Ева́нгелие: Аз дах им сло́во твое́ и мир возненави́де их я́ко не суть от ми́ра. Я́коже несмь аз от ми́ра.

Егда́ доброде́телни бы́вше го́нимся от лука́вых и доброде́тели жела́юще нахухна́емся от о́нех, да не разслабля́емся ниже́ стужа́ем си таково́ бо естество́ вещь име́ет и везде́ не́нависть обы́че ража́ти доброде́тель пред лука́выми. Зави́дяще бо кро́тце жи́ти хотя́щыми и мня́ще уготовля́ти себе́ отве́т, а́ще ины́х сла́ву низложа́т. Ненави́дят пре́же сопроти́вная проходя́щых. И вся де́йствуют о е́же посрами́ти житие́ о́нех. Но да не тужы́м сие́ бо доброде́тели зна́мение. Сего́ ра́ди и Христо́с рече́, а́ще от ми́ра б́ысте бы́ли мир у́бо своя́ люби́л бы. И и́нде па́кы. Го́ре вам егда́ до́бре вам реку́т вси челове́цы сего́ ра́ди и зде рече́. Сло́во твое́ дах им и мир возненави́де их. Па́кы глаго́лет вину́ ея́же ра́ди досто́йни суть, мно́гаго прилежа́ния от отца́ получи́ти. Тебе́ бо ра́ди возненави́дени бы́ша рече́ и словеси́ твоего́. Те́мже пра́ведни вся́кого у́бо бу́дут наслади́тися промышле́ния не молю́ да во́змеши их но да соблюде́ши их от лука́ваго. Па́кы изъявля́ет сло́во. Па́кы ясне́йши соде́ловает. Е́же ничто́же и́но есть показу́ющаго ра́зве я́ко мно́го о них твори́т промышле́ние. Те́мже е́же со опасе́нием твори́ти е́же о них утеше́ние. И у́бо сам глаго́лаше я́ко вся сотвори́ оте́ць ели́ка а́ще попро́сят. Ка́ко у́бо зде сам о них мо́лит. Ничто́же и́но е́же рех. Ра́зве любо́вь показу́я от ми́ра не суть, я́коже аз несмь от ми́ра ка́ко у́бо и́нде рече́, и́хже дал еси́ мне от ми́ра твои́ бе́ша. Та́мо у́бо естество́ глаго́ля, зде же о дея́ниих лука́вых. И до́лго им слага́ет похвале́ние. Пе́рвое я́ко не суть от ми́ра та́же я́ко той их даде́. И я́ко сло́во его́ соблюдо́ша. И я́ко его́ ра́ди ненави́дятся. А́ще же глаго́лет я́коже аз несмь от ми́ра да не смути́шися. Е́же бо я́коже зде, несть непреме́ннаго опасе́ния. Я́коже бо егда́ о себе́ и отце́ глаго́лется. То я́коже мно́га ра́вность сро́дства ра́ди естества́ си́це о нас и о нем глаго́лется, мно́го посре́дство. За е́же и мно́го бы́ти посре́дство и безме́рно обоего́ естества́ а́ще бо греха́ не сотвори́л есть той ниже́ лесть ка́я обре́теся во усте́х его́. Ка́ко (мо) мо́гут у́бо апо́столи сравня́тися ему́. Что у́бо есть е́же рече́. Я́ко от ми́ра не суть, ко ино́му зря́щим ни еди́ноже о́бще что в земли́ им есть. Но небе́снии бы́шя гра́жане и о сих любо́вь свою́ показу́ет. Егда́ ко отцу́ их похваля́ет. И предлага́ет роди́телю рек же соблюди́ их. Не о свобоже́нии без рече́. Но и о е́же в ве́ре пребыва́нии. Те́мже и наведе́. Освяти́ их во и́стине твое́й. Святы́х сотвори́ ду́ха дая́нием. И пра́вых догма́т я́коже егда́ глаго́лет чи́сти есте́ словеси́ ра́ди е́же глаго́лах вам и ны́не то же рече́ накажи́ их научи́ их и́стинне и у́бо сие́ глаго́лет ду́ху твори́ти. Ка́ко у́бо то от отца́ про́сит ны́не. Да навы́кнеши па́кы ра́вно че́стие. Пра́выя бо догма́ты о Бо́зе глаго́лемы, освяща́ют ду́шу. А́ще же глаго́лю рече́ освяща́тися, да не чуди́шися. И я́ко о догма́тех рече́. Наведе́ сло́во твое́ и́стинно есть си́речь ничто́же ло́жно в нем. Вся́ческы сбы́тися подоба́ет всем рече́нным. И я́ко ничто́же обра́зно явля́ет па́кы ниже́ теле́сно я́коже Па́вел рече́ и о це́ркви. Я́ко освяти́ ю́ глаго́лом весть бо и глаго́л Бо́жий очища́ти. Ви́дит же ми ся и и́но явля́юще е́же освяти́ их. Си́речь, во е́же отдели́ их сло́ву и про́поведи и сие́ па́ки от су́щых по сих я́вьствено я́коже мене́ рече́ посла́л еси́ в мир. И аз посла́х их а е́же глаго́лет и Па́вел полага́я в нас сло́во примере́ния о не́мже бо Христо́с дости́же. О сем и си́и вселе́нную постиго́ша а е́же я́коже па́кы зде не уподобле́ния о_нем и апо́столех лежи́т. Ка́ко бо инако бе вме́стно челове́ком посыла́тися обы́чай же ему́ и бу́дущее а́ки бы́вшее глаго́лати. И о_них освяща́ю себе́ да бу́дут освяще́ни во и́стинне чи́сто есть освяща́ю себе́. Приношу́ тебе́ же́ртву же́ртвы же вся свя́ты глаго́лются и вои́стинну свя́та Бо́гови возложе́нная. Поне́же бо дре́внее во о́бразе освяще́ние бе овча́тем. Ны́не же не ктому́ во о́бразе но в само́й и́стинне. Те́мже рече́, да бу́дут освяще́нни во и́стинне твое́й и́бо и их тебе́ возлага́ю ю́ и творю́ приноше́ние. Или́ у́бо за е́же главу́ сие́ быва́ти рече́ или́ за е́же и им жре́тися. Предста́вите бо рече́ у́ды ва́ша же́ртву жи́ву су́щу свя́ту. И вмени́хомся я́ко овца́ заколе́ния. И кроме́ сме́рти же́ртву их соде́ловает и приноше́ние. Я́коже бо же́ртву назна́мена свою́ рек освяща́ю я́вьствено от су́щих по сих. Понеже за них умре. Рече же я́ко о них освяща́ю себе́. Да не кто вознепщу́ет я́ко о апо́столех сие́ то́кмо творя́ше наведе́. Не о сих же молю́ еди́ных, но и о ве́рующых сло́вом их в мя. Отсю́ду па́ки воздви́же их душа́. Показа́в бу́дущых мно́гых ученико́в. Поне́же бо е́же имя́ху изря́дно о́бще сотвори́л есть па́кы их утеша́ет. Явля́я и ины́х спасе́ния быва́ющих их вино́вных. Рек же о спасе́ниих?. И е́же освяти́тися ве́рою и же́ртвою. Глаго́лет про́чее о единомышле́нии. И в сие́ заключа́ет сло́во. От зде нача́в и в то сконча́в и начина́я рече́, за́поведь но́ву даю́ вам и да бу́дут еди́но. Я́коже ты о́тче во мне и аз в тебе́, па́кы е́же я́коже не опа́снаго изравне́ния о них. Ниже́ бо мо́щно им бе толи́ко но я́ко челове́ком мо́щно я́коже егда́ глаго́лет. Бу́дите ще́дри я́ко оте́ць вашь. Что же есть в вас ве́ре су́щей в вас. Поне́же бо ничто́же си́це соблажня́ет всех. Я́коже е́же растерза́тися. Сие состроя́ет я́ко бы́ти еди́н. Что ли у́бо соверши́ сие́ рече́. И зело́ соверши́. Вси бо и́же апо́столы ве́ровавше еди́но суть а́ще и не́цыи от них растерза́шася. Ниже́ бо си́е его́ утаи́ся. Но и сие́ прорече́. И показа́ и сие́ челове́ческыя ле́ности су́ще. Да мир ве́рует. Я́ко ты мя посла́л еси́. Я́коже у́бо ина́я глаго́лаше. О сем позна́ют вси я́ко мне ученицы́ есте́. А́ще любо́вь и́мате межь собо́ю. И ка́ко отсю́ду ве́ровати хотя́ху, я́ко ми́ра еси́ Бог рече́. А́ще у́бо я́же от ни́хже уве́деша соблюду́т. Позна́ют учи́теля от ученико́в слы́шащии. А́ще же ра́туются, не реку́т ми́рнаго Бо́га бы́ти ученико́в не су́щаже мя ми́рна. Не испове́дят посла́тися от тебе́. Зри́ши ли ка́ко до конца́ сие́ состроя́ет е́же ко Отцу́ еди́но разу́мное. И аз сла́ву ю́же дал еси́ мне дах им. Ю́же зна́мений. Ю́же догма́ты. И да единоду́шии? бу́дут. Сия́ бо сла́ва да бу́дут еди́но и зна́мений бо́лши. Я́коже бо и Бо́гу чуди́мся я́ко несть ра́спря. Несть рать в естестве́ о́ном. И вели́ка сия́ сла́ва, си́це и си́и рече́. От зде да бу́дут светлы́ и ка́ко у отца́ про́сит сие́ да́ти им. Сам сие́ глаго́ля дая́ти. А́ще бо о зна́мениих. Или́ о единомышле́нии или́ о ми́ре ему́ сло́во. Явля́ется сам им сия́ пода́в. Отню́дуже я́вьствено бе, я́ко утеше́ния ра́ди их проше́ние быва́ет. Аз в них и ты во мне. Ка́ко даде́ сло́ву, в них быв. И отца́ и́мя с собо́ю я́ко бы содержа́ти. И́ндеже не си́це рече́ но тем отцу́ приходи́ти. Но и себе́ и отца́ у него́ бы́ти, и оби́тель у него́ сотвори́ти. Та́мо у́бо саве́лиан зауща́я уста́. Зде же А́риево мне́ние отъе́мля. Да бу́дут совеше́нни? во еди́н. Да позна́ет мир я́ко ты мя посла́л еси́. Ча́сте сие́ глаго́лет. Показу́я зна́мения па́че мир могу́ща привлача́ти. Я́коже бо разделе́ние разреши́тельно. Си́це согла́сие собира́телно. И возлюби́х их я́коже мене́ возлюби́л еси́ па́кы зде то я́коже а́ки челове́к возлюби́тися возмо́жно и зна́мение любви́. Е́же себе́ за них да́ти. Рек у́бо я́ко бу́дут во утверже́нии. Я́ко не превратя́тся. Я́ко бу́дут свя́ти я́ко мно́зи ве́руют и́ми я́ко мно́гия насладя́тся сла́вы я́ко не той их возлюби́л есть еди́н но и Оте́ць. Глаго́лет про́чее и о су́щих по зде́шнем отше́ствии о по́честех и венце́х соблюда́емых и(м?). О́тче бо рече́ и́хже дал еси́ мне. Хощу́ да иде́же есмь аз и си́и бу́дут. Е́же у́бо иска́ху при́сно глаго́лаше, ка́мо и́деши что глаго́леши. Сие́ проше́нием ли прие́млеши и не у́ име́еши. Ка́ко у́бо им глаго́лаше ся́дете на двуна́десят престо́лех. Ка́ко у́бо обеща́ бо́лша и вя́щша. Зри́ши ли ко вся сосхоже́ния ра́ди глаго́лются поне́же ка́ко глаго́лаше. После́дуеши же по́сле. Но о мно́жайшем извеще́нии. И показа́нии любви́ сия́ рече́, да ви́дят сла́ву мою́. Ю́же дал еси́ мне па́кы сие́ е́же ко отцу́ единомы́слити зна́мение высоча́йше у́бо пре́же них. Пре́же сложе́ния бо ми́ра рече́. Име́юще же не́кое и сие́ схоже́ние. дал бо ми еси́ глаго́лет. А́ще же не сие́ есть, сла́дце у́бо вопроси́л бых спроти́в глаго́лющых. Дая́й подлежа́щему не́коему дае́т. Еда́ у́бо пре́же его́ роди́в, по́сле сла́ву даде́. Пе́рвее оста́вль бы́ти безсла́вна. Ка́ко у́бо име́ет сло́во. Зри́ши ли я́ко е́же даде́, роди́л есть что же ра́ди не рече́ да причастя́тся сла́вы но да зрят сла́ву. Зде гада́тельствует я́ко вся́ко упокое́ние сие́ есть. Е́же зре́ти Сы́на Бо́жия. Сие́ у́бо и прославля́тися твори́т е́же и Па́вел рече́, открове́нным лице́м. Сла́ву Госпо́дню взира́юще. Я́коже бо к луча́м зря́щи и возду́ха наслажа́ющеся тонча́йшаго. От зре́ния име́ют наслаж́ение. Си́це и тогда́ и мно́го вя́щше сие́ нам соде́ловает сла́дость. Вку́пеже и показу́ет я́ко не сие́ есть зри́мое. Но гро́зно не́кое существо́, о́тче пра́ведне. И мир тебе́ не позна́;

Что хо́щет сие́, ко́е име́ет после́дование. Показу́ет зде ни еди́наго ве́дяща Бо́га. Но ра́зве еди́наго позна́вшых Сы́на. А е́же глаго́лет таково́ есть восхоте́х всех сие́ бы́ти, но не позна́ша тя. А́ще и ничто́же име́юще порица́ти. Сие́ бо есть о́тче пра́ведне зде ми ви́дится и стужа́я сия́ глаго́лати, я́ко во и́стинну блага́го же и пра́веднаго, не восхоте́ша позна́ти. Поне́же бо иуде́и глаго́лаху Бо́га ве́дети. Его́же не ве́дети. К сему́ отвещава́ет глаго́ля, я́ко возлюби́л еси́ мене́ пре́же сложе́ния ми́ру. Отве́т сложи́в ко осуже́ниям иуде́йскым. И́же бо сла́ву? прие́м. Возлю́блен бы́вый пре́же сложе́ния ми́ру. И́же сведе́телеи хотя́ име́ти их сла́вы о́ноя. Ка́ко сопроти́вен бе Отцу́. Не у́бо сие́ есть е́же ре́шя иуде́и. Я́ко си́и у́бо тя ве́дят, аз же тя не вем. Но спроти́вное. Аз у́бо тебе́ вем, ини́и же тебе́ не позна́ша. И си́и же позна́ша я́ко ты мя посла́л еси́. Зри́ши ли я́ко их гада́тельствует глаго́лющих, не бы́ти ему́ от Бо́га. И к сему́ сло́во изглавля́ет все. И изъяви́х им и́мя твое́ и изъявлю́. И у́бо ду́ха рече́ соверше́нное позна́ние, но я́же о́тча моя́ суть. Да любо́вь е́юже возлюби́л мя еси́ в них пребу́дет. И аз в них. А́ще бо навы́кнут кто ты, тогда́ уве́дят яко не отделе́н аз. Но и от зело́ люби́мых, и при́сный? сын и соку́пленый. Сие́ же увеща́вшеся я́коже подоба́ет. И ю́же в мене́ ве́ру и любо́вь соблюду́т опа́сну я́коже подоба́ет лю́бящим же его́ я́коже подоба́ет аз пребу́ду в них. Зри́ши ли ка́ко в добр коне́ц соверши́л есть в любо́вь всех ма́тере сконча́в сло́во.

Нравоуче́ние 82. Подвиза́ние к пра́вде, и отступле́ние су́щых в житии́ лю́тых.

Да ве́руем у́бо и да лю́бим Бо́га, Да не и о нас глаго́лется. Бо́га испове́дуют ве́дети. Де́лы же отме́щутся. И па́ки ве́ры отве́ржеся и есть неве́рнаго го́рши. Егда́ бо он и рабо́м и ю́жикам и чужи́м помага́ет. Ты же ниже́ к ро́ду бли́жним угажа́я. Ка́я бу́дет тебе́ про́чее наде́жа, или отве́т. Бо́гу ху́лиму и досажа́ему тебе́ ра́ди. Смотри́ бо коли́ки даде́ нам при́тчи благотворе́ния Бог. О́вого у́бо я́ко сро́дника. О́вого же я́ко дру́га о́вогоже я́ко сосе́да. О́вогоже я́ко согра́жанина. О́вогоже я́ко челове́ка ми́луй рече́. А́ще же ничто́же тебе́ сих держи́т. Но вся растерза́еши ю́зы услы́ши Па́вла, я́ко неве́рнаго еси́ го́рши. Зане́ он ничто́же о ми́лостыни слы́шав, ниже́ су́щих на небесе́х. Превзы́де тебе́ любому́дрием и человеколю́бием. Ты же и враго́в люби́ти повеле́н быв. Дома́шних я́ко враго́в зри́ши. И име́ний щади́ши па́ки, не́жели теле́с а́ще и та у́бо изнуря́ема. Ничто́ постра́жут лю́то. Сей же презира́ем погыба́ет. Ко́е у́бо неи́стовьство име́ний щаде́ти сро́дников. Отку́ду сие́ жела́ние вскочи́. Отку́ду безчелове́чие и лю́тость. А́ще бо кто я́коже на позо́рища версе́ сед в ми́ра всего́ расмотри́т. Па́чеже а́ще хо́щете еди́н прои́дем град. А́ще кто у́бо на высоте́ сед вся расмотри́ти возмо́гл бы челове́чьская помы́сли ели́ко позазри́т безслове́сие. Ели́кы сле́зы претерпи́т. Ели́кым посмее́тся сме́хом, ели́кою возненави́дит не́навистию, такова́ бо де́йствуем. Я́ко и безу́мия и слез и не́нависти бы́ти досто́йна. О́нсица пита́ет псов. Да ди́вны зве́ри ло́вит. Сам во зве́рьство отпа́дая. Ин пти́ца и волы́ да прено́сит ка́мения. Челове́ков же презира́ет гла́дом тае́мым и зла́то у́бо безчи́слено изнуря́ет. Да ка́менных челове́ков соде́лает. Су́щих же челове́ков ка́менных быва́емых от озлобле́ния презира́ет. Ин ка́мения зла́та собира́я со мно́гым злострада́нием облага́ет сте́ны ни́щых же утро́бы на́гы зря не преклоня́ется и о́ви у́бо риз́ам свои́м, ри́зы па́кы умышля́ют и́нже ниже́ са́мое те́ло на́го обложи́ти име́я на суди́лищых же па́кы, ин ина́го пожре́. Ин во блудни́ца(х?) изнури́. И влако́мых другы́й в шуто́в и плесце́в. Возда́ния ин све́тла вкупле́ния сел и домо́в. Па́кы о́во у́бо ро́сты счита́ет. Ов же ро́сты росто́в. Ов же писа́ния слага́ет мно́гых по́лна уби́йств. И ниже́ е́же от но́щи упокое́ние обье́млет. О су́щых ины́м злых бдя. Дню же бы́вшу о́ви у́бо на приобре́тение непра́ведно. Ови́же на изнуре́ние блу́дно о́виже на татбу́ обличе́ну теку́т. И изли́шних у́бо и возбране́нных. Мно́го тща́ние ну́жных же ни еди́ноже сло́во. Судя́щии же и́мя у́бо судии́ име́ют. Де́ло же разбо́йников иму́же уби́йц. А́ще и ка́зни кто истя́жет. А́ще и заве́ты безчи́сленая па́кы обря́щет и зде зла лсти татбы́ наве́ты. И о сих все упражне́ние. Духо́вных же сло́во ни еди́ноже. Но це́рковь о е́же то́кмо ви́дети стужа́ют вси иско́мое же не сие́ есть, но дел нам тре́ба есть и мы́сли чи́стыя. А́ще же весь день изнури́ши в лихоима́ние. Та́же ма́лы глаго́лы вшед рече́ши. Не то́кмо не сотвори́л еси́ ми́лостива Бо́га, но и раздражи́л еси́ бо́лше. А́ще бо хо́щеши примири́ти твоего ́влады́ку, дела́ покажи́ уве́ждь собра́ние бед. Зри нагы́х. А́лчущых оби́димых. Безчи́сленыя ти человеколюбия пройде пути. Да не убо прельща́ем себе́ ту не и всу́е живу́ще. Ниже́ я́ко н́ыне здра́вьствуем да пренебреже́м. Но помы́сливше яко мно́жицею в неду́г впа́дше. И в после́дне? боле́зни прише́дше, умира́ем стра́хом и ча́янием бу́дущых, да ожидаем пакы в таяже впасти. И то́йже стяжи́м страх. И бу́дем лу́чши. Я́ко я́же у́бо ны́не, безчи́сленых осуже́ний досто́йна, су́щии у́бо в суди́щих, лвом уподо́бишася и псом. А и́же на то́ржищих лиси́цам. Безве́щно е́же живу́щеи житие́, ниже́ си́и в потре́бное безвеще́ствием де́йствуют. Упражне́ние все в позо́рища и я́же оттуду изнуря́юще и запреща́я и у́бо быва́емым ни еди́н же ревну́ющии же. И ухапля́еми я́ко не ра́вная им де́йствуют, мно́зи. Те́мже и сим па́ки му́читися и не творя́щым зла́я. Не то́кмо бо сия́ творя́т. Но и соблаговоля́ют творя́щим. И́бо и я́же усе́рдия их та́кожде растле́шася. Отню́ду же я́вьствено я́ко и изволе́ния есть пострада́ти казнь. Сия́ на всяк день глаго́лю, и глаго́ля не престаю́. А́ще убо не́цыи услы́шат. Приобре́тение. А́щеже ни еди́н же внима́яй бу́дет, тогд́а услы́шите сия́. Егда́ приобре́тение на́ше и укори́те себе́, и мы вины́ чи́сти. Но не бу́ди сей то́кмо нам отве́т име́ти. Но и похвалу́ вас бы́ти на́шу пред суди́щем Христо́вым. Да о́бще благы́х наслади́мся. Благода́тию и человеколю́бием Го́спода на́шего Иису́са Христа́. Ему́же сла́ва и держа́ва, во ве́ки веко́в. Ами́нь.