Ева́нгелие: Воста́ните и́дем отсю́ду, аз есмь виногра́д и́стинный и вы ло́зие. А оте́ць мой де́латель есть.

Страшли́ву и нему́жествену ду́шу, неуче́ние твори́т. Я́коже у́бо вели́ку и высо́ку, небе́сных догма́т наказа́ние. Ни еди́наго же бо наслажа́ющися прилежа́ния, боя́знена не́кая есть не по естеству́ но по произволе́нию. Егда́ бо уви́жу му́жествена у́бо не́когда. Ны́не же боязни́ва. Не ктому́ естества́ глаго́лю бы́ти страсть, есте́ственая бо непрело́жна па́кы егда́ уви́жу ны́не боязни́вых внеза́пу сме́лых бы́вшых то́же па́кы усужа́ю произволе́нию все возложи́в поне́же и ученицы́. Зело́ бе́шя боязни́ви пре́же да́же научи́тися я́же подоба́ше и духо́внаго сподо́битися да́ра. По́слеже у́бо лвов де́рзостнейши бы́ша. И Петр отрокови́ци не претерпе́в преще́ние. Низгла́в повеша́шеся и бие́н быва́ше и тма́ми бе́дствуя не молча́ше но я́коже во сне страда́ша, я́же пострада́ си́це дерза́ше. Но не пре́же креста́. Сего́ ра́ди и Христо́с глаго́лаше воста́ните да и́дем отсю́ду. Что ра́ди рцы ми, не ве́дяше ли вре́мени в не́же хотя́ше надста́ти. Но боя́шеся да не та́мо прише́д удержи́т их Иу́да. И пре́же не́же испо́лнити изря́дное уче́ние. Надста́нут наве́тующии. Не бу́ди дале́че сия́ досто́иньства его́ а́ще у́бо не боя́лбыся. Что воздвиза́ет их и по е́же соверши́ти тогда́ в вертогра́д приво́дит зна́емый Иу́де. А́ще же и прише́л бы Иу́да. Не можа́ше ли их ослепи́ти зре́ния е́же и предстоя́щим сотвори́л есть. Что у́бо ра́ди отступа́ет ма́ло отдохну́ти дае́т ученико́м. И́бо ле́по бе им а́кы во объявле́ннем ме́сте су́щим, трепета́ти и боя́тися и от вре́мени и от ме́ста. И́бо нощь глубоча́йша. И бе ниже́ вня́ти глаго́лемым но обраща́тися и мечта́ти напа́дающых. И́но и па́че е́же когда́ и сло́во учи́телево ча́яти творя́ше лю́тая. Еще́ бо ма́ло рече́ и несмь с ва́ми. И гряде́т ми́ра сего́ князь. Поне́же у́бо сия́ и такова́я слы́шаще смуща́хуся я́ко а́бие наипа́че е́млеми приво́дит на ме́сто их по́сле да непщу́юще во утверже́нии бы́ти со осла́бою про́чее слы́шат. И́бо имя́ху вели́кых слы́шати догма́т. Сего́ ра́ди рече́ воста́ните и́дем отсю́ду. Та́же и наве́д рече́, аз есмь виногра́д вы же ло́зие. Что бо хо́щет при́тчею гада́тельствовати. Я́ко не внима́ющему глаго́лемым жи́ти несть и я́ко бу́дущая чудеса́ от Христо́вы быва́ют си́лы оте́ць мой де́латель есть что у́бо. Де́йства ли тре́бует сын; Не бу́ди, указа́ние бо сие́ есть не сие́ явля́ет. Зри у́бо с ели́кым опасе́нием начина́ет при́тчу. Не бо ко́реню наслажа́тися прилежа́ния де́лателева. Но к ло́зиям рече́ ко́р(е?)нже ничто́же ра́ди прия́т есть зде. Но да навы́кнут я́ко кроме́ его́ си́лы. Ничто́же де́латися мо́жет. И я́ко си́це им соединя́тися подоба́ет ве́ре я́коже лозе́ виногра́ду вся́ку лозу́ во мне не нося́щую плода́. Из(ъ?)е́млет ю́ оте́ць зде житие́ гада́тельствует показу́я я́ко кроме́ дел несть бы́ти в нем. И вся́ку нося́щую плод. Очи́стит ю́. Си́речь, мно́гаго прилежа́ния наслажа́тися твори́т, и́бо и ко́рень тре́бует прилежа́ния, пре́же лозь окопова́ем обнажа́ем. Но ничто́же зде о сем. Рече́ но все о лоза́х показу́я я́ко сам у́бо себе́ довле́ет. Ученицы́ же мно́гаго тре́буют от де́лателя поможе́ния. А́ще и зело́ доброде́телни бу́дут, сего́ ра́ди рече́ плод нося́щую очища́ет. О́ва бо поне́же безпло́дна есть ниже́ в виногра́де бы́ти мо́жет о́важе поне́же плодоноси́т ража́тельнейшую соде́ловает. Сие́ же и ко ско́рбем их рещи́ся. Тогда́ наво́димых рече́т у́бо кто, е́же бо очи́стит ю́ си́речь обре́жет е́же рожа́тельнейшу твори́т ло́зу. Отню́ду же показу́ется я́ко искуше́ния наипа́че их крепча́йшых соде́ловают та́же да не глаго́лют о кото́рых сия́ глаго́лет и па́кы в печа́ль их вложи́т. Рече́ уж вы чи́сти есте́. За сло́во е́же глаго́лах вам. Зри́ши ли ка́ко себе́ вво́дит попече́ние творя́ща о лоза́х, аз вас очи́стих рече́. А́ще и вы́ше показу́ет отца́ сие́ творя́ща, но ничто́же посреди́ отца́ и сы́на подоба́ет же бы́ти про́чее я́же о нас та́же да пока́жет я́ко не их тре́буя служе́ния сия́ сотвори́л есть но да преспева́ют. Наво́дит. Я́коже лоза́ не мо́жет носи́ти о себе́ пло́да си́це ниже́ во мне не пребыва́яй да́же бо от боя́зни не разделя́тся. И ослабе́вшую их ду́шу стра́хом связу́ет и себе́ соприлепля́ет и благи́я простира́ет про́чее наде́жи. Ко́рень бо пребыва́ет а е́же изъима́тися и оставля́тися, лоз есть та́же отобою́ду устреми́в и от благы́х и от печа́лных. Я́же от нас истязу́ет пе́рвая, во мне пребыва́яй и аз в нем. Зри́ши ли и Сы́на не ме́нше соверша́юща отца́. Ко учени́ческому прилежа́нию; Оте́ць бо отребля́ет то́йже в себе́ держи́т. А е́же на ко́рени пребыва́ти сие́ твори́т плодоноси́ти лозу́, не отребля́емая бо. Пребыва́ющих на ко́рени но́сит плод. А́ще и не ели́к подоба́ше. Не пребыва́ющая же. Ниже́ отню́д. Но оба́че и е́же очища́ти показа́ся сыно́вне су́ще. И е́же пребыва́ти на ко́рени. Оте́чьско. И́же и ко́рень роди́вшаго.

Ви́дел ли еси́ ка́ко о́бща вся и е́же отребля́ти. И е́же си́лы от ко́рени наслажа́тися. Вели́ка у́бо тщета́. И е́же ничто́же мощи́ твори́ти оба́че не до сего́ поставля́ет му́ку, но да́лейше произво́дит сло́во. Изве́рже бо ся рече́ вне не ктому́ де́лательныя наслажа́ющися ру́кы и иссыха́ет си́речь а́ще что имя́ше ко́рени отлага́ет а́ще не́кую благода́ть. Обнажа́ется сей и опустева́ет су́щия отту́ду по́мощи и жи́зни?. И что коне́ц; В огнь вмета́ется. Но не тако́в пребыва́яй в нем. Та́же показу́ет и что есть е́же пребыва́ти и рече́, а́ще глаго́лы моя́ в вас пребу́дут. Зри́ши ли я́ко и пре́же сего́ в ле́поту глаго́лах. Я́ко е́же де́лы показа́ние и́щет; Рек бо я́ко е́же а́ще про́сите сотворю́. Наведе́. А́ще лю́бите мя за́поведи моя́ соблюди́те. И зде а́ще пребу́дете во мне и дела́ моя́ в вас. Е́же а́ще хо́щете проси́те и бу́дет вам сия́ же глаго́лаше показу́я, я́ко наве́тующии у́бо ему́ сгоря́? си́и же плод принесу́т. Страх у́бо и́же от них во о́нех преложи́в и показа́в я́ко си́и не побеже́нни бу́дут, рече́, в сем просла́вися оте́ць мой да вы мне бу́дете ученицы́. И плод мног но́сите отсю́ду сло́во достове́рно твори́т а́ще бо во сла́ву о́тчу, восхо́дит е́же плодоноси́ти. Не неради́т о сла́ве свое́й. И бу́дете мне ученицы́. Зри́ши ли ка́ко и́же плод нося́ он есть учени́к. Что же есть в сем просла́вися оте́ць. Си́речь ра́дуется егда́ во мне пребыва́ете. Егда́ плод но́сите. Я́коже возлюби́л мя оте́ць, и аз возлюби́х вас. Зде про́чее челове́чнейше бесе́дует е́же бо к челове́ком рече́но. Свою́ и́мать кре́пость и́же бо и умре́ти изволя́я и рабо́в су́щых. И враго́в и ра́тников. Толи́кия сподо́бив че́сти. И на небеса́ возве́д. Ка́ко у́бо показа́ ме́ру любви́. А́ще у́бо люблю́ вас, дерза́йте. А́ще о́тча есть сла́ва е́же плодоноси́ти. Ничто́же непщу́йте лю́то. Та́же да не лени́вых сотвори́т. Зри ка́ко связу́ет па́кы, пребу́дите любви́ мое́й сему́ бо вы госпо́дие. Ка́ко же ли сие́ бу́дет; А́ще за́поведи моя́ соблюде́те рече́. Я́коже аз отца́ моего́ за́поведи соблюдо́х. Па́кы челове́ческы сло́во произво́дит не бо́ зако́но поло́жник под за́поведми хотя́ше лежа́ти;

Зри́ши ли я́ко е́же при́сно глаго́лю сие́ и зде показу́ется, не́мощи ра́ди слы́шащых; К непщева́нию бо их мно́гая глаго́лют, И все́ми показу́ет во утверже́нии су́щых. И враго́в погыба́ющых и я́ко все е́же име́ют от сы́на име́ют и я́ко никто́же их преодоле́ет когда́;

Смотри́ же его́ госпо́дьственейше им бесе́дующа, не рече́ бо пребу́дите в любви́ о́тчей но в мое́й. Та́же да не глаго́лют егда́ всем нас возра́товал еси́; Тогда́ нас оставля́еши и отхо́диши. Показу́ет я́ко не оставля́ет. Но си́це им прилепля́ется а́ще хотя́т, я́коже лоза́ в виногра́де и па́кы. Да не наде́явшеся бы́ти до́брое, а́ще и разленя́тся. Та́же да не в себе́ обьста́вит вещь и па́сти устро́ит, наипа́че рече́ в сем просла́вися оте́ць. Везде́ бо свою́ и о́тчу. Показу́ет любо́вь в них. Не у́бо я́же иуде́и сла́ва. Но сия́ я́же хотя́ху приима́ти. Та́же да не глаго́лют испадо́хом оте́честв оста́хом. На́зи и пу́сти всех бы́хом на мя рече́ зри́те. Люби́м есмь от отца́ но оба́че стражду́ сия́ предлежа́щая. Не у́бо ниже́ вас за е́же не люби́ти оставля́ю ны́не. А́ще бо аз убива́ем быва́ю. И не творю́ сие́ зна́мение е́же не люби́тися от отца́. Отню́ду же ниже́ вам смуща́тися подоба́ет а́ще бо в любви́ пребу́дете мое́й, ничи́м же вас сия́ лю́тая повредя́т. В сло́во любви́.

Нравоуче́ние 76. О су́щей во Христа́ любви́ и о лихоима́нии и я́ко лу́чше убожа́ти не́жели богате́ти.

Поне́же у́бо ве́лия и непобеди́ма любо́вь. И несть глаго́л прост, да пока́жем де́лы сию́. Той враго́в су́щых примири́ мы дру́зи бы́вше, да пребыва́ем той нача́т. Мы поне́ да после́дуем, той не в свое́ приобре́тение лю́бит. Не тре́бующь бо есть, мы поне́ в поле́зное нам. Той враго́в су́щых возлюби́л есть, мы поне́ дру́га су́ща да возлюби́м. Я́ко ны́не у́бо спроти́вная твори́м на всяк день ху́лится нас ра́ди Бог. Хище́ний ра́ди лихоима́ний ра́ди и не́гли не́кто от вас рече́т, на всяк бо день о лихоима́нии бесе́дует. Да бы и на вся́ку нощь мо́щно сие́ рещи́. Да бы и на то́ржищи после́дующему и на трапе́зе. Дабы́ и жена́м и любе́зным и де́тем и рабо́м и земледе́лцем и сосед́ом и само́му помо́сту и стена́м мо́щно бы́ло сего́ при́сно отрыга́ти гла́са. Да поне́ ма́ло осла́били бы́хом си́це. Вселе́нную пости́же всю сий неду́г и всех держи́т душа́. И мно́го мамо́ны томи́тельство от Христа́ искупи́хомся. И зла́ту рабо́таем ина́го влады́чьство пропове́дуем. И ино́му покаря́емся и е́же а́ще повели́т, со усе́рдием твори́м и повину́емся и ро́да и дру́жбы и естества́ и зако́нов, и всех не ве́мы о́ного ра́ди никто́же взира́ет на не́бо. Никто́же помышля́ет бу́дущая но бу́дет вре́мя. Егда́ ниже́ слове́с сих бу́дет вре́мя. В а́де бо рече́, кто испове́сться тебе́ жела́тельно зла́то и мно́го подае́т наслаже́ние нам. И че́стных бы́ти твори́т. Но не си́це я́коже не бо́ бога́таго бо и отвраща́ются мно́зи и ненави́дят. Живу́щаго же в доброде́тели. Стыдя́т и почита́ют. Но посмеява́ется убо́гый, а́ще и доброде́телен бу́дет рече́. Но не пред челове́цы, но пред безслове́сными. Те́мже ниже́ обраща́тися подоба́ет. Ниже́ бо а́ще ржа́ли бы у́бо ослы́. Гра́ели?же бы прему́дрии же вси похвали́ли бы; Оста́вльше сие́ позо́рище к безслове́сных ли вопие́ниям возре́ли бы́хом и́бо подо́бнии осло́в го́рши настоя́щым чудя́щеися, та́же а́ще у́бо царь земны́й чуди́тся, ни еди́но же мно́гых твори́ши сло́во. А́ще и вси подсмеява́ют. А́ще же а́нгельскый влады́ка похваля́ет. Осло́в ли и комаро́в похвале́ния взыску́еши. Сие́ бо си́и к Бо́гу па́че же ниже́ сие́ но а́ще что сих худе́йши. Доко́ле в ти́не обраща́емся. Доко́ле ласка́телей и чре́во обьядли́вых посажа́ем нам позара́таев они́ зе́рньщыков мо́гут искуша́ти до́бре пья́ньствующих. Чре́ву живу́щых. Доброде́тели же и зло́бы ниже́ во сне мечта́ти мо́гут. Та́же а́ще убо кто тебе укорит яко потоков водотечных не веси изводи́ти ничто́же непщу́еши лю́то. Но и посмее́шися не иску́ство сие́ предложи́вшему. Доброде́тель же ли навыка́ти хотя́. И́же ниже́ сию́ ве́дещых искуша́телеи посажа́еши;

Сего́ ра́ди никогда́ же достиза́ет в хы́трость сию́. Не бо́ иску́сным, но неуче́нным попуща́ем на́шя ве́щы они́же не по сло́ву хи́трости но по своему́ неуче́нию искуша́ют. Те́мже молю́. Да пренебреже́м мно́гых. Па́чеже похва́л. Да жела́ем неиме́ний. Ни бога́тства. Ниже́ зло не́что да непщу́ем нищету́. И́бо мудрова́ния и терпе́ния. И вся́кого любому́дрия учи́тельница нам нищета́. Поне́же и Ла́зарь нищете́ соживя́ше и венча́ся. И Ия́ков хле́ба еди́наго жела́ше получи́ти. И Ио́сиф в после́дней нищете́ быва́ше. И не раб то́кмо бе, но и ю́зник и сего́ ра́ди па́че ему́ чуди́мся. Не си́це похваля́ем егда́ пшени́цу разделя́ше я́ко егда́ в юзи́лищи живя́ше. Не егда́ диади́мою облага́шеся, но егда́ вери́гою. Не егда́ на престо́ле седя́ше но егда́ наве́товашеся. И продая́шеся сия́ у́бо вся помышля́юще. И су́щая от подвиго́в сих да плете́м венца́ не бога́тьству и пи́щи и че́стем и могу́тьствам но нищете́ и вери́зе и ю́зам. И терпе́нию е́же о доброде́тели чуди́мся. Коне́ц бо о́нех молв испо́лнен и смуще́ния. И настоя́щему совоку́плен есть житию́ си́хже плод. Не бо́ и я́же на небесе́х блага́я. Я́же ни о́ко ви́де ниже́ у́хо слы́ша. И́хже бу́ди всем нам получи́ти. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом ны́не и при́сно и во ве́кы веко́в. Ами́нь.