Ева́нгелие Глаго́ла у́бо Иису́с к ве́ровавшым к Нему́ иуде́ом. А́ще вы пребу́дете в словеси́ мое́м. Вои́стинну ученицы́ мои́ есте́. И позна́ете и́стинну и́стинна свободи́т вас.

Толкова́ние Мно́га терпе́ния тре́буют на́шя о́ люби́мицы. Терпе́ние же быва́ет. Егда́ в глубину́ укорене́ни догма́ты бу́дут. Я́коже ду́ба в до́лняя не́дра испусти́вша ко́рения. Истя́гнута со опасе́нием. Ни еди́н же ветр припа́д исто́рнути возмо́жет. Си́це у́бо и ду́шу пригвожде́нную Бо́жию стра́ху. Никто́же преврати́ти возмо́жет. Укоре(не́)ния бо. Е́же пригвозди́тися бо́лше есть. Сие́ у́бо проро́к мо́лится глаго́ля. Пригвозди́ от стра́ха твоего́ пло́ти моя́. Си́це и ты пригвозди́ и совокупи́ а́кы гвозде́м проверте́нным!

Я́коже бо си́и не удо́бь е́млеми. Си́це сопроти́внии удо́бь е́млеми быва́ют и низверза́ются удо́бне. Е́же и тогда́ пострада́ша иуде́и слы́шавше бо и ве́ровавше па́кы разврати́шася. Хотя́ у́бо углуби́ти ве́ру их Христо́с. Якобы́ не на верху́ бы́ти. Копа́ет ду́шу, уязви́тельнейшими словесы́. Ве́ровавшых бо бе и обличе́ний терпе́ти. Они́х? а́бие свере́пяху. Ка́ко же сие́ твори́т, пре́же завещава́ет. А́ще вы пребу́дете в словеси́ мое́м. В и́стинну ученицы́ мои́ есте́, и позна́ете и́стину и́стинна свободи́т вас. То́чию не глаго́ля, хощу́ глубо́ко да́ти сече́ние, но не коле́блитеся. Па́чеже и си́ми их, киче́ние мы́сли их спря́та, чего́ свободи́т рцы ми. Грехо́в что у́бо презо́ривии они́, се́мя Авраа́мле есмы́. И ни еди́ному же порабо́тахом никогда́же низпаде́ а́бие их мысль. Сие́ же глаго́лем от е́же к мирскы́м ве́щем устраши́тися. А́ще пребу́дете во словеси́ мое́м. Явля́ющаго бе я́же в се́рдцы их. И ве́дящаго я́ко ве́роваша у́бо, не пребы́ша же и ве́лие обещава́ет, е́же ученико́м его́ оне́м бы́ти. Поне́же бо не́цыи отъидо́ша пре́же, гада́тельствуя их рече́. А́ще пребу́дете. Поне́же и они́ слы́шаша и ве́роваша. И отъидо́ша поне́же не пребы́ша мно́зи бо от учени́к его́ отъидо́ша вспять. И не ктому́ с ним хожа́ху, позна́ете и́стинну. Си́речь мене́. Аз бо есмь и́стинна. Иуде́йская у́бо вся о́браз бе́ша. И́стинну же от мене́ уве́сте и свободи́т вас от грехо́в. Я́коже бо оне́м глаго́лаше во гресе́х ва́шых у́мрете. Си́це сим глаго́лаше свободи́т вас. И не рече́ свобожу́ вас от рабо́ты. Но сие́ им оста́ви све́дети. Что у́бо они́ се́мя Авраа́мле есмы́. И ни еди́ному же порабо́тихом никогда́ же. И́бо а́ще подоба́ше негодова́ти о пре́жнем. Ле́по бе тем е́же рещи́, позна́ете и́стинну, и рещи́, что у́бо ны́не и́стинны не ве́мы ли. Зако́н у́бо ло́жен ли и позна́ние на́ше. Но ничто́же о сих им раде́ние бысть. Но о мирскы́х ве́щех боле́знуют, и наипа́че рабо́ту вознепщева́вше.

Суть бо суть и ны́не мно́зи. И́же от худы́х у́бо срамля́ются. И о рабо́те сей. О рабо́те же грехо́вней не ктому́ и изво́лили бы у́бо тмам о́ной рабо́те нарещи́ся раби́. Не́жели сей еди́ною. Такови́ не́цыи бе́ша и они́ и ниже́ ве́дяху ину́ю рабо́ту. И ре́ша. Рабо́в ли наре́кл еси су́щих от ро́да Авраа́мля. Благоро́дных ли, и́хже не подоба́ше сего́ ра́ди нарещи́ рабо́ты. Никогда́ же бо рече́ рабо́тахом. Такова́ бо иуде́йская похвале́ния. Се́мя Авраа́мля есмы́. Израильтя́не есмы́. Нигде́ же свои́х исправле́ний помина́ют. Сего́ ра́ди к ним возопи́ Иоа́нн глаго́ля. Не помышля́йте глаго́лати я́ко отца́ и́мамы Авраа́ма. Что же ра́ди не обличи́л есть их Христо́с. И́бо мно́жицею рабо́таша и еги́птяном и вавило́няном, и ины́м мно́гым, зане́ не к любоче́стию ему́ глаго́лемая бе́ша. Но ко спасе́нию и ко благодея́нию. И к сему́ тща́шеся. Поне́же рекл бы, 40 ле́та. Рекл бы у́бо 80. Рекл бы у́бо, я́же при судия́х. Я́же овогда́ у́бо, 20 овогда́ же два, овогда́ же 7. Рек бы у́бо ка́ко никогда́же преста́ша рабо́тающе;

Но не сие́ тща́шеся показа́ти рабо́в челове́ком бы́вшых, но греха́. И́же есть и люте́йшая рабо́та. Ея́же Бог еди́н свободи́ти мо́жет. Е́же бо оставля́ти грехы́. Ни еди́наго ина́го есть. И сие́ и са́ми испове́даху. Поне́же бо сие́ испове́даху Бо́жие де́ло бы́ти в сие́ их возво́дит. И рече́, всяк творя́й грех раб есть греху́. Показу́я я́ко сей глаго́лет свобо́де. Я́же от сея́ рабо́ты!

Раб же не пребыва́ет в дому́, сын пребыва́ет во ве́кы. Ти́хо и зако́ном осужа́ет гада́тельствуя пре́жния времена́ да́же бо не востека́ют и глаго́лют же́ртвы и́мамы я́же повеле́ Моисе́й. Оне́ нас свободи́ти возмо́гут, сего́ ра́ди сия́ наведе́.

Поне́же ко́е после́дование имя́ху рече́нная. Вси бо согреши́ша и лиша́ются сла́вы Бо́жия. Оправда́еми ту́не. И свяще́нницы са́ми. Сего́ ра́ди и Па́вел рече́ о иере́и. Я́ко до́лжен есть рече́ приноси́ти о себе́. Я́коже о лю́дех поне́же и той облежи́т не́мощию. И сие́ явля́ет тем е́же рещи́. Раб не пребыва́ет в дому́ зде же и единоче́стие свое́ явля́ет е́же ко Отцу́, и разли́чие раба́ и свобо́днаго. При́тча бо сие́ хо́щет си́речь не име́ет о́бласти раб. Сие́ бо есть е́же не пребыва́ет. Что же ра́ди о гресе́х бесе́дуя. До́ма воспомяну́л есть. Показу́я зане́ я́коже о до́му влады́ка. Си́це все́ми той владе́ет. А е́же не пребыва́ет сие́ есть, не име́ет о́бласть дарова́ти, а́кы не сый до́му влады́ка. Сын же до́му влады́ка есть. Сие́ бо есть пребыва́ти во ве́кы. От подо́бия челове́ческых да не глаго́лют ты кто еси́. Моя́ суть вся. Сын бо есмь, и в дому́ пребыва́ю о́тчи. Дом о́бласть нарица́я, и́бо и́нде дом нарица́ет отца́ нача́льство. В дому́ отца́ моего́ оби́тели мно́гы суть. Поне́же бо о свобо́де и рабо́те сло́во в ле́поту сим де́йствует ноше́нием глаго́ля. Я́ко не имя́ху о́бласть они́ оставля́ти. А́ще у́бо Сын вас свободи́т. Ви́дел ли еси́ единосу́щное е́же ко Отцу́. И ка́ко показу́ет ту́же име́юща самому́ о́ному власть; А́ще у́бо Сын свободи́т никто́же сопроти́в глаго́лет про́чее. Но изве́стну име́йте свобо́ду Бог бо оправда́яй, кто осужа́я. Зде показу́ет и греха́ себе́ чи́ста. И ю́же до нарече́ния свобо́ду гада́тельствует. Сию́ бо и челове́цы даю́т. О́нуже еди́н Бог. И сим увещава́ет их не срабля́тися о рабо́те сей, но о грехо́вней. И хотя́ показа́ти я́ко раби́ не бе́ша бы́ли за е́же о́ну отрази́ти. Па́че же показу́ет су́щых рабо́в тем е́же рещи́ свобо́дни бу́дете. Сие́ бо я́вляющаго есть я́ко сия́ свобо́да не и́стинна;

Та́же, да не глаго́лют я́ко греха́ не име́ем. Ле́по бо сие́ бе рещи́. Зри ка́ко их во осуже́ние вложи́ сие́. Оста́вль бо все их обличи́ти житие́. Сие́ е́же с рука́ми е́же еще́ де́йствовати хотя́ху. Приво́дит на среду́ и рече́. Вем я́ко се́мя Авраа́мле есте́. Но и́щете мене́ уби́ти. Ти́хо и пома́лу отрева́ет сро́дства их о́ного. Наказу́я не велему́дроствовати о сем. Я́коже бо свобо́да и рабо́та от дел. Си́це и сро́дство.

И не рече́ а́бие не́сте Авраа́мле сы́нове. Му́же уби́йцы, пра́веднаго. Но истека́ет еще́ и рече́. Вем я́ко се́мя Авраа́мле есть. Но не сие́ есть иско́мое. И про́чее тяжча́йша де́йствует уче́нием сим и́бо есть я́ко мно́гая соблюсти́. Я́ко хотя́ ве́лие соде́лати что. По е́же соде́лати, вя́щшим де́йствует дерзнове́нием. Я́ко сведете́льству су́щему от дел зауща́ющу их но и́щете мене́ уби́ти!

Что у́бо а́ще пра́ведне рече́. Но ниже́ сие́, те́мже и вину́ полага́ет, я́ко сло́во мое́ не вмеща́ется в вас. Ка́ко у́бо глаго́леши я́ко ве́роваху в него́. Но е́же рех. Прелага́хуся па́кы. Те́мже и зело́ их каса́шеся. А́ще бо сро́дством хва́литеся о́ного, и житие́ показа́ти подоба́ет, и не рече́ не вмеща́ете сло́во, но не вмеща́ется мое́ сло́во в вас. Высо́кое свои́х догма́т показу́я, и́бо ниже́ о сем уби́ти подоба́ше. Но па́че почита́ти угажа́ти. Я́ко бы навы́кнути. Что у́бо а́ще от себе́ сия́ глаго́леши. Сего́ ра́ди наведе́. Я́же аз ви́дех у отца́ моего́. Сия́ глаго́лю и вы я́же слы́шасте от отца́ ва́шего сия́ твори́ти. Я́коже рече́ аз и от глаго́л, и от и́стинны явля́ю отца́. Си́це и вы от веще́й. Не то́же бо существо́ то́кмо. Но и ту́же и́стинну име́ю отцу́. Глаго́лаху ему́, мы отца́ име́ем Авраа́ма. Глаго́ла им Иису́с, а́ще отца́ име́ли бысть Авраа́ма дела́ его́ твори́ли бы́сте. Ны́не же и́щете мене́ уби́ти. Ча́сте зде уби́йственое их обраща́ет произволе́ние. И Авраа́ма помина́ет. Твори́т же сие́ и сего́ их отвести́ хотя́ сро́дства. И изли́шнее хвале́ние изъя́ти, и увеща́ти не ктому́ о о́ном наде́жи спасе́ния име́ти. Ниже́ во е́же по естьству́ сро́дстве, но в су́щем по произволе́нию!

Сие́ бо бе возбраня́ющее их приходи́ти ко Христу́. Е́же непщева́ти довле́ти им сро́дство о́но во спасе́ние. Ко́юже и́стинну глаго́лет. Я́ко ра́вен есть отцу́. Сего́ бо ра́ди иска́ху его́ иуде́и уби́ти. И рече́, и́щете мене́ уби́ти я́ко и́стинну вам глаго́лах. Я́же слы́шах от Отца́. Показу́я я́ко несопроти́вна отцу́ сия́ суть. Па́кы к нему́ прибега́ет. Глаго́лаху ему́. Мы от блуда́ не́сме роже́ни. Еди́наго отца́ име́ем Бо́га. Что глаго́леши вы отца́ Бо́га име́ете, и Христу́ ли порица́ете сие́ глаго́лющу.

Зри́ши ли я́ко изря́дне глаго́лаше своего́ отца́ бы́ти Бо́га. Поне́же у́бо сро́дства их отве́рже Авраа́мля. Ничто́же име́юще рещи́. И́но не́что бо́лше дерза́ют к Бо́гу востека́юще. Но и сия́ их отрева́ет че́сти глаго́ля. А́ще Бог оте́ць ваш был бы люби́ли у́бо мя бы́сте. Зане́ аз от Бо́га изыдо́х и приидо́х. И от себе́ не приидо́х, но он мя посла́. Что ра́ди не ве́сте бесе́ды моея́. Зане́ не мо́жете слы́шати слове́с мои́х! Вы о́то отца́ ва́шего диа́вола есте́. И вожделе́ния отца́ ва́шего хо́щете твори́ти, он человекоуби́йца бе искони́. И во и́стинне не стои́т. Егда́ глаго́лет лжу. От свои́х глаго́лет изве́рже их сро́дства Авраа́мля. И поне́же бо́лшая дерзну́ша. Тогда́ про́чее наво́дит я́зву глаго́ля. Я́ко не то́кмо Авраа́мли не суть но я́ко и диа́воли суть. Спроти́в си́лно безсту́дия дая́ сече́ния и ниже́ без сведе́тельства сие́ оставля́ет, но обличе́ньми сие́ состроя́ет. Е́же бо убива́ти рече́ о́ного зло́бы есть и не рече́ про́сте де́ла. Но вожделе́ния его́ твори́те. Показу́я я́ко зе́лне и он и си́и уби́йств держа́тся. И я́ко за́висть бе вина́. Ниже́ бо име́я что Ада́му порица́ти. Но ра́зве зави́дуя то́кмо. Уби́ сие́ у́бо и зде гада́тельствует, и во и́стинне не стои́т, си́речь в пра́вом житии́;

Поне́же бо ча́сте его́ оклеветова́ху я́ко от Бо́га несть глаго́ла. Я́ко и сие́ отту́ду есть. Он бо пе́рвый роди́л есть ложь глаго́ля. Во́ньже день а́ще сне́сте, отве́рзются ва́шя очеса́. То́ею пе́рвый де́йствова. Челове́цы бо не я́ко свое́ю ею́ де́йствуют, но я́ко чу́жею. Сей же я́ко свое́ю. Аз же я́ко и́стинну глаго́лю, не ве́руете ми ко́е сие́ после́дование. Ничто́же порица́юще уби́ти мя хо́щете. Поне́же бо врази́ есте́ и́стинны, сего́ ра́ди мене́ го́ните. Поне́же а́ще не сего́ ра́ди. Рцы́те согреше́ние. Сего́ бо ра́ди наведе́. Кто от вас обличи́т мя о гресе́. Та́же они́, мы от блуда́ не роди́хомся и у́бо от блуда́ роди́шася мно́зи и́бо не подоба́ющая смеше́ния творя́ху. Но ниже́ сие́ облича́ет. Но ко о́ному стои́т. Поне́же бо показа́ не су́щых от Бо́га но от диа́вола. От сих всех. И́бо е́же убива́ти диа́вольско есть. И е́же лга́ти диа́вольско. Я́же обоа́вы? творите́. Показу́ет я́ко е́же люби́ти сию́. Зна́мение е́же от Бо́га не бы́ти что ра́ди не ве́сте бесе́ды моея́. Поне́же бо при́сно недоуме́яху глаго́люще. Что есть я́ко глаго́лет. Иде́же аз иду́. Вы не мо́жете приити́. Сего́ ра́ди рече́ не ве́сте бесе́ды моея́, я́ко сло́во Бо́жие не име́ете. Сие́ же вам быва́ет за долере́вностное мы́сли. И за е́же мно́го бо́лше бы́ти моя́. Что у́бо а́ще не можа́ху све́дети. Зде е́же не́мощи, е́же не хоте́ти есть. Я́ко смире́нных себе́ наказа́сте. Я́ко ничто́же ве́лие мечта́ете. Поне́же бо глаго́лаху гони́ти его́ я́ко о Бо́зе ревну́юще, сего́ ра́ди везде́ покуша́ется показа́ти. Я́ко е́же гони́ти его́. Ненави́дящых есть Бо́га. Сопроти́вное же, е́же люби́ти ве́дящых Бо́га рече́. Еди́наго отца́ име́ем Бо́га. От сих украша́ются от че́сти а не о исправле́нии;

Не у́бо е́же чу́жу бы́ти мне е́же не ве́ровати вам зна́мение. Но е́же вам не ве́дети Бо́га. Неве́рие зна́мение вино́вно е́же от е́же хоте́ти лга́ти и диа́волськая твори́ти. Сие́ же твори́т, душе́вная ху́дость я́коже апо́стол рече́, иде́же бо в вас рве́ние и за́висть не пло́тсти ли есте́, что же ра́ди не мо́жете, я́ко вожделе́ния отца́ ва́шего хо́щете твори́ти. Тщи́теся, любопри́теся!

Зри́ши ли я́ко е́же не́мощи е́же не хоте́ти глаго́лет. Я́ко Авраа́м сие́ не сотвори́л есть. Но ка́я суть его́ дела́. Кро́ткое, ти́хое, поко́рное. Вы же от сопротивле́ния стоите́, непокорли́ви су́ще и лю́ти.

Отку́ду же им наиде́ к Бо́гу прибега́ти недосто́йных их, показа́ Авраа́ма. Хотя́ше у́бо сего́ избежа́ти. На бо́лшее взыдо́ша поне́же бо поноси́ уби́йство я́ко отвеща́ние не́кое творя́ще я́ко Бо́га отмща́ют, сие́ глаго́лаху. Показу́ет у́бо я́ко сие́ са́мое сопротивля́ющихся есть Бо́гу. А е́же изыдо́х, показу́ет себе́ отту́ду су́ща. Изыдо́х же глаго́ла, е́же. К нам достиже́ние. Гада́тельствуя. Поне́же ле́по бе им рещи́. Я́ко стра́нна не́кая глаго́леши и но́ва. От Бо́га речь приити́. В ле́поту у́бо не послу́шает их рече́, от диа́вола су́ще. Что бо ра́ди убива́ете. Что име́юще порещи́. А́ще не сие́ есть, что ра́ди не ве́руете мне си́це у́бо их су́щых от диа́вола. От лжи и уби́йства показа́в. Показа́ чу́жих су́щых, Авраа́ма и Бо́га от е́же ненави́дети ничи́м же обе́дившаго. И от е́же не слу́шати слове́с его́. И показу́ет горе́ и до́лу. Я́ко ниже́ богопроти́вен бе. Ниже́ сего́ ра́ди не ве́роваху. Но я́ко чу́жии бе́ша Бо́гу. И́же бо греха́ не сотвори́в. Глаго́ля и себе́ приити́ от Бо́га. И отту́ду посла́тися. И́стину глаго́ляй. И си́це и́стинну глаго́ля, я́ко всех ко обличе́нию призыва́ти, та́же не ве́руем. Благоявле́нно я́ко за е́же плотяны́м оне́м бы́ти не ве́руется:

Нравоуче́ние 54. Я́ко не жите́йская. Но ца́рствие небе́сное похыща́ти подоба́ет.

Ве́дят бо ве́дят смире́нну ду́шу твори́ти грехы́. Сего́ ра́ди рече́. Поне́же лени́ви бы́сте слу́хы ва́шими егда́ бо су́щых на земли́ пренебрещи́ не возмо́жет кто. Ка́ко о су́щых на небесе́х любому́дрити и́мать когда́. Сего́ ра́ди молю́ вся да де́йствуем. Я́ко бы житию́ на́шему испра́витися. Я́ко бы очи́ститися мы́сли. Я́ко бы ничто́же скве́рно бы́ти нам возбране́ние, просвети́те бо себе́ свет ра́зума. И не се́йте в те́рниях: не ве́дый бо я́ко е́же лихои́мствовати зло. Когда́ уве́сть бо́лшее. Не оша́яйся сих. Когда́ оне́х держа́тися и́мать. Добро́ е́же похыща́ти но не погыба́ющая но ца́рствие небе́сное. Ну́жницы бо рече́ похища́ют е́, не у́бо с ле́ностию есть получи́ти его́. Но со тща́нием что же есть ну́жницы. Ну́жи тре́ба мно́гыя: те́сен бо путь. И ю́ношьскыя тре́бует ду́ши и до́блественыя. Похыща́ющеи, всех хотя́т предвзя́ти. К ничему́ же зрят ни к зазре́нию. Ни ко осуже́нию. Ни к муче́нию. Но еди́ного быва́ют то́кмо, е́же взя́ти я́же хотя́т похи́тити. И всех су́щых напреди́ претека́ют.

Да похища́ем у́бо ца́рствие небе́сное. Несть бо зде согреше́ние е́же похища́ти. Но похвала́, согреше́ние же зде е́же не похища́ти. Не ина́го тще́ты, но на́ше быва́ет бога́тьство, да потщи́мся у́бо сие́ похи́тити. А́ще и стужа́ет я́рость. А́ще и стужа́ет вожделе́ние, да пону́дим естество́ кротча́йши да быва́ем. Труди́мся ма́ло да упоко́имся непреста́нне, да не похи́тиши зла́то. Но похи́ти бога́тство. Ти́ну показу́ющее зла́то. Рцы бо ми а́ще предлежа́л бы свине́ц и зла́то, что у́бо похи́тил бы еси́, не благоявле́нно ли я́ко зла́то. То́же иде́же у́бо похища́яй му́чится бо́лшее почита́еши. А иде́же похища́я и почита́ется. Предае́шили бо́лшее. А́ще бо от обою́ду му́ка была́ бы, не на сие́ ли па́че прише́л бы еси́ зде́же ничто́же таково́ есть, но блаже́нство. И ка́ко есть похи́тити рече́, пове́рзи су́щая в рука́х. Доне́лиже бо сия́ держи́ши. О́на похи́тити не возмо́жеши!

Помы́сли бо ми му́жа сребра́ ру́кы испо́лнены име́юща. Еда́ возмо́жет до́ндеже держи́т сие́ похи́тити зла́то. А́ще не пове́ржет сие́ и благоразреше́н бу́дет. Похища́ющему бо бла́го опоя́сану подоба́ет бы́ти, я́ко бы не удержа́ну бы́ти. И́бо и ны́не суть сопроти́вныя си́лы натека́ющия на нас да отъи́мут. Но да бе́гаем их бе́гаем. Ниже́ еди́ну привлача́юще вину́ отвне́. Да пресеца́ем ю́жа. Нази́да? быва́ем жите́йскых. Ка́я потре́ба шо́лковых риз. Доко́ле зла́то посыпа́ем. Хоте́х преста́ти сия́ глаго́ля при́сно, но вы не оставля́ете. При́сно мне подаю́ще изве́ты и вины́ но ны́не у́бо да отступи́м. Да ины́х житие́м наказа́вше, получи́м обеща́нных благы́х. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва со Святы́м Ду́хом ны́не и при́сно и во ве́ки веко́в, Ами́нь.