Кра́снаго и све́тлаго пра́здника день Благове́щения пра́зднующе, нача́лный и пе́рвый сей Влады́чних пра́здник, и глави́зна на́шего спасе́ния, ра́достию ра́дуемся, и весе́лием весели́мся. Просвети́хомбося духо́вно в нем, и украси́хося, взира́юще и смышля́юще е́же всем ве́лие та́иньство, е́же о нас Бо́жия человеколю́бия и милосе́рдия схожде́ние. Что же ли есть та́иньство; Я́ко Сын Бо́жий, Сын челове́чь быва́ет: воплоти́вся от Ду́ха Свя́та, и Мари́и Пречи́стыя и Пренепоро́чныя и при́сно Де́вы, и от Нея́ храм себе́ созда́в, и соверше́н Челове́к бысть, да́же бо́га челове́ка сотвори́т. Прельсти́бося пра́отец наш Ада́м зми́ем, и злонача́лным враго́м дия́волом: и Бог вожделе́в бы́ти и небы́сть, но солга́ся: от Бо́га и от рая́ изринове́н бысть, и сме́ртию осуди́ся, и с ним ку́пно вси от него́ су́щии осуди́хомся, и пови́нни бы́хом тле́нию и сме́рти: сего́ ра́ди быва́ет Бог челове́к, да́же бо́га Ада́ма сотвори́т, и нас свободи́т от сме́ртныя тли и осужде́ния. Сия́ есть пра́здника сего́ вина́, сия́ есть та́йны сея́ си́ла: сего́ ра́ди вся тварь ликоству́ет: и игра́ет и весели́тся. Прии́де бо Христо́с да́же су́щих под зако́ном иску́пит, я́коже пи́шется: да́же всыновле́ние прии́мем: да́же ктому́ не бу́дем раби́, но свобо́дни: не ктому́ пристра́стни, но безстра́стни: не ктому́ миролю́бцы, но боголю́бцы: не ктому́ по пло́ти ходя́ще, но по ду́ху. И́бо по пло́ти ходя́щии плотьска́я му́дрствуют, а и́же по ду́ху духо́вная: му́дрость бо плотьска́я, смерть, му́дрость же духо́вная, живо́т и мир. Поне́же бо му́дрость плотьска́я вражда́ есть на Бо́га, зако́ну бо Бо́жию не повину́ется, ниже́ бо мо́жет: а и́же во пло́ти су́щии, Бо́гу угоди́ти не мо́гут. Сий пра́здник у́бо я́коже в кра́тце рещи́, спасе́ния на́шего обновле́ние и измене́ние. И сих ра́ди до́лжни есмы́ духо́вно пра́здновати, и духо́вно ходи́ти, преподо́бием и пра́вдою, любо́вию и кро́тостию, ми́ром и совокупле́нием, долготерпе́нием благосты́нею и Ду́хом Святы́м: да́же непра́здно и безде́лно Го́спода на́шего Иису́са Христа́ устрое́ние собо́ю показу́ем. До́лжни же есмы́ и моли́тися и скорбе́ти о ми́ре, зря́ще приходя́щая мно́га зла и лю́та грех ра́ди на́ших. До́лжни есмы́ скорбе́ти и о бра́тиях на́ших су́щих в плене́нии, и о страда́нии сих, и сокруше́нии и озлобле́нии, и мольбы́ приноша́ти о́нех ра́ди и моли́твы к Бо́гу: да́же посети́т и уте́шит сих ду́шы, па́дающыя от стуже́ния и ско́рби, и напа́дания враг на́ших: и помо́жет им человеколю́бец Госпо́дь о души́ и телеси́, я́коже вся вели́чия и ми́лость Его́. Е́же бо сострада́ти друг дру́гу и сболе́зновати, благоприя́тно есть Бо́гу бра́тие. И до́лжни есмы́ твори́ти сие́, я́коже раби́ и служи́тели Бо́га Сло́ва, да́же уго́дни бу́дем Ему́, е́же во́иньствовати обеща́хомся. До́лжни есмы́ моли́тися о всех челове́цех: поне́же та́ко учи́т, и та́ко повелева́ет нам и совещава́ет, и боже́ственый и свяще́нный апо́стол Па́вел, твори́ти мольбы́ и моли́твы и моле́ния, благодаре́ния о всех челове́цех, о царе́х, и всех в вели́чиих су́щих: да́же ти́хо и безмо́лвно житие́ и́мамы, во вся́ком благове́рии и чистоте́. Е́же бо моли́тися о всех челове́цех бра́тие, не то́кмо естеству́ добро́ есть, поне́же вси тому́жде естеству́ причаща́емся, но и Бо́гу благоуго́дно есть сие́ и прия́тно: Той бо хо́щет всем челове́ком спасти́ся, и на ра́зум и́стины приити́. А́щели же Бог хо́щет всем челове́ком спасти́ся, и приити́ на разуме́нии Его́, восхо́щем и мы молю́ся, и уподо́бимся Бо́гу до́брыми де́лы ели́ко по си́ле на́шей, и мо́лимся о всех челове́цех, я́коже учи́т нас писа́ние. Ве́лию бо по́лзу хода́таит души́, е́же моли́тися о всех челове́цех: поне́же бо на любо́вь приво́дит, не то́кмо челове́к ве́рных, но и тех самы́х нечести́вых и неве́рных враг на́ших, и не оставля́ет сих звери́тися и дивия́читися и бра́ти нас. Сея́ же ра́ди вины́ ну́жда есть привлещи́ся о́нем, и приити́ на и́стинную ве́ру Бо́жию. И се есть спасе́ние их, е́же на ра́зум Бо́жий и на и́стину приити́. Еди́на же су́щая и́стина есть, я́же к Бо́гу ве́ра на́шя. Сего́ ра́ди и свяще́нницы стоя́т, я́коже о́бщии отцы́ ми́ру, о всех челове́цех промышля́юще и пеку́щеся о них, и мо́лятся о умире́нии всего́ ми́ра, и о святы́х Бо́жиих церкве́й благостоя́нии, и е́же о всех совокупле́нии. Мы же мо́лимся ку́пно с ни́ми, и припа́даем Бо́гу, да́же всех поми́лует, Свое́ю благосты́нею умоля́емь, неизрече́ннаго ра́ди милосе́рдия и ми́лости и человеколю́бия Его́. Поне́же бо и се хотя́ Влады́ка пече́тся и промышля́ет о всех, и сия́ет со́лнце на лука́выя и благи́я, и дожди́т на пра́ведныя и на непра́ведныя: и всех насыща́ет, и исполня́ет свои́ми благи́ми, и неве́рныя и ху́лныя дарова́ет. Да́же у́бо и на нас всех бра́тие сия́ вся блага́я быва́ют. Пре́жде же у́бо всех разруши́м вражду́, е́же на не́кия и́мамы: невозмо́жно бо зло име́ти на о́нех, о них же моле́ния твори́м: и ти́и бо са́ми врази́ на́ши кротча́йши быва́ют, и ми́руют с на́ми. Прелага́ют бо ся от зло́бы моли́твенаго ра́́ди деяния, и ктому́ не бо́рют ниже́ зверя́тся на нас. Ктому́ же и Влады́чнее запове́дание соверша́ем глаго́лющее: люби́те враг ва́ших. Добро́ твори́те ненави́дящим вас. Благослови́те клену́щих вас, моли́теся о злотворя́щих вам: я́ко да бу́дете сы́нове Вы́шняго. А́щели же о вразе́х и ненави́дящих нас, и о клену́щих и злотворя́щих до́лжни есмы́ моли́тися, коль па́че о свои́х и единосу́щных в ве́ре, и о тружда́ющихся и пеку́щихся и ми́лующих нас, до́лжни есмы́ моли́тися. И па́че же от Бо́га су́щих царе́й на́ших благове́рных и христолюби́вых, и моле́ния твори́ти о них и моли́твы к Бо́гу при́сно. Ктому́ же и о всей пола́те и во́иньстве их, сих бо спасе́ние и утверже́ние, на́ше есть безпеча́лие и поко́й. Молю́же вас Го́спода ра́ди, вси моле́ния и моли́твы и молбы́ и сле́зы сокруше́ным се́рдцем приноша́ем Бо́гу, и мо́лимся о царе́х на́ших, су́щих от Бо́га, и о спасе́нии их, и утверже́нии, и о побе́де, и благосподобле́нии, и о всех про́чих: долг бо есть сей ну́жен и не отло́жен, и прия́тен Бо́гу и благоуго́ден, и ду́шу по́лзует и те́ло, и ве́лию ра́дость и утверже́ние хода́тайствует нам. Не то́кмо же у́бо свяще́нницы до́лжни суть моли́тися о всех челове́цех, но и вси ве́рнии друг о дру́зе. Незави́стна бо есть благода́ть, и всех призыва́ет, не то́кмо свяще́нныя, но и всех про́чих. И вся́кий челове́к до́лжен есть моли́тися на вся́ком ме́сте, о Ца́рствии е́же от Бо́га, и о Це́ркви, и о присносу́щных в ве́ре: спаса́ет бо ся сим, и христия́нское все составле́ние. Бу́дут же ру́ки ва́ши чи́сты от лихоима́ния, от похище́ния, от уби́йства, от ра́ны, и от вся́кия зло́бы и непра́вды, па́чеже простира́йте сия́ в ми́лостыню, и на вся́ко и́но бла́го де́лание. Не гне́вайтеся на бра́тию и бли́жния ва́ша. Ниже́ име́йте помышле́ния лука́ва, и злопомне́ния и пристра́стия. Ниже́ не извеще́нием и сомне́нием моли́теся Бо́гу, егда́ что про́сите, но ве́рующе и неразмышля́юще и не сомня́щеся, я́ко прия́ти и́мате от Бо́га проше́ния, или́ неприя́ти, а́ще не супроти́вно ничто́же, и кроме́ су́ще Бо́жия про́сим во́ли: но пра́ведная и́щем вся и духо́вная. Прия́ти у́бо вся́ко и́мамы вся сия́ от Бо́га. Ему́же подоба́ет вся́ка сла́ва, честь и поклоне́ние, ны́не и при́сно и во ве́ки веко́в. Ами́нь.