Ева́нгелие: Сия́ глаго́лах вам да ра́дость моя́ в вас бу́дет. И ра́дость ва́шя испо́лнится, сия́ есть за́поведь моя́, да люби́те друг дру́га, я́коже возлюби́х вас.

Вся блага́я тогда́ име́ют мзду егда́ в коне́ць прии́дут подоба́ющии. А́ще же отсече́тся посреде́, истопле́ние быва́ет и я́коже кора́бль тма́ми настав?ля́емь, а́ще не предвари́т к приста́нищам дости́гнути. Но среде́ пучи́ны погрузи́тся ничи́мже наслади́ся мно́гаго пла́вания но и бо́лшую соде́ла беду́. Ели́ко и вя́щше претерпе́ трудо́в. Си́це и я́же пре́же конца́ трудо́в возлежа́щия души́ и посреди́ подвиго́в раслабля́емыя. Сего́ ра́ди и Па́вел сла́ву и честь и мир глаго́лаше сре́стися. По терпе́нию дел благы́х подаю́щим. Е́же у́бо и о ученице́х Христо́с устрая́ет ны́не. Похвали́ их и ра́довахуся о нем та́же страсть привпа́дши и се́тованныя глаго́лы, отсеца́ти хотя́ху сла́дость. По е́же бесе́довати дово́лная и уте́шити их, рече́ сия́ глаго́лах вам, да ра́дость моя́ в вас пребу́дет. И ра́дость ва́шя испо́лнится. Си́речь да не отдели́теся от мене. Да не пресеце́те тече́ние. Возра́довастеся о мне и зело́ возра́довастеся но впаде́ печа́ль сию́ у́бо изъима́ю. Да к концу́ прии́дет ра́дость. Показу́ет я́ко не печа́ли досто́йна настоя́щая но сла́дости;

Ви́дех вас соблазни́вшихся, (непре?) небрего́х. Не рех что ра́ди не пребыва́ют до́блествени. Но глаго́лах вам утеше́ние нося́щая си́це хощу́ вас вы́ну о той же любви́ блюсти́. Слы́шасте о ца́рствии возра́довастеся, да́же у́бо испо́лнится ра́дость ва́шя, сия́ рех вам. Сия́ же есть за́поведь да люби́те друг дру́га, я́коже аз возлюби́х вас;

Зри́ши ли Бо́жию любо́вь сплете́нну на́шей. И я́коже плени́цу не́кую совоку́пленну сего́ ра́ди овогда́ у́бо две рече́ за́поведи. Овогда́ же еди́ну. Несть бо пе́рвыя прие́мшему, не другу́ю име́ти. Овогда́ бо рече́ всем зако́н и проро́цы вися́т. Овогда́ же ели́ко хо́щете да ти творя́т вам челове́цы и вы твори́те им. Сей бо есть зако́н и проро́цы. И соверше́ние зако́ну любо́вь. Е́же и зде глаго́лет. А́ще бо е́же пребы́ти от любви́ быва́ет. Любо́вь же от соблюде́ния за́поведе. За́поведь же есть да лю́бим друг дру́га е́же пребы́ти в Бо́зе, от я́же ко друг дру́гу любви́ быва́ет. И не про́сте любо́вь рече. Но о́браз явля́ет, я́ко аз возлюби́х вас па́кы показу́ет я́ко не́нависти есть сие́ отхоже́ние, но любви́, я́коже наипа́че подоба́ше чуди́тися о сем. О вас бо ду́шу полага́ю. Но нигде́же си́це рече́ сие́. Но вы́ше у́бо изря́днаго подпису́я па́стыря. Зде же, внегда́ нака́зовати их и показа́ти любви́ вели́чьство и себе́ кто есть что же ра́ди любо́вь везде́ взе́млет зане́ сие́ ученико́в сие́ содержа́щее доброде́тель. Сего́ ра́ди и Па́вел толи́ка о ней рече́, а́кы учени́к сый при́сный Христо́в, и и́скус ея́ прие́м. Вы дру́зи мои́ есте́. Не ктому́ вас глаго́лю рабо́в раб бо не весть что твори́т госпо́дь его́. Вы дру́зи мои́ есте́. Вся бо ели́ка слы́шах от отца́ моего́ сказа́х вам ка́ко у́бо глаго́лет. Мно́га име́ю глаго́лати вам, но не мо́жете носи́ти ны́не. Ничто́же и́но тем е́же вся сострая́ет и е́же слы́шати. Ра́зве я́ко ничто́же чу́же веща́ет. Но то́кмо я́же оте́ческа поне́же сие́ наипа́че ви́дится дру́жбы бы́ти е́же неизрече́нная глаго́лати и сего́ сподо́бистеся обще́ния сия́ же егда́ рече́т. Ели́ка слы́шати им подоба́ше глаго́лет та́же и и́но зна́мение не ху́до дру́жбы полага́ет, ко́е у́бо сие́, не вы мене́ избра́сте рече́, но аз избра́х вас. Си́речь аз к дру́жбе ва́шей притеко́х, и ниже́ зде ста. Но положи́х рече́ вас, е́же есть насади́х да вы и́дете еще́ подо́бием виногра́да де́йствует е́же есть да простира́етеся и плодоноси́те. И плод ваш пребу́дет. А́щеже плод пребу́дет, мно́га па́че вы. Не возлюби́х бо то́кмо вас рече́, но и велича́йшими облагода́тельствоваху всю́ду вселе́нныя ва́шя ло́зия.

Зри́ши ли ели́кими показу́ет любо́вь; Тем е́же неизрече́нная рещи́ тем е́же пе́рвому притещи́ ко дру́жбе. Тем е́же вели́кая им дарова́ти блага́я тем е́же пострада́ти о них. Я́коже пострада́ тогда́. От сего́же показу́ет, я́ко и пребу́дет вы́ну с ни́ми хотя́щими дая́ти плод. Ну́жа бо я́же от него́ помощи́ наслажа́ющимся, си́це и плодоноси́ти, да е́же а́ще про́сите у отца́ во и́мя мое́, дасть вам. И́бо проси́мому есть, е́же сотвори́ти. А́ще же оте́ць про́сится. Ка́ко сын твори́т. Да навы́кнеши я́ко не ме́нши сын. Сия́ глаго́лах вам да люби́те друг дру́га. Си́речь, не поноша́я сия́ глаго́лю. Я́ко ду́шу мою́ полага́ю. Я́ко пе́рвый вам притеко́х но в дру́жбу вас возводя́. Та́же поне́же у́бо е́же гони́мым бы́ти от мно́гых и поноша́тися лю́то бе и неисце́лно. И дово́лно и высо́кую смири́ти мысль. Сего́ ра́ди безчи́сленна предре́к. Тогда́ в сие́ низведе́ Христо́с, угла́див бо их ду́шу, си́це на сия́ прихо́дит и сия́ от премно́жества. Показу́я о них су́ща я́коже и ина́я показа́. Я́коже бо рече́ я́ко не то́кмо не тужи́ти, но и ра́доватися подоба́ет. Я́ко отхожу́ рече́ ко отцу́, не бо оставля́я их, но и зело́ любя́ сие́ твори́т. Си́це и зде показу́ет я́ко ра́доватися а не тужи́ти подоба́ет. И зри ка́ко сие́ состроя́ет. Не рече́ бо вем ско́рбну су́щу вещь. Но мене́ ра́ди терпи́те поне́же у́бо и за мя стра́ждете но не у́ сей изве́т дово́лен бе уте́шити. Те́мже сего́ оста́вль ина́го прилага́ет. Ко́его у́бо сего́ я́ко пре́жния доброде́тели сие́ зна́мение и сопроти́вное тужи́ти подоба́ше. Не я́ко ненави́дитеся ны́не. Но а́ще хо́щете люби́тися. Сие́ бо гада́тельствует от е́же глаго́лати. А́ще от ми́ра бы́сте бы́ли мир у́бо свое́ люби́л бы я́коже а́ще лю́битеся я́вьствено я́ко зло́бы изно́сите указа́ние. Та́же поне́же сие́ са́мое проре́к не соде́ла. Истязу́ет па́кы сло́вом. Несть раб бо́ле го́спода своего́. А́ще мене́ изгна́ша и вас изжену́т. Показа́ ревни́телей их по сему́ наипа́че бы́вших. Доне́лиже бо бе во пло́ти Христо́с. Ко о́ному рать имя́ху. Егда́ же преста́вися, к ним па́ки прии́де брань. Та́же поне́же у́бо ма́ли су́ще мо́лвьствоваху. Наро́да толи́ка хотя́ще рать приима́ти. Воставля́ет их ду́шу глаго́ля. Я́ко сие́ наипа́че ра́дости де́ло есть е́же ненави́детися от них та́ко бо мне приобщи́тися страсте́й. Не у́бо вам мо́лвьствовати подоба́ет. Не бо вы мене́ лу́чши. Я́коже у́бо и предвари́в рех, несть раб бо́ле господи́на своего́. Та́же и тре́тиим утеше́нием я́ко и оте́ць досажа́ется с ни́ми. Сия́ бо вси сотворя́т рече́ за и́мя мое́, я́ко не ве́дят посла́вшаго мя. Си́речь и о́ному досажа́ют к сим. Ми́лости лиша́я и положи́в и и́но утеше́ние рече́. А́ще не прише́л бых и глаго́лал им греха́ не бы́ша име́ли. Показу́я я́ко непра́ведне и я́же в него́ и я́же в о́нех соде́лают. Что у́бо на толи́ка нас приве́л еси́ зла́я не проуви́дел ли еси́ бра́ней не́нависть. Сего́ ра́ди па́ки рече́ ненави́дяй мене́ и отца́ моего́ ненави́дит. Нема́лу и отсю́ду им провозглаша́я му́ку. Поне́же бо горе́ и до́лу изве́т творя́ху. Я́ко отца́ ра́ди его́ гоня́ху. И отъе́мля их оправда́ния, сие́ рече́. Не и́мут бо изве́та, е́же от слове́с уче́ние пода́х е́же от дел приложы́х по Моисе́ову зако́ну. И́же такова́я творя́щему и глаго́лющему, покаря́тися всем повеле́. Егда́ и ко благоче́стию во́дит, и чудеса́ подоба́ет велича́йша не про́сте рече́ зна́мения. Но я́же никто́же ин сотвори́л есть и сих они́ сведе́тели. Си́це глаго́люще, никогда́ же си́це яви́ся во Изра́или. И не слы́шано бысть от ве́ка я́ко отве́рзе кто очеса́ сле́пу роже́ну и е́же о Ла́зари таково́. И ина́я вся такова́. И чудоде́йствия о́браз. Но́ва и преди́вна вся. Что у́бо ра́ди рече́ и тебе́ и нас го́нят зане́ от ми́ра несть. А́ще от ми́ра бы́сте бы́ли. Мир у́бо свое́ люби́л бы. Предвоспомина́ет глаго́л им. И́хже ко бра́тиям рече́ свои́м. Но та́мо у́бо обы́чнейше да не ужаси́т зде же сопроти́вное е́же все откры́ и отку́ду сие́ я́вьствено, я́ко сего́ ра́ди ненави́димся, от быва́емых ко мне. Чему́ бо рцы ми глаго́ланных или́ соде́янных зазре́ти име́юще не прия́ша мя. Та́же поне́же у́бо вещь ужа́сна бе нам, рече́ и вину́ си́речь зло́бу их и ниже́ зде стае́т, но и проро́ка наво́дит. Показу́я его́ изнача́ла провозглаша́юща и глаго́люща, я́ко возненави́деша мя ту́не. Е́же и Па́вел твори́т мно́гым бо чудя́щымся ка́ко иуде́и не ве́ровашя. Проро́ков приво́дит предглаго́лющых испе́рва и вину́ явля́ющых, я́ко зло́ба их и го́рдость неве́рия бе. Что у́бо а́ще сло́во твое́ не соблюдо́ша. И сего́ ра́ди ниже́ на́ше соблюду́т. А́ще тебе́ изгна́ша сего́ ра́ди и нас изжену́т, а́ще зна́мения ви́деша якова́ никто́же сотвори́. А́ще глаго́л слы́шаша яковы́х ни еди́н же, и ничто́же по́лзовашася. А́ще отца́ твоего́ ненави́дят и тебе́ со оне́м. Что ра́ди нас вложи́л еси́. Ка́ко мы достове́рни про́чее бу́дем. Кто же во́нмет от единоплеме́нных нам. Да́же у́бо не сия́ помышля́юще мо́лвят. Зри яково́ наво́дит утеше́ние. Егда́ прии́дет уте́шитель его́же аз послю́ ду́ха и́стинны. И́же от отца́ исхо́дит, он сведе́тельствовати и́мать о мне. И вы сведе́тельствуете, я́ко искони́ со мно́ю есте́ он достове́рен бу́дет. Дух бо и́стинны. Сего́ ра́ди Ду́ха Свята́го. Но и́стинны его́ нарече́. А е́же ниже́ от отца́ исхо́дит. Вся весть изве́стне, я́коже и сам рече́ о себе́. Я́ко вем отку́ду гряду́ и ка́мо иду́, и та́мо о и́стине бесе́дуя его́же аз послю́. Се несть оте́ць еди́н но и сын есть посыла́яй. И вы же и́мате достове́рное со мно́ю бы́вшеи. И́же не от ины́х слы́шащеи. И апо́столи отсю́ду кре́пко изъявля́ют глаго́люще. Я́же ядо́хом и пи́хом с ним. А я́коже не ко благода́ти рече́ся присведе́тельтсвует дух глаго́лемым. Сия́ глаго́лах вам да не соблазни́теся. Си́речь егда́ уви́дите мно́гых не покаря́ющихся и лю́тая стра́ждущих вас. У́же бо сложи́шася а́ще кто испове́сть Христа́ вне со́нмища бу́дет. Но гряде́т час да всяк уби́вый вас мнит слу́жбу приноси́ти Бо́гу. Та́ко ва́ше вознепщу́ют уби́йство я́ко вещь благоче́стну и Бо́гу уго́дну, та́же утеше́ние наво́дит па́кы я́ко и сия́ сотворя́т, зане́ не ве́дят посла́вшаго мя ниже́ мене́. Довле́ет вам утеше́ние. Е́же мене́ ра́ди и отца́ сия́ страда́ти. Зде воспомина́ет па́ки им блаже́нств и́хже начина́я глаго́лаше. Блаже́ни есте́ егда́ поно́сят вам челове́цы и изжену́т. И реку́т всяк зол глаго́л на вас лжу́ще мене́ ра́ди. Ра́дуйтеся и весели́теся я́ко мзда ва́шя мно́га на небесе́х. Сия́ глаго́лах вам. Да егда́ прии́дет вре́мя помина́йте сих. Я́ко от сих и про́чая ве́рна непщу́йте не бо име́ти бу́дете рещи́. Я́ко ласка́я вас я́же ко благода́ти глаго́лах то́кмо. Но я́ко пре́лести бе́ша глаго́ланная. Не у́бо хотя́ и прельща́ти и сия́ проре́кл бы вам отвраща́ющая сего́ у́бо ра́ди прореко́х. Да не ненача́янна припа́дша вас смутя́т и и́ну же вину́, да не глаго́лете я́ко не предве́дях бу́дущая сия́. Помина́ете у́бо я́ко аз рех вам. И́бо при́сно облага́ху о́браз лука́в гоне́нию их. Я́ко вреди́телей изгоня́юще. Но не смуща́ше ученико́в сие́. Предуслы́шавшых и ве́дящых о ни́хже страда́ху дово́лна бо их вина́ быва́емых воста́вити. Сего́ ра́ди ю́ везде́ обраща́ет глаго́ля. Не позна́ша мене́, и я́ко мене́ ра́ди сотворя́т. И и́мени моего́ ра́ди и отца́ де́ля. И я́ко аз пе́рвый пострада́х. И я́ко не от пра́ведныя вины́ сия́ дерза́ют:

Нравоуче́ние 77. Я́ко подоба́ет благоду́шне я́же за Христа́ терпе́ти страда́ния и злых оша́ятися, и о ми́лостыни.

Сия́ и мы во искуше́ниих да обраща́ем егда́ от лука́вых челове́к постра́жем. Нача́лника на́шего зря́ще. И соверши́теля ве́ры. И я́ко я́же от злых челове́к, и я́ко за доброде́тель. И я́ко его́ ра́ди. А́ще бо сия́ помышля́ем вся, удо́бна бу́дут и легка́ истерпи́ма. А́ще бо от возлю́бленных что стра́жа и красу́ется. Бо́га ра́ди кто а́ще постра́жет что. Ко́е прии́мет чу́вьство лю́тых а́ще бо сам вещь поно́сную крест, сла́ву нарица́ше нас ра́ди мно́го па́че нам си́це устроя́тися подоба́ет. А́ще бо страсте́й си́це возмо́жем пренебрега́ти. Мно́го па́че име́ний и лихоима́ний досто́ит у́бо егда́ что хо́щем страда́ти несла́достно не труды́ то́кмо но и венцы́ помышля́ти. Я́коже бо купцы́ не пучы́ны то́кмо но и приобре́тения счита́ют си́це и нам не́бо. И е́же к Бо́гу дерзнове́ния размышля́ти подоба́ет. А́ще и сла́дко яви́тся е́же лихои́мствовати помы́сли я́ко Христо́с не хо́щет и несла́достно а́бие яви́тся па́кы а́ще ско́рбно бу́дет а́же ни́щим дая́ти. Не да́же до изнуре́ния поста́виши по́мысл. Но а́бие преведи́ мысль на жа́тву от се́твы. И егда́ тя́жко бу́дет е́же пренебрещы́ раче́ния жены́ чу́жия размышля́й и́же от труда́ вене́ць и удо́бне стерпи́ши труд. А́ще челове́чьскый и страх отвраща́ет безме́стных веще́й. Мно́го па́че Христо́во жела́ние же́стока доброде́тель, но да обложи́м лицу́ ея́. Обеща́ния бу́дущых благо́е вели́чество. Доброде́телнии бо и кроме́ сих. Саму́ о себе́ ю́ красну́ зрят и сего́ ра́ди ю́ де́йствуют и за уго́дное Бо́гови. А не о мзде де́лают. И ве́лие непщу́ют е́же целому́дрити. Не за е́же не му́читися но поне́же Бог повеле́. А́ще же кто не́мощнейшь и по́чести? да помышля́ет си́це и о ми́лостыни да твори́м, и да ми́луем единоплеме́нных. Да не у́бо презира́ем от гла́да погыба́ющых. Ка́ко бо не безме́стно. Саме́м у́бо на трапе́зе седе́ти смею́щимся и наслажа́ющимся. Ины́х же у́лицею преходя́щых слы́шащых восклица́ющых ниже́ обраща́тися к рыда́нию, но и стужа́ти си и преле́стника нарица́ти. Что глаго́леши о́ челове́че. Хле́ба ли ра́ди еди́наго кто пре́лесть плете́т. Ей рече́. Те́мже у́бо си́це наипа́че да ми́луется. Сия́ наипа́че ну́жи да свобожа́ется. А́ще же не хо́щеши да́ти. Ниже́ досади́ши, а́ще не хо́щеши разреши́ти истопле́ние да не ре́еши в я́му. Помы́сли бо егда́ прише́дша отри́неши ни́щаго. Кто бу́деши Бо́га моля́ е́юже бо ме́рою ме́рите рече́, возме́рится вам; Помы́сли ка́ко сокруше́н быв он. Отхо́дит до́лу пони́к. Боле́знуя рыда́я, с нището́ю и ю́же от доса́ды я́зву взем. А́ще бо е́же проси́ти кля́тву вы полага́ете, е́же прося́щему не взя́ти и досаже́нну отъити́. Смотри́ коли́ку зи́му соде́ловает. Доко́ле звере́м уподо́бихомся. И естество́ са́мое лихоима́ния ра́ди не зна́ем. Мно́зи стену́т о сих. Но не хощу́ ны́не. Но вы́ну сию́ име́ти ми́лость. Помы́сли ми день он. Егда́ предста́нет суди́лищу Христо́ву. Егда́ помо́лимся поми́ловатися и на среду́ их приве́д Христо́с. Глаго́лет к нам. Я́ко хле́ба ра́ди еди́наго и пу́ла еди́наго. Толи́ку душа́м сим соде́ласте бу́рю. Что рече́м, что же отвеща́ем. Я́ко бо и в среду́ их приведе́т. Услы́ши что рече́. Поели́ку не сотвори́сте еди́ному сих бра́тей мои́х ниже́ мне сотвори́сте. Ниже́ бо они́ про́чее реку́т что к нам. Но и (нъи?) Бог за них нам поноси́ти и́мать. Поне́же и Ла́заря бога́тый ви́де. Но Ла́зарь у́бо ничто́же к нему́ рече́. Авраа́м же е́же о о́ном сло́во творя́ше. Си́це и о ни́щих бу́дет ны́не от нас презира́емых, не бо́ ру́це их протеза́ющых у́зрим во умиле́нне о́бразе. Но во упокое́нии су́щых мы же о́нех восприи́мем о́браз и да бы о́браз то́кмо, а не е́же мно́го люте́йшее томле́ние. Ниже́ бога́тый крупи́ць жела́ше насы́титися та́мо. Но пряжа́шеся и му́чашеся лю́те. И слы́ша я́ко восприя́л еси́ блага́я своя́ в жи́зни свое́й и Ла́зарь та́коже зла́я. Не у́бо ве́лие что бога́тьство да непщу́ем. Сие́ бо напу́тие нам бу́дет му́кы. А́ще не внима́ем, я́коже у́бо а́ще внима́ем и нищета́ прило́г быва́ет и наслаже́ния и упокое́ния нам. И́бо и согреше́ний отлага́ет бре́мена. А́ще благода́рьственне сию́ терпи́м. И мно́гое у Бо́га стяжава́ем дерзнове́ние. Да не у́бо при́сно осла́бу взыску́ем. Да осла́бы наслади́мся та́мо но су́щых о доброде́тели и́мемся трудо́в и изли́шняя да пресеца́ем и ничто́же вя́щше да взыску́ем. Но в тре́бующых име́ния вся да изнуря́ем. Кото́рый бо име́ти бу́дем отве́т. Егда́ той у́бо нам не_?бо обещава́ет. Мы же ниже́ хлеб ему́ подае́м. Егда́ той у́бо тебе́ со́лнце восиява́ет. и вся́ко тва́ри подае́т служе́? ты же ниже́ ри́зу ему́ дае́ши. Ниже́ кро́ву приобща́тися твори́ши. И что глаго́лю со́лнце и тварь те́ло тебе́ предложи́л есть. Кровь же честну́ю даде́ ты же ниже́ ча́шу подае́ши. Но дал еси́ еди́ною. Но несть сие́ ми́лость. До́ндеже бо име́я не довле́ши?, не у́ все соверши́л еси́. Поне́же и деви́цы лампа́ды име́ющия имя́ху еле́й. Но не изоби́лен подоба́ше у́бо а́ще и от себе́ подава́л бы еси́. Ниже́ си́це бы́ти щади́телен. Ны́не же влады́чня дая́ чесо́ де́ля скупи́шися. Реку́ хо́щете ли вину́, сего́ безчелове́чия. От лихоима́ния вво́дят име́ния. И к ми́лостыни суть лени́ви си́и си́це бо навы́кнувый приобрета́ти изнуря́ти не весть. Ка́ко бо а́ще кто приготовле́н в хище́ние. К спроти́вному себе́ устро́ит. Прие́мляй бо я́же у ины́х. Ка́ко возмо́жет своя́ произда́ти друго́му и́бо пес навы́кнув пло́тии вкуша́ти. Стрещи́ не ктому́ мо́жет ста́до. Сего́ ра́ди таковы́х и убива́ют па́стырие. Е́же да не и мы постра́жем. Да удержи́мся таковы́я и́бо и си́и пло́тей вкуша́ют, смерть гла́дом привводя́щеи. Не зри́ши ли ка́ко вся о́бща нам вложи́ Бог; А́ще же в име́нии оста́вил есть убожа́ти и сие́ богатя́щихся де́ля утеше́ния да име́ют ми́лостынею я́же ко о́нем совлача́ти согреше́ния ты же и всем лют и безчелове́чен был еси́ отню́дуже я́вьствено я́ко а́ще и в бо́лшых сию́ прия́л еси́ бы о́бласть. Безчи́слени у́бо соде́лал бы еси́ уби́йства. И све́та и жизнь всю заключи́л бы еси́ е́же да не бу́дет ну́жа о́нех несы́тьство пресещи́. А́ще же боле́знуете сие́ слы́шаще. Мно́го па́че аз сия́ быва́ема зря доко́ле ты бога́т и он убо́г до ве́чера; Да́ле же не ктому́. Си́це бо кро́тко житие́ и вся в после́дних и вся при две́рех ста́ша про́чее, я́ко час мал. Все бы́ти непщу́й ка́я тебе́ тре́ба сокро́вищ испыту́емых и мно́жество раб и иконо́мов. Что ра́ди не безчи́сленных име́еши пропове́дников ми́лостыни. Сокро́вище бо, ниже́ еди́н испуща́ет гла́са, но и безчи́сленных привлача́ет разбо́йников ни́щых же сокро́вища, к само́му восхо́дят Бо́гу. И сла́дко настоя́щее житие́ соде́ловают. И вся разреша́ют прегреше́ния и сла́ву пред Бо́гом, и честь пред челове́кы прино́сят. Что у́бо зави́диши себе́, толи́кых благы́х не о́нем бо но себе́ благотвори́ши бо́лше. О́нех благоде́тельствуя. О́нем бо настоя́щая исправля́еши. Себе́ же бу́дущую сла́ву и дерзнове́ние предложи́ши. Ея́же бу́ди всем нам получи́ти. Благода́тию и человеколю́бием Го́спода на́шего Иису́с Христа́. И́мже и с Ни́мже Отцу́ сла́ва со Святы́м Ду́хом ны́не и при́сно и во ве́кы веко́в. Ами́нь.