Ева́нгелие: Глаго́ла Ему́ Фили́пп, Го́споди покажи́ нам Отца́, и довле́ет нам. Глаго́ла ему́ Иису́с, толи́ко вре́мя с ва́ми есмь и не позна́л ли еси́ Мене́ Фили́ппе. Ви́девый Мене́ ви́де Отца́.

Проро́к у́бо глаго́лаше ко иуде́ом. Зре́ние блудни́цы. Бысть тебе́. Обесту́дился еси́ ко всем. Я́ко уподо́бижеся не о́ному гра́ду пра́ведно то́кмо сия́ рещи́, но и безсту́дне ко и́стинне сопротивозря́щым Фили́ппу бо ко Христу́ ре́кшу, покажи́ нам Отца́, рече́. Толи́ко вре́мя с ва́ми есмь и не позна́л ли еси́ мене́ Фили́ппе; И оба́че не́цыи суть и по глаго́лех сих отделя́юще Сы́на от роди́теля и́бо ко́е бо́лша сего́ и́щеши приближе́ние. Не́цыи бо от рече́ния сего́. И в Саве́лиев неду́г впадо́ша но и сих и о́нех оста́вльше мы а́кы по ме́ре законопреступа́ющих, да уви́дим рече́ ины́х опа́ство. Толи́ко вре́мя с ва́ми есмь и не позна́л ли еси́ мене́ Фили́ппе рече́. Что бо, ты ли еси́ оте́ць его́же взыску́ю; Ни рече́ сего́ ра́ди ниже́ рече́ не позна́л еси́ его́. Но не позна́л еси́ мене́ ничто́же и́но изъявля́я ра́зве я́ко ничто́же и́но есть сын. Или́ сие́, е́же есть оте́ць. Пребы́в е́же бы́ти сынь. Отку́ду же на сие́ прии́де Фили́пп глаго́лаше, а́ще мене́ ви́дели бы́сте и отца́ моего́ ве́дели у́бо бы́сте и иуде́ом мно́жицею рече́ сие́. Поне́же у́бо вопроси́ Петр его́ мно́жицею и иуде́и кто есть оте́ць. Вопроси́ его́ и Фома́. И ни еди́н же ничто́же навы́че я́вьствено. Но еще́ не ве́дяше глаго́лемая. Да не возмни́тся тя́жек бы́ти Фили́пп. И стужа́ти ему́ со иуде́и. Вопроша́я его́ покажи́ нам отца́. Наведе́ и довле́ет нам, ничто́же мно́жае взыску́ем, и́бо и Христо́с глаго́лаше. А́ще мене́ ви́дели бы́сте и Отца́ моего́ ве́дели у́бо бы́сте. И собо́ю отца́ явля́ше. Он же сопроти́в обрати́ чин и рече́, отца́ покажи́ я́ко его́ ве́дый опа́сне. Но не прие́млет его́ Христо́с. Но на путь поставля́ет. Собо́ю Отца́ уве́дети увеща́ той же теле́сными очесы́ си́ми хотя́ше уве́дети;

Не́гли о проро́цех слы́ша я́ко ви́деша Бо́га. Но схоже́ние бе о́на о́ Фили́ппе сего́ ра́ди Христо́с глаго́лаше, Бо́га никто́же ви́де никогда́ же. И па́ки всяк слы́шавый Бо́га, и уви́дев, прихо́дит ко мне. Ниже́ гла́са его́ слы́шасте, ниже́ вид его́ узре́сте. И в дре́внем, никто́же у́зрит лице́ мое́ и жив бу́дет. Что у́бо Христо́с. Зело́ запрети́телне, толи́ко вре́мя с ва́ми есмь. И не позна́л ли еси́ мене́ Фили́ппе; И не рече́ ви́дел еси́ мене́. Но не позна́л мя еси́. Еда бо тебе хощу уведети отца увидети ищу ныне, ты же ми глаго́леши, не позна́л ли еси́ мене́; Ко́е у́бо после́дование име́ет сие́. Мно́го у́бо поне́же бо сие́ есть е́же есть оте́ць пребыва́я сын. В ле́поту о себе́ показу́ет роди́теля та́же разделя́я ипоста́си. Рече́, ви́девый мене́ ви́де отца́. Да не́кто рече́т я́ко той оте́ць той сын. А́ще бо той был бы оте́ць. Не бы у́бо рекл ви́девый мене́ о́ного ви́дел есть. Ка́ко же не рече́ ему́ не возмо́жная про́сиши и не по челове́ку. Мне бо еди́ному сие́ мо́щно. Поне́же у́бо рече́ довле́ет нам я́ко его́ ви́дев. Показу́ет я́ко ниже́ его́ ви́де, вои́стинну бо и о́ного ви́дел бы. А́ще и сего́ возмо́гл бы. Те́мже глаго́лаше ви́девый мене́ ви́де отца́. А́ще кто мене́ ви́де и о́ного у́зрит. А е́же глаго́лет таково́ есть я́ко ниже́ мене́ ниже́ о́ного. Мо́щно есть уви́дети, Фили́пп бо е́же зре́ние иска́ше позна́ние. И поне́же у́бо его́ ви́дети непщева́ше. Хотя́ше же и Отца́ си́це уви́дети показу́ет я́ко ниже́ его́ ви́де. А́ще же глаго́лет кто зре́ние зде ра́зум ниже́ сие́ сопроти́во глаго́лю позна́вый бо мене́ рече́ позна́ отца́. Но не рече́ сие́ но единосу́щное преста́вити хотя́ рече́. И́же существо́ мое́ ве́дый весть и о́тчее и что рече́ сие́ и́бо и́же тварь ве́дый весть и Бо́га; И́бо вси ве́дят и зрят Бо́га же не ве́дят вси. И́нако же, да уви́дим что Фили́пп и́щет уви́дети. Еда́ прему́дрость о́тчу; Еда́ благосты́ню ни но е́же что есть Бог то́же существо́. К сему́ у́бо отвещава́ет Христо́с. Ви́девый мене́ тварь же ве́дый не и существо́ Бо́жие весть. А́ще кто ви́де мене́ отца́ моего́ ве́де рече́. А́ще же ина́го существа́ был бы, не бы сие́ рекл да́же и дебеле́йшаго косну́ся словеси́. Никто́же зла́то не ве́дый во сребре́ зла́та существо́ уви́дети мо́жет. Не и́но бо ины́м явля́ется естество́. Сего́ ра́ди и до́бре запрети́ рек. Толи́ко вре́мя с ва́ми есмь и не позна́л ли еси́ мене́ Фили́ппе; Толи́каго наслади́вся уче́ния; Ви́дел еси́ зна́мения со госпо́дьством. И вся я́же божества́ бе́шя сво́йствена. И я́же оте́ць еди́н де́лает прегреше́ния разреша́ема, неизрече́нная на среду́ приводи́ма смерть отходя́щу. Соде́тельство о земли́ быва́емо и не позна́л мя еси́ Фили́ппе. Поне́же бо пло́тию обложе́н бысть. Сего́ ра́ди рече́ не позна́л мя еси́. Ви́дел ли еси́ отца́; Не ищи́ мно́жае уви́дети. Во о́ном бо мене́ ви́дел еси́ мене́ а́ще ви́дел еси́ мене́ ничто́же испыту́й. И́бо во мне о́ного позна́л еси́. Не ве́руеши ли я́ко аз во отци́; Си́речь во о́ном существе́ явля́юся. Глаго́лы я́же аз глаго́лю о себе́ не глаго́лю. Ви́дел ли еси́ приближе́ния вели́чество. И еди́наго существа́ указа́ние; Оте́ць во мне пребыва́яй. Той твори́т дела́. Ка́ко от глаго́л начина́я на дела́ прии́де. После́довательно бе рещи́. Той глаго́лет глаго́лы. Но двоя́ полага́ет зде, о уче́ниих и зна́мениих. Или́ поне́же и глаго́лы дела́ бе́шя ка́ко у́бо той твори́т и у́бо и́нде рече́. А́ще не творю́ дела́ отца́ моего́, не ве́ру(й)те мне ка́ко у́бо зде отца́ рече́ твори́ти. Сие́ и́стое явля́я. Я́ко ничто́же посреди́ отца́ и сы́на. А е́же глаго́лет таково́ есть. Не у́бо и́нако сотвори́л есть оте́ць, а и́нако аз. И у́бо и́нде, и сам оте́ц де́лает. Оте́ць бо мой досе́ле де́лает, и аз де́лаю. Та́мо у́бо непреме́нное дел. Зде же то́же показу́я. А́ще гото́вое рече́ний изъявле́ние смире́ние явля́ет, да не чуди́шися. Пе́рвее бо рек не ве́руеши, тогда́ сие́ провеща́. Показу́я о е́же в ве́ру его́ привести́, си́це вообрази́ глаго́лы. Сердца́ бо их прихожа́ше. Ве́руйте я́ко аз во отци́ и оте́ць во мне. Подоба́ше у́бо вам слы́шащым отца́ и сы́на, ничто́же и́но иска́ти во представле́ние е́же по существу́ сро́дства;

А́ще же вам не довле́ет сие́ ко е́же показа́ти еди́но че́стное и еди́но су́щное, поне́же от дел научи́теся, и е́же ви́девый мене́. Ви́де отца́ моего́. А́ще от дел глаго́лал бы не бы по́сле рекл. А́ще же ни, за дела́ ве́руйте ми та́же показу́я я́ко сия́ мо́жет то́кмо, но и́на мно́го бо́лша сих. Со премно́жеством сия́ полага́ют. Не глаго́лет бо я́ко бо́лша сих могу́ сотвори́ти. Но е́же мно́го чу́днейше бе. И ины́м да́ти могу́ рече́ и бо́лша сотвори́ти сих. Ами́нь бо глаго́лю вам я́ко ве́руяй в мя. Дела́ я́же творю́ сотвори́т. И бо́лша сих сотвори́т, я́ко ко отцу́ моему́ гряду́. Си́речь ва́шя есть е́же чудоде́йствовати. Аз бо отхожу́ та́же поне́же возвести́ е́же сло́во хотя́ше. Рече́, я́ко е́же а́ще проси́ти во и́мя мое́ сотворю́ сие́, да во мне просла́вится оте́ць;

Зри́ши ли ка́ко па́кы сам твори́т сие́; Сотворю́ бо рече́ аз, и не рече́ умолю́ отца́ но да просла́вится оте́ць. И у́бо и́нде глаго́лаше, Бог просла́вит его́ в себе́. Зде же сам просла́вит отца́. Егда́ бо сын явля́ется ве́лия моги́й прославля́ется роди́вый. Что же ли есть во и́мя мое́, е́же апо́столи глаго́лаху во и́мя Иису́с Христо́во, воста́ни и ходи́. Вся бо зна́мения я́же сотвори́ша, сам де́йствоваше. И рука́ госпо́дня бе с ни́ми. Аз сотворю́ рече́;

Зри́ши ли госпо́дьство, я́же ины́ми сам твори́т а я́же ли собо́ю не вознемога́ет. Но отца́ поспешеству́ем и кто у́бо сия́ рече́. Что ра́ди второ́е сие́ полага́ет. У(де?)ржа́я свое́ сло́во и показу́я я́ко пе́рвая схоже́ния бе́шя. А е́же ко отцу́ иду́. Си́речь не погиба́ю но во свое́м досто́иньстве пребыва́ю и на небесе́х есмь. Сия́ же вся утеша́я их глаго́лаше. Поне́же бо ле́по бе им, не у́ о воскресе́нии ве́дящым словеса́ помышля́ти что се́товно ины́ми обеща́ет такова́ дава́ти им. Везде́ исцеля́я их, и показу́я я́ко пребыва́ет вы́ну и не пребыва́ет то́кмо но и бо́лшую показу́ет си́лу:

Нравоуче́ние 74. Я́ко доброде́тель духо́вная же́ртва есть. И я́ко сребролю́бие, от тщесла́вия есть и я́ко три есть вожделе́ние. Есте́ственое ну́жное и посре́днее.

Да после́дует у́бо ему́ и да во́змем крест а́ще бо не близ есть гоне́ние, но ины́я сме́рти вре́мя. Умертви́те бо рече́ у́ды ва́шя су́щая на земли́. Да погаси́м у́бо вожделе́ние да убие́м я́рость. Да отъи́мем за́висть. Сие́ есть же́ртва жи́ва не в пе́пел сия́ же́ртва скончава́ется. Ниже́ в дым разлива́ется ниже́ дров тре́бует и огня́ и ножа́. Име́ет бо и огнь и ножь, Ду́ха Свята́го. Сим де́йствуя ноже́м, отсеца́й от се́рдца изли́шнее и чу́жее отверза́й заткнове́ние слу́ха. Неду́гы бо и лука́выя вожделе́ния загража́ти обы́кшя словеси́ вхо́да и́бо име́ний вожделе́ние приложи́вшеся. Не попуща́ет слы́шати е́же о ми́лостыни сло́во и за́висть прише́дши. Прегража́ет е́же о любви́ уче́ние. И ин неду́г впад. Па́ки лени́вейшую устра́яет ко всем. Да отъи́мем у́бо лука́вая вожделе́ния. И́бо довле́ет восхоте́ти и вся погасо́ша. Не у́бо да сие́ ве́дим я́ко томи́тельно име́ний вожделе́ние но я́ко ле́ности на́шия есть томи́тельство. Мно́зи у́бо ниже́ я́ко есть сре́бреница ве́дети глаго́лют. Несть бо есте́ствено вожделе́ние сие́. Есте́ственая бо, испе́рва и изнача́ла изве́ржени бы́шя. Зла́то же и сребро́, и до мно́гаго вре́мени ниже́ я́ко когда́ есть зна́емо бе. Отку́ду у́бо возрасте́ вожделе́ние сие́ от тщесла́вия и ле́ности после́дния. О вожделе́нии бо. О́ви у́бо суть ну́жны о́виже есте́ствень о́ви же посре́дне сих яково́ что глаго́лю, ели́цы растлева́ют несоверше́нно живо́тное. Сия́ есте́ствены и ну́жны суть. Си́речь, е́же бра́шен и пи́тей, и е́же спа́ти вожделе́ние теле́с же жела́ние. Есте́ствено но у́бо есть не ну́жно же мно́зи бо ему́ преодоле́ша и погыбо́ша. Име́нии же вожделе́ние ниже́ есте́тсвено ниже́ ну́жно. Но изли́шне. И а́ще хо́щем не прии́мем его́ нача́ло. Сего́ ра́ди и Христо́с о де́вьстве бесе́дуя рече́. Могы́й вмести́ти да вмеща́ет. О име́ниих же не си́це но что. А́ще кто не отве́ржется всех име́ний свои́х несть мне досто́ин. Е́же бо бе удо́бно наказова́ше. А е́же превосхо́дит мно́гых попуща́ет произволе́нию что у́бо вся́кого лиша́ем себе́ отве́та от наси́льственейшия у́бо стра́сти я́тыи. Не мно́гу постра́жет казнь от немощны́я же уловле́ный, вся́кого лише́н есть отве́та. Что бо рече́м егда́ глаго́лет. А́лчуща мя ви́десте и не напита́сте ко́е прии́мем отвеща́ние. Нищету́ предложы́м вся́ческы но не́смы вдови́цы о́ноя убо́жайши. Я́же две ме́дници вве́ргши, всех превзы́де. Не коли́чьство бо вноше́ния истязу́ет Бог. Но ме́ру изволе́ния и сие́ же его́ промышле́ния.

Почуди́вшеся у́бо его́ человеколю́бию. Возмо́жная да совнесе́м. Да́же и в настоя́щем житии́ и в бу́дущем мно́гаго получи́вше Бо́жия человеколю́бия. Возмо́жем наслади́тися обеща́нных благы́х. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом. Ны́не и при́сно и во ве́кы веко́в. Ами́нь.