Ева́нгелие: А́ще лю́бите мя. За́поведи моя соблюди́те. И аз умолю́ отца́ и ина́го уте́шителя дасть вам. Да пребу́дет с ва́ми в век дух и́стинны его́же мир не мо́жет прия́ти. Зане́ зрит его́ ниже́ зна́ет его́.

Дел нам тре́ба есть и дея́ний везде́. А не е́же глаго́лы показа́ния. Рещи́ бо и обеща́тися вся́ческому удо́бно есть. Соде́яти же несть подо́бне легко́. Что ли у́бо сия́ рех; Зане́ мно́зи ны́не суть глаго́лющии боя́тися Го́спода и люби́ти, де́лы же сопроти́вная показу́ющых. Бог же и́же де́лы любо́вь взыску́ет. Сего́ ра́ди и ко ученико́м глаго́лаше, а́ще лю́бите мене́ за́поведи моя́ соблюда́йте поне́же бо рече́ я́ко е́же а́ще про́сите аз сотворю́. Да не вознепщу́ют про́сте проше́нию возмощи́, наведе́. А́ще лю́бите мене́. Тогда́ рече́ сотворю́. Поне́же у́бо ле́по бе им и слы́шащым, я́ко аз ко отцу́ иду́, смуща́тися, рече́. Не сие́ есть люби́ти мя е́же смуща́тися ны́не. Но е́же покаря́тися глаго́лемым. Дах вам за́поведь да люби́те друг друга́, да си́це твори́те друг дру́гу. Я́коже и аз вам сотвори́х. Сие́ есть любо́вь е́же покаря́тися сим и повинова́тися люби́мому. И умолю́ отца́, и ина́го уте́шителя дасть вам схоже́ния па́кы сло́во. Поне́же бо не у́ его́ позна́вшим ле́по бе взыска́ти сопребыва́ние о́ного, глаго́лы, е́же по пло́ти его́ прише́ствие. И ниже́ еди́но приима́ти утеше́ние не су́щу. Что рече́, умолю́ отца́ и ина́го уте́шителя дасть вам. Си́речь ина́го я́коже мене́. Да постыдя́тся и Саве́лиева му́дроствующии. И о Ду́се не подоба́ющее непщева́ние име́ющеи. И́бо чу́до словеси́ сие́ есть. Я́ко от спротивле́ния стоя́щая е́реси еди́ною я́звою низложи́ е́же бо рещи́ ина́го, показу́ет своея́ ипоста́си разли́чие а е́же рещи́ уте́шителя существа́ сро́дство. Что же ра́ди рече́, умолю́ отца́. Я́ко а́ще рекл бы аз послю́. Не у́бо бы подо́бне ве́ровали. Ны́не же потща́тельное сие́ есть, я́ко бы ве́роватися ему́. По́сле бо сам рече́ его́ посыла́ет глаго́ля. Приими́те Дух Свят. Зде же рече́ умоля́ет отца́ я́ко достове́рно им сотвори́ти сло́во. Поне́же бо Иоа́нн рече. Я́ко от исполне́ния его́ мы вси прия́хом. А его́же Христо́с имя́ше. Ка́ко от ина́го прие́млет. И па́кы. Той вас крести́т Ду́хом Святы́м и огне́м что же апо́столов вя́щше имя́ше. А́ще отца́ умоли́ти хотя́ше я́ко бы да́ти ины́м. И́же не́когда они́ мно́жицею и без моли́твы явля́ются сие́ творя́ще. Ка́коже а́ще по умоле́нию отца́ посыла́ется сам о себе́ налета́ет. Ка́коже и от ина́го посыла́ется. И́же везде́ сый, и разделя́я осо́бная коему́ждо я́коже хо́щет. И глаго́ля с госпо́дьством, отдели́те у́бо мне Па́вла и Варна́ву. А́ще и Бо́гу служа́ху служа́щеи. Но оба́че с госпо́дьством во свое́ де́ло призва́. Не я́ко на и́но де́ло призыва́ше. Но да о́бласть пока́жет. Что про́чее есть и аз умолю́ отца́. Показу́ет прише́ствия вре́мя егда́ бо их очи́сти же́ртвою тогда́ налете́ Дух Святы́й. И что у́бо су́щу с ни́ми не на́йде я́ко не у́ бе же́ртва вознесе́на. Егда́ же про́чее и грех разруши́ся. И они́ к беда́м посыла́хуся и к подвиго́м совлача́хуся. Подоба́ше помаза́ющему приити́. Что же ра́ди не а́бие по воскресе́нии Дух прихо́дит. Да во мно́гом его́ устро́ившеся вожделе́нии, со мно́гою его́ прии́мут благода́тию. До́ндеже бо бе с ни́ми Христо́с. Не бе́шя в ско́рби. Егда́ же отъи́де обнажи́вшеся и во мно́зе стра́се устро́ившеся. Со мно́гым его́ хотя́ху усе́рдием прия́ти. А е́же с ва́ми пребу́дет сие́ явля́ет. Я́ко ниже́ по сконча́нии отступи́т. Да́же не уте́шителя слы́шавше па́кы воплоще́ние и́но вознепщу́ют. И очесы́ вознепщу́ют его́ зре́ти исправля́я рече́. Его́же мир не мо́жет прия́ти, зане́ не зрит его. Не си́це бо вам сопребу́дет я́коже аз но всели́тся в ва́шых ду́шях. Сие́ бо есть, е́же да в вас пребу́дет. Ду́ха же его́ и́стинны нарица́ет сим о́бразы су́щая во дре́внем явля́я да с ва́ми бу́дет. Что есть с ва́ми е́же сам рече́. И се аз с ва́ми есмь и́накоже. И и́но не́что гада́тельствует. Я́ко не постра́ждет сия́ я́же аз. Ниже́ отъи́дет его́же мир не мо́жет прия́ти, зане́ не зрит его́. Что бо рцы ми ины́х зри́мых, ничто́же. Но зде ра́зум рече́. Наведе́ у́бо. Ниже́ зна́ет его́ весть бо и опа́сном позна́нии зре́ние глаго́лати. Поне́же бо чувств ясне́йше есть зре́ние сим при́сно опа́сное представля́ет позна́ние, ми́ра зде лука́вых рече́ и си́це утеша́я их. Е́же да́ти им изря́дный дар. Зри коли́кыми воздви́же е́же о нем сло́во. Рече́ я́ко ин е́же аз есть. Рече́ я́ко не оста́вит вас рече́ я́ко к вам еди́ным прии́де я́коже у́бо и аз. Рече́ я́ко в вас пребыва́ет. Но ниже́ си́це печа́ль их изгна́. Его́ бо иска́ху еще́ и обы́чая его́. Сие́ бо исцеля́я рече́. Ниже́ аз оста́влю вас си́рых. Прииду́ к вам не бо́йтеся рече́. Не сего́ ра́ди рех ина́го уте́шителя посла́ти. Я́ко сам вас в коне́ц отступа́я, не сего́ ра́ди рех я́ко у вас пребыва́ет, яко не ктому́ зря вас и́бо и сам гряду́ к вам. Не оставля́ю вас си́рых. Поне́же бо начина́я глаго́лаше ча́дца. Сего́ ра́ди и зде рече́, не оста́влю вас си́рых. В нача́ле у́бо глаго́лаше, я́ко прии́дете иде́же аз иду́. И я́ко в дому́ отца́ моего́ оби́тели мно́гы суть. Зде же поне́же до́лго вре́мя о́но бе дае́т Ду́ха но поне́же не ве́дяще е́же что бе глаго́лемое. Не имя́ху дово́лно утеше́ние, не оста́влю вас си́рых глаго́ля;

Сие́ бо наипа́че иска́ху. Но поне́же у́бо е́же гряду́ к вам явля́ющаго бе прише́ствие. Да не па́ки то́же взыщу́ прише́ствие яково́е пе́рвее. Зри ка́ко сие́ я́вьствене у́бо не рече́, назна́мена же. Рек бо еще́ ма́ло и мир не у́зрит мене́, вы же ви́дите мя а́ки бы глаго́лал прииду́ к вам. Не у́бо та́коже я́коже пе́рвее на всяк день бесе́дую при́сно, сопребыва́я. И да не глаго́лют ка́ко у́бо иуде́ом рекл еси́ отны́не не у́зрите мене́ разреша́ет сопротивле́ние про́чее. Рек к вам еди́ным, поне́же и дух тако́в есть; Я́ко аз живу́ и вы жи́ви бу́дете не разлучи́т у́бо крест в коне́ц. Но ра́зве часе́ц мал сотры́ет то́кмо. Живо́т же ми ви́дится не настоя́щий то́кмо, но и бу́дущий глаго́лати во он день позна́ете я́ко аз во отцы́, и вы во мне и аз в вас. О отцы́ у́бо существа́ есть. О ни́хже единомышле́ния и по́мощи я́же от Бо́га рече́нное и ка́ко и́мать сло́во рцы ми рече́. Ка́ко у́бо сопроти́вное и́мать сло́во мно́го бо посре́дство. И зело́ безме́рно Христо́во и ученико́в. А́ще же те же лежа́т глаго́лы. Да не чуди́шися. Весть бо писа́ние мно́жыцею. Те́миже глаго́лы о Бо́зе и челове́цех лежа́щых не та́коже де́йствовати поне́же. И бо́зи глаго́лемся и сы́нове Бо́жии. Но не ту́же кре́пость име́ет глаго́л о нас и о Бо́зе лежа́щь. И о́браз сынь глаго́лется и сла́ва и мы но мно́го посре́дство. И па́ки вы же Христо́ви Христо́с же Бо́жи(й?) Не та́кожде же Бо́жий Христо́с и мы Христо́ви. Что же есть егда́ воста́ну рече́. Уве́сте я́ко не отдели́хся от отца́, но ту́же име́ю си́лу. И я́ко с ва́ми есмь всегда́. Ве́щем воспропове́дающым ю́же от вас по́мощь от мене́ быва́ему. Враго́м спря́таным вам дерза́ющым. Лю́тым от среды́ быва́емым про́поведи на всяк цвету́щи день. Всем уступа́ющым и отходя́щым, сло́ву благоче́стия. Я́коже посла́ мя и аз посыла́ю вас.

Зри́ши ли я́ко ниже́ зде ту́же кре́пость рече́ние и́мать. А́ще бо сие́ си́це прии́мем ничто́же бу́дет растоя́ще апо́столи Христа́. Что же ра́ди рече́ тогда́ позна́ете я́ко егда́ ви́деша его́ воскре́сша и соживу́ща им. Тогда́ изве́стную ве́ру навыко́ша. Вели́ка бо ду́ха си́ла бе. Я́ко вся их наказу́ющы име́яй за́поведи моя́ и соблюда́я их он есть любя́й мя. Не довле́ет бо е́же име́ти то́кмо, но и хране́ния нам тре́ба есть опа́снаго. Что же ра́ди мно́жицею им то́же глаго́лет си́речь а́ще лю́бите мя, за́поведи моя́ соблюди́те. И име́яй за́поведи моя́ и соблюда́я их. И а́ще кто сло́во мое́ услы́шит и соблюде́т е́, он есть любя́й мя. Не слу́шаяй слове́с мои́х не лю́бит мя. Мню гада́тельствовати печа́ль их. Поне́же бо мно́го о сме́рти им любому́дрствовати. Ненави́дяй ду́шу свою́ в ми́ре сем, в животе́ ве́чнем прии́мет ю́. И а́ще кто не во́змет креста́ своего́ и после́дует мне несть мне досто́ин. Хо́щет же и и́на мно́жайша глаго́лати. Поноша́я им рече́. Вы непщу́ете от любви́ страда́ти е́же скорбе́ти. Е́же не скорбе́ти у́бо любви́ бе. Я́коже сие́ чрез все состро́ити хо́щет. В сие́ происходя́ сло́во возъизглави́?. А́ще бо люби́ли бы́сте мене́ рече́, возра́довалися у́бо бы́сте. Я́ко ко отцу́ моему́ иду́. Ны́не же от боя́зни сие́ стра́ждете. А е́же си́це пребыва́ти к сме́рти. Несть мои́х за́поведей помина́ющим. Подоба́ше бо вам распя́тися. А́ще вои́стинну люби́ли мя бысть. Я́ко бо мое́ сло́во наказу́ет. Не боя́тися от убива́ющых те́ло. Таковы́х и оте́ць лю́бит и аз и явлю́ся им сам та́же Иу́да, и что рече́ я́ко нам хо́щещи яви́ти себе́. Зри́ши ли от боя́зни напо́лнену их ду́шу. Слия́ся бо и смути́ся и непщева́ я́коже и ме́ртвых зрим во сне си́це и ему́ име́ти зре́тися, да́же у́бо не сие́ вознепщу́ют. Услы́ши что рече́, аз и оте́ць прии́дем к нему́. И оби́тель у него́ сотвори́м. То́чию не глаго́ля, я́коже оте́ць явля́ет себе́ си́це и аз не си́це же то́кмо, но и тем е́же рещи́ я́ко оби́тель у него́ сотвори́м отъя́т непщева́ние е́же снов? несть ты же ми смотри́ ученика́ и смуща́ема и не сме́юща я́вьствене рещи́. Е́же рещи́ жела́ше не рече́ го́ре нам я́ко умира́еши. и я́ко сконча́вшиися хо́щеши нам явля́тися и надстоя́ти. Но не рече́ си́це. Но что есть я́ко нам хо́щеши яви́ти себе́ а не ми́рови. Глаго́ла у́бо я́ко вас похваля́ю. Вы за́поведь мою́ блюдете́. Да́же бо не по сих зря́ще его́ мечта́ние бы́ти вознепщу́ют. Сего́ ра́ди сия́ предглаго́лет. И да не си́це я́коже рех вознепщу́ют им явля́тися. Глаго́лет и вину́, за е́же за́поведи моя́ соблюда́ти. Глаго́лет я́ко и Дух си́це хо́щет явля́тися. А́ще же толи́ко с ним пребы́вше вре́мя не у́ терпя́т та́мо существо́. Па́че же ниже́ разумева́ют сие́ что у́бо пострада́ли бы а́ще в нача́ле си́це им яви́лбыся сего́ ра́ди и ясть с ни́ми. Да не мечта́ние вещь вознепщу́ется. А́ще бо на вода́х ви́девше сие́ пщева́ша, и́бо тому́же зре́нию я́вльшуся. И не пре́же мно́га разлучи́вшуся что у́бо вознепщева́ли бы. А́ще ви́дели бы его́ а́бие воскре́сша. Его́же ви́деша держи́ма и побива́ема. Сего́ ра́ди ча́сте им глаго́лет. Я́ко яви́тся и что ра́ди яви́тся и ка́ко. Да не мечта́ние вознепщу́ют не любя́й мене́ слове́с мои́х не соблюда́ет. И сло́во е́же слы́шасте несть мое́, но посла́вшаго мя я́коже не мене́ то́кмо, но ниже́ отца́ лю́бит и́же сих не слу́шаяй слове́с. А́ще бо сие́ зна́мение любви́ е́же слы́шати за́поведей. Сия́ же оте́ческыя суть. Слу́шаяй не сы́на то́кмо но и отца́ возлюби́л есть. Ка́коже твои́ и не твои.́ Си́речь, я́ко ничто́же вне отца́ веща́ю. Ниже́ свое́ и́но, па́че уго́днаго о́ному. Сия́ глаго́лах вам. У вас пребыва́я но поне́же сия́ не я́вьственна бе́ша и о́ва у́бо ниже́ разуме́ша, мно́гая же и сомнева́хуся да не смуща́ются па́кы не глаго́лют кото́рыя за́поведи свободи́ их боя́зни вся́кия рек уте́шитель же его́же по́слет оте́ць во и́мя мое́ он вас научи́т. Не́гли не я́вьствена рече́нная ны́не но есть сих я́вьствен учи́тель он, а е́же у вас пребу́дет гада́тельствующаго есть я́ко сам отхо́дит та́же да не печа́лятся рече́. Я́ко до́ндеже у них сам пребу́дет и Дух не прии́дет. Ничто́же ве́лие и высо́ко мо́гут све́дети. Сия́ же глаго́лет устро́я их до́блествене претерпе́ти его́ разлуче́ние. Я́ко вели́кых вину́ быва́ющу им благы́х ча́сте же уте́шителя нарица́ет содержа́щих ра́ди их тогда́ печа́лей поне́же уби́ и сия́ слы́шаще смуща́хуся помышля́юще ско́рби бра́ни разлуче́ние его́. Зри ка́ко их спряту́ет па́кы глаго́ля. Мир оставля́ю вам. То́чию не глаго́ля, чим вреди́теся от мирска́го смуще́ния. До́ндеже ми́рствуете ко мне. Не тако́в бо сей мир. И́же у́бо от вне и о зле быва́ет мно́жицею и не поле́зен. И име́ющых ничи́мже по́лзова. Аз же и даю́ тако́в я́кобы с друг дру́гом ми́ровати. Е́же вас крепча́йших твори́т. Но поне́же па́ки рече́ оставля́ю. Е́же бе отходя́щаго. И дово́лно бе их смути́ти сего́ ра́ди па́кы рече́. Да не смуща́ется ва́ше се́рдце. Ниже́ да бои́тся зри́ши ли я́ко о́ва у́бо от друголю́бия, о́ва же от боя́зни страда́ху. Слы́шасте я́ко аз рех вам иду́ ко отцу́ и прииду́ к вам. А́ще люби́ли мя бы́сте возра́довалися у́бо бы́сте. Я́ко иду́ ко отцу́ я́ко оте́ць бо́лши мене́ есть и ко́ю сие́ им ра́дость имя́ше носи́ти ко́е утеше́ние что у́бо есть рече́нное не уве́дяху о воскресе́нии. Ниже́ яково́ подоба́ше о нем непщева́ние имя́ху. Ка́ко бо и́же ниже́ я́ко воскре́снет ве́дяще. Отца́ же вели́ка бы́ти непщева́ху. Глаго́лет у́бо я́ко а́ще и о мне бои́теся я́ко не довле́ющем себе́ заступи́ти. Ниже́ наде́етеся я́ко по кресте́ па́кы вам узрю́ но услы́шавше я́ко ко отцу́ отхожу́. Подоба́ше ра́доватися про́чая я́ко к бо́лшему отхожу́ и могу́щему вся разре́ти? лю́тая. Вы слы́шасте я́ко аз рех вам. Что ра́ди сие́ положи́л есть я́ко си́це зело́ дерза́ю быва́емыми, я́ко и прорещи́ си́це не убо(я́?)хся?;

Сие́ у́бо и по сих рех вам пре́жде бы́ти да егда́ бу́дут ве́руете я́ко аз есмь. А́ки бы глаго́лал. Еда́ ве́де ли бы́сте то́кмо аз рех не у́бо же рекл бых, а́ще не дерза́ли бы. Ви́дел ли еси́ схоже́ния сло́во су́ще. И́бо егда́ глаго́лет мните́ ли я́ко не могу́ умоли́ти отца́, и предста́вит ми двана́десят легео́нов а́нгел. Ко мне́нию слы́шащых веща́ет;

Ниже́ бо о́но рече́т кто а́ще и зело́ бу́дет неи́стовь, я́ко не можа́ше себе́ помощи́. Но а́нгел тре́боваше. Но поне́же у́бо о нем а́ки о челове́це непщева́ние имя́ху, сего́ ра́ди рече́ двана́десят легео́нов а́нгел. И́бо про́сте их вопроси́ и пове́рже вспять. А́ще же глаго́лет кто бо́лша бы́ти отца́ я́ко вино́вна сы́ну ниже́ сему́ сопроти́в рече́м. Но не у́бо сие́ ина́го бы́ти существа́ сы́ну твори́т. А е́же глаго́лет таково́ есть. До́ндеже у́бо зде бу́ду, ле́по непщева́ти вам я́ко бе́дствуем. А́ще же отъиду́, дерза́йте я́ко во? утверже́ни? есмы́. О́ному бо никто́же преодоле́ти возмо́жет. Сия́ же вся к не́мощы ученико́в глаго́лахуся, и сам у́бо дерза́ю. И не пеку́ся о сме́рти. Сего́ бо ра́ди рече́ сия́ рех вам, пре́же бы́ти. Но поне́же вы не у́ мо́жете е́же о сих прия́ти сло́во от отца́ его́же непщу́ете вели́ка бы́ти. Ввожу́ утеше́ние уте́шыв у́бо их па́кы глаго́лет печа́лная не ктому́ возглаго́лю с ва́ми. Что ра́ди гряде́т бо ми́ра сего́ князь и во мне и́мять? ничто́же. Ми́ру же кня́зя диа́вола рече́, и лука́вых челове́к си́це нарица́я. Не бо челове́ку нача́льствует земли́ или небеса́. Поне́же у́бо разврати́л бы вся и низложи́в нача́льствует же преда́вшым ему́ себе́ сего́ ра́ди и кня́зя тмы ве́ка сего́ нарица́ет. Тму зде па́кы лука́вая дея́ния нарица́я. Что у́бо диа́вол убива́ет ли. Ника́коже не име́ет бо во мне ничто́же. Ка́ко у́бо тебе́ убию́т поне́же хощу́ и да позна́ет мир я́ко люблю́ отца́, не бо пови́нен сме́рти рече́ ниже́ до́лжен ея́ за любо́вь ю́же ко отцу́ стражду́. Сие́ же рече́, да па́ки их воздви́гнет ду́шу. И уве́дят я́ко не нехотя́, но во́лею на сие́ прихо́дит, и я́ко пренебрегы́й диа́вола. Не довля́ше бо е́же рещи́ я́ко ма́ло вре́мя с ва́ми есмь. Но ча́сте са́мое сие́ обраща́ет печа́льное. В ле́поту. До́ндеже сие́ пред ни́ми удо́бь прия́тно сотвори́т, приплета́я тому́ блага́я. Сего́ ра́ди овогда́ у́бо глаго́лет иду́ и прииду́. И я́ко иде́же есмь аз, да и вы бу́дете и не мо́жете мне ны́не после́довати, после́дуете же по́сле. И ко отцу́ иду́, и оте́ць бо́лши мене́ есть, и пре́же бы́ти рех вам и я́ко не от ну́жи сия́ стражду́, но за любо́вь о́тчу. Я́ко бы разуме́ти им я́ко не погы́бельна вещь. Ниже́ вред нося́ща. А́ще у́бо зело́ его́ любя́ и люби́мый от него́ си́це хо́щете. Сего́ ра́ди у́бо блага́я сия́ примеша́я. Ча́сте глаго́лаше и печа́лная, обуча́я их мысль. И́бо е́же у вас пребу́дет. И е́же поле́зно есть вам разлуче́ние. Утеша́ющаго бе. Сего́ бо ра́ди предвари́в безчи́сленая рече́ о(_?)не́м. Е́же в вас есть и мир мо́жет прия́ти и той воспомяне́т вся, и Ду́ха и́стинны. И Дух(а?) Свята́го, и Уте́шителя. И я́ко поле́зно есть вам, да не скорбя́т, я́ко ни еди́ному же су́щу заступа́ющу и помага́ющу. Поле́зно же глаго́лет, явля́я я́ко духо́вных их соде́лает;

Нравоуче́ние 75. О дерзнове́нии по прия́тии Ду́ха апо́стол

Сие́ убо и зрим бы́вше. Трепе́щущеи бо и боя́щеся. По е́же прия́ти Ду́ха в среду́ бед скака́ху и к желе́зу и огню́ и звере́м и пучи́не. И ко вся́кому совлача́хуся томле́нию и некни́жнии неве́жи с толи́кым бесе́доваху дерзнове́нием. Я́ко ужаса́ти слы́шащых от бе́рных (бре́ных?) бо, желе́зных их сотвори́л есть дух и летя́щых сотвори́. И к ничесо́муже челове́ческых низпа́дати оста́ви, такова́ бо благода́ть она́ а́ще и ле́ность обря́щет, разруша́ет, а́ще и вожделе́ние лука́во, изнуря́ет, а́ще и боя́знь изгоня́ет и не оставля́ет про́чее челове́ку бы́ти. Причасти́вшагося ему́. Но я́коже в са́мое пресели́вшеся не́бо. Вся та́мо мечта́ти устроя́ет. Сего́ ра́ди ни еди́н же что от име́ний свои́х глаго́лаше свое́ бы́ти. Но претерпева́ху в моли́твах в ра́дости и простоте́ се́рдца. Сего́ бо или́ па́че тре́ет? Дух Святы́й плод бо Ду́ха. Ра́дость мир ве́ра кро́тость и у́бо и тужа́т мно́жицею духо́внии рече́. Но печа́ль ра́дости есть сладча́йше. Поне́же и Ка́ин опеча́лися но мирско́ю печа́лию; И Па́вел опеча́лися, но су́щею по Бо́зе. Все бо е́же а́ще бу́дет духо́вно приобре́тение и́мать велича́йше. Я́коже и мирско́е все тщету́ после́днюю. Да привлача́ем у́бо непребори́мую Ду́ха по́мощь за́поведи соблюда́юще и ниже́ а́нгел бу́дем ме́нши. Ниже́ бо они́ поне́же безтеле́сни суть. Такови́ суть а́ще бо сие́ бы́ло бы ни еди́н же у́бо безтеле́сных был бы зол. Но произволе́ние всех вина́. Сего́ ра́ди и в безтеле́сных челове́к го́рши безслове́сных обрето́шася и во име́ющих телеса́ безтеле́сных лу́чши вси у́бо пра́веднии на земли́ живу́щеи телеса́ име́юще испра́виша я́же испра́виша. Я́ко бо прише́лцы су́щеи стра́нни зе́млю насели́шася. Не бо́ же я́ко гра́жане не у́бо и ты глаго́ли пло́тию обложе́н есмь не могу́ стерпе́ти су́щых о доброде́тели пото́в. Да не оклеве́щеши соде́теля. А́ще бо е́же плоть носи́ти не́мощну твори́т доброде́тельне на́шя укори́зна, а я́коже не твори́т не́мощну. Показа́ святы́х лик. Па́влу у́бо не возбрани́ пло́ти естество́ бы́ти такову́. Яко́в бысть ниже́ Петру́ прия́ти ключа́ небе́сныя и Ено́хже плоть носи́в преложи́ся, и не обрета́ется си́це и Илия́ восхи́щен бысть с пло́тию. И Авра́ам со Исаа́ком и вну́ком плоть име́юще облиста́ша. И Ио́сиф с се́ю бра́ся, к блу́дной о́ной жене́. И что глаго́лю плоть. А́ще бо и вери́гу пло́ти обложи́ши, ничи́мже вреди́т. А́ще бо и аз свя́зан есмь рече́ Па́вел. Но сло́во Бо́жие не вя́жется. И что глаго́лю ю́зу и вери́гу приложи́ и у́зище и ключа́. И ниже́ си́це возбране́ния быва́ют сия́ доброде́тели. И си́це у́бо научи́л есть Па́вел. Ю́за бо души́ не желе́зо. Но боя́знь и име́нии вожделе́ние. И безчи́сленыя стра́сти. Сия́ связу́ют а́ще и разруше́но бу́дет те́ло. Но от телеси́ сия́ ража́ются рече́. Изве́т сия́ непщева́ние ло́жно. Аще бо от телеси ражалися бы. Вси убо сие страда́ли бы я́коже бо труда́ и сна. И е́же алка́ти и жада́ти немо́щно избежа́ти. Поне́же у́бо естества́ суть, си́це и сия́. А́ще такова́ была́ бы. Ни еди́ного же оста́вила бы́шя вне их томи́тельства бы́ти. А́ще же мно́жайши избега́ют. Благоявле́нно я́ко леня́щияся суть души́ таковы́и недоста́тки. Сию́ у́бо да отсеце́м и да не оклевету́ем те́ла, но да покори́м е́ души́. Да благопослу́шно име́юще, ве́чных получи́м благы́х. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом ны́не и при́сно и во ве́кы веко́в, Ами́нь.