Ева́нгелие И ми́мо ходя́ Иису́с. Ви́де челове́ка сле́па от роже́ния. И вопроси́ши его́ ученицы́ его́ глаго́люще, учи́телю кто согреши́. Сей или́ роди́тели его́. Да слеп роди́тся.

Толкова́ние И преходя́ Иису́с. Ви́де челове́ка сле́па от роже́ния. Зело́ человеколюби́в сый. И о на́шем спасе́нии промышля́я. И неблагода́рных уста́ загради́ти хотя́ ничто́же от пристоя́щых ему́ оставля́ет. А́ще и ни еди́н же внима́яй бу́дет. Сие́ у́бо и проро́к ве́дый глаго́лаше. Я́ко да оправди́шися в словесе́х свои́х, и победи́ши внегда́ суди́ти. Сего́ у́бо ра́ди и зде поне́же высо́кое слове́с не прия́ша. Но и бесну́ющаяся нареко́ша. И уби́ти начина́ху. Изше́д от святи́лища исцеля́ет слепа́го. И отше́ствием я́рость утеша́я, и содея́нием зна́мения жесто́кое их и не поко́рное умякча́я. И рече́нна уверя́я и твори́т зна́мения не прилу́чшеися. Но тогда́ пе́рвее слу́чшеися. От ве́ка бо рече́ несть слы́шано я́ко отве́рзе кто очеса́ слепороже́нну сле́пу у́бо не́гли отве́рзе роже́ннуже не ктому́. И я́ко изше́д от святи́лища на де́ло прии́де прили́чно. Я́вьствено отту́ду сам бо ви́де слепа́го. А не слепе́ць к нему́ прии́де и си́це потща́телне возре́. Я́ко и ученико́м чу́вьство пода́ти. От сего́ у́бо и на вопроше́ние приидо́ша. Зря́ше бо его́ потща́телне внима́юща, вопраша́ху глаго́люще, кто согреши́, сей или́ роди́тели его́. Соблажне́нно вопроше́ние, ка́ко бо согреши́л бы пре́же не́же роди́тися, ка́коже роди́телем согреши́вшим. Той у́бо му́чилбыся.

Отку́ду у́бо приидо́ша на вопроше́ние сие́. Пре́же сего́ разсла́бленаго исцеля́я глаго́лаше. Се здрав был еси́ ктому́ не согреша́й. Си́и у́бо помы́сливше я́ко он грех ра́ди разсла́блен бысть. Глаго́лаху Христу́, бу́ди он грех ра́ди разсла́блен бысть. О сем же что у́бо рече́ши. Сей или́ согреши́. Но несть рещи́. От ро́дства бо есть слеп. Но роди́телие ли его́, но ниже́ сие́ сын бо о отце́ не стра́жет ка́зни. Я́коже бо отроча́ озлобля́емо зря́ще глаго́лем. Что у́бо реку́т о сем, что сотвори́ло есть отроча́ не вопроша́юще. Но недоуме́юще. Си́це у́бо и ученицы́ не толи́ко воспроша́юще сие́ глаго́лаху но недоуме́юще, что у́бо Христо́с. Ниже́ сей согреши́ ниже́ роди́телие его́. Сие́ же не грехо́в свобожа́ их рече́;

Не про́сте бо рече́ ниже́ сей согреши́ ниже́ роди́телие его. Но наведе́ да слеп роди́тся. Но да просла́вится Сын Бо́жий. Согреши́ бо и сей, и роди́телие его́. Но не отсю́ду ослепле́ние. Сия́ же глаго́лаше, не сие́ явля́я я́ко сей у́бо не си́це. Ини́и же не́цыи от сих ослепле́ни бы́ша вин за грехы́ роди́телеи ниже́ бо есть согреши́вшу ино́му му́чити ина́го. Поне́же а́ще сие́ да́мы. И о́но да́мы. Я́ко пре́же роже́ния согреши́л есть я́коже у́бо рек ниже́ сей согреши́ роди́телие его́ не сие́ рече́. Я́ко есть роди́телей ра́ди му́читися. И́бо Иезекии́лем мне́ние сие отъе́млет. Живу́ аз глаго́лет Госпо́дь: а́ще будет при́тча сия́ глаго́лемая. Отцы́ ядо́ша те́рпкая. И зу́бы ча́дом окрови́шася, и Моисе́й же рече́, не у́мрет оте́ц о ча́де. И о не́коем цари́ рече́ я́ко сего́ ра́ди не сотвори́ соблюда́я зако́н Моисе́ов. А́ще же глаго́лет кто, ка́ко у́бо рече́ся. Тре́тий и четве́ртый род о́но у́бо рече́м. Я́ко несть собо́рно изрече́ние. Но о не́ких рече́ся. И́же от Еги́пта исше́дшых. А е́же глаго́лет таково́ есть. Поне́же у́бо из Еги́пта изше́дше и по зна́мениях и чудесе́х прароди́телей бы́ша го́рши и́же ничто́же сих ви́деша та́яже постра́жут рече́ я́же пострада́ша они́ поне́же, та́яже дерзну́ша. И я́ко онех́ рече́ся. Ме́сту не́кто надста́в опа́снейше уве́сть!

Что ли у́бо ра́ди слеп роди́ся. Да яви́тся сла́ва Бо́жия рече́. Се па́кы недоуме́нно и́но а́ще кроме́ сего́ му́ки немо́щно яви́тися Бо́жией сла́ве; Наипа́че у́бо, не сие́ рече́ся я́ко не мо́щно. Мо́щно бо но и о сем да яви́тся. Что у́бо рече́, непра́вдовася сла́вы ра́ди Бо́жия. Ко́ею непра́вдою рцы ми. А́ще бо ниже́ отню́д привести́ его́ хоте́л бы. Аз же и благода́тельствоватися ему́ реку́, от ослепле́ния вну́треними бо прозре́ очесы́!

Ка́я бо по́лза иуде́ом оче́с есть. Бо́лшую у́бо му́ку стяжа́ша. Осле́пльше внегда́ зре́ти. Кото́рыи же сему́ вред от ослепле́ния. Сим бо прозре́. Я́коже у́бо зла́я не суть зла я́же по настоя́щему житию́. Си́це ниже́ блага́я бла́га. Но грех еди́н зло ослепле́ние е́же не зло приведы́йже от не су́щаго в е́же бы́ти, о́бласть имя́ше и си́це его́ оста́вити. Ре́ша же не́цыи я́ко сие́ ниже́ виносло́вно есть прорече́ние, но сбы́тия. Си́речь я́ко егда́ глаго́лет, я́ко на суд аз приидо́х в мир. Да не ви́дящии прозря́т и ви́дящии сле́пи бу́дут. И па́кы Па́вел, разу́мное бо Бо́жие я́вьственно есть в них. В е́же бы́ти им не отве́тным, и́бо не сего́ ра́ди им показа́ да лиша́тся отве́та, и па́ки и́нде. Зако́н привни́де. Да умно́жится недоста́точное. А́ще и не сего́ ра́ди привни́де но да возбрани́тся грех. Зри́ши ли везде́ прирече́ние сбы́тия су́ще. Я́коже бо не́кто зда́тель изря́ден хра́мины. О́во у́бо соде́ла. О́воже оста́ви несконча́нно. Я́ко бы не ве́рующим оста́тком и о всем отвеща́ти. Си́це и Бог, я́ко хра́мину не́кую согни́вшу. Те́ло на́ше соприле́пляет и наполня́ет, и ру́ку суху́ю исцеля́я. Разсла́бленыя у́ды стязу́я. Хромы́х исправля́я. Прокаже́ных очища́я. Неду́гующих воздвиза́я голе́нми напа́ствованных соверше́нных творя́, ме́ртвых от сме́рти взыва́я сомже́ныя очеса́ отверза́я не су́щая наложи́в. Я́же вся есте́ственыя не́мощи су́ща напа́ствования. Та́же исправля́я. Показова́ше свою́ си́лу. Ре́кже да яви́тся сла́ва Бо́жия. О себе́ рече́ а не о отце́, о́ного бо сла́ва бе я́вьствена. Поне́же бо слы́шаху я́ко челове́ка Бог сотвори́ взем персть от земли́ сего́ ра́ди си́це и той созда́.

Е́же бо рещи́ я́ко аз есмь прие́мый персть от земли́ созда́в челове́ка. Же́стоко ви́дящеся бы́ти слы́шащим. Де́лом же сим показу́емо, не ктому́ про́чее проти́в стоя́ше. Те́мже у́бо и сам персть взем и растворя́я плюнове́нием. Си́це сокрове́нную свою́ си́лу и сла́ву изъяви́л есть. Нема́ла бо сла́ва е́же соде́телю ему́ непщева́тися тва́ри. От сего́ бо. И ина́я совхожа́ху от ча́сти и все уверя́ше я́же бо о бо́лшем ве́ра и ме́ншее утвержа́ше. Тва́ри бо всея́. Честне́йши челове́к. И в су́щых в нас удесе́х, честне́йше о́ко. Сего́ ра́ди не про́сте но о́нем о́бразом очеса́ соде́тельствова. А́ще бо и мал вели́чьством уд. Но всего́ телеси́ есть нужне́йшь. И сие́ Па́вел явля́я глаго́лаше. А́ще рече́т слух я́ко несмь о́ко, несмь от телеси́, не сего́ ра́ди несть от телеси́. Вся бо я́же в нас Бо́жия прему́дрости есть указа́ние. Мно́го же па́че о́ко, сие́ у́бо все окормля́ет те́ло. Сие́ всему́ те́лу, красоту́ соде́ловает сие́ украша́ет зре́ние. Сие́ свети́лник есть всех удо́в. Е́же бо со́лнце по вселе́нней сие́ о́ко в телеси́. А́ще угаси́ши со́лнце, вся погуби́л еси́ и смути́л еси́. А́ще угаси́ши очеса́ и но́гы не потре́бни и ру́ки, и душа́. Погыба́ет бо ра́зум, осле́пшим сим. Си́ми бо Бо́га позна́хом. Неви́димая бо от созда́ния ми́ра. Творе́нми познава́ема ви́дятся. Не у́бо те́лу свети́лник о́ко то́кмо но и пре́же те́ла души́. Те́мже я́коже в не́коем ца́рском ме́сте водруже́но есть вы́шний жре́бий получи́вше и ины́х чувьств председя́ще.

Сие́ у́бо назида́ет та́же да не вознепщу́еши я́ко ве́щи тре́бует егда́ твори́т и да навы́кнеши я́ко ниже́ в нача́ле бе́рния потре́бу имя́ше. И́же бо не су́щая существа́ бо́лшая приве́д. Мно́го у́бо па́че сие́ кроме́ ве́щи сотвори́л бы. Да́же у́бо навы́кнеши я́ко не потре́бы ра́ди сие́ твори́т. Но науча́я соде́теля бы́ти себе́ су́щих в нача́ле. Пома́зав бе́рнием рече́ иди́ умы́йся. Да уве́си я́ко не бе́рния тре́бую ко е́же сотвори́ти очеса́. Но да яви́тся в нем сла́ва моя́. Я́ко бо о себе́ рече́ рек. Да яви́тся сла́ва Бо́жия наведе́, мне подоба́ет де́лати дела́ посла́вшаго мя. Си́речь мне подоба́ет яви́тися себе́ и сотвори́ти. Могу́щая мене́ показа́ти та́яже отцу́ творя́ща не такова́. Но та́яже. Е́же бо́лшаго есть непреме́ньства и е́же ниже́ пома́лу ра́зньствующих глаго́лется кто у́бо сопроти́в возри́т про́чее. Зря его́ та́яже могу́ща отцу́ не бо́ созда́ то́кмо очеса́ ниже́ отве́рзе. Но и е́же зре́ти дарова́. Е́же зна́мение есть, е́же и ду́шу вду́нути. О́ной бо не де́йствующе о́ко а́ще и соверше́нно бу́дет, не у́бо уви́дит когда́ ничто́же. Я́ко и е́же от души́ де́йство дарова́. И уд даде́, вся име́ющь. И арти́рии, и жи́лы. И жи́лицы крова́выя, и кровь. И ина́я вся. От них́же сложе́но есть нам те́ло. Мне подоба́ет де́лати, до́ндеже день есть. Что сия́ хотя́т глаго́лы. Ко́е же после́дование име́ют, мно́го. Е́же бо глаго́лет таково́ есть до́ндеже день есть. До́ндеже леть есть челове́ком ве́ровати в мя. Доко́ле житие́ сие́ стои́т, подоба́ет ми де́лати. Гряде́т нощь, си́речь бу́дущее вре́мя, егда́ никто́же мо́жет де́лати е́же есть егда́ ктому́ ве́ра несть ниже́ труды́. Ниже́ покая́ние. Я́ко бо де́лу ве́ру глаго́лет, глаго́лаху ему́, что сотвори́м да де́лаем дела́ Бо́жия. Глаго́ла, сие́ есть де́ло Бо́жие, да ве́руете в той. Его́же посла́ он. Ка́ко у́бо сие́ де́ло никто́же мо́жет де́лати тогда́. Я́ко ниже́ ве́ра есть. Но и хотя́щеи не хотя́ще повину́тся.

Та́же бо не́кто рече́т я́ко тщесла́вяся сие́ твори́т. Показу́ет я́ко щадя́ их вся де́лает. Зде то́кмо власть име́ющых ве́ровати и не ктому́ могу́щых припло́дити что. Сего ра́ди ниже́ приступи́вшу слепо́му сотвори́ е́же сотвори́. Я́ко бо досто́ин бе исцели́тися, и а́ще ви́дел бы. Ве́ровал бы у́бо и прише́л. И а́ще от не́коего слы́шал бы предстоя́ща не бы у́бо си́це не ради́л, от су́щых по сих я́вьственно от му́жества, от ве́ры самы́я, и́бо бе ле́по ему́ помы́слити и рещи́. Что сие́ есть, бе́рние сотвори́ и пома́за мои́ о́чи, и рече́ мне иди́ умы́йся. Не можа́ше ли исцели́ти. И тогда́ посла́ти в купе́ль мно́жицею умы́хся та́мо с ине́ми мно́гыми. И ни еди́наго же наслади́хся бла́га. А́ще не́кую си́лу име́л бы. Предстоя́ у́бо исцели́л бы е́же и Елисе́ю Неема́н глаго́лаше. И́бо он повеле́н быв отъити́ умы́тися во Иорда́ни, не ве́рова. И наипа́че ве́сти толи́цей су́щи о Елисе́и. Но слепы́й не неве́рова, ниже́ сопроти́в рече́ ниже́ размышля́ше к себе́. Что сие́ есть. Бе́рние ли подоба́ше наложи́ти; Сие́ ослепи́ти па́че есть, кто си́це прозре́ когда́. Но ничто́же сих размышля́ше, ви́дел ли еси́ ве́ру тве́рду и усе́рдие; Прихо́дит нощь. Показу́ет от сего́ я́ко и по кресте́ хо́щет промышля́ти о нечести́вых и приводи́ти мно́гых еще́ бо день есть. По се́мже, коне́чно их отдели́т. И сие́ явля́я глаго́лаше. Егда́ бу́ду в ми́ре свет есмь ми́ру. Е́же и ины́м глаго́лаше. Ве́руйте до́ндеже свет с ва́ми есть.

Что у́бо Па́вел нощь настоя́щее житие́ нарече́, о́ноже день. Не сопротивля́яся Христу́. Но та́яже глаго́ля, а́ще и не глаго́лы. Но разуме́нми. И́бо рече́ нощь пре́йде. День же прибли́жися. Нощь бо настоя́щее нарица́ет вре́мя, седя́щых ра́ди во тме. Или́ за е́же приложи́ти ю́ дни о́ному. Христо́с же нощь бу́дущее нарица́ет, не де́йственаго ра́ди грехо́в! Па́вел же за е́же во тме бы́ти е́же во зло́бе пребыва́ющым и неве́рии!

Нравоуче́ние 56. О ми́лостыни, и сосуже́нии настоя́щых благы́х к бу́дущым.

Ве́рным у́бо бесе́дуя глаго́лаше. Нощь пре́йде день же прибли́жися. Я́ко име́ющых наслади́тися све́та о́ного, и нощь ве́тхое житие́ нарица́ет. Отложи́м бо рече́ дела́ тмы. Зри́ши ли я́ко оне́м бы́ти нощ(е/ь?) рече́. Те́мже глаго́лет, я́ко во дни благообра́зне да хо́дим да све́та наслади́мся о́ного. А́ще бо сей си́це добр свет. Помы́сли коли́к бу́дет он. Ели́ко бо свети́лничнаго све́та со́лничный лу́чши. Толи́ко и мно́го вя́щше он лу́чши сего́. И сие́ явля́я глаго́лаше. Со́лнце поме́ркнет, си́речь вели́чества ра́ди о́ноя све́тлости. Ниже́ сие́ яви́тся. А́ще же ны́не о е́же све́тлы име́ти хра́мине бла́го возду́шны безчи́сленая изнуря́ем име́ния. Зи́жуще, злостра́жуще. Помы́сли ка́ко подоба́ет и телеса́ са́мая изнуря́ти. О е́же све́тлым нам хра́мом на небесе́х созда́тися. Иде́же свет он неизрече́нный.

Зде бо и ра́ти и любопре́ния. О преде́лех и стена́х. Та́може ничто́же таково́ есть. Ни за́висть ни завиде́ние. Ниже́ любопри́тся кто с на́ми о пределоположе́ниих. И сего́ у́бо оста́вити ну́жа вся́ческы. Он же сопребу́дет всегда́. И сему́ у́бо ну́жа согни́ти вре́менем, и безчи́сленым подлежа́ти вредо́м, о́ному же пребыва́ти несостаре́емому вы́ну. И сего́ у́бо ни́щий не мо́жет созда́ти, о́ногоже есть и двема́ пу́лы созда́ти я́коже вдови́ца. Сих ра́ди согнета́ются. Я́ко толи́кым нам предлежа́щым благы́м, лени́мся. Малоду́шьствуем. И е́же ка́ко у́бо зде све́тлы стя́жем хра́мы, вся де́йствуем. А е́же ка́ко на небесе́х. Поне́ ма́ло стя́жем оби́телище, не промышля́ем не пече́мся.

Рцы бо мне, где хоте́л бы храм име́ти. Зде у́бо. Или́ в пусты́ни. Или́ во еди́ном от градо́в ма́лых. Аз бо не мню, но в ца́рственнейшых и вели́кых. Иде́же мно́жае бога́тьство. Иде́же бо́лше све́тлость. Аз же тебе́ веду́ во град тако́в. Его́же худо́жник и соде́тель Бог. Та́мо молю́ стяжава́ти же и зда́ти. Ма́лыми име́нми. Ма́лым трудо́м о́ного хра́ма ни́щых созидают ру́кы. И сие́ наипа́че есть зда́ние. Я́ко я́же у́бо ны́не быва́ема. После́дняго безу́мия. И́бо а́ще кто тебе́ в пе́рскую вел бы зе́млю зря́ща я́же та́мо и возвраща́ющася та́же повеле́л бы зида́ти хра́мы. Еда́ не его́ ли бы позазре́л еси́ неве́дению после́днему. Я́ко безвре́менне изнуря́ти повелева́ющу;

Ка́ко у́бо на земли́ са́мое сие́ твори́ши его́же ма́ло по́слеже оста́виши. Но де́тем оста́влю рече́. Но и они́ ма́ло по́слеже оста́вят по тебе́. Мно́жицею же и пре́же тебе́. И и́же по о́нех па́кы и быва́ет тебе́ и зде вещь печа́ли вина́. Егда́ насле́дников держа́щых не у́ ви́диши. Та́мо же ничто́же таково́ есть непщева́ти, но не подви́жно стяжа́ние пребыва́ет и тебе́ и де́тем и вну́ком, а́ще ту́юже доброде́тель подража́ют. О́ного зва́ния Христо́с каса́ется. О́ного зи́жущему не ну́жа прилежа́телен устрая́ти ниже́ пещи́ся ниже́ скорбе́ти;

Егда́ бо Бог де́ло восприи́мет, ка́я потре́ба попече́ния. Он вся собира́ет, и воставля́ет хра́мину. И не сие́ то́кмо есть чу́дно. Но я́ко си́це зи́жет. Я́ко тебе́ уго́дно есть. Па́че же и чрезуго́дное и па́че е́же хо́щеши. Худо́жник бо есть изря́ден. И зело́ промышл́яет о по́лзующых тебе́. А́ще и нищь бу́деши. И восхо́щеши зда́ти хра́мину сию́ не но́сит тебе́ за́висти. Ниже́ ража́ет тебе́ завиде́ние. Никто́же бо ю́ зрит от све́дящих зави́дети, но све́дящии ра́доватися а́нгели благы́м твои́м никто́же ю́ предели́ти возмо́жет. Никто́же бо ей близ живе́т. От неду́гующих такова́я;

Сосе́дов име́еши та́мо святы́х су́щых о Петре́ и Па́вле. Проро́ков всех, му́чеников. Наро́д а́нгел, арха́нгел. Сих у́бо ра́ди всех су́щая в них да истощи́м. Да о́нех получи́м оби́телей. И́хже бу́ди всем нам получи́ти. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва со Святы́м Ду́хом ны́не и при́сно и во ве́кы веко́в, Ами́нь.