Ева́нгелие Любя́й ду́шу свою́ погуби́т ю́, а ненави́дяй ду́шу свою́ в ми́ре сем в живо́т ве́чный соблюде́т ю́. Мне служа́й мне да после́дует и иде́же есмь аз. Та́мо и слуга́ мои бу́дет.

Толкова́ние Сла́док настоя́щий живо́т. И мно́гыя испо́лнен сла́дости но не всем но пригвожде́нным ему́. А́ще же кто на не́бо возри́т и я́же та́мо уви́дит до́брая. Вско́ре его́ пренебреже́т, и ни еди́но же сотвори́т сло́во. Поне́же и добро́та теле́с до́ндеже и́на не яви́тся светле́йша чу́дится. Егда́ же у́бо яви́тся лу́чша, презира́ет пре́жняя. А́ще у́бо восхо́щем и мы о́ну добро́ту уви́дети, и благоле́пие та́мошняго ца́рствия созерца́ти вско́ре себе́ юз отреши́м настоя́щых ю́за бо не́кая есть, е́же к настоя́щым пристра́стие и в сие́ нас возводя́ Христо́с. Услы́ши что рече́ любя́й ду́шу свою́ погуби́т ю́. А ненави́дяй ду́шу свою́ в ми́ре сем. В живо́т ве́чный соблюде́т ю́. Мне служа́й мне да после́дует и иде́же есмь аз та́мо и слуга́ мой гада́нию уподобля́тися ви́дятся глаго́лемая. Но несть. Но мно́гыя испо́лнена прему́дрости. И ка́ко любя́й ду́шу свою́ погуби́т ю́ и́же вожделе́ния ея́ творя́ безме́стная. Угожа́яй ей па́че потре́бнаго. Сего́ ра́ди наказу́ет не́кто глаго́ля. Не ходи́ в вожделе́нии душа́ твоея́ си́це бо ю́ погуби́ши. Пути́ бо на доброде́тель веду́щаго отво́дит я́коже бо сопроти́вное, ненави́дяй ю́ в ми́ре сем спасе́т ю́. Что же есть ненави́дяй ю́ не повину́яйся ей. Врежа́ющая повелева́ющей и не рече́ не повину́яйся ей. Но ненави́дя ню. Я́коже бо ненави́димых ниже́ гла́са слы́шати терпи́м. Ниже́ зре́ние уви́дети сла́дце си́це и ду́шу. Егда́ сопроти́вная де́йствует Бо́гови уго́дных со зе́лностию отвраща́тися подоба́ет;

Поне́же бо о сме́рти хо́щет про́чее им бесе́довати. Сме́рти свое́й и проуве́де скорбя́щих и низпа́дающих. Премно́жество сотвори́ глаго́ля. Что глаго́лю а́ще мою́ смерть до́блествене не претерпите́ а́ще бо вы са́ми не у́мрете ничто́же вам бу́дет приобре́тение и зри ка́ко утеша́ет слов́о. Зело́ тя́жко бе и ско́рбно е́же слы́шати, я́ко подоба́ет умре́ти лю́бящом ду́шу и душе́ лю́бящаго челове́ка и что глаго́лю ве́тхое. Иде́же у́бо и ны́не мно́гых обря́щем сла́достне вся страда́ти претерпева́ющих. И о е́же настоя́щее обоима́ти житие́ и па́че о бу́дущих увере́нных. И́же егда́ у́бо уви́дят зда́ния, и худо́жества и ухищре́ния слезя́т приглаго́люще. Коли́ка челове́к и быва́ет прах. Та́ко мно́го настоя́щия жи́зни вожделе́ние;

Сия́ у́бо разреша́я ю́зы Христо́с рече́. Ненави́дяй ду́шу свою́ в ми́ре сем, в живо́т ве́чный соблюде́т ю́. Я́ко бо оне́х наказу́я глаго́лаше, и страх их разреша́я, услы́ши су́щых по сих. Мне служа́й мне да после́дует. О сме́рти глаго́ля. И е́же де́лы после́дование истязу́я. И подоба́ет бо вся́ческы служа́щему. Служи́мому после́довати. И смотри́ когда́ им сия́ бесе́дует. Не егда́ гоня́хуся но егда́ дерза́ху. Егда́ непщева́ху во утверже́нии бы́ти вся мно́гых ра́ди че́сти и слугова́ния. Егда́ и воздви́гнутися можа́ху и услы́шати. И да во́змет крест свой да после́дует ми. Е́же есть при́сно уготовле́н бу́ди рече, к беда́м к сме́рти ко оше́ствию е́же от зде;

Та́же поне́же у́бо тя́жкая рече́. И по́честь полага́ет ка́я ли у́бо сия́ бе, е́же ему́ после́довати и бы́ти иде́же есть показу́я я́ко воскресе́ние смерть преи́мет. Иде́же бо есмь рече́ аз, та́мо и слуга́ мой. Где же ли Христо́с, на небесе́х. И пре́же воскресе́ния у́бо, та́мо преста́вимся душе́ю и умо́м. А́ще кто мне служи́т, возлюби́т его́ оте́ць мой. Что ра́ди не рече́ аз. Поне́же у́бо не у́ подоба́ющее о нем непщева́ние имя́ху. Но бо́лшую о отце́;

И́же бо ниже́ я́ко воскре́снути ему́ подоба́ше ве́дяще, ка́ко вели́кая о нем мечта́ли бы. Те́мже и сыно́м заведе́евым рече́, несть мое́ да́ти, но и́мже угото́вася от отца́ моего́. А́ще и сам есть судя́й зде же и при́сно представля́ет. Я́ко бо при́снаго сы́на служи́телей. Си́це оте́ць похва́лит. Ны́не душа́ моя́ смути́ся и что реку́, о́тче спаси́ мя от часа́ сего́ и у́бо сие́ несть пред повелева́ющаго на смерть приити́. Наипа́че у́бо повелева́ющаго. Да́же бо не глаго́лют я́ко той боле́зней сый челове́ческых. Удо́бне о сме́рти любому́дрит(ь). И нас от безбе́днаго наказу́ет. Показу́ет я́ко а́ще и боя́ся ея́. Оба́че потре́бнаго ра́ди не отрица́ется. Сия́ же смотре́ния суть а не божества́, сего́ ра́ди рече́. Ны́не душа́ моя́ смути́ся. Поне́же а́ще не сие́ есть, ко́е после́дование име́ет глаго́ланное и е́же ре́щи. Отче́ спаси́ мя от часа́ сего́. И си́це смути́ся я́ко и свобоже́ние иска́ти. А́ще у́бо мо́щно бы́ло бы избежа́ти сия́ челове́ческаго естества́ неможе́ния. Но не име́ю рече́ что реку́ свобоже́ние прося́ сего́ бо ра́ди приидо́х на час сей. А́кы бы глаго́лал, а́ще и волну́емся. А́ще и смуща́емся не бе́гаем сме́рти. Поне́же и аз ны́не смуща́ем. Не глаго́лю я́ко бы убежа́ти. Подоба́ет бо терпе́ти находя́щее;

Не глаго́лю свободи́ мя о́тче от часа́ сего́. Но что о́тче просла́ви и́мя твое́. А́ще и смуще́нию сие́ принужа́ющу глаго́лати, сопроти́вное глаго́лю. Просла́ви твое́ и́мя. Е́же есть приведи́ про́чее на крест. Е́же мно́го челове́ческое показу́ет. И естество́ не хотя́ще умре́ти, но настоя́щия держа́щися жи́зни. Показу́я, я́ко не вне челове́ческых бе страсте́й. Я́коже бо е́же алка́ти не укори́зна ниже́ е́же спа́ти си́це ниже́ е́же настоя́щия жи́зни жела́ти. Христо́с же те́ло чи́сто от грехо́в имя́ше. А не есте́ственых нужь свобоже́но. Поне́же ниже́ те́ло бы́ло бы. Си́ми у́бо, и и́но не́что наказа́ ко́е у́бо сие́. Да а́ще когда́ в по́двизе устро́имся и боя́зни. Ниже́ си́це да отска́чем предлежа́щых о́тче просла́ви и́мя твое́. Показу́ет я́ко о и́стинне умира́ет, сла́ву в Бо́га вещь нарица́я и сие́ хожа́ше, по кресте́ хотя́ше обраща́ти вселе́нныя и ска́зывати и́мя Бо́жие и служи́ти ему́. А́ще и не о́тче то́кмо и сы́нове;

Но оба́че сие́ молчи́т. Прии́де у́бо глас от небе́с и просла́вих и па́кы просла́влю по́сле креста́. Что у́бо Христо́с. Не мене́ ра́ди глас сей бысть но вас ра́ди. Они́же гром непщева́ху бы́ти или́ а́нгела ему́ глаго́лавша и отку́ду сие́ вознепщева́ша. Еда́ бо не я́сен и благознамени́телен бе глас. Но впоско́ре их отлете́. А́ки добле́йших су́щих, и плотяны́х и лени́вых. И о́ви у́бо глас держа́ху, о́виже у́бо я́ко сочета́н бе глас, ве́дяху. Что же назна́мена не ктому́. Что у́бо Христо́с. Не мене́ ра́ди глас сей бысть, но вас ра́ди. Что ра́ди сие́ рече́ ко о́ному сопротивля́яся е́же глаго́лаху при́сно, я́ко несть от Бо́га и́же от Бо́га прославля́ем ка́ко несть от Бо́га. Его́же и и́мя тем прославля́ется. Сего́ бо ра́ди и глас снесе́ся. Тем и сам рече́, не мене́ ра́ди глас сей бысть. Но вас ра́ди. Не да аз навы́кну что не ве́дя от него́, вся бо вем я́же о́тча но вас ра́ди поне́же бо глаго́лаху я́ко а́нгел глаго́ла ему́. Или́ гром бысть и не вня́ху. Рече́ я́ко вас ра́ди бысть да не си́це возведе́тся. Ко?е́же вопроси́ти что есть рече́нное. О́виже устраше́ни, ниже́ си́це вопроша́ху слы́шаще. Я́ко тем влага́ше вещь. Не ве́дящему бо к нему́ же глаго́лаше в ле́поту ви́дяшеся не знамени́т бы́ти глас, вас ра́ди глас бысть;

Зри́ши ли я́ко смире́нная их ра́ди быва́ют. А не я́ко тре́бующу сы́ну по́мощи ны́не суд есть ми́ру сему́. Ны́не князь ми́р(а) сего́ изве́ржется сие́ ко́е после́дование и́мать ко е́же просла́вих и па́кы просла́ви ю́? мно́го и зело́ соглаша́юще поне́же бо рече́ просла́влю показу́ет и о́браз сла́вы кото́рый же ли о́браз есть он изве́ржется до́лу рече́. Что же есть, суд есть ми́ру сему́. А́ки бы глаго́лал, суди́лище бу́дет и отмще́ние. Ка́ко и ко́им о́бразом отъя́т пе́рваго челове́ка, пови́нна прие́м греху́. Грехо́м бо вни́де смерть во мне сие́ не обре́те. Что ра́ди наскочи́, и сме́рти предаде́ что ра́ди во Иу́дину ду́шу вложи́. Я́ко бы мене́ уби́ти. Да не у́бо ми рече́ши ны́не. Я́ко Бог устро́и. Сие́ бо не диа́вола но его́ прему́дрости. Еще́ о́ного изволе́ние да истя́жется лука́ваго. Ка́ко у́бо су́дится мир во мне а́ки суди́лище посади́вшу реку́тся сие́ к нему́ бу́ди всех уби́л еси́. За е́же греху́ пови́нных обрести́. Христа́ что ра́ди уби́л еси́ не благоявле́нно ли я́ко непра́ведне те́мже у́бо им отмсти́тся мир весь. Но да я́вьственнейше бу́дет и о указа́нии сие́ сотворю́ я́вьствено да бу́дет не́кто кре́пок томи́тель всех впа́дающих безчи́слеными облага́я злы́ми сей а́ще срази́вся царю́ или́ сы́ну Царе́ву убие́т его́ непра́ведне смерть о́ного и ины́х отмьсти́ти мо́жет да бу́дет не́кто должнико́в истязу́я и да бие́т и во юзи́лище да вмета́ет. Та́же от тоя́же го́рдости и ничи́мже до́лжнаго под то же затворе́ние да веде́т сей и́хже во ины́х сотвори́, постра́жет казнь убие́т бо его́ он. Та́ко и о сы́не Бо́жии бысть. И́хже бо в нас сотвори́л есть диа́вол и́миже во Христа́ дерзну́, истя́жется ка́зни. И я́ко сие́ гада́тельствует услы́ши что рече́. Ны́не князь ми́ра сего́ изве́ржется до́лу, сме́ртию мое́ю. И аз а́ще вознесу́ся всех привлеку́ к себе. А́ще бо рекл бы я́ко воскре́сну. Не у́ я́вьствено я́ко и ве́руют. Те́мже е́же рещи́ я́ко ве́руют, обоя́ споказа́вшася я́ко и воскресе́нием. А́ще бо мертв пребы́л бы и прост челове́к быв и никто́же ве́ровал бы всех привлеку́ к себе́ ка́ко у́бо рече́ я́ко оте́ць привлача́ет я́ко сы́ну влеку́щу оте́ц влече́т. Привлеку́ рече́ а́ки под мучи́телем держи́мых. И о саме́х еди́ных не могу́щых приити́ я́ко и о́ного рук не избежа́ти. А́ки держи́мым и́нде же сие́ хище́ние нарица́ет никто́же мо́жет сосу́ды кре́пкаго расхы́тити а́ще же не пре́же свя́жет кре́пкаго и тогда́ сосу́ды его́ расхи́тит сия́ же наси́льственое его́ представля́я глаго́лаше. Е́же у́бо та́мо хище́ние. Зде влече́ние нарече́:

Нравоуче́ние 67. О ми́лостыни

Сия́ у́бо ве́дяще, да воста́нем, да просла́вим Бо́га. Не ве́рою то́кмо но и житие́м. Поне́же не у́бо бу́дет сла́ва. Но хула́, не та́ко бо ху́лится Бог е́ллину су́щу скве́рну я́коже христиани́ну растле́нну. Те́мже у́бо молю́ся вся твори́ти, я́ко бы сла́витися Бо́гу. Го́ре бо рече́ рабу́ о́ному и́мже и́мя Бо́жие ху́лится. Егда́ же го́ре бу́дет, вся́кая а́бие му́ка и томле́ние бу́дет блаже́н же, и́мже и́мя Бо́жие сла́вится. Не у́бо я́коже во тме бу́дем. Но всех да бе́гаем грехо́в наипа́че же во о́бщий восходя́щих вред. Поне́же наипа́че всих Бог ху́лится ко́е бо прии́мем проще́ние егда́ ины́м да́ти повелева́еми. Я́же ины́х похыща́ем. Ка́я нам бу́дет наде́жа спасе́ния. А́ще же а́лчуща не напита́в му́чится, а́ще же и совле́к оде́яннаго коея́ получи́м ми́лости, сия́ ча́сте глаго́люще не преста́ем не́гли бо и́же днесь не услы́шавше зау́тра услы́шат, зау́траже не вне́мшеи, в су́щии по о́ном повину́тся. А́ще же не́цыи и не покори́ве бу́дут пребыва́юще. Но нам неиспы́тно бу́дет суди́лище е́же бо на́ше испо́лнихом;

Бу́ди же ни нам посрами́тися о глаго́лемых ниже́ вам стыде́тися. Но всем возмо́же со дерзнове́нием ста́ти на суди́щи Христо́ве. Да и са́ми возмо́жем похвали́тися о вас, и на́шых злых утеше́ние не́кое прия́ти, ва́ше благоиску́ствие. О Христе́ Иису́се о Го́споде на́шем. Ему́же сла́ва и держа́ва. Ны́не и при́сно и во ве́кы веко́в. Ами́нь.