Иде́же Влады́ка, я́ко Исто́чник животу́, теле́сно прии́дет, и мно́гия и разли́чныя источа́ет ка́пли человеколю́бия. Взы́де на го́ру со ученики́ по боже́ственном Воскресе́нии, источа́я струи́. Сни́де отту́ду, и разли́чными неду́ги одержи́мых, ту́чи исцеле́ния пролива́я. Ста при о́вчии купе́ли, и разсла́бленнаго здра́вия напои́. Вни́де в дом Петро́в, и те́щу его́ огне́м жего́му прохлади́. Сни́де в Вифа́нию, и ча́шу живота́ четверодне́внаго напои́. Сре́те прокаже́ннаго, и мозо́лием стра́сти гу́бою человеколю́бия отре́. Ста в собо́рищи, и су́ху ру́ку в прозябе́ние покланя́емое де́лати сотвори́. Прии́де на брак, и пресла́вное преложе́ние во́ду в вино́ в возва́нных почерпе́. И ина́я чудеса́ мно́га и безчи́сленна, я́же исчести́ неудо́бь. Взы́де днесь в це́рковь, и ре́ки уче́ния слы́шащым источа́ет. Слы́шасте у́бо Ева́нгельское уче́ние, и́же всегда́ нам, и посреде́ пра́здника, в высо́ком седа́лищи стоя́ и благовесту́я, и велегла́сно взыва́ше, я́коже не́которой трубе́ гла́сом ловитву́ восприе́м, его́же и рече́: пра́зднику преполови́вшуся, взы́де Иису́с в це́рковь и уча́ше, исполни́ти человеколю́бия де́ло. Не рече́ гоне́нию и ско́рби прише́дшу, или́ гоне́нию, или́ ле́ности обдержа́ше ученики́, и таки́х ины́х по́вестех, о ни́хже всегда́ апо́стольское дея́ние повесту́ет. Но что рече́; Пра́зднику преполо́вльшуся. Рцы О Иоа́нне, И́род ру́це возложи́, сове́т лука́вный, па́ки собира́ет собо́р, па́ки в преда́тельство Иу́да. Не рече́, несть, но что; Взы́де Иису́с в це́рковь и уча́ше. Подо́бна Христу́, предложи́л еси́ Христо́ви, досто́йно дея́ние совокупи́ Ему́. Де́ло богосло́ву, е́же глаго́лати. Учи́телю, е́же учи́ти Христу́. Поле́зная слы́шащым предлага́я словеса́. Взы́де Иису́с в це́рковь и уча́ше. О вели́кое чу́до, О́ле неизме́нное человеколю́бие. Иде́же пома́ле ка́мением побива́шеся, ту слове́сное уче́ние побива́ющих обогатева́ше. Взы́де Иису́с в це́рковь и уча́ше. Иде́же взаконе́ние моисе́ово что́мо быва́ше, ту благода́тию прилага́ше уче́ния, Исполни́тель бысть зако́ну. Той бо сам во Ева́нгелии взыва́ше, глаго́ля: не приидо́х разори́ти зако́на, но испо́лнити. И боже́ственный Па́вел, имы́ во усте́х свои́х Влады́ку глаго́люща, рече́: соверше́ние зако́ну Христо́с во оправда́ние. Се же в преполове́ние пра́здника взы́де Иису́с в це́рковь и уча́ше. Все уча́ ме́сто моли́товное. Ту же и оглаше́ния сотворя́ет, я́ко Сло́во словесе́, иде́же и лука́вый собра́ся собо́р. И́же по чи́ну мелхиседе́кову, Святи́тель взы́де во святи́лище и уча́ше. Мно́гим бо слы́шащым, и ни еди́ного от иуде́й слы́шаща. О ни́хже бо боже́ственный проро́к провозвеща́я, вопия́ше: о́чи и́мут, и не ви́дят, у́ши и́мут и не слы́шат. Взы́де Иису́с в це́рковь, и уча́ше, богопроти́вных безу́мие облича́я. Взы́де Иису́с во святи́лище и уча́ше, но жи́дове снидо́ша ве́рою. Се же преполо́вльшуся пра́зднику, взы́де на небе́сная, уче́ния откры́ет, и сете́й слове́сное от челове́к сотвори́ ловле́ние. Дивля́ху же ся иуде́е, глаго́люще: ка́ко сей весть кни́ги, не учи́вся; Дивля́хуся, но не ве́роваху. Чудя́хуся Исто́чнику прему́дрости, но не пока́яшася. Зло́бою испо́лнени су́ще и лука́вствием. Зря́ху Врача́, предлага́юща бы́лия цельбы́ и неду́гующа, и врачева́ния не прие́мляху. Ви́дяще Изба́вителя, и плене́ние любля́ху. Иму́ще ме́жду собо́ю кра́сныя цветы́, те́рние собира́ху. Приста́нищу прише́дшу, погиба́ху зле. Прему́дрости излива́ющу боже́ственная уче́ния, уби́йцы не восхоте́ша отмы́ти рук свои́х от кро́ве. Христу́ криле́ человеколю́бия простира́ющу, кры́тися не хотя́ху исча́дия ехи́днова. Колькра́ты, рече́ Госпо́дь во Ева́нгелии, восхоте́х собра́ти ча́да твоя́, я́коже ко́кошь птенцы́ своя́, и не восхоте́сте. Дивля́ху же ся жи́дове, глаго́люще: ка́ко сей весть кни́ги, не учи́вся; О́ле веще́х. Зако́н прочита́еши О жидови́не, и не зна́еши Зако́на уче́ния. И глаго́леши: ка́ко сей весть кни́ги, не научи́вся; Рцы, О вра́же И́стине, ка́ко Ада́м не научи́вся кни́гам, звере́м а́бие внеза́пу имена́ нарече́. Раба́ не вопроша́еши, и на Влады́ку сло́во полага́еши, глаголя́: ка́ко сей весть кни́ги, не научи́вся; Отвеща́ Иису́с и рече́: Мое́ уче́ние, несть Мое́, но посла́вшаго Мя Отца́. Когда́ же Бог по прехожде́нию посыла́ется от ме́ста на ме́сто; Когда́ же исполня́я вся́ческая, иде́же есть гряде́т; К жидо́м сло́во се, а не в тех учи́ти благоче́стно ве́дущих глаго́л. Мое́ уче́ние, несть мое́, но посла́вшаго мя Отца́. И́же ми с небесе́ свиде́тельствова, и пред все́ми ва́ми провозгласи́, глаго́ля: се А́гнец Бо́жий, взе́мляй грехи́ ми́ра. А́гнец бо вои́стинну Христо́с, вше́дый днесь в це́рковь, и́стинный глас, о не́мже Иоа́нн прорече́. Глас бо сей досто́ин словесе́ похвалы́. Свети́льник бо сый, со́лнечныя зари́ позна́. Я́ко Предте́ча провозвеща́я гряду́щаго, я́ко заря́ у́тро пропове́да, я́ко во́ин царе́во и́мя объявля́я. Се А́гнец Бо́жий, взе́мляй грехи́ ми́ра. Его́же у́бо А́гньца Де́вая без се́мени зача́т, и нетле́нно породи́. Я́сли же, я́ко зеленоно́сное по́ле прие́мше И́. Купе́ль Иорда́н, Иоа́нн крести́. Иу́да жидо́м продаде́, закла́ Пила́т. Гроб предста́ви, и мы снедо́хом. И обнаже́нии су́ще от преступле́ния ада́мля, всех оде́я све́тлою оде́ждею. Тому́ сла́ва и держа́ва, честь и покланя́ние, в безконе́чныя ве́ки, Ами́нь.