Ева́нгелие Пре́жде же пра́зника Па́схы, ве́дый Иису́с я́ко прии́де ему́ час его́. Да преи́дет от ми́ра сего́ ко Отцу́ возлюби́в свои́х в ми́ре, в коне́ц возлюби́л их.

Подража́тели мои́ быва́йте рече́ блаже́ный Па́вел я́коже и аз Христо́в. Сего́ бо ра́ди плоть прия́т от растворе́ния на́шего. Да то́ю нас нака́жет доброде́тели. В подо́бии бо пло́ти греха́ рече́ и о грес́е осуди́ грех пло́тию и сам рече́, научи́теся от мене́ я́ко кро́ток есмь и смире́н се́рдцем. И сия́ не глаго́лы то́кмо но и ве́щми научи́л есть. И́бо и самаряни́на и бесну́ющася его́ нарица́ху и лестьца́ и ка́мения пусти́ша на него́ и овогда́ у́бо слуг посыла́ху иуде́и. Я́ко бы его́ уби́ти овогда́ же ины́х пуща́ху наве́тующых. И са́м(и?) мно́жицею досажа́юще пребыва́ху. И наипа́че ничто́же име́юще порица́ти. Но и благоде́тельствуеми всегда́ но оба́че по толи́кых не отступа́ет им благотворя́. И глаго́лы и ве́щми и рабу́ не́коему зауши́вшу, рече́. А́ще у́бо зле глаго́лах сведе́тельствуй о зле. А́ще же до́бре что мя бие́ши но о́на у́бо ко враго́м и наве́тующим. Да уви́дим же и ко ученико́м. Что твори́т ны́не. Наипа́че же и я́же твори́т ны́не к наве́тнику. Его́же бо наипа́че всех подоба́ше ненави́дети я́ко учени́к сый. И трапе́з и со́ле приобщи́вся и чудеса́ ви́дев и толи́кых сподо́бився всех сотвори́ люте́йшая, ка́мения у́бо не меща́ ниже́ досади́в. Но пре́дав его́ и отда́в;

Сего́ зри ка́ко любому́дрене прие́млет умыва́я ему́ но́гы. И́бо си́це его́ удержа́ти хотя́ше зло́бы о́ноя. И́бо мо́щно бе а́ще хоте́л бы и иссуши́ти его́ я́коже смоко́вницу. И пресещи́ я́коже ка́мения растерза́ше раздра́ти я́коже катапета́зму. Но не хотя́ше ну́жею. Но произволе́нием наве́та отвести́. Сего́ ра́ди и умыва́ем но́ги. И ниже́ сего́ устыде́ся злостра́стный он и окая́нный. Пре́же пра́зника Пасх рече́. Ве́дый Иису́с я́ко прии́де час его́. Не тогда́ ве́дый но е́же сотвори́л егда́ сотвори́л есть ве́дый дре́вле да не прии́дет. Велему́дрене евангели́ст прехоже́ние его́ смерть нарица́ет. Хотя́ бо оста́вити их рече́. Зе́лнейшу любо́вь показова́ше е́же бо возлюби́ в коне́ц возлюби́л есть их си́речь, ничто́же оста́ви и́хже зе́лне лю́бящему ле́по бе твори́ти;

Что же у́бо не изнача́ла сие́ сотвори́л есть, бо́лшая по́сле налага́ет. Я́ко бы их простре́ти усвое́ние и мно́го им предположи́ти утеше́ние к хотя́щим не ходи́ти лю́тым свои́х же их глаго́лет по сло́ву усвое́ния. Поне́же и ины́х свои́х глаго́лет. По соде́тельству сло́ву. Я́ко егда́ глаго́лет свои́ его́ не прия́ша что же есть су́щых в ми́ре. Поне́ бо бе́ша ему́ и сконча́вшейся свои́ су́щии о Авраа́ме и Исаа́це и Иа́кове, и су́щии по о́нех. Но не в ми́ре бе́ша они́. Зри́ши ли я́ко ве́тхому и но́вому той есть Бог; Что же есть в коне́ц возлюби́л есть их пребыва́ше любя́ их всегда́ и зна́мения мно́гыя любви́ сие́ рече́ а́ще и во мно́гых ме́стех и́но рече́. Е́же ду́шу положи́ти о друзе́х свои́х. Но не у́ о́но быва́ше. Что же ра́ди сие́ сотвори́л есть. Зане́ мно́го чу́днейше бе егда́ светле́йшь пред все́ми яви́ся, и утеше́ние же нема́ло оста́ви хотя́ отъити́. Поне́же бо име́ху боле́зновати зе́лне сопроти́в мо́щно им си́ми утеше́ние вво́дит. И ве́чери бы́вши, диа́волу вло́жшу в се́рдце Иу́дино да преда́ст его́. Сему́ ужаса́яся евангели́ст предложи́. Я́ко сего́ у́же преда́ти хотя́ща его́ умы́. Показу́ет же его́ мно́гую зло́бу я́ко ниже́ со́лей обще́ние его́ удержа́ е́же наипа́че весть удержава́ти зло́бу. Ни е́же да́же до после́дняго дни пребу́ти учи́телю его́ нося́щу. Ве́дый я́ко вся предаде́ ему́ оте́ць. И я́ко от Бо́га изы́де к Бо́гу и́дет. Или́ сие́ рече́, я́ко толи́к и тако́в от Бо́га прише́дый к нему́ отходя́ все́ми владе́я и сие́ соде́ла. И ниже́ си́це лиши́ся прия́ти вещь такову́. Преда́ние же я́коже мне ви́дится, ве́рных спасе́ние зде нарица́ет. И́бо егда́ глаго́лет, вся мне пре́дана суть от отца́ моего́ сие́ глаго́лет преда́ние я́коже рече́ твои́ бе́ша, и мне их дал еси́ и па́кы никто́же мо́жет приити́ ко мне. А́ще не оте́ць посла́вый мя привлече́т его́. И я́ко а́ще не бу́дет дано́ ему́ с небеси́ или́ сие́ у́бо рече́. Зане́ ничи́м же имя́ше умаля́тися от сего́ от Бо́га изше́д и к Бо́гу иды́й и вся име́я. Егда́ же услы́шиши преда́ние. Ничто́же челове́чьско да вознепщу́еши, ю́же бо ко отцу́ показу́ет ч(а/е?)сть и единомышле́ние. Я́коже бо оте́ць ему́ предае́т. Си́це и той отцу́. И явля́ет Па́вел глаго́ля, егда́ предае́т ца́рствие Бо́гу и Отцу́. Челове́чнейше же сие́ зде рече́. Мно́гое от них показу́ет промышле́ние, и неизрече́нную от них изъявля́я любо́вь. Зане́ я́ко от свои́х печа́шеся про́чее. Науча́я их ма́тери благы́х смиреному́дрию. Ю́же и коне́ць бы́ти рече́ доброде́тели что у́бо прилежи́т е́же от Бо́га изы́де, и к Бо́гу и́дет си́речь досто́йная творя́ше отту́ду приве́дшаго. И та́мо отходя́щаго вся́ко попира́я киче́ние. И воста́в от ве́чери и положи́в ри́зы. Зри ка́ко не е́же умы́ти то́кмо. Но и и́нако смире́нное показу́ет не пре́же бо да́же восклони́тися. Но и по е́же возлещи́ всем. Тогда́ воста́. Пото́м же ниже́ про́сте умыва́ет. Но ри́зы отложи́в и ниже́ до сего́ ста. Но и ле́нтием препоясу́ется и ниже́ сим удовле́ся но и сам напо́лни. А не ино́му напо́лнити повеле́. Но вся сам де́лает. Сия́ все́ми показу́я я́ко не неради́вым подоба́ет твори́ти такова́я егда́ благотвори́м, но со вся́кым усе́рдием. Мне мни́тся: Преда́телю пе́рвому умы́ти но́гы. Нача́т бо рече́ умыва́ти и тогда́ прии́де к Петру́, егда́ же прии́де глаго́ла ему́ он. Го́споди ты ли мои́ но́ги мои́ умы́еши. Рука́ми те́ми рече́. И́миже очеса́ слепы́х отве́рзл еси́ и прокаже́нных очи́стил еси́ и ме́ртвых воскреси́л еси́. Мно́го же изъявле́ние и сие́ и́мать. Те́мже ниже́ помоли́ся ему́ что вя́щше. Ра́зве е́же ты и́бо и о себе́ дово́лно бе все показа́ти. Взы́щет же(т?) у́бо кто в ле́поту. Ка́ко никто́же ему́ от про́чих возбрани́. Но Петр еди́н. Е́же не ма́лаго любле́ния и стыде́ния бе. Ка́я ли у́бо есть вина́; Мне ви́дится пе́рвее преда́теля умы́ти. Та́же к Петру́ про́чее я́ко бо инаго пре́же его́ умы́. Я́вствено от е́же рещи́, егда́ прии́де к Петру́. Но несть зе́лен оглаго́лник евангели́ст. Е́же бо нача́т. Сие́ есть гада́тельствующаго, а́щеже Петр пе́рвый бе; Но в ле́поту преда́телю су́рову су́щу. И пре́же верхо́внаго возлещи́. И́бо и отъину́ду суровьство́ его́ показу́ется. Егда́ омоча́ет со учи́телем и егда́ облича́ем не умиля́ется. Но Петр у́бо еди́ною запреще́н быв в пре́дних. И сия́ от любле́ния глаго́лы рек си́це спря́тася я́ко и боя́ся и трепе́ща, и́нако тре́бовати к вопроше́нию сей же ча́сте облича́ем не ощуща́ше. Егда́ у́бо прии́де к Петру́. Глаго́ла ему́ он Го́споди ты ли мои́ умы́еши но́ги глаго́ла ему́. Е́же аз творю́ ты не ве́си ны́не. Разуме́еши же по сих. Си́речь, приобре́тение ели́ко от сего́ по́лзу уче́ния. И ка́ко дово́лно во вся́ко привести́ смиреному́дрие нас. Что у́бо Петр еще́ возбраня́ет и глаго́лет не умы́еши ног мои́х во век, что твори́ши о́ Пе́тре. Не по́мниши ли пре́жних рече́ний. Не рекл ли еси́ ми́лостив ты, и слы́шал еси́ иди́ от мене́ сатана́; И ниже́ си́це ли уцеломудря́ешися, но еще́ зе́лен еси́; Ей рече́ ве́лие бо быва́емое и у́жаса по́лно. Поне́же бо от мно́гыя любви́ сие́ соде́ла от тоя́же его́ е́млет па́кы. Я́коже у́бо и та́мо зе́лне запрети́в и рек собла́зн ми еси́, си́це и зде. А́ще не умы́ю тебе́ не и́маши часть. Что у́бо те́плый и горя́щий Го́споди не но́зе мои́ то́кмо но и ру́це и главу́. И в попуще́нии зелне́йшь обоя́ бо от любви́. Что бо ра́ди не рече́. Чего́ де́лма творя́ше сие́ но преще́ние приложи́л зане́ он не бы у́бо повину́лся. А́ще бо рекл бы оста́ви си́ми бо увещава́ю вас смиреному́дрити, обеща́лбыся у́бо тма́ми сие́ о е́же не влады́це сие́ сотвори́ти. Ны́не же что рече́ е́же наипа́че страша́шеся и трепета́ше. Е́же разлучи́тися от него́. Той бо есть ча́сте вопраша́яй где и́деши те́мже и глаго́лаше, я́ко ду́шу мою́ рече́ преда́м за тя. А́ще бо услы́шав я́ко не ве́си е́же аз творю́ разуме́еши же по сих ниже́ си́це отступи́. Мно́го па́че а́ще уве́дел бы. Сего́ ра́ди рече́ разуме́еши же по сих. Ве́дый я́ко а́ще ны́не уве́сть спроти́вится, и не рече́ у́бо мя да оста́влю. Но е́же мно́го зе́лнейше бе ниже́ научи́тися терпя́ше. Но научи́ глаго́ля. Не умы́еши мои́х ног, егда́ же воспре́ти а́бие осла́би кре́пость. Что же есть разуме́еши же по сих. По сих когда́; Егда́ мои́м и́менем бе́сы изго́ниши. Егда́ уви́диши на небеса́ возноша́ема. Егда́ от Ду́ха уве́си я́ко от десны́х сежу́, тогда́ уве́даеши ны́не быва́емое что у́бо Иису́с. Поне́же рече́ Петр не но́зе мои́ то́кмо но и ру́це и главу́ измове́нный рече́ не тре́бу. Ра́зве но́зе умы́ти то́кмо. Есть бо чист весь. У́же вы чи́сти есте́ за сло́во е́же глаго́лах вам. А́ще у́бо чи́сти суть, чего́ ра́ди умыва́ет но́ги. Я́ко бы нас смиря́тися наказа́ти. Сего́ ра́ди не на и́ну часть прии́де. Но я́же ины́х безче́стнейша бы́ти ви́дится. Что же есть измове́нный, си́речь чи́стый. Еда́ у́бо они́ чи́сти бе́ша ибо не у́ грехо́в бе́ша свобоже́ни же Ду́ха сподо́блени. Греху́ еще́ владе́ющу кля́тве рукопи́санному пребыва́ющу. Свяще́ннику не у́ прине́сшу, ка́ко у́бо их чи́стых бы́ти глаго́лет да́же бо не за сия́ вознепщу́еши их чи́стых, я́ко грехо́в свобоже́нных. Наведе́ у́же вы чи́сти есте́ за сло́во е́же глаго́лах вам. Е́же есть си́це еще́ есте́ чи́сти у́же свет прия́сте, у́же заблуже́ния свободи́стеся иуде́йскаго. И́бо проро́к рече́, измы́йтеся чи́сти бу́дите отъими́те лука́вствия от душ ва́шых. Я́коже таковы́й измы́ся и чист есть. Поне́же у́бо вся́ко лука́вство поверго́ша от души́. И с чи́стою мы́слию сопребыва́ху ему́. Сего́ ра́ди рече́. Измове́нный по проро́ческому сло́ву. Чи́сту же и́бо та́мо ба́ню не ю́же водо́ю глаго́лаше иуде́йскую но е́же соде́тельства очище́ние:

Нравоуче́ние 70. О пра́вде и о я́же к вдови́цам ми́лостыни.

Да бу́дем у́бо и мы чи́сти да научи́мся добро́ твори́ти. Что же ли есть до́брое; Суди́те си́ру. И оправда́йте вдови́цу и прииди́те и да стя́жемся. Мно́го сие́ сло́во в писа́ниих вдови́ц и си́рых. Но нам ни еди́но же сего́ сло́во и́бо помы́сли коли́ка по́честь. А́ще бу́дут греси́ ва́ши я́ко оброще́ни. Я́ко сне́га убелю́. А́ще же я́ко очервле́ни, я́ко во́лну убелю́. И́бо без заступле́ния вдови́ца. Сего́ ра́ди мно́го о ней твори́т тща́ние и́бо мо́щно вторы́м сожи́ти бра́ком. Бо́жия ра́ди стра́ха. Я́же от вдо́вьства претерпева́ющи лю́тая. Да подае́м у́бо им ру́ку вси и му́жи и жены́ да не когда́ постра́жем я́же от вдо́вства лю́тая. А́ще же и постра́жем мно́гу предложи́м человеколю́бия вину́. Нема́ла си́ла слез вдови́чих есть. Но и са́мое не́бо мо́жет отврести́ да не у́бо на них нахо́дим. Ниже́ го́ршия да твори́м беды́ но вся́кым о́бразом да помога́ем. Мно́го себе́ облага́юще утвержен́ие. И в настоя́щем и в бу́дущем ве́це незд́е бо то́кмо. Но и та́мо нам предста́нут. Мно́жайшая грехо́в на́шых я́же к ним благодея́нием отсеца́ющи. И со дерзнове́нием творя́щи предста́ти суди́щу Христо́ву. Его́же бу́ди всем нам получи́ти. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́ки веко́в. Ами́нь.