь, и разуме́й, я́ко Сам есмь Аз Христо́с. И не бу́ди неве́рен, но ве́рен. Но оба́че рещи́ и́мать кто: Ка́ко в нетле́ннем телеси́ Христо́ве тле́нная зна́мения явля́хуся, си́речь я́звы? Глаго́лем же, я́ко те́ло Госпо́дне нетле́нно воскре́се вои́стину, я́коже и прорече́ им. И не тре́баше пи́щи или́ пи́ва. Но устрое́ния ра́ди неизрече́ннаго, я́ко уве́ритися Воскресе́нию, яде́, и пия́, и Фоме́ показа́шеся зна́мения гво́здная и ре́бреная.

Ева́нгелие: И отвеща́ Фома́, и рече́ Ему́: «Госпо́дь мой и Бог мой». Глаго́ла ему́ Иису́с: «Поне́же ви́дев Мя, ве́руеши. Блаже́ни неви́девше, и ве́ровавше».

Толкова́ние: Слы́шав же Фома́ Госпо́дни глаго́лы, и осяза́нием Ду́хом Святы́м ку́пно испо́лнься и ра́достию, неве́рствие преложи́ и сомне́ную мысль отри́ну. Уны́ние отложи́ и возопи́, глаго́ля: «Госпо́дь мой и Бог мой!» Е́же рещи́ Госпо́дь - челове́ческое естество́ показа́. А е́же рещи́ Бог мой - боже́ственое существо́ явля́ет. Еди́ного Того́ же бы́ти Го́спода и Бо́га испове́дает Фома́. Го́спода у́бо виде́нием, Бо́га же смышле́нием. Подоба́ет же Фоме́ и рече́нное Дави́дом: «Рука́ма мои́ма Бо́га взыска́х и не прельсти́хся». Блаже́ни неви́девшии и ве́ровавше: Показа́ нам Госпо́дь, я́ко се есть ве́рнейше, е́же неви́димая приима́ти ве́рою. Глаго́лет: Блаже́ни неви́девшии и ве́ровавше. Ве́ра у́бо есть наде́ющемуся о́браз и веще́м неви́димым обли́чник. Не то́кмо бо ученики́ зде блажи́т Христо́с, но и вся челове́ки хотя́щая ве́ровати пото́м. Поне́же бо пи́сано есть, я́ко блаже́на очеса́ ви́девшая Го́спода. Показу́ет Он, я́ко се есть па́че блаже́но, е́же не ви́дети и ве́ровати, и я́ко не худе́йше что име́ти хотя́т неви́девшии от ви́девших.

Ева́нгелие: Мно́га у́бо и и́на зна́мения сотвори́ Иису́с пред ученики́ Свои́ми, я́же не суть пи́сана в кни́зе сей. Сия́ же пи́сана бы́ша, да́же ве́ру и́мете, я́ко Иису́с Христо́с Сын Бо́жий и да ве́рующе, живота́ и́мате во и́мя Его́.

Толкова́ние: Поне́же бо богосло́вец сей и евангели́ст Иоа́нн мале́йша па́че други́х апо́стол рекл есть, сего́ ра́ди глаго́лет, я́ко ни про́чии апо́столи все изреко́ша, но ели́ка бя́ху дово́льна на увере́ние привлещи́ слы́шащых. Не ве́руяй же глаго́ланным, ни мно́жайшая прия́ти и́мать, ниже́ ве́ровати. Прие́мший же сия́, ничто́ же и́но на увере́ние тре́бовати восхо́щет. Явля́ет же ся, я́ко не глаго́лет евангели́ст о и́же пре́жде Креста́ бы́вших зна́мениих, но о бы́вших по Воскресе́нии - сего́ ра́ди рече́ пред ученики́ Свои́ми. Ели́ка же пре́жде распя́тия, не пред ученики́ Свои́ми то́чию сотвори́л есть Христо́с, но пред наро́ды все́ми. Еди́ным же то́кмо ученико́м, четы́редесятьми де́ньми явля́яся, зна́мения показа́ше. Единонаде́сятими же кра́ты я́ве показа́ся им. 1. Пре́жде бо яви́ся Мари́и на гро́бе, и про́чим жена́м. 2. Та́же яви́ся Петру́. 3. Пото́м же Клео́пе и Луце́ на пути́, гряду́щим во Еммау́с в раздробле́ние хле́ба. 4. Пото́м же единонадеся́тим, затворе́ным су́щим две́рем, не су́щу Фоме́. 5. Па́ки же сим единонадеся́тим и Фоме́ су́щу с ни́ми. 6. Та́же яви́ся бо́ле пятии́ сот бра́тиям еди́ною, я́коже зна́менает Па́вел. 7. К тому́ же яви́ся Ия́кову, и о сем Па́вел веща́ет. 8. Та́же седми́м на мо́ри Тивириа́дстем. 9. Пото́м же седмодеся́тим. 10. Та́же на горе́ Галиле́йстей, иде́же завеща́ им Иису́с. 11. И на горе́ Елео́ньстей, егда́ же и Вознесе́ние бысть.

Соликоству́ет же пра́зднику обновле́ния сего́ бра́тие и вре́мя се преле́тное. И явля́ются вся Воскресе́нием Христо́вым сра́доватися, я́коже бо не́кое умерщве́ние, зи́мное се́тование отло́жьши, тварь вся возботева́ет па́ки и оживля́ется: зрим зе́млю злак прозяба́ющу, сады́ олистня́юща, живо́тная игра́юща, мо́ре украша́емо, вся́ческая на добро́ту прелага́ема и обновля́ема. А́щели же безду́шная и безслове́сная та́ко свеселя́тся и просвеща́ются Воскресе́нием Христо́вым, ко́льже па́че мы до́лжни есмы́, и́же сло́вом Бо́жиим и о́бразом Его́ почте́ни, просвеща́ти себе́ и уясня́ти житие́м до́брым и благоуха́ти, и обновля́тися Ду́хом. Сего́ бо ра́ди и освяща́емся бра́тие, и в себе́ прихо́дим, и бу́дем но́ви вме́сто ве́тсех, поне́же Христо́с у́мре и воскре́се, да́же и мы грехо́м не у́мрем, но обновле́нием живота́ хо́дим, велича́юще и благодаря́ще Христа́ и́стиннаго Бо́га на́шего, вся на по́льзу устрая́ющаго, Ему́же подоба́ет сла́ва и держа́ва, со Безнача́лным Его́ Отце́м и со Пресвяты́м Ду́хом, ны́не и при́сно и во ве́ки веко́в. Ами́нь.

Го́спода Бо́га и Спа́са на́шего Иису́с Христа́ воскресе́ние сла́вное ра́достно уже́ пра́здновахом бра́тие и прича́стницы бы́хом пречи́стаго Те́ла и святы́я Его́ Кро́ве, е́юже омы́ челове́ческия грехи́ и сме́ртию Свое́ю живи́ от веќа уме́ршая. То́ю бо сни́де во ад и, разруши́в его́ смерть, глаго́ла: Мир вам бли́жним и мир да́льним. Бли́жняя же нарече́ пра́ведники, ре́кше пра́веднии отцы́, патриа́рхи, проро́ки, и́же в закон́е Его́ пожи́ша, но не бе им льзе от а́да разреши́тися, поне́же под кля́твою бе естество́ челове́че пе́рваго ра́ди преступле́ния Ада́мля. Да́льняя же нарече́ вся гре́шники, и́же от язы́к поработи́вшаяся диа́волу и тва́ри послужи́вша. Всего́ бо рече́ Ада́ма приидо́х изба́вити, всеро́дно па́дшаго зло́бою змии́ною. Да каковы́я ра́дости досто́ин бе таковы́й пра́здник!

Ны́нешний же подо́бен есть о́ному, и́мже преступле́нием уме́ршая воскреси́в, и живы́я я́ко Бог спасе́ ве́рующая Ему́. Тем воскре́с, яви́ся пе́рвее жена́м и посла́ их ко ученико́м, да ве́ру им́ут Ему́. Оба́че и се ве́дите, я́ко не довле́ет ве́ра еди́на на спасе́ние то́кмо, а́ще до́брых де́телей не буд́ет. Ка́я бо по́льза, а́ще кто ча́сто слы́шит и ничто́же не твори́т я́же слы́шит? То па́че бо́льшее осужде́ние прии́мет.

Но да ся наслади́м Его́ ева́нгельских слове́с:

Ева́нгелие: Су́щу по́зде, в день той, во еди́ну от субо́т, и про́чее, прии́де Иису́с и ста посреди́ их и рече: «Мир вам».

Толкова́ние: Прии́де Госпо́дь ве́чер, ожида́ше бо всем собра́тися затворе́ным две́рем, да позна́ют я́коже И́ воскре́се, ка́мени с печа́тьми лежа́щу на гро́бе. И глаго́ла: «Мир вам».

Ева́нгелие: Возра́доваша же ся ученицы́, ви́девше Го́спода.

Толкова́ние: Пре́жде бо распя́тия рекл бе им, яко «Узрю́ вы и возра́дуется се́рдце ва́ше».

Ева́нгелие: И па́ки рече́: «Я́коже посла́ Мя Оте́ц, и Аз посыла́ю вы».

Толкова́ние: Виждь, не рече́: «Умолю́ Отца́ да по́слет вы», но и ду́нув дасть им Дух Святы́й. Не соверше́н дар, но е́же отпуща́ти грехи́ челове́ком. О сем помы́сли иере́йский дар, и́же отпуща́ют грехи́.

Ева́нгелие: Фома́ же еди́н не бе ту с ни́ми.

Толкова́ние: И слы́шав от дружи́ны ви́девших Его́, не я́ко лжу мня не ве́роваше, но горя́ душе́ю и сам хотя́ ви́дец Ему́ бы́ти.

Ева́нгелие: Во осмы́й же день па́ки прии́де Иису́с, и став посреди́ их, глаго́ла Фоме́: «Принеси́ перст твой» и про́чая.

Толкова́ние: Фома́ же осяза́в, богосло́вяше Его́. Не лиша́я бо Фомы́ блаже́нства, рече́ Госпо́дь: «Блаже́ни неви́девше и ве́ровавше», но утеша́я неви́девшая, да ве́рующе Вонь спасу́тся. Виждь же ка́ко, не ве́де ли Бог Фомина́ жела́ния о виде́нии, но и ре́бра Своя́ осяза́ти ему́ пове́ле, да спасе́т не того́ ду́шу неве́рующу, но и от мно́гих соблажне́ныя отсече́т по́мыслы. Да не реку́т привиде́нием по воскресе́нии яви́ся, а по и́стинне пло́тию. Те́мже и ял есть по воскресе́нии, не по ну́жди телеси́, но на уве́дение воскресе́ния.

Ева́нгелие: Мно́га же и и́на зна́мения сотвори́ Иису́с пред ученики́ Своими по воскресе́нии.

Толкова́ние: Я́коже бо пре́жде распя́тися творя́ше чудеса́, показа́ше Себе́ Сы́на Бо́жия, а по воскресе́нии творя́ше, явля́я Себе́ плоть нося́ща, да и вы ве́ру и́мете. Глаго́лет бо евангели́ст: «Да ве́рующе живо́т и́мате во и́мя Его́», ве́рующе я́ко воскре́се и Жив есть.

Поуче́ние: Са́ми себе́ в животе́ снабди́м, я́ко не довле́ет ве́ра еди́на ко спасе́нию. Послу́шайте, что рече́ Госпо́дь: «Не всяк глаго́ляй Ми: Го́споди, Го́споди, - вни́дет в Ца́рство небе́сное, но творя́й во́лю Отца́ Моего́». Во́ля же Бо́жия се есть, е́же храни́ти за́поведи Его́: не лени́тися к це́ркви, ни лга́ти, ни кра́сти, ни клевета́ти, ни гне́ватися, не помина́ти зла, не зави́дети, не упива́тися, не велича́тися, но на всяк день Бо́га сла́вити, воскре́сшаго из ме́ртвых Христа́ Бо́га на́шего, нас ра́ди и за на́ша грехи́ пострада́вшаго, Ему́же сла́ва во ве́ки веко́в. Ами́нь.

Се бо приспе́х вам долг пове́дати, долг от мене́ подава́юща, е́же быва́ет на по́льзу и вас обогатева́юща. Прихо́дит бо па́ки показа́тися Фоме́, и́же пре́жде вма́ле не ве́ровавшу Госпо́дню Воскресе́нию. По́слежде, по виде́нию лица́ Его́ и ручна́го осяза́ния, и Христу́ ве́ровавша, и Го́спода и Бо́га Того́ нарица́юща.

Простри́те слу́хи ва́ша приле́жно ны́не, молю́ся вам, и с ти́хостию вонми́те мои́х гру́бых слове́с, я́ко да не́кая ма́лая от них поле́зная плод восприи́мете, ка́ко Спас а́бие вско́ре растерза́ утро́бу всея́дца а́да, и быв Пе́рвенец из ме́ртвых, и ка́ко вни́де две́рем затворе́ным. Фома́ же, глаго́лемый Близне́ц, не бе с ни́ми. Прии́де жела́емый рачи́тель, а возлю́бленный не обре́теся ту. Предста́ до́брый Па́стырь па́стве, а овца́ из огра́ды заблу́ждьши, не бе ту. Царь прии́де, а во́ин от боже́ственнаго во́инства дале́че пребыва́ше.

Оба́че мнит ми ся, я́ко сие́ бысть боже́ственное смотре́ния та́инство, е́же не прилуча́тися ученику́. Я́ко а́ще бы прише́л, не бы ся покуси́л испытова́ти рука́ма. А́ще бы ся не покуси́л рука́ма, не бы осяза́л. А́ще не бы осяза́л, не бы си́це ве́ровал, ни бы та́ко научи́л нас ве́ровати.

Оба́че и неве́рствие Фомино́ на́шему ве́рованию ма́ти быва́ет. Сего́ ра́ди мы, и́же не ви́дим Христа́, покланя́емся Ему́. И сего́ ра́ди [и́же] не осяза́ем Неосяжи́маго, восхваля́ем Его́ и воспева́ем, поне́же той подержа́ Влады́ку свои́ма рука́ма и восхвали́ Его́.

Глаго́лаху тогда́ коне́чно ученицы́, прише́дшу Фоме́: «Обрето́хом ре́кшаго: По трех днех воста́ти и́мам». И и́стину о ве́щи обрето́хом, глаго́ланная: «Аз есмь Воскресе́ние и Живо́т», и и́стину от Жизнода́вца прия́хом. Обрето́хом реќшаго: «Власть и́мам положи́ти ду́шу свою́, и власть и́мам па́ки прия́ти ю́», и Его́ву власть о ве́щи восприя́хом. Предста́ бо Спас безмо́лвно в хра́ме, и две́ри не отве́рз. Мы же к стра́нному предста́нию Его́ву, я́ко ви́дехом, удивле́ни бы́хом. Возчуди́хомся сицева́го вхо́да новотво́рнаго. Ви́дехом ру́це Его́, е́же те́ми сокруши́ смерть, и прия́т гво́здныя ра́ны, и́же и челове́ком отсече́ грехи́. Ви́дехом Его́ свята́я ре́бра, и́же я́зву прие́мшая нас ра́ди, источи́вшая кровь и во́ду два исто́чника, е́же есть к на́шему спасе́нию.

И Фома́ к ним рече́: «Вы же ви́десте Го́спода, аз еди́н не бых досто́ин Его́ва виде́ния. Ве́сте до́бре, я́коже зва́ни бы́сте вы, и аз зван бых. И я́коже бы́сте почте́ни от Него́, и аз почте́н бых. И я́коже ви́десте вы на Кресте́ распина́ема, и аз ви́дех Его́. Оба́че я́коже ви́дех с ва́ми приско́рбная, хощу́ ви́дети с ва́ми и све́тлая. А́ще не ви́жу рука́м Его́вем о́бразы гвозди́нныя, и вложу́ пе́рсты моя́ в я́зву гвозди́нную, и вложу́ ру́ку мою́ в ре́бра Его́, не иму́ ве́ры».

Пожди́, о́ Фомо́, и еще́ до́брому неве́рствию. Пожди́, до́ндеже подержи́ши и́же ве́ре наде́жду. Пожди́ сицево́му и еще́ жела́нию, до́ндеже ви́диши возлю́бленнаго, Его́же лю́биши. Целу́ем твоего́ двообра́знаго по́мысла, и́же вся́ка разделе́ния посека́юща. Похваля́ем любопре́ннаго твоего́ и христолюби́ваго нра́ва, и́же вся́ка любопре́ния утоли́вша. Не ве́руй, не ве́руй и еще́ па́че, я́ко да изве́стно ве́рую аз. Взыщи́ Го́спода и призови́ Неотсту́пнаго, я́ко тебе́ и́щуща и призыва́ющаго и аз [обыму́] моего́ Изба́вителя. [Пожди́ и еще́ Тому́, И́же рече́: «Ищи́те и обря́щете». Пожди́ иска́нию, до́ндеже обря́щеши Сокро́вище е́же и́щеши. Пожди́ сту́ку двери́ противоглаго́льнаго зна́ния, до́ндеже ти отвори́т И́же рече́: «Толцы́те, и отве́рзется вам». Любо́вию слу́шаю сугу́бство твои́х глаго́л: «А́ще не ви́жу в руце́ мое́й о́бразы гвозди́нныя, не иму́ ве́ры». Неве́рие твое́ учи́т мя, да ве́рю аз: я́коже язы́ку твоему́ подо́бно ора́лу ора́ти поле боже́ственнаго Те́ла и мне без труда́ пожина́ти и освоя́ти сей плод. А́ще свои́ма очи́ма не ви́жу бразд я́же ископа́ху нечести́вцы на святы́х рука́х Его́, не иму́ ве́ры ника́коже. А́ще перста́ си не вложу́ в я́звы гвозди́нныя, не прииму́ ва́шего благове́стия. А́ще мое́ю руко́ю си не косну́ся ребр Его́, нело́жнаго Свиде́теля Воскресе́ния, ва́ше свиде́тельство ника́коже мене́ поколе́блет.

Свои́ма очи́ма разсмотрю́, е́же вы пропове́даете, – достове́рно бо есть и изве́стно свои́ма очи́ма ви́дети, - и тогда́ прииму́ слов ва́ших свиде́телей: вся́ко бо свиде́тельство ве́рно и достове́рное есть а́ще дела́ми потверди́тся, слова́ бо легки́ суть и возду́х пу́сто стряса́ют. И́мам пропове́дати лю́дям о чудесе́х Учи́теля: ка́ко же и́мам сказа́ти о е́же не есмь ви́дел очи́ма? Ка́ко же неве́рныя уве́рю во е́же сам не есмь изпыта́л? Ка́ко же скажу́ иуде́ом и язы́ком ви́дети ми Влады́ку распя́таго и не ви́дети воскре́сшаго, толи́ко слы́шати? Кто ли не осмее́т таковы́х глаго́л? Кто не пре́зрит такову́ про́поведь? Ино́е есть е́же слы́шати, и ино́е есть е́же ви́дети. Ино́е есть е́же писа́ти словесы́, и ино́е есть е́же испы́товати и узре́ти.]

Сицева́я истяза́ния к свои́м равноапо́столом глаго́лаше Фома́, и вни́де к ним Иису́с, две́рем затворе́ным. Вни́де Дверь живота́, затворе́ным две́рем. Вни́де, я́ко Еди́н весть Сам. Я́коже бо роди́ся, и две́ри де́вственныя нерастли́ - си́це внутрь хра́ма обре́теся и затво́ры не отве́рз. Я́коже изы́де вон из гро́ба затворе́ному гро́бу, си́це вни́де с пло́тию, иде́же пребыва́ше Божество́м, и врата́ не отвори́. Восхоте́ бо, и ничто́же возбрани́ся. Восхоте́, и вся потща́хуся. Восхоте́, и вся тварь послужи́. И Его́во рожде́ние, вся́ка словеса́ побежда́ет. И вон исхожде́ние из гро́ба прехо́дит вся́ку мысль, и ко ученико́м восхо́д Его́ недоуме́нен есть и неизрече́нен. И е́же вход Его ко ученико́м уве́дехом, а е́же ка́ко вни́де, ктому́ не ве́дех. И е́же не прия́х, ни глаго́лати сме́ю. Воспева́ю Вше́дшаго, не истяза́ю многоиспы́тно вше́ствия о́бразы. Пропове́даю та́инство, а не сказа́ю недове́домаго. Дивлю́ся быва́емому зна́мению, ка́ко же бысть, не ищу́. Ве́рую пи́санным и спаса́юся. Послушли́в бо есмь Влады́чним чудесе́м, а не испытли́в боже́ственных дел.

А́ще не́кто жидови́н рече́т ти: Невозмо́жна и стра́нна пропове́дуеши. Ка́ко бо можа́ше затворе́ным две́рем плоть вни́ти? Рече́м ему́: ка́ко возмо́же а́нгел свести́ Авваку́ма в ров львом к Дании́лу, и па́ки возведе́н вон, и лежа́ща печа́ти це́лы и утвержены́ оста́ви? Раб е́же восхоте́ приобре́те, а Влады́ка не можа́ше ли сотвори́ти, е́же хо́щет? Я́коже о́но бысть боже́ственным хоте́нием, та́ко и сие́ соде́лася вочелове́чившагося Бо́га Сло́ва.

Вни́де тогда́ к Свои́м ученико́м, я́коже [благоволи́] Спас, и ста посреде́ их, я́ко да яви́тся всем едина́ко. И рече́ им: «Мир вам». И па́ки: «Мир вам». И мир, е́же вам да́рую, е́же и́мам, сие́ даю́ вам. И сий мир, е́же есть по всей Вселе́нней, пове́да. Ве́сели же бе́ша ученицы́, па́ки насы́тишася Влады́чни красоты́ и Его́ва гла́са. И свои́ми лакотьми́ потыка́ху Фому́, и очи́ма помава́юще ему́. И не то́чию еди́неми то́кмо ве́ждами, но и глаго́лаху к нему́: Не реко́хом ли тебе́ пре́жде, я́ко обрето́хом Го́спода? И не ве́рова на́шему гла́су. Се бо предстои́т Возлю́бленный, и насы́тися ели́ко хо́щеши. Наслади́ся, ели́ко жела́еши. И прии́де, е́же твоего́ ра́ди спасе́ния прише́дша к нам. И начни́ испыта́ние твоему́ отреше́нию.

И то́йжде Фома́ стоя́ше, взира́я свои́ма очи́ма по вся у́ды Спа́совы, и смотря́ше испы́тно всяк уд, бу́дет ли И́стина пострада́вый и воскре́с, прише́дшый к нам. Что́же к нему́ рече́ Еди́н Человеколю́бивый Бог, «И́же хо́щет всех челове́к спасти́ и в ра́зум и́стинный привести́»? - «И принеси́ свой перст се́мо, и виждь ру́це Мои́». Сего́ ра́ди приидо́х к тебе́, и тебе́ ра́ди предста́х па́ки, его́же не отступа́ю николи́же Божество́м. Тебе́ ра́ди поста́вих сих Мои́х рук на гво́зди, я́ко да исхода́таю тебе́ без беды́ спасе́ние. Прибли́жися ко Мне теле́сно, и духо́вно, и с ве́рою, и уве́ждь изве́стно, я́коже жела́еши уве́дети. Я́коже хо́щеши, испыта́й. Я́коже хо́щеши, сматря́й. И прочита́й в Мои́х рук напи́санная во́льных мои́х стра́стий писмена́. Предлага́ю тебе́ вся у́ды Моя́ ко испыта́нию. Не срамля́юся те́ла Моего́ я́звами, ни гнуша́юся пло́ти Моея́ ран, е́же прия́х ва́ших ра́ди ран. Не скрыва́ю сла́вы Моея́ и побе́ды попра́ние, но па́че представля́ю я́вственно всей тва́ри. Ви́де сих со́лнце, и того́ ра́ди за́йде, и нощь во дни сотвори́. Ви́де сих земля́, и та у́бо ра́ди взыска́ ме́сто бежа́ти. Ви́деша сих ка́мение, и того́ бо ра́ди распадо́шася, и воспла́каша Моея́ стра́сти. Ви́деша сих ме́ртвии, и́бо сего́ ра́ди вон из гроб изыдо́ша. Ви́де сих и церко́вная запо́на, и́бо того́ ра́ди надво́е раздра́ся и воззре́ пре́жде на жидо́вския поги́бели.

Ви́дел еси́ Мои́х рук, я́коже восхоте́л еси́. Вшел еси́ пе́рстом твои́м в незаходи́мыя Моя́ я́звы. Хо́щеши ли па́ки Мое́ ребро́ испыта́ти? Сего́ ра́ди открыва́ю ти и се́. Принеси́ руку́ свою́ многоиспы́тную, и вложи́ в ребро́ Мое́. Прикосни́ся те́лу Моему́, сочета́вшуся без се́мене челове́ческаго. Прикосни́ся те́лу Моему́, Е́же уме́ршее вас ра́ди, поне́же не пострада́ от тли сме́ртныя. Прикосни́ся те́лу Моему́, Е́же есть стра́шно херуви́му, и ди́вно серафи́му, и пресла́вно безпло́тным си́лам. Разуме́й и научи́ся от иску́са сих, что есть осяза́ние Мое́, и что есть неосяжи́мо. Что есть пострада́ние Мое́, и что есть безсме́ртие Мое́. Что есть ме́ртвость тебе́ ра́ди, и что пребы́сть нетле́нно. Что есть прикоснове́ние твои́м пе́рстом, и что есть неосяжи́мо твое́й десни́цы. И не бу́ди неве́рен, но па́че бу́ди ве́рен. И и́щеши ви́дети, и ви́дети и́маши. Сего́ бо ра́ди сие́ Мое́ ребро́ си́це оста́вих, я́ко да и́щеши ты и обря́щеши, и ося́жеши, и ве́руеши, и спасе́н бу́деши. Я́ко егда́ прииду́ Судия́ живы́м и ме́ртвым, покажу́ враго́м я́зву, и осужу́ богора́тнаго со́нмища. И да ви́дят жи́дове, Кого́ прободо́ша.

Отвеща́в Фома́ и рече́: «Госпо́дь мой, и Бог мой». Ве́рую Твоему́ Воскресе́нию Влады́ко. Ве́рую Твое́й побе́де Царю́. Ве́рую, и не ктому́ ищу́, Его́же обрето́х. Ве́рую Го́споди, и нектому́ Тебе́ мно́го испыту́ю моего́ Влады́ку. Ве́рую, и не ктому́ стяза́юся сло́вом, е́же о Ца́рствии Твое́м. Ви́дех что держа́х, и не сомню́ся. Ви́дех, Кого́ сподо́бихся осяза́ти. Ви́дех иску́сно, Его́же не возмо́же ни та са́мая смерть искуси́ти на мно́го. Ви́дех в Кого́ подоба́ет ми ве́ровати. Но про́чее глаго́лю: Мой Госпо́дь, и мой Бог. Ты Бой мой и Госпо́дь, Преве́чный вку́пе и Новоявле́н. Ты еси́ Небе́сный и Земны́й. Ты еси́ Ви́димый и Неви́димый. Ты еси́ без о́браза пло́тьска, и во о́бразе пло́ти сея́. Ты еси́ Бог и́стинный, и Челове́к нело́жен, Ты еси́ на небеси́, ты еси́ на Кресте́. Ты еси́ на ца́рском Престо́ле, Ты еси́ на Кресте́ и на гвозде́х. Ты еси́ безстра́стен по ду́ху, Ты еси́ пострада́вый по пло́ти. Ты еси́ безсме́ртен, я́ко соприсносу́щен Отцу́. Ты еси́ в сме́рти, ты еси́ в животе́. Ты еси́ в ме́ртвости, Ты еси́ превы́ше ме́ртвости. Ты мертв тридне́вен. Ты присносу́щный Роди́телю Своему́. Ты воскре́се си́лою Свое́ю. Ты еси́ с на́ми с пло́тию, и весь по всей Вселе́нней. Ты вся исполня́еши. Ты еси́ поде́ржан от мене́. Тебе́ ви́жу теле́сныма очи́ма, Тебе́ же сразумева́ю ве́рныма очи́ма. Оба́че разумева́ю в Тебе́, е́же во мне. Разумева́ю в Тебе́, е́же от Отца́ Твоего́ Божества́. Еди́ного тя Го́спода и Бо́га пове́даю. И́нако же Тя Ино́го Еди́ного Тебе́ уве́дех, а не ино́го или́ друга́го свем. Не разде́ляю Тя Неразде́льнаго, не разсека́ю Тя Неразсеко́маго. И е́же ви́жу, и е́же держу́, и е́же разумева́ю, еди́нем гла́сом испове́дую: Госпо́дь еси́ мой, и Бог мой Ты. И Твоего́ ра́ди соше́ствия, мою́ ду́шу изведе́ от глубины́ неве́жествия. Ты челове́ки, плене́ны быва́ющя, свободи́л еси́. Ты дия́вола попра́л еси́, ели́ко же восхоте́. Ты грех пло́ти осуди́л еси́. Ты же смерть в те́ле осуди́л еси́. Ты нетле́ния ра́ди тлю отгна́л еси́. Ты же, и Твоего́ ра́ди Воскресе́ния, нам воскресе́ние обнови́л еси́. Ты же тридне́внаго Твоего́ гро́ба оста́вил еси́ на земли́ пору́чника, е́же бы́ти ме́ртвым воскресе́ние. Ты челове́ки небе́сны показа́л еси́. Ты зе́млю светле́йшу па́че небе́с сотвори́л еси́. Ты же всяк изря́дным и бо́льшым преста́вил еси́. Ты еси́ Су́щий Бог, и Челове́к быв, я́ко да челове́ка сотвори́ши бо́га. Госпо́дь еси́ мой, и Бог мой.

Глаго́ла ему́ Иису́с: «Я́ко ви́дел Мя еси́, и ве́ровал еси́». Зри же па́ки, возше́дшу Ми с пло́тию, и да не восприи́меши ты словеса́ неве́рствия, и рече́ши: А́ще не ви́жу в ру́це мои́ о́браз гвозди́нных, и не иму́ ве́ры. Еди́ною возлюби́л еси́, еди́ною не ве́ровал еси́. Еди́ною изневе́рился еси́, еди́ною осяза́л еси́. Еди́ною ве́ровал, про́чее пропове́дай, я́же разуме́л еси́. «Блаже́ни, и́же не ви́девше Мя и ве́рующе». И блаже́нство же сие́ в нас пребыва́ет. И́же мы не ви́дехом Его́, и ве́рующе в Него́. Блаже́ни бо есмы́ мы, и́же с ве́рою ве́дяще Неви́димаго. Блаже́ни мы, и́же по всегда́ торжество́ твори́м. Взира́юще Того́ свои́ма очи́ма, приноша́юще, и свои́ми усты́ целу́юще, и зубми́ снеда́юще.

О́ле стра́шному Та́инству! Оба́че и стра́нному, я́ко Седя́й одесну́ю Отца́, в десны́х обрета́ется ве́рных. И́же от а́нгел Воспева́емый, от скве́рных рук держи́тся и пренаша́ет, пренося́ от недосто́йных, е́же носи́ти Его́. И не бе́гает, е́же от гре́шныя дла́ни на́шея. Не сокруша́ет гли́нных Творе́ц, но па́че Той предповелева́я и глаго́ля: «Приими́те, яди́те». «Приими́те, пи́йте». Принеси́те ру́ки ва́ша, и вложи́те в ре́бра Моя́, и уд Мои́х наслади́теся в сы́тость. Е́же бо восприе́мля тех уд, та́мо есмь весь.

Прии́дем ны́не вси чи́сти к Чи́стому, да восприи́мем Го́спода на́шего. Егда́ же восприи́мем Его́, да не а́бие вознеради́м, е́же приходи́ти к Нему́, но па́че да не устрани́мся наеди́не. И еди́ни Еди́ному воздава́ти моли́твы своя́ Изба́вителю на́шему Го́споду, глаго́люще: «Недово́льни есмы́, да вни́деши под кров душа́ на́ша. Но, поне́же во́лею Своею́ Сам держи́шися в нас, поне́же Ты я́ко Человеколю́бец, соверше́нно пребыва́ти в нас благоизво́лил еси́, к Тебе́ дерзнове́ние иму́ще прихо́дим. Повелева́еши Влады́ко усто́м отверза́ти две́ри, я́коже сам Еди́н соде́лал еси́. Вхо́диши и с человеколю́бием, я́коже Сам ве́си. Вхо́диши и отреша́еши грехо́вныя у́зы. Ве́руем, я́ко сие́ твори́ши. И́бо и блудни́цу, со слеза́ми прибе́гшую к Тебе́, не отри́нул еси́. Ниже́ мытаря́ отврати́лся еси́ ка́ющася. Ниже́ разбо́йника оста́вил еси́ бы́ти, е́же пре́жде быв. Ниже́ гони́теля, разуме́вша Твое́ Ца́рство, отгна́л еси́. Но па́че сих всех, покая́ния ра́ди прия́л еси́, и в лик Свои́х люби́мых поста́вил еси́».

С си́ми ны́не моли́твами душа́м небе́сное Та́инство да прии́мем, и житие́м целому́дренным себе́ огради́м, и да не исхо́дит из уст на́ших сло́во скве́рно, отню́ду же исхо́дит Христо́с. Такова́я жития́ восприими́те, о́ но́во, свяще́нницы, наслади́теся неболе́зненныя купе́льныя боле́зни, и сея́ не отмета́йтеся боже́ственнаго рожде́ния. Да не рече́т и к нам Купе́ль: «Cы́ны роди́х и возвы́сих, ти́и же Мене́ вознебрего́ша». В небе́сных на́ша имена́ суть напи́сана. Да не па́ки в ти́ны сла́стныя погружа́ем себе́ и бра́чны ри́зы бе́лыя совлече́мся. Ни па́ки совлеце́те убеле́ния душ ва́ших, [да не по апо́столу Па́влу услы́шим: «Теча́сте до́бре: кто вам возбрани́ не покаря́тися и́стине?»]. Сию́ оде́жду, а́ще ю́ са́ми вы не отве́ржете, никто́же ин вас мо́жет совлещи́. Те́мже пребыва́йте всегда́ но́вы, о́ свяще́нницы, я́ко сподо́битися о́наго блаже́ннаго гла́са: «Прииди́те благослове́ннии Отца́ Моего́, восприими́те угото́ванное вам Ца́рство от сложе́ния ми́ру», Ему́же сподо́битися всем нам мо́лимся о Христе́ Иису́се Го́споде на́шем, Ему́же сла́ва и держа́ва, вку́пе со Отце́м и со святы́м Ду́хом, ны́не и при́сно и во ве́ки веко́в. Ами́нь.

Обновле́нием чти́тися ве́тхий зако́н и до́бре име́ющь, па́чеже но́вым чти́тися обновле́нии - и сие́ не еди́нощи, но и мно́гащи, коему́ждо ле́та ораще́нию той день приводя́щу, да не исчезнове́на вре́менем бу́дут до́брая, ниже́ претеку́т забве́ния глубина́ми омрача́ема. Обновля́ются у́бо «к Бо́гу о́строви» Иса́ии, я́коже прочто́хом; ки́и ли у́бо о́строви сия́ непщева́тельне, мню же от язы́к Це́ркви ны́не устрояе́мыя, и от сла́наго неве́рия возница́ющая, и водруже́ние прие́млющыя Бо́гу ше́ственное. Обновля́ется же «стена́ ме́дна» у и́ного проро́ка, мню же ду́ша тверда́, и златови́дна, и новодруже́на во благоче́стие. «Пе́ти же Го́сподеви песнь но́ву» повелева́емся, а́ще же в Вавило́н и лука́вое смеше́ние низвле́кшися от греха́, та́же во Иерусали́му возспа́сшеся - и та́мо у́бо не могу́ще божес́твенную пе́ти песнь, я́ко на земле́ чужде́й, зде́ же но́ву песнь и жи́тельство уставля́юще, а́ще же пребы́вше в до́бром, и преуспева́юще, и о́во у́бо испра́вивше уже́, о́во же исправля́юще от свя́таго и новотвори́ва Ду́ха. Обновля́ется же Ски́ния сведе́ния и зело́ многосоверше́нно, ю́же Бог показа́, и Веселе́ил соверши́, и Моисе́й водружи́. Обновля́ется же ца́рство Дави́да; не еди́нощи, но помазу́ему пе́рвее, и нарица́ему второ́е. «Бы́ша же обновле́ния во Иерусали́мех» . Зима́ бе неве́рия, и Иису́с прису́тствоваше Бог и Храм, Бог ве́чный, Храм нов, тождедне́вне реши́мь, и тридне́вен воскреша́емь, и пребыва́ющь во ве́ки - да аз спасу́ся, и от ве́тхаго паде́ния воззову́ся, и бу́ду но́во зда́ние, таковы́м человеколю́бием воззижда́емь. Взыска́ет же боже́ственный Дави́д се́рдце чи́сто в себе́ зи́ждемо и дух прав, во утро́бех обновля́емь – не я́ко не име́я, [Кто бо а́ще не Дави́д толи́к?], но я́ко но́во зна́я, ны́не при́сно прилага́емое. И что тре́бствует ми вя́щших обновле́ний? Мо́щно насу́щная сказа́ти и я́же днесь торжеству́ем, к жи́зни по сме́рти прибли́жившеся. Обновле́ния, обновле́ния торжество́ бра́тие! Да глаго́лется бо мно́гащи от сла́дости. И ки́я сия́? Ве́дящии у́бо научи́те, неве́дящии же - слу́хом обновля́йтеся.

Свет бе непристу́пен, и необъема́емь Бог, ниже́ наче́ншийся, ниже́ преста́нущь, ниже́ ме́римь; Присносия́нен, Трисия́нен, ма́лыми ели́к есть ви́димь, [мню же, ниже́ ма́лыми]. И све́ти втори́и, пе́рваго Све́та озаре́ния, при Нем си́лы и служе́бнии ду́хове. У нас же сей свет не то́чию по́слежди нача́тся, но и но́щию сече́тся и сече́т нощь равноча́стием. Зра́ку вве́рен, и возду́хом разлия́н, и прие́млющь е́же дае́т: ви́дети же бо зра́ку подава́ет, и пе́рвое ви́дится от зра́ка и, ви́димым прити́чущь, дерзнове́ние да́рует. Восхоте́в бо Бог сей мир соста́вити, от ви́димых же и неви́димых состоя́щь, вели́ка и чу́дна вели́чия Своего́ пропове́дника, присносу́щным бо Сам есть Свет, и не ин. Что бо тре́бствоваше све́та втора́го, велича́йшь иму́щым? До́льным же и при нам , пе́рвую просиява́ет све́та сего́ си́лу. И́бо ле́потствоваше вели́кому Све́ту соде́тельство от све́та нача́ти, и́мже реши́т тму и обдержа́щее тогда́ безкрасо́тство и безчи́нство. И сей не орга́нен изнача́ла указа́в, ниже́ со́лнечный, - я́ко мое́ сло́во, - но безтеле́сен, и безсо́лнечный, та́же и со́лнцу дан освеща́ти всю вселе́нную. Елма́ бо и́нем вещь предподста́вив, возвидотвори́ по́слежде коему́ждо чин, и о́браз, и вели́чество приложи́в, да возчудоде́ет что бо́льшее. Зде вид ве́щи предподста́ви: вид бо со́лнца свет, посе́м же вещь приво́дит, о́ко дне соде́лав сие со́лнце. Си́це не́что пе́рвое во днех чи́слится, и второ́е, и тре́тие, и про́чая - да́же до седма́го и поко́йнаго дел дне, и́миже разделя́ются бы́вшая, словесы́ неизглаго́ланными учиня́ема, и не напра́сно воздава́емая вся си́льному Сло́ву и Ему́же помы́слити то́чию или́ рещи́ де́ло есть представля́емо. А́ще же после́дний челове́к показа́ся, и сей руко́ю Бо́жиею и о́бразом почте́н, чу́дно ничто́же: подоба́ше бо, я́коже царю́, предпоста́вити ца́рская, и та́ко введе́ну бы́ти Царю́, все́ми уже́ дориноси́му.

А́ще у́бо бы́хом пребы́ли, е́же бы́хом, и за́поведь сохрани́ли - бы́ли бы́хом, е́же не бы́хом, к дре́ву жи́зни прише́дше по дре́ве зна́ния. И что бы́вше? Обезсме́ртившеся и Бо́гу прибли́жшеся. Елма́ бо «за́вистию лука́ваго смерть в мир вни́де» и укра́де ле́стию челове́ка, сего́ ра́ди на́шею стра́стию стра́ждет Бог, быв челове́к, и ни́щетствует е́же пло́ти соста́витися, да мы О́ного нището́ю обогати́мся. Отсю́ду смерть, и погребе́ние, и воскресе́ние. Отсю́ду новозда́ние, и попра́зднственный пра́здник. И па́ки аз торже́ственник, обновля́ющь мое́ спасе́ние.

Что у́бо глаго́лет? Не пе́рвая ли неде́ля обновле́ние бе, по свяще́нной но́щи и светоно́сию? Но дне́шнему сие́ дая́, о́ любопра́зднственниче ты, и мно́гая примышля́я светлова́ния.

О́на святи́тельство бя́ше, сия́ же спасе́ния рождество́. И о́на у́бо междопреде́лие погребе́ния и воскресе́ния, сия́ же чи́сте втора́го бытия́, да я́коже пе́рвое зда́ние нача́ло от неде́ли прие́млет, [явле́но же, от тоя́ бо седмы́й, савва́та быва́ет, упокое́ние су́ще дел], та́ко и втора́я па́ки от тоя́жде начина́ется, пе́рвая су́щи по ней, и осми́ца от су́щих пре́жде тоя́ - высо́кия вы́шшая и чу́дныя чудне́йшая, к вы́шнему бо веде́т устрое́нию, е́же и боже́ственный Соломо́н гада́тельствовати ми мни́тся, дая́ти «часть седми́», житию́ сему́ законопола́гаю, и «осми́» , бу́дущему от зде́шнего благоде́йства и та́мошнего устрое́ния. Но и вели́кий Дави́д то́йже припева́ти ви́дится о осми́це псалми́ , я́коже и обновле́ний дню сему́ псало́м ин , до́му не́кое обновле́ние имену́я, и́же есмы́ мы, и́же Бо́жий храм бы́ти же и слы́шати сподо́бльшеся, и быва́ти.

И́мате обновле́ний сло́во! Но обновля́йтеся, ве́тхаго челове́ка отве́ргше, в но́вости жи́зни жи́тельствуйте, всем узду́ наложи́вше, от ни́хже смерть [быва́ет], вся у́ды наказа́вше, вся́ку злу дре́ва снедь возненави́девше или́ изблева́вше, и сего́ ра́ди то́чию помина́юще ве́тхия, да бежи́м [их]. «Красе́н бе в виде́нии и добр во снедь», мене́ умертви́вый плод. Бежи́м благорумя́нств, на ны самы́я зрим, да тя «не победи́т добро́ты по́хоть, ниже́ совосхи́тишися ве́ждами» , а́ще мо́щно да́же и до презо́ра, Е́ву помы́слив, сла́дку лесть, что́мый яд. Ка́ко бо спасе́т удо́бь чужда́я, его́же погуби́ своя́? Да не услади́тся ти горта́нь, и́мже низвлачи́тся все дае́мое и, пре́жде не́же прия́тися что́мое, по е́же прия́ти - безче́ствуется. Обоня́ние уже́нствова тя - бежи́ благоуха́ний. Осяза́нием умягчи́лся еси́ - отрецы́ся гла́дкостей и мя́гкостей. Слух преувеща́ - положи́ две́ри ле́стным словесе́м и преде́лательным. «Отве́рзи твоя́ уста́ сло́ву Бо́жию» , да привлечи́ши Дух, да не прито́ргнеши сме́рти. Егда́ не́что тя прельща́ет от отрече́ных, помяни́, кто был еси и отку́ду поги́бл еси́. А́ще ма́ло что от словесе́ преотврати́шися, к себе́ возвраща́йся, пре́жде не́же всеконе́чне вне па́днути и низнести́ся к сме́рти - и бу́ди нов в ме́сто ве́тхаго, и ду́ши пра́зднуй обновле́ния. Я́рость да бу́дет ти на еди́наго зми́я, его́же ра́ди испа́днул еси́. Жела́тельное да простре́тся тебе́ все к Бо́гу, не ко и́ному чесо́му от наве́тных и бла́зненых. По́мысл всем да настоя́тельствует, и да не низвлачи́тся лу́чшее от го́ршаго. Да не возненави́диши твоего́ бра́та, и сия́ ту́не, зань же Христо́с у́мре и твой брат бысть, Бог сый и Влады́ка. Да не воззави́диши исправля́ющу, зави́деный, и зави́дитися увеща́вся, и сего́ ра́ди низведе́н. Да не обезче́стиши слез, мно́гих досто́йная слез постра́давый, та́же поми́лован. Да не отри́неши убо́гаго, обогати́вся Божество́м: а́ще же у́бо, но да не обогати́шися на убо́гаго, и сие́ бо мно́го от несы́тых. Да не обезче́стиши стра́ннаго, за́ньже Христо́с стра́нствова, [Его́же вси мы стра́нницы и прише́льцы,] да не устрани́шися от рая́ я́коже пе́рвее. Пода́ждь тре́бующему храм, покро́в, пи́щу ‐ си́ми наслажда́йся и па́че тре́бования. Да не возлюби́ши бога́тства, а́ще не помага́ет убо́гым; оста́ви, оста́вленый; поми́луй, поми́лован. Стяжи́ человеколю́бным человеколю́бное, до́ндеже вре́мя. Все житие́ да обновля́ется тебе́, всяк жи́тельства путь. Я́же под и́гом - дади́те что и Бо́гу, предприя́стеся бо, де́вы - все Бо́гу, разреши́стеся бо. Не быва́йте та́тницы рабы́ни сла́сти, бежа́вшия свобо́ды от е́же сожи́ти, не му́же́м у́бо, му́жем же оба́че. Не прие́млю тружда́тися при́сно, сла́сти воспомина́ньми. Ненави́жу и чрез возду́х обы́чая. Си́льнии, бо́йтеся Сильне́йшаго, И́же высо́ких престо́л Вы́шшаго. Да не почуди́шися ничесо́му, е́же не пребыва́ет. Ни пре́зриши, е́же пребыва́ет, ниже́ что пристя́гниши, е́же расти́чется держи́мо. Не поревну́еши чесо́му зави́димых, но ненави́димых. Не вознеси́ся вельми́, да не бо́лие низнесе́шися, ни злых му́дрствуй, явля́тися лу́чший. Печа́луйся, благи́ми побежда́емь. Не посмее́шися паде́нию бли́жнего: проходи́ же небла́знено, ели́ка ти си́ла, но даждь ру́ку ни́зу лежа́щу. Ниже́ печа́луя, отча́ешися благоде́нства; ниже́ де́я до́бре, печа́ли. Еди́но ле́то четы́ри времена́ но́сит, и еди́но манове́ние вре́мене мно́гыя дея́ний прело́ги. Да пресеца́ет ти печа́ль у́бо сласть, скорбь же лу́чшая наде́жда. Си́це обновля́ется челове́к, си́це чте́тся обновле́ний день, таково́ю пи́щею, таковы́ми сне́дьми. «Не яви́шися, глаго́лет, тощь пред Мно́ю» , но а́ще что до́бро с тобо́ю нося́. Ны́не же яви́ся нов, нра́вом ин, весь измене́н. «Дре́вняя преидо́ша, се бы́ша вся но́ва» . Сие́ пра́зднику плодоноси́, до́брым измене́нием измени́ся и ниже́ си́це вели́ко му́дрствиши, но провеща́й Дави́дово: «Сие́ измене́ние Десни́цы Вы́шняго» , от Него́же все челове́ком исправля́емо. Не хо́щет тя Сло́во когда́ в то́мже пребыва́ти, но приснодви́жна бы́ти, благодви́жна, вся́ко новосозда́нна. А́ще греши́ши - обраща́ющася. А́ще исправля́еши - напряжа́юща. Вчера́ ве́ру име́л е́си време́н - днесь Бо́жию позна́й. «Доко́ле на обою́ хра́млеши плесну́» ? Доко́ле возстрои́тельствуеши? И назда́ти когда́ усе́рдствуй. Вчера́ еже мне́тися не́кто почита́л еси́, днесь е́же бы́ти предпочти́. Доко́ле со́ния? И и́стина не́когда да потщи́тся тебе́! Вчера́ был еси́ позо́рник - днесь яви́ся богозри́телен. Вчера́ - укори́тель лют, днесь - благохва́льник кро́ток. Вчера́ - упива́тель, днесь - целому́дреник. Днесь - винопи́йца, утро - водопи́йца. Днесь упитава́яся на о́дрех слоно́вных и пе́рвыми ми́ры ма́жася - у́тро землелега́тель и бде́тель. Ме́сто сме́шника – сумни́тель. Ме́сто утва́рника – злооде́жник. Ме́сто кичли́ва и го́рда - худ явля́емым. Ме́сто златокро́вна – узкохра́мен. Ни́зу ни́чущ в ме́сто высоковы́йна. А́ще си́це разуме́еши и си́це твори́ши, бу́дет тебе́ не́бо но́во и земля́ но́ва, и́наже и сих сло́во постиза́ющу.

Но отъи́дем уже́ и вре́мени подо́бная сопра́зднующе. Вся бо на добро́ торжеству́ стека́ются и сра́дуются. Виждь бо какова́ ви́димая Цари́ца време́н Цари́це дней посыла́ет и дароно́сит от себе́, все я́ко добре́йшее и красне́йшее. Ны́не не́бо проза́рнейшее. Ны́не со́лнце вы́шшее и златови́днейшее. Ны́не ме́сяца круг све́тльший и звезд лик чи́стший. Ны́не брего́м у́бо во́лны миря́тся, со́лнцу же - о́блак, возду́ху же - ве́три, земля́ же - садо́м, са́дове же - виде́нием. Ны́не исто́чницы проза́рнее теку́т. Ны́не же ре́ки оби́льнее, зи́мных уз отреши́вшияся, и тра́вник благоуха́ет, и сад зелени́тся, и стри́жется злак, и а́гнцы прискаку́ют зеле́ным ни́вам. Ны́не у́бо кора́бль от приста́нищ возво́дится с пе́сньми, [и си́ми я́ко мно́га боголюбе́зными,] и ядри́лом воскриля́ется. И обскаку́ет дельфи́н, воздува́я яко сладча́йшее, возпуща́яся, и пропуща́я пловцы́ со благоду́шием. Ны́не же земледе́латель ра́ло водружа́ет, горе́ зря, и плодода́теля призыва́я, и подъяре́м веде́т вола́ ора́ч, и сече́т сла́дкую бразду́, и наде́ждами весели́тся. Ны́не же па́стырь и говя́дарь согожда́ют свире́ли и па́стырскую вдыха́ют песнь, под сада́ми и ка́меньми весну́ют. Ны́не же сад садоде́латель цели́т, и име́льник тро́сти зи́ждет, и подзи́рает пру́ти, и испыту́ет перо́ пти́чие, и ры́барь глубины́ прозира́ет, и мре́жу очища́ет, и ка́мением пресе́дит. Ны́не у́бо любоде́льная пчела́, крило́ отвле́кши и от у́лий воста́вши, свою́ му́дрость показу́ет, и тра́вники прелета́ет, и кра́дет цве́ты. И о́ва у́бо де́лает со́ты, шестоу́гльныя и противополо́жная о́чца истка́ющи, и пра́вая уго́льными преме́няющи, де́ло ку́пно добро́ты и тве́рдости. О́ва же мед во влага́лищех полага́ет и де́лает стра́нствующу плод сла́док и неора́н. Я́ко о́ бы́ и мы, Христо́в пче́льник, и тако́в прие́мше му́дрости и трудолю́бия ука́з. Ны́не же гнездо́ пти́ца устроя́ет: и о́ва у́бо привосхо́дит, о́ва же вселя́ется, о́ва же облета́ет, и оглаша́ет луг, и приглаго́лует челове́ку. Вся Бо́га пою́т, и сла́вят, гла́сы неизглаго́ланными. О всех бо благодари́тся мно́ю Бог. И та́ко о́нех пе́ние - на́ше быва́ет, от ни́хже аз е́же пе́ти прие́млю. Ны́не у́бо смее́тся всяк живо́тных род и вся́ким чу́вством учрежда́емся. Ны́не же высоковы́йный конь и горд, в храми́нах стужа́я и у́зы уму́чив, ударя́ет по по́лю и река́ми красу́ется.

Что и́ная? Ны́не му́ченицы ве́дрствуют, и позо́рствуют, и све́тлыми стопа́ми созыва́ют люд христолюби́вый, и натрижне́ния наро́дствуют. Сих еди́н есть и мой вене́чник, [мой бо, а́ще и не у мене́ - да па́дает за́висть, ве́дущым глаго́лю], Ма́мант преслову́тый, и па́стырь, и му́ченик. Пе́рвее у́бо, еле́ницы доя́ поспеша́ющияся другодру́жно, да чу́ждим млеко́м пита́ется пра́ведный. Ны́не же пася́ люд матерогра́да и весну́ обновля́я днесь, мно́гими ты́сящами отвсю́ду приспева́ющих, разли́чну же доброде́тели добро́тами, и па́стырей досто́йную, и слове́с победи́тельных.

Еще́ же сокра́щеннее рещи́: Ны́не весна́ мирска́я, весна́ духо́вная, весна́ душа́м, весна́ телесе́м, весна́ ви́дима, весна́ неви́дима, ея́же и та́мо да причасти́мся, зде до́бре изме́ньшеся, и но́ви к но́вому житию́ препосли́мся, во Христе́ Иису́се Го́споде на́шем, Ему́же вся́ка сла́ва, честь, и держа́ва, со святы́м Ду́хом, во сла́ву Бо́га Отца́. Ами́нь.

Стихи́:

А́ще а́да или́ из гро́ба клю́чь не возбраня́ет,

Твое́ Спа́се стремле́ние, клю́чь двере́й ка́ко возбрани́т?

В си́й де́нь, в Неде́лю втору́ю по Па́сце, обновле́ния пра́зднуем Христо́ва Воскресе́ния, и свята́го апо́стола Фомы́ осяза́ние. Обновле́нием у́бо обы́чай бе́ дре́вний быва́ти, на не́которое от наро́читых: ле́ту бо окружа́ющу и то́й де́нь, во́ньже тогда́ соде́яно бы́сть наве́дшу ве́щи о́ноя, па́мять творя́ху ле́тнюю, да не в забве́ние вели́кая бы дела́ бы́ли. Отсю́ду евре́и пе́рвее Па́сху в Галга́лех сотвори́ша, Чермна́го мо́ря прехожде́ние обновля́юще. Отсю́ду се́нь свиде́ния и́м обновля́ется, и многосла́вно. Отсю́ду ца́рство Дави́дово, и ина́я, да не по коему́ждо глаго́лю: елма́ у́бо все́х я́же в житии́ веще́й изря́днее бо́льше, и па́че вся́кия мы́сли де́ло, Госпо́дне Воскресе́ние: не то́чию на ко́еждо ле́то сие́ пра́зднуем и обновля́ем, но при́сно и по осмо́м дни́. Пе́рвое у́бо сего́ обновле́ние, настоя́щая Неде́ля, я́же глаго́лалася бы вои́стинну и осма́я и пе́рвая. Осма́я у́бо, я́ко от Па́схи: пе́рвая же, я́ко нача́ло други́х. И осма́я па́ки: я́ко во о́браз вчиня́ется безконе́чнаго о́наго дне́, и́же в бу́дущем ве́це, и́же пе́рвый, и еди́н бу́дет вся́ко, ни но́щию разсека́емь. Сия́ у́бо о обновле́ниих: а я́же о Фоме́, си́це бы́сть: Христу́ во́ньже де́нь воскре́се, по́зде ученико́м я́вльшуся, не бя́ше Фома́, не у с про́чими совоку́плься, стра́ха ра́ди иуде́йска. Та́же пома́ле наше́д, уве́да Христо́во прише́ствие, не ве́рова, не ученико́м то́кмо, я́ко Того́ ви́деша воскре́сша, но я́ко ниже́ отню́д воскре́се Госпо́дь, и се́й еди́н сы́й от двоюна́десятих. Благохи́тростный же Бо́г, и о еди́ном у́бо си́це пеки́йся, ку́пно же и смотре́нием не́ким бо́льшим, да и па́че Воскресе́ние и по си́х бу́дущым уве́рится, оста́вль дни́й о́смь: да о́наго любо́вь коне́чную поостри́т, и па́че неве́ровавый все́м ве́ру изве́стншую пода́ст Воскресе́ния, па́ки прихо́дит, и две́рем заключе́нным, я́коже пре́жде, су́щу же и Фоме́, вхо́дит и ми́р обы́чно пода́в, посе́м к Фоме́ простира́ется, и глаго́лет: принеси́ пе́рст тво́й се́мо, и ви́ждь ру́це Мои́, и принеси́ ру́ку твою́, и вложи́ в ре́бра Моя́, и не бу́ди неве́рен, но ве́рен. Поне́же бо не то́чию виде́нием уве́ритися име́л еси́ за привиде́ние, но ско́р сы́й, и осяза́ния помяну́л еси́. Показа́ же си́м, я́ко внегда́ сия́ глаго́лаше ко ученико́м, бя́ше слы́ша: вложи́ ру́ку твою́ в ре́бра Моя́. Явля́ет же, я́ко и широка́ бя́ше я́же на ре́брех я́зва, я́ко и ру́ку вну́трь вмеща́ти. Фома́ же опа́сно испыта́в, и ве́ру прии́м осяже́нием, попуща́емь бо бе́ сия́ зре́ти и твори́ти о́ная, а́ще и в нетле́нном и обоже́нном коне́чно телеси́, за извеще́ние взыва́ше: Госпо́дь мо́й и Бо́г мо́й. О́во у́бо пло́ти ра́ди, о́во же Божества́ ра́ди. И Христо́с к нему́ глаго́лет: я́ко ви́дев Мя́ ве́ровал еси́, блаже́ни не ви́девшии и ве́ровавшии. Близне́ц же глаго́лется Фома́, или́ зане́ с други́м роди́ся, или́ за е́же усумне́тися о Воскресе́нии, или́ зане́ си́це от естества́ сле́плена бе́ста ему́ два́ пе́рста руки́ десны́я, си́есть сре́дний, и и́же пред о́нем, глаго́лемый указа́тельный: не́гли ре́кл бы кто́, я́ко усумне́тися имя́ше, и с си́ми осяза́ти. Ини́и же глаго́лют, е́же и изве́стнейшее, я́ко е́же Фома́, близне́ц толку́ется. Второ́е сие́ явле́ние Христо́во. Тре́тие же бы́сть на мо́ри Тивериа́дстем в ловле́нии ры́б, егда́ и пи́щи причасти́ся, боже́ственным огне́м сне́дшейся, я́коже ве́сть Са́м, изве́стнейшее Воскресе́ние представля́я. Та́же во Еммау́се явля́ется. Пя́тое в Галиле́и, и единона́десятищи, я́коже глаго́лют, явля́ется, до́ндеже вознесе́ся, мно́гая и преесте́ственная зна́мения творя́, пред ученики́ по Воскресе́нии: не бо́ мно́гим сия́ пока́зоваше. Оста́виша же сия́ вся́ Евангели́сти написа́ти, зане́ не бе́ возмо́жно сия́ мно́гим, и в ми́ре живу́щым челове́ком слы́шати, я́ко преесте́ственна су́ща зело́. Твоего́ апо́стола Фомы́ моли́твами, Христе́ Бо́же на́ш поми́луй на́с. Ами́нь.

Исходяще в притвор, поем: Слава и ныне, глас 1:

На го́ру ученико́м иду́щим / за земно́е вознесе́ние, / предста́ Госпо́дь, и поклони́вшеся Ему́, / и да́нныя вла́сти везде́ научи́вшеся, / в поднебе́сную посыла́хуся / пропове́дати е́же из ме́ртвых воскресе́ние, / и е́же на небеса́ возше́ствие: / и́мже и во ве́ки спребыва́ти нело́жный обеща́ся Христо́с Бог, / и Спас душ на́ших.

И абие слово:

Бра́тия и отцы́, Па́сха пре́йде, Пра́здник сконча́ся. Ни ли ра́доватися? Ни ли пра́здновати? А́ще хо́щем, прии́дем - подоба́ет бо при́сно нам ра́доватися и пра́здновати духо́вно по глаго́ланному: «Ра́дуйтеся всегда́ о Го́споде, и па́ки глаго́лю: Ра́дуйтеся» .

Е́сть же се ка́ко? А́ще обновля́ему и́мам при́сно па́мять стра́сти Спа́са на́шего Христа́, я́ко Госпо́дь нас ра́ди погребе́ся и я́ко воскре́се в тре́тий день, совоздви́г и животвори́т нас с Собо́ю, «да живу́ще николи́же себе́ живе́м, но нас ра́ди Уме́ршему и Воскре́сшему» , я́ко упова́ющим нам глаго́лати со апо́столом: «Живу́ же аз николи́же себе́, живе́т же во мне Христо́с», «е́же ны́не жив во пло́ти, в ве́ре живу́ Сы́на Бо́жия возлю́бльшаго мя и преда́вшаго Себе́ мене́ ра́ди» .

Се есть та́йны сконча́ние: ме́ртвем бы́ти ми́ру, живе́м же о Бо́зе. Сего́ ра́ди подоба́ет ны и по Па́сце бде́ти и дерза́ти, моли́тися и умиля́тися, слези́ти и просвеща́тися, «всегда́ умерщвле́ние Го́спода Иису́са в те́ле приноси́ти» , повсегда́ умира́ти приложе́нием, всегда́ «исходи́ти из те́ла и преходи́ти к Бо́гу» отхожде́нием плотски́х му́дростей. Да не рече́ши ны́не: «Пои́стинне суть вы́ну пост есть бдя́щим.» Да не рече́ши: «Мно́го есмь был в поще́нии, да подоба́ет поко́ю» - несть поко́я зде. Да не рече́ши: «Состаре́хся в доброде́тели да не бою́ся» - страх вы́ну препа́стен есть и мно́ги состаре́вшихся в доброде́тели во еди́но вре́мя и час низложи́ сатана́ в про́пасть грехо́вную. Я́коже мня́йся стоя́ти, да соблюде́тся, да ся не паде́т. И мня́йся сохраня́емь, да блюде́тся, да не несохраня́емь бу́дет. Да бу́дет в сохране́ние и внима́ние ми́ра - во сне, и яде́нии, и питии́, и всем ине́м. Да очища́ет и да порабоща́ет те́ло, да не я́ко жребе́ц сверепя́ся, иску́са брозду́ пори́нет нас в ро́вище грехо́вное.

Запове́дах вам в пре́жнем оглаше́нии, да не осла́битеся, ни еди́ни быва́йте в ме́стех сокрове́нных - и па́ки не́цыи в тех есте́. «Что хо́щете: па́лицею ли приду́ к вам, ли с любо́вию ду́хом кро́тости?» Вся́ко ю́ду глаго́лах, неслы́шан бых. Вся́ко ю́ду ви́десте бра́та ва́шего, в сей су́ще за́поведи, и не смири́теся. Внима́йте, да не в том не́кто паде́т неве́рии.

Не ту́не и в суету́ оглаше́ния быва́ют. «Несть Бог ра́ти, но ми́ру, я́ко во всех це́рквах святы́х» . «Те́мже вся обра́зно и почи́н да бу́дут» , да все́ми сла́вится Бог в нас. Се́мо и о́вамо ходя́ще, бра́тие, соблюда́йте себе́, где и ка́ко живете́ и седите́: не я́ко оста́влени, но я́ко прия́ти ду́хом; не я́ко [не] соблюда́еми, но соблюда́еми от Го́спода, Соблюда́ющаго всяк по́двиг и де́ло ва́ше; не се́мо ни о́намо несмотре́нно ходя́ще, но молча́ще на трапе́зах ва́ших, соблюда́я рукодея́ния, моли́твами и пе́нии ва́шими; не сокро́вища творя́ще себе́ сребролю́бия ра́ди не́что, но дово́льни быва́юще си́ми. Сам бо рече́: «Не оста́влю, ни оста́влена тя сотворю́» , я́коже утвержа́я нас глаго́лет. «Госпо́дь мне помо́щник, и не убою́ся, что сотвори́т мне челове́к. Помяни́те бра́тию на́шу, и́хже ви́девше сбы́тие жития́» , уподо́битеся ве́ре.

Та́коже блаже́нный Доментиа́н, его́же воспева́ем и его́же па́мять со святы́ми, ку́ю ку́плю купи́, ко́е житие́ сконча́, труды́ ва́шими и по́двиги насле́дивша жизнь ве́чную! Челове́к мал пло́тию, но поне́же изво́ли доброде́тель и возлюби́ Бо́га, вознесе́ его́ Бог по пи́санному, я́ко «сла́вящая Мя́ просла́влю, а отмета́яйся Мене́ обезче́стится» . Ра́доватися у́бо и весели́тися вся́цей бра́тии, но ничто́же на по́льзу, а́ще са́ми себе́ не введе́м иму́ще честь со святы́ми о Христе́ Иису́се Го́споде на́шем, Ему́же сла́ва и держа́ва со Отце́м и со Святы́м Ду́хом, ны́не и при́сно и во ве́ки веко́в. Ами́нь.

По чтении же, тропарь святаго Феодора, глас 8:

Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

И посем: Христос воскресе: трижды, и первый час по обычаю, и конечный отпуст.