Неделя мироносиц

Сия́ у́бо дне́шняя неде́ля и святы́й день, покло́нна есть и ди́вна и спаси́телна. В сию́ у́бо Го́спода на́шего Иису́са Христа́, боже́ственыя стра́сти воспомина́юще. В себе́ страстьми́ свои́ми умиля́емся, и духо́вно весели́мся, и ра́достию исполня́емся. Единоро́дный бо Сын Бо́жий, во́лею на стра́сти сам прихо́дит, всего́ ми́ра очище́ние и спасе́ние, и предае́т себе́ нас ра́ди. Кля́тва быв, да́же от кля́твы нас и греха́ свободи́т, преблаги́й Влады́ка наш на дре́во кре́стное возноша́ется, и простира́ется и пригвожда́ется безгре́шный. Оба́че же дре́во живо́тное подае́т нам, па́ки рай отве́рз его́же затвори́, пра́дед на́ших преслуша́ние и преступле́ние, предае́т ду́шу Свою́ в ру́ки неви́димаго Отца́, и мертв явля́ется. Но ме́ртвии востаю́т на увере́ние после́дняго и о́бщаго воскресе́ния. Погреба́ется, но воста́ет па́ки, я́ко кре́пок и си́лен. И разруша́ет сме́ртию смерть, и во ад низхо́дит, но возво́дит ду́ша свободи́в я́ от го́ркаго осуже́ния тмы, и от неразреши́мых уз томи́теля дия́вола. На небеса́ восхо́дит, но па́ки прии́дет со сла́вою суди́ти живы́м и ме́ртвым, и возда́ти кому́ждо по дело́м его́. Сия́ же вся на уче́ние не́кое, Бо́жие бысть нас ра́ди, и целба́ неду́га на́шего. Ве́тхаго Ада́ма возводя́ше, отну́дуже отпаде́. И на вы́шшее и боже́ственое житие́ возводя́ и спаса́я. Страстьми́ бо Христо́выми обнови́хомся, и спасе́нию и животу́ свободи́хомся, и та́йнам боже́ственым прича́стницы бы́хом, и даро́в небе́сных и духо́вных наслади́хомся. И прославля́ем и велича́ем, е́же на ны ве́лия и премно́гая ми́лость Бо́жия, и милосе́рдие Его́ неизрече́нное, и безконе́чное. Ева́нгелие. Во вре́мя о́но рече́ евангели́ст Ма́рко, прии́де Ио́сиф и́же от Аримафе́я, благообра́зен сове́тник, и́же и той бе ча́я Ца́рствия Бо́жия, дерзну́в вни́де к Пила́ту, и проси́ те́ло Иису́сово. Пила́т же диви́ся, а́ще у́же у́мре, и призва́в со́тника, вопроси́ его́, а́ще у́же у́мре, и уве́дев от со́тника, даст те́ло Ио́сифови, и купи́в плащани́цу и снем Его́, обви́т плащани́цею, и положи́ Его́ во гроб, и́же бе изсече́н от ка́мене. И привали́ ка́мень над две́рии гро́бу. Толкова́ние. Блаже́ный сей Ио́сиф, еди́н бя́ше от совеща́ния иуде́йскаго, и зело́ наро́чит и бога́т бя́ше, и зако́ну рабо́тая. К тому́ же и Христо́в учени́к бысть, и ве́рова Вонь. Во́лею не явле́нною, и чи́стою мы́слию. Сего́ ра́ди и по сме́рти Христо́ве, после́днее возда́ние Учи́телю подае́т, па́чеже благоразу́мие, и повинова́ние и чи́сту ве́ру. Прии́де же к Пила́ту и моли́ся ему́ о ме́ртве обо́лгану враги́, и осуже́ну и распя́ту. От учени́к же и друг свои́х оста́влену бы́вшу, и презре́ну во вре́мя стра́сти. Всем у́бо стра́хом и боя́знию уде́ржаном бы́вшим, свои́м дома́шним ученико́м, и всем разбе́гшимся. Еди́н то́кмо Ио́сиф, тае́мый пре́жде учени́к Христо́в, безбоя́знен обре́теся и дерзнове́нен. Пра́ведник рече́ я́ко лев упова́ет. Те́мже и дерза́нием похва́лным и ди́вным дерза́ет. Ниже́ бо рече́ в себе́ благообра́зный сей, и честны́й и благогове́йный, и доброде́телный муж, я́ко бога́т есмь и просла́влен. Да а́ще попрошу́ те́ло осуже́ннаго томле́нием, и распе́ньшагося Христа́. Отпа́сти и́мам от сла́вы и бога́тьства, и по́чести лиши́тися и́мам, и обо́лган бу́ду от иуде́й, и от со́нма отлуче́н бу́ду. Но вся сия́ нивочто́же положи́в, и презре́в вся види́мая, и са́мое те́ло свое́ я́ко чу́же презре́в любве́ ра́ди и испове́дания, и ве́ры ра́ди Христо́вы. И испроси́ погребсти́ те́ло Иису́сово. Пила́т же удиви́ся, зане́ в трех часе́х Иису́с у́мре. Ве́дяше бо я́ко никто́же та́ко вско́ре умира́ет. Того́бо ра́ди и о́ного мно́го жда́ти и терпе́ти мня́ше, я́коже и разбо́йники. И призва́в со́тника , и вопраша́ше его́ а́ще у́же у́мре. И изве́щшуся от со́тника, я́ко у́мерл есть, послу́ша Пила́т ти́хостию, о не́мже благочести́вно проси́ Ио́сиф, и дарова́ ему́ те́ло. Боже́ственая бо си́ла споспе́шьствовавше Ио́сифу, и пила́тову злонра́вную и жесто́кую ду́шу умякчева́ше. И прие́м те́ло Ио́сиф, купи́ плащани́цу. И сняв Его́ со дре́ва, и обви́в И́ плащани́цею, и с Никоди́мом ку́пно, и тому́ су́щу ученику́ Христо́ву, сокрове́ну же и тому́ стра́ха ра́ди иуде́йска, честно́е и пречи́стое те́ло о́но Влады́чнее, че́стно и благогове́йно и со стра́хом погреба́ют. Совеща́тель же са́ном бя́ше Ио́сиф, я́коже рече́но бысть. Па́чеже служе́ние о́бщее имя́ше и тяготу́ гра́жаньску, е́же иму́ще и се́, понужа́ются о исправле́нии торжебьства́ промышля́ти, доброде́тели же и блага́я де́ла забыва́ют, и мно́зи мно́жицею в напа́сти впа́дают, злодея́ния ра́ди торже́бнаго, и тяготы́ ра́ди вины́ сея́. Ио́сифа же ничто́же повреди́ от доброде́тели совеща́тельства сан, ниже́ тягота́ и содержа́ние гра́жаньское, не бысть поврежде́ние благодея́нию, и пресла́вному и блаже́нному погребе́нию Христо́ву. Да слы́шат у́бо бога́тии, и о ца́рьских ве́щех упражня́ющеися, и от блага́го де́ла да не остаю́тся. Положи́ же Ио́сиф честно́е и Влады́чнее о́но те́ло во гро́бе, и́же бя́ше изсе́чен от ка́мени, и привали́ ка́мень ве́лий вы́ше его́. Ева́нгелие. Мари́я же Магдалы́ни, и Мари́я Ия́ковля, зря́сте где Его́ полога́ху. И мину́вши субо́те, Мари́я Магдалы́ни, и Мари́я Ия́ковля, и Соломи́и, купи́ша арома́ты, да прише́дше пома́жут Иису́са. Толкова́ние. Ну́жно у́бо бя́ше и пребы́тие и жада́ние жен я́ко ви́дети, и уве́дети где полага́ется Христо́с. Да́же прише́дше ска́жут ученико́м, и Воскресе́ния благове́щение и ра́дость принесу́т, род у́бо же́ньский е́же па́че осуже́н бысть в раи́, прельще́ния ра́ди змии́наго. Сей пре́жде прие́млет благо́е причаще́ние и виде́ние. Пребы́шаже вся спосле́довавшая жены́ от Галиле́я. Тепле́йше же па́че Магдалы́ни Мари́я, и Ма́ти Госпо́дня. Я́же Мари́я Ия́ковля нарица́ется. И ма́ти сыно́в зеведе́овех, я́же бя́ше Соломи́и. Си́и бо мно́жае прилежа́ние сотвори́ша. И ве́лию хра́брость и терпе́ние, во вре́мя стра́сти и на погребе́нии Христо́ве показа́ша. Егда́ у́бо ученицы́ вси бежа́ша люби́мии и зна́емии, сия́ терпе́нием и мно́гим усе́рдием ожида́ют ви́дети вся. Егда́ же бо ми́мо и́де субо́та, и не возбраня́еми бя́ху зако́ном, в субо́ту у́бо не повелева́ше зако́н, ниже́ оставля́ше де́лати что. Угото́ваша арама́ты, и приидо́ша на гроб пома́зати Иису́са. Не у́бо му́дрствоваху жены́ высо́кая и ве́лия, ниже́ боже́ствена и досто́йна Го́спода Иису́са Божеству́. Сего́ ра́ди при гро́бе седя́т и ожида́ют и купова́ют ми́ро. Я́ко а́ще преста́нет, и утоли́тся неи́стовьство беззако́нных муж, ити́ и полия́ти Христа́. И по обы́чаю жидо́вьскому пома́зати те́ло Его́, я́ко да благоуха́нно пребу́дет и несогни́то. Сухо́тну бо не́кую си́лу и́мать ми́ро, и мокроту́ теле́сную испива́ет, и соблюда́ет и́. И сохраня́ет несогни́тно, такова́я сму́дрствоваху жены́ о Христе́. И зело́ зау́тра во еди́ну от субо́т, си́речь, пе́рвый день от неде́лных дней, субо́ты бо вся дне́вы нарица́ху иуде́и. Еди́ну же от субо́т пе́рвую, си́речь неде́лю, воста́вше приидо́ша на гроб, и смышля́ху кто отвали́т им ка́мень. Ели́коже такова́я смышля́ху, а́нгел отвали́ ка́мень. Ева́нгелие. И рече́ жена́м, не ужаса́йтеся, Иису́са и́щете назаряни́на, распя́таго. Воста́, несть зде. Се ме́сто иде́же положи́ша Его́. Толкова́ние. Пре́жде бо избавля́ет а́нгел жены́ от стра́ха мно́гаго, его́же име́яху. Пото́м же и о Воскресе́нии благовесту́ет. Распя́та же Христа́ нарица́ет, не срамля́етбося Креста́. Поне́же сей есть спасе́ние челове́ком, и благи́м всем глави́зна. Воста́ рече́ а́нгел он я́вльшийся, несть зде Госпо́дь. А́щелиже хо́щете уве́ритися, се ме́сто иде́же положи́ша И́. О сем бо и ка́мень отвали́ а́нгел, да́же пока́жет. Ева́нгелие. Но иде́те, рцы́те ученико́м Его́ и Петро́ви, я́ко варя́ет вас в Галиле́и. Та́мо Его́ ви́дите, я́коже рече́ вам. И изше́дше, бежа́ша от гро́ба. Имя́шеже их тре́пет и у́жас. И никому́ же ничесо́же ре́ша, боя́хубося. Толкование. От про́чих учени́к отлуча́ет Госпо́дь Петра́. А́ще бы́ша пришли́ жены́ и рекли́ про́сто та́ко, я́ко повеле́но бысть нам рещи́ ученико́м. Рекл бы Петр, я́ко аз отверго́хся, и про́чее учени́к несмь Его́. Отри́нубо мене́, и омрази́ мя Госпо́дь. Сего́ ра́ди прилагае́т, и Петру́ на и́мя рещи́, да́же не соблазни́тся и оскорби́тся Петр. Я́ко не сподо́блься сло́ва от Влады́ки и той, поне́же отрече́ся. И се́го ра́ди не сочета́тися ученико́м достои́н есмь рекл бы. В Галиле́ю же посыла́ет ученики́ Госпо́дь. От молвы́ и от мно́гаго стра́ха иуде́йскаго изво́дя их, и свобожа́я их от вся́каго стра́ха и смуще́ния. Удержа́ же жены́ страх и у́жас, си́речь, удивле́ние и виде́ние а́нгела стра́шнаго Воскресе́ния. И никому́ же ничто́же ре́ша, боя́хубося. И жидо́в боя́хуся жены́, и е́же от виде́ния стра́хом содержи́ми, ума́ погуби́ша. И сего́ ра́ди никому́же ничто́же ре́ша, забы́вшим не́кая я́же от а́нгела слы́шаху. Мы же послу́шающе сия́, и те́плою и чи́стою ве́рою разсмотря́юще, внутрь в мы́слех серде́ц на́ших полага́ти незабве́но потщи́мся. И други́м пропове́дати потщи́мся Христо́во Воскресе́ние. И поклони́мся и просла́вим воскре́сшаго Христа́ Бо́га на́шего. Благодари́м пострада́вшаго нас ра́ди и погре́бшася, и воскресе́ние нам исходата́ившаго. Благодари́м поне́сшаго не́мощи на́ша, и изба́вльшаго нас го́ркаго томле́ния дия́воля, и наве́т его́ и озлобле́ния. Благодари́м промышля́ющаго, и и́щущаго при́сно на́ше спасе́ние и исправле́ние. Угоди́м Бо́гови ве́рою чи́стою и благи́ми де́лы, и покая́нием, и испове́данием, мно́жицею бо и покая́нием еди́ным прие́млет нас Госпо́дь, я́коже и на мно́гих се́ показа́л есть. Пи́шетбося о постя́щихся, и ви́де Бог я́ко раска́яся ко́ждо от зло́бы своея́, и отступи́ от пути́ своего́ лука́ваго. И раска́яся Бог о зло́бе, е́же хотя́ше сотвори́ти им. Грех ра́ди на́ших предае́т нас человеколю́бец, и пра́ведный судия́ Бог, супоста́том на́шим не на погубле́ние, но в наказа́ние и исправле́ние. Я́коже Иереми́ем проро́ком глаго́лет. Дерза́йте лю́дие мои́ па́мять изра́илева. Пре́дани бы́сте язы́ком не на погубле́ние, зане́же прогне́васте Бо́га, пре́дани бы́сте супоста́том, раздражи́сте бо раздражи́вшаго вас. И Иса́ия па́ки глаго́лет. Кто даде́ на расхище́ние Ия́кова Изра́иля промы́сленником их. Не Бог ли Ему́же согреши́ша, и не восхоте́ша в путе́х Его́ ходи́ти, ниже́ послу́шати зако́на Его́. И приведе́ на них гнев я́рости Своея́, и укрепи́ся на них брань. Сего́ ра́ди ве́дети до́лжни есмы́, я́ко грех ра́ди на́ших пре́дани быва́ем в ру́ки враг беззако́нных, и томле́ни быва́ем и́ми. И ничто́же от случа́ющихся нам ско́рбных и се́тованных непра́ведно прихо́дит на́ ны, но вся по пра́вому суду́ Бо́жию. И непра́вды на́ша приноша́ют нам, зла́я вся. Поне́же бо от Го́спода вся пра́ведна суть. Самовла́стни бо есмы́, своему́ спасе́нию и погубле́нию. Я́коже пи́шется, я́ко Бог искони́ сотвори́ челове́ка, и оста́ви его́ в руце́ сове́та его́. И пред челове́ки есть живо́т и смерть, искони́ у́бо благи́м блага́я созида́хуся, лука́вым же лука́вая. И Ада́м и Е́вва пра́отцы на́ши, зане́ преступи́ша за́поведь Бо́жию, изринове́ни бы́ша наследни́цы рая́. И ели́цы искуси́ша и прогне́ваша Бо́га, ме́рзцы бы́ша, и потреби́шася беззако́ний ра́ди. Бо́жиим пра́вым судо́м, воздаю́щим кому́ждо по дело́м его́. Я́коже бо сотвори́сте глаго́лет Госпо́дь, та́ко и бу́дет вам. И возда́ние ва́ше возда́стся вам на глава́х ва́ших. И́миже бо согреша́ем бра́тие, сих ра́ди му́чими быва́ем. Добро́ у́бо есть ниже́ до ма́ла согреша́ти нам, и не преступа́ти за́поведи Бо́жия. Но ве́рою пра́вою, и чи́стым житие́м угожа́ти Ему́. Поне́же бо се несть, поне́ у́бо покая́нием и испове́данием, испра́вим вско́ре прегреше́ния. Ка́ющеся на всяк час, и от пути́ на́шего зла́го удаля́ющеся. Прибега́ем к Бо́жию человеколю́бию и ми́лости, и воздыха́ем от глубины́ се́рдца, к могу́щему Го́споду Иису́су Христу́ спаси́ нас, и мо́лимся приле́жно со слеза́ми те́плыми, да́же прости́т на́ша прегреше́ния, и вра́жияго томле́ния и наве́та изба́вит и свободи́т нас. То́йбо есть Свободи́тель и Изба́витель душа́м на́шим, и бесе́дуяй о нас Бо́гу и Отцу́. И́же и да́рует нам в житии́ сем, блага́я и поле́зная, в бу́дущем же ве́це, Ца́рствие Свое́ безконе́чное и блаже́нное. Е́же и получи́ти сподо́бимся вси, о Христе́ Бо́зе на́шем. Ему́же сла́ва и держа́ва со безнача́льным Отце́м, и с Пресвяты́м Ду́хом. И ны́не и при́сно и во ве́ки веко́в, Ами́нь.

Похва́лен церко́вный сей зако́н, гото́вя нас тридне́вныя сме́рти Спа́са на́шего па́мять пра́зднествовати. Слы́шите бо глаго́лемая вам, неизрече́нную та́йну услы́шите и уве́дите, ея́же по уве́дении никто́же мо́жет пости́гнути: Влады́ка Христо́с Сын Бо́га Жива́го Свое́ю во́лею вшед на крест, а не по ну́жди, и просте́ртием руку́ Свое́ю вся неви́димыя си́лы обличи́. Во́льным муче́нием те́ла Своего́ восхо́те вкуси́ти тридне́вныя сме́рти о всем челове́честем ро́де, да то́ю умерщвле́ному род́у безсме́ртие да́рует. И а́бие покло́нь святу́ю главу́ Свою́, повеле́ я́ко рабы́ни сме́рти приступи́ти. И а́бие приступи́, я́ко раба́, смерть, служа́щи Ца́рскому повеле́нию.

Сим та́ко бы́вшим от Спа́са на́шего, Ио́сиф, муж не́кий, до́бра ро́да и бога́т, от Аримафе́йския ве́си сый, Пропя́таго быв ученик, после́днюю воздая́ Учи́телю честь, прии́де к Пила́ту, моля́ и глаго́ля о Уме́ршем: «Сию́ творя́ мольбу́ Оклевета́ну бы́вшу от иуде́й, Оста́влену же от друго́в на кресте́, о Ме́ртвем молю́, не иму́щу Ему́ ни зла́та, ни сребра́, ни друг, ни во́ин, ни посо́бник - то́кмо Ма́терь ни́щу, обога́щшуся рождество́м Его́. О ме́ртвем молю́, во́лею пострада́вшем. А́ще бо не хоте́л бы, то не бы уме́рл, да снят у́бо бу́дет со креста́. Не оби́дев николи́же никого́же ничи́мже, благодея́ниими же мно́ги тмы поче́т. Даждь ми, Его́же не и́мам ино́го добре́йша. Даждь ми ра́дость, блаже́на мя творя́ща прие́млюща Его́. Даждь ми Сего́ творя́щагося ме́ртва, да прие́м Его́, покры́ю земле́ю. Даждь ми треблаже́нное те́ло, Его́же умира́юща ви́девши тварь воспла́кася. Даждь ми те́ло, Его́же издыха́юща ви́девши це́рковь раздра́ свою́ опо́ну. Даждь ми те́ло, Его́же ра́ди ка́мение распадеся сокруше́нием свои́м [и] плачь соверши́ло есть. Да облобыжу́ я́звы свято́ю руку́, и́миже моея́ души́ исцеле́ша стру́пы. Да осяжу́ о́на пречи́стая ре́бра, из ни́хже изы́де пречи́стая Кро́вь и вода́ порожде́ния. Да погребе́та ру́це си Хотя́щаго раздруши́ти сме́ртные пле́ны. Да погребу́т си́и пе́рсти гре́шнии вся́кия пра́вды Де́лателя и Показа́теля. Да прикосну́ся к безгре́шней Пло́ти, е́йже всяк прикаса́яся с ве́рою блажи́мь быва́ет. Да провожду́ ко гро́бу Хотя́щаго ме́ртвым отве́рсти гро́бы. Да донесу́ И́же держи́мым во гро́бе безсме́ртный Исто́чник и просвещу́ седя́щим во тме сме́ртней воскресе́ния свет».

Сия́ у́бо Ио́сиф глаго́лаше благове́рно, а Пила́т послу́шаше внима́я, Бо́жия бо си́ла ме́ртваго Проси́маго от Него́ обраща́ет благове́рно Пила́тову ду́шу к послуша́нию. И а́бие моли́твеник и погреба́тель явля́шеся Ио́сиф. Прии́м е́же любя́ше те́ло, и облобыза́ше напа́д, и устне́ ко пречи́стым удо́м прилага́ше, и помышля́ше се, я́ко жена́ кровоточи́ва с ве́рою, прикосну́вшися ри́зе Его́, источи́ кро́ви исто́чник. Аз же Само́му Те́лу Бо́жию прикаса́яся, ки́им даро́м не бу́ду досто́ин? Пото́м же плащани́цею чи́стою обви́в в пречи́стый би́сер, во гроб нов положи́ и, ка́мень привали́в на двери́ гро́ба, со слеза́ми возврати́ся, ча́сто ко гро́бу обраща́яся, и взира́я к нему́, и лише́ния Учи́телева пла́чася. О́ постиже́ние благове́ствия Ио́сифова! О́ злове́рьствие иуде́йско! Па́ки бо возла́явше на Бо́га а́ки пси и, собра́вшеся в день субо́тный, припадо́ша к Пила́ту, глаголюще: «Го́споди, помяну́хом я́ко льстец Той еще́ жив сый рече́: В тре́тий день воскресну́. Повеле́ у́бо утверди́ти гроб, егда́ ка́ко прише́дше ученицы́ Его́ укра́дут И́ и реку́т лю́дем: Воскре́се от ме́ртвых. И бу́дет после́дняя лесть го́рши пе́рвыя.

Что сие́ глаго́леши, о́ ле́стьче и законопресту́пниче жидови́не? Лесте́ц ли бе Христо́с? Свободи́вый от льсти неприя́зньския иму́щая злы́я ду́хи. Льсте́ц ли бе Христо́с? Поста́вий в пусты́ни трапе́зу без труда́ и напита́вый пятью́ хле́бы пять ты́сящь. Льстец ли бе Христо́с? Исцеле́вый ро́жденники твоя́ от прока́зы. Льстец ли бе, воскреси́вый Ла́заря от гро́ба? Испуща́я ю́жники гла́сом Свои́м. Льстец ли бе Христо́с? Сия́ творя́й, то кто бе ин пра́веден? А́ще льстец бе Христо́с, то почто́ у́бо бои́шися я́же есть глаго́лал? Что у́бо бои́шися ме́ртву Ему́ глас́а? Оба́че рече́ ли что при воскресе́нии, почто́ не ве́руеши Ему́ и прорица́нию Его́? Что всу́е стра́ждеши, окая́нне? Оба́че коне́ц рече́нным взира́й: а́ще воскре́снет из ме́ртвых, о не́мже пече́шися.

Что у́бо к ним рече́ Пила́т? «И́мате кустоди́ю - иди́те утверди́те я́коже ве́сте». А́ще проти́вна Бо́гу и законопресту́пна, рече́, Его́же вы та́ко нарица́ете, тольми́ бои́теся, а́ще ме́ртваго живи́и тольми́ боите́ся - и́мате стра́жии и собере́теся на еди́ного мно́зи, утверди́те вам Стра́шнаго и Ме́ртваго, я́ко ве́сте. Я́ко хо́щете запечатли́ти ме́сто - запечатле́йте. Хо́щете ли желе́зныя своя́ пропя́ти - препни́те. Да не рече́те по́следи: А́ще бы́ша невозбрани́ли нам стрегу́щим гро́ба, не бы́хом у́бо погуби́ли ме́ртваго. Иде́те утверди́те гроб, я́коже ве́сте. А́ще прии́дет Петр, мече́м растле́те и́. А́ще прии́дет не́кий от учени́к Его, воста́вше уби́йте и́. Прилежи́те стрегу́ще и́ и храня́ща тве́рдо, да никто́же от ле́стных укра́сти возмо́жет ва́шего вра́га. Таце́ми словесы́ и ору́жии во́ини вооружи́вшеся Госпо́дни врази́ со мно́гою враждо́ю и спе́хом идо́ша на гроб, и желе́зны печа́ти возложиша на гроб, и седя́ще стрежа́ху Его́.

Во вре́мя же се, второ́му дни бы́вшему, смерть попра́на, в Сего́ обраща́яше, и сожва́ти зубы́ истле́ния не возмо́же, и помышля́ше в себе́ глаго́лющи: «Кто Сей есть непобеди́мый мертве́ц? Кто сей есть ме́ртвый по зако́ну и па́че зако́на храни́мь без истле́ния? А́нгел бо несть, челове́ческий бо о́браз и́мать я́ко Ада́м и не повину́етмися истле́нию. Я́ко челове́к прие́млет смерть, и по умре́тии истле́ти я́ко мертв не хо́щет. Ники́й же [от] су́щих от ве́ка под мно́ю ме́ртвых таково́ те́ло имы́й, прии́де ко мне. Еда́ си плоть оде́жда есть Бо́жия? Да тем на моя́ уста́ обостри́лася есть. Еда́ Сей есть Бо́жия Сло́ва храм? Еда́ Сей есть Це́ркви ре́кшаго: Разори́те Це́рковь сию́ и треми́ де́ньми созди́жду ю́? Еда́ Сей ко воскресе́нию храни́тся? Еда́ Сей схо́дник есть ме́ртвым, ди́вный Сей ме́ртвый? Еда́ пожре́т я́ мно́ю дре́вле ме́ртвыя, пои́мь отсю́де, воскреси́т с Собо́ю? Еда́ я́коже Ио́на во чре́ве ки́тове спасе́н бысть, та́кожде и Сей от мене́ пребу́дет? И ждет тре́тияго дне, да тогда́ пе́рвее воскресе́ние пока́жет и други́м ме́ртвым врата́ воскресе́нию». Сия́ ве́щьми, а не глаго́лми глаго́лаша смерть. И та́ко сим быва́ющим, иуде́ом со стра́хом и со стра́жми приседя́щим гро́бе.

В субо́ту, по́зде свита́ющи, во еди́ну субо́т, хотя́щи зача́тися неде́ли, прии́де Мари́а Магдалы́ни и друга́я Мари́я ви́дети гро́ба. О́ страшным и ди́вным ве́щем! Петр, пе́рвый воево́да Христо́в, убоя́вся гла́са рабынина́, отве́ржеся своего́ Царя́, а жены́ не́мощны и страши́вы во умре́тии приидо́ша поче́сть Учи́теля своего́. Приидо́ста ви́дети гро́ба. Не у́бо вои́стину ве́роваху словеси́ воскресе́нию: приидо́ша ви́дети гро́ба я́ко прия́ти уте́ху не́кую печа́ли свое́й виде́нием гро́ба, весть бо, весть, утеша́ти печа́льныя гроб явля́яся и сле́зы ва́ша к себе́ прие́мля. И приидо́ста ви́дети гро́ба и приступи́ти ели́ко любля́ше, не сме́яста же стра́ха ра́ди иуде́йска. И укра́дующе же о́тай стопы́ своя́ приступи́ста ко гро́бу, и кропя́ста хри́змою , и па́ки отхожда́ста таю́щися. И дале́че стоя́ще та́ко очи́ма сле́зныма на ме́сто взира́юще со слеза́ми и печа́лию, мня́ста угожда́ти Бо́гу. И на иуде́и глаго́лющи ти́хим гла́сом, к себе́ зря́щи и си́це глаго́лющи, я́коже бе ле́по: «Ка́ко дерзну́ша на Го́спода сицева́я такова́я? Ничто́же враже́бное иму́ще поима́ти Нань. Ка́ко не убоя́шася на кресте́ пригвозди́ти? Его́же со́лнце ви́дев про́пнена, поме́рче. Ка́ко не убоя́шася сме́рти преда́ти? Не сотво́рша ничто́же досто́йна сме́рти. Ка́ко не насы́тишася своея́ зло́бы ни по умре́тии Осужде́ному от них ту́не, а́ще и была́ такова́ вражда́ во вре́мя пропя́тию Его́, что и по уме́ртию Его́ на гро́бе приседя́т, что и прии́мшим от Него́ блага́я возбраня́ют приступи́ти ко гро́бу и поклони́тися Ему́ проти́ву благода́ти, я́же прия́т ко́ждо от него́ почести́ти Его́?».

Та́ко рыда́ющема жена́ма и пла́чущимася я́ко ме́ртва Христа́, Сам Его́же ся пла́каста, не ви́дящим стра́жем очесы́ свои́ми и гро́бу запечатле́нну су́щу, изы́де из него́ и а́нгела с небеси́ посла́, глаго́ля к нему́: «Иди́ к жена́ма си́ма, де́рзима и ве́рныма, пла́чущимася и мня́щима Мя еще́ ме́ртва, и научи́ ею́, я́ко победи́х смерть и Жив есмь, я́коже ви́диши Мя. Преста́ви се́тование и́ма на р́адость и све́тлость, преложи́в десни́цею свое́ю ка́мень, и́же затверди́ша мно́гих враг десни́ца».

Прише́д же а́нгел, дви́же от основа́ния зе́млю, да стра́жей убу́ждь и по́слухи сотвори́в, рече́т вину́ ея́же ра́ди прии́де. И пото́м, ви́дящим им свои́ми очесы́, и́же без труда́ отвали́ ка́мень от две́рий гро́бу и се́де на нем, руга́яся желе́зным печа́тем яќо не́мощным, поступа́я на иуде́я, я́ко в тверды́ню ка́меня наде́жду свою́ вда́ша. Бе́яше же виде́ние его́ я́ко мо́лнии: иде́же бо о́блак греху́ не осеня́ет, ту све́тлость мно́га просвеща́ет лице́ его́. И оде́ние его́ бело́ я́ко снег, и́мже бо ве́щем пропове́дник хотя́ше бы́ти сим, и зрак, и оде́жду досто́йну и́маше. Подоба́ше бо такове́й стра́шней ве́щи и ве́стника о всем бы́ти све́тла. У́жас же ве́лий сотвори́ и страх стра́жем, и вма́ле вся су́щая ту иуде́и сотвори́ ме́ртвы. «Что боите́ся?, - к ним глаго́лаше, - о́ фарисе́и, что трепе́щете и падо́сте ни́цы я́ко ме́ртви? О мне, рабе́, ме́ртви, а о Го́споде мое́м де́рзи, и во́ин яви́хся вам стра́шен. Поне́же Царь небе́сный мя посла́, еди́ного а́нгела. Прише́ствия стра́ха не те́рпите, то ка́ко Творца́ а́нгелом прете́рпите. Мене́, небе́снаго де́лателя прелага́юща ка́мень, не могу́ще терпе́ти, ка́ко Соде́телю всея́ тва́ри хотя́щу воскресну́ти, можа́ше те возбрани́ти? Со тва́рию не могу́щеся победи́ти, ка́ко проти́витися покуша́ете Творцу́? Но воста́ните и озри́теся вои́стину. Еда́ Петр ны́не есть со мно́ю? Еда́ от рыбаре́й кто кра́дет со мно́ю ме́ртваго? Еда́ тре́бует Бог помо́щника? Еда́ тре́бует поспе́шника Христо́с Бо́г ко Своему́ воскресе́нию?» - сия́ рек ко стра́жем и к фарисе́ом а́нгел. И сия́ оста́вль лежа́ща и трепе́щуща, обрати́ся к жена́ма ти́хим лице́м. Пре́жде даде́ и́ма наслади́тися взира́нием кро́тким и тихим, пото́м же и душа́м их страсть отгна́, глаго́ля к ни́ма: «Не бо́йтася вы. Вем бо я́ко Иису́са распя́таго и́щете». Не рече́ ме́ртваго, - не бе бо тогда́ мертв, - но Иису́са пропя́таго и́щета, кресто́м студ попра́вшаго . И́щете И́щуща взыска́ющих Его́ . И́щете Су́щаго близ зову́щим Его́ . И́щете, Его́же иски́й, всяк ве́рою благо́ю обрета́ет ско́ро, искуша́яй же зло́ю ве́рою, не ви́дит Его́, а́ще и обря́щеть И́. «Вем, я́ко Иису́са и́щета пропятаго, несть зде».

Что глаго́леши, о́ а́нгеле, несть ли зде вино́вный на́шим слеза́м? Без ума́ ли принесо́хом ему́ ме́ртвых да́ры, и несть ли зде? Преложи́ша ли его́ инамо па́ки ревни́вии, зави́девше Ему и погребе́нию Его́, зави́девшии животу́ Ему́. Несть ли зде? Но еди́н еси́ тогда́ есть, рцы на́ма ско́ро, моли́ветися. Утверди́ трепе́щущии на́ю сердца́, не приложи́ ино́го пла́ча к плачу. Но кажи́ на́ма ме́сто Иско́маго ме́ртва, да те́кши вско́ре излие́ве печа́ль очи́ю. Он же рече́ и́ма: «Хо́щета ли уве́дети, где есть Иско́мый ва́ма? Воскре́се, я́коже рече́. Я́коже рече́, вои́стину по обы́чаю и́стина есть. Я́коже сло́вом пре́жде рече́, си де́лом сконча́: воскре́с, изы́де боголе́пно, и не чу́яша стра́жие стрего́мому изы́тия. Не бе́ху бо досто́йни пропне́наго от них воскреса́юща ви́дети. Не удержа́ша желе́зныя печа́ти Госпо́дня Воскресе́ния. Не возмого́ша разори́ти разо́ршаго вся грехи. Уступи́ нево́лею мучи́тель Царе́ви. И сам ад убоя́вся, вострепета, вра́тницы а́довы закле́пи поверго́ша и врата́ разверзо́ша, и не сме́яше ни еди́ному рещи́ ничто́же совоскре́сшим с Ним. Воста́, я́коже рече́. Ка́ко ва́ма скажу́ нескаже́мая? Ка́ко пропове́м побеждающаго всяк ум? Ка́ко скажу́ Госпо́дня Воскресе́ния та́йну? Я́коже роди́ся затворе́ным врато́м де́вственым, та́ко и воскре́се, затворе́ну су́щу гро́бу. Я́коже бысть пе́рвенец из ложе́сн Единоро́дный, та́ко бысть из ме́ртвых Госпо́дь. Я́коже не вреди́ де́вства Де́ве и Ма́тери ро́ждься, та́ко не вреди́ печа́тей гро́бных воскре́с. Ни сло́ва ему́ могу́ объя́ти и ни изы́тия гро́бнаго пости́гнути. Зря ме́ста воскресе́нию, не искуша́ю сумне́нием Воскресе́ния. Покланя́юся ме́сту ди́вному, ви́жду си и ва́ма пока́заю. Прииди́та, ви́дета ме́сто, иде́же лежа́ Госпо́дь. Ны́не ме́сто видита, и не по мно́зе у́зрета и ме́сту стра́нный плод. Прииди́та, ви́дета ме́сто, в не́мже неприя́зненую я́зву прия́т. Прииди́та, ви́дета ме́сто, в не́мже лежи́т смерть умерщвле́на. Прииди́та, ви́дета ме́сто, в не́мже все́яно бысть невсе́янное зерно́, и клас полн безсме́ртия возрасте́. Прииди́та, ви́дета ме́сто, в не́мже ва́шему воскресе́нию вписа́ся об́раз. Прииди́та, ви́дета место, без гла́са вопию́щее погребе́наго си́лу. Прини́кнета в бы́вшее ло́же вели́каго Царя́ неистле́ния жи́зни. Прини́кнета во гроб, из него́же на не́бо пресели́ся. Оста́нитася воздыха́ния слез. Оста́нитася и́щуще Жива́го с ме́ртвыми. Глаго́лета врагу́ пле́жущу: Где ти, сме́рти, жа́ло? Где ти, а́де, побе́да? И ско́ро ше́дше рце́та ученико́м Его́ и Петро́ви, я́ко воскре́се от ме́ртвых. И се, варя́ет вы в Галиле́и. И ту И́ ви́дите». И ше́дше ско́ро от гро́ба со стра́хом и ра́достию, теко́сте пове́дати учениќом Его́ cи́и жене́, к [скоре́йшему] тече́нию ну́дящу Свято́му Духу, И́же вопия́ше Иса́ием пророком: «Жене́ гряду́щи от виде́ния прииди́та: не бо́ лю́дие суть иму́ще ра́зума» .

Жена́ма же теку́щема тече́нием и любо́вию мно́гою, внеза́пу предста́в и́ма Госпо́дь, запечатле́ а́нгелова словеса́ печа́тию Своего́ лица и душа́ и́ма возвесели́. Рек и́ма: «Ра́дуйтася! Осужде́ная бо Е́ва оправда́ся. В зе́млю по́сланый Ада́м возврати́ся. Лесть разорися. Лукавая змия попрана бысть. Неприя́знь паде́. Поспе́шницы неприя́знии постыде́шася. Жи́дове пла́чутся без утеше́ния. Фарисе́и рыда́ют. Поне́же крест мне поспе́шник бысть. Гроб мое́й си́ле сведе́тель бысть и сме́рти побежде́ние испове́дает. Безсме́ртие челове́ком написа́ся. О Мне челове́чь род обнови́ся. О Мне вси уме́ршии ожи́ша. О Мне ца́рствует челове́чьство. О Мне Мой о́браз венча́ся. Сия́ Ми суть тридне́внаго погребе́ния пло́ди. Сия́ Ми суть тридне́внаго безсме́ртныя побе́ды венцы́. Сия́ о́брази Моего́ ца́рства и ца́рстии би́сери. Иди́та пове́дита Моей бра́тии, да и́дут в Галиле́ю и ту Мя ви́дят. О́ ве́лие человеколю́бие! Бра́тию нарица́ет оста́вльших Его́ во вре́мя пропя́тия. Весть бо терпе́ти укори́мь. Весть терпе́ти неве́домь. Весть не́мощь на́шу носи́ти. Весть согреша́ющая, пла́чущаяся ми́ловати. Иди́та и рцы́та бра́тии Мое́й, да и́дут в Галиле́ю и та́мо Мя ви́дят. Пове́дита бра́тии мое́й, я́же вы та́йны пе́рвее ви́деста. Бу́дета учи́телем всего́ ми́ра учи́тельницы. Да уве́сть и Петр, отве́ргийся Мене́, я́ко могу́ и жены́ сотвори́ти апо́столы. Да и́дут в Галиле́ю и ви́дят ма́лое то е́зеро, из него́же их в челове́ческое мо́ре устро́их. Да ви́дят е́зеро, из него́же в мы́сленых челове́к лов изнесо́х». Си́я глаго́ла Госпо́дь жена́ма. То́йжде есть и ны́не призыва́я оглаше́ныя и глаго́лет к ним: «А́ще не породи́тся водо́ю и ду́хом, не мо́жет вни́ти в Ца́рство небе́сное». Хо́щеши ли сподо́битися Ца́рству небе́сному, оглаше́не? Потщи́ся, не заме́дли. Потецы́, пости́гни. Совлецы́ся ве́тхаго челове́ка. Вни́ди, измы́йся в ба́ни, слу́жбу иму́щей от а́нгел, Бо́гу тя крестя́щу. Измы́йся в ба́ни, потопля́ющей грехи́, подава́ющей тебе́ и ро́ду твоему́ отда́ние. Дар бо есть побежда́я зако́н, па́чеже соверша́я зако́н. Храни́лище ве́ре, крестом зна́менайся, дар бо есть, его́же ра́ди мно́го тру́ждьшися пра́ведницы, су́щии пре́жде зако́на, едва́ улучи́ша сень его́ приобрести́. Таковы́й блаже́нства дар, я́коже пое́т Давид пророк глаголя: «Блаже́ни, и́мже отда́шася безако́ния и и́мже прикры́шася греси́» о Христе́ Иису́се Го́споде на́шем, Ему́же сла́ва со Отце́м и со Святы́м Ду́хом, ны́не и при́сно, и во ве́ки веко́в. Ами́нь.

Возлю́бленнии, со́лнце красу́яся по о́блацех, люби́мо быва́ет ви́дящим е́. Та́коже и апо́столом Госпо́дним, по распя́тии и по сме́рти Христо́ве, ра́достно возсия́ Воскресе́ние Госпо́дне. Ио́сиф же, и́же отъ Аримафе́я, пре́жде Воскресе́ния Христо́ва дерза́ет, старе́йшим ученико́м бежа́вшим, еди́н прихо́дит к Пила́ту, дерза́я проси́ти Те́ла Христо́ва, Его́же на Кресте́ ви́сяща ви́де, пре́жде бо позна́ Его́ Бо́га су́ща. Те́м не рече́: бо́гат е́смь, еда́ отпаду́ бога́тства, а́ще испрошу́ Те́ло Осужде́ннаго на́ смерть, и бу́ду оклевета́н к жидо́м. Ничто́же таково́ помы́сли, но все́ нивочто́же вмени́в, испроси́ погребсти́ Те́ло Христо́во. Пила́т же диви́ся, а́ще у́же у́мре? Мня́ше бо на до́лзе Ему́ жи́ву бы́ти, и вопроси́ со́тника, а́ще у́же у́мре, и уве́дев и́стинно, я́ко уже́ у́мре, повеле́ да́ти Те́ло Иису́сово Ио́сифови. Он же, взе́м Те́ло Иису́сово и купи́ плащани́цу, и Свято́е Те́ло че́стно положи́ в но́вем свое́м гро́бе: учени́к бо бе́ Иису́сов и то́й, и ве́дяше, ка́ко чести́ Влады́ку гове́йно, бла́го и прече́стно, хотя́ прича́стник бы́ти небе́сному Его́ Ца́рствию. Сове́тник же бе́ са́ном и в лю́дех старе́йшина. Слы́шите, бога́тии, и́же во гра́дских упражня́ющеся ве́щех, и ну́дящеся о то́ржищах пещи́ся, ка́ко Ио́сифу не возбрани́ на доброде́тель сове́тничества са́н? Мину́вши же субо́те, Ма́рия Магдали́на, и Мари́я Иа́ковля, и Саломи́я, купи́ша арома́ты, да прише́дше пома́жут Иису́са: по обы́чаю жидо́вскому се́ творя́ху. Разуме́йте же глаго́л ева́нгельск. Рече́ бо Матфе́й: в ве́чер субо́тный приидо́ша на гро́б жены́. Лука́ же рече́: зело́ ра́но. Ма́рко же рече́: возсия́вшу со́лнцу приити́ жена́мъ на́ гроб. И никто́ же ра́зно глаго́лет: о разли́чных бо жена́х реко́ша вси́. По Матфе́еву глаго́лу [Матф., зач. 115], в ве́чер субо́тный приидо́ша не с ми́ромъ жены́, но ви́дети гро́ба. Тогда́ же тру́с бы́сть, и а́нгел отвали́ ка́мень от две́рий гро́ба, и рече́ жена́м: не бо́йтеся вы́. Тогда́ и Са́м Иису́с те́ма я́влься, и рече́: ра́дуйтеся! иди́те к бра́тии Мое́й, да и́дут в Галиле́ю и та́мо Мя́ ви́дят. Бе же тогда́ Мари́я Магдалы́ня, и друга́я Мари́я Иа́ковля и Иоси́ина ма́ти. И па́ки полу́нощи и́ны жены́ приидо́ша, а́ки испыта́юще бы́вшаго, я́же о Воскресе́нии Христо́ве от Магдалы́ни слы́шавше. О тех бо Лука́ написа́ [Лук., зач. 112], и́же рече́: зело́ ра́но приидо́ша жены́ дозре́ти гро́ба, и не́цыи с ни́ми, и ти́и ви́деша уже́ ка́мень отвале́н, и два́ а́нгела во блеща́щихся ри́зах глаго́люща: не́сть зде, но воста́. По Иоа́нну же [Иоан., зач. 63], пред заре́ю прии́де Мари́я Магдалы́ня, из нея́же изгна́ се́дмь бесо́в. И та́ ви́де два́ а́нгела во гро́бе в бе́лых ри́зах, та́коже и Самого́ Христа́. Ма́рко же рече́ [Марк., зач. 70]: мину́вши субо́те, и со́лнцу возсия́вшу, вся́ вку́пе прише́дша, глаго́лет, с ми́ром, и Мари́ю Иа́ковлю Богоро́дицу имену́ет. Рече́ же и́м явле́йся ю́ноша: не ужаса́йтеся. Пе́рвее измени́ и́хъ о́тъ страха, пото́м же и о Воскресе́нии благовествова́, и глаго́ла и́м: Иисуса ли и́щете распя́таго? Воста́, не́сть Его́ зде. — Ви́диши ли, не срамля́ется а́нгел распя́тием, те́м бо спасе́ние всему́ ми́ру бы́сть. До́бре уве́рити я́ хотя́, рече́: се́ ме́сто, иде́же бе́ положе́н. Но иди́те, рцы́те ученико́м Его́ и Петро́ви. — Петра́ еди́наго от учени́к нарече́, и́же при Стра́сти отве́рглся бе́ Христа́. Аще бо бы́ша прише́дше жены́ рекли́: по́слани есмы́ пове́дати ученико́м; то́ у́бо ре́кл бы Пе́тр: а́з у́же не́смь учени́к Его́: отве́ргл бо мя́ е́сть и возненави́дел. Того́ ра́ди приложи́ и Петра́, да ся́ не соблазни́т. В Галиле́ю посыла́ет и́х, хотя́ извести́ и́х от стра́ха жидо́вскаго. Те́мже ничто́же тогда́ реко́ша: боя́хубося. Благодари́м у́бо и мы́ за ны́ пострада́вшаго Го́спода, и погребе́ннаго, и воскре́сшаго, да прии́метъ я́ко же́ртву чи́сту на́ше благодаре́ние и похвале́ние, и ве́чных бла́г сподо́бит на́с, я́ко Бла́г и Человеколю́бец, Ему́же сла́ва, ны́не, и при́сно, и во ве́ки веко́в. Ами́нь.

Стихи́:

Христу́ но́сят учени́цы ми́ра:

Аз же сим пе́снь, я́ко ми́ра ношу́.

В сий де́нь Неде́лю тре́тию по Па́сце, святы́х жен мироно́сиц пра́здник пра́зднуем. Еще́ же и па́мять твори́м и́же от Аримафе́а Ио́сифу, и́же бе́ учени́к сокрове́н от седми́десятих еди́н сый. К сим же и нощна́го ученика́ Никоди́ма, и́же от князе́й ко Христу́ приступи́. Зане́ жены́ у́бо ты́я су́ть, свиде́телие нело́жныя и пе́рвыя Воскресе́ния, Ио́сиф же и Никоди́м погребе́ния: я́же у́бо и и́стиннейшая су́ть и содержительне́йшая, е́же по нам догма́та. А́бие бо Никоди́м у́бо от со́нмища изгна́н бы́сть, не изволя́я иуде́ем сму́дрствовати. Ио́сиф же по е́же погребсти́ Госпо́дне те́ло, в ров от иуде́и вмета́емь быва́ет, и Боже́ственною си́лою отону́ду восхища́ется и во Аримафе́й во свое́ оте́чество отхо́дит. И воскре́с Христо́с, ему́ явля́ется, у́зами содержи́му, и уверя́ет ему́ вя́щше Воскресе́ния та́инство. Мно́га же и от иуде́й стражда́, молча́нию та́инственная дая́ти не стерпе́, но со дерзнове́нием вся́ бы́вшым уча́ше. Глаго́лется у́бо, я́ко и Никоди́м сей пото́нку я́же о стра́сти Христо́ве, и о Воскресе́нии сочине́нием уясни́ пе́рвый всех, я́ко со́нмища сый, и изве́стнее и сове́ты иуде́й и словеса́ и про́ста вся́ ве́дый. И сея́ ра́ди вины́, я́коже реко́хом, я́ко нело́жнии погребе́ния свиде́телие, с ви́девшими жена́ми Воскресе́ние учини́шася. И по пе́рвем Фомине́ увере́нии о́ному предъучине́но бы́сть, я́ко по днех осми́х, глаго́лет, прии́де благове́стие. Жены́ у́бо сия́, пе́рвыя Воскресе́ние ви́деша, и ученико́м сие́ благовести́ша. Подоба́ше бо пе́рвее па́дшему пле́мени под грех, и кля́тву насле́дствовавшему, тому́ пе́рвее и Воскресе́ние ви́дети, и ра́дость внуши́ти, пе́рвее слы́шавшему: в печа́лех роди́ши ча́да. Мироно́сицы же наречены́ бы́ша: зане́ Па́схи настоя́щей пятка́ 3 ра́ди, я́ко вели́к де́нь бя́ше суббо́ты о́ныя, елма́ тща́хуся и погребсти́ те́ло Госпо́дне Ио́сиф и Никоди́м, и́же по иуде́йскому обы́чаю ми́ры Сего́ пома́заша, но не я́коже досто́яше: ало́й бо, и сми́рну вя́щше вложи́вше, и плащани́цею обви́вше, гро́бу преда́ша. Сего́ ра́ди сия́ любо́вь те́пле ко Христу́ иму́щыя, я́ко учени́цы, ми́ра многоце́нныя купи́вшыя, но́щию приидо́ша. Ку́пно у́бо и иуде́йскаго ра́ди стра́ха, ку́пно же я́ко и обы́чай бе́ ра́нее опла́кати и пома́зати то́, и оску́дное за ско́рость вре́мене тогда́ наверши́ти, егда́ прише́дшыя разли́чная явле́ния ви́деша, блиста́ющася же два́ а́нгела вну́трь гро́ба, и на ка́мени седя́ща друга́го: по сих же Христа́ ви́дят, и покланя́ются. Магдали́на же и я́ко огра́дника мня́щи, Того́ о Само́м вопроша́ше. Мно́ги у́бо бы́ша мироно́сицы, по евангели́сти о наро́читых то́чию сотво́рше помина́ние, други́я оста́виша. Бя́ху же сия́: пе́рвая всех Магдали́на Мари́а, из нея́же и де́монов се́дмь Христо́с изгна́, я́же и по Христо́ве вознесе́нии в Рим прише́дши, я́ко сло́вом но́вым, сме́рти Пила́та и архиере́а предае́т, я́же о Спа́се Христе́ Тиве́рию ке́сарю возвести́вши. Последи́ же во Ефе́се умира́ет, и от Богосло́ва Иоа́нна погреба́ется: от Прему́драго же Льва́ в Константи́нь град прино́сится. Втора́я же Сало́ми, я́же е́сть Обру́чника Ио́сифа дщи́, си́це бо и обои́х именова́ху, я́же дщи́ его́, Зеведе́а имя́ше му́жа, от нея́же евангели́ст Иоа́нн и Иа́ков роди́стася. Четы́ри бо сы́ны му́жеска по́лу роди́ Ио́сиф: Иа́кова, глаго́лемаго Ма́лаго, и Иоси́ю, Си́мона, и Иу́ду, и дще́ри три́: Есфи́рь, Фа́марь и Сало́ми Зеведе́ову. Я́коже егда́ слы́шиши во Ева́нглии, Мари́ю Иа́кова Ма́лаго, и Иоси́еву Ма́терь, Богоро́дицу непщу́й бы́ти, я́ко Ма́терь Ио́сифовых чад Богоро́дица вменя́шеся: я́коже приключи́тися отсю́ду, сестри́чищу бы́ти Христо́ву евангели́сту Иоа́нну, я́ко бра́тню сы́ну. Тре́тия же мироно́сиц е́сть Иоа́нна жена́ Хуза́ня, и́же бя́ше назира́тель и строи́тель до́му царя́ И́рода. Четве́ртая же, и пя́тая, Мари́а и Ма́рфа, сестре́ Ла́зареве. Шеста́я Мари́а Клео́пина. Седма́я Соса́нна, и ины́я множа́йшыя бя́ху, я́коже Лука́ боже́ственный повеству́ет: я́же бя́ху, глаго́лет, служа́щыя Христу́, и ученико́м Его́, от име́ний свои́х. Я́ко у́бо ты́я Воскресе́ние пропове́даша, и мно́гия по нам догма́ты сказа́ша, во увере́ние и извеще́ние и́стинное Воскресе́ния Христо́ва. По Фоме́ и сим прия́т пра́здновати Христо́ва Це́рковь, я́ко ви́девшым пе́рвым Христа́ от ме́ртвых воскре́сша, и всем извести́вшым спаси́тельное пропове́дание, и е́же по Христе́ жи́тельство проше́дшым изря́дно, и я́коже досто́яше жена́м науче́нным от Христа́. Святы́х мироно́сиц моли́твами, Бо́же поми́луй нас.

Исходя́ще в притво́р, пое́м стихи́ру ева́нгельскую: Сла́ва и ны́не, глас 2:

С ми́ры прише́дшым я́же с Мари́ею жена́м, / и недоумева́ющымся, ка́ко бу́дет им улучи́ти жела́ние, / яви́ся ка́мень взя́тый, / и боже́ственный ю́ноша утоля́яй мяте́ж душ их: / воста́ бо, глаго́лет, Иису́с Госпо́дь. / Те́мже пропове́дите пропове́дником Его́ ученико́м, в Галиле́ю тещи́, / и ви́дети Его́ воскре́сша из ме́ртвых, // я́ко Жизнода́вца и Го́спода.

И а́бие сло́во:

Бра́тие и отцы́, ра́достию ра́дуемся, смире́нии, зря́ще вас в ле́то преходя́щим зде, я́ко втору́ю Па́сху пра́зднуем прише́ствие ва́ше.

Но поне́же нам вы прино́сите плотска́я, [ин по ино́му, я́коже рука́ма мо́жете принести́] , и мы вам та́коже возда́мы духо́вная. Молю́ у́бо вас бра́тие, и́мени ра́ди Го́спода на́шего Иису́са Христа́, ходи́ти вам досто́йно во мни́шеской за́поведи, испове́дания е́же испове́дахом, гоне́ния, е́же гоне́ни бы́хом Го́спода ра́ди, житие́ ва́ше иму́ще добро́ в ми́ре – «да не в не́мже оклевета́ют нас, я́ко зло творя́ща, постыдя́тся, искуша́юще ва́ше о Христе́ благо́е житие́» . Суть бо не́цыи, и́же и поро́чно соблюда́ют испове́дание Христо́во, я́ко па́че вина́ бысть бля́ди, е́же страшу́ся и глаго́лати, ре́ша бо: «Бо́ле есть причаща́тися е́реси или́ изво́лити о Христе́ гоне́ния», и́мже грех по пра́вде есть, и сове́т по сове́ту Валаа́мову, положи́вшем блазнь в сыно́х Изра́илевых . Два у́бо еста́ блуда́: еди́н в ве́ре, а други́й в те́ле. Восхище́ни бо в ерети́ческом прича́стии, си́и суть соблуди́вии на Бо́га, соблужа́ют си́лою и те́лом. Егда́ не заблужа́ют си́це глаго́люще, но умо́м прельще́ни быва́ют, ловя́ще неутверже́нныя душа́. Вы же бра́тие, вас ра́ди саме́х и заблужа́емыя, и́стиною тве́рдейше житие́ на́ше поста́вим, благи́ми жи́тельствы живу́ще и до́брыми по́двиги исправля́ющеся. Ки́йждо вас псало́м и́мать, уче́ние и́мать, язы́к и́мать, открове́ние и́мать, сказа́ние и́мать: вся же к созида́нию да быва́ют . А́ще и в пути́ потре́буя да бу́дет, присту́пим гове́йно, да просвети́тся лице́ ва́ше на по́льзу зря́щих ра́ди. А́ще случи́тся бесе́довати жене́, бесе́дуем с вели́ким смотре́нием, смежа́ющи о́чи от возре́ния, да не прии́мет жа́ла и стрелы́ в се́рдцы. Вся́ко ю́де творе́нно, в сла́ву Бо́жию бу́ди, Возлюби́вшаго вас и преда́вшаго Себе́ нас ра́ди. Его́же любо́вию дивля́ше тмо́ю любо́вника, не оставля́ше его́ от Cебе́ Госпо́дь. И се а́ще кто ви́дит от пло́тско лю́бящих. И́бо егда́ муж возлюби́т жену́, всего́ себе́ издае́т любо́вницы: о́ной дыха́ет, и она́ ли́чится ему́. А́ще со́лнце, рече́, кто не хо́щет се́рдцем зре́ти, но любоде́йцу. А́ще трапе́зу кто предста́вит ему́, не ра́дуется от нея́ вкуси́ти, но любоде́йцу зре́ти. Что у́бо красне́е Влады́ки Христа́? Что ли сладча́е блаже́нныя Его́ любве́? Не се ли есть красота́ па́че сыно́в челове́ческих ? Не се ли есть сла́дость и все жела́ние по словесе́м? И се явля́юще святи́и, е́же есть те́плая к Нему́ любо́вь: ов рече́: я́ко жела́ет еле́нь на исто́чники водны́я, та́ко вжада́ ду́ша моя́ к Тебе́ Бо́же ; други́й же: мой Любо́вник распя́тся Христо́с ; и други́й па́ки: «И́бо любо́вь Христо́ва одержи́т нас су́ждьших сие́ : я́ко еди́н за всех у́мре, и да вси уме́рше зань. Но Он за все умре́, да живу́щии николи́же о себе́ живу́т, но за ни́хже ра́ди Уме́ршему» .

Таково́ю любо́вию возлюби́л есть Бог ми́ра, и та́ко возлю́блен есть от святы́х зело́ же непостоя́нно. Мы же, поне́же простуже́нно лю́бим Его́, сего́ ра́ди растае́мся неприя́знеными по́мыслы и помышле́нии плотски́ми, лю́бяще боле́знь вме́сто здра́вия, и го́ресть вме́сто сла́дости, и рать вме́сто ми́ра. Но возни́кнем, о́ бра́тие, молю́ся при́сно, и очи́стим ду́ши от сих поги́бельных помышле́ний, да и́мамы в себе́ Христа́ всеси́льна. Иде́же бо есть чистота́, ту есть Христо́с, и та есть блаже́ная и возлю́бленная жизнь, и, си́це живу́ще, насле́дим Ца́рство небе́сное, о Христе́ Иису́се Го́споде на́шем, Ему́же сла́ва со Отце́м и со Святы́м Ду́хом, ны́не и при́сно и во ве́ки веко́в. Ами́нь.

По чте́нии же, тропа́рь свята́го Фео́дора, глас 8:

Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

И посе́м: Христо́с воскре́се: три́жды, и пе́рвый час по обы́чаю, и коне́чный отпу́ст.