Ева́нгелие В после́дний день вели́кий пра́зника. Стоя́ше Иису́с, и возва́ глаго́ля. А́ще кто жа́жет да гряде́ть ко мне и пие́т. Ве́руяй в мя я́коже рече́ писа́ние, ре́ки от чре́ва его́ потеку́т во́ды жи́вы.

Толкова́ние Приходя́щим к про́поведи, и ве́рою внима́ющым. Жела́ние жа́жущых показова́ти подоба́ет. И толи́ко воспаля́ти вожделе́ние себе́. Та́ко бо возмо́гут и глаго́лемая, со мно́гым удержа́ти хране́нием. И́бо жа́жущии. Егда́ у́бо ча́шу во́змуть со мно́гым ю́ привлача́ют усе́рдием, и тогда́ упокая́ются. Си́це у́бо им боже́ственых послу́шающе слове́с. А́ще жа́жуще прии́мут. Никогда́ же тружа́ются, до́ндеже испию́т. Я́ко бо при́сно подоба́ет жада́ти и алка́ти. Блаже́нии рече́ а́лчущии и жа́жущии пра́вды. И зде рече́ Христо́с, а́ще кто жа́жет гряде́т ко мне и пие́ть. А е́же глаго́лет таково́ есть. Ни еди́наго ну́жею и си́лою привлача́ют. Но а́ще кто име́ет усе́рдие мно́го. А́ще кто распаля́ется жела́нием. Сего́ аз призыва́ю. Что же ра́ди назна́мена евангели́ст, я́ко в после́дний день вели́кий. И́бо и пе́рвый и коне́чный вели́к бе. Су́щия бо посреди́ наипа́че в наслаже́ние изнури́ша. Что у́бо ра́ди в после́дний глаѓолем. Зане́ в нем вси бе́ша со́брани. В пе́рвый бо не прии́де. И вину́ рек к бра́тиям. Но ниже́ во вторы́й и в тре́тий таково́ не́что глаго́лет. Я́ко бы не разруши́тися глаго́лемым. Хотя́щим им на пи́щу приходи́ти. В после́дний егда́ отъидо́ша в дом, напу́тия им дае́т ко спасе́нию и взыва́ет. О́во у́бо дерзнове́ние свое́ я́вляя. О́во же мно́гаго ра́ди наро́да, и явля́я я́ко о мы́сленом бесе́доваше питии́ наво́дит. Ве́руяй в мя я́коже рече́ писа́ние, ре́кы от чре́ва его́ потеку́т во́ды жи́вы чре́во зде се́рдце рече́ я́коже и и́нде рече́, и зако́н твой посреде́ чре́ва моего́. И где рече́ писа́ние я́ко от чре́ва его́ ре́кы потеку́т воды́ жи́вы нигде́же, что у́бо есть ве́руяй в мя рече́. Я́коже рече́ писа́ние. Зде то́чку положи́ти подоба́ет. Да бу́дет е́же ре́кы от чре́ва его́ потеку́т его́ изрече́ния. Поне́же бо глаго́лаху мнози. Сей есть Христо́с, Христо́с егда́ прии́дет. Еда́ мно́жайша зна́мения сотвори́т. Показу́я я́ко испра́влен подоба́ет ра́зум име́ти и не от зна́мений си́це. Я́коже от писа́ний уверя́тися. Мно́зи у́бо его́ и чудоде́йствующа ви́дяще, не я́ко Христа́ прия́ша хотя́ху же глаго́лати я́ко не писа́ния ли глаго́лют. Я́ко Христо́с от се́мени Дави́дова прихо́дит и сия́ горе́ и до́лу обраща́ше показа́ти хотя́. Я́ко не убега́ет е́же си́ми указа́ния. И па́ки их в писа́ния посыла́ет и́бо вы́ше глаго́лаше. Испыта́йте писа́ния. И па́ки есть пи́сано во проро́цех. И бу́дут вси учи́ми Бо́гом. И Моисе́й вас усуди́т, и зде я́коже рече́ писа́ние, ре́ки из чре́ва его́ потеку́т. Изооби́лное и незави́стное благода́ти гада́тельству е́же и и́нде рече́, исто́чник воды́ ска́чущия в живо́т ве́чный. Си́речь, мно́гу прии́мет благода́ть. И́нде у́бо живо́т ве́чный глаго́лет. Де́йствующь при́сно я́же бо духа благода́ть егда́ у́бо в мысль вни́дет и водрузи́тся. Вся́кого исто́чника па́че востека́ет. И не оскудева́ет. Ниже́ истоща́ется. Ниже́ стои́т вку́пе у́бо и неоску́дное подая́ния явля́я и неизрече́нное де́йства, исто́чник и ре́кы нарече́. Не еди́ну ре́ку но неизрече́ных, и та́мо же наводне́ние за е́же скака́ти предста́ви. И удиви́т у́бо кто глаго́лемое я́вьствене;

А́ще прему́дрость Стефа́нову. А́ще Петро́в язы́к. А́ще Па́влово устремле́ние помы́слит. Ка́ко ничто́же их пренесе́ ничто́же преложи́ ни наро́дов я́рость. Ни мучы́телей воста́ния. Ни де́моньскыя наве́ты. Ни сме́рти повседне́внии. Но я́коже ре́кы мно́гы шуме́нием носи́ми. Си́це и вся привле́кше отъидо́ша.

Сия́ же глаго́лаше о Ду́се рече́. Его́же хотя́ху приима́ти ве́рующыи. Не у́бо бе Дух Святы́й. Ка́ко у́бо проро́цы проро́чествоваша. И безчи́слена соде́лаша чудеса́. Апо́столи у́бо не ду́хом изгоня́ху, но я́же от него́ о́бластию. Я́коже сам рече́ а́ще аз о велзеву́ле изгоня́ю бе́сы. Сы́нове ва́ши о ком изго́нят. Сие́ же глаго́лаше я́вляя. Я́ко не вси ду́хом изгоня́ху пре́же креста́. Но я́же от него́ о́бластию. Егда́ у́бо их хотя́ше посыла́ти, тогда́ глаго́лаше приимите Дух Святый, и пакы прииде на них Дух Святы́й. И тогда́ зна́мения творя́ху. Егда́ же посла́ их, не рече́ даде́ им Дух Святы́й. Но даде́ им о́бласть глаго́ля. Прокаже́нныя очища́ите, бе́сы изгоня́ете, ме́ртвых воздвиза́ите. Ту́не прия́сте ту́не дади́те, о проро́цех же, у всех испове́дуется. Я́ко Ду́ха Свята́го дая́ние бе. Но бе сия́ благода́ть спря́тана и оста́влена. И от земли́ оскуде́вша. От дни о́ного от него́же рече́но бысть. Оставля́ется дом вашь пуст. И пре́же о́ногоже нача́ла приима́ше сия́ ре́дкость. Не ктому́ бо проро́к у них бе, ниже́ назира́ше их боже́ственая благода́ть!

Егда́ же настава́ше у́бо Дух Святы́й. Хотя́ше же про́чее излия́тися изооби́лне. Сего́ же разделе́ния нача́ло по кресте́ бысть. Не то́кмо изооби́лия, но и бо́лшых дарова́ний;

И́бо чудне́йше бе дарова́ние, я́коже егда́ глаго́лет. Не ве́сте ко́его ду́ха есть/е?. И па́кы не прия́сте бо дух рабо́ты. Но прия́сте дух сыноположе́ния. И́бо дре́внии ти у́бо дух име́ху, ины́м же не подая́ху. Апо́столи же, тмы испо́лниша Ду́ха Свята́го.

Поне́же у́бо сию́ хотя́ху приима́ти благода́ть. Не у́же бе дана́ сего́ ра́ди рече́ не у́бо бе Дух Святы́й. Поне́же бо и Госпо́дь о сей глаго́ля благода́ти евангели́ст глаго́лаше. Не у́бо бе Дух Святы́й. Си́речь дан, поне́же Иису́с, не у́ просла́вися. Сла́ву нарица́я крест. Поне́же бо врази́ бы́хом и согреши́вше. И лиша́еми да́ра Бо́жия и богоме́рзцы. Благода́ть же примире́ния бе указа́ние дар же не враго́м ниже́ ненави́димым но друго́м дае́тся и бла́го угоди́вшим. Подоба́ше пе́рвее принести́ ю́же о нас же́ртву и вражду́ во пло́ти разруши́ти. И бы́ти Бо́гу дру́гом, и тогда́ прия́ти дарова́ние.

А́ще бо при обеща́нии сие́ бысть су́щем ко Авраа́му. Мно́го па́че во благода́ти. И сие́ явля́я Па́вел глаго́лаше. А́ще бо от зако́на насле́дницы истощи́ся ве́ра. Зако́н бо гнев соде́ловает; А е́же глаго́лет таково́ есть. Обеща́ Бог Авраа́му и се́мени его́ да́ти зе́млю. Но не досто́йни бе́ша обеща́ния отро́ди. И от свои́х не возмого́ша благоугоди́ти трудо́в сего́ ра́ди вни́де ве́ра вещь удо́бна. Да благода́ть привлече́ть. И не отпа́дут обе́ты, и глаго́лет сего́ ра́ди от ве́ры. Да по благода́ти во е́же бы́ти изве́стну обеща́нию. Сего́ ра́ди по благода́ти. Поне́же от пото́в не возмого́ша;

Что же ра́ди рек по писа́ниих, ненави́дит и сведе́тельство, зане́ растле́нен их разуме́ бе. О́ви бо глаго́лаху, сей есть проро́к. Ини́и же, льстит наро́да, ини́и глаго́лаху, не от Галиле́я Христо́с прихо́дит. Но от Вифлее́мскыя ве́си. Ини́и же глаго́лаху, Христо́с егда́ прихо́дит. Никто́же весть отку́ду есть и разли́чен бе ра́зум. А́кы во мно́жестве смуще́нне. Ниже́ бо опа́сне внима́ху глаго́лемым, ниже́ ра́ди е́же навы́кнути. Сего́ ра́ди сим у́бо ничто́же отвещава́ет. А́ще и глаго́лют, егда́ Христо́с от Галиле́я прихо́дит, Нафана́ила же зе́лнейше ре́кша и уязви́телнейше. От Назаре́та мо́жет ли что бла́го бы́ти. Похвали́л есть я́ко вои́стинну изра́ильтянина. Си́и бо и к Никоди́му ре́кше, испыта́й и вижь. Я́ко от Галиле́я проро́к не воста́. Не уве́дети и́щуще глаго́лаху но про́сте преврати́ти ю́же о Христе́ сла́ву о́нже и́стинны сый рачи́тель. И дре́вняя вся опа́сне све́дый. Сие́ глаго́лаше си́и же ко еди́ному то́кмо зря́ху, е́же преврати́ти я́ко не Христо́с. Есть те́мже их ниже́ откры́. И́же бо и себе́ сопроти́вная глаго́люще. И овогда́ у́бо никто́же весть отку́ду прихо́дит. Овогда́же от Вифлее́ма. Благоявле́нно я́ко и уве́девше, спроти́вни бе́ша. Бу́ди бо ме́ста не ве́дяху воспита́ния ра́ди е́же от Назаре́та. А́ще и ниже́ сие́ проще́ние имя́ше, не та́мо бо роди́ся. Еда́ и ро́да не ве́дяху. Я́ко от до́му и оте́чества Дави́дова; Ка́ко у́бо глаго́лаху не от се́мени Дави́дова прихо́дит Христо́с, но и сие́ о́ному спокры́ти хотя́ху. Злоде́йственне вся веща́юще;

Что ра́ди не приступи́вше ре́ша. Поне́же ины́м у́бо всем чуди́мся. Повелева́еши же тебе́ покаря́тися по писа́ниих, рцы ка́ко писа́ния у́бо глаго́лет. Я́ко от Вифлее́ма подоба́ет приити́ Христу́. Ты же от Галиле́я прише́л еси. Но ничто́же сих ре́ша но вся лука́вая веща́ют!

Я́ко бо не и́щуще ниже́ уве́дети хотя́ще. А́бие наведе́ евангели́ст. Я́ко не́цыи хотя́ху я́ти его́. И никто́же возложи́ Нань ру́ку свою́. А́ще бо и ничто́же и́но. Сие́ у́бо само́е дово́лно бе во умиле́ние их возвести́. Но не умили́шася я́коже рече́ проро́к. Раздели́шася и не умили́шася. Таково́(я?) есть зло́ба. И не еди́ному же хо́щет уступа́ти к еди́ному зрит то́кмо я́ко бы наве́туемаго уби́ти. Но что рече́ писа́ние, и скова́вый ров бли́жнему, впаде́т в него́ е́же и тогда́ бысть. Они́ бо хотя́ху его́ уби́ти. Я́ко у́бо погаша́юще про́поведь. Бысть же сопроти́вно про́поведь бо цвете́т Христо́вою благода́тию. А яже онех вся погасоша и погибоша. И отечества. И свобо́ды. И осла́бы. И слу́жбы испадо́ша. И вся́кого лиши́ша(ся) благоде́ньствия, и би́ша раби́ и пле́ницы.

Нравоуче́ние, 51. О е́же не зле сопроти́в твори́ти.

Сия́ у́бо ве́дяще. Никогда́ же да наве́туем ины́м, и ве́девше я́ко са́ми на себе́ изощря́ем мечь. И глубоча́йшую себе́ дае́м я́зву. Но опеча́лил есть кто и хо́щещи ему́ отмсти́т, не отмща́й. Си́це бо отмьсти́ти возмо́жеши. А́ще же отмьсти́ши, не отмща́й. И да не вознепщу́еши гада́ние бы́ти рече́нное, но и́стинно сло́во. Ка́ко ли и кои́м о́бразом, я́ко не отмща́я Бо́га ему́ надста́ви вра́га. Отмща́я же, не ктому́. Мне бо отмще́ние, аз возда́м глаго́лет Госпо́дь.

А́ще бо рабо́в име́ем и а́ще межь собо́ю срази́вшеся ни ка́зни и му́кы нам попустя́т. Но себе́ повелева́ют. А́ще и тма́ми присту́пят, не то́кмо не отмща́ем, но и негоду́ем. Бе́глече глаго́люще и кру́тниче. Все нам попусти́ти подоба́ше. Но поне́же себе́ предвари́в отмсти́л еси́. Ничто́же стужа́й про́чее. Мно́го па́че Бог запове́давый ему́ попуща́т всех, сие́ рече́т. Ка́ко бо не безме́стно. Егда́ от отроко́в на́шых толи́ко истязу́ем любому́дрие и послуша́ние. Влады́це же не попуща́ем и́же хо́щем рабо́м нам попуща́ти.

Сия́ же глаго́лю, за усе́рдное на́ше и оне́х му́це, поне́же у́бо вои́стинну любому́дрствующему. Ниже́ сие́ подоба́ет твори́ти, но пра/оща́ти и оставля́ти согреше́ния а́ще и не о́но бы́ло бы вели́кое натриж(е)не́ние. Оставле́ние вме́сто сих приима́ти!

А́ще бо рцы ми зазира́еши согреши́вшему, что ра́ди и сам согреши́(в)шими в та́же впа́даеши досади́л есть не сопроти́в досади́ши. Поне́же себе́ досади́л еси́. Уязви́л, не сопроти́в уязви́ши. Поне́же разли́чное нигде́же. Опеча́лил не сопроти́в опеча́лиши. Поне́же приобре́тение ни еди́ноже. Но был еси́ о́ному па́ки ра́вен. Си́це его́ обрати́ти возмо́жеши. А́ще с ти́хостию и кро́тце претерпи́ши. Си́це его́ усрами́ши. Си́це его́ отсещи́ гне́ва.

Никто́же злым зло́е исцеля́ет. Но благы́м зло́е. Сия́ от е́ллин не́цыи любому́дрствуют. Да усрами́мся у́бо а́ще у́ е́ллин несмы́сленных толи́ку су́щу любому́дрию. Мы ху́жши яви́мся. Мно́зи оби́дени бы́ша, и претерпе́ша. Мно́зи оклеве́тани бы́ша, и не отмьсти́ша, наве́товани бы́ша, и благоде́тельствоваша страх же не мал да не бо́лши нас у них по житию́ обря́щутся. И зе́лнейшу нам му́ку соде́лают.

Егда́ бо и́же ду́ха причасти́вшеся ца́рствие ча́юще. О небесе́х любому́дрствующеи. Не боя́щеися гее́нны. Повелева́еми и а́нгели бы́ти. Та́инств наслади́вшеися. Ниже́ в ту же оне́м дости́гне доброде́тель. Кою́ наде́жу прии́ме(м). А́ще бо иуде́ев превосходи́ти подоба́ет, а́ще бо не преизбу́дет ва́ша пра́вда рече́ па́че кни́жник и фарисе́й. Не вни́дете в ца́рствие небе́сное. Мно́го па́че е́ллин. А́ще фарисе́ов, мно́го па́че неве́рных. А́ще бо не превосходя́щым нам оне́х жи́тельство. Затворе́на суть ца́рствия врата́!

Егда́ е́ллин яви́мся го́рше, ка́ко сподо́бимся сего́ получи́ти. Вся́ку у́бо го́ресть и гнев и я́рость. Да отри́нем, та́яже бо глаго́лати, мне у́бо не ле́ностно. Вам же изве́стно. И́бо и врачи́ те́мже мно́жицею де́йствуют чарова́нием. И мы не преста́нем та́яже воглаша́юще, воспомина́юще, уча́ще моля́ще. И́бо мно́га жите́йскых веще́й и мгла, и забы́тие нам вотворя́юща. И уче́ния тре́ба есть ча́стаго. Да́же у́бо не всу́е ниже́ ту́не зде собира́емся. Е́же де́лы указа́ние да подади́м. Да и бу́дущых получы́м благы́х. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва о Святы́м Ду́хом, ны́не и при́сно и во ве́кы веко́в, Ами́нь.