Ева́нгелие: Ами́нь ами́нь глаго́лю вам, прие́мляй а́ще кого́ послю́. Мене́ прие́млет. Прие́мляй же мене́, прие́млет посла́вшаго мя.

Вели́ко су́щаго к Бо́жиим рабо́м угоже́ния воздая́ние, и плоды́ отсю́ду нам воздае́т. Прие́мляй бо рече́ вас, Мене́ прие́млет. Мене́ же прие́мля, прие́млет посла́вшаго мя тому́ же е́же Христа́ прия́ти. И его́ Отца́ что у́бо бу́дет то́чно и ко́е сие́ после́дование ко пре́же рече́нным. Что же о́бще име́ет ко е́же глаго́лати. А́ще творите́ сия́ блаже́ни есте́, е́же рещи́ прие́мляй вас. И мно́го после́дование есть уви́дети. Поне́же бо имя́ху исходи́ти и мно́га страда́ти лю́тая. Двема́ о́бразы их утеша́ет. Еди́ным у́бо, а́ще любому́дрствуете рече́. Мене́ всегда́ име́юще в па́мяти и я́же сотвори́х и я́же пострада́х обнося́ще вся удо́бне претерпи́те лю́тая. Не си́мже то́кмо о́бразом. Но и е́же от всех мно́гаго наслажа́тися слугова́ния и пе́рваго у́бо изъяви́л есть рек. Блаже́ни есте́ а́ще творите́ сия́. Второ́е же прие́мляй вас, мене́ прие́млет глаго́ля. Всех бо отве́рзе им до́мы я́кобы и от любому́дрия нра́вов, и от промышле́ния слугу́ющих сугу́бо име́ти утеше́ние;

Та́же поне́же у́бо сия́ им запове́да. Я́ко име́ющым вселе́нную обтещи́ всю помышля́я я́ко обои́х сих преда́тель лиши́тся и ни еди́ного же их наслади́тся. Ниже́ су́щаго в труде́х терпе́ния. Ниже́ прие́млющых слугова́ния. Смути́ся па́кы, е́же и евангели́ст назна́меноваша явля́я. Я́ко о́ного ра́ди смути́ся. Сия́ бо рече́ глаго́ла и смути́ся ду́хом. И сведе́тельствова и рече́. Еди́н от вас преда́ст мя па́кы во всех обставля́ет стра́ха, тем е́же не и́менем рещи́. А́ще и ничто́же себе́ они́ све́дяще лука́во свои́х по́мысл, изрече́ние Христо́ве ве́рнейше непщу́ют. Те́мже и взира́ху на друг дру́га. Е́же бо во еди́ного обста́вити еди́н от вас смути́ всех. Что у́бо, ини́и у́бо взира́ют на друг дру́га. Везде́ же те́плый Петр Иоа́нн помава́ет поне́же бо и пе́рвее запреще́н бысть. И хотя́щу омы́ти возбрани́. И везде́ обрета́ется от любви́ устремля́яся порица́ем же. Сего́ ра́ди боя́ся, ниже́ умолча́. Ниже́ провеща́ но посре́дством Иоа́нновым хо́щет уве́дети. О́но же досто́йно есть взыска́ти что у́бо всем боя́щимся и трепе́щущым. Верхо́вному боя́щуся. Иоа́нн я́коже наслажа́яся возлеже́т в не́дрех Иису́совех и не возлежи́т то́кмо но и на пе́рси напа́дает и не сие́ то́кмо досто́йно взыска́ния. Но е́же по сих. Что у́бо сие́ есть, е́же о нем глаго́лет, его́же любя́ше Иису́с. Что бо ра́ди никто́ же ин сие́ рече́ о нем. И́бо и ини́и любля́хуся, но сей вя́щше ины́х;

А́ще же никто́же ин сие́ о нем рече́. Но сам о себе́ чу́дно ничто́же. Твори́т сие и Па́вел вре́мени зову́щу. Си́це глаго́ля, вем челове́ка пре́же лет четырена́десятих. А́ще и нема́ла его́ проидо́шя похвале́ния и́на или́ ма́ло тебе́ ви́дится е́же слы́шащу после́дуй ми а́бие оста́вльшу мре́жа и отца́ после́довати. И е́же со Петро́м то́кмо его́ поя́ти на го́ру и и́нде па́кы во хра́мину вше́дшу той же коли́ко похвале́ние Петру́ про́йде. И не скры рещи́ Христу́ глаго́ля. Пе́тре лю́биши ли мя мно́жае сих и везде́ показу́я его́ те́пла. И бли́же не име́юща к нему́. Егда́ же глаго́лаше сей же что. От мно́гыя любви́ глаго́лаше сие́. Что у́бо ни еди́н же ли ин рече́ о нем; Я́ко ниже́ той рекл бы а́ще не в сие́ впал бы ме́сто. А́ще бо рекл бы я́ко Петр пома́я Иоа́нну вопроси́ти. Ничто́же и́но приложи́л бы. Мно́го твори́л бы недоуме́ние. И взыска́ти прину́дил бы нас вину́. Сего́ ра́ди разреша́я рече́ сию́. Возлежа́ше на пе́рсех Иису́совех. Или́ ма́ло непщу́еши слы́шав навы́кнути. Я́ко возлежа́ше и толи́каго им учи́тель причаща́ше дерзнове́ния. А́ще же и сего́ вину́ взыску́еши уве́дети. Любви́ вещь бе сего́ ра́ди рече́. Его́же любля́ше. Аз же ему́ и за и́но мню сие́ твори́ти. Хотя́щу показа́ти чужа себе́ согреше́ния. Сего́ ра́ди дерза́ет и глаго́лет и наде́ется поне́же что ра́ди не во ино́м ме́сте сие́ рече́. Но егда́ верхо́вный пома́я да́же бо не вознепщу́еши я́ко бо́лшу су́щу пома́я глаго́лет. Я́ко за мно́гую любо́вь сие́ быва́ше, что же и па́дает на пе́рси. Ничто́же не у́ ве́лие оне́ непщева́ху. И́накоже и печа́ль утиша́ше, ле́по бо зре́нию их бы́ти посу́плену тогда́. А́ще бо душя́ми свои́ми смути́шася. Мно́го па́че зре́ний укроща́я у́бо их и сло́вом и вопроше́нием предпу́ть твори́т. И попуща́ет напа́сти на пе́рси. Смотри́ же его́. И не кичли́вое не рече́ бои́мся но что его́же любля́ше. Я́коже и Па́вел глаго́лаше вем челове́ка пре́же лет четы́рех на́десят. Тогда́ у́бо пе́рвое его́ облича́ет Христо́с. И ниже́ тогда́ и́менем но ка́ко. Ему́же аз омочи́в укру́х пода́м, и о́браз орати́телен я́ко ниже́ трапе́зы устыде́ся. Того́же хле́ба приобщи́вся. Бу́ди обще́ние соле́й не обрати́ е́же и от него́ прия́ти укру́х кого́ у́бо не привлекло́ бы но не о́ного. Те́мже и сатана́ тогда́ вни́де в него́ посмея́вся его́ безсту́дию. Доне́лиже бо бе в ли́це не сме́яше наскочи́ти. Но отвне́ прилага́шеся. Егда́ же у́бо я́вьствена его́ сотвори́ и отлучи́ наскочи́л есть про́чее со осла́бою ниже́ бо подоба́ше такова́ су́ща на мно́зе неисправле́на пребыва́юща, внутрь держа́ти. Сего́ ра́ди изве́рже его́ про́чее. И отсече́нна прие́млет тогда́ он, и оста́вль их изы́де но́щию. Глаго́ла ему́ Иису́су. Дру́же е́же твори́ши сотвори́ скоре́йше и никто́же уви́де от возлежа́щих. О́ле коли́ко нечу́вствие, ка́ко не умягчи́ся. Ка́ко не устыде́ся но безсту́днейши быва́я исхо́дит. А е́же сотвори́ скоре́йше. Не повелева́ющаго есть. Ниже́ сове́тующаго но поноша́ющаго и показу́ющаго я́ко той у́бо хотя́ше испра́вити. Но поне́же неисправле́н имя́ше оставля́ет его́ и сие́ никто́же уве́де от возлежа́щых мно́го у́бо кто зде недоуме́ние обря́щет. А́ще у́бо вопроси́вшим ученико́м кто есть глаго́ла. Ему́же омочи́в укру́х пода́м. И ниже́ си́це разуме́шя оба́че то́кмо о́тай рече́. Я́ко бы ни еди́ному же услы́шати. И́бо Иоа́нн сего́ ра́ди на пе́рси напа́в вопраша́ет то́чию не ко у́ху, я́ко бы не бы́ти я́вьствену преда́телю. И Христо́с си́це отвещава́ше и ниже́ си́це сотвори́ я́вьствена но он у́бо обнаже́ннейше глаго́лаше ему́. Е́же твори́ши сотвори́ скоре́йше они́же не разуме́ша. Сие́ же глаго́лаше показу́я я́ко и́стина я́же ко иуде́ом рече́нна бе́ша ему́ о сме́рти, и́бо ко оне́м реко́шася. О́бласть име́ю положи́ти ду́шу мою́. И о́бласть име́ю взя́ти ю́. И никто́же взе́млет ю́ от мене́ доне́лиже у́бо держа́ше, никто́же возмо́же егда́ же попусти́ про́чее удо́бьна тогда́ вещь быва́ет. Я́же вся гада́тельствуя глаго́лаше. Е́же твори́ши сотвори́ скоре́йше. И ниже́ тогда́ его́ я́вьственна сотвори́л есть. Не́гли бо его́ расто́ргнули бы. Не́гли у́бо и Петр уби́л бы его́. Сего́ ра́ди никто́же уве́де от возлежа́щих. Еда́ ниже́ Иоа́нн ниже́ сей. Ниже́ у́бо ча́яше я́ко учени́к на толи́ко изы́де зако́но преступле́ния. Поне́же бо дале́че таковы́я зло́бы бе́шя. Ниже́ о ины́х такова́я непщева́ти имя́ху и поне́же у́бо, е́же ча́сте глаго́лаше я́ко не о всех глаго́лю и нигде́же отсече́ и зде непщева́ше о ино́м глаго́латися. Бе же нощь егда́ изы́де. Что мне вре́мя глаго́леши, да навы́кнеши лю́тость. Я́ко ниже́ вре́мя его́ удержа́ от устремле́ния. Но ниже́ сие́ его́ обьявле́нна сотвори́. И́бо стра́хом содержи́ми и боя́знию мно́гою, тогда́ волнова́хуся. Сего́ ра́ди помышля́ху же рече́ я́ко да ни́щим что дам, сия́ глаго́лаше. Мно́го бо творя́ше о ни́щых попече́ние науча́я нас мно́го твори́ти о сем тща́ние се бо меше́ць име́яше и влага́емая. А́ще и ни еди́н же явля́ется прине́с к нему́ име́ния но я́ко у́бо пита́ху его́ от име́ний учени́ца?, рече́. Сие́ же нигде́ назна́мена. Ка́ко же ни мешца́ ни ме́ди. Ниже́ зла́(та?) повеле́ носи́ти. Меше́ць ноша́ше к ни́щым служе́нию. Да навы́кнеши я́ко и зело́ нестяжа́тельному и распя́тому. Сея́ ча́сти мно́го подоба́ет твори́ти промышле́ние мно́гая бо устрая́я, к на́шему уче́нию соде́ла. Сие́ у́бо помы́слиша ученицы́. Да ни́щым не́что пода́ст, и ниже́ сие́ обрати́ е́же до после́дняго дни, не хоте́ти его́ обличи́ти сие́ и нам подоба́ет твори́ти. И не облича́ти соживу́щых согреше́ния. А́ще и неисце́лне име́ют. И́бо и по сих прише́дшу преда́ти целова́ние даде́ и изво́ли вещь толи́ку. И о е́же мно́го люте́йше происхожа́ше крест ему́, смерть поно́сная и па́кы та́мо то же целова́ние пока́зоваше. И сла́ву зде вещь нарица́ет, науча́я нас. Я́ко ничто́же си́це сту́днейше и поно́снейше, е́же не све́тла твори́т де́йствующаго. Егда́ по Бо́зе быва́ет. По е́же у́бо изы́ти Иу́де о е́же преда́ти, глаго́лет. Ны́не просла́вися Сын челове́чь, си́це па́дшая помы́сли ученико́в воздвиза́ет. И увещева́я не то́кмо не се́товати но и ра́доватися. Сего́ ра́ди и Петру́ изнача́ла запрети́. В сме́рти бо быва́емое и преодоле́ти сме́рти. Сла́ва вели́ка и сие́ есть е́же о себе́ глаго́лаше, егда́ вознесу́ся тогда́ позна́ете я́ко аз есмь. И па́ки разруши́те хра́ма сего́ и треми́ де́ньми воздви́гну его́ и па́ки зна́мение не да́сться вам. То́кмо зна́мение Ио́нино ка́ко бо не сла́ва вели́ка, е́же и по сме́рти возмощи́ су́щых пре́же сме́рти бо́лша да́же бо увере́но бу́дет воскресе́ние бо́лшая соде́лаху ученицы́. А́ще же не ожи́л и Бог был бы. Ка́ко о и́мени его́ толи́ка соде́лали бы си́и и Бог просла́вит его́. Си́речь, и Бог просла́вит его́ в себе́, е́же есть собо́ю а не ины́м, и а́бие просла́вит его́, вку́пе со кресто́м. Ниже́ бо вре́менем мно́гым рече́ ниже́ до́лго воскресе́ния ожида́ет вре́мя. Ниже́ тогда́ просла́вит све́тла но а́бие на само́м кресте́ све́тлая явя́тся со́лньце возврати́ся ка́мение разседо́шася. Катапета́зма раздра́ся. Мно́га телеса́ усо́пшых святы́х воста́ша гроб печа́ти имя́ше и стра́жи приседя́ху и наложе́ну на те́ло ка́меню воскрес(и́?) те́ло. 40, дней преидо́ша и ду́ха сни́де подая́ние и вси его́ а́бие пропове́даху. Сие́ есть просла́вит его́ в себе́ и а́бие просла́вит его́ ниже́ а́нгелы и арха́нгелы. Ниже́ ино́ю ко́ею си́лою, но собо́ю ка́ко же и просла́ви собо́ю, вся соде́яв ко сла́ве сыно́вне. А́ще и вся сын сотвори́л есть. Зри́ши ли я́ко от него́ быва́емая отцу́ возлага́ет; Еще́ ма́ло вре́мя с ва́ми есмь и я́коже рех иуде́ом. Взы́щете мене́ и не обря́щете, и иде́же есмь аз вы не мо́жете приити́ и вам глаго́лю ны́не. Начина́ет печа́лных про́чее по ве́чери. Егда́ бо Иу́да изы́де, не ктому́ ве́чер бе но нощь. Поне́же бо имя́ху ма́ло по́слеже надста́ти, подоба́ше вся завеща́ти им, я́ко бы име́ти в па́мяти па́чеже ду́ху вся воспомяну́ мно́гая бо́ле по а́ки пе́рвое слы́шавшым. И такова́ хотя́щым страда́ти искуше́ния отлага́ти и́же бо и ко́сну низноси́ми. Я́коже и ин рече́ евангели́ст и печа́лию содержи́ми я́коже и сам рече́. Я́ко бо сия́ рех печа́ли испо́лних се́рдце ва́ше. Ка́ко у́бо сия́ вся удержа́ли бы изве́стне. Что у́бо глаго́лашеся нема́ло им быва́ше приобре́тение во Христо́ву сла́ву. Е́же я́вьствене уве́дети по сих воспомина́емым. Я́ко сия́ дре́вле слы́шавше бе́ша от Христа́ что же ра́ди преднизлага́ет их ду́шу глаго́ля. Еще́ ма́ло вре́мя с ва́ми есмь. Иуде́ом у́бо в ле́поту глаго́лашеся. Нас же что ра́ди в то́йже чин вво́диши. Оне́м ли не благода́рным; Ника́коже что же ра́ди рече́, я́коже рех иуде́ом, воспомяну́х я́ко не ны́не от прише́ствия лю́тых сия́ предглаго́лю но испе́рва сия́ предве́дях, и сведе́тели вы слы́шавшии я́ко и ко иуде́ом сия́ глаго́лах. Те́мже приложи́л есть ча́дца, да услы́шавше я́коже рех иуде́ом, и не к ним подо́бне рещи́ся вознепщу́ют рече́нному не низлага́я их у́бо, но утеша́я же их рече́; да не не нача́янна наста́вша им лю́тая смутя́т, иде́же аз иду́ вы не мо́жете приити́. Показу́ет свою́ я́ко преставле́ние и преложе́ние лу́чшых. Вме́сто теле́с тле́нных не прие́млющее. Сия́ же глаго́лет, и е́же к нему́ воздвиза́я жела́ние, и тепле́йше творя́;

Ве́сте бо я́ко егда́ уви́дим о любе́зных не́кых отходя́щых. Наипа́че разгрева́емся. И егда́ уви́дим в ме́сто отходя́щых. В не́же ниже́ мо́щно нам отъи́ти. Оне́х у́бо страша́ сия́ глаго́лаше. Сих же жела́ние воспаля́я. Таково́ есть ме́сто, я́ко не то́кмо оне́м, но ниже́ вам любе́знейшым возмощы́ приити́ та́мо. Зде и досто́иньство свое́ показу́ет. И вам глаго́лю ны́не, что ра́ди ны́не. И́нако оне́м и́нако вам си́речь не о? со оне́ми;

Где же его взыска́ша ученицы́ иуде́и же где. Ученицы́ у́бо егда́ бежа́ша. Иуде́и же егда́ неисце́льная пострада́ша лю́тая. И вся́ко превосходя́ща сло́во град их взя́ту бы́вшу, и богопо́сланному отвсю́ду на них носи́му гне́ву. Оне́м у́бо тогда́ глаго́лах за неве́рьствие их. Вам же ны́не за е́же не ненача́янным бы наити́ лю́тым. За́поведь но́ву даю́ вам, поне́же бо в молву́ им впа́сти ле́по сия́ слы́шащым. Я́ко пусты́м име́ющым бы́ти. Утеша́ет их всех благы́х ко́ренем и утверже́нием облага́я их любо́вию, а́кы бы глаго́лал боле́знует отходя́щу мне, но а́ще лю́бите друг дру́га, бу́дете крепча́йши; Ка́ко у́бо не сие́ рече́ но е́же па́че сего́ по́лзоваше их, о сем позна́ют вси я́ко мои́ ученицы́ есте́. И сего́ ра́ди вку́пе изъяви́л есть, я́ко не уга́снет лик. Е́же иногда́ в позна́ние им даде́ сие́ же рече́, егда́ преда́тель их отлучи́ся. Ка́коже сию́ за́поведь глаго́лет но́ву и в вет́хом лежа́щу. Сам сотвори́л есть но́ву нра́вом наведе́ у́бо, я́коже аз возлюби́х вас. Не́бо пре́же бы́вшим вам исправле́ниям. Долг вам отда́х но сам нача́х си́це и вам благода́тельствовати любе́зных подоба́ет и недо́лжных вам и оста́вль рещи́ чудеса́ я́же имя́ху твори́ти от любви́ их начерта́ет. Что ли у́бо, зане́ сие́ наипа́че есть показу́юще е́же челове́ков святы́х вся́кыя бо вина́ есть доброде́тели. Сего́ ра́ди наипа́че спаса́емся вси сие́ бо есть рече́ бы́ти ученику́. Си́це нас вси похва́лят. Егда́ уви́дят вас. Любо́вь подража́щыя что у́бо, не мно́го ли па́че чудеса́ пока́жет сие́ ника́коже, мно́зе бо реку́т. Го́споди не твои́м ли и́менем бе́сы изгна́хом; И па́кы ра́дующымся им я́ко бе́си им повину́ются. Рече́, не ра́дуйтеся я́ко бе́си вам повину́ются. Но я́ко имена́ ва́ша напи́сана суть на небесе́х. И у́бо в сие́ вселе́нную прохожа́ше. Поне́же у́бо о́но пре́же бе а́ще же не бы́ло бы о́но. Ниже́ сие́ пре́было бы сие́ у́бо вско́ре их сотвори́ло есть до́брых и благы́х, е́же бы́ти всех се́рдцу и души́ еди́ной. А́ще же раздели́лися бы́ша от друг дру́га. Вся у́бо бы поги́бла:

Нравоуче́ние 72. О любви́ и житии́ доброде́тельном.

Не оне́м сия́ бесе́довашеся то́кмо но и всем хотя́щым ве́ровати сло́вом их в него́. Поне́же и ны́не и́но ничто́же есть соблажня́ющее е́ллинов. Не́жели е́же не любви́ бы́ти но и е́же ли зна́мениям не бы́ти порица́ют; Но не си́це. Где же любо́вь показа́ша апо́столи. Зри́ши ли Петра́ и Иоа́нна. Не отторже́нне держа́щихся друг дру́га; Во святи́лища восходя́щым Зри́ши ли Па́вла си́це к ним пребыва́юща; Аще бо ина́я стяжа́ша, мно́го па́че имя́ху ма́тере благы́х, от души́ бо доброде́тельны. Сия́ вещь прозяба́ет. Иде́же лука́вьство, сей изсыха́ет сад. Егда́ бо умно́жится беззако́ние, изся́кнет любо́вь мно́гых. И е́ллинов же не си́це приво́дят зна́мения. Я́коже житие́ и житие́м ничто́же си́це твори́т све́тло. Я́коже любо́вь о́на бо творя́щих мно́жицею и преле́стников нареко́ша. Житию́ же чи́сту, не у́бо име́ют зазре́ти егда́ у́бо про́поведь не у́ пре́дана бе в ле́поту зна́мения чудя́хуся. Ны́не же от жития́ подоба́ет чуди́му бы́ти. Ничто́же бо си́це обраща́ет е́ллинов, я́коже доброде́тель, ничто́же соблажня́ет, я́коже зло́ба;

Егда́ бо уви́дит лихои́мствующа похыща́юща спроти́вная повелева́юща. И еди́но племе́нным я́ко звере́м устрая́ющася. Повеле́ннаго и враго́в люби́ти. Ложь рече́т рече́нная. Егда́ уви́дит трепе́щущих сме́рти. Ка́ко прии́мет я́же о безсме́ртии словеса́ егда́ уви́дит любонача́льствующых и рабо́тающых страсте́м, опа́снейше во свои́х пребу́дет догма́тех. Ничто́же ве́лие о нас мечта́я мы бо есмы́ вино́вни мы. Е́же пребы́ти им в заблуже́нии. Догма́т бо су́щых у них дре́вле зазре́ли бы́шя. И на́шим же подо́бне почудя́тся, от жития́ же на́шего возбраня́ются. Е́же бо словесы́ любому́дрити удо́бно есть мно́зи бо и о себе́ сие́ сотвори́ша. И́щут же е́же де́лы показа́ние;

Но дре́вних су́щых у нас да помышля́ют но не ве́руют рече́ но соживу́ющих взыску́ют покажи́ бо мне рече́ ве́ру твою́ де́лы твои́ми. Егда́ же па́че зве́ря растерза́ем бли́жних име́ния, вред нас нареку́т вселе́нныя. Сия́ е́ллин держа́т и не попуща́ют к нам преложи́тися. Те́мже мы и сих казнь постра́жем, не о ни́хже зле де́йствуем то́кмо но и о ины́хже ху́лится и́мя Бо́жие нас ра́ди, доко́ле име́нием и наслаже́нию. И ины́м есмы́ пре́дани страсте́м да отступи́м у́бо про́чее. Услы́ши что рече́ проро́к о не́коих несмы́сленных. Яди́м и пие́м, за́втра бо у́мрем. О настоя́щых же ниже́ сие́ есть рещы́ си́це мно́зи я́же всех ве́щми облага́ются си́це и тем поноша́я Христо́с, и проро́к глаго́лаше. Еда́ всели́стеся еди́ни на земли́. Те́мже и бою́ся да не́что бу́дет лю́то. И мно́го привлече́м е́же от Бо́га томле́ние. Е́же да не бу́дет доброде́тели да и́мемся. Да и бу́дущых получи́м благы́х. Благода́тию и человеколю́бием Отцу́ сла́ва со Святы́м Ду́хом. Ны́не и при́сно и во ве́ки веко́в. Ами́нь.