Ева́нгелие Отвеща́ша у́бо иуде́и ре́ша ему́, не до́бре ли глаго́лем мы, я́ко самаряни́н еси́ ты и бе́са име́еши. Отвеща́ Иису́с, аз бе́са не име́ю.

Толкова́ние Безсту́дно зло́ба, и лю́то. И егда́ стыде́тися подоба́ше. Тогда́ па́че свере́пеет. Е́же у́бо и о иуде́ех бысть. Потре́бно бо о рече́нных умили́тися почуди́вшимся дерзнове́нию и рече́нных после́дованию. Они́же досажа́ют самаряни́на нарица́юще. И бесну́ющася глаго́люще и ре́ша, не до́бре ли глаго́лем. Я́ко самаряни́н еси́ ты и бе́са име́еши; Егда́ бо высо́ко. Что рече́т, неи́стовство сие́ ви́дится от зело́ нечу́вственых бы́ти. А́ще и нигде́же евангели́ст рече́ пре́же я́ко самаряни́на нареко́ша. Но ле́по отрече́ния сего́. Мно́жицею от них рещи́ся сему́. Бе́са име́еши рече́. И́бо кто бе́са име́яй почита́я Бо́га. Или́ почита́ющему досажа́яй, что у́бо Христо́с, кро́тость. Ти́хость, аз бе́са не име́ю. Но чту посла́вшаго Мя. Иде́же у́бо научи́ти их подоба́ше. И мно́гое их нисто́ргнути киче́ние. И наказа́ти не ве́лие му́дрствовати о Авраа́ме. Зе́лен бе. А иде́же досажа́ему ему́ подоба́ше претерпе́ти, мно́гою кро́тостию де́йствует. Егда́ бо глаго́лаху я́ко отца́ Бо́га име́ем Авраа́ма, зело́ их каса́шеся. Егда́ же его́ бесну́ющася нарица́ху. Ти́хо сло́вом де́йствует наказу́я нас: я́же у́бо в Бо́га отмща́ти. А я́же к нам презира́ти. Аз не ищу́ сла́вы моея́. Сия́ рек рече́. Показу́я я́ко не пристоя́ше Бо́га вам нарица́ти отца́, мужеуби́йцем су́щим. Те́мже че́стию е́юже ко о́ному сия́ веща́х, и о́ного ра́ди сия́ слы́шу. И его́ ра́ди безче́стисте мя. Но ничто́же ми раде́ние безче́стия досаже́ния сего́. О́ному испыта́ния до́лжни есте́ рече́нных. Его́же ра́ди сия́ слы́щу ны́не. Аз не ищу́ сла́вы моея́ сего́ ра́ди оста́вль е́же му́чити вас на наказа́ние обраща́юся. И совещева́ю сия́ твори́ти. От ни́хже не то́кмо му́кы избежи́те. Но и ве́чныя жи́зни полу́чите. Ами́нь Ами́нь глаго́лю вам, а́ще кто сло́во мое́ соблюде́т не у́зрит сме́рти во ве́кы. Зде не ве́ру то́кмо рече́, но и житие́ чи́стое. И вы́ше у́бо глаго́лаше. Живо́т ве́чный прии́мет. Зде же рече́, сме́рти не у́зрит. Вку́пе же и гада́тельствует. Я́ко ничто́же мо́гут ему́ сотвори́ти. А́ще бо сло́во его́ соблюда́я и не у́мрет мно́го па́че сам, сие́ у́бо све́дяще, и они́ глаго́лют. Ны́не разуме́хом я́ко бе́са име́еши Авраа́м у́мре и проро́цы умро́ша си́речь и́же сло́во слы́шавше Бо́жие умро́ша и и́же твое́ слы́шавше не у́мрут ли; Еда́ ты бо́ле еси́ отца́ на́шего Авраа́ма, о́ тщесла́вия. Па́кы на сро́дство его́ притека́ют и́бо после́дователно бе рещи́. Еда́ ты бо́лше еси́ Бо́га, или́ слы́шавше тебе́ Авраа́ма. Но не глаго́лют сие́, поне́же Авраа́ма ме́нша его́ непщева́ху бы́ти; Пре́же у́бо показа́ мужеуби́йц, и си́це их отведе́ сро́дства. Егда́ же пребы́ша, и́нако сие́ ухищря́ет па́кы. Показу́я, я́ко неполе́зная тружа́ются. И о сме́рти у́бо ничто́же им бесе́дова. Ниже́ откры́. Ниже́ рече́ ко́ю глаго́лет смерть. Еще́ же увещева́ет я́ко Авраа́ма лу́чши есть, да и сим умо́лит;

Наипа́че у́бо а́ще и прилу́чшиися был бых, не подоба́ше умре́ти ничи́мже оби́девшу. Егда́ же и́стинну глаго́лю. И ниже́ еди́н грех име́ю. И от Бо́га по́слан бу́ду, и Авраа́ма бу́ду лу́чши, ка́ко неи́стовитеся и не поле́зная тружа́етеся, начина́ющи уби́ти. Что у́бо они́, ны́не позна́хом, я́ко бе́са име́еши. Но самаряны́ня не си́це. Ниже́ рече́ ему́ бе́са име́еши. Но толи́ко то́кмо еда́ ты бо́лши еси́ отца́ на́шего Иа́кова; Си́и бо бе́ша досади́тели и уби́йцы, она́же уве́дети хотя́ше. Те́мже и взыскова́ше. И с подоба́ющым смире́нием отвещева́ше. И го́спода его́ нарица́ет. И́же бо мно́га бо́лше обещева́ющу и достове́рну су́щу; Не досажа́тися подоба́ше. Но и почита́тися и чуди́тися. Си́и же, и бесну́ющая его́ глаго́лют. Она́ бо я́же самаряны́ни недоуме́ющияся бе́ша. Сия́ же не ве́рующих и развраще́нных. Еда́ ты бо́лши еси́ отца́ на́шего Авраа́ма;

Я́коже сие́ бо́лша бы́ти твори́т Авраа́ма егда́ у́бо изше́дша ви́дите. Испове́даете я́ко бо́лши есть. Сего́ ра́ди глаго́лаше. Егда́ вознесе́те мя, тогда́ разуме́ете я́ко аз есмь!

И зри ра́зум пе́рвее их отдра́в сро́дства, показу́ет себе́ о́ного бо́лша су́ща бы́ти. Да от мно́гаго вели́чества. Бо́лши уви́дится и проро́к. Поне́же бо при́сно проро́ка глаго́лаху его́, си́це ра́ди глаго́лаше. Сло́во мое́ не вмеща́ется в вас!

Та́мо бо глаго́лаше, я́ко воскреша́ет ме́ртвых. Зде же не у́зрит сме́рти ве́руяй. Е́же мно́го бо́лше бе, е́же не попусти́ти удержа́тися сме́ртию. Те́мже па́че свере́пеху. Что у́бо они́, кого́ себе́ твори́ши. И сие́ досади́телне ты рече́ угожа́еши себе́. К сему́ у́бо Христо́с. А́ще аз сла́влюся сам, сла́ва моя́ ничто́же есть. Ко́я глаго́лют зде еретикы́. Слы́ша еда́ ты бо́лши еси́ отца́ на́шего Авраа́ма; И не дерзну́ им рещи́. Яко ей. Но спокрове́нне сие́ твори́т. Что у́бо. Ничто́же ли есть сла́ва его́, ко оне́м ничто́же есть. Я́коже бо глаго́лет, сведе́тельство мое́ несть и́стинно. Ко оне́х непщева́нию. Си́це и зде рече́ есть прославля́яй мя. И что ра́ди не рече́ отець посла́вый мя но а́кы бы глаго́лал. Но его́же вы глаго́лете я́ко Бог вашь есть и не ве́сте его́. Хотя́ше бо показа́ти я́ко не то́кмо отца́ его́ не ве́дят, но ниже́ Бо́га. Аз же вем его́. Те́мже не е́же глаго́лати я́ко аз вем его́ киче́ние есть. Но е́же рещи́ не ве́дети ложь вы же глаго́люще ве́дети его́, лже́те. Си́це аз а́ще реку́ не ве́дети. А́ще аз сла́влю себе́. Поне́же у́бо глаго́лаху кого́ себе́ твори́ши, рече́. А́ще аз творю́. Сла́ва моя́ ничто́же есть. Я́коже у́бо аз его́ вем изве́стне. Си́це его́ не ве́сте вы;

Я́коже бо о Авраа́ме не все отъя́т. Но рече́, вем я́ко се́мя Авраа́мле есте́. Яќо бы бо́лше сотвори́ти осуже́ние. Си́це зде не все отъя́т но что. Его́же вы глаго́лете. Да в е́же глаго́лы похвале́ние бо́лше сотвори́ согреше́ние. Ка́коже ли не ве́сте его́. Зане́ вся о нем и глаго́лющаго и творя́щаго. Я́ко бы ему́ просла́витися досажа́ете. А́ще и от о́ного по́сланна. Но сие́ без сведе́тельства; Но про́чаго сострои́телна, и сло́во его́ соблюда́ю. Зде же а́ще бы что име́ли могли́ бы обличи́ти, велича́йше бо бе указа́ние, е́же от о́ного посла́тися. Авраа́м оте́ць ваш возра́довася. Да уви́дит день мой, и ви́де возра́довася, па́кы показу́ет их чу́жих су́щых о́ного. А́ще у́бо о ни́хже он возра́доватися, си́и боле́знуют. Дня же зде мне ви́дится глаго́лати кре́стнаго. Его́же в приноше́нии о́вни и Исаа́кове предвообрази́;

Что у́бо они́, четы́редесяте лет не у́ и́маши. И Авраа́ма ли ви́дел еси́; Я́ко близ четы́редесятих лет про́чее бы́ти Христу́. Глаго́ла им пре́же не́же Авраа́му бы́ти аз есмь, и взя́ша ка́мения да ве́ргут Нань. Зри́ши ли ка́ко же бо́лшу бы́ти Авраа́ма устро́ил есть. Возра́довавый бо ся да уви́дит день. И потща́тельно сие́ положи́в. Благоявле́нно я́ко о благодея́нии бы́вшаго и я́ко бо́лшаго.

Поне́же бо глаго́лаху текто́нов сын и ничто́же вя́щше мечта́ху пома́лу их возво́дит к высоча́йшему разуме́нию. Егда́ у́бо слы́шаша я́ко не ве́сте Бо́га, не боле́зноваша. Егда́ же слы́шаша пре́же не́же Авраа́му бы́ти аз есмь, я́ко благоро́дству их смиря́ему свере́пеху и ка́мением побива́ху. Ви́де де́ньми и возра́довася. Показу́ет я́ко не нево́лею на страсть гряде́т. А́ще у́бо похваля́ет обра́довавшегося о кресте́. Сие́ бо спасе́ние вселе́нныя бе, они́же ка́мение мета́ху си́це ко уби́йствам гото́ви бе́ша. И собо́ю сия́ де́йствоваху, ничто́же истяза́юще!

Что же ра́ди не рече́, пре́же Авраа́му бы́ти аз бех, но аз есмь. Я́ко оте́ць его де́йствует сим рече́нием есмь. Си́це и той, е́же бо непреста́нне бы́ти. Знамена́телно сие́. Вся́кого свобоже́нно вре́мени. Сего́ ра́ди и ху́лно им бы́ти рече́ние ви́дится. А́щеже е́же ко Авраа́му сосужде́ние не претерпе́ша. А́ще и ма́ло су́ще. А́ще ча́сте себе́ сравня́л бы отцу́. Еда́ у́бо преста́ли бы его́ побива́юще; Та́же бе́гает па́ки челове́чьскы и кры́ется. Дово́лно уче́ние им предлага́я. И своя́ соверши́в, взы́де от святи́лища, и отлучи́ся на исцеле́ние слепа́го. Де́лы уверя́я, я́ко пре́же Авраа́ма есть;

Но не́гли рече́т кто, что ра́ди не разруши́ их си́лу. Си́це бо ве́ровали бы. Разсла́бленаго исцели́л есть, и не ве́роваша. Ина́я безчи́сленая соде́ла, и в само́й же стра́сти, пове́рже их, в зна́кых?. И помрачи́ их зре́ния, и не ве́роваша. И ка́ко бы у́бо ве́ровали, а́ще си́лу их разруши́л бы, души́ бо отча́явшияся, ничто́же го́рше. А́ще и зна́мения уви́дит, а́ще и чудеса́, пребыва́ет то́же безсту́дие име́ющи.

Нравоуче́ние 55. О за́висти и я́ко от Бо́га у́бо быва́емым, сра́доватися подоба́ет. Зле же стра́ждущым сболе́зновати. А́ще и от Бо́га му́чится.

Фарао́н безчи́сленыя прии́м я́звы. Егда́ му́чашеся то́кмо уцелому́дряшеся. И до после́дняго дни тако́в пребы́сть. Гоня́ и́хже отпусти́. Сего́ ра́ди горе́ и до́лу Па́вел рече́, да не ожесточи́тся кто от вас ле́стию грехо́вною. Я́ко бо столпи́ те́ла умерщвя́ются про́чее. И ниже́ еди́но чу́вство име́ют. Си́це и душа́, егда́ мно́гыми удержа́на бу́дет страстьми́ умерщвя́ется к доброде́тели. А́ще и что у́бо принесе́ши, не прие́млет ве́щи чу́вство. Но а́ще и му́ку, а́ще и яково́ любовоспрети́ши, не поболе́нна пребыва́ет. Те́мже у́бо молю́ся, до́ндеже наде́жи име́ем спасе́ния, до́ндеже мо́жем обрати́тися, вся твори́ти. И́же бо от безнаде́жившеся. Я́коже ко́рмников отча́явшейся ве́тру ды́шущу кора́бль преда́вше. Ничто́же от себе́ вно́сят, си́це и си́и пробода́ются про́чее. Егда́ бо зави́дливый во еди́но зрит то́кмо, вожделе́ние испо́лнити свое́. А́ще и му́читися хо́щет, а́ще и убие́н бы́ти стра́сти быва́ет то́кмо. И блу́дный, и любоиме́телный. А́ще же страсте́й толи́ко томи́тельство. Мно́го па́че доброде́тели. А́ще оне́х ра́ди сме́рти пренебрега́ем, мно́го па́че сея́ ра́ди. А́ще они́ души́ пренебрегу́т своея́. Мно́го па́че о спасе́нии на́шем сие́ твори́ти подоба́ет. Ко́е бо нам бу́дет сло́во. Егда́ погыба́ющим си́це тща́щимся о свое́й погы́бели, мы о свое́м спасе́нии ниже́ толи́ко показу́ем тща́ние. Но при́сно за́вистию тае́ми пребыва́ем. Ничто́же бо завиде́ния го́рше. Да́же ина́го погуби́т. И себе́ припогуби́т, зави́стливаго о́ка. Истаява́ет печа́лию, сме́рти соживе́т всегда́шней, всех враго́в непщу́ет. Ничи́мже оби́девших. Ту́жит я́ко Бог почита́ется. Ра́дуется о ни́хже диа́вол ра́дуется. Он си́це почте́н бысть пред челове́кы. Но несть сия́ честь. Не зави́ди но пред Бо́гом ли почте́ся; Поревну́й и бу́ди подо́бен. Но не хо́щеши ли. Что у́бо и себе припогубля́еши. Что и е́же име́еши поверза́еши не мо́жеши ли бы́ти ра́вен о́ному. Ниже́ взя́ти что добро́; Что и зело́ прие́млеши. Потре́бно соуслади́тися. Да а́ще и приобщи́тися трудо́в не возмо́жеши. От е́же соуслади́тися приобрета́еши. Довле́ет мно́гажды и произволе́ние ве́лие сотвори́ти бла́го. Иезекии́ль у́бо рече́, сего́ ра́ди моави́тяном учи́тися, за е́же ра́доватися о израильтя́нех, и ины́х не́кым спаса́тися зане́ воздыха́ху о ины́х злых.

А́ще же воздыха́ющым о ины́х злых есть не́кое утеше́ние. Мно́го па́че услажа́ющимся о че́стех ины́х. Порица́еши моави́тяном я́ко ра́довахуся о израильтя́нех. А́ще и Бог му́чаше. Но ниже́ егда́ сам му́чит, услажа́тися нам хо́щет от му́чимых. Ниже́ бо сам хо́щет их му́чити, а́ще ли же сболе́зновати подоба́ет му́чимым. Мно́го па́че почита́емым не зави́дети. Си́це убо и́же о Коре́и и Дафа́не погыбо́ша. Зави́димых у́бо светле́йшых сотво́рше. Себе́ же му́це преда́вше. Зверь бо есть ядови́т за́висть. Зверь нечи́ст, и зло́ба произволе́ния, ми́лости не име́ющи. Лука́вьство отве́та лише́но всех вина́ и́мати злых! Те́мже искорени́ сию́ да изы́мем да настоя́щых злых свободи́мся. И бу́дущых благы́х получи́м. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́кы веко́в, Аминь.