Ева́нгелие: Отъидо́ша у́бо па́кы к себе́ ученицы́. Мари́я же стоя́ше у гро́ба пла́чущи вне.

Люби́телен не́како же́нскый род, и к ми́лости уклони́телнейшь. Сие́ же рех, да не чуди́шися что же у́бо Мари́я го́рце рыда́ше у гро́бе Петр же, ничто́же таково́ пострада́ ученицы́ бо отъидо́ша к себе́ она́ же стоя́ше слезя́щи и́бо естество́ и е́же о воскресе́нии не у́ я́вьствене ве́дяше сло́во я́коже они́ ри́зы ви́девше и ве́ровавше отъидо́ша к себе́ ужаса́ющеся. И чесо́ ра́ди не а́бие прии́де в Галиле́ю я́коже им обеща́ся пре́же стра́сти. Ожида́ше про́чих не́гли. И еще́ процвету́щем бе́ша ужаснове́нии си́и у́бо отъидо́ша. Она́ же стоя́ше у жела́ния ве́лие бо е́же рех к утеше́ние, и гроб явля́ем. Зри́ши ли у́бо ю́. Я́ко бы вя́щше упоко́итися, и прини́кшу и хотя́щу ме́сто уви́дети иде́же те́ло лежа́ше. Сего́ бо ра́ди и мно́гаго сего́ тща́ния мзду прия́т нема́лу. Е́же бо не ви́деша ученицы́. Сие́ ви́де жена́ пе́рвая седя́щих а́нгелов о́вого у́бо при нога́х о́вого же у главы́ в бе́лых и о́браз све́тлости мно́гыя испо́лнь и ра́дости. Поне́же бо не бе высо́ка жены́ мысль. Я́ко от сударе́й прия́ти упокое́ние быва́ет же не́что вя́щше и а́нгелов зрит седя́щих в све́тле о́бразе. Я́ко бы ей воста́витися пре́же от стра́сти от зде и уте́шитися. Но ничто́же ей о воскресе́нии глаго́лющим, но ти́хо принужа́ет уче́нием сим. Ви́де зре́ния све́тла и па́че, не́жели по обы́чаю. Ви́де о́браз све́тел, слы́ша сострада́тельнаго гла́са. Что бо рече́, Же́но что пла́чеши. Си́ми же все́ми я́ко же две́ри отве́рзене пома́лу во е́же о воскресе́нии сло́во. И о́браз же седа́лища их. В вопроше́ние ю́ приведе́ и́бо изъявля́ху, я́ко ве́дяху бывшее. Сего́ ра́ди ниже́ вку́пе седя́т, но разстоя́щеся от друг дру́га. Поне́же бо не бе ле́по ей дерзну́ти про́сте вопроси́ти. Вопроше́нием. И о́бразом седа́ния. Приводя́ ю́ на бесе́дование. Что у́бо сия́ те́пле вку́пе и любе́зне. Взя́ше Го́спода моего́ и не вем где положи́ша его́. Что глаго́леши не у́ ли ничто́же о воскресе́нии ве́даеши. Но еще́ не и́стинно мечта́еши; Зри́ши ли ка́ко не у́ высо́ко прия́т веле́ние. И сия́ ре́кши, обрати́ся вспять. И ко́е сие́ после́дование ко о́нем бесе́дующу и не у́ ничт́оже слы́шавшу от него́. Обрати́ся вспять. Мне ви́дится сия́ глаго́лющи ей. Внеза́пу яви́вся Христо́с созади́ ея́ ужаси́ти а́нгелов. И о́нем ви́девшим влады́ку. И о́бразом и зре́нием. И подвиже́нием а́бие изъяви́ти я́ко Го́спода ви́деша. И сие́ жену́ обрати́, и вспять возврати́тися сотвори́ о́_?нем у́бо си́це яви́ся. Жене́ же не си́це я́ко бы ю́ не от пе́рваго ужаси́ти зре́ния, но худе́йшим и о́бщым о́бразом. И я́вьствено от ни́хже и вертогра́даря его́ бы́ти непщева́. Си́це же смире́нную, не подоба́ше внеза́пу на высо́кая возводи́ти. Но ти́хо па́ки у́бо ю́ вопраша́ет. Же́но что пла́чеши кого́ и́щеши. Сие́ изъяви́ ви́дети ей е́же хо́щет вопроси́ти. И во отвеща́ние приведе́ сие́ у́бо и жена́ уразуме́вши, не ктому́ и́мя Иису́сово глаго́лет. Но я́ко ве́дящу вопраша́ющему о нем пыта́ет. Рече́. А́ще ты взял еси́ его́ рцы ми, где положи́л еси́ его́ и аз возму́ его́. Па́ки положе́ние и взя́тие. И е́же носи́ти а́ки о ме́ртвом беседующи рече́. А е́же изъявля́ет сие́ есть. А́ще стра́ха ра́ди иуде́йскаго взя́сте его́ отсю́ду рцы́те ми и аз возму́ его́ мно́га прия́знь и любле́ние жены́. Высо́ко же не у́ от нея́. Сего́ ра́ди про́чее предлага́ет ей сие́ не зре́нием, но гла́сом. Я́коже бо иуде́ом овогда́ у́бо познава́шеся овогда́ же не я́вьствен бе и предстоя́ та́ко и веща́я внегда́ хотя́ше тогда́ зна́ема себе́ творя́ше. И́бо егда́ иуде́ом глаго́лаше кого́ и́щете. Ни зре́ние ни глас позна́ша. Доне́леже восхоте́. Е́же у́бо и зде случи́ся и и́мя ея́ то́кмо нарече́ поноша́я и каса́яся, я́ко сия́ о живо́м мечта́ше. Ка́коже обрати́вшися глаго́лет. А́ще у́бо к ней бесе́доваше мне ви́дится ре́кшу ю́ е́же где положи́сте его́ обра́щьшуся ко а́нгелом я́ко вопраша́ющу что ужасо́шася. Та́же Христу́ назва́вшу ю́ обрати́ти к себе́ от о́нех и гла́сом я́вьствена себе́ сотвори́ти. Егда́ бо нарече́ ю́ Мари́я тогда́ его́ позна́ си́це не зре́ния бе. Но гла́са позна́ние. А́ще же глаго́лют, отку́ду я́вьствено я́ко а́нгели ужасо́шася. И сего́ ра́ди обрати́ся жена́ и зде реку́т, отку́ду я́вьствено я́ко косну́ся его́ и припаде́. Но я́коже сие я́вьствено от е́же рещи́ не прикаса́йся мне. Не́цыи ре́ша я́ко благода́ть про́сит духо́вную слы́шавши со ученикы́ глаго́люща. А́ще поиду́ ко отцу́ моему́ и молю́ его́, и дасть вам ина́го уте́шителя и ка́ко не су́щая со ученикы́ сия́ слы́ша и́накоже и дале́че мы́сли сея́ таково́е мечта́ние. Ка́коже про́сит, не у́ ко отцу́ отше́дшу. Что у́бо есть мне ви́дится. Хоте́ти ей еще́ сопребы́ти ему́ я́коже тогда́, и от ра́дости ничто́же помы́слити ве́лие. А́ще и мно́го лу́чши бысть по пло́ти. Сего́ у́бо отводя́ ю́ помышле́ния. И е́же со мно́гою ему́ боя́знию бесе́довати. Ниже́ бо ученико́м явля́ется про́чее отлуча́яся та́коже возво́дит ея́ мысль. Я́ко бы гове́йнейше ему́ внима́ти. Е́же бо рещи́ не приступа́й мне я́коже и пе́рвее. Не бо в тех же ве́щи. Ниже́ та́коже име́ю сопребыва́ти про́чее вам. Же́стоко бе и велича́ние име́юще. А е́же рещи́ не у́ взыдо́х ко отцу́, не ско́рбнейше то́же явля́ющаго бе рек бо я́ко не у́ взыдо́х. Явля́ет я́ко та́мо спеши́т и тщи́тся. Та́може хотя́щаго отъити́. И не ктому́ со челове́кы жи́ти не подоба́ше стою́ же зре́ти мы́слию е́юже и пре́же сего́. И я́ко сие́ есть явля́ет е́же по сих. Рек бо сие́. Рече́ иди́ рцы бра́тии мое́й я́ко иду́ ко отцу́ моему́. И отцу́ ва́шему и Богу моему́ и Бо́гу ва́шему. А́ще и не хотяше вско́ре сие́ твори́ти, но по 40-х днех. Ка́ко у́бо сие́ рече́. Воздви́гнути хотя́ ея́ мысль. и увеща́ти я́ко на небеса́ восхо́дит. А е́же отцу́ моему́ и отцу́ ва́шему. И Бо́гу моему́ и Бо́гу ва́шему смотре́ния есть. Поне́же и е́же взы́ти, пло́ти есть. К ничто́же бо ве́лие мечта́юще и сия́ веща́ет и́нако бо его́ оте́ць и и́нако нашь; Велми́ у́бо, а́ще бо пра́ведных и́нако Бог и ины́х челове́к. Мно́го па́че сыно́вен по пло́ти и нашь. Поне́же бо глаго́ла рцы бра́тиям, да не от сего́ ра́вно не́что мечта́ют. Показу́ет премене́ное. Той бо хотя́ше седе́ти на престо́ле оте́ческом си́и же предстоя́ти. Те́мже а́ще и по существу́ плотско́му брат нашь бысть но че́стию мно́го разньствова. И ниже́ есть рещи́ ели́ко она́ у́бо отхо́дит сия́ возвеща́ющы ученико́м. Толико есть приседе́ние и терпе́ние до́бро. Та́може про́чее ка́ко не боле́зноваху хотя́ще отъити́. Ниже́ веща́ху якова́ и пе́рвее. Тогда́ у́бо я́ко уме́ршу сие́ страда́ша. Ны́не же воскре́сшу, чесо́ ра́ди хотя́ше ему́ боле́зновати. Возвести́ же и зрен́ие и глаго́лы. Я́же дово́лна бе́ша их уте́шити. Поне́же у́бо ле́по бе ученико́м сия́ слы́шащим или́ не ве́ровати жене́ или́ ве́ровавшим боле́зновати. Я́ко их не сподо́би зре́ния, а́ще и обеща́вся в Галиле́и им яви́тися. Да́же у́бо не сия́ обраща́юще тужа́т. Ниже́ еди́н день оста́ви преити́ но в вожделе́ние их приве́д. И тем е́же у́же ведети воста́вша его́. И тем е́же от жены́ слы́шати жа́ждущим уви́дети и пристра́шным су́щым. Е́же и сие́ наипа́че жела́ние творя́ше вя́щее. Тогда́ ве́черу бы́вшу надстае́т и со мно́гым чудесе́м. Что у́бо ве́чере яви́ся. Егда́ наипа́че ле́по им бы́ти пристра́шным но е́же чу́дно. Ка́ко мечта́ние его́ не возмне́ша. И́бо затворе́нным вни́де две́рем и внеза́пу наипа́че у́бо и жена́ предвари́вши. Мно́гу ве́ру соде́ла. И́накоже, и я́сно и ти́хо и зре́ние им показа́. В день же не предста́ у́бо я́ко собра́тися всем вку́пе. Мно́го бо бе ужаснове́ние. Ниже́ бо дверь порази́, но внеза́пу ста посреде́. И показа́ ребро́ и ру́ку. Вку́пе же и гла́сом. Уте́ши волня́щагося по́мысла рек, мир вам, си́речь не смуща́йтеся. И глаго́ла? воспомяну́в его́ пре́же креста́ к ним рече. Мир мой оставля́ю вам. И па́кы, во мне мир име́йте, в ми́ре скорбь име́ти бу́дете. Возра́довашася у́бо ученицы́ ви́девше Го́спода. Зри́ши ли о де́лех словеса́ сбыва́ющася. Е́же бо глаго́лаше пре́же креста́, я́ко па́ки узрю́ вам и возра́дуется се́рдце ва́ше. И ра́дости ва́шия никто́же во́змет от вас. Сие́ у́бо де́лом испо́лни вся́же сия́. Возвожа́ху их во опа́снейшую ве́ру. Поне́же бо рать не смири́телну имя́ху ко иуде́ом. Ча́сте приглаго́лет е́же мир вам. Сопроти́во си́лно дая́ ра́ти утеше́ние. Сей у́бо пе́рвый по воскресе́нии рече́ глаго́л. Те́мже и Па́вел всю́ду рече́, благода́ть вам и мир. Жена́м же ра́дость благовеству́ет. Зане́же в печа́лех род он бе. И сия́ прия́т пе́рвую кля́тву. После́дователне у́бо муже́м ра́ти де́ля ми́ре. Жена́м же печа́ли ра́ди. Благовеству́ет ра́дость. Вся же разруши́в печа́лная приглаго́лет исправле́ние креста́. Сия́ же бе́шя мир. Поне́же у́бо вся отъя́шася возбране́ния рече́. И побе́ду поста́вих све́тлу и испра́вишася вся, та́же про́чее рече́, я́коже посла́ мя оте́ць и аз посыла́ю вам ниже́ еди́но име́йте неудо́бьство и от у́же бы́вших и от досто́иньства моего́ посыла́ющаго. Те́мже рече́ зде взима́ет их ду́шу. И показу́ет мно́го достове́рное а́ще у́бо хотя́т его́ де́ло восприя́ти и не ктому́ моле́ние ко отцу́ быва́ет. Но госпо́дьством дае́т им благода́ть и си́лу. Ду́ну бо и рече́, прииме́те Ду́ха Свята́го. И́мже отпустите́ грехы́, отпу́стятся. И и́мже держите́, держа́тся. Я́коже бо не́кый царь князе́й посыла́я о́бластию во юзи́лище. Вмета́ти и испуща́ти дае́т, та́ко и сих посыла́я. Се́ю облага́ет си́лою. Ка́ко у́бо рече́ а́ще не отъиду́ он не прии́дет. И у́бо Ду́ха дае́т не́цыи у́бо ре́ша я́ко не Ду́ха даде́, но прили́чных их ко прия́тию дунове́ние устро́и. А́ще бо а́нгела ви́дев Дани́л изступи́. Что неизрече́нную благода́ть о́ну прие́млюще не бы пострада́л?, а́ще не ученико́в их пе́рвее устро́ил бы. Сего́ ра́ди не глаго́ла рече́ прия́сте Ду́ха Свята́го но прииме́те Ду́ха Свята́го. Не у́бо же кто согреши́т и тогда́ прия́ти им глаго́ля. О́бласть не́кую духо́вную и благода́ть но не я́коже ме́ртвых воскреша́ти и си́лы твори́ти. Но я́ко оставля́ти грехы́;

Разли́чна бо дарова́ния Ду́ха. Те́мже приведе́, и́мже отпустите́ отпу́стятся. Показу́я кото́рый вид де́йства дае́т. Та́може по четы́редесятих днех, зна́мений при́яша де́йство. Сего́ ра́ди рече́, прииме́те си́лу наше́дшу Свято́му Ду́ху на вы, и бу́дете мне сведе́тели. Сведе́тели же зна́меньми быва́ху и́бо безме́рно Ду́ха благода́ть, и мно́го ви́ден дар. Сие́ же быва́ет да навы́кнеши я́ко отца́ и сы́на и Свята́го Ду́ха, еди́н дар и о́бласть я́коже бо ви́дятся осо́бна бы́ти о́тча сия́ и сыно́вня бы́ти явля́ются, и Ду́ха Свята́го. Ќако у́бо никто́же приихо́дит к сы́ну рече́. А́ще не оте́ць привлече́т его́ но сие́ показу́ется сыно́вне су́ще. Аз бо есмь рече́ путь, и никто́же прихо́дит ко отцу́, то́кмо мно́ю, Зри же сие́ и Ду́ха су́щее, никто́же бо мо́жет рещи́ Го́спода Иису́са. То́кмо Ду́хом Святы́м и па́ки апо́столов. Овогда́ у́бо от отца́ овогда́ же от сы́на. Овогда́ же от Ду́ха дая́тися це́ркви и разделе́ния дарова́ний отца́ и сы́на и Свята́го Ду́ха зрим су́ща:

Нравоуче́ние 86. Я́ко подоба́ет почита́ти свяще́ников, а́ще и ху́ди бу́дут житие́м. Ти́и бо о нас сло́во воздадя́т.

Вся у́бо да де́йствуем, я́ко бы Ду́ха Свята́го име́ти у себе́. И вруче́нным де́йству, со мно́гою угожа́ем че́стию. Вели́к бо свяще́ннический сан, и́мже а́ще отпустите́ рече, отпу́стятся грехы́. Те́мже и Па́вел глаго́лаше, повину́йтеся наста́вником ва́шым и покаря́йтеся, и от преизли́шьства непщу́йте их в че́сти. Ты бо свои́ми пече́шися. И а́ще сия устроя́ются до́бре, ни еди́но же другы́х тебе́ бу́дет сло́во. Свяще́нник же а́ще и свое́ устро́ит житие́ до́бре о твое́м же не со опасе́нием попече́тся с лука́выми в гее́нну отхо́дит. И мно́жицею от свои́х не пре́дан быв от ва́ших погыба́ет а́ще не вся подоба́ющая ему́ испра́вит до́бре. Те́мже, ве́дяще убо беды́ вели́чьство мно́гу отдава́йте им честь и любо́вь. Е́же и Па́вел назна́мена глаго́ля, я́ко бдят о душа́х ва́шых, а́ки сло́во воздаю́ще. Сего́ ра́ди подоба́ет мно́гаго слугова́ния от нас наслажа́тися им. А́ще же напа́дает со ины́ми на них и вы, ниже́ ва́шя до́бре устро́ятся. До́ндеже во благоду́шии пребыва́ет ко́рмчий, во утвержении будут и я́же вса́дников, а́ще же укоря́емым оне́м, и вражебне име́ющим ко́еже зло страда́ти, ниже́ бде́ти подо́бне мо́жет, ниже́ худо́жество соблюда́ти и не хотя́ безчи́слеными си́ми облага́ется злы́ми. Та́ко и свяще́нник. А́ще у́бо наслади́тся су́щаго от вас угоже́ния и ва́ша устро́ити до́бре возмо́жет. А́ще же печалию их облага́ет, ру́це ослабля́юще удо́бь е́млемых с вами их сотвори́те злы́ми во́лнами. А́ще и зело́ до́блествени бу́дут. Помы́сли что о иуде́ох рече́ Христо́с. На Моисе́ове седа́лищи седо́ша кни́жници и фарисе́и. Вся у́бо ели́ка глаго́лют вам твори́ти твори́те. Ны́не же несть рещи́ на Моисе́ове седа́лищи седо́шя свяще́нници, но на Христо́ве. О́ного бо пре?я́ша уче́ние. И на его́ престо́ле седя́т. Те́мже и Па́вел рече́, о Христе́ мо́лим. Я́ко Бо́гу моля́щу на́ми. Не зри́те ли о вне́шних нача́лницех всех подница́ющих, и ро́дом лу́чших мно́жицею, и житие́м и ра́зумом о судя́щих их; Но оба́че да́вшаго р́ади ничто́же сих помышя́ют, но стыдя́тся суда́ Царе́ва. А́ще и кто у́бо прие́м нача́льство ни бу́дет. Та́же а́ще у́бо челове́к поста́вит толи́к страх. Бо́гу же поставля́ющу а вы презира́ете поста́вленнаго и укаря́ите. И безчи́слеными поноше́ньми омыва́ете. И бра́тей на́шых возбране́ни бы́вше суди́ти. На свяще́нников ли язы́к поощря́ете. И где сия́ отве́та досто́йна. Егда́ су́щаго у́бо в очеси́ на́шем бревна́ неви́дим сучецы́ же ина́го го́рце испыту́ем. Не ве́си ли я́ко люте́йше себе́ твори́ши суди́лище си́це судя́ свяще́нника. И сия́ глаго́лю. Не похваля́я недосто́йне свяще́ньство управля́ющых. Но ми́луя и слезя́. Не у́бо сего́ ра́ди реку́ пра́ведно бы́ти от нача́льствуемых суди́тися а́ще и житие́ их зело́ осуже́но бу́дет, ты же а́ще себе́ внима́еши, ничи́м же повреди́шися в поруче́нная ему́ от Бо́га. А́ще бо осло́м гла́су испусти́тися сотвори́л есть. И волхво́м благослове́ния духо́вная дарова́. И безслове́сными устна́ми и нечи́стым язы́ком валаа́мовым де́йствовав прирази́вшыхся ра́ди иуде́й, мно́го па́че нас ра́ди благоразу́мных и а́ще зело́ ху́ди суть свяще́нницы, своя́ вся де́йствует Бог и посыла́ет Святы́й Дух. Ниже́ бо чи́стый от своея́ привлача́ет сего́ чистоты́. Но благода́ть есть вся соде́ловающия. Вся бо рече́ вас ра́ди. А́ще Па́вел. А́ще Аполло́с, а́ще Ки́фа. Я́же бо вруче́н есть иере́й. Бо́гу еди́ному есть дарова́ти. И иде́же а́ще челове́ческое дости́жет любому́дрие. Недоста́точно благода́ти о́ноя яви́тся, и сия́ глаго́лю. Не я́ко ле́ностне свое́ житие́ устрая́ем, но да не леня́щимся не́кым предстоя́щим, вы нача́льствуемии себе́ мно́жицею собира́ете зла́я. И что глаго́лю свяще́нников. Ниже́ а́нгел, ниже ́арха́нгел, соде́лати что мо́жет вдае́мая ему́ от Бо́га но оте́ць и сын и Святы́й Дух стро́ит вся. Иере́й же свои́ взае́м дае́т язы́к. И свою́ подае́т ру́ку и́бо ниже́ пра́ведно бе инаго ра́ди зло́бы, во образова́ния спасе́ния на́шего. Верою приступа́ющым врежа́тися. Сия́ у́бо вся ве́дяще не суди́те. И Бо́га бо́йтеся и свяще́нников его́ в че́сти да име́йте, вся́ку им отдаю́ще честь да и о свои́х исправле́ниих. И е́же ко о́нем угоже́нии, мно́го прии́мем от Бо́га воздарова́ния. Благода́тию и человеколю́бием Го́спода на́шего Иису́са Христа́. И́мже и с Ни́мже Отцу́ сла́ва со Святы́м Ду́хом, во ве́ки веко́в. Ами́нь.