Ева́нгелие Сия́ рек Иису́с. Плю́ну до́ле, и сотвори́ бе́рние от плюнове́ния. И пома́за бе́рнием на очеса́ слепа́го: И рече́ ему́, иди́ умы́йся в купе́ли силоа́мли.

Толкова́ние Хотя́щым что от прочита́емых обоима́ти. Ниже́ ма́лое глаго́лемых претека́ти подоба́ет сего́ бо ра́ди испытова́ти писа́ния повеле́ни бы́хом. Поне́же ви́дятся мно́га а́ще и от себе́ су́ща удо́бна. Мно́го во глубине́ разуме́ние име́ти сокрове́нно. Зри бо яково́ есть и настоя́щее. Сия́ бо рек рече́. Плю́ну до́лу ка́я сия́. Да яви́тся сла́ва Бо́жия и я́ко подоба́ет ми де́лати дела́ посла́вшаго мя. Не про́сте бо рече́ воспомяну́л есть нам рече́нных евангели́ст и наведе́ я́ко плю́ну. Но явля́я я́ко сло́во де́лы уве́ри и что ра́ди не водо́ю де́йствует но плюнове́нием бе́рние. Хотя́ше его́ посла́ти в Силоа́м да́же у́бо ничто́же напи́шеши исто́чнику но навы́кнеши я́ко я́же от уст его́ изше́дши си́ла. Сия́ и назда́ и отве́рзе очеса́. Плю́ну до́лу, сие́ у́бо и евангели́ст зна́менуя глаго́лаше. И сотвори́ бе́рние от плюнове́ния. Та́же да не возмни́тся земли́ бы́ти исправле́ние, повеле́ умы́тися!

Что у́бо ра́ди, не а́бие сие́ сотвори́. Но к Силоа́му посла́. Да навы́кнеши слепа́го ве́ру. Да заусти́тся иуде́йское неблагодаре́ние. Ле́по бо бе всем его́ зре́ти отходя́ща бе́рние име́юща на очесе́х пома́зано. Пресла́вным бо всех у́бо обрати́л бы к нему́, и ве́дящих его́ не ве́дящых. И со опасе́нием у́бо ему́ внима́ли бы. Поне́же бо не удо́бно сле́па прозре́вша позна́ти. Мно́гых твори́т пе́рвее сведе́телей долгото́ю пути́. И опа́сных зри́телей пресла́вным зре́ния. Да внима́телнейши бы́вше, не ктому́ возмо́гут глаго́лати сей есть, несть сей. Ко́имже, и о́но хо́щет состро́ити. Я́ко не чужь есть зако́на и дре́вняго посыла́я в Силоа́м. Ниже́ бо о́но про́чее непщева́ти бе. Да не Силоа́м во́змет сла́ву. И во мно́зи мно́жицею та́мо очеса́ омыва́юще, ни еди́ного же такова́го наслади́ш(и/а?)ся. И та́мо бо си́ла бе Христо́ва, вся содева́ющая. Сего́ ра́ди и толкова́ние нам прилага́ет евангели́ст рек бо в Силуа́м, приложи́ е́же есть по́слан. Да навы́кнеши я́ко и та́мо Христо́с его́ исцели́. Я́коже Па́вел рече́ пия́ху бо от духо́внаго после́дующаго ка́мене. Ка́мень же бе Христо́с я́коже у́бо ка́мень бе Христо́с духо́вень. Си́це и Силоа́м бе духо́вен. Мне ви́дится внеза́пное прише́ствие воды́ гада́тельствовати та́иньство нам неизрече́нное.

Ко́е ли у́бо сие́ ненача́янное Богоявле́ния, и па́че наде́жи вся́кия. Но зри слепа́го ра́зум. И ко всем повину́ющься. Ниже́ бо рече́ а́ще отню́д бе́рние есть или́ плюнове́ние подаю́щее очеса́. Ка́я мне потре́ба Силоа́ма. А́щеже тре́ба Силоа́ма. Ка́я потре́ба бе́рния. Что ра́ди пома́за. Что ра́ди умы́тися повеле́.

Но ничто́же сих помышля́ше. Но ко еди́ному уготовля́шеся то́кмо. Во всех покаря́тися повелева́ющему, и ничто́же его́ от быва́емых соблазни́. А́ще же глаго́лет кто ка́ко у́бо прозре́ отложи́в бе́рние, ничто́же и́но услы́шит от нас. Ра́зве, я́ко о́браза не ве́мы и что чу́дно а́ще мы не ве́мы. Ниже́ бо евангели́ст ве́дяше ниже́ сам исцеле́нный. Но бы́вшее у́бо ве́дяше, о́браза же пости́гнути не мо́жет. Сие́ же и вопраша́ем(ь) глаго́лаше. Я́ко бе́рние возложи́ на очеса́ моя́. И умы́хся и ви́жу. Ка́коже сие́ бысть не и́мать глаго́лати. А́ще и тма́ми вопрося́т сусе́ди у́бо рече́ и ви́дящии его́ я́ко проси́тель бе глаго́лаху. Не сей ли есть седя́й и прося́. Ини́и глаго́лаху сей есть. Преди́вное бо бы́вшаго. И в неве́рие их приведе́ а́ще и толи́кым устрое́нным, я́ко бы не обезве́ритися. Они́же глаго́лаху, не сей ли есть седя́й и прося́; О́ле Бо́жияго человеколю́бия, к?а́мо сни́де проси́телей со мно́гою прия́знию исцеля́я. И отзде́ иуде́ов зауща́я я́ко не све́тлых, ниже́ обьявле́нных. Ниже́ нача́лников, но и худы́х и того́же сподобля́ше промышле́ния и́бо на спасе́ние всех прии́де.

А е́же о разсла́бленном бысть, сие́ и о сем быва́ет, ниже́ бо он ве́дяше кто есть исцели́вый его́. Ниже́ сей. Быва́ше же сие́ отхоже́ния ра́ди Христо́ва. Отхожа́ше же при́сно исцеля́я Иису́с, я́ко бы вся́кому зазре́нию отъя́тися зна́мений. Не ве́дящии бо его́ кто есть, ка́ко у́бо угожа́ли бы ему́ и состро́яли быва́емая. Ниже́ бо от ми́мо ходя́щых бе сей. Но от седя́щих при две́рех святи́лища. Сомня́щымжеся всем о нем. Что рече́ он, аз есмь не постыде́ся пе́рвыя слепоты́ ниже́ убоя́ся наро́дныя я́рости, ниже́ отрече́ся показа́ти себе́. Да пропове́сть благода́теля. Глаго́лаху ему́ ка́ко отверзо́шася твоя́ очеса́. Глаго́ла им, челове́к глаго́лемый Иису́с. Что глаго́леши челове́к такова́я соде́ловает ли. Но ничто́же ве́лие еще́ ве́дяше о нем. Сотвори́ бе́рние и пома́за! Зри́ши ли ка́ко и́стинен есть. Не рече́ отку́ду сотвори́. Е́же бо не ве́дяше не глаго́лет. Ниже́ бо ви́де я́ко до́лу плю́ну. Я́коже пома́за чу́вьством навы́кну и осяза́нием. И рече́ ми иди́ умы́йся в купе́ли силоа́мстей. И сие́ слух сведе́тельствова. И отку́ду позна́вше его́ гла́са. От бесе́дования су́щаго ко ученико́м. И сия́ глаго́ля вся, и́же де́лы сведе́тельство взем. О́браза рещи́ не мо́жет. А́ще же о чу́вьственых и осяза́емых ве́ры тре́ба есть. Мно́го па́че о неви́димых, глаго́лаху ему́, где есть он. Глаго́ла не вем. Глаго́лаху же где есть он уби́йствующе у́же Нань. Зри Христо́во не велича́вое, ка́ко не близ бе исцеля́емым. Не сла́ву обоима́ти хотя́ше. Ниже́ народоводи́ти, ниже́ пока́зоватися. Зри ка́ко вся любои́стинне отвещева́ет слепы́й. Хотя́ху у́бо Христа́ обрести́. Якобы́ его́ привести́ ко иере́ом. Но поне́же не получи́ш(и/а?), приво́дят слепа́го к фарисе́ом. Я́ко зе́лнейше вопроша́ющым, сего́ бо ра́ди евангели́ст назна́менует. Я́ко субо́та бе. Да лука́вое их изволе́ние пока́жет. И вину́ ея́же ра́ди иска́ху я́ко изве́т не́гли обрета́юще. И могу́ще чу́до оболга́ти ви́дящымся бы́ти преступле́нием зако́на. И сие́ явля́я от а́бие ви́девшим его́ ничто́же и́но рещи́ но ка́ко отве́рзе твоя́ очеса́. И зри ка́ко глаго́лют. Не ре́ша бо ка́ко прозре́л еси́. Но ка́ко отве́рзе твоя́ очеса́ даю́ще ему́ изве́т е́же оболга́ти его́ о благодея́нии. Он же я́ко пре́же слы́шавшим скоре́йше веща́ет ниже́ бо и́мя рек ниже́ я́ко рече́ ми иди́ умы́йся. А́бие рече́, бе́рние наложи́ на очеса́ моя́. И умы́хся и ви́жу я́ко мно́гу у́же бы́вшу оклеве́танию. И о нем ре́кшим се Иису́с якова́ де́лает в субо́ту бе́рнием помазу́ет ты же ми смотри́. Ка́ко не смуща́ется слепы́й егда́ бо на оне́х глаго́лаше безбе́дне вопроша́ем не си́це ве́лие бе е́же и́стинно рещи́. А е́же чу́дно есть ны́не, я́ко во мно́жайшем стра́се устро́и вся. Ниже́ отмета́ется ниже́ сопроти́вная глаго́лет пре́жним.

Что у́бо фарисе́и па́че же ини́и ведо́ша у́бо его́ я́ко отмета́ющася, сопроти́вное же пострада́ша. Е́же не хоте́ша. И изве́стнейше уве́деша. И сие́ везде́ о зна́мениих стра́жут. Па́чеже в су́щых по сих, сие́ я́вьственнейше пока́жет что у́бо фарисе́и глаго́лаху. Не́цыи, не вси. Но люте́йшии. Сей челове́к несть от Бо́га. Я́ко субо́ту не храни́т, ини́и глаго́лаху, ка́ко мо́жет челове́к гре́шен такова́ зна́мения твори́ти. Зри́ши ли я́ко о зна́мении возвожа́хуся и́же бо пре́же сего́ посла́вше я́ко бы привести́ его́, услы́ши что глаго́л(е/ю?)т ны́не, а́ще и не вси: и́бо нача́лницы су́ще. От славолю́бия в неве́рия впа́даху. Оба́че же и от князе́й мно́зии ве́роваша в него́, не испове́даху же. Мно́гии у́бо наро́д удо́бь пренебрего́м бе а́ки ничто́же ве́лие споспеша́я в со́нмище их. Кня́зи же па́че све́тли су́ще, не удо́бнейше дерза́ху о́вех у́бо любонача́льствие держа́ше о́вех же боя́знь. И и́же о мно́гых страх. Те́м(ш/ж?)е глаго́лаше, ка́ко мо́жете ве́ровати. Сла́ву от челове́к прие́млюще и они́ убива́ти и́щуще не пра́ведне. От Бо́га глаго́лаху бы́ти. Слепы́х же исцеля́ющему. Не мощи́ бы́ти от Бо́га. За е́же субо́ту не храни́ти к сим сопроти́в положи́ша си́и. Я́ко гре́шник такова́я зна́мения твори́ти не мо́жет. Они́ у́бо злоде́йствене бы́вше молча́ще. Мня́щееся бы́ти преступле́ние, на среду́ приноша́ху. Не глаго́лаху бо я́ко в субо́ту исцеля́ет. Но я́ко субо́ту не храни́т. Си́и же па́кы немо́щне;

Потре́бно бо показа́ти ка́ко субо́ту разруша́ет от зна́мений укрепля́ются то́кмо и в ле́поту. Еще́ бо челове́ка его́ непщева́ху бы́ти. Поне́же а́ще не сие́ бы́ло бы. И и́нако име́ли бы изве́ты твори́ти. Я́ко субо́ты Госпо́дь бе сам ю́ сотвори́л есть. Но не у́ сие́ имя́ху изволе́ние. Никто́же у́бо от них сме́яше я́же хотя́ше я́вьствене рещи́. Ниже́ во отвеща́нии, но в сомне́нии. О́ви у́бо за недерзнове́нное. О́ви же за начальстволю́бие. Ра́спря у́бо бе в них сия́ ра́спря пре́же нача́ся в лю́дех, та́же по́сле нача́лницех. И о́ви у́бо глаго́лаху я́ко благ есть, ини́и же ни. Но льстит наро́да. Зри́ши ли ка́ко неразу́мнейши мно́гых нача́лницы распре́вшеся по́слеже; Но по е́же распрева́тися па́кы. Ничто́же показова́ху до́блествено зря́ще фарисе́ов належа́щих. Я́ко а́ще у́бо соверше́нно распре́лися бы́ша. Вско́ре у́бо и́стинну позна́ли бы. Есть бо распре́тися до́бре. Те́мже и сам глаго́лаше, не приидо́х вложи́ти мир на зе́млю но мечь. Есть бо и зло единомышле́ние есть и до́бре разгла́сие.

Нравоуче́ние 57. Я́ко подоба́ет не исправле́нных и злых бе́гати и ни еди́наго соблазни́ти

И́бо столп зи́жущеи, единомы́слиша во свое́м зле. И са́ми и си́и па́кы нево́лею у́бо, о поле́зном же оба́че распре́шася. И о ко́рен же су́щии зле единомы́слиша. Сего́ ра́ди до́бре раздели́шася. И Иу́да единомы́сли со иуде́и зле есть у́бо раздели́тися до́бре, и есть единомы́слити зле сего́ ра́ди рече́. А́ще о́ко твое́ соблажня́ет тя исткни́ е́. А́ще нога́ твоя́ отсецы́ ю́. А́щеже от удеси́ разделя́тися подоба́ет зле спребыва́ющаго мно́го па́че от друго́в зле сопребыва́ющых нам. Я́ко не везде́ единомышле́ние до́бро я́ко же у́бо ниже́ везде́ разделе́ние бла́го. Сия́ глаго́лю да(же?) бе́гаем лука́вых. И да пожене́м благы́х. А́ще бо во удесе́х согни́вшее и неисце́лне име́юще отсеца́ем. Боя́щеся да не и про́чее те́ло то́йже вред прии́мет. И твори́м сие́ не о́ного пренебрегу́ще. Но про́чее сохрани́ти па́че хотя́ще ю́. Коль па́че о соживу́щых нам о зле. Сие́ де́йствовати ну́жно;

А́ще бо возмо́жем и оне́х испра́вити и са́ми не вреди́тися. Вся твори́ти подоба́ет. А́щеже и они́ пребу́дут неисправле́ни, и нас вредя́т. Отсеца́ти их и помета́ти ну́жно. Мно́жицею бо си́це приобрета́ют па́че. Те́мже и Па́вел си́це наказу́ет глаго́ля. И изми́те лука́ваго от вас саме́х. И да во́змется от среды́ вас де́ло сие́ сотвори́вый лю́то бо лю́то, сопребыва́ние лука́вых. Не си́це ско́ро губи́тельство каса́ется и кра́ста растлева́ет смеша́ющыхся неду́гом содержи́мых. Я́коже зло́ба лука́вых муже́й. Тлят бо обы́чаи благы́я бесе́ды злы и проро́к па́кы, изыди́те от среды́ их и отлучи́тся.

Никто́же у́бо зла́го да держи́тся дру́га а́ще бо сыно́в злых име́юще отмета́ем. И не стыди́мся естества́. Ниже́ сего́ зако́нов, ни су́щия от него́ ну́жи, мно́го па́че обы́чных и зна́емых бе́гати подоба́ет, лука́вых су́щых. А́ще бо и ни еди́н же от них прии́мем вред, лука́выя у́бо сла́вы избежа́ти не возмо́жет вне́шнии у́бо нежитие́ испыту́ют. Но от соживу́щих нас су́дят. Сия́ и жена́м и деви́цам запоруча́ю. Промышля́юще бо рече́ до́брая не то́чию пред Бо́гом, но и пред челове́кы, вся у́бо да де́йствуем. Якобы́ не соблажни́ти бли́жняго. Житие́ бо а́ще и зело́ пра́во бу́дет собла́зн ины́м подаю́ще, все погуби́. И ка́ко есть пра́вому житию́ соблазни́ти. Егда́ сожи́тие́? непра́вых. Злу́ю ему́ обложи́т сла́ву. Егда́ бо наде́ющееся на ся сопребыва́ем лука́вым. А́ще и са́ми не вреди́мся, ины́м соблазни́м.

Сия́ и муже́м и жена́м глаго́лю и де́вам оставля́я их со́вести со опасе́нием ве́дети коли́ка отсю́ду ража́ется зла́я. Аз бо ничто́же непщу́ю лука́во. Ниже́ ин кто не́гли о соверше́ннейших просте́йшии же брат(ь?) о твое́м врежа́ется соверше́нии подоба́ет же и о не́мощи о́ного промышля́ти. А́ще и сей не вреди́тся, но е́ллин поврежа́ется. Па́вел же повеле́ непредкнове́нном бы́ти и иуде́ом и е́ллином, и це́ркви Бо́жией аз лука́во ничто́же непщу́ю о де́ве. Люблю́ бо де́вьство. Любо́вь же не помышля́ет зло́е. Аз зело́ рачи́тель есмь жи́тельства сего́, и ниже́ помы́слити что могу́ безме́стно. Но ка́ко вне́шних увеща́ем, подоба́ет бо и о оне́х твори́ти промышле́ние. Си́це у́бо я́же по себе́ да устрая́ем да ниже́ от неве́рных кто име́ет на нас пра́ведный обрести́ вред.

Я́коже бо житие́ пра́во показу́ющии прославля́ют Бо́га. Си́це и́же сопроти́вное. Ху́лиму бы́ти устрая́ют но не бу́ди не́кым таковы́м бы́ти у нас. Но си́це просвети́тися де́лом на́шим. Я́кобы просла́витися Отцу́ на́шему су́щему на небесе́х. И су́щия от него́ сла́вы нам наслади́тися. Ея́же бу́ди всем нам получи́ти. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́ки веко́в. Ами́нь.