Пятница Светлой седмицы

Толкова́ние иже во святых отца нашего Иоа́нна архиепископа Константиня града, Златоу́стаго, сло́во пя́тое: Бысть челове́к по́слан от Бо́га, и́мя ему́ Иоа́нн:

Бесе́довав я́же о Бо́жии Сло́ве принужда́ющая уме́ренне яже в нача́тце нам, путе́м и чи́ном происходя́, и на пропове́дника Сло́ву тезоимени́таго ему́ Иоа́нна прихо́дит про́чее. Ты же слы́шав, я́ко тот Бо́га по́слан есть, ничто́же бы́ти челове́ческо непщу́й от о́ного глаго́лемых. Не своя́ бо, но Посла́вшаго вся веща́ет. Те́мже и а́нгел пронарече́н бысть - а́нгелу же доброде́тель е́же ничто́же свое́ рещи́. А е́же бысть зде - не преше́ствия во е́же бы́ти я́вственно, но посла́ния есть сего́. Е́же бо «бысть по́слан от Бо́га», вме́сто е́же посла́н от Бо́га. Ка́ко у́бо «во зра́це Бо́жии сый»1 не о е́же ко Отцу́ премене́ние рещи́ся глаго́лют, за е́же не прилежа́ти а́рфру? Сей бо зде нигде́ же а́рфра прилежи́т. Егда́ у́бо о Отце́ рече́ся? Что у́бо рече́м проро́ку глаго́лющу, я́ко «се посыла́ю а́нгела Моего́ пред лице́м Твои́м и́же устро́ит путь Твой»2. Е́же бо Мое́ и Твое́ - дву лиц есть изъяви́тельно. «Сей прии́де во свиде́тельство да сведе́тельствует о Све́те»3. Что сие́ раб Влады́це сведе́тельствует ли? Не́гли рече́ кто у́бо, егда́ у́бо не то́кмо от раба́ сведе́тельствуема Его́, но и прише́дше уви́диши к нему́ и с иуде́и креща́ема от него́, еда́ не па́чели ужасне́шися и недоуме́ешися? Но не подоба́ет смуща́тися, ниже́ волнова́тися, но ужаса́тися неизрече́нной бла́гости. А́ще же пребу́дет кто недоуме́яся и смуща́яся, рече́т к нему́ сие́, е́же и ко Иоа́нну рече́: «Оста́ви ны́не, си́це бо ле́по есть нам испо́лнити вся́ку пра́вду»4. А́ще же и́на вя́щше смути́тся кто, глаго́лю я́же ко иуде́ом рече́ и к тебе́: «Не я́ко от челове́ка сведе́тельства прие́млю»5.

А́ще у́бо не тре́бует сведе́тельства сего́, что ра́ди по́слан бысть от Бо́га Иоа́нн? Не я́ко ему́ тре́бующа сведе́тельства, сие́ бо после́дния ху́лы есть. Но что ра́ди? Сам Иоа́нн наведе́, рек: «Да вси ве́ру и́мут ему́6»7. И Са́м же Христо́с рече́, я́ко «от челове́ка сведе́тельства не прие́млю» да не возмни́тся от несмы́сленных, Себе́ сопротивля́тися. «Ны́не у́бо, глаго́ля, ин есть сведе́тельствуяй о Мне, и вем, я́ко и́стинно есть сведе́тельство его»8. Иоа́нна бо явля́ше, ны́не же, глаго́ля «от челове́к свиде́тельства не прие́млю», наведе́ разреше́ние во ско́ре, рек: «Но сия́ глаго́лю вас ра́ди да спасе́теся»9. А́ки бы глаго́лал я́ко у́бо «Бог есмь и Бо́жий и При́сный Сын. И существа́ о́ного нетле́ннаго и блаже́ннаго, ни еди́наго тре́бую сведе́тельствующа. А́ще у́бо и ни еди́н же восхо́щет сия́ рещи́, ничи́мже Аз от сего́ в естество́ умаля́юся Свое́. Но поне́же о спасе́нии Мне мно́гих попече́ние есть, сего́ ра́ди в сие́ снидо́х смире́ние, я́ко и челове́ку сведе́тельство повеле́ти Мое́, до́ле пле́жущаго бо и не́мощнаго». Слы́шащих иуде́й сице, благоприя́тнейша им и удо́бнейша имя́ше я́же в Него́ бы́ти ве́ра. Я́коже у́бо пло́тию оде́яся, да не наги́м Божество́м приложи́вся, всех погуби́т. Си́це и пропове́дника челове́ка посла́, да сро́днаго услы́шавше гла́са, удо́бнейше тогда́ слы́шавшии прии́дут. Поне́же я́ко о́ного ничто́же тре́боваше сведе́тельства, довля́ше показа́ти то́кмо Себе́ И́же кто бе наги́м Божество́м и уязви́ти всех. Но сие́ не сотвори́л есть за е́же предвари́х рек, всех бо погуби́л бы, ни еди́ному же могу́щу непристу́пнаго о́ного све́та прираже́ние претерпе́ти. Сего́ ра́ди и пло́тию я́коже предвари́х рек оде́яся. И еди́ному от на́шых клевре́т вруча́ет сведе́тельство, поне́же у́бо вся, к челове́ческому промышля́я спасе́нию, не к досто́инству еди́ному Своему́, но и ко удо́бь прия́тному и поле́зному слы́шащих зря. Е́же у́бо и сам гада́тельствуя глаго́лаше: «Сия́ глаго́лю вас ра́ди да спасе́теся». И евангели́ст же та́яже Влады́це веща́я по е́же рещи́: «Да свиде́телствует о Све́те», и наведе́: «Да вси ве́руют ему́10». То́чию не глаго́ля, да не вознепщу́еши я́ко сего́ ра́ди прии́де свиде́тельствуя крести́тель Иоа́нн да не что Влады́це приложи́т в достове́рие сло́во. Не сего́ ра́ди, но да единоплеме́ннии ве́руют ему́11.

Я́ко бо сие́ предъизъя́ти мне́ние тща́ся, сие́ наведе́, и от су́щих по сих я́вственно есть, наведе́ бо: «Не бе он, рече́, свет»12. А́ще же не ко мне́нию сему́ стоя́ восприя́л бы сие́, изли́шне про́сте глаго́лемое и то́же сло́во па́че не́жели изъявле́ние уче́ния бы́ло бы́.

И рек бо, я́ко «по́слан бысть да свиде́тельствует о Све́те», что па́ки глаго́леши «не бе он свет»? Не про́сте, ниже́ всу́е. Но поне́же у́бо я́ко мно́га о нас бо́льши свиде́тельствуяй свиде́тельствуемаго и достове́рнейшь мно́жицею бы́ти ви́дится. Да не кто и о Иоа́нне сие́ вознепщу́ет, от нача́л а́бие лука́вое сие́ мне́ние отъе́млет и из ко́рени сие́ восто́рг, показу́я, кто у́бо сей свиде́тельствуяй, Кто́ же Он свиде́тельствуемый, и ели́ко посре́дство Свиде́телствуемаго и свиде́тельствующаго есть. И сие́ сотвори́в, и показа́в Его́ несосу́дное вели́чество, си́це с дерзнове́нием про́чее и на оста́вшее прихо́дит сло́во. И а́ще что от безме́стных бе в ра́зумех несмы́сленейших устремля́яся, сие от среды́ со опасе́нием вземь, си́це всем со удо́бством невозбра́нне уче́ния на про́чая влага́ет сло́во.

Нравоуче́ние шесто́е, я́ко ничто́же нам по́льза догма́ты име́ти пра́вы, а́ще житие́ име́ем развраще́нно зело́ ди́вно и стра́шно:

Да помо́лимся у́бо про́чее со открове́нием разуме́ний сих, и пра́востию догма́т, и житие́ нам бы́ти чи́сто, и граже́нство све́тло, поне́же сих по́льза ни еди́но же, де́лом же не су́щим нам благи́м. А́ще бо и всю ве́ру име́ем и писа́ний разуме́ние, от жития́ же предста́тельства бу́дем пу́сти и на́зи - ничто́же возбраня́юще в гее́нский отвести́ся огнь и в безконечное сгара́ти от неугаси́маго пла́мени. Я́коже бо блага́я соде́лавши воскре́снут в живо́т ве́чный, си́це сопроти́вное дерзну́вшии - в ве́чную му́ку, и ко́нца никогда́ же име́ющую. Те́мже вся́ко да пока́жем тща́ние, я́кобы не прибы́вшее нам от пра́выя ве́ры приобре́тение растли́ти ху́достию дел, но и от зде благоиску́сенствовавшим со дерзнове́нием уви́дети Христа́, сего́ бо ра́вно ничто́же блаже́нства бу́дет у́бо. Бу́ди же всем нам получи́ти рече́нных, во сла́ву Бо́жию вся де́йствуя13, Ему́же сла́ва, вку́пе Единоро́дному Сы́ну и Свято́му Ду́ху, во ве́ки веко́в. Ами́нь.

В пято́к Све́тлыя седми́цы пра́зднуем обновле́ние хра́ма Пресвяты́я и Госпожи́ на́шея Богоро́дицы, имену́емаго живоно́снаго исто́чника. Еще́ же па́мять твори́м изря́дных и па́че естества́ чуде́с бы́вших во о́ном хра́ме от Богома́тере. Се́й у́бо хра́м пе́рвее основа́ся от царя́ Льва́ Вели́каго, и́же и Маке́лл именова́ся. Се́й, поне́же бя́ше бла́г и смире́н челове́к, за до́брое свое́ наме́рение и ми́лостивное е́же имя́ше, пре́жде не́же бы́ти царю́, обрета́яйся во о́ном ме́сте, обре́те еди́наго челове́ка слепа́го, не ви́дяща ка́мо ити́: и взе́м его́ за ру́ку, ведя́ше. Дости́гшима же обои́ма та́мо бли́з, иде́же бя́ше се́й исто́чник, возжада́ слепы́й, и моля́ше льва́, да ороси́т его́: и́же идя́ во вну́треннее о́ное ле́са, иде́же бя́ше древе́с и насажде́ний разли́чных испо́лнено, иска́ше воды́, и не обрета́яй исто́чника, обраща́шеся а́ки отягча́емь. И слы́шит гла́с свы́ше глаго́лющь: «О́ Льве́! не уныва́й, зане́ вода́, ея́же и́щеши, бли́з тебе́ е́сть, и обрати́ся обрести́ ю́». И Ле́в у́бо обраща́яйся, и ища́й мно́го, не обре́те ея́. И па́ки слы́шит ра́вный пе́рвому гла́с, и глаго́лет ему́: «Царю́ Льве́, вни́ди во вну́треннюю ча́сть загуще́ннаго сего́ ле́са, и возми́ свои́ма рука́ма от сея́ му́тныя воды́, и исцели́ жа́жду слепа́го, и пома́жи и помраче́нныя его́ о́чи: и а́бие позна́еши, ка́я е́смь, и от мно́гаго вре́мене живу́ на се́м ме́сте». Ле́в у́бо сотвори́ я́коже гла́с повеле́ ему́, и а́бие воззре́ слепы́й. И по Богома́тере прорече́нию, по ма́ле вре́мени бы́сть ца́рь Ле́в: и созда́ та́мо у исто́чника хра́м пе́рвый, бога́тою руко́ю, я́коже зри́тся дне́сь. И поне́же быва́ху чудеса́ множа́йшая на вся́кий де́нь, по мно́гих ле́тех иустиниа́н вели́кий самоде́ржец гре́ческий, поне́же пострада́ зело́ от не́мощи водотру́дия, и обре́те та́мо исцеле́ние свое́, хотя́ да́ти воздая́ние Ма́тери Бо́жией, па́ки созда́ о́ный пе́рвый хра́м, и сотвори́ и велича́йший и красне́йший, и́же от мно́гих тру́сов внегда́ разсе́деся, последи́ ца́рь Васи́лий Македо́нский, и сы́н его́ Ле́в Му́дрый, па́ки созда́ша и испра́виша и. Во вре́мя и́х се́й исто́чник мно́га чудеса́ де́йствова: и во́д задержа́ния, и пти́сы, и ины́я тмочи́сленныя стра́сти исцели́: карки́нския стра́сти, и кровотече́ния мно́гих родо́в, и́миже стражда́ху царе́вны и ины́я жены́, и разли́чныя огне́вицы, и ины́я боле́зни, и я́звы неисце́льныя, и непло́дныя разреши́: я́ко и цари́ца Зои́ непло́ды су́щи прия́т да́р от сего́ исто́чника, сы́на Константи́на Порфироге́нита. Воскреси́ же и ме́ртваго, и́же бе́ от Фессали́и, и приходя́ ко свято́му исто́чнику у́мре на пути́. Егда́ же хотя́ше умре́ти, запове́да кора́блеником взя́ти его́ та́мо во хра́м исто́чника, и возлия́ти на него́ три́ ка́ди от о́ныя воды́, и тогда́ погребсти́ его́. Е́же творя́ще кора́бленицы, и возлива́юще на него́ во́ду, а́бие воскре́се ме́ртвый. По мно́гом же вре́мени, хотя́ па́сти вели́кий хра́м о́ный, яви́ся Богоро́дица, и держа́ше его́, до́ндеже изы́де во́н все́ мно́жество люде́й, и никто́же вреди́ся. Та́яжде свята́я вода́ пива́ема, мно́гия бесну́емыя исцели́: и от темни́цы челове́ки свя́занныя разреши́. Исцели́ же и царя́ Льва́ от каменозая́тия, и жены́ его́ Феофа́ны угаси́ зе́льнейшую огне́вицу. И бра́та его́ Стефа́на разреши́ от пти́сныя не́мощи. Дарова́ же и слу́х Иоа́нну патриа́рху Иерусали́мскому. Исцели́ еще́ и си́льную огне́вицу Патри́киа Тара́сиа, и ма́тере его́ Магистри́ссы, и сы́на Стилиа́нова исцели́ от водозадержа́ния. И не́кую жену́ и́менем Схи́зину свободи́ от чревоболе́ния. И царя́ Рома́на исцели́, от разреше́ния и связа́ния чре́ва та́яжде вода́, подо́бне и жену́ его́. Призва́нием же то́кмо исцели́ всесвята́я мона́ха Пе́перин, и ученика́ его́ в Халде́и. Подо́бне и мона́ха Матфе́а, и Меле́тиа, и́хже оболга́ша царю́, свободи́ от гне́ва: Патри́киа же и Протоспафа́риа, и ины́я тмочи́сленныя кто́ испове́дати мо́жет? Не́сть же пра́ведно не воспомина́ти и исцеле́ния Исхи́ова: ниже́ ки́й язы́к мо́жет пове́дати, ели́ка чудеса́ та́яжде вода́ де́йствова, и да́же до дне́сь де́йствует, па́че ка́плей дожде́вных, и па́че зве́зд небе́сных, и листо́в мно́жества, я́же в на́ша времена́ ви́дехом. Еще́ исцели́ и ины́я смертоно́сныя боле́зни, прока́зы, свербо́ты па́че естества́, и опухле́ния же́нская, и душе́вныя стра́сти мно́гия исцели́, и разли́чныя очны́я боле́зни. Еще́ же исцели́ вара́гга Иоа́нна от воднотрудова́ния, и друга́го вара́гга исцели́ от злы́х я́зв, и священномона́ха Ма́рка от о́спы, и каменозая́тия мона́ха Заха́рию. И ина́я мно́жайшая чудеса́, я́же не возмо́жно е́сть исчи́слити, я́же де́йствова и де́йствует непреста́нно. Твоея́ Ма́тере моли́твами, Христе́ Бо́же на́ш поми́луй на́с. Ами́нь.

Днесь, возлю́блении, те́мная ме́ста обхо́дит Влады́ка наш. Днесь ме́дная врата́ сокруши́, днесь затво́ры желе́зныя сломи́. Послу́шай приле́жно рече́ннаго: не рече́, отве́рзе врата́ ме́дная, но сокруши́л. Почто́? Да непотре́бна бу́дет темни́ца. Не отъя́т затво́ры, но сломи́л, да не́мощна бу́дет темни́ца. Иде́же бо несть ни две́рий, ни затво́р; а́ще и вни́дет кто, не держи́тся. Егда́ же Христо́с сломи́, кто ин мо́жет испра́вити? Е́же бо Госпо́дь Бог разве́ржет, кто уже́ испра́вит? Ца́рие, егда́ восхотя́т свя́зня отпуща́ти, писа́ние посыла́ют к стра́жем, да испу́стят свя́зня. Отверза́ют, а не сло́мят ни врат, ни затво́ры. Явля́юще, я́ко па́ки или́ тем же вни́ти, или́ ине́м в тех ме́сто. Христо́с не та́ко: но показа́ти хотя́, я́ко кончи́на сме́рти бысть, сломи́л ея́ врата́ ме́дная. Ме́дная же нарече́, не я́ко от ме́ди бы́ша, но нему́чимое сме́рти де́ля. Я́коже бо царь не́который, разбо́йника обре́те предержа́ща град, и хища́юща от всего́, и в пеще́ры вла́зяща, и ту полага́юща бога́тство, связа́ того́ разбо́йника, в му́ку предае́т, бога́тство же его́ прино́сит в кле́ти ца́рския. Та́коже Христо́с сотвори́л: связа́ разбо́йника и темни́чника дия́вола, и смерть, и бога́тство его, [глаго́лю же род челове́ческий], преве́де в кле́ти ца́рския. Сего́ ра́ди и Па́вел вопия́ше, глаго́ля: «Я́ко изба́вил ны есть от вла́сти те́мныя, и преста́вил ны есть в Ца́рство Сы́на любве́ Его́»1. И се же ди́вно, я́ко Сам прии́де Царь. Я́ве же есть, я́ко ни еди́н же царь сего́ бы сотвори́л коли́, но свои́ми слуга́ми отпуща́ет свя́зня. Зде же не та́ко, но Сам прии́де к свя́знем Царь, не усрамя́ся темни́цы и свя́заных. Его́же бо созда́л, не бе Ему́ ся срамля́ти. И сокруши́ врата́, и сломи́ затво́ры. На́йде на а́да, и пу́сту сотвори́ всю темни́цу его́. И темни́чника пои́м свя́зана, та́ко к нам возврати́ся. Проти́вник плене́н, веде́н быва́ше кре́пко свя́зан. Сама́ смерть пове́ргши свое́ ору́жие, на́га к нога́ма Царе́выма притече́. Ви́де ли кре́стная исправле́ния? Ви́де ли ди́вну побе́ду? Реку́ ли ти и́но чу́до ди́вно и дивне́е. Уве́ждь о́браз побе́ды, и тогда́ почуди́шися бо́льшими. И́мже победи́л дия́вол, тем же удоле́ ему́ Христо́с. И сама́ ору́жия его́ взем, тем его́ пребра́. Ка́ко ли? Послу́шай. Де́ва, и дре́во, и смерть - о́брази побежде́ния. Де́вою бе Е́ва, не у́бо зна́яше му́жа. Дре́во бе запреще́ние ада́мово, сме́рти осужде́ние. Се па́ки, Де́ва, и дре́во, и смерть - о́браз побе́ды. В Е́вы ме́сто - Мари́я. В дре́ва ме́ста, е́же ви́дети ра́зума добру́ и злу, - дре́во кре́стное. В сме́рти ме́сто ада́мовы - смерть Христо́ва. Ви́диши ли, коли́ко и́мже победи́л, те́ми же его́ победи́ма. Дре́вом пребра́ Ада́ма дия́вол, Кресто́м же пребра́ дия́вола Христо́с. И дре́во, о́во во ад сла́ше, о́во же и ше́дших отту́ду возвраща́ше. Па́ки же, о́но дре́во на́га кры́яше, се же дре́во Победи́теля на высо́це всем показа́ше. Ов у́бо и су́щих с ним осуди́л, но сей и бы́вших пе́рвее Его́ воскреси́л. Кто возглаго́лет си́лы Госпо́дня? От сме́рти бы́хом безсме́ртни. Си́и суть исправле́ния кре́стная. Уве́дел ли еси́ побе́ду? Уве́дел ли еси́ о́браз побе́ды? Уве́ждь, ка́ко без труда́ ти бысть исправле́ние. Не окрова́вихом ору́жия, не ста́хом в полце́, не прия́хом я́звы, ни ви́дехом бра́ни - побе́ду же прия́хом. По́двиг Того́ есть, а вене́ц наш, поне́же у́бо на́ша есть побе́да. Воскли́кнем, я́ко во́ини побе́дную песнь! Вси днесь рцем, хва́ляще Влады́ку: «Поже́рта бысть смерть в побе́ду. Где ти сме́рти побе́да? Где ти а́де жа́ло?» Се Распя́тый нам испра́вил есть, Христо́с Бог наш, Тому́ сла́ва и держа́ва во ве́ки веко́в. Ами́нь.

Благослове́н Бог! Похва́лим днесь Единоро́днаго Сы́на Бо́жия, небе́сных Роди́теля, изни́кшаго от та́йных бок зе́мских и светоно́сными заря́ми Вселе́нную осени́вша! Похва́лим днесь Единоча́даго погребе́ние и Воскресе́ние Победи́теля, ра́дость всего́ ми́ра, жизнь язы́ком! Похва́лим днесь, отве́ргша неле́пие, и в благоле́пие обо́лкшася! Похва́лим Бо́га Сло́ва, И́же ми́ра сего́ прему́дростию обличи́л [есть], и проро́к прорече́ние утверди́л [есть], апо́стольска ли́ка соу́з совоку́пил, церко́вное и́мя поче́л, духо́внаго де́йства пространи́л [есть]! Сего́ мы, и́же иногда́ стра́ннии, Бо́га позна́хом. И писа́ние сбы́сться: «Воспомяну́тся и обратя́тся ко Го́споду вси концы́ земли́, и покло́нятся пред Ним вся оте́чествия язы́ческая» . Что воспомяну́тся? Ве́тхаго паде́ния, но́ваго воста́ния, ста́раго преступле́ния, после́дняго исправле́ния, умерщвле́ния Е́вина, де́вственнаго рождества́, ра́йскаго оше́ствия, небе́снаго обраще́ния. Похва́лим днесь Оста́вльшаго землю́ и Бо́жиим повеле́нием тле́нное на нетле́нное Претво́ршаго. Но воззри́, возлю́блене, чудеса́ Бо́жия и по стра́сти исправле́ния ра́дости. Нече́стный на благосло́вие преложи́ся, и ми́рная ра́дость без тли воста́ла с те́лом. Егда́ породи́ земля́, и приложи́ день, и изблюну́ смерть, вся́ко воскресе́ние не можа́ше подража́ти Держа́щаго вся сло́вом. Пра́зднуим у́бо днесь тридне́вное Воскресе́ние, жи́зни ве́чныя исхода́таище. Я́коже Мари́я Богоро́дица, де́вственныя и неве́стовныя боле́зни неру́шьши, во́лею Бо́жиею и благода́тию духо́вною родила́ Роди́теля век, от Бо́га - Бо́га Сло́ва. Та́кожде и земля́, от свое́ю боку́ боле́зни сме́ртныя разре́шьши, изблюну́ повеле́нием своего́ Влады́ки, не можа́ше бо держа́ти те́ло, носи́ло же сме́ртию бы́вше. Смотря́я у́бо проро́к Дави́д неле́поты исправле́ние, руше́ние сме́рти, дре́вних раб свобо́ду, вопие́т и глаго́лет: «Госпо́дь воцари́ся, в благоле́поту облече́ся!» В нетле́ние ве́ры, во апо́стольское созва́ние. У́же несть Иу́ды преда́теля, ни Каиа́фы. У́же не прети́т И́род, ни Пила́т су́дит, ни изра́ильтяне держа́т. Тле́нное бо бысть нетле́нно, и мни́мый ми прост челове́к - Бог яви́ся. Те́мже и мы вопие́м: «Где ти а́де жа́ло? Где ти сме́рти побе́да?» «Госпо́дь воцари́ся, в благоле́поту ся облече́. Облече́ся Госпо́дь в си́лу и препоя́сася» . И си́лу, глаго́лет смире́ние плотско́е. Что бо того́ си́льнее? Пло́тию безпло́тныя бе́сы низложи́л, и Кресто́м проти́вныя бе́сы плени́л. Поне́же запе́рва двиза́ше земле́ю грех. Воскре́се же Госпо́дь наш дре́вом кре́стным. Ю́же не на плач па́губы ходя́щу, ни дожди́ льсти мочи́му. Те́мже глаго́лет: «Гото́в престо́л твой отто́ле, от ве́ка Ты еси́» . И «Ца́рство Твое́, Ца́рство ве́чно» , е́же не сотле́ет. Его́же бу́ди всем улучи́ти, благода́тию и человеколю́бием Самого́ Христа́ Бо́га на́шего, Ему́же сла́ва и держа́ва, со Отце́м и со Святы́м Ду́хом, ны́не и при́сно и во ве́ки веко́в. Ами́нь.

Бла́го вре́мя, и вседоброгла́сно, и подо́бно ны́нешнему вре́мени ве́ровавшым нам святопе́вцу Дави́ду глаго́лати: «Сей день, и́же сотвори́ Госпо́дь, возра́дуемся и возвесели́мся вонь» . Вои́стинну возрадо́ватися, я́ко ви́дехом, Его́же жела́хом. Я́ко осяза́хом, Его́же иска́хом. Я́ко смотри́хом, Его́же ча́яхом. Я́ко весна́ христиа́нска возсия́ла. Я́ко возсия́ша преподо́бных цве́ти. Я́ко вознесо́шася новокреще́ных кри́ни. Я́ко сия́ют купе́льная ча́да. Вои́стинну сей день, и́же сотвори́ Госпо́дь, возра́дуемся и возвесели́мся вонь! О́ дню, вся́каго дне светле́е! О́ дню, уста́вивый тму неразу́мия, и свет ра́зума показа́в! О́ дню, отгна́вый нощь со́нмища, и у́тро дни Воскресе́ния показа́в! О́ дню, упраздни́вый мра́ка неве́дения неве́рных и сло́во ве́рных озари́в! О́ дню, зна́яй Царя́, та́коже Про́ста! О́ дню, окрады́й дия́вола, и ни еди́наго же должника́ оста́вль! О́ дню, су́щих пе́рвее сего́ рабы́, ны́не же свяще́нники Го́споду показа́в! О́ дню, предста́вивый великомы́сленныя голуби́цы олтаре́ви! Где ны́не жиру́ют вра́ни саватиа́не? Где кра́дшеи Па́сху су́етныя при́тчи? Коли́ко де́тий тогда́ дия́вол погуби́л. Когда́ Влады́чняя мре́жа смы́сленыя пти́цы улови́ла, тогда́ или́ ны́не? Когда́ не́бо Воскресе́ния, толи́ко смы́сленныя зве́зды на земли́ показа́ше, тогда́, или́ ны́не? Когда́ ма́слом и во́ском горя́ще свещи́, со́лнечныя лучи́ преспе́ша, тогда́ или́ ны́не? Не препира́ют ли тя страсти́телю словеса́? Изве́стна ти да бу́дут пропове́дания. Не ви́диши ли, вся вселе́нная све́тлыми ри́зами украша́ема. Ни в нари́чемем твоея́ Па́схи боя́ся, в чи́сты ри́зы обо́лклся еси́, ни ны́не возвесели́лся, пра́зднество се́туя, в све́тлых ри́зах хо́диши. Ка́ко и́маши пра́здновати, ни оболки́йся николи́же в чи́сты? Вся есть рещи́ не́коему от них: Что у́бо, чи́сто ли одея́ние спаса́ет челове́ка? А́ще ли кто не облече́тся в бе́лы, не пра́зднует ли? Послу́шай глаго́ла си: вои́стинну у́бо одея́ние чи́сто не спаса́ет челове́ка, но душа́ светла́, и житие́ доброде́тельно. Подоба́ет же все́ми пра́зднующаго, то́чно пра́зднеству и оде́ние носи́ти: я́коже и́мать, а не я́коже не и́мать. Та́кожде бо и у нас ни́щии, ца́рским одея́нием кра́сятся. Те́мже подоба́ет сыново́м Воскресе́ния, и душе́вным одея́нием, и теле́сным бе́лым и чи́стым бы́ти. Еда́ ка́ко негото́вым нам обре́теным бы́вшым, услы́шим от жениха́ Христа́: «Дру́же, ка́ко вни́де зде, не имы́й одея́ния бра́чна?» Та́кожде бо и сам Образо́вник Воскресе́ния Христо́с, воскресе́ние явля́я на горе́ Преображе́ния, не то́кмо лице́ бе́ло показа́, но и ри́зы преблесну́. Я́коже еди́н от евангели́ст рече́: «И бы́ша ри́зы Его́ белы́ я́ко снег, я́коже не мо́жет беле́ц на земли́ убели́ти» . Та́кожде и сы́нове Воскресе́ния, я́коже ви́дите, не то́кмо же оде́жду белу́, но и сапоги́ та́кожде но́сят, обетша́ния ада́мова совле́кшеся, и во обновле́ние Влады́ки Христа́ оболче́ни. Я́коже боже́ственный Па́вел глаго́лет: «Ели́цы во Христа́ крести́стеся, во Христа́ облеко́стеся» . Я́коже все на воскресе́ние бело́, не то́кмо на земли́, но и на небеси́ подоба́ет име́ти нам. Слы́шал еси́ Матфе́я глаго́люща: «По́зде в суббо́ту, свита́ющи неде́ли, прии́де Мари́я Магдалы́ни, и друга́я Мари́я на гроб Иису́сов. И трус бысть вели́к: а́нгел бо сшед с небе́с, отвали́в ка́мень, седя́ше верху́ его́. Бе́яше виде́ние его́ я́ко мо́лния, и одея́ние его́ я́ко снег» . Вои́стинну «сей день, и́же сотвори́ Госпо́дь, возра́дуемся и возвесели́мся вонь». Я́ко уже́ не тя́жет и́го зако́нное, но ле́гкое благода́ти те́шит. Я́ко не ковче́г еди́ною спаса́ет, но И́же от Де́вы весь мир спаса́ет. Возра́дуемся и возвесели́мся вонь. Я́ко уже́ не с поло́в дом разори́тся, но ми́лостивно дом воздвиза́ется. Я́ко не уже́ одожда́ет огнь на Содо́мех, но дождь на Де́ву посыла́ет. Возра́дуемся и возвесели́мся вонь. Я́ко у́же не столп со́ли жена́ Ло́това образу́ется, но день Воскресе́ния просвеща́ется. Сей день, и́же сотвори́ Госпо́дь, возра́дуемся и возвесели́мся вонь. Мы весели́мся, а жи́дове се́туют, не ве́рующе проро́ку Дави́ду, изда́вен лет веща́ющу о нетле́нне Воскресе́нии Госпо́дни, си́це: «Не оста́влена бысть душа́ Его́ во а́де, ни плоть Его́ ви́де истле́ния» . Что глаго́леши жидови́не? А́ще ин кто воскре́сл из ме́ртвых нетле́нен, глаго́ли, да ти ве́ру и́мем. А́ще ли несть ино́го никого́же, то́кмо Христо́с, возопи́вый пе́рвее мно́го лет проро́ком к язы́ком: «Претерпи́ Мя в день Воскресе́ния Моего́, глаго́лет Госпо́дь, и́мже держа́ва моя́ в собо́ре язы́к» , - почто́ не притече́ши, но бежи́ши? Сей день, и́же сотвори́ Госпо́дь, возра́дуемся и возвесели́мся вонь. Мы возвесели́мся, де́ти же фарисе́йския се́туют. Почто́ же? Зане́же не ве́роваша патриа́рху Иа́кову, изда́вна о ца́рстем Госпо́дни Воскресе́нии возопи́вшу, и глаго́лющу си́це: «Возле́г, у́спе я́ко лев, и я́ко ски́мен, кто воздви́гнет И́?» Что глаго́леши жидови́не? Даждь нам ино́го, ца́рски воста́вша подо́бно льву, и и́мем ве́ру ва́шым бесе́дам. А́ще ли несть ино́го никого́же, то́кмо еди́н Влады́ка Христо́с, я́ко лев поспа́ тридне́вно, и я́ко ски́мен воста́. И я́коже есть Самого́ Го́спода слы́шати издавна́ о вочелове́чении: «Аз обоня́х Ефре́ма, я́ко и лев дом Иу́дов» . Вся́ко же есть рещи́ кому́: почто́ подо́бно льву Госпо́дь во гро́бе полежа́? Естества́ ра́ди льво́ва. Льву бо спя́щу в свое́й пеще́ре, отве́рсте есте́ о́чи его́. Та́кожде и Влады́ка Христо́с поспа́ в сме́рти три дни, боже́ственною о́чию не смежи́в. Тому́ сла́ва и держа́ва во ве́ки веко́в, Ами́нь.

О вои́стинну И́стинной Богоро́дице и при́сно Де́вей Мари́и мно́зи пове́даша. Проро́цы у́бо разли́чными о́бразы и именова́нии я́же о Ней, и И́же от Нея́ несказа́нно Ро́ждшагося Христа́ И́стиннаго Бо́га на́шего предреко́ша. Святи́и же апо́столи и́же от Нея́ вопло́щшагося Сы́на и Сло́ва Бо́жия и о соде́янных упраздни́шася, о Не́йже м́ала не́кая прореко́ша, а́бие претеко́ша, [Ду́ху Свято́му та́ко устро́ившу]. Вси же от Дави́да род Ея́ быти глаго́лют. Похваля́юще и́же Ея́ мно́зи от святы́х оте́ц бы́ша, ни еди́н же от них о житии́ Ея́, и о воспита́нии или́ о кончи́не пра́ве или́ благоявле́нне назна́менаша, но и нача́ша, и ма́ла не́кая ре́кше, не испра́виша, себе́ бы́ша оглаго́льницы. Иа́ков же бе евре́ин, Афроди́тиян пе́рсянин и не́цыи про́чии - о рожде́нии Ея́ то́чию рекше, о про́чих умолча́ша. О успе́нии же Ея́ Иоа́нн Солу́нский многослове́ное сотвори́в сло́во, сам себе́ покори́ и ин не́кто Иоа́нн, и́же себе́ богосло́ва нарече́, лже́ю покры́вся. Андре́й же иерусали́млянин, архиепи́скоп Кри́тский, ма́ла не́кая рек и испра́вив в похвалу́ Ея́, упраздни́ся. Аз же мно́гих оста́вив и собра́в я́же и́стинну иму́щия, и благове́рна бы́ти, и и́стинна, просты́ми бесе́дами, лю́бящим я́же о Ней и изве́стне слы́шати, по́мощию Ея́ Богома́тери и заступле́нием. Предста́вим и коего́ждо творца́ и́мя, от него́же а́ще что прия́хом, на кра́евех кни́ги напи́шем, да не восхо́щет кто оболга́ти нас, я́ко что свое́ приложи́вша или́ оста́вивша. Но па́че а́ще и от скро́вных, или́ от ерети́к что прия́хом, никто́же нам да зазри́т: от врага́ бо свиде́тельства досто́йно ве́рна суть и тверде́йша, я́коже рече́ святы́й Кири́л, и́мже и той сотвори́ от Авраа́ма даждь до Дави́да о родстве́ Ио́сифа Обру́чника Пренепоро́чныя Богоро́дицы и при́сно Де́вы Мари́и в родосло́вии же Ея́, поне́же от двою́ бра́ту роди́шася, и се соглаша́ют и обои́ евангели́сти, родосло́вяще: Матфе́й у́бо восходя́ по родосло́вию, Лука́ же возвраща́яся, и Сы́на Его́ Дави́дова имену́я.

Макси́мово, Иси́дорово: От коле́на Нафа́нова, сы́на Дави́дова ражда́ется Леви́й. Сей же Леви́й роди́ Мелхи́я и Панфи́ра, и Мелхи́й у́бо взем жену́, и у́мре жена́ безча́дна. Панфи́й же роди́ Ванбанфии́ра. Ванбанфии́р же роди́ Иоаки́ма, отца́ преблагослове́нныя Богоро́дицы. Па́ки от коле́на Соломо́нова ражда́ется Матфа́н. Матфа́н у́бо ражда́ет Иа́кова и, роди́в его́, у́мре. И взем жену́ его́, ре́кше ма́терь Иа́ковову, Мелхи́й брат Панфии́ров, си́речь пе́рвый сын Леви́ев и роди́ Илию́. Иа́ков бя́ше от пле́мене Соломо́нова, Или́й же от пле́мене Нафа́нова. У́мре же Или́й безча́ден, и взем жену́ его́ при́сный брат его́ Иа́ков и роди́ Ио́сифа. И у́бо Ио́сиф сей естество́м есть сын Иа́ковль, я́ко от пле́мени Соломо́нова; по зако́ну же Или́ев, от Матфа́на. Живя́ху же в Галиле́и ку́пно, и взя́ша о́ба бра́та еди́ну жену́, я́коже зако́н повелева́ет, глаго́ля: «А́ще кто у́мрет безча́ден, да по́ймет жену́ его́ брат его́ и воздви́гнет се́мя бра́ту своему́». Иа́ков же, Иоаки́м и Или́й от отца́ еди́ного Панфи́ра бра́тия. Си́це и Или́й па́ки, и Иа́ков - от отца́ Матфа́на бр́атия. Сей у́бо Иоаки́м, роди́ Мари́ю Пречи́стую Богоро́дицу, Иа́ков роди́ Ио́сифа Обру́чника и Мари́ю, ю́же нари́чет евангели́ст Мари́ю Клеопину, я́коже бы́ти Мари́и Богоро́дицы, Ио́сифу Обру́чнику двою́ бра́ту де́тий. Ио́сиф же, хи́тростию древоде́ль, имя́ше же бра́та при́снаго от Иа́кова: Клео́пу, его́же и Кло́пу реко́ма. И та́ко у́бо обрето́хом по отце́ пле́мя Преблагослове́нныя Богоро́дицы: от коле́на сы́на Дави́дова Нафа́на, от него́же роди́ся и Леви́й, у́бо роди́ Мелхи́я и Панфи́ра, Панфи́р же Вамбанфи́ра, Вамбанфи́р же Иоаки́ма, отца́ Преблагослове́ныя Богоро́дицы. По ма́тери же си́це еще́: па́ки от коле́на Дави́дова ражда́ется Матфа́н, и Матфа́н - Иа́кова, Иа́ков у́бо сей, по Матфа́ну я́ко от коле́на Соломо́нова, и той роди́ Ио́сифа, Обру́чника Богоро́дицы. И та́ко у́бо по отце́ обрето́хом род Преблагослове́ныя Богоро́дицы. Смотри́ же зде, и по ма́тери та́кожде, коле́на сего́ возвраще́ние.

Ипполи́тово: Матфа́н, свяще́нник от Вифлее́ма, роди́ три дще́ре: Мари́ю, Сову́ и А́нну. И Мари́я у́бо роди́ Саломи́ю ба́бу, Сова́ же - Елисаве́ть, ма́терь Предте́чеву. А́нна же взят Иоаки́ма, бра́та отцу́ Ио́сифу Обру́чнику, и́же от Матфа́на сни́де неве́ста от Иерусали́ма во град Галиле́йский Назаре́т, и жит со Иоаки́мом осмь лет, и ча́да не сотвори́ша. Бысть же им взы́ти во Иерусали́м в пра́здник обновле́ния и приноша́ху сы́нове Изра́илеви да́ры своя́ Го́споду Богу. Принесе́ же Иоаки́м, и ста пред ним Руви́м иере́й, глаго́ля: «Не досто́ит ти пе́рвее принести́ да́ры своя́, поне́же се́мене не сотвори́л еси́ во Изра́или». И оскорбе́ Иоаки́м зело́, и не яви́ся жене своей, но отъи́де в пусты́ню и бе та́мо моля́ся четы́редесять дний. Моля́щу же ся ему́ в горе́, услы́ша глас с небесе́, глаго́лющь ему́: «Я́ко роди́т ти ся отроча́ и ра́ди его́ просла́вишися». Зача́т же у́бо жена́ его́ А́нна в ста́рости, и роди́ отроча́ же́нский пол, и нарече́ и́мя ему́ Мариа́м, пе́рвыя ра́ди се́стры ея́, ю́же пре́жде реко́хом, и пора́довашася с ни́ми вси сро́дницы их и дру́зи их.

Иа́ков: Бы́вши же отрокови́цы Мари́и трие́м ле́том, и возве́дше Ею́ роди́телие Ея́ во Иерусали́м, и предста́виша Ея́ Го́сподеви с да́ры. И прия́т Ею́ и да́ры их иере́й Иода́е, нарече́нный Варахи́я, оте́ц Заха́риин, отца́ Предте́чева. И вси иере́и возра́довашася, и помо́льшеся и благослови́вше Иоаки́ма и А́нну и отрокови́цу Мари́ю. И пото́м роди́теля Ея́ с Не́ю снидо́ша в Назар́ет. И в седмо́е ле́то па́ки возве́доша Ю́ и отда́ша Ея́ Го́сподеви в дар во вся дни живота́ Ея́. И се сотво́рше, пома́ле Иоаки́м у́мре, я́коже ре́ша не́цыи осми́м десяти́м ле́том. Мариа́м же от це́ркви Госпо́дни не исхожда́ше нощию и дни́ю. По сме́рти у́бо Иоаки́ма оста́ви А́нна Назаре́т, иде́же бя́ху свекры́ ея́, ре́кши Галиле́ю, и прии́де во Иерусали́м. И бя́ше с дще́рию свое́ю Мари́ею. И пребы́вши жи́ва две ле́те, у́спе, ле́том су́щим се́дмьдесять и де́вять, без еди́ного ле́та не ра́вна со Иоаки́мом ле́том еди́нем от преда́ния. Мариа́м же, от всех обсироте́вши, пребыва́ше неисхо́дна, не исходя́щи от це́ркви Госпо́дни у́бо, и́же а́ще же тре́боваше к братуча́де Свое́й Елисаве́ти хожда́ше то́кмо, близ бо живя́ше и я́ко к сро́дницы Свое́й хожда́ше. Научи́жеся Пречи́стая Богоро́дицы и Преблагослове́нная Мари́я евре́йской кни́зе, жи́ву су́щу отцу́ Ея́ Иоаки́му и бя́ше удо́бна ко уче́нию и лю́бящи уче́ние. И ктому́ уедини́вшися, прилежа́ и упражня́шеся о боже́ственных писа́ниих и о де́лании же во́лньнем, и о льне, и о копри́не пеку́щися. Превзы́де му́дростию и ра́зумом па́че всех и́же в ро́де о́ном отрокови́ц. Я́ко к ней глаго́лати пра́отцу ея́ Соломо́ну: «Жену́ му́жествену кто обря́щет…» и про́чая. Бя́ше же отлуче́но ме́сто в хра́ме Госпо́дни близ ле́выя страны́ же́ртвеника, иде́же стоя́ху деви́цы еди́ны. И́бо други́я деви́цы по собра́нии и отпуще́ния слу́жбы вся отхожда́ху в до́мы своя́. Та́яже еди́на приседя́ше, соблюда́ющи же́ртовник и це́рковь, иере́ом служа́щи.

Афроди́тияна Пе́рсянина: Нрав же Ея́ бя́ше че́стен, ма́ло бесе́дующи и скоропослу́шлива, благоле́пна, благоде́рза ко вся́кому челове́ку, не смею́щиися, несму́тна, не гневли́ва, благопокло́нна, чести́тельна, чту́щи покланя́ющися вся́кому челове́ку, я́коже чуди́тися всем о ра́зуме Ея́ и о бесе́де, во́зрастом сре́дним, русовла́са, о́чи пра́ве, благови́дна, че́рне ве́жди, нос сре́дни име́я, до́лзе руце, до́лги пе́рсти, долга́ ли́цем, благооде́ждна, не тщесла́вна, не образу́ющися, не крася́щися, оде́жды багря́ны лю́бящи носи́ти. И свиде́тельствует омофо́риос (омофо́рион) Ея́, си́речь раменоно́сец: тка́ше же иере́ом оде́жды, ре́кше хра́му Госпо́дню, пребыва́ющи в моли́твах, и в чте́нии, и в посте́. Я́ко украше́ния ра́ди дел устрое́ния мно́гим жена́м бы́ти ей наста́вницы, су́щей Богоро́дицы и при́сно Благослове́ней Мари́и.

Варфоломи́ево: Бы́вши же Ей двана́десятем ле́том, бысть во еди́ну от но́щий, моля́щися Ей, при две́рех же́ртвеника в полу́нощи све́ту восия́ти па́че све́тлости со́лнечныя, и глас от олтаря́ изы́де, глаго́лющий: «Роди́ши Сы́на Моего́». Она́же умолче́, никому́ же пове́давши та́йну, до́ндеже Христо́с вознесе́ся.

Иполи́тово: Ави́я же архиере́й роди́ Иода́я, его́же нарица́ху Варахи́ю. Сей роди́ Агге́я и Заха́рию, и ти́е свяще́нницы, и взят Заха́рия Елисаве́ть, братуча́ду Богоро́дицы и живя́ху в Вифлее́ме. И роди́ Елисаве́ть Крести́теля Иоа́нна, Агге́й же, брат Заха́риев, роди́ дщерь и́менем Соломи́ю, и взят ю́ Ио́сиф, древоде́ль, пре́жде обруче́ния Пречи́стыя Богоро́дицы, сын Или́ев, Иа́ковов. Сий у́бо Иа́ков бя́ше от коле́на Соломо́нова или́ же от коле́на Матфа́нова, я́коже пре́жде рече́ся, братуча́д си́й Мари́и Богоро́дицы, и роди́ от Саломи́е сы́ны четы́ри: Иа́кова апо́стола, и́же и по пло́ти нарица́ется брат Госпо́день, и Симео́н, и́же Си́мон, Иу́ду апо́стола и Оси́ю, и дще́ри Есфи́ру и Ма́рфу. У́мре же Сало́ми жена́ его́, и пребыва́ше Ио́сиф во вдовстве́ и целому́дрии, ле́том сый се́дмьдесять, бога́тством нищь, хи́тростию древоде́ль изря́ден, пребыва́я во гра́де Галиле́йстем Назаре́те. Пречи́стая же Мари́я бя́ше во Иерусали́ме в дому́ Госпо́дни и, бы́вше Ей ле́том четырина́десять, невме́стно бе Ей бы́ти в дому́ Госпо́дни лу́нныя ра́ди не́мощи и же́нскаго естества́.

Иа́ковово: Архиере́и е́же о Пречи́стей сей Мари́и и Богоро́дицы сове́т сотвори́вше, ста́ша в моли́тву, и Заха́рия оте́ц Иоа́нна Крести́теля взят двана́десять жезл ста́рец свяще́нник и поста́ви их в же́ртвенице глаго́ля: «Покажи́ Го́споди Бо́же зна́мение, кому́ бу́дет Де́вая». Приимы́й в число́ двана́десятих жезл и от сро́дник Де́выя же́злы, и моля́щимся им, и прорасте́ си́це пресла́вне сух и непосажде́н жезл Ио́сифа древоде́ля. И про́чее суд Бо́жий обручи́ ему́ братуча́ду, Де́вую Мари́ю. Прия́т же Ея́ Ио́сиф от руку́ Госпо́дню, и сведе́ Ю́ в дом свой и́же в Вифлее́ме, гра́да галиле́йскаго Назаре́фа высоча́йше же есть ме́сто Иерусали́мско от всех мест. И́же та́мо преда́ст ей дще́ри своя́, Есфи́ру и Ма́рфу, упрему́дрити и вразуми́ти их я́коже и себе́. Се же все бысть во е́же утаи́тися хитреца́ зло́бе дия́вола, дре́вле назира́ющу Де́вы, отне́леже слы́ша проро́ка, глаго́люща: «Се Де́вая во чре́ве зачне́т». Отра́зен у́бо бысть обруче́ния ра́ди я́ко наве́тник спасе́ния, началозло́бный змий и блага́го отсту́пник. Сего́ ра́ди обру́чник нари́чется, ку́пно же Де́ву и Богоро́дицу храни́т и недове́дому врагу́ вещь содева́я, я́ко посягну́вша мня его́, а не де́вственика, и не безму́жну Святу́ю Де́ву и Богоро́дицу Мари́ю. Бысть же сове́т иере́ом до обруче́ния, и та́ко пребыва́ше неисхо́дна, сотво́рши же в дому́ Ио́сифове шесть ме́сяц, обы́чне постя́щися Ей. Откры́в ей а́нгел Гаврии́л, повеле́нное та́инство прие́м в ра́зуме (тропарь), изре́к та́инства, и никто́же уве́де бы́вшее от до́му Ея́, ниже́ Ио́сифу пове́да что Богоро́дица, до́ндеже узре́ Сына на небеса́ восходя́ща. Сего́ ра́ди глаго́лет евангели́ст: «И не позна́ Ея́, до́ндеже роди́ Сы́на своего́ пе́рвенца», си́речь не уве́де я́же о ней та́инство Бо́жие, ни зна́яше яже в ней содеваемое, ни разуме́яше боже́ственаго смотре́ния, глаго́л бысть сокрове́нное та́инство. А́ще ли же я́ко по свято́му Васи́лию и Иоа́нну Златоу́сту, я́ко возвраща́ющеся вя́ще от су́щаго, глаго́лют по е́же «се с ва́ми есмь во вся дни да́же и до сконча́ния», еда́ по кончи́не отлучи́тся пра́ведных да не бу́дет. И по е́же «я́ко не возврати́ся го́лубь, до́ндеже не преста́ вода́», та́же возврати́ся. И по е́же «до́ндеже состаре́ется аз есмь», еда́ повнегда́ состаре́тися несть. Или ели́ка подо́бная.

Евсе́вия Памфи́ла: Бе же день неде́льный пе́рвый, е́же есть неде́ля, два́десять пя́таго пе́рваго ме́сяца, пе́рвый же ме́сяц от евре́й нарече́тся март, от него́же и Па́сха обрета́ется, луне́ первой. Сей ме́сяц пе́рвый в ме́сяцех, я́коже кни́га Моисе́ова сказу́ет. Сей пе́рвый день, во́ньже перворо́дный отгна́ся мрак или́ тма, в семь ме́сяцы сотвори́ Бог вся́ческая. И сведе́тельствуют и древеса́ цвету́щая в нем, и Христо́ва страда́ния бы́ша: в том пе́рвый челове́к созда́ся руко́ю Бо́жиею; в том фарао́нския рабо́ты свободи́ Изра́иля Бог, през чермно́е мо́ре проведе́ и па́сху сверши́; и в том Но́е изы́де из киво́та; в нем богопи́саныя скрижа́ли Моисе́й прия́т во уставле́ние киво́та; в нем Гаврии́л Богоро́дицы богому́жнаго строе́ния благове́щение принесе́; в нем Христо́с Бог из ме́ртвых воскре́се тридне́вно; в нем о́бщая кончи́на воста́ние и суд бу́дет.

Иоа́нна Златоу́ста: Се ме́сяц шесты́й, отне́леже Иоа́нна Крести́теля зача́т Елисаве́фь, септе́врия бо ме́сяца в два́десять тре́тий зача́т его́. В седми́ у́бо ме́сяц ре́кше от ма́рта я́ве я́ко септе́врие, в не́мже обновле́ние сенопотче́ния твори́мом и в поклоне́ние киво́та. Вни́де Заха́рия во свята́я святы́х еди́н по зако́ну, и яви́ся ему́ а́нгел Гаврии́л. Отто́ле у́бо ме́сяцы в числе́ пою́тся по лу́нному кру́гу, последи́ бо вмени́шася инди́ктии ме́сяцы от грек. Зря́щи свята́я себе́ в чистоте́ рече́ к Гаврии́лу де́рзостне: Пресла́вное гла́са твоего́ не удо́бь прия́тно души́ мое́й явля́ется.

Евсе́вия Памфи́ла: А е́же рещи́ Святе́й Мари́и ко а́нгелу ка́ко се бу́дет Ми, иде́же му́жа не зна́ю - ре́кше му́жа не жела́ю, жела́ние му́жеско до конца́ не вем, не вем по́хоти плотскы́я: жела́ния му́жеская не имя́ше бо де́вство по воздержа́нию или́ от по́двига, я́ко про́чая целому́дреныя жены́, но от естества́, и́же есть изря́днее от всех жен и стра́нно вся́кого естества́ челове́ческа. И се есть от проро́ка Езеки́иля реч́енное: «Бу́дет Дверь я́же на восто́к заключе́на, и не отве́рзется и никто́же про́йдет сквозе́ Ея́, то́чию Госпо́дь Бог Изр́аилев Еди́н вни́де и изы́дет сквозе́ Ея́, и бу́дет дверь та́я заключе́на». Вси же проро́цы и апо́столи то́жде сведе́тельствуют. Но и отцы́ на́ши и учи́тели и свети́льницы собо́рныя це́ркве то́же соглаша́ют. С ни́миже и святы́й Диони́сие Ареопаги́т рече́: «О Христе́ я́ко ви́деша челове́к челове́ческая творя́ше и свиде́тельствуется е́же от Де́вы рождество́». Святы́й же Афана́сие Алекса́ндрьский и Ле́в Па́па Ри́мский о Ней ре́кше, я́ко похоте́ние му́жеско не уве́де. И святи́и вси правосла́внии собо́ры то́жде сведе́тельствуют. И не то́чию се, но и от евре́й не́цыи сведе́тельствуют, от ни́хже Иа́ков евре́й, и́же бе тогда́ на рождество́ Христо́во, се глаго́лет, я́ко ося́зана бы́вши от ба́бы Пречи́стая Богоро́дица, обре́теся Де́вая я́коже и прежде Рождества́. С си́мже и Руви́м свяще́нник то́жде сотвори́в, ба́бы ра́ди ув́ерися. От е́ллин же н́ецыи глаго́лаху изря́дное нечто обре́теся естество́. Друзи́и же, па́че уста́в есте́ственых бысть, иму́щи богоприя́тну Де́вая утро́бу (икос 3). И восте́к к Елисаве́фи, Младе́нец же, о́ное а́бие позна́в сея́ целова́ние, ра́довашеся и игра́ньми вопия́ше. Пречи́стая же Ма́ти Бо́жия по во е́же преити́ а́нгелову виде́нию, а́бие вскоре взы́де в Вифлее́м к братуча́де свое́й Елисаве́ти. Иуде́я бо, в не́йже есть Вифлее́м, высоча́йше есть ме́сто от Галиле́и, в не́мже бе Назаре́ф. Сего́ ра́ди глаго́лет евангели́ст, я́ко «воста́вши Мариа́м и́де в го́рняя со тща́нием во град Иу́дов и вни́де в дом Заха́риин». Вше́дши же и целова́вши Елисаве́фь, пове́да ей боже́ствена та́инства: Пе́рвое явле́ние а́нгелово е́же в це́ркви, еще́ и благове́щение а́нгелово, и словеса́ я́же рече́ к Ней, я́ко му́жеский пол во чре́ве Ея́. И я́ко Заха́рия а́нгела ви́де в це́ркви сего́ ра́ди умолча́, поне́же Заха́рия не можа́ше бесе́довати, и сам в себе́ та́инства пове́даху, и никому́же пове́даху глаго́ланная им. Пребы́сть же Мариа́м с не́ю я́ко три ме́сяцы и возврати́ся в дом свой. И по трие́х ме́сяцех сни́де Всепе́тая Мари́я в Галиле́ю, в дом свой.

Ле́ту же премину́ему, и утро́бе растя́щей, бу́рю внутрь име́я помышле́ний неве́рных целому́дреный Ио́сиф смути́ся, к небра́чней Тебе́ зря и бракоокра́денну помышля́ше, Непоро́чная. Уви́дев же Ти зача́тие от Ду́ха Свя́та, рече́: Аллилу́ия.

Ио́сиф зря Пречи́стую Деву я́же о ней та́инства не ве́дый, мно́гою печа́лию и срамото́ю тая́ше, помы́сли о́тай отгна́ти ю́ от до́му своего́. А́нгел же возбрани́ ему́ глаго́ля, я́коже рече́ евангели́ст: «Не убо́йся прия́ти Мариа́м жену́ свою́» и про́чая. Случи́жеся тогда́ написа́нию бы́ти от ке́саря А́вгуста, и взы́де Ио́сиф от Галиле́и в Иуде́ю со всем до́мом свои́м. И сы́ны у́бо предпосла́, дще́ре же своя́ и святу́ю Мари́ю сам взем, со осля́тем грядя́ше. И не доспе́вши во Иерусали́м во е́же написа́тися во оби́тели, и́же бе пред Вифлее́мом, иде́же бе село́ братуча́ди Богоро́дице Саломия обита́яше, в не́йже бе пеще́ра и оби́тель воло́м и о́вцам, и в ту нощь роди́ Го́спода на́шего Иису́с Христа́ Пречи́стая и при́сно Де́вая Богоро́дица. Уве́девши же Елисаве́фь доше́ствие их, прии́де к ним и принесе́ им я́же на потре́бу. Ини́и не́цыи от сро́дник их, слы́шавше я́же па́стырие реко́ша, удиви́шася: слы́шаша па́стырие а́нгелы пою́ще.

Лука́ евангели́ст: И в осмы́й день обре́заша отроча́, и наре́кши и́мя ему́ Иису́с, е́же есть Спас. И та́ко возврати́шася в дом свой Назаре́т. Сы́нове же Ио́сифовы возше́д во Иерусали́м, написа́шася: си́речь Иа́ков, Симео́н, Иоси́й, И́уда, cамобра́тницы. И возврати́шася ити́ в Назаре́фь, хотя́щу Симеону от ны́нешняго ве́ка преста́витися преле́стнаго. И сконча́вшимся четы́редесятим днем, возведо́ша роди́телие отроча́ Иису́са во Иерусали́м, я́коже глаго́лет Лука евангели́ст, и предста́виша Го́сподеви с да́ры. И Симео́н ста́рец взы́де ду́хом во святи́лище, и прия́т его́ на руку́ свою́ и рече́: «Ны́не отпуща́еши влады́ко раба́ Своего́ по глаго́лу Твоему́ с ми́ром, я́ко ви́деста о́чи мои́ Спасе́ние Твое́» и пр́очая.

Иоа́нна Златоу́стаго: Во второ́е же ле́то его́ приидо́ша волсви́ от Перси́ды, гра́да Вавило́ня, си́речь от восто́ка со́лнечнаго, ви́девши звезду́ ошу́ю Иерусали́ма, та́ко бо прилежи́т Перси́да ко Иуде́и. Звезда́ же не бя́ше от про́чих звезд, ниже́ от высоты́ про́чих звезд, но ни́жняйшая и никогда́ яви́вшася, я́коже рече́ Иоа́нн Златоу́ст.

Ипполи́тово: И́род же во днех о́нех имя́ше дома́шнюю брань с Саломи́ю, друго́ю жено́ю свое́ю, дще́ри су́щии Урка́ну архиере́я и с сы́новы ея́: Алекса́ндром и Аристову́лом. И жену́ у́бо уби́в, боя́ся сыно́в ея́, бежа́ и сни́де в Рим к ке́сарю. И сотвори́ та́мо две ле́те, и прия́т власть па́ки отту́ду, возврати́вся, удави́ в реце́ сы́ны своя́. Архе́лу же то́кмо оста́ви своего́ сы́на, отроча́ еще́ ссу́щая и имя́ше с собо́ю. И́мже ра́ди сего́ я́же от волхво́в рече́нная, в забы́тии премину́. Упраздни́вшуся у́бо и воспомяну́вшу, я́ко от волхво́в пору́ган бысть, не возврати́вшимся к нему́, я́коже испыта́ от них вре́мя я́вльшияся звезды́, гне́вом ве́лием разже́гся и сотвори́ детоуби́тие в Вифлее́ме. По двою́ ле́ту по се́мже, служа́щу Заха́рию, отцу́ Предте́чеву, уби́ша во́ини внутрь це́ркви Иерусали́мстей. Елисаве́фь же в Вифлее́ме бя́ше тогда́, взе́мши Иоа́нна, бежа́ в пусты́ню и кры́яся четы́редесять дни в пеще́ре. Иоанн убо та́мо воспита́вся, пребыва́ше в пусты́ни до дне явле́ния своего́ ко Изра́илю.

Ипполи́тово: Во вре́мя же о́но по открове́нию а́нгелову восия́ в Еги́пте просвеще́ние и́стинне, отгна́л еси́ лжи тму. Ио́сиф бежа́ во Еги́пет с сы́ны свои́ми, и с дще́рми свои́ми, и с Пречи́стою Богоро́дицею, и с ро́ждшемуся из Нея́ Христу́. Сотвори́ пять лет и па́ки открове́ния ра́ди отлучи́ся отту́ду, возврати́ся и прии́де во град Галиле́йский Назаре́т. И поя́ сестру́ Ея́ Мари́ю брат его́ Клео́па, и́же Кло́па со Ио́сифом я́ве от еди́ныя ма́тере и от Иа́кова и роди́ от нея́ Симео́на. Сей у́бо Симео́н по Иа́кове бра́те Госпо́дни епи́скоп бысть во Иерусали́ме при Доментиа́не цари́ Ри́мстем, по мно́зех му́ках и по́слежде ра́спят бысть, ле́том сый сто и два́десять. Иа́ков же сын Ио́сифов име́ жену́ за две ле́те и уме́рши ей и́ну не поя́т. Иу́да же брат его́ роди́ два сы́на: Зои́ра и Иа́кова, сице нарица́емых. Сии предста́вше Доментиа́ну царю́ Ри́мскому доброде́тели их ра́ди, и прему́дрости, е́же на христиа́ны гоне́ние уста́виша. Иа́ков же и Иу́да бра́тия Госпо́дня в числе суть двуна́десяти тых апо́стол. Иоси́й же и Симео́н и ти́и взе́мше жены́. Есфи́ра же пребы́сть с Пречи́стою Богоро́дицею вся ле́та. Иоси́й же еще́ ссу́щу ему́, у́мре ма́ти его́. И воспита́ его́ Мари́я дщи Соломи́ина, братуча́ди Пречи́стыя Богоро́дицы. На вся́кый же пра́здник Па́схи исхожда́ху от Назаре́та во Иерусали́м. И́мже и двана́десятим ле́том бы́вшу Иису́с Христу́, и возше́дшим им во Иерусали́м. Уве́ден бысть от мно́гих, и чу́ден бысть ра́зумом и прему́дростию, и мн́огих ужаси́. Егда́ обрето́ша Его́, я́коже рече́ евангели́ст, посреде́ учителе́й седя́ща, и послу́шающа Его́, и вопраша́юща их. Бе же красе́н виде́нием зело́, я́коже проро́к рече́: «красе́н добро́тою па́че сыно́в челове́ческих», я́коже самови́дцы и служи́телие Cло́ву бы́вше и зри́телие и сожи́теле святи́и апо́столы, от зача́ла и свы́ше преда́вше Це́ркви, преписа́ша боже́ственое Его́ воображе́ние: Благ во́зрастом, троела́котен, ве́ждама леп, о́чи красны́, нос долг име́я, власы сомле́ны, наведе́н, леп ви́дом, браду́ черну́ име́я, лице́ сре́днее: ре́кше ни бело ни черве́но, по ма́тернему подо́бию, пе́рсты до́лги, благогла́сен, сладкобесе́ден, незло́бив, кро́ток, молчали́в, долготерпели́в, мно́жайшия доброде́тели умноже́ния име́я, в и́хже подо́биих боже́ственый Его́ о́браз пи́шется, да не мне́нием скро́вным или́ преложе́ным измене́нием в боже́ственом словеси́ вочелове́чение мни́тся по манихе́йскому бляде́нию.

Феодо́сия иере́я: По пе́рвых же ле́тех обы́чай бе иуде́ом, по равночи́сленех словесе́х и́же от нас глаго́лемым, два́десять и два иере́й в це́ркви бя́ху. Те́мже и богодохнове́нныя кни́гы два́десять и две нари́чутся, сви́ток у́бо кни́жен бя́ше в це́ркви лежа́, в не́мже написа́шеся коего́ждо иере́я и́мя, и отца́ его́, и м́атере его́ - си́речь два́десять и двема́ иере́ома имена́. Еди́ному у́бо уме́ршу иере́ю, и про́чим собира́хуся в це́рковь и исчита́ху, ре́кше избира́ху, в ме́сто уме́ршаго иере́я друга́го поста́вити, наполня́юща два́десять и двема́ иере́ома число́. И написова́ху на сви́тце я́ве, я́ко еда́ в кий день у́мре о́нсица и о́ного сын и в ме́сто его́ поста́вися о́нсица. Сему́ у́бо обы́чаю держа́щу, прилучи́ся по вре́мени, я́коже Иису́с во Иуде́и хожд́аше, умре́ти еди́ному от два́десятих и два иере́й, пре́жде да́же не наче́ншу Иису́су явля́ти Себе́ и учи́ти и ве́ровати челове́ком в Него́. Собра́шася у́бо про́чии иере́и избра́ти друга́го иере́я в ме́сто уме́ршаго, и кому́ждо бесе́дующу нарица́емаго досто́йна бы́ти про́чии сего. А́ще дово́лен есть в доброде́телии ея́же ра́ди до́лжен есть бы́ти иере́й искуша́ху и а́ще мудр есть и по обы́чаех проро́ческих. А́ще ли неве́жда и неразу́мен бя́ше, не поставля́ху его́ иере́я. И та́ко мно́гим иере́ом нарицающим, еди́н не́кто иере́й воста́ посреде́ и рече́ к про́чим: «Мно́зи от вас иску́шени бы́вше иере́йству? Прие́млете ли убо и мене́, да реку́ о еди́ном челове́це, подо́бну поста́витися в ме́сто уме́ршаго иере́я. Мню у́бо ни еди́н отрече́тся моего́ нарица́ния». Повеле́вшим про́чим иере́ом рещи ему́, его́же хо́щет в ме́сто уме́ршаго иере́я друга́го бы́ти иере́я. Отвеща́в и рече́: «Хощу́ и аз, а́ще во́ля есть Бо́жия и ва́ша, Иису́са сы́на Ио́сифова древоде́ля. Я́ко а́ще и млад есть во́зрастом, но прему́дростию стар есть и сло́вом и житие́м, обы́чаем же благ и кро́тостию украше́н. И мню ни еди́ного когда́ от челове́к такова́ явля́ше или́ в житии́ или́ в сло́ве или́ по обы́чаю, яко́в же Сий есть. И ве́мы и мы вси живу́щии во Иерусали́ме Сего́, ве́дома су́ща и всем изнача́ла незазо́рна». Слы́шавше же сло́во про́чии архиере́и, зде прие́мша му́жа и утверди́ша нарече́ние приле́жно бы́ти, и па́че вся́кого челове́ка Иису́са ре́кши досто́йна бы́ти в поставле́ние свяще́ничества. Нецыи же о нем глаго́лаху не бы́ти Ему́ от коле́на Леви́ева, но от коле́на Иу́дова бы́ти Ио́сифова мня́ще бы́ти сы́на Иису́са. Та́ко бо во иуде́ех слы́шашеся Ио́сифу бы́ти от коле́на Иу́дова, а не от коле́на Леви́ина. Возбраня́ху поста́вити его́ архиере́и. Иер́ей же, назва́вый его́, и́же нареки́й досто́йна бы́ти Иису́са во иере́йство, отвеща́в рече́ к ним: «Смеше́н есть род его, и пе́рваго в родо́х дре́вних слы́шася яко размеше́ние бысть. Во обои́х коле́нох и от Иу́ды бы́ти Ио́сифов род». Се слы́шавше и про́чии иере́и го́де им бысть нарече́ние. И о́бщим сове́том вси соше́дшеся иере́и восхоте́ша в ме́сто уме́ршаго иере́я Иису́са поста́вити. Обы́чаю же иму́щу не то́чию иере́ово и́мя написа́ти в сви́тце ко́жном, но и о́тче, и ма́терне. И ре́ша не́цыи от них: «Подоба́ет пе́рвее призва́ти роди́телие и от них уве́дети и́стинно, а́ще есть тех сын и́же во свяще́нничество приведе́ный». И уго́дно бысть всем. Нареки́й у́бо Иису́са иере́й глаго́лаше уме́рша бы́ти отца́ Иису́сова, мня́ще Его́ сы́на Ио́сифова бы́ти, то́чию ма́терь Его́ жи́ву. Реко́ша у́бо вси привести́ ма́терь Иису́сову в собо́р и уве́дети от Нея́, а́ще Ма́ти есть Иису́сова или́ а́ще Та роди́ Его́, и и́мя му́жу слы́шати, от него́же роди́ Его́. И ре́кше вси призва́ти ма́терь его́, и реко́ша ей: «Поне́же о́нсица иере́й у́мре сын о́ного и хо́щем в ме́сто о́ного сотвори́ти Сы́на Твоего́ иере́я. Обы́чай же есть написа́ти не токмо имя бы́вшаго иере́я, но и о́тче и ма́тернее. Рцы нам, а́щ́е есть Сын Твой Иису́с, и а́ще Ты родила́ еси́ Его́, и и́мя му́жа, от него́же роди́ся». Мари́я же сия́ слы́шавши, отвеща́в иере́ом глаго́лющим, я́ко у́бо «Сын Мой есть Иису́с, испове́дую и я́ко Того́ Аз роди́х, и свиде́тельствуют ми прилучи́вшеися и обре́тшеися жены́, ражда́ющи Ми Того́. Я́ко на земли́ отца́ не и́мать извеще́ние прииме́те от мене́, я́коже хо́щете, я́ко Де́ва есмь. И в Галиле́и пребыва́ющи ми, а́нгел Бо́жий предста́ Ми, бдя́щей неспя́щей, глаго́ля мне: «Аз есмь и́же си́лы Бо́жия арха́нгел Гаврии́л, и по́слан есмь принести́ Ти благове́щения ра́дость». И вшед в клеть, иде́же бех, благовести́ Ми от Ду́ха Свя́та роди́ти сы́на и нарещи́ и́мя Ему́ Иису́с. Дивя́ще же Ми Ся о сем и отвеща́ющи Ми к нему́: «Ка́ко бу́дет ми сие́, поне́же му́жа не зна́ю и я́ко вся́кая жена́ рожду́». То́йжде си́лы Госпо́дня арха́нгел отвеща́ ми: «Не та́ко бу́дет о Тебе́ Мариа́м, но Дух Святы́й на́йдет на Тя и си́ла Вы́шняго осени́т Тя. Те́мже и рожде́ное Свя́то нарече́тся, Сын Бога Вы́шняго». Де́ва же по рождестве́ па́ки пребыва́ю, и да́же доны́не, и, ро́ждьши Ми, де́вою есмь». Сия слы́шавше иере́и удиви́шася. Приидо́ша же и обре́тшаяся, и́же ви́девша Ту ражда́ющу, свиде́тельствующа, я́ко сын Ея́ есть Иису́с. И ужа́сни бы́вше иере́и о глаго́лемых о Мари́и и от сведе́тельствующих. И о рождестве́ ея́, ре́кше: «Поне́же восхоте́ся нам сотворит́и Сы́на Твоего́ иере́я, рцы нам Мариа́м, не обину́яся, я́ко да от уст Твои́х слы́шим, кого́ и чий есть, я́ко да та́ко напи́шем Его́. Ко́их у́бо а́ще рече́ши нам роди́теля, сих а не други́х напи́шем». Она́ же отвеща́вши и рече́: «Я́ко и́стинну реко́х вам и па́ки глаго́лю, свиде́тельствующии со́вести мое́й, я́ко не лжу: Аз Его́ роди́х, отца́ же Его́ не вем, но от а́нгела слы́шах Сы́на Бо́жия бы́ти Его́. Сын Мой есть нарица́емыя Мари́я и Сын Бога Вышняго. И ма́ти бы́вши, де́вою па́ки есмь». Сия́ слы́шавше иере́и, принесо́ша сви́ток ко́жный и написа́ша си́це: «Поне́же о́нсий в сий день у́мре о́нсица иере́й, сын о́нсица и о́ного, и бысть в ме́сто его́ о́бщим сове́том на́шим иере́й Иису́с, Сын Бо́га Вы́шняго и Мари́и при́сно Де́выя». Сей же сви́ток принесе́н бысть от це́ркве со тща́нием от и́же нача́льствующаго во иуде́их, лежи́т в Тивериа́де.

Ио́сифово, писа́теля плене́нию Иерусали́мскому: Пи́шет же Ио́сиф, списа́тель плене́ния Иерусали́мскаго, си́це глаго́ля, я́ко Иису́с в це́ркви свяще́нники освящева́я.

Лучино́ (Луки́ Евангели́ста): Егда́ вни́де Иису́с по обы́чаю Своему́ в день субо́тный в собо́рище иуде́йско и вда́ша ему́ кни́гу Иса́ии проро́ка, и отве́рз кни́гу обре́те ме́сто, иде́же напи́сано: «Дух Госпо́день на Мне Его́же ра́ди пома́за Мя благовести́ти ни́щим, посла́ мя исцели́ти сокруше́ныя се́рдцем, пропове́дати плене́ным оставле́ние и слепы́м прозре́ние». Пишет бо я́ко вся церко́вныя степе́ни проити́ Го́споду на́шему Иису́су Христу́, си́речь четцу́, иподиа́кону, диа́кону, иере́ю, и архиере́ю. И про́чая проро́чествия о сих свиде́тельствих увере́нно, поне́же а́ще не бы прия́л чин иере́йский от иуде́й Госпо́дь наш Иису́с Христос, не бы́ша в собо́ре да́ли ему́ кни́гу чести́ посреде́ лю́дий. Ни бы освящева́л скверне́ных, я́коже Ио́сиф пр́ежде рече́нный рече́.

Иоа́нну же су́щу в пусты́ни три́десять и еди́но лето иму́щу, начина́емым ле́том, си́речь от септе́врия ме́сяца, бысть к нему́ сло́во Госпо́дне о креще́нии. И прии́де в Иуде́ю и в Галиле́ю, пропове́дуя креще́ние покая́ния во оставле́ние грехо́м, а не в Дух Святы́й. Еще́ у́бо не бе Дух Святы́й пропове́дан о нем, поне́же Иису́с, я́коже глаго́лет Иоа́нн Богосло́в, не бе просла́вился. Зря́ще же лю́дие житие́ его́ стра́шное и чу́дное, после́доваша ему́ мно́зи и бы́ша ем́у ученицы́. В ни́хже бе Андре́й от Вифсаи́ды, гра́да Галиле́йска, Иоа́нн от Зеведе́я гра́да. Архиере́и е́же иуде́йстии слы́шавше о Ио́анне и о уче́нии его́, о́ви глаго́лаху, я́ко Христо́с есть, о́ви же я́ко несть - и ра́спри бы́вше мно́зе посреди́ их. О глаго́ле сем посла́ша ко Иоа́нну и вопроси́ша его́, я́коже глаго́лет во Ева́нгелии.

Иоа́нн Богосло́в: Ты что глаго́леши о себе́? И отвеща́: «Я́ко несмь аз Христо́с, но аз глас вопию́щаго в пусты́ни. Созади́ же мене́ гряды́й посреде́ вас стои́т» и про́чая. Ищи́ во Ева́нгелии, и́стиннее уве́дети. Бысть же день и приидо́ша лю́дие мно́зи и нача́льницы на Иорда́н ко Иоа́нну и креща́хуся от него́, испове́дающе ему́ грехи́ своя́. Иоа́нну люди уча́щу и оглаша́ющу во стране́ Вифава́ре, об он пол Иорда́на, прии́де Иису́с и крести́ся от него́. Име́я и той лет три́десять, и во осмы́й день изы́де в пусты́ню Иорда́нскую Христо́с, и сотвори́ та́мо дний четы́редесять, я́коже рече́ Евангели́ст. И па́ки возврати́ся ко Иоа́нну, и я́коже ви́де его́ Иоа́нн, гряду́ща к нему рече́: «Се а́гнец Бо́жий, взе́мляй грехи́ ми́ру. Ви́дех бо Дух Бо́жий сше́дши с небесе́ и пребыва́ющь на Нем. И глас слы́шах глаго́лющь: Сей есть Сын Мой возлю́бленный», - и слы́шаху наро́ди и дивля́хуся. Во у́трии же па́ки ви́де Иоа́нн Иису́са ходя́ща и глаго́ла о нем: «Се А́гнец Бо́жий и Сын Оте́чь». И слы́шавше ученицы́ его́: Андре́й и Иоа́нн, оста́виша его́ и после́доваша Иису́су. И приидо́ша с Ним в оби́тель, я́коже глаго́лет евангели́ст, я́ко ре́ша ему́: «Учи́телю, где пребыва́еши?». Он же рече́ им: «Прииди́те и ви́дите». Они́ же прише́дше, пребы́ша у Него́ день он, час же бе я́ко деся́тый. И поиска́в же Андре́й бра́та своего́ Си́мона, и обре́т его́, и приведе́ ко Иису́су. И слы́шав Иису́с, я́ко пре́дан бысть Иоа́нн во у́трии прии́де в Галиле́ю с треми́ ученики́ Свои́ми. И обре́т Фили́ппа, улови́ его́, ре́кше приведе́, и он па́ки Нафана́ила. И приидо́ша в Ка́ну Галиле́йску, и в тре́тий день брак бысть та́мо. И поз́вани бы́ша, и сотвори́ вод́у в вино́. И́мя же жениху́ Си́мон, и́же и по днех ма́лех после́дова Иису́су. И отту́ду прии́де в Вифсаи́ду град Галиле́йский, и внидо́ша в дом, Петро́ву те́щу прише́д исцели́. Воста́в же, возврати́ся в Назаре́т. Ио́сиф Обру́чник Богоро́дицы у́спе, стар испо́лнь дний, я́коже ре́ша не́цыи ле́том сто и де́сять. Сы́нове же Ио́сифовы Иа́ков же и Иу́да после́доваша Христу́. Оба́че вси после́доваша Ему́, по вся гра́ды и страны́ ходя́ща. И пропове́дующе [Ему́] Ца́рствие небе́сное, исцелева́юще всяк недуг и вся́ку боле́знь. Та́коже и те́ща Петро́ва исцеле́вшая, со дще́рию свое́ю, жено́ю Петро́вою, после́доваша Ему́, пребыва́юще с Богоро́дицею.

Ио́сиф: Воздви́жеся отту́де, приидо́ша в Зеведе́ю Галиле́йску, ве́си Вифвсаи́дския, при и́же есть е́зеро имену́емо Гени́са. И́же и Генисаре́фь глаго́лется, в не́йже есть Вапса́м, и чу́дный Виссь, и́же есть бы́лие очервля́я. Нари́чет же ся Гени́са е́зеро окру́гло за изравне́ния кру́глости. Вода́ же ему́ зело́ све́тла и чи́ста, я́ко седмь по́прищь иму́ща о́крест себе́. Ма́сло же чу́дно и вся́кое ово́щие о́крест е́зера и рыб мно́жество. Прише́д же Иису́с, взы́де во град с Ма́терию и со ученики́ свои́ми. Препочи́ у Ио́сифа Зеведе́я, зане́ бе пе́рвый от и́же в Галиле́и наро́читых муж, и́же имя́ше и жену и два сына, Иа́кова и Иоа́нна, и поя́т их ученики́.

Иоа́нна Златоу́стаго: Ма́ти же их мня́щи И́, я́ко о земно́м Ца́рствии возвеща́ет, прося́ше Ему́, я́ко да еди́н одесну́ю Ему́ а други́й ошу́ю Ему́ ся́дут в Ца́рствии Его́. И отту́де изше́дше, приидо́ша в Капернау́м. И исцели́ разсла́бленнаго и ине́х мно́зех, иде́же а́ще бы возле́гл. Исцелява́еми же и пе́рвии от гра́да свое́ю во́лею приноша́ху Ему́ мно́жество бога́тства. И мно́зех оглашава́ху и креща́ху ученицы́ Его́. Иису́с же не креща́ше, но то́чию уча́ше и исцелева́ше боля́щих, а́може а́ще идя́ше. Ио́сиф же Зеведе́й у́мре, и прише́д Иа́ков сын его́, рече́ ко Го́споду: «Повели́ ми поити́, да погребу́ отца́ моего́». И не повеле́ ему́ рек: «Оста́ви ме́ртвыя погреба́ти своя́ мертвеца́». И пома́ле посла́ и о́ба бра́та Иа́кова и Ио́анна, и́же и ше́дше, отца́ у́бо погребо́ша, ма́терь же приведо́ша ко Христу́ - и пребы́сть с Богоро́дицею во вся дни живота́ своего́. Прише́дше ко Го́споду с ма́терию свое́ю, и со ученики́ во Иуде́ю, всюду благовеству́юще и креща́юще, исцелева́ху неду́ги и вся́ку боле́знь. Вше́дши_им же во Иерусали́м, пребыва́ше та́мо дний неколи́ко, бя́ше бо пра́здник сено́вняго потче́ния. И мно́зех просвети́в уче́нием Христо́с во святи́лищи, и торжники́ изгна́, и мно́зех исцели́ разли́чных неду́г, возврати́ся в Галиле́ю. И вшед в Магдалу́ град, жена́ не́кая и́менем Мари́я Магдалы́ни, я́ве я́ко благоро́дна и бога́та зело́, прия́т Его́ в дом свой, я́же имя́ше седмь бесов́, от ни́хже свободи́вшися, я́коже рече́ евангели́ст, слы́шавше сло́во Его́. И ви́девши чудеса́, я́же творя́ше, отре́кшися до́ма своего́ и прише́дши [ко] Христу́, после́довавше Ему́ и бя́ше с Богоро́дицею и с про́чими. Бя́ше же мудра́ и тепле́йша духом па́че всех, я́коже и Петр в муже́х, и от бога́тства своего́ служа́ им. Ученицы́ же и тогда бя́ху число́м си́и: от Вивсаи́ды гра́да два бра́та: Андре́й и Петр; от Зеведе́я гра́да два бра́та: Иа́ков и Иоа́нн; два бра́та Госпо́дня и та́я два: Иаков Алфе́ов, Иу́да Иа́ковль - Ио́сифа бо Обру́чника Богоро́дицы от други́я жены́ бе́ша, сего́ ра́ди нари́чется Алфе́ев; Фили́пп и Варфоломе́й; Си́мон Канани́т си́речь и́же от Ка́ны Галиле́и, и Фома глаго́лемый Близне́ц, Матфе́й евангелис́т, Иу́да преда́тель от Ска́ры гра́да. Разу́мно же я́ко Иоа́нн и Иа́ков, сы́нове Зеведе́еви, по внегда́ умре́ти Ио́сифу отцу́ их, и́же от Зеведе́йскаго гра́да, сим же и Зеведе́й нари́чется, продадо́ша дом свой, и́же в Зеведе́йстем гра́де сущь, и, прише́дше во Иерусали́м, купи́ша святы́й Сио́н, высоча́йша же есть сия́ страна́ во Иерусали́ме об о́ну страну́ Иерусали́ма.

Иоа́нна Памфи́ла: Первосвяще́нницы же тогда на ко́еждо ле́то изменя́хуся, и не наме́стницы быва́ху, но от разли́чных стран. Те́мже и А́нна архиере́й от Катаво́лы бя́ше. Каиа́фа же от Киявити́нския страны́, и́мже той архиере́й в ле́то о́но бысть, испроси́в пребы́сть в купле́нии Иоа́нна Богосло́ва. Сего́ ра́ди евангели́ст рече́, я́ко учени́к он зна́ем бя́ше архиере́ю. Пол у́бо от до́ма даде́ архиере́ю повеле́нием бра́та своего́ Иа́кова в пребыва́ние, в полови́не же угото́ва Па́сху, си́речь ве́черю та́йную в четверто́к вечер со ученики́ и со учени́цами, е́же бо рещи́ Христу: «Иди́те во град к о́нсице», - Иоа́нна Богосло́ва глаго́лет. Та́мо ве́черя сверши́ся. Та́мо бо воспе́вше, изыдо́ша в весь, Гефсима́нии нарица́ему, к го́ре Елео́нстей. Та́мо бо сверши́ша пе́рвое та́инство, апо́столи та́мо бежа́ша стра́ха ра́ди иуде́йска. Та́мо пребыва́ху по воскресе́нии Госпо́дни. Та́мо яви́ся им две́рем затворе́ным и дасть им рек, прииме́те Дух Святы́й. Та́мо уве́ри Фому́ апо́стола показа́в ему́ о́бразы гвозди́нныя и ко́пия. Та́мо поста́виша апо́стола пе́рваго епи́скопа Иа́кова бра́та Госпо́дня, я́коже рече́ евангели́ст глаго́ля. Та́мо пребыва́ше ма́ти Иису́сова со Иоа́нном Богосло́вом, я́коже рече́ евангели́ст глаго́ля: «От часа́ о́ного поя́т Ю́ учени́к он во своя́ си». Та́мо пребыва́ше вси апо́столи, с Богоро́дицею, и с жена́ми, и с бра́тиями, в посте́ упражня́ющеся и на земли́ лега́нием, в моли́твах же, и в слеза́х, и в пе́снех непреста́нных со мно́гою ра́достию. Та́мо явля́яся Христо́с ча́сто, я́коже Лука́ рече́, во мно́зех зна́мениих, за четы́редесяте дний явля́яся им и глаго́ля я́же о Ца́рствии Бо́жии. Мироно́сицы же жены́ бя́ху седмь: Пе́рвая Мари́я Магдалы́ни, втора́я Соломи́и, тре́тяя ма́ти сыну́ Зеведе́ову, Иу́дова же жена́ бра́та Госпо́дня, четве́ртая Мари́я Иа́кова ма́лаго ма́ти, пя́тая Иоси́ева ма́ти, воспита́вшия бр́ата Госпо́дня, шеста́я Ио́анна жена́ Петро́ва, седма́я сестра́ ма́тере Госпо́дня, си́речь Мари́я Клео́пина жена́, сестра́ же Ио́сифова, поне́же Иоаки́м и А́нна друго́е ча́до не сотвори́ша. Сия́ мироно́сицы четы́режды в нощь о́ну приидо́ша на гроб, когда́ же Господь воскре́се не уве́дша. Богоро́дица же еди́ницею и пре́жде с Мари́ею Магдалы́нею ше́дше на гроб. И от а́нгела уве́девше воскре́сша его́, и возврати́вшемася и́ма, сре́те их Госпо́дь и рек: «Ра́дуйтеся» и, уве́рившеся, пребыва́ше ника́коже смути́вшеся. Жены́ же други́я мно́ги благоро́дны, от разли́чных о́бластей пребыва́юще с Богоро́дицею, о́ви от боле́зни свободи́вшася, о́ви же от дух нечи́стых. По вознесе́нии же Госпо́дни и Д́уха Святаго на ученики́ прише́ствие, Иа́ков брат Бо́жий и пе́рвый епи́скоп Иерусали́мский раздели́ им страны́ жре́бием и открове́нием Ду́ха Свята́го. И посыла́я их запове́да, да я́коже учи́т ко́ждо их, да посыла́ет ему́ е́же и творя́ху, я́ко да соглаша́ется пропове́дание Христо́во, и на ко́еждо ле́то приходи́ти им во Иерусали́м в день Па́схы, и пятидеся́тницу вку́пе тем с Богоро́дицею пра́здновати. Стефа́н же первому́ченик по шести́х ле́тех вознесе́ния Госпо́дня ка́мением побие́н бысть. И Па́вел апо́стол по шести́х ле́тех и пол крести́ся, и по трех ле́тех нача́т пропове́дати. И по девяти́х ле́тех, поя́т ученики́ Диони́сия Ареопаги́та, вкупе и Тимофе́я и ине́х, и́же на Успе́ние Пречи́стыя Богоро́дицы приидо́ша от Ефе́са, восхи́щену бы́вшу Па́влу. Ева́нгелие же Матфе́ево написа́ся от него́ по повеле́нию Иа́кова бра́та Госпо́дня и первосвяти́теля на восто́це по осми́х ле́тех вознесе́ния Христо́ва. А е́же от Ма́рка написа́ся от него́ во Александри́и по десяти́х летех. От Луки́ же написа́ся от него́ в Ри́ме по повеле́нию Петро́ву по пятина́десятих ле́тех. А е́же от Иоа́нна написа́ся от Про́хора в Па́тьме по повеле́нию Ио́а́нна Богосло́ва по три́десятих ле́тех вознесе́ния Христо́ва. Ви́девши же Пречи́стая и Пресвята́я Богоро́дица Сыно́вне на небеса́ вознесе́ние, мно́жае Себе́ вда́вши поще́нию и коленопреклоне́нию, [я́коже рече́ Андре́й архиепи́скоп Кри́тский, я́ко да́же и до ны́не ме́сто коле́ном Ея́ на мра́морих свята́го Сио́на суть] и на ка́мени лежа́ние, иде́же ма́ло есте́ственый прие́мля сон. Мно́га же исцеле́ния немощны́м творя́ше и бесну́ющихся от дух нечи́стых свобожда́ше, ми́лостыни же и попече́ния мно́гая творя́ше ни́щим и вдови́цам. И пре́жде пятьна́десяти дней прорече́ о исхо́де Свое́м. И пре́жде трех дней прии́де а́нгел Гаврии́л, предвозвеща́я Ей исхо́д Ея́ и Госпо́дне прише́ствие. И посла́вши, призва́ вся сро́дники Своя́, и сусе́ди Своя́. Сим же прише́дшим, се и апостоли вси приидо́ша на о́блацех, и не́кая словеса́ изрече́ им и та́йны стра́шныя, я́же в се́рдце свое́ влагаю́щи и соблюда́ше. При тре́тием же часе́ дне о́ного гром бысть ве́лий с небесе́, я́ко воня́ благоуха́ния, и се Госпо́дь прии́де на о́блацех со мно́жеством а́нгел и целова́ Мариа́м же и апо́столы. Она́ же ра́дости испо́лнившися, рече́ к нему́: «Благодарю́ Тя, Го́споди Иису́с Христе́, зане́ я́же обеща́л Ми, еси́ испо́лнил». И а́бие преда́сть Пресвяту́ю Ду́шу Свою́ Го́сподеви. Госпо́дь же прие́мь пренепоро́чную и святу́ю Ея́ ду́шу, взы́де на небеса́. Богоприя́тное же те́ло Ея́ ангельскими и апо́стольскими пе́сньми принесе́но и положе́но бысть во гро́бе в Гефсима́нии, на ме́сте же том за три дни а́нгельское и апо́стольское пе́ние пребы́сть непреста́нно. По тре́тием же дни а́нгельскому пе́нию преста́вшу, всем су́щим апо́столом, еди́ному же не доспе́вшу. И по тре́тием дни прише́дшу, и богоприя́тному те́лу хотя́ поклони́тися, отверзо́ша гроб, и те́ло Ея́ у́бо пречи́стое и препе́тое не обретшеся - еди́на же Ея́ погреба́льная обре́тше, от ни́хже неизреченнаго благоуха́ния напо́лнившеся, паки затвори́вше гроб. Ти́и же па́ки о́блаки взя́ти бы́ша, и кого́ждо на свое́м ме́сте поста́виша, иде́же пропове́даше. Исчита́ют же ся ле́та Ея́ си́це: седмию́ лет принесена́ бысть роди́тельми Го́сподеви и сотвори́ в це́ркви лет шесть и ме́сяц шесть. И в дому́ Ио́сифове друга́я ме́сяц шесть, ре́кше на трина́десятое ле́то восходя́щии. В четырена́десятое ле́то благовести́ся Ей всеми́рная ра́дость и в пятьна́десятое ле́то роди́ Го́спода на́шего Иису́с Христа́. И с С́ыном Ея́ Бо́гом на́шим три́десять лет и три. И по е́же на небеса́ вознесе́ния Его́ пребы́сть с Богосло́вом во свято́м Сио́не лет два́десять четы́ри - я́коже ку́пно всех лет се́дмьдесять и два. Ея́же моли́твами Христе́ Бо́же спаси́ душа́ на́ша. [Ами́нь.]