Ева́нгелие Сия́ глаго́лы я́же глаго́ла Иису́с в Газофилаки́и уча́ во святи́лищи. И никто́же ят его́, не у́ бо прии́де час его́.

Толкова́ние О́ безу́мия иуде́йскаго, пре́же Па́схы и́щуще его́ та́же посреде́ прие́мше, и мно́жицею наче́нше удержа́ти и собо́ю и ины́ми и не возмо́гше, ниже́ его́ си́ле почуди́шася но нападо́ху зло́бою, и не отступа́ху, я́ко бо начина́ху при́сно рече́. Сия́ глаго́лы в Газофилаки́и уча́ во святи́лищи, и никто́же ят его́. Во святи́лищы глаго́лаше и в чи́ну учи́теля, е́же па́че дово́лно бе их воздви́гнути. И сия́ глаго́лаше о ни́хже ухапля́хуся и порица́ху. Я́ко ра́вна себе́ твори́т отцу́ и́бо двою́ челове́к сведе́тельство и́стинно есть. Сие́ явля́ет. Но оба́че сие́ рече́ глаго́лаше во святи́лищи и в чи́ну учи́теля. И никто́же ят его́ я́ко не у́ прии́де час его́. Си́речь я́ко не у́ вре́мя бе прили́чно. В не же хотя́ше распя́тися те́миже тогда́. Не их си́лы бысть де́ло но смотре́ния его́. Они́ бо и дре́вле хотя́ху. Не можа́ху же не у́бо ниже́ тогда́ возмогли́ бы. А́ще не бы сам попусти́л, рече́ у́бо им па́кы Иису́с. Аз иду́ и взы́щете мене́. Что у́бо глаго́леть сие́ ча́сте потряса́я их душа́ и устраша́я. Зри у́бо ели́к сие́ втворя́ше страх. И́бо уби́ти его́ хотя́ще да свободя́тся. И́щут иде́же и́дет. Си́це вели́кая от ве́щи мета́ху и и́ноже научи́ти их хотя́ше, я́ко не оне́х ну́жи вещь есть. Но испе́рва сию́ предвообрази́. И воскресе́ние у́же си́ми прописа́ словесы́. Глаго́лаху у́бо еда́ убие́т себе́. Что у́бо Христо́с. Отъе́мля их непщева́ние и показу́я я́ко вещь грех есть; Рече́ вы от ни́жних есте́. А е́же глаго́лет таково́ есть. Ничто́же чу́дно вам такова́я помышля́ти челове́ком плотяны́м и ничто́же помышля́ющим духо́вно. Но аз не соде́ю, что таково́. Свы́ше бо есмь. Вы же от ми́ра сего́ есте́. И па́ки мирска́я помышле́ния и плотска́я рече́. Отню́дуже я́вьствено я́ко и е́же аз несмь от ми́ра сего́. Не е́же пло́ти не прия́ти есть. Но е́же дале́че бы́ти зло́бы оне́х. И́бо ученико́в рече́ не бы́ти от ми́ра. Но оба́че плоть имя́ху они́. Я́коже у́бо Па́вел глаго́ля не́сте в пло́ти не безтеле́сных бы́ти рече́ их си́це глаго́ля ученико́в не бы́ти от ми́ра. Ничто́же и́но ра́зве любому́дрие им сведе́тельствует. Рех у́бо вам я́ко а́ще не ве́руете я́ко аз есмь. Во гресе́х ва́шых у́мрете. А́ще бо сего́ ра́ди прии́де да во́змет грех ми́ра. И и́нако его́ совлещи́ся несть. Ра́зве ба́нею ну́жа неве́рующему име́ющему ве́тхаго челове́к отъити́. Не хотя́й бо себ́е умертви́ти ве́рою и погрести́. У́мрет ему́ и отъи́дет та́мо дая́ испыта́ния пре́жних согреше́нных;

Сего́ ра́ди глаго́лаше. Не ве́руяй же, у́же осуже́н есть. Не е́же не ве́ровати то́кмо но я́ко и пре́жняя грехы́ име́я отъи́дет. Глаго́лаху у́бо ты кто еси́. О́ безу́мия по вре́мени толи́ком и зна́мении и уче́нии. Вопроша́ют, ты кто еси́ что у́бо Христо́с. Нача́ток я́коже и глаго́лю вам. А е́же глаго́лет таково́ есть. Е́же отню́д слы́шати слове́с су́щых от мене́ не досто́йни есте́. А не то́кмо и уве́дети и́же кто аз есмь. Вы бо вся искуша́юще глаго́лете. И ни еди́ному же су́щых от мене́ внима́юще. И сия́ вся мого́х обличи́ти ны́не сие́ бо есть мно́га име́ю и глаго́лати и суди́ти. Не обличи́ти же то́кмо, но и му́чити, но посла́вый мя ре́кше Оте́ць, не хо́щет сие́ не приидо́х бо суди́ти ми́ра. Но спасти́ ми́ра. Не посла́ бо Бог сы́на своего́ да су́дит ми́ру рече́, но да спасе́т ми́ра. А́ще у́бо на сие́ мя посла́, и́стинен есть в ле́поту ни еди́ного же аз сужу́ ны́не. Но сия́ глаго́лю я́же ко спасе́нию, а не я́же ко обличе́нию. Глаго́ла же сия́ да не вознепщу́ют я́ко толи́ко слы́ша от не́мощи не истязу́ет. Или́ я́ко не весть их мы́слей и наруга́ния не разуме́ша я́ко отца́ им глаго́лет. О́ безу́мия не преста́ им о себе́ бесе́дуя, и не познава́ху. Та́же егда́ у́бо мно́га зна́мения сотвори́в и научи́в не привлече́. О кресте́ про́чее бесе́дует глаго́люще. Егда́ вознесе́те сы́на челове́ча, тогда́ разуме́ете я́ко аз есмь. И о себе́ не глаго́лю. И я́ко со мно́ю есть посла́вый мя. И не оста́ви мене́ еди́наго Оте́ць; Показу́ет я́ко пра́ведне глаго́лаше, нача́ток я́ко и глаго́лю вам. Си́це не внима́ху глаго́лемым. Егда́ вознесе́те Сы́на Челове́ча не вы ли тогда́ наипа́че ча́ете свободи́теся мене́ и уби́ти. Аз же глаго́лю я́ко тогда́ наипа́че уве́сте я́ко аз есмь. И зна́мений ра́ди и воскресе́ния. И пленения вся бо сия́ дово́лна бе́ша. Изъяви́ти его́ кре́пость. И не рече́ тогда́ позна́ете кто есмь. Егда́ бо уви́дите рече́ я́ко ничто́же от сме́рти постра́жу. Тогда́ позна́ете я́ко Аз есмь. Си́речь Христо́с. И Сын Бо́жий. И и́же вся нося́ и водя́ и несопроти́вен о́ному. Сего́ у́бо ра́ди приведе́, и от себе́ ничто́же глаго́лю. Обоя́ бо позна́ете и кре́пость мою́. И единомышле́ние е́же ко отцу́. Е́же бо от себе́ ничто́же глаго́лю. Непреме́нное существа́ явля́ет. И я́ко ничто́же кроме́ оте́ческых разуме́ний веща́ет егда́ бо отпаде́те слу́жбы. Егда́ не попусти́т вам ниже́ ему́ служи́ти я́коже пре́же сего́, тогда́ уве́сте. Я́ко отмща́я мене́ сие́ твори́т. И раздража́яся о непослу́шавшых мене́. А́кы бы глаго́лал, не у́бо а́ще богопроти́вен не́кий был бых и чужь; Толи́ко у́бо гнев на вы подви́гнул бы. Сие́ и Иса́ия рече́, дасть лука́вых вме́сто погребе́ния его́, и Дави́да тогда́ возглаго́лет к ним гне́вом свои́м, и сам, се оставля́ется вашь дом пуст. И при́тчи то́же явля́ют, егда́ глаго́лют. Что сотвори́т де́лателем господи́нь виногра́да о́ного. Злых зле погуби́т их. Зри́ши ли я́ко везде́ за е́же никогда́ же ве́роватися си́це веща́ет. Поне́же а́ще той их погуби́т я́коже у́бо и погуби́т. Принеси́те бо рече́ их зде не хотя́щых мя ца́рствовати и заколи́те. Что ра́ди не свое́ рече́ де́ло, но о́тче бы́вшее. К оне́х не́мощи бесе́дуя. Вку́пе же и почита́я роди́теля. Сего́ ра́ди не рече́ оставляю́ дом ваш пуст, но оставля́ется. Сие́ у́бо без лица́ положи́л есть. Те́мже е́же рещи́ коли́жды восхоте́х собра́ти ча́да твоя́ и не восхоте́л еси́. Та́же навести́ я́ко оставля́ется. Показу́ет я́ко той запусте́ние соде́ла поне́же бо рече́ благоде́тельствуеми и исцеля́еми не восхоте́сте позна́ти. Му́чими уве́сте кто аз и со мно́ю есть оте́ць. Да́же бо не вознепщу́ют е́же посла́вый мя умале́ния бы́ти. Глаго́ла со мно́ю есть. О́во бо смотре́ния. О́во же божества́. И не оста́ви мене́ еди́наго. Я́ко аз уго́дная ему́ творю́ всегда́. Па́кы на смире́ннейшее сло́во низведе́ ко о́ному ча́сте стоя́ е́же глаго́лах. Я́ко несть от него́ и я́ко субо́ты не храни́т. К сему́ рече́. Уго́дная ему́ творю́ всегда́. Показу́я я́ко и е́же разреша́тися субо́те. Уго́дно есть ему́. Си́це у́бо и при кресте́ рече́, мни́те ли я́ко не могу́ умоли́ти отца́. А́ще и рек то́кмо кого́ и́щете пове́рже во знак? их. Что у́бо не глаго́леши я́ко мни́те, я́ко не могу́ вас погуби́ти. Де́лом сие́ показа́в, к не́мощи их схо́дит мно́го творя́ше тща́ние я́ко бы показа́ти я́ко ничто́же сопроти́вно твори́т Отцу́. Си́це у́бо и зде челове́чнейше веща́ет. Я́коже у́бо е́же не оста́ви мене́ еди́ного рече́ся. Си́це и е́же я́ко аз уго́дная ему́ творю́ всегда́, сия́ ему́ ре́кшу, мно́зи ве́роваша в него́. Егда́ во смире́нное сло́во низведе́. Тогда́ мно́зи ве́роваша;

Еще́ ли у́бо вопроша́еши что ра́ди смере́нне веща́ет; И́бо я́вьствене евангели́ст назна́мена сие́ рек я́ко сия́ ему́ глаго́лавшу. Мно́зи ве́роваша в него́. То́чию не вопия́ си́ми ве́щми. Не смуща́йся о́ послу́шниче. А́ще что смире́нно услы́шиши. И́же бо по толи́ком уче́нии не у́ уве́рени я́ко от отца́ есть, в ле́поту смире́ннейшая слы́шаху да уве́рятся.

И сие́ у́бо отве́т есть. О имя́щых смире́нне рещи́ся ве́роваша у́бо, не я́ко подоба́ше же. Но про́сте и я́коже прилучи́ся. Обра́довавшеся и упоко́ившеся о глаго́лемых смире́нии. Я́ко бо несоверше́нную ве́ру имя́ху. Показу́ет евангели́ст от су́щых по сих слове́с. В ни́хже ему́ па́кы досажа́ют. И я́ко си́и са́ми суть они́, изъяви́л есть рек. Глаго́ла у́бо Иису́с к ве́ровавшым к нему́ иуде́ом. А́ще вы пребу́дете в словеси́ мое́м показу́я я́ко не у́ прия́ша уче́ние. Но то́кмо внима́ху глаго́лемым. Те́мже и уязви́тельнейше рече́. Та́мо у́бо про́сте рече́. Взы́щете мене́. Ны́не же бо́лше приложи́л есть я́ко во гресе́х ва́шых у́мрете. И е́же ка́ко показу́ет. Я́ко не мо́жете прише́дше та́мо умоли́ти мя про́чее сия́ я́же глаго́лю в ми́ре. Си́ми изъяви́л еси́ про́чее исходя́щу ему́ во язы́кы. Поне́же не позна́ша про́чее я́ко отца́ им глаго́лет пре́же. Па́кы веща́ет оне́м. И вину́ смире́ния глаго́л положи́л есть евангели́ст.

Нравоуче́ние 53. Я́ко подоба́ет и в це́рковь и в прочита́ние писа́ний упражня́тися. Си́це бо и гре́шныи и а́лчущее преуспе́ти возмо́жем.

А́ще си́це у́бо восхо́щем писа́ние испытова́ти со опасе́нием а не про́сте. Возмо́жем спасе́ния на́шего получи́ти. А́ще вы́ну в них пребыва́ем. И догма́т пра́вость и житие́ уве́мы опа́сно. А́ще и зело́ же́сток кто бу́дет и лют и слаб. И ничто́же приобрета́ше во ины́х вре́менех. Вре́мя у́бо припло́дит сие́, и прии́мет не́кую по́лзу, а́ще и не такову́ я́коже чу́вьство име́ти, но оба́че прии́мет. А́ще бо ми́ро прода́вца кто ми́мо ходя́. И приседя́ дела́ те́лницам таковы́м и не хотя́ обоня́ется от благоуха́ния, мно́го па́че в це́рковь отходя́. Я́коже от пра́зности пра́зность ража́ется си́це от де́йства усе́рдие ража́ется. А́ще и безчи́сленых бу́деши испо́лнен злых. А́ще и не чист да не бежи́ши е́же зде пребыва́я!

Что у́бо рече́ зане́ слы́ша не творю́ нема́ло приобре́тение окаява́ти себе́. Не непотре́бен сей страх. Не безвре́менна сия́ боя́знь. А́ще постене́ши то́кмо я́ко слы́ша не творю́. Вся́ческы на е́же твори́ти при́деши не́когда. Несть бо мо́щно Бо́гу бесе́дующему, и послу́шающему Бо́гу бесе́дующу не обрета́ти что. А́бие у́бо спря́туемся, и ру́це умыва́ем егда́ кни́гу восхо́щем прия́ти!

Зри́ши ли и пре́же почита́ния коли́ко благогове́ние, а́ще же и со опасе́нием прочита́ем мно́гу обои́мем по́лзу, не бо́ а́ще в благогове́нии устро́ил бы ду́шу. Ру́це у́бо умы́ли бы́хом. И жена́ а́ще и не покрове́нна бу́дет обложи́т. А́бие плат, су́щаго внутрь благогове́ния указа́ние показу́ющи. И муж а́ще покрове́н бу́дет, обнажа́ет главу́. Зри́ши ли ка́ко быва́ет пропове́дник е́же благогове́ния внутрь вне́ший о́браз та́же и в послуша́ние сед, воздохну́ мно́жицею. И позазре́ житию́ настоя́щему. Да внима́ем у́бо писа́нием о́ возлю́блении. И а́ще ничто́же и́но, ева́нгелия у́бо потща́телна нам да быва́ю. И сия́ в ру́кы да прие́млем. А́бие бо разну́в кни́гу христо́во и́мя обря́щеши. И у́зриши внутрь лежа́ще. И услы́шиши а́бие глаго́люща. Иису́с Христо́во Рожество́ си́це бе, обруче́не бо бы́вше ма́тери его́ Мари́и. Обре́теся во чре́ве име́ющи от Ду́ха Свя́та. Сия́ же слы́шай, возжеле́ет де́вьства а́бие почуди́тся рожеству́. Свободи́тся земли́. Не ма́ла и сия́, егда́ уви́диши и Ду́ха сподобле́ну деви́цу и а́нгела ей бесе́дующа. И сия́ у́бо све́рху. А́ще же пребу́деши до конца́ проходя́, вся а́бие оплюе́ши жите́йская. Всем посмее́шися су́щым зде. А́ще и бога́т бу́деши. Ничто́же вознепщу́еши бога́тство слы́шав я́ко текто́нова су́щи о́на и смире́нныя хра́мины. Ма́ти влады́ки твоего́ бысть. А́ще и нищь бу́деши не постыди́шися нищеты́, уве́дев я́ко худе́йшия хра́мины не устыде́ся и́же ми́ру соде́тель!

Сия́ помышля́я не похи́тиши не лихои́мствуеши. Не во́змеши я́же друго́в твои́х, но рачи́тель бу́деши па́че нищеты́. И пре́зриши бога́тьство. А́ще же сия́ бу́дет, вся изго́ниши зла́я па́кы егда́ уви́диши его́ в я́слех лежа́ща. Не потщи́шися о́троку своему́ обложи́ти у́ тварь зла́ту. Ниже́ жене́ среброко́ван сотвори́ти одр. Сия́ же тща́ся ниже́ я́же от сих соде́лаеши лихоима́ния и хище́ния. Мно́га и и́на есть обрести́. Я́же не леть есть ны́не по по́части глаго́лати, ве́дят же иску́с прие́мшии. Те́мже молю́ истяжава́ти кни́гы, и с кни́гами разуме́ния держа́ти, и в мы́слех писа́ти. Иуде́и бо поне́же не внима́ху, на рука́х повелева́хуся кни́гы пове́шати. Мы же ниже́ в рука́х. Но в дому́ полага́ем. Потре́бно вообража́ти в се́рдци. Си́це бо настоя́щее очи́стивше житие́. Получи́м бу́дущых благи́х. И́хже бу́ди всем нам получи́ти. Благода́тию и человеколю́бием Го́спода на́шего Иису́са Христа́. Я́ко Тому́ сла́ва и держа́ва, ны́не и при́сно и во ве́ки веко́в, Ами́нь.