Ева́нгелие Приидо́шя у́бо слугы́ ко архиере́ом и фарисе́ом. И ре́ша им они́. Что ра́ди не приведо́сте его́. Отвеща́ша у́бо слугы́, никогда́ же си́це глаго́ла челове́к.

Толкова́ние Ничто́же и́стинны просте́йше, а́ще не злоде́йствуемым, я́коже у́бо злоде́йствующых, ничто́же не удо́бнейше. Се бо фарисе́и у́бо и кни́жницы. И́же не́гли мня́щеся бы́ти прему́дрейши, со пребыва́юще при́сно Христу́ наве́та ра́ди, и чудеса́ зря́ще и писа́ния прочита́юще. Ничто́же по́лзвовашяся. Но и вреди́шася, служы́телие же ничто́же о сих име́юще рещы́, от еди́ного и то́кмо наро́ду уче́ния я́ти бы́ша. И отше́дше я́ко бы его́ связа́ти. Возврати́шася связа́вшеся чудесе́м не ра́зуму их чуди́тися то́кмо есть я́ко зна́мений не востре́боваша, но от уче́ния еди́ного я́ти бы́ша. Не бо у́бо ре́ша я́ко никогда́ глаго́ла си́це челове́к не у́бо ра́зуму их есть чуди́тися то́кмо, но и дерзнове́нию я́ко к посла́вшым сия́ глаго́лаху к фарисе́ом, к ра́тующым. И вся о сем де́йствующым. Приидо́шя бо рече́ слугы́. И глаго́лаху им фарисе́и, что ра́ди не приведо́сте его́. А е́же приити́. Мно́го бо́лше бе е́же пребы́ти тогда́ бо свободи́лися бы сих ско́рби ны́не пропове́дницы быва́ют Христо́вы прему́дрости. И бо́лше показу́ют дерзнове́ние, и не глаго́лют не возмого́хом наро́да ра́ди зане́ я́ко проро́ку внима́ху. Но что. Никогда́ же глаго́ла си́це челове́к. А́ще и можа́ху о́но рещи́ отвеща́ние. Но изъявля́ют свое́ пра́вое изволе́ние. Сие́ бо не чудя́щыхся оне́х то́кмо бе. Но и сих оклеве́тающих. Я́ко посла́ша вя́жущых его́ их, его́же послу́шати подоба́ше. А́ще и ниже́ до́лгаго слы́шаша народоуче́ния но кро́ткаго. Егда́ бо мысль нелицеприя́тна бу́дет. Ниже́ до́лгых слове́с тре́ба есть. Таково́ бо и́стина. Что у́бо фарисе́и. Потре́бно умили́тися, сопроти́вное творя́т сопроти́в порица́ют им. Еда́ и вы заблуди́ли есте́ глаго́люще; Еще́ их ласка́ют, и не тя́жестне де́йствуют сло́вом. Боя́щеся да не коне́чне одеру́тся но я́рость явля́ют; и со шаде́нием веща́ют. Потре́бо? вопроси́ти что глаго́лав. И подиви́тися рече́нным. Сие́ у́бо не творя́т: ве́дяху бо я́ко я́тися имя́ху. От зна́мения зело́ несмы́сленаго их смышля́ют. Что бо ра́ди никто́же от князе́й ве́рова рече́ в него́, сие́ у́бо Христо́ви ли порица́еши рцы ми. А не ве́ровавшим. Но наро́д рече́ не ве́дый зако́на; про́кляти суть. Сие́ бо вам бо́лше осуже́ние. Я́ко наро́д у́бо ве́рова. Вы же не ве́ровасте. И у́бо я́же ве́дящых зако́на творя́ху они́, ка́ко у́бо про́кляти суть. Вы бо трекля́ти не блюду́щеи зако́на, а не они́ зако́ну покаря́ющеися. Подоба́ше же не от неве́рующых осужа́ти неве́руемаго, непра́в бо о́браз сей. Поне́же и вы не ве́ровасте Бо́гу, я́коже Па́вел рече́. Что бо а́ще не ве́роваша не́цыи. Еда́ неве́рие их ве́ру Бо́жию упразни́т. Не бу́ди. И́бо и проро́цы им при́сно порица́ху глаго́люще. Слы́шите кня́зи содо́мстии и нача́лницы твои́ не покаря́ются. И па́ки не ва́ше есть разуме́ти суд и везде́ зе́лнейше напа́дают на них. Что у́бо и Бо́гу ли кто порече́т сего́ ра́ди. Не бу́ди, оне́х бо сие́ согреше́ние ко́е ли у́бо и никто́ сотвори́т зна́мение е́же не ве́дети вам зако́на. Или́ е́же не покоря́тися. Поне́же у́бо ре́ша еда́ от князь кто ве́рова в него́. И я́ко не ве́дящеи зако́на, после́дователне их каса́ется Никоди́м, си́це глаго́ля. Еда́ зако́н наш су́дит челове́ка, а́ще не услы́шит от него́. Показу́ет бо их ниже́ ве́дящых зако́на, ниже́ творя́щых зако́на. А́ще бо он ни еди́ного же повелева́ет уби́ти челове́ка не пе́рвее услы́шавшим. Си́и же пре́же услы́шати на сие́ устреми́шася. Престу́пницы суть зако́на. И поне́же у́бо ре́ша никто́же от князь ве́рова Вонь, сего́ ра́ди назна́менует евангели́ст я́ко еди́н бе от них, показу́я я́ко и княз́и ве́роваша в него́. Дерзнове́ние же не у́ подоба́ющее подоба́ющее показова́ху оба́че присвоя́хуся Христу́;

Зри же ка́ко и со щаде́нием обличе́ние наво́дит. Не рече́ бо вы же хо́щете его́ уби́ти, и про́сте осужа́ете челове́ка я́ко лестьца́. Но не си́це рече́, но кротча́йше неизрече́нное их устремле́ние отсеца́я. И неудержи́мое и уби́йственое сего́ ра́ди на зако́н обраща́ет сло́во глаго́ля а́ще не услы́шит опа́сне, и позна́ет что твори́т якобы́ ниж́е послуша́ния тре́ба про́стаго, но и опа́снаго. Сие́ бо есть е́же позна́ет что твори́т. Что хо́щет. И что ра́ди и о ком. Еда́ о развраще́нии гража́ньства и я́ко враг ли. Недоуме́вшеся у́бо поне́же ре́ша никто́же от князь ве́рова в него́ ниже́ зе́лне ниже́ со щаде́нием ему́ принесо́ша кое́ после́дование имя́ше рцы ми. Ре́кшу о́ному я́ко зако́н наш не су́дит ни еди́наго же рещи́ еда́ и ты от Галиле́я еси́. Потре́бно бо показа́ти, я́ко не не разсу́дне посла́ша его́ призыва́юще не́жели я́ко не подоба́ет пода́ти сло́ва. Они́ свере́пейше и я́ростнейше де́йствуют сопротиворе́чием. Вопроси́ и вижь я́ко от Галиле́я проро́ка не воста́!

Что бо рече́ челове́к я́ко проро́к есть, рече́. Я́ко не суже́на уби́ти не подоба́ше. Они́же досади́телне я́ко не ве́дящу о писа́ниих ничто́же сия́ наведо́ша. А́ки бы а́ще кто рекл, иди́ уве́жь. Сие́ бо есть вопроси́ и вижь. Что у́бо Христо́с. Поне́же горе́ и до́лу Галиле́ю обраща́ху и проро́ка. Свобожа́я всех сего́ чужа́го непщева́ния, и показу́я я́ко не еди́н от проро́к есть. Но ми́ру Влады́ка. Рече́ аз есмь свет ми́ру, не Галиле́и, ни Палести́не. Ниже́ Иуде́и. Что ли у́бо иуде́и, ты о себе́ сведе́тельствуеши сведе́тельство твое́ несть и́стинно. О́ безу́мия, к писа́ниям посла́ше горе́ и до́лу. И глаго́лют ты ли о себе́ сведе́тельствуеши; Что же ли сведе́тельствова, аз есмь свет ми́ру. Ве́лие рече́нное. И вои́стинну ве́лие. Но не зело́ их уязви́. Поне́же у́бо ниже́ сравня́ет ны́не себе́ отцу́. Ниже́ сын о́ного рече́ бы́ти, ниже́ Бог но свет еще́. Хотя́ху у́бо преврати́ти и сие́. И́бо мно́го сие́ бо́лше е́же рещи́. После́дуяй мне не и́мать ходи́ти во тме. Свет и тму зде. Мы́сленне глаго́ля. Е́же есть, не пребу́дет в заблуже́нии. Зде и Никоди́ма привлача́ет и возво́дит я́ко зело́ дерза́вшаго и слуг похваля́ет сие́ сотвори́вшых. Е́же бо воззва́ти, сие́ есть состро́ити хотя́щаго. Я́ко да и оне́х услы́шит. Вку́пе же их гада́тельствует о́тай лесть плету́щых. И во тме и в заблужде́нии. Но све́та не преодоле́ют. И Никоди́ма воспомина́ет глаго́л оне́х. Я́же глаго́лаше пре́жде. Всяк зла́я творя́й, ненави́дит свет, и не прихо́дит к све́ту да не явя́тся дела́ его́. Поне́же бо глаго́лаху я́ко никто́же от князь ве́рова в него́. Сего́ ра́ди рече́. Зла́я творя́й не прихо́дит к све́ту показу́я я́ко не све́та не́мощи е́же не приити́. Но оне́х развраще́ннаго ра́зума. Отвеща́ша и ре́ша ему́. Ты ли о себе́ сведе́тельствуеши; Что у́бо той. А́ще и аз сведе́тельствую о себе́. Сведе́тельство мое́ и́стинно есть. Я́ко вем отку́ду гряду́, и где иду́. Е́же предвари́в сие́ рех. Сие́ си́и предлага́ют я́ко нача́лне рече́нно, что у́бо Христо́с, превраща́я сие́ и показу́я я́ко о́на, я́ко к ним и непщева́нию их бесе́доваше, челове́ка его́ непщу́ющых про́ста. Рече́, и а́ще аз сведе́тельствую о мне, и́стинно есть сведе́тельство мое́. Я́ко вем отку́ду гряду́. Что есть сие́, от Бо́га есмь Бог. И Сын Бо́жий. Бог же, сам себе́ достове́рен сведе́тель, вы же не ве́сте. Злохо́тни же рече́ и ве́дяще, притворя́етеся не ве́дети. Но от челове́ческыя мы́сли вся веща́ете, ничто́же вя́щше хотя́ще явля́емаго разуме́ти, вы по пло́ти су́дите. Я́коже е́же по пло́ти жи́ти сие́ есть е́же зле жити. Си́це е́же по пло́ти суди́ти. Непра́ведне суди́ти есть. Аз не сужу́ ни еди́ного же. И а́ще сужу́ суд мой пра́веден есть. А е́же глаго́лет таково́ есть. Непра́ведне су́дите. И а́ще непра́ведне суди́м рече́. Что ра́ди не порица́еши, что ра́ди не му́чиши. Что ра́ди не осужа́еши, я́ко не на сие́ приидо́х рече́. Сие́ бо есть е́же аз не сужу́ ни еди́наго же. И а́ще сужу́ аз суд мой и́стинен есть. Поне́же а́ще восхоте́л бых суди́ти. Вы у́бо от осуже́нных бы́ли бы. И сия́ не судя́ глаго́лю я́ко не дерза́я я́ко а́ще бы суди́л. Уби́л бых у́бо вас и́бо а́ще суди́л бых пра́ведне у́бо вас осуди́л бых. Но ны́не вре́мя суда́ несть. О бу́дущем же у́бо суде́ назна́мена. Я́ко еди́н несмь. Но аз и посла́вый мя оте́ць. Зде назна́мена я́ко не той еди́н их осу́дит. Но и оте́ць, та́же сие́ спокры́л есть. Во свое́ сведе́тельство возводя́. И в зако́не же на́шем пи́шется. Я́ко двои́х челове́к сведе́тельство и́стинно есть. Что у́бо реку́т зде еретицы́, что вя́щше име́ет челове́ков. А́ще про́сте си́це отъи́мем рече́нное. О челове́цех бо сего́ ра́ди уста́вися сие́. Поне́же бо сей бе несть достове́рен. О Бо́зеже. Ка́ко у́бо име́ет сие́ сло́во. Ка́ко у́бо рече́ся дво́е, еда́ поне́же два, или́ поне́же челове́цы сего́ ра́ди два. А́ще бо поне́же два суть, что ра́ди не прибеже́ ко Иоа́нну, ниже́ рече́ сведе́тельствую аз о себе́. И сведе́тельствует о мне Иоа́нн, что ра́ди ко а́нгелу, что ра́ди ко проро́ком, и́бо и безчи́сленыя у́бо ины́ обре́л бы сведе́тельства. Но не сие́ хо́щет показа́ти то́кмо я́ко два но я́ко и того́же существа́. Глаго́лаху ему́. Кто есть оте́ць твой. Та́же рече́ ниже́ мене́ ве́сте ниже́ Отца́ моего́. Поне́же у́бо ве́дяще я́ко не ве́дяще глаго́лаху, и я́ко искуша́юще его́. Ниже́ отве́та их сподобля́ет. Сего́ ра́ди глаго́лет. Про́чее ясне́йше вся, и с мно́жайшым дерзнове́нием от зна́мений и уче́ния. После́дующых, сведе́тельство взем, и е́же близ бы́ти кресту́ вем бо рече́ отку́ду гряду́. Сие́ не зело́ их косну́ся. А е́же не ве́сти? иде́же аз иду́. Наипа́че их устраши́ло у́бо, я́ко не имя́щу ему́ пребы́ти в сме́рти!

Что же ра́ди не рече́, вем я́ко Бог есмь, но вем отку́ду гряду́. При́сно смире́нная смеша́ет высо́кым. И сама́я же сия́ спря́тает. Рек бо я́ко аз сведе́тельствую о мне и показа́в прии́де на смире́нное. А́ки бы глаго́лал. Вем от кого́ по́слан есмь и к кому́ отхожу́. Си́це бо ничто́же име́ли бы сопроти́в рещи́ слы́шавше я́ко от о́ного по́слан есть, и ко о́ному отхо́дит. Не рех бо рече́ что ло́жно. Отню́дуже приидо́х, и та́мо отхо́дит ко и́стинному Бо́гу. Вы же не ве́сте Бо́га, сего ра́ди по пло́ти су́дите и́же бо толи́кых слы́шавше зна́мений же и обличе́ний, еще́ глаго́лю несть и́стинен и Моисе́я непщу́ете достове́рна. И они́хже и о ины́х. И о и́хже о себе́ глаго́лаше. Христа́ же не то́кмо по пло́ти суди́ти есть. Аз же не сужу́ ни еди́наго. И у́бо рече́ я́ко оте́ць не су́дит ни еди́наго же, ка́ко у́бо зде рече́. И а́ще сужу́ же аз суд мой пра́веден есть. Зане́ несмь еди́н. Па́кы к непщева́нию оне́х веща́ет. Си́речь суд мой оте́чь есть. Не у́бо и́нако суди́л бы оте́ць судя́, ра́зве я́коже аз. И не у́бо и́нако аз. Ра́зве я́коже оте́ць. Что же ра́ди, и зако́на воспомяну́. Не бо́ непщева́ху достове́рна бы́ти сы́на. А́ще не о́тче сведе́тельство прия́л бы. И́накоже, ниже́ ста́ло бы рече́нное, о челове́цех бо егда́ два чу́жеи ве́щи сведе́тельствуют, тогда́ сведе́тельство есть и́стинно. Сие́ бо есть сведе́тельствовати двема́. А́ще хо́щет кто себе́ сведе́тельствовати, не ктому́ два суть. Зри́ши ли я́ко ни зачто́же и́но сие́ рече́ ра́зве да пока́жет еди́но су́щна себе́ и собо́ю па́кы пока́жет. Ничто́же ме́нше име́юще отца́. Зри у́бо госпо́дьство. Аз есмь сведе́тельствуя о себе́. И сведе́тельтсвует о мне посла́вый мя оте́ць. Не у́бо же а́ще ме́ншаго сущьства́ был. Сие́ положи́л бы. Ны́не же да не вознепщу́еши я́ко числа́ ра́ди прия́то есть. Зри о́бласть ничто́же име́ющу премене́но;

Сведе́тельствует челове́к. Егда́ о себе́ достове́рен бу́дет. И не егда́ сведе́тельства тре́бует. И сие́ в чу́жеи ве́щи. В свое́ и́же егда́ сведе́тельтсва тре́бует е́же от ина́го. Не ктому́ есть достове́рен. Зде же все сопроти́вное. И́бо во свое́й ве́щи сведе́тельствуя. И от инаѓо глаго́ля сведете́льстоватися достове́рну бы́ти рече́ отвсю́ду. Показу́я свое́ сведе́тельство о госпо́дьстве;

Что у́бо ра́ди рек несмь еди́н. Но аз посла́вый мя оте́ць. И е́же дву челове́к сведе́тельство есть и́стинно. Неумолча́но наведе́, аз есмь сведе́тельствуя о себе́. Я́вьствено я́ко госпо́дьство явля́я. И пе́рвее у́бо себе́ положи́л есть. Аз есмь сведе́тельствуя о мне. Показу́ет зде и единоче́стие. И я́ко ничто́же по́льзуются Бо́га глаго́люще ве́дети, отца́ его́ не ве́дяще. И сие́ вино́вно бы́ти рече́, е́же его́ не хоте́ти ви́дети. Глаго́лет я́ко не мо́щно ви́дети отца́ его́ кроме́. Да поне́ си́це их привлече́т в свое́ позна́ние. Поне́же бо оста́вльше его́ при́сно отца́ иска́ху уве́дети, глаго́ла. Не мо́жете ве́дети отца́ без мене́. Я́коже и́же сы́на ху́ляща, не его́ ху́ля то́кмо, но и ро́жшаго.

Нравоуче́ние 52. О е́же подоба́ет христиани́ну и житие́ име́ти доброде́тельно.

Сия́ да бежи́м мы, и да сла́вим сы́на. И́бо а́ще не естества́ был бы того́же. Не бы у́бо си́це рекл. А́ще бо научи́л бы то́кмо, иносу́щен же был бы, мо́щно и его́ не ве́дящу ве́дети отца́. Ниже́ бо челове́ка ве́дый. Весть а́нгела. Ей рече́. И́бо тварь ве́дый. Весть Бо́га. Ника́коже, мно́зи бо суть тварь зря́щии. Па́чеже вси челове́цы. Зрят бо ю́, и Бо́га не ве́дят да прославля́ем у́бо Сы́на Бо́жия не сла́вою сею́ то́кмо. Но и е́же де́лы. Сия́ бо о́ноя кроме́ ничто́же есть;

А́ще же ты рече́ иуде́й имену́ешися. И почива́еши на зако́не и хва́лишися о Бо́зе. Науча́яй у́бо ина́го себе́ ли не учи́ши. В зако́не хваля́йся преступле́нием зако́на Бо́га безче́стиши. Зри да не ка́ко и мы о пра́вости ве́ры хва́лящеся. За е́же не соглаша́юще ве́ре житие́ пока́зовати, Бо́га безче́стим. Творя́ще его́ ху́лима бы́ти. И́бо учи́теля вселе́нныя и ква́са. И све́та и соль бы́ти хо́щет христиани́на. Что же ли есть свет. Житие́ светя́ще ничто́же име́юще потемне́но. Свет не себе́ потре́бен. Ниже́ соль ниже́ квас. Но во ины́х показу́ют по́лзу си́це не о свое́й по́лзе истя́зани бу́дем то́кмо но и о ины́х. Соль бо а́ще не со́лит несть соль, и и́но же не́что сие́ показу́ет. Я́ко а́ще са́ми испра́вим, бу́дет вся́ческий. Ни до́ндеже са́ми не испра́вим, ниже́ ины́х по́лзовати мо́жем, ничто́же бу́е. Ничто́же сла́бо от нас. Таковы́ бо мирскы́я ве́щы. Такова́ жите́йская попече́ния сего́ ра́ди де́вы бу́яя отве́ржени бы́ша зане́ о бу́их мирскы́х ве́щех упражня́хуся, зде у́бо собира́юще. А иде́же подоба́ше не полага́юще. Страх у́бо есть да не и мы то́же постра́жем страх у́бо да не и мы во скве́рныя облече́ни ри́зы отъи́дем. Иде́же вси име́ют све́тлы и объявле́ны. И? что́же бо греха́ скверне́йше. Ничто́же нечи́стейше. Темже естество его пророк сказу́я вопия́ше. Восмерде́ша и согни́шася ра́ны моя́. И а́ще хо́щеши уве́дети греха́ зло ви́дное. Помы́сли его́ во е́же бы́ти. Егда́ вожделе́ния свободи́шися. Егда́ ни ктому́ стужа́ет огнь и тогда́ у́зриши како́в есть грех. Пом́ысли я́рость. Егда́ в тишине́ бу́деши помы́сли лихоима́ние. Егда́ вне бу́деши стра́сти. Ничто́же студне́йше, ничто́же скверне́йше, хище́ния и лихоима́ния.

Сия́ ча́сте глаго́лем не стужа́ти вам хотя́ще, но приобрести́ не́что ве́лие и чу́дно. И́же бо от е́же еди́ною не испра́вив, не́гли от е́же второ́е услы́шати, сотвори́т сие́. И и́же второ́е прете́к, от тре́тияго испра́вит. Бу́ди же всем нам свободи́вшымся лука́вых всех. Благоуха́ние Христо́во име́ти. Я́ко тому́ сла́ва со Отце́м и со Святы́м Ду́хом ны́не и при́сно и во ве́ки веко́в, Ами́нь.