Ева́нгелие Не у́бо вни́де в весь но бе на ме́сте иде́же сре́те его́ Ма́рфа. Иуде́и же су́щии с Мари́ю в до́му и утеша́юще ю́ ви́девше я́ко вско́ре воста́ и изы́де. После́доваша ей глаго́люще. Я́ко и́дет на гроб да пла́чется.

Толкова́ние Ве́лие бла́го любому́дрие, любому́дрие же глаго́лю е́же у нас. Я́же бо су́щых отвне́, глаго́лы и ба́сни то́кмо суть. И ниже́ са́мии ба́сни любому́дрие име́юще. Сла́вы бо ра́ди вся быва́ют я́же оне́х ве́лие у́бо бла́го любому́дрие. И воздарова́ние отсю́ду нам воздае́т. Име́ний бо пренебрегы́й, отсю́ду у́же обье́млет до́брое, попече́ний свобоже́н изли́шних и неполез́ных. И сла́ву попра́вый. Отсю́ду у́же прие́млет мзду ни еди́ному же раб сый. Но и́стинною свобо́дою свобо́ден небе́сных жела́я и восприе́млет воздая́ние. Ничто́же настоя́щая бы́ти непщу́я ве́щи и печа́лию все́ю облада́я удо́бне;

Се у́бо и жена́ сие́ любому́дрствующи. Мзду отсю́ду прия́т. И́бо всем приседя́щим пла́чущи сокруша́ющися, не пожда́ приити́ к ней учи́телю ниже́ досто́инство соблюде́. Ниже́ от пла́ча удержа́ся и́бо со ины́м злостра́стием пла́чущия. И се и неду́г име́ют любопочита́тися от предстоя́щых хотя́ще. Но ничто́же сих сия́ пострада́ но воста́вши а́бие сре́те. Иису́с же не у́ прии́де на ме́сто. Косне́йше бо хожа́ше, да не возмни́тся порева́ти себе́ на зна́мение. Но моли́тися от оне́х. Или́ сие́ у́бо хо́щет гада́тельствовати евангели́ст, или́ я́ко вско́ре теча́ше. Я́ко предвари́ти его́ гряду́ща. Гряде́т же не еди́на, но всех привлача́ющи иуде́и. И зело́ разу́мне;

Сего́ ра́ди и о́тай рече́ к ней сестра́. Я́ко бы не смути́ти собо́рища. И ниже́ вину́ рече́. Вои́стинну бо мно́зи отшли́ бы́ша. Ны́не же я́ко рыда́юще и вси после́доваху, и сим па́кы я́ко у́мре Ла́зарь уверя́ется. И паде́ на но́гы его́. Тепле́йша сия́ сестры́ ни наро́да устыде́ся ни зазре́ния е́же имя́ху о нем бе́ша бо мно́зи и от враго́в и́же глаго́лаху не можа́ше ли сей отве́рзый очеса́ слепо́му сотвори́ти да и сей не у́мрет, но вся отве́рже челове́чьская учи́телю предстоя́щу. И еди́наго бысть то́кмо я́же в учи́теля че́сти. И что рече́ Го́споди а́ще бы еси́ был зде брат мой не бы у́мерли что у́бо ничто́же ей бесе́дует Христо́с. Ниже́ глаго́лет сия́, я́же и к сестре́ ея́ наро́д бо предстоя́ше мног. И не бе глаго́л вре́мя оне́х но схо́дит и нисхо́дит челове́ческо естество́ обнажа́я и пре́же ничто́же вя́щше хотя́ мечта́ти. Поне́же бе чу́до ве́лие бе и таково́ яково́ ма́лижды сотвори́ и имя́ху ве́лие приобрета́ти сим. Да не е́же без них сотвори́ти, сопроти́в ста́нет наро́дом ничто́же приобря́щут от вели́чества. Мно́гых привлача́ет сведе́телей схоже́нием. Да не лови́тву погуби́т и показу́ет пре́же челове́чьское естество́. Слези́т бо и_слива́ется. Весть бо плачь возвыша́тися. Та́же запрети́в стра́сти. Е́же бо воспре́ти ду́хови сие́ есть. Удержа́ слия́ние. И си́це вопраша́ет где положи́сте его́, я́кобы не со восклица́нием бы́ти вопроше́нию. Что же у́бо вопраша́ет. Не хо́щет сам не скака́ти но вся от них навыка́ти и мо́лим? твори́ти. Я́ко бы вся́кого зазре́ния изба́витися зна́мению. Глаго́лаху ему́ прииди́ и виждь. Прослези́ Иису́с. Ничто́же бо не у́ воскресе́ния зна́мение показова́ше. Ниже́ си́це прихо́дит я́ко воскреша́я но я́ко слезя́. Я́ко бо си́це отъити́. Ви́дящеся я́ко слезя́ а не я́ко воскреша́я услы́ши что рече́ у́бо глаго́лаху. Вижь ка́ко любля́ше его́ друзи́и же глаго́лаху. Не можа́ше ли сей сотвори́ти да и сей не у́мрет. Ниже́ в беда́х лука́вьства упусти́ша и у́бо е́же хо́щет твори́ти мно́го чудне́йше. Того́ бо е́же уста́вити смерть наше́дшу прише́дшу и облада́вшу отгна́ти мно́го бо́лше есть. От ни́хже у́бо подоба́ше чуди́тися его́ си́ле. От тех его́ оболгу́ют испове́дуют у́бо я́ко отве́рзе слепо́му очеса́ и потре́бно о о́ном чуди́тися. От сего́ и о́но оболгу́ют я́ко ниже́ о́но бы́вше. Не сие́ же то́кмо показу́ет их растле́нных. Но я́ко ниже́ прише́дшу ниже́ показа́вшу предваря́ют оглаго́ланми, не ожида́юще ве́щи конца́;

Зри́ши ли ка́ко растле́нен их суд бе. Прихо́дит у́бо на гроб, и па́ки запреща́ют стра́сти. Что же у́бо потща́телне евангели́ст горе́ и до́лу рече́ я́ко прослези́ я́ко запрети́. Да навы́кнеши, я́ко вои́стинну естество́м на́шим обложи́ся. Поне́же у́бо ве́лие о себе́ веща́ет ины́х па́че и в теле́сных мно́го смире́ннейше веща́ет зде. Ничто́же бо о сме́рти таково́ рече́, я́ко в про́чии ниже́ я́ко боя́шеся но и спроти́вное, я́ко и во зна́(к/н?)ых пове́рже. Оскуде́вшее бо та́мо напо́лни зде пла́чем. О сме́рти бо бесе́дуя глаго́лаше. О́бласть име́ю положи́ти ду́шу мою́ и ничто́же смире́нно та́мо веща́ет сего́ ра́ди в стра́сти мно́го челове́ческое ему́ рече́ име́ти. От сего́ явля́я и́стинну смотре́ния. Матфе́й бо от боя́зни и тре́пета и по́та. Сей же от пла́ча уверя́ет не у́бо же а́ще не естества́ был бы на́шего от пла́ча облада́лся и еди́ною и второ́ю согреше́ний у́бо ра́ди ничто́же оне́м рече́ что бо подоба́ше глаго́лы зауща́ти. Хотя́щу а́бие де́лы сие́ страда́ти е́же не тяжча́йше бе и па́че посрами́ти их дово́лно. Рече́, возми́те ка́мень что у́бо не не сый призва́ и предста́ви его́, что же у́бо не ка́мену належа́щу. Сотвори́ воскресну́ти. И́бо можа́ше те́ло подви́гнувый ме́ртво гла́сом и о души́ в растле́нное. Мно́го па́че (же?) ка́мень подви́гнути возмо́гл бы те́мже гла́сом и́же свя́з(а)ннаго и не зря́ща и спреткнове́нна, гла́сом ходи́ти устро́ив мно́го па́че ка́мене подви́гнул бы и не сый сие́ соде́лал. Что же у́бо сотвори́л, да их сведе́телей сотвори́т чудеси́ я́ко да не сие́ глаго́лют е́же и о слепце́. Сей есть, несть сей. Ру́це бо и е́же приити́ на гроб. Сведе́тельствоваху я́ко сей есть. Они́ бо или́ мечта́ние у́бо вознепщева́ли бы. Или́ ина́го вме́сто ина́го. Ны́не е́же приити́ на ме́сто и ка́мень взя́ти. И е́же обви́ту изы́ти. Я́же повеле́ти разреши́ти свя́заннаго. И е́же друго́м изне́сшим предстоя́щым ему́ зре́ти. И от риз познава́тися и е́же се́страм не оста́ти. И е́же сей рещи́ у́же смерди́т четверодне́вен бо есть. Вся у́же сия́ дово́льна заусти́ти не благода́рьствующых, сведе́телей быва́ющых зна́мения;

Сего́ ра́ди им повелева́ет ка́мень взя́ти от гро́ба, показу́я я́ко его́ воздвиза́ет. Сего́ ра́ди и вопраша́ет, где положи́сте его́. Да ре́кшии прииди́ и виждь и приве́дшии его́ не име́ют глаго́лати я́ко ина́го воздви́же. Да и глас и ру́це сведе́тельствуют. Глас у́бо глаго́лющь прииди́ и виждь, ру́це же и ка́мень взе́млющия. Пе́лены разреши́вшия, и зре́ние и слух он гла́са слы́шавши сие́ ви́девши изше́дша. И обоня́ние злово́ния вме́сто прие́млемо рече́ бо у́же смерди́т четверодне́вен бо есть. В ле́поту у́бо глаго́лаху, я́ко ничто́же ве́дяше же_на́ и́хже рече́ Христо́с. Я́ко а́ще и у́мрет жив бу́дет. Зри у́бо зде что рече́, я́ко невозмо́жне ве́щи су́щи про́чее вре́мени ра́ди. И́бо бе стра́нно е́же четверодне́внаго растле́вшася воскреси́ти ме́ртва. Ученико́м у́бо рече́ да просла́вится Сын Бо́жий о ней. Зде же сла́ву Бо́жию о Отце́ рече́. Зри́ши ли я́ко не́мощь слы́шащих разли́чию глаго́лемых вина́ бе. Воспомина́ет же и́хже бесе́дова к ней спро́ста запреща́я а́ки не по́мнящей. Не хотя́ше же еще́ смути́ти зри́телей. Те́мже рече́. Не рех ли тебе́ я́ко а́ще ве́руеши у́зриши сла́ву Бо́жию:

Нравоуче́ние 63. Я́ко ве́рою вне́шних любомудреце́в апо́столи преодоле́ша, и я́ко ве́ра без дел не соверша́ет и о блуде́ и о любоде́йстве, и я́ко любоде́йстве. И я́ко любоде́йство есть. И е́же име́ющему жену́ ину́ю растли́ти.

Ве́лие бо бла́го ве́ра есть. Ве́лие и мно́гых вино́вно. Я́ко я́же Бо́жия мо́щи́? челове́ком твори́ти о и́мени о́ного. А́ще бо ве́руете рече́. Рече́те горе́ сей прииди́. И ве́руяй в мя бо́лша зна́мения сотвори́т о и́мени мое́м. Ка́я же ли бо́лша. И́бо сотвори́ша сте́ни апо́стольскыя, ме́ртвых воста́ти. Та́ко бо пропове́дашеся Христо́ва си́ла не си́це бо бе чу́дно жи́ву су́щу ему́ чудоде́йствовати я́коже уме́ршу ему́ ине́м во и́мя о́ного. Бо́лша его́ мо́щи́? несо́мнително бо бе сие́ воскресе́ния указа́ние. Не у́бо ниже́ а́ще яви́лося бы си́це ве́ровалося. О́ному бо име́ли бы рещи́ я́ко мечта́ние бе зря и́же о и́мени его́ то́чию про́стаго бо́лша бы́вша зна́мения не́жели егда́ сам бе во пло́ти с челове́кы не у́бо обезве́рилбыся, а́ще и зело́ несмы́слен был бы. Ве́лие у́бо бла́го ве́ра егда́ от те́плыя бу́дет мы́сли. От любле́ния мно́га и горя́щия души́ сия́ филосо́фов вас показу́ет сия́ ху́дость челове́ческую покрыва́ет и по́мыслы оста́вльши до́лу о су́щых на небесе́х любому́дрит ве́щех. Е́же челове́ческая прему́дрость обрести́ не мо́жет но пополза́ется. Сие́ сия́ исправля́ет. Сие́ учи́т да и́мемся у́бо сея́ и не по́мыслы себе́ да отвлача́ем;

Что бо ра́ди е́ллини рцы ми ничто́же обрести́ возмого́ша. Не прему́дрость ли всю вне́шнюю позна́ша отку́ду у́бо ры́барей и скинотво́рцев и неразу́мных преодоле́ти не возмого́ша. Зане́ они́ у́бо по́мыслы си́и же ве́рою все творя́ху. Сего́ ра́ди Плато́на и Пифаго́ра и всех оне́х заблу́жших, си́и преодоле́ша и остроло́гов астроло́гию учи́телную и землеме́рение и чи́сленую совоку́пившых и вся́ко наказа́ние собра́вших. Я́ко прах поверго́ша и толи́ко бы́ша лу́чшы ели́ко и́стииннии филосо́фи и су́ще естество́м бу́их и шата́ющихся си́и бо ре́ша безсме́ртну бы́ти ду́шу а́бие и не ре́ша то́кмо, но увеща́ша, они́же пре́же сего́ у́бо ничто́же ве́дяху, е́же что есть душа́. Егда́ же у́бо обрето́ша и раздели́ша от телеси́ ю́. Па́ки то́же пострада́ша. О́ви бо те́ло ю́ ре́ша о́виже сло́жну. О́ви же те сразруша́тися о небеси́ па́ки. О́ви у́бо ре́ша я́ко одушевле́но есть и Бог. Ры́барие же де́ло Бо́жие и ухищре́ние и всех увеща́ша. Но е́же у́бо е́ллином по́мыслы де́йствовати, чу́дно ничто́же. А е́же мня́щымся бы́ти ве́рным сим обрета́тися душе́вным, сие́ есть подсмея́телно. Сего́ ра́ди и си́и заблуди́ша. О́ви у́бо глаго́люще ве́дети Бо́га, я́ко сам себе́ весть е́же никто́же оне́х ниже́ рещи́ дерзну́ о́виже глаго́люще. Не мощи́ Бо́гу безстра́стне ража́ти ниже́ попуща́юще ему́ вя́щше что мно́гых име́ти о́виже глаго́люще, я́ко житие́ пра́во ничи́мже по́лзует ниже́ гража́нство пра́во. Но не вре́мя сия́ глаго́лати ны́не. Я́ко бо ничто́же по́лзует ве́ра пра́ва. Житию́ су́щу растле́нну, и Христо́с и Па́вел мно́жайшая бесе́дуют о сем, и рече́. Не всяк глаго́ляй мне Го́споди Го́споди вни́дет в Ца́рствие небе́сное. Но творя́й во́лю отца́ моего́, и па́кы мно́зи реку́т ми в он день. Го́споди не твои́м ли и́менем проро́чествовахом и реку́ им не вем вас, и па́ки не ра́дуйтеся я́ко бе́сове вам повину́ются не внима́ющии бо себе́ удо́бне во зло́бу пополза́ются. А́ще и ве́ру име́ют пра́ву но мы сих да бежы́м. Несть бо пра́ваго жития́ кроме́ уви́дети Христа́. Мир бо гони́те рече́ и святы́ню. Ея́же кроме́ никто́же у́зрит Го́спода. Святы́ню же глаго́лет целому́дрие. Я́коже кому́ждо довле́тися свое́ю жено́ю, и не внима́ти ино́й. Не довле́ющемубося невозмо́жно спасти́ся. Но ну́жа вся́ческы поги́бнути а́ще и безчи́сленая и́мать исправле́ния со блудо́м бо не мо́щно вни́ти во ца́рствие небе́сное;

Па́чеже ниже́ блуд сие́ про́чее но прелюбоде́йство я́коже бо свя́заннуя му́жу. А́ще со ины́м ля́жет прелюбоде́йствует. Си́це свя́занный жене́. А́ще и́ну и́мать прелюбоде́йствова таковы́и же не насле́дит ца́рствие. Но во гее́нну впаде́т, о таковы́х рече́ Бог, червь их не сконча́ется и огнь не уга́снет. Ни еди́ноже бо и́мать проще́ние, и́же по́сле жены́ и утеше́нии толи́ком, досажа́я во ину́ю. Сие́ бо ща́поство про́чее. А́ще и тоя́ оща́ются мно́зи егда́ поста́ вре́мя бу́дет егда́ моли́твы а и́же ниже́ се́ю довле́яся. Но и́ну вводя́, коли́ко собира́ет зло. А́ще отпусти́вшему ту и прие́мшему и́ну внима́ти несть. Прелюбоде́йство бо есть и́же внутрь той су́щи ину́ю привводя́. Коли́ко соде́ловает зло никто́же у́бо сему́ неду́гу да попуща́ет пребыва́ти в души́. Но искорени́ да исторга́ет не си́це оби́дит жены́ я́коже себе́;

Си́це бо бы́ти ви́дится Бо́гу вещь скве́рна, я́ко а́ще и идолослужи́теля разлучи́тся не хотя́щу о́ному му́чить ю́ Бо́гу. Блудника́ же а́ще разлучи́тся не ктому́ зри́ши ли ели́ко зло а́ще бо ка́я ве́рна рече́ му́жа и́мать неве́рна. И той благоволи́т жи́ти с не́ю. Да не оставля́ет его́. О блудни́ци же не си́це но что. А́ще кто отпусти́т жену́ свою́ кроме́ словеси́ блу́днаго. Твори́т ю́ прелюбоде́йствовати;

А́ще бо сожи́тие те́ло еди́но сопребыва́ющаго блудни́ци твори́т. Те́ло еди́но твори́т ка́ко у́бо прии́мет украше́ние и Христо́в уд су́щи. Ка́ко ей совокупля́еши уд блудни́ци, и зри премно́жество. Неве́рному бо соживу́щая, несть нечи́ста. Освяща́етбося мужь неве́рный о жене́. (О/У) блудни́ци же не си́це, но что. Еда́ у́бо у́ды Христо́вы сотворю́ блудни́ци у́ды. Та́мо бо освяще́ние пребыва́ет и о́ному соживу́щу и не отступа́ет. Зде же разлуча́ется. Лю́то бо блуд лю́то. И безсме́ртную наводя́щь му́ку. И зде же безчи́сленая привлача́ет злая. Житие́ бо злостра́стно, и зло́бно принужа́ется жи́ти таковы́й. И му́чимых ничи́мже пребыва́ет отра́днее, в хра́мину чу́жую себе́ вводя́. Со стра́хом и тре́петом мно́гым и везде́ боя́ся, и служи́телей и рабо́в и свобо́дных. Те́мже молю́ свобожа́тися неду́га сего́. А́ще же не хо́щете в незаходи́мая не входи́те свяще́нная. И́бо красоты́ испо́лненыя овца́ и неду́га по́лныя. Не подоба́ет со здра́вствующими изводи́тися и пасти́ся. Но отгоня́ти па́ствы до́ндеже неду́г отложа́т. У́ды бо Христо́вы есмь(ы́?) да не у́бо у́ды блудни́ци быва́ем. Несть ме́сто блу́дно но це́рковь. У́д(у?) же блудни́ци а́ще име́еши да не ста́неши в це́ркви. Да не досади́ши ме́сто. А́ще бо не гее́нна была́ бы. А́ще бо не му́ка была́ бы. По обе́тех оне́х и бра́чных свеща́х по пра́ведным ло́жи по чадотворе́нии. По обще́нии, ка́ко претерпи́т приложи́тися ино́й. Ка́ко не стыди́шися ниже́ срамля́ешися и́же по сконча́нии Жень ины́м примеша́ющеся от мно́гых зазира́ются. А́ще и не му́ку и́мать вещь. Ты же ли и живу́щи ину́ю привво́диши. Коли́кыя сия́ нечистоты́. О таковы́х рече́, червь их не сконча́ется, и огнь не уга́снет. Ужасни́ся преще́ния устраши́ся му́кы. Несть зде толи́ка сла́дость. Ели́ко та́мо томле́ние. Но не бу́ди кому́ пови́нну бы́ти му́кы о́ноя. Но святы́ню держа́вшим уви́дети Христа́. И обеща́нных получи́ти благы́х. И́хже бу́ди всем нам свободи́тися. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́ки веко́в, Ами́нь.