Ева́нгелие И е́же возве́д очеса́ своя́ горе́ и рече́, о́тче благодарю́ тя я́ко услы́шал мя еси́. Аз же ве́дях, я́ко всегда́ мя послу́шаеши но наро́да ра́ди предстоя́щаго рех.

Толкова́ние Е́же мно́жицею рех сие́ и ны́не реку́, я́ко Бог не си́це к досто́иньству зрит своему́, я́коже ко спасе́нию на́шему. Ниже́ я́ко что ве́лие провеща́ет. Но я́ко могу́щее нас привлещи́. Сего́ ра́ди высо́кая у́бо и вели́кая. Ма́ла, и сия́ покрове́нна. Смире́нная же и худа́я мно́га облага́ет свои́м словесе́м, поне́же бо си́ми возвожа́хуся па́че. Всих и пребыва́ет и ниже́ сия́ отню́д веща́ет я́кобы су́щих по сих не вреди́ти. Ниже́ сия́ умолчава́ет я́ко бы су́щим тогда́ не соблазни́тися к соверше́нному бо изше́дши, и от еди́ного уче́ния. Все возмо́гут разсмотри́ти. Тогда́ же ху́ди су́щии. А́ще не мно́жицею сия́ слы́шали бы́шя. Ниже́ у́бо удержа́либыся. Сего́ ра́ди ниже́ по толи́кых пребыва́ют но и ка́мение ме́щут и го́нят. И уби́ти начина́ют и ху́лника его́ нарица́ют. Егда́ ра́вна себе́ твори́т Бо́гу и ны́не у́бо глаго́лют я́ко ху́лит, поне́же рече́ оставля́ются тебе́ греси́ твои́, и па́кы бесну́ющася нарица́ет егда́ глаго́лет. Сме́рти лу́чше бы́ти послу́шающему слове́с его́. И егда́ глаго́лет аз во отци́ и оте́ць во мне оставля́ют его́ и соблажня́ются. И егда́ глаго́лет с небеси́ снидо́х. А́ще бо сия́ не терпя́ху ре́дкостию глаго́лема, упражне́ние бы́ло бы. А́ще все́ми бы́ло бы высо́ко сло́во. И си́це тка́шеся вня́ли бы́шя. Егда́ глаго́лет я́коже запове́да ми Оте́ць. Си́це глаго́лю. И Аз от себе́ ничто́же глаго́лю. Тогда́ ве́руют. Мно́зи ве́роваша рече́ в него́ тогда́ и назна́менует евангели́ст я́ко сия́ ему́ глаго́лавшу. А́ще у́бо е́же смире́нная веща́ти ве́ру творя́ще. А е́же высо́кая отрева́ше. Ка́ко не после́дняго безу́мия не созира́ти смире́нных вину́, я́ко послу́шателей делма́ рече́ся поне́же и и́нде ве́лие не́что рещи́ восхоте́в умолча́. Вину́ сию́ приложи́в и рек, да́же не соблазня́тся, ве́рзи у́дицу. Мо́ре е́же у́бо зде. По е́же бо рещи́ я́ко всегда́ мя послу́шаеши. Наведе́, я́ко наро́да ра́ди предстоя́щаго рех да ве́руют еда́ на́шы глаго́лы, еда́ уга́дка на́шя. Егда́ бо и от веще́й не повине́мся я́ко соблажня́ются о высо́кых, и сам глаго́лет. Я́ко сего́ ра́ди смире́нная веща́ю да не соблазня́тся кто еще́ естества́ бы́ти худы́я вознепщу́ет глаго́лы но не схоже́ние. И и́нде гла́су сне́сшуся свы́ше глаго́лаше, не мене́ ра́ди глас сей бысть, но вас ра́ди. И́бо высо́кому, леть есть мно́га глаго́лати о себе́ смире́нна смире́нному же пра́ведно несть ве́лие и высо́ко веща́ти то бо схоже́ния быва́ет, и не́мощь учи́мых вину́ и́мать. И е́же возводи́ти во смиренному́дрие. И е́же пло́тию обложе́ну бы́ти. И е́же наказа́ти слы́шащых ничто́же о себе́ ве́лие глаго́лати. И е́же непщева́тися богопроти́вну, и е́же не ве́роватися и приити́ от Бо́га. И е́же зазира́тися разруша́ти зако́на, и ю́же слы́шащих зав́исть. И е́же глаго́латися ча́сте в дре́внем Госпо́дь Бог твой Госпо́дь еди́н есть. Смире́нну же су́щу и высо́ко что о себе́ рещи́ ни еди́ну же и́мать вину́. Ниже́ благосло́вну, ниже́ безслове́сну но ра́зве го́рдость у́бо то́кмо и нече́стие бу́дет, и де́рзость не проще́нна;

Что ли у́бо ра́ди смире́нна веща́ет неизрече́ннаго и вели́каго о́ного существа́ сый рече́нных ра́ди. И я́ко бы не непщева́тися не роже́н и́бо Па́вел. Таково́ не́что явля́ется убоя́вся, те́мже и глаго́лаше кроме́ поко́ршаго ему́ вся. Нечести́во бо сие́ помышля́ти а́ще ме́нши роди́теля сый. И ина́го существа́ ра́вен непщева́лся бы. Не бы вся твори́л я́ко не непщева́ти сие́. Ны́не же сопроти́вное твори́т глаго́ля. А́ще не творю́ дела́ посла́вшаго мя, не ве́руйте мне. И е́же глаго́лати. Аз во Отци́ и Оте́ць во Мне, ра́венство нам гада́тельствует. Подоба́ше же со мно́гою зе́льностию сие́ отъя́ти, а́ще у́бо недоста́точнейшь был бы. И нигде́ же отню́д рещи́, я́ко аз во Отци́, и Оте́ць во Мне, или я́ко еди́но есмы́. Или́ я́ко ви́девый мя ви́де отца́. И́бо о си́ле сло́во бе. И глаго́лаше аз и Оте́ць еди́но есмы́ и о о́бласти сло́во бе, и глаго́лаше. Я́ко же оте́ць воскреша́ет ме́ртвых и животвори́т. Си́це и Сын и́хже хо́щет животвори́т е́же не мо́щно бе ина́го существа́ су́щу твори́ти. А́ще же и мо́щно бы́ло бы, не подоба́ше сие́ рещи́ да не вознепщу́ют еди́но и то же существо́ бы́ти. А́ще бо да не вознепщу́ют я́ко богопроти́вен есть. И я́же не прили́чна ему́ веща́ют мно́жицею. Мно́го па́че и тогда́ а е́же глаго́лати да почита́ют сы́на. Я́коже почита́ют отца́, и е́же глаго́лати дела́ я́же он де́лает та́коже и аз творю́ и е́же глаго́лати себе́ воскресе́ние бы́ти и живота́ и све́та ми́ру. Изравня́юща бе́ша роди́телю. И зазре́ние поставля́щаго. Е́же мня́ху они;

Ны́не же я́ко у́бо зако́на не разруша́ет толи́ка глаго́лет и отвеща́ет. Непщева́ние же ра́вности су́щия ко Отцу́, не то́кмо не отъе́млет, но и поставля́ет. И ре́кшим я́ко ху́лиши зане́ твори́ши себе́ Бо́га. От дел су́щия ра́вности сие́ поста́ви. И что глаго́лю сын а́ще сие́ сотвори́л есть. Иде́же у́бо и оте́ць пло́тию не обложи́выйся. И́бо и той терпя́ше мно́га о нем смире́нна рещи́ся. Спасе́ния ра́ди слы́шащых. Тем бо е́же Ада́ме где еси́. И е́же да разуме́ю а́ще по вопие́нию их сконча́ются. И е́же ны́не уве́дех я́ко бои́шися ты Бо́га. И е́же а́ще у́бо услы́шат. И кто дасть се́рдце лю́дем сим си́це бы́ти. И е́же глаго́латися несть подо́бен тебе́ в бозе́х и мно́га такова́ в дре́внем а́ще кто избере́т, недосто́йна Бо́жия досто́йна су́ща обря́щет. И о Аха́ве же рече́ся. Кто прельсти́т ми Аха́ва. И е́же при́сно е́ллинскых бого́в по сосуже́нию себе́ предлага́ти вся недосто́йна Бо́гу. Но и́нако досто́йна быва́ют. Зане́ си́це человеколюби́в есть, я́ко на́шего ра́ди спасе́ния и досто́иньству его́ не подоба́ющых глаго́л призира́ти и́бо и сие́ е́же челове́ку бы́ти недосто́йно. И е́же раба́ зрак(?) прия́ти и смире́нныя веща́ти глаго́лы. И смире́нная претерпе́ти. Недосто́йно у́бо а́ще кто к досто́иньству о́ному возри́т досто́йно же а́ще кто неизрече́нное человеколю́бия вели́чьство помы́слит;

Есть же и и́на смире́ния глаго́л вина́. Зане́ Отца́ у́бо ве́дяху и чудя́хуся. Его́же не ве́дяху сего́ ра́ди ча́сте к нему́ прибега́ет, я́ко испове́дуему а́ки сам не сый не у́ достове́рен не от своея́ ху́дости. Но от безу́мия слы́шащих и не́мощы сего́ ра́ди и мо́лится и глаго́лет. О́тче благодарю́ тя я́ко услы́шил мя еси́. А́ще бо и́хже хо́щет живи́т. И я́коже оте́ць си́це жи́во твори́т. Что ра́ди мо́лит. Но вре́мя про́чее в са́мое взя́ти ме́сто. Я́ко у́бо взя́ша ка́мень. Возведе́ Иису́с очеса́ своя́ на не́бо, и рече́. О́тче благодарю́ тя я́ко послу́шал мя еси́, и аз же ве́дях я́ко всегда́ мя послу́шаеши. Но наро́да ра́ди предстоя́щаго рех. Да ве́руют я́ко ты мя посла́л еси́, да вопроси́м у́бо еретика́. От моли́твы ли по́мощь взят, и ме́ртваго воскреси́. Ка́ко у́бо ина́я кроме́ моли́твы творя́ше глаго́ля. Тебе́ глаго́лю бе́се изы́ди от него́ и хощу́ очи́стися. И встав возми́ одр свой. И оставля́ются тебе́ грехы́ твоя́ и мо́рю. Молчи́ у́бо зда́йся что же отню́д и́мать апо́столов вя́щше. А́ще у́бо той от моли́твы твори́т. Наипа́чеже, ниже́ они́ с моли́твою вся творя́ху, но без моли́твы мно́жицею и́мя Иису́сово нарица́юще. А́ще же и́мя его́ толи́ку имя́ше кре́пость. Ка́ко у́бо сам моли́твы тре́бовал бы а́ще же моли́твы тре́бовал бы не бы и́мя его́ возмогло́. Егда́ же отну́д творя́ше челове́ка кото́рыя моли́твы тре́боваше. Не еди́но че́стие ли та́мо мно́го. Сотвори́м бо рече́ челове́ка, что же не́мощнейше. А́ще моли́твы тре́боваше да уви́дим же и ка́я моли́тва. О́тче благодарю́ тя я́ко услы́шал мя еси́. И кто си́це помоли́ся когда́. Пре́же не́же что рещи́. Благодарю́ тя рече́ показу́я я́ко не тре́бует моли́твы. Вся бо твори́ши ели́ка аз хощу́ рече́. Не я́ко ему́ не могу́щу, но я́ко еди́ному су́щу изволе́нию. Что у́бо ра́ди моли́твы о́браз восприя́т. Не мене́ да услы́шиши. Но само́го глаго́лющаго, предстоя́щаго ра́ди наро́да да ве́руют я́ко ты мя посла́л еси́. Не рече́ да ве́руют я́ко ме́нши есмь, я́ко потре́бу име́ю по́мощи су́щия свы́ше я́ко без моли́твы не могу́ сотвори́ти. Но я́ко ты мя посла́л еси́. Сия́ бо вся моли́тва явля́ет а́ще про́сте сию́ восприи́мем;

Не рече́ посла́л мя еси́ не могу́ща рабо́ту ве́дящаго. О себе́ ничто́же творя́щаго. Но сия́ вся оста́вль, да ничто́же сих вознепщу́еши. Полага́ет и́стинную моли́твы вину́. Да не богопроти́вна мя вознепщу́еши. Да не глаго́лют несть от Бо́га. Да покажу́ по изволе́нию твоему́ де́ло быва́емое. То́чию не глаго́ля, я́ко а́ще был бых богопроти́вен не бы произошло́ быва́емое. А е́же услы́шал мя еси́. И о друзе́х глаго́лется и о единоче́стных аз же ве́дях. Я́ко всегда́ мя послу́шаеши. Си́речь ко е́же бы́ти мое́й во́ли. Не тре́бую моли́твы я́ко бы увеща́ти. Еди́но бо хоте́ние что у́бо моли́тва. Не́мощных ра́ди и худе́йшых, и сия́ рек. Возва́ гла́сом вели́кым что ра́ди не рече́ во и́мя отца́ моего́ гряди́ вон что ра́ди не рече́ воскреси́ его́ о́тче. Но сия́ вся оста́вль, моля́щаго ся о́браз восприи́м ве́щми госпо́дьство показу́ет. Я́ко и сие́ его́ прему́дрости. Глаго́лы у́бо схоже́ние. Де́лы же о́бласть показова́ти. Поне́же бо ничто́же и́но имя́ху порица́ти Христу́. Но ра́зве я́ко несть от Бо́га. И си́це мно́гых прельща́ху. Сего́ ра́ди со премно́жеством показу́ет сие́ ему́, и сей о́браз, его́же не́мощь оне́х истязова́ше, мо́щно бо бе и и́нако показа́ти согла́сие со свои́м досто́иньством. Но не можа́ше взы́ти толи́ко наро́д и рече́ Ла́заре гряди́ вон. Сие́ есть е́же глаго́лаше. Гряде́т час егда́ ме́ртвии услы́шат глас Сы́на Бо́жия, и услы́шавше и оживу́т да́же бо не вознепщу́еши я́ко от ина́го прия́т де́йство свы́ше тебе́ сему́ научи́ и де́лы показа́, и не рече́ воста́ни но гряди́ вон, я́ко живо́му бесе́дуя, и сконча́вшемуся. Что сея́ о́бласти бу́дет у́бо ра́вно. А́ще же не свое́ю си́лою сие́ твори́т. Что вя́щши прии́мет апо́стол глаго́лющих. Что нам внима́ете я́ко свое́ю си́лою, или́ благоче́стием сотво́ршым его́ ходи́ти. А́ще бо не творя́ свое́ю си́лою. Е́же апо́столи о себе́ глаго́лаху. И бу́дут они́ па́че любому́дрствующе. Тем е́же отража́ти сла́ву, и па́ки что внима́ете нам я́ко свое́ю си́лою подобостра́стни есмы́ челове́цы. Та́же апо́столи у́бо. Поне́же ничто́же от себе́ де́йствоваху. Вся глаго́лаху я́ко бы увеща́ти сие́. То́йже такову́ о себе́ сла́ву име́я. Не у́бо ли непщева́ние отъя́л бы. А́ще не свои́ госпо́дьством твори́л бы. Кто у́бо сие́ рече́т но и спроти́вное рече́. Предстоя́щых ра́ди наро́дов да ве́руют, я́ко ты мя посла́л еси́. Я́ко а́ще ве́ровали бы́шя, не тре́ба моли́твы. А́ще бо не бе досто́йно ему́ е́же моли́тися. Что ра́ди оне́м вину́ вменя́ет. Что же ра́ди не рече́, да ве́руют я́ко несмь тебе́ ра́вен подоба́ше бо от мне́ния приити́. Но егда́ у́бо зазира́шеся, разоря́ти зако́на, рече́ние сие́ положи́л есть. Ниже́ рече́нным оне́м. Не мни́те я́ко приидо́х разори́ти зако́на. Зде же поставля́ет го́рдость. Отню́дуже что тре́ба бя́ше обхоже́ния толи́каго и гада́нии. Довля́ше бо рещи́ несмь ра́вен и свободи́тися;

Что ли у́бо не глаго́ла рече́ я́ко не творю́ во́лю мою́, и сие́ спокрове́нне и ко оне́х не́мощи и от тоя́же вины́ от нея́же и моли́тва бысть. Что есть я́ко услы́шал мя еси́ си́речь я́ко ничто́же сопроти́вно мне к тебе́. Я́коже у́бо е́же я́ко услы́шал мя еси́ не сие́ есть явля́ющаго я́ко сам не возмо́же а́ще бо сие́ бы́ло бы не неможе́ние то́кмо бу́дет но и неве́дение. А́ще у́бо пре́же е́же моли́тися не ве́дяше я́ко хо́щет услы́шати Бог. А́ще и не ве́дяше, ка́ко глаго́лаше я́ко поиду́ да возбужу́ его́. Я́коже у́бо сие́ не не́мощи не единомышле́ния. Си́це и е́же всегда́ мя послу́шаеши. Или́ сие́ есть рещи́, или́ я́ко и непщева́нию оне́х рече́ся. А́ще же ниже́ не ве́дяше. Ниже́ не можа́ше, благоявле́нно я́ко сего́ ра́ди смире́нныя веща́ет глаго́лы. Да поне́ от вели́чьства уве́ришися и прину́дишися испове́дати я́ко не досто́иньства есть но схоже́ния. Что у́бо есть е́же услы́шал еси́. К не́мощи слы́шателей рече́ся. Ни рече́ но да пока́жет преиме́ние. И у́бо сие́ не бе показа́ти преиме́ние. Но зело́ смири́ти себе́. И изъяви́ти ничто́же вя́щше челове́ка име́юща е́же бо моли́тися. Не Бо́гу ниже́ сопресто́лну;

Зри́ши ли я́ко ниотку́ду отъину́ду на сие́ прии́де но безве́рия ра́ди оне́х; Зри у́бо де́ло сведе́тельствующе его́ госпо́дьство. Изы́де у́бо Ла́зарь свя́зан, та́же да не вомни́тся мечта́ние бы́ти вещь. Того́ бо е́же воста́ти е́же изы́ти свя́зану не ме́нше ви́дяшеся бы́ти пречу́дно повеле́ его́ разреши́ти. Да косну́вшеся (и?) прибли́жившеся и близ бы́вше, ви́дят я́ко вои́стинну он есть и рече́. Оста́вите его́ ити́. Ви́дел ли еси́ не велича́вое, не во́дит его́ ниже́ повелева́ет с собо́ю ходи́ти я́ко бы показова́тися;

Бы́вшу же сему́ чудеси́, о́ви у́бо чудя́хуся о́ви же возвести́ша фарисе́ом что у́бо они́. Потре́бно ужаса́тися и чуди́тися хотя́ху его́ уби́ти воскреси́вшаго мерьтвеца́ о́ безу́мия. Во ины́х телесе́х сме́рти преодоле́вшаго сме́рти преда́ти умы́слиша и глаго́лют. Что твори́м я́ко челове́к сей мно́га зна́мения твори́т. Челове́ка его́ еще́ нарица́ют толи́ко прие́мшии указа́ния божества́ Его́. Что твори́м ве́ровати подоба́ше. И угожа́ти и поклони́тися. И не ктому́ непщева́ти челове́ка. А́ще оста́вим его́ си́це. Прии́дут ри́мляне и во́змут и язы́к нашь и град. Что есть е́же хотя́т рещи́. Люде́й поколеба́ти хотя́т про́чее. Я́ко име́юще бе́дствовати о зазре́нии наси́льства. А́ще бо наро́до водя́ща рече́ уви́дят его́ ри́мляне позазря́т нам о наси́льстве, и во́змут нашь град. Что ра́ди рцы ми. Еда́ бо отступле́нию уча́ше, не повелева́ше ли дань да́ти ке́сарю. Не царя́ ли его́ восхоте́сте сотвори́ти и бежа́ не худо́е ли невелича́вое гоня́ше житие́. Ниже́ хра́мину име́я ниже́ и́но что от таковы́х ничто́же;

Сия́ у́бо ре́ша не ча́юще но зави́дяще сбы́сться же и не ча́ющим им, и язы́к и град взя́ша, егда́ у́бо уби́ша его́ и́бо дале́че вся́каго зазре́ния быва́емая. Исцеля́яй бо неду́жных и наро́читое уча́ житие́. И нача́лником покаря́тися повелева́я. Не наси́льства составля́ше. Но разруша́ше!

Но от пре́жних уга́дываем рече́. Но они́ отступле́нию уча́ху. Сей же сопроти́вно зри́ши ли я́ко лицеме́рие бе глаго́лемая что бо показова́ше таково́. Оружено́сци ли облага́шеся. И колесни́ци собира́ше. Не пусты́ня ли гоня́ше. Но да не возмня́тся страсть свою́ глаго́лати. Гра́ду ре́ша бе́дствовати всему́. И е́же о́бще наве́товатися и о после́дних им бы́ти сло́во. Не сия́ плене́ния вам вина́ бы́шя, но сопроти́вная и сего́ и су́щаго в Вавило́н, и е́же при Антио́хе су́щаго по сих не е́же бы́ти у вас угожа́ющым но е́же бы́ти в вас оби́дящым. И Бо́га прогне́вающим сие́ вас от да́нных сотвори́. Но за́висть не зрит ничто́же, но ослепля́ет ду́шу. Не кро́ткых ли научи́ сей. На зауща́емых ли наказова́ше. Не сопроти́в зауша́ти. Не терпе́ти ли оби́димым. Не бо́лшее ли показова́ти усе́рдие. Ко е́же зле страда́ти. Не́жели ко е́же ины́х зле сотвори́ти. Сия́ у́бо рцы ми наси́льство ли составля́ющаго глаго́лаше. А [не] наси́льство отъе́млющаго.

Нравоуче́ние 64. О за́висти и лихоима́нии.

Но е́же рех лю́то за́висть и лицеме́рия по́лна сие́ вселе́нную безчи́сленных напо́лни злых. От сего́ неду́га. Суди́лища испо́лнишася от сего́ уби́йства. И име́ний разли́чие и любонача́льствие и тщесла́вие отсю́ду пути́ об(ъ?)седя́тся. И мо́ре разбо́йников име́ет отсю́ду су́щая по вселе́нней уби́йства. Отсю́ду род нашь растерза́ся е́же а́ще уви́диши зло. От сея́. У́же и во це́ркви вскочи́. И испе́рва безчи́сленая соде́ла лю́тая сей неду́г сребролю́бие роди́. Вся горе́ и до́лу творя́щь, и пра́ведное растлева́юще. Мзды бо ослепля́ют очеса́ му́дрых. И я́коже брозда́ устна́м, отвраща́ет обличе́ния сей рабо́в вме́сто свобо́дных твори́т. О сем на всяк спира́емся день. И вя́щше ничто́же быва́ет звере́й быва́ем го́рши, си́рых похыща́ем вдови́ц обнажа́е(м?). Ни́щых оби́дим(ым?). Го́ре на го́ре быва́ет. Увы́ мне я́ко погы́бе благогове́йный от земли́ и нам есть е́же рыда́ти про́чее. И сие́ подоба́ет на всяк день глаго́лати ничто́же в моли́твах соверша́ем ничто́же в совеща́ниих ничто́же в наказа́ниих. Остае́т про́чее е́же слези́ти сие́ и Христо́с сотвори́л есть, мно́га су́щых во Иерусали́мех моли́в. Я́ко ничто́же приобрета́ху они́ прослези́ сам о беде́;

Сие́ и проро́цы творя́т сие́ и мы да твори́м ны́не. Рыда́ния про́чее вре́мя и слез и мича́ния. Благовре́менно рещи́ и ны́не призови́те рыда́ющия и ко прему́дрицам посли́те и да веща́ют не́гли си́це возмо́жем отврещы́ неду́га. Хра́мы зи́жущим све́тлыя се́лы обложе́нным от хище́ния рыда́ти благовре́менно. Но споспеши́те мне и вы оби́деннии. Обнаже́ннии споспеши́те мне, рыда́йте мне и низведи́те мне сле́зы. Но рыда́юще не себе́ но оне́х да рыда́ем, не вас оби́деша. Но са́ми себе́ погуби́ша. Вы бо и́мате ца́рствие небе́сное, вме́сто оби́ды. Они́ же гее́нну, вме́сто приобре́тения. Сего́ ра́ди лу́чше оби́детися, а не оби́дети. Да рыда́ем их рыда́нием не о́бщым но от боже́ственых писа́ний. И́мже и проро́цы рыда́ша да рыда́им со Иса́ием си́це глаго́лаше. Го́ре совокупля́ющеи хра́мину к хра́мине и село́ к селу́ приближа́юще до бли́жняго отъи́мут не́что. Еда́ всели́стеся еди́ни на земли́ хра́м(ин?)ы вели́кы и до́бры. И не бу́дут живу́щии в них да рыда́ем сна умо́м, и да рече́м со оне́м. Го́ре зи́ждай в высоту́ хра́мину свою́. Наипа́че да возрыда́ем их. После́дующе Христу́ глаго́лющему. Го́ре богатя́щеися. Я́ко вза́лчете я́ко отстоите́ мзды ва́шея и утеше́ния рыда́ем и да не преста́нем. А́ще же не безобра́зно, и да бие́мся. Да рцем е́же проро́к не пла́чите уме́ршаго но хи́щника, лихои́мца сребролю́бца, несы́таго. Что ра́ди ме́ртвых рыда́ем. О ни́хже ничто́же есть соверши́ти про́чее да возрыда́ем сих. О ни́хже есть и преложе́ние. Но нам рыда́ющим, не́гли они́ смею́тся и сие́ рыда́ний досто́йно я́ко смею́тся о ни́хже подоба́ет пла́кати а́ще у́бо оша́ялися бы от рыда́ний на́шых, подоба́ше преста́ти рыда́ющым я́ко хотя́щым испра́витися. Но поне́же не чу́вьствене пребыва́ют да пребыва́ем мы пла́чуще небога́тых про́сте. Но сребролюби́вых лихои́мцев хи́щников есть бо и бога́тьством в потре́бное де́йствовати. Егда́ в тре́бующих изнуря́ем. Лихоима́ние же укори́зна есть и осуже́ние и оглаго́лание. Да рыда́ем у́бо. Не́гли бо не́когда бу́дет исправле́ние. А́ще и впа́дшии не свободя́тся. Но ини́и не паду́т в лю́тое, но сохраня́тся. Бу́ди же и оне́х свободи́тися неду́га. И ино́му ни еди́ному же впа́сти да о́бще вси обеща́нных получи́м благы́х. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́кы веко́в. Ами́нь.