Рече́ Госпо́дь, всяк и́же испове́сть о Мне пред челове́ки, испове́м и Аз о нем пред Отце́м мои́м небе́сным. Толкова́ние. Не то́кмо у́бо от души́ и помышле́ния ве́ру и́щет Христо́с, но и от уст и́щет испове́дания. Глаго́лет бо вели́кий апо́стол, я́ко се́рдцем у́бо ве́руется в пра́вду, усты́ же испове́дуется во спасе́ние. Поне́же бо сугу́бь есть челове́к, сугу́бо есть и освяще́ние. Освяща́ет бо ся ду́ша ве́рою, освяща́ет же ся и те́ло испове́данием. Не рече́ же я́ко и́же испове́сть Мене́, но о Мне, си́речь Мое́ю си́лою и благода́тию. Вы́шним бо заступле́ние и благода́тию помага́емь испове́дающий, и Бо́жиею по́мощию и споспеше́нием дерза́ет вся́кий ве́рующий пра́во. Испове́м же и аз о нем, си́речь, се испове́дающаго Мя ве́рою с де́лы же его́ и с дея́ньми до́брыми, о дерзнове́нии его́ е́же к мучи́телем и гони́телем показа́, испове́м и Аз глаго́лет Госпо́дь. Кроме́ бо Бо́жия си́лы и по́мощи, ниже́ мы се испра́вити мо́жем, ниже́ Бог нас прие́млет, кроме́ на́шея ве́ры и потща́ния и хоте́ния и изволе́ния. Тре́буем же и мы пре́жде боже́ственыя по́мощи, и си́лы и посо́бия. Кроме́ бо его́ ничто́ же испра́вити мо́жем, и Бог на́ше изволе́ние и потща́ние хо́щет. А́ще у́бо мы не изво́лим, ниже́ потщи́мся, ниже́ Бог нас прие́млет. Испове́даем же и мы о Бо́зе, си́речь по́мощию Его́ и заступле́нием и благода́тию, и Бог о нас, си́речь на́шим изволе́нием и тща́нием и по́двигом, и чи́стою ве́рою. А́ще бо не да́мы Бо́гу вины́, ниже́ испове́мы, ниже́ Бог испове́дати и́мать о нас: но и па́че отри́нути и́мать нас. Ева́нгелие. Любя́й ду́шу свою́, погуби́т ю. Толкова́ние. Сла́дко есть житие́ се не всем челове́ком, но пригвожде́ным к нему́, и связа́ние не́которое есть к настоя́щим обы́чай. Возводя́ же у́бо нас на свобожде́ние Госпо́дь, сия́ глаго́лет, я́ко любя́й ду́шу свою́ погуби́т ю. Кто же есть любя́й ду́шу свою́; И́же вожделе́ния ея́ не подо́бная творя́й, и подава́яй ей па́че потре́бы, сей погубля́ет ду́шу свою́. Ева́нгелие. Ненави́дяй же ду́шу свою́, сей спасе́т ю. Толкова́ние. Кто же есть ненави́дяй ду́шу свою́; Не послу́шаяй ея́, ху́лная и вре́дная и́щущи. Но отвраща́яся и ненави́дяй ея́. Я́коже бо ненави́димаго нигла́са хо́щем слы́шати, ниже́ о́браза ви́дети сла́дко, та́ко же и души́ отвраща́тися зе́лно подоба́ет, егда́ повелева́ет нам твори́ти супроти́вная во́ли Бо́жией. И́же бо мнит я́ко промышля́ет зде о души́ свое́й, и не хо́щет ю в беды́ и напа́сти преда́ти, и на тесноты́ и ско́рби и искуше́ния, погубля́ет ю в бу́дущем вре́мени. Предая́й же ду́щу свою́ на беды́ и напа́сти, на тесноты́ же и ско́рби и искуше́ния в ны́нешнем ве́це, мно́гия и вели́кия плоды́ собира́ет в бу́дущем ве́це. Сия́ ж рече́ Госпо́дь, не я́ко души́ стра́ждущи зде, но вожделе́ние душе́вное нарица́ет, е́же мни́тся содержа́ти и промышля́ти о ней, не предая́ в напа́сти те́ло. Есть у́бо естество́м челове́к боя́ся сме́рти, пресла́вноже се есть, я́ко и́же Христо́вою ве́рою оболче́н есть, и есте́ственая презира́ет, и сме́рти не бои́тся Христа́ ра́ди. А́ще у́бо Христо́с спасе́ния ра́ди на́шего, и на́шея ра́ди по́лзы предаде́ себе́ на смерть, ка́ко у́бо не хра́брыя души́ се есть, е́же спасе́ния своего́ ра́ди привре́менное житие́ се кто презри́т: и пло́тьнаго ра́ди умира́ния, неувяда́емое и безконе́чное житие́, и блаже́нное о́но стя́жет. Си́и бо суть ненави́дящии ду́шы своя́, и́же предаю́ще себе́ на смерть любве́ ра́ди Христо́вы, и о и́стине и пра́вде, и сохраня́юще себе́ нескве́рны, ве́чных ра́ди благи́х. И в поще́ниях у́бо живу́щии, ненави́дят душ свои́х, не побежа́ющеся лю́бо пло́тными сладостьми́. Христо́с бо е́же сотвори́ о всех, ра́ди спасе́ния пострада́в, нам о́браз хра́брости сотвори́л есть, уча́ше ве́рующыя Вонь, и жела́ющыя бу́дущих благ, тща́тися и подвиза́тися и доброде́тели исправля́ти. Хотя́щи бо после́довати Христу́, ра́вну ему́ хра́брость и дерзнове́ние показа́ти до́лжни суть. Та́ко бо прия́ти и́мут побежде́ния венцы́ и натрижне́ния, нетле́нная и ве́чная блага́я: И поне́же на́шего спасе́ния нача́лник, не сла́вою и пи́щею поживе́, но безче́стием и трудо́м: та́ко у́бо и нам подоба́ет бра́тие без ско́рби твори́ти, да́же в ме́сто о́но пости́гнем, и боже́ственей сла́ве о́ной прича́стницы бу́дем и наслажде́нию. Кото́рой же че́сти досто́йни есми́ бу́дем, не сподобля́ющеся ра́вно пострада́ти со Влады́кою; Но в ни́хже яви́ся Христо́с пожи́в, в те́хже до́лжни суть пребыва́ти и послед́ующии Ему́ я́коже пи́шет, иде́же есмь Аз, та́мо и слуга́ мой бу́дет: не ме́стом, но нра́вом доброде́телным: не богоподо́бными са́ны, невозмо́жно бо есть челове́ку и́стинно и есте́ствено Бо́гу уподо́битися, но в ни́хже есть досто́йно и возмо́жно челове́ку пребыва́ти. Не запреща́ти мо́рю, но е́же бы́ти смире́нем и кро́тцем, и терпя́щем досажде́ние. Ко́ждо у́бо нас бра́тие по дарова́нней ему́ слу́жбе, да тщи́тся и да бдит: да́же на о́бщую слу́жбу подвиза́ется, и созида́ется на оби́телище Бо́жие ду́хом. Глаго́лет бо боже́ственый апо́стол, и́же назида́ет на основа́нии сем, зла́то, и сребро́, и ка́мение че́стно. Дрова́ траву́, тро́стие, сте́блие, ко́ждаго же де́ло явле́нно бу́дет. День бо показа́ти и́мать, поне́же огне́м откры́тися и́мать. И ко́ждаго де́ло яково́ же есть, огнь искуси́ти и́мать. Смо́трим у́бо что глаго́лет; Доброде́тели и блага́я де́ла, подо́бит зла́ту и сребру́ и честно́му ка́мению. Зло́бу же и грех, прилага́ет дрова́м и траве́ и сте́блию. Сия́ у́бо зло́бы и греха́ де́ла, сгоре́ти и́мут. Тве́рдая же и кре́пкая доброде́тели и пра́вды де́ла, спасе́на бу́дут. А́щели же кто не хо́щет де́лати, да не яст. Слы́шим у́бо рече́ не́кия в вас безчи́нно ходя́щыя и не де́лающыя, но лука́вно обходя́щыя, таковы́м у́бо поруча́ем, и мо́лим о Го́споде Иису́се Христе́, да с безмо́лвием де́лающе хлеб свой ядя́т. Безчи́нны нарица́ет боже́ственый апо́стол не де́лающыя. И́бо не благогове́ин безчи́нен быва́ет, и в словесе́х не воздержли́в, и на уничиже́ние гото́в: про́чее же и на монасты́рьское послуша́ние неподо́бен, и ле́ности раб. Поруча́ет же у́бо спря́товатися от такова́го и отлуча́тися, я́ко от прия́тнаго неду́га. И́бо леня́щиися и не де́лающии, гордели́ви суть и презо́рницы, и апо́стольским преда́нием разруши́тели. Боже́ственый бо апо́стол глаго́лет, я́ко ту́не хле́ба не изъядо́хом ни от кого́же, но трудо́м и по́двигом в нощи́ и во дни де́лающе, е́же не отяготи́ти никого́же. Учи́тель язы́ком, пропове́датель Ева́нгелия Христо́ва, вознесе́ный да́же до тре́тияго небесе́ глаго́ляй, я́ко Госпо́дь повеле́л есть, и́же Ева́нгелие пропове́дает, от Ева́нгелия жи́ти, трудо́м и по́двигом в нощи́ и во дни работа́ет, я́ко не отяготи́ти никого́же: мы же что и́мамы сотвори́ти леня́щиися на де́ла духо́вная, и теле́снаго поко́я и́щуще, ниже́ пропове́дание ева́нгельское дано́ бысть нам, ниже́ о це́рквах попече́ние: но то́кмо о души́ свое́й попече́ние. От ле́ности бо пра́здность быва́ет, от пра́здности же присмотре́ние, от присмотре́ния же безчи́ние, от безчи́ния же вся́кая зла. Таковы́м же поруча́ем в безмо́лвии де́лающе хле́ба своего́ я́сти. А́щели же кто не хо́щет де́лати, ни да яст. Сим бо апо́стольским повеле́нием отцы́ на́ши после́дующе, ни во еди́но же вре́мя пра́здным бы́ти мни́хом повелева́ют, па́чеже ю́ным еще́ су́щим: ве́дуще я́ко терпе́ния ра́ди и дел ле́ность отгоня́ют, и пи́щу свою́ пристроя́ют, и тре́бующим помога́ют. Не то́кмо бо свои́х ра́ди потре́б де́лают, но и стра́нным и су́щим в темни́цах и ни́щим даю́т, ве́рующе я́ко таково́е благо́е де́ло, же́ртва свя́та и благоприя́тна Бо́гу быва́ет. И се у́бо глаго́лют отцы́, я́ко де́лающий с еди́нем бе́сом бо́рется, и тем оскорбля́ем есть. Пра́здностный же ты́сящими ду́хи нечи́стыми пленя́емь быва́ет. Сия́ же вся глаго́лю бра́тие, воспомина́я вам, я́ко тща́ния и промышле́ния и терпе́ния потре́ба есть мно́га. Не у́бо начны́й до́брое де́ло той есть блаже́н, но и́же до конца́ в нем пребы́сть. И́бо по́лзающий по земли́ змий злонача́лный враг наш дия́вол, при́сно на́шу пя́ту зрит, си́речь на́шего жития́ исхожде́нию наве́тует, и до конца́ живота́ на́шего, препина́ти начина́ет нас. И сего́ ра́ди нача́ти до́бре ничто́же нас и́мать по́льзовати, ниже́ теплота́ пе́рваго исхожде́ния от ми́ра по́льзу нам исхода́таити мо́жет, а́ще коне́ц таковы́й же не бу́дет. И Христо́во же у́бо смире́ние е́же обеща́стеся пред ним, не и́нако укреплено́ бу́дет, а́ще не до конца́ та́ко пока́жете е. Сего́ ра́ди молю́ся вам бра́тие, а́ще рабо́тати Бо́гу пришли́ есте́, угото́вайте сердца́ ва́ша не на безпеча́лие, не на поко́й и пи́щу, но на искуше́ния и ско́рби: мно́гими бо скорбьми́ подоба́ет нам вни́ти в Ца́рство небе́сное. И у́зок и приско́рбен есть путь вводя́щий в живо́т ве́чный, и ма́ли суть обрета́ющии его́. Внима́йте у́бо тща́щимся до́брым бра́тиям, и показа́нием и де́лом о́нех подо́битеся, и направля́йте свое́ житие́. Не внима́йте лени́вым и презо́рным, ниже́ подо́битеся неве́рным, не послушли́вым и прекосло́вным и досади́телем бра́тии, а́ще и мно́зи суть. Мно́зи бо рече́ зва́нни, ма́ли же избра́нни. И ма́ло ста́до, ему́же изво́лил есть Оте́ц да́ти Ца́рьствие. Да не мне́ти и́мать я́ко мал грех есть е́же обеща́тися на соверше́ние, и лени́вым и неради́вым после́довати. Нача́ло бо на́шего спасе́ния бра́тие страх есть Бо́жий, от него́же ражда́ется благо́е послуша́ние, и от сего́ послуша́ния ражда́ется повинове́ние, и презре́ние всех мирски́х веще́й, от сего́ бо смире́ние начина́ется, от смире́ния же ражда́ется свои́х хоте́ний умерщве́ние, от умерщве́ния же хоте́ний сластолю́бная коре́ния увяда́ют, от сих же вся́кая поврежде́ния душе́вная отлага́ются: отложе́нием же вредо́в душе́вных, доброде́телей плоды́ творя́т и расту́т: возра́стшим же доброде́телем, чистота́ се́рдца, си́речь апо́стольское соверше́ние прихо́дит, от него́же у́бо сподо́бимся на соверше́ние взы́ти. Вся́ко почита́ние, вся́ко благоразу́мие, и вся́ко благогове́ние и повинова́ние и благопослуша́ние, к настоя́телем и игу́меном ва́шим име́йте. Ве́рующе свято́му апо́столу глаго́лющему, вся́ка душа́ власте́м предержа́щим да повину́ется. Несть бо власть а́ще не от Бо́га, су́щия же вла́сти от Бо́га учине́ни суть: те́мже противля́яйся вла́сти, Бо́жию повеле́нию противля́ется. Супротивля́ющиижеся, себе́ грех приобря́щут. Нача́лницы бо не суть страх до́брым де́лом, но злым. Хо́щеши же ли не боя́тися вла́сти, благо́е твори́, и похвале́ние име́ти и́маши от него́, Бо́жий бо служи́тель есть тебе́ на благо́е. А́щели же зло́е де́лаеши, бо́йся, не ту́не бо мече́м опоясу́ется, Бо́жий бо слуга́ есть, на гнев отмсти́тель, на творя́щыя зла́я. Сего́ ра́ди ну́жда есть повинова́тися, не то́кмо гне́ва ра́ди, но и со́вести ра́ди. И па́ки глаго́лет, мо́лим у́бо вас бра́тие, ве́дати тружда́ющихся в вас, и предстоя́щих о Го́споде и уча́щих вас, и име́йте их изли́ше любо́вию, дел ра́ди их. И па́ки, послу́шайте игу́мен ва́шых и повину́йтеся им, ти́и бо бдят о душя́х ва́ших, я́ко сло́во хотя́ще возда́ти. Предста́тели бо ва́ши сло́во хотя́т возда́ти о ко́емждо вас бра́тие. Сего́ ра́ди вседу́шно и усе́рдно послуша́ние показу́йте к ним, да без отве́та бу́дете в день суда́ Христо́ва, к тому́ же и друг со дру́гом любо́вь и мир и совокупле́ние име́йте, друг за дру́га боля́ще, любохрани́телным хоте́нием и завеща́нием. Друг дру́га укрепля́юще, науча́юще, утеша́юще, терпя́ще друг дру́гу. И е́же про́сто рещи́, все е́же бла́го и спасе́но, и ели́ка и́стинна, ели́ка честна́, ели́ка пра́ведна, ели́ка чи́ста, ели́ка любе́зна, ели́ка сла́вна, е́же доброде́тель и е́же похвала́, сия́ помышля́йте, и сия́ твори́те я́же научи́стеся, и прия́сте, и слы́шасте, и ви́десте, де́ема и глаго́лема отцы́ и учи́тели ва́шими, да́же Ца́рство небе́сное насле́дите. И той же сам игу́мен я́ко оте́ц о де́тех при́сных да промышля́ет о вас, и посеща́ет ко́ждаго вас потре́бы, и подо́бное исцеле́ние и промышле́ние проти́ву си́лы принесе́т. И е́же забве́нием неду́гующаго у́да, или́ теле́сно или́ душе́вно, любо́вию и о́тчим благоразу́мием понесе́т. Всех ми́луя, о всех промышля́я, терпя́ всех, прие́мля всех, науча́я и утеша́я, поучава́я ра́зуму. Боля́щих исцеля́я, неду́гующих укрепля́я, малоду́шствующих утеша́я, согреша́ющих обраща́я. Се́дмьдесят седмери́чно проща́я по за́поведи Госпо́дни. Поле́зно бо есть нам, подо́бящеся Го́сподеви, ми́лостивным и снизхо́дным сужде́нным бы́ти, не́жели коне́чную пра́вину соблюда́ти, я́ко неми́лостивным и братоненави́стником осужде́ным бы́ти: и́мже бо судо́м су́дите, тем и осужде́ни бу́дете: и яково́ю ме́рою ме́рите, отме́рится вам. Сего́ рад́и молю́ вас бра́тие пре́жде про́чих ины́х доброде́телей стя́жем смире́ние. Всяк бо смиря́яй себе́ вознесе́тся, и возвыша́яй себе́ смири́тся: и смиреному́дрыя сла́вою воздви́гнет Госпо́дь. И́же а́ще кто в вас па́че про́чих бо́лши есть, да невелему́дрствует, да не над худе́йшими превозноша́ется, ле́та вся́ко предлага́я, или́ де́ло, или́ сло́во, или́ благопле́меньство, или́ сан, или́ приноше́ние стяжа́ний не́коих, или́ зла́то: но он па́че да почита́емь быва́ет в вас, и́же на слу́жбы прия́тен, его́же пе́рвая бра́тия и сам игу́мен избере́т, а́ще и млад бу́дет постри́глся, а́ще и прост есть, и о вне́шних веще́х не иску́сен, ни еди́но бо поврежде́ние от сего́ монастырю́ быва́ет: Поне́же бо Бог мо́жет и от ка́мения ча́да воздви́гнути Авраа́му, и слепы́м дая́ти прему́дрость, и сло́во безслове́сным. Поне́же бо всих благоволи́т Бог мно́жае па́че, не́жели о хва́лящихся свое́ю прему́дростию и си́лою, и благоро́дием и бога́тьством. Бу́яя бо рече́ ми́ра и не́мощная и уничиже́нная избра́ Бог, да́же прему́дрыя и си́лныя и высо́кия посрами́т, и не су́щая да́же су́щая упраздни́т. Блаже́н челове́к иже житие́ высо́ко име́яй, смире́ну же му́дрость. Нечи́ст же у́бо пред Го́сподем всяк высокосерде́чный. И́бо Госпо́дь го́рдым супротивля́ется, смире́нным же дае́т благода́ть. Смири́ у́бо себе́ бра́тие ны́не, да́же вознесе́мся. Смире́ние бо дверь небе́снаго Ца́рьствия есть. Про́чее же супроти́вная не содержи́м, ниже́ на ся совеща́емся, и превозноша́емся и горди́мся. Се бо есть безу́мие и превозноше́ние, не то́кмо бо не прилага́ет нам блага́я, но и я́же и́мамы растача́ет и растлева́ет и погубля́ет. Смиреному́дрие же не то́кмо су́щая добра́, и потре́бная не погубля́ет, но и не су́щая блага́я прилага́ет и спасе́ная. Сим у́бо возревну́ем, да́же и жития́ сего́ наслади́мся, и бу́дущую сла́ву и ра́дость получи́м, и ве́чным благи́м насле́дницы бу́дем, благода́тию и́стиннаго Бо́га и Спа́са на́шего Иису́са Христа́. Ему́же подоба́ет сла́ва и держа́ва, со Отце́м и Святы́м Ду́хом, ны́не и при́сно и во ве́ки веко́в, Ами́нь.