Госпо́дь наш Иису́с Христо́с, Сын и Сло́во О́тчее, И́же пре́жде всех век от Него́ Рожде́йся, И́же Сый сия́ние о́браз соста́ва Его́ и при́сно Сый во еди́ном соста́ве по Божеству́, прия́тия же ра́ди сла́вим Того́ во двою́ естеству́, е́же есть в Божестве́ и челове́честве, И́же на́шего ра́ди спасе́ния в после́дняя дни излия́в Себе́ и зра́ка раба́ прии́мь, подо́бен нам быв по всему́, громе́ греха́, и́же бя́ше пребы́сть Бог Сый И́стинен и е́же не бе, прия́т, бысть соверше́н челове́к от при́сно Де́вы Мари́и благоволе́нием Отца́ и наше́ствием Свята́го Ду́ха, и с челове́ки поживе́, и́же боже́ственою си́лою неизрече́нныя соверша́я зна́мения, по плотско́му же смотре́нию вся челове́ческая соверша́я, сего́ ра́ди изво́ли, ну́жных ра́ди вин, Пречи́стей Свое́й Ма́тери обру́чнику и храни́телю бы́ти пра́ведному Ио́сифу, я́ко сим ухитря́я дре́вняго врага́, назира́ющаго в соверше́ние приити́, е́же рече́ Иса́ия: «я́ко Де́вая хо́щет роди́ти Бо́га во пло́ти», я́ко да премине́т сию́ я́ко обру́ченицу и не уве́сть та́инства, не то́чию же той, но и челове́цы не ви́дяху таково́е смотре́ние. Сего́ ра́ди Лука́ пи́шет: и Той бе Иису́с, я́ко ле́том три́десяте начина́я, Сый мнимь я́ко сын Ио́сифов. Вели́к у́бо пои́стинне Ио́сиф и зело́ свят по зако́ну, я́ко такова́го смотре́ния та́ин бысть и воплоти́вшемуся Бо́жию Сло́ву, я́ко сый мни́мый оте́ц, и́же пре́жде век Того́ ро́ждшаго Отца́ назна́менуя свет, блаже́н зело́ пра́ведный сей Ио́сиф и я́ко от Свята́го Ду́ха проуви́дено житие́ сего́ и неизрече́нная чистота́ души́ его́. Иа́ков же он, си́це и весь дом свой научи́. Сего́ ра́ди таковы́м та́йнам служи́теля избра́ того́ Святы́й Дух, к сим же и я́ко ве́дый до́бре проро́ческая рече́ния и Дави́да ца́рскаго ко́рене че́стно прозябе́ние и того́ до́му вели́кая похвала́, я́коже свиде́тельствует боже́ственный евангели́ст, сы́на Дави́дова того́ нарица́я, и о всем непоро́чно служа́ща та́инству Госпо́дня воплоще́ния по повеле́нию а́нгелову.

Сей у́бо прозябе́ние вели́кий Иа́ков, о не́мже сло́во произвести́ дерзну́х, а́ще и вы́ше си́лы. Сего́ ра́ди пре́жде показа́х ко́рене досто́инство, да и плод того́ досто́ин всем явле́н бу́дет, и я́ко того́ наказа́нием зело́ пра́веден показа́ся блаже́нный Иа́ков, пои́стинне блага́го ко́рене пресла́вно прозябе́ние и кра́снаго дре́ва сла́дкий плод.

Бя́ше же сему́ блажен́ному и и́на бра́тия единоро́дни: Ио́сий и Си́мон Иу́да, я́ко Ио́сифу ча́да плотска́я от и́же в ю́ности бы́вшая тому́ жены́, и́мже разделя́я насле́дие Ио́сиф, восхоте́ с те́ми сотвори́ти насле́дника и мни́маго Того́ Сы́на, ро́ждшагося от Святы́я Деви́цы, Го́спода на́шего Иису́са Христа́. Они́ же не восхоте́ша. Иа́ков же, прие́мь свою́ часть, насле́дника ей Христа́ поставля́ет. Госпо́дь же прие́мь того́ произволе́ние и Своея́ ра́ди ми́лости от сего́ нарече́ его́ Себе́ брат и, я́ко пра́ведна су́ща, и зело́ того́ возлюби́. Пребыва́я же вели́кий Иа́ков с Го́сподем и после́дуя Ему́, и до спасе́ныя стра́сти зри́тель быва́я богозва́ния Его́ и навыка́я от него́ неизрече́нная та́инства, глаго́лет же ся, я́ко Сам Госпо́дь научи́ того́ та́йней безкро́вней слу́жбе, е́же о Свое́й честне́й Пло́ти и Кро́ве, и составле́нию Литурги́и. Поставля́ет же его́ первопресто́льника и пе́рваго епи́скопа Иерусали́му, иде́же соверши́в вмирско́е избавле́ние Свое́, е́же по пло́ти боже́ственое смотре́ние, и я́ко Свое́ ме́сто тому́ наверша́ти дарова́. По спасе́ней же стра́сти и Воскресе́нии, просвеща́ется и той наше́ствием Свята́го Ду́ха со обемана́десяте. Пребы́сть же, до́бре пра́вя престо́л Иерусали́мския Це́ркви. Боже́ствении же апо́столи почита́ху его́ не то́чию, я́ко бра́та Госпо́дня, но вме́сто Самого́ Христа́ имя́ху его́. Сего́ ра́ди вся по его́ сове́ту творя́ху и, егда́ разлуча́хуся во страны́, е́же Святы́й Дух тем раздели́, и ели́ко с те́ми Бог сотвори́ пресла́вная во иуде́ех и язы́цех, вся тому́ возвеща́ху, о́ва писа́нием, и́на же, егда́ возвраща́хуся, я́коже свиде́тельствует верхо́вный Петр. Егда́ изведе́ того́ а́нгел из темни́цы, отходя́ во и́но ме́сто: «Возвести́те, - рече́, - Иа́кову сия́». Пи́шет же и Кли́мент, егда́ поста́ви того́ Петр епи́скопа Ри́му, вся, я́же о себе́, ко Иа́кову. Егда́ же не́цыи ве́ровавшии от е́реси фарисе́йския возмуща́ху и́же от язы́к ве́ровавших, глаго́люще тем обре́зоватися и Моисе́ов зако́н храни́ти, и мно́гу взыска́нию бы́вшу о сих во апо́столех, егда́ же вси умолча́ша, рече́ вели́кий Иа́ков: «Му́жие и бра́тие, послу́шайте мене́. Симео́н пове́да, я́ко испе́рва избра́ Бог от язы́к лю́ди и́мени Своему́», и к сим приложи́ от зако́на и проро́к, рече́: «Те́мже аз сужу́: не стужа́ти и́же от язы́к обраща́ющимся к Бо́гу, но запове́дати им огреба́тися от треб и́дольских и от блуда́ и уда́вленины и от кро́ве и, ели́ка себе́ неуго́дна, и́нем не сотвори́ти». И е́же рече́, та́ко и бысть. Вси апо́столи по словеси́ его́ зна́менавше, посла́ша во Антиохи́ю бра́тии, та́мо бо такова́я подвиго́шася.

Си́це у́бо от всех благопослу́шне почита́емь вели́кий, и пребыва́я во Иерусали́ме, препира́я, обраща́ше не то́чию су́щая иуде́и, но и прише́льцы на уви́дение и́стинне и на ра́зум Сы́на Бо́жия; су́щих же в ве́ре потвержда́я, не во Иерусали́ме то́кмо, но и во всех, и́же в разсе́янии двана́десяте колен, я́коже собо́рное посла́ние его́ явля́ет. «Иа́ков бо, ‐ рече́, ‐ Иису́с Христу́ раб, двана́десяте коле́ном, и́же в разсе́янии, ра́доватися». Виждь же ми смире́ние свята́го. Не рече: Бо́жий брат, или́ апо́стол, или́ пе́рвый епи́скоп, но па́че смире́ная вообража́ет, раба́ себе́ нарече́.

Пи́шет же учи́тельно посла́ние уча́ о разли́чных искуше́ниих, ко́е у́бо есть от Бо́га, ко́е же от своего́ се́рдца челове́ком есть, и я́ко не сло́вом то́кмо, но и де́лом показа́ти ве́ру, поне́же та кроме́ дел мертва́ есть, и я́ко не послу́шницы зако́на, но творцы́ оправда́ются. О бога́тых же запове́дает, да не охужда́ют ни́щая бога́тии в це́рквах, но па́че и уязвля́ются, я́ко презо́риви; отверза́яй же дверь язы́ческую без воздержа́ния, сего́, ре́че, су́етна ве́ра; могу́щаго же обуздава́ти сего́ свире́пство соверше́на того́ именова́, утеша́я же и оби́димыя и повелева́я им терпе́ти до прише́ствия Христо́ва, и научи́в о долготерпе́нии от И́овова блага́го терпе́ния. Над боля́щими же вели́т свяще́нники призыва́ти; подвиза́тижеся обраща́ти к и́стинне заблу́ждшая от пра́ваго тоя́ пути́, я́ко сия́ нам хода́тайствуют оставле́ние грехо́в, и мно́гу мзду, рече́, о том от Бо́га име́ти. Разу́мно же хотя́ о сих уве́дети, да прочте́т посла́ние его́, соста́вленое прему́дростию Свята́го Ду́ха. От сего́ уве́сть, я́ко в зерца́ле, от де́ятельнаго в боговиде́ние высо́кое восхожде́ние его́. Предста́вит же сло́во страда́льный того́ по́двиг, я́ко совокупле́ние и соверше́ние обои́м – дея́нию и виде́нию, я́ко сим блаже́ным, де́ятельным по́двигом отложи́в заве́су пло́ти, в зерца́ле тому́ разреши́шася, и восхо́дит не в мрак боговиде́ния, но в са́мое не́бо, е́же чи́сте зре́ти лице́ Госпо́дне и при́сно насыща́тися боговиде́ния луча́ми. И́мать же предъиду́щее рече́ние, е́же о страда́нии его́ си́це.

Сей у́бо вели́кий, я́ко брат Госпо́день, свят же и освяще́н из чре́ва ма́терня, я́коже Иереми́я и Саму́ил или́ высоча́йше, удаля́яся вина́ и сике́ра и от сне́ди живо́тных мяс, но пита́яся при́сно живо́тным хле́бом, и желе́зо на главу́ его́ не взы́де, я́ко назаре́й, си́речь, освяще́н бе Бо́гови; ми́ро же и ма́сло не прикосну́ся телесе́ его́, но Святы́м Ду́хом мы́слене умаща́яся, и при́сно оде́ждеми све́тлыми свяще́ния, я́ко архиере́й, одева́шеся, си́ми показу́я све́тлость души́ своея́, вну́треняя свята́я ходя́ и при́сно предстоя́ престо́лу Госпо́дню, же́ртвы безкро́вныя принося́, е́же в Ду́се, не о себе́ то́чию, но и за людска́я неве́жествия, я́ко сый досто́ин за превысо́кое чистоты́, к сим же и покланя́яся Отцу́ и Того́ Сы́ну и Пресвято́му Ду́ху, моли́твою же и моле́нием хода́тайствуя Созда́телю и созда́нию.

Пои́стинне у́бо па́че Моисе́я просла́вися сей и Ааро́на превы́ше возвели́чися. Я́ко они́ у́бо о́бразом и се́ни служа́ху, сей же Благода́ти, и́стинне предста́тель и пе́рвый архиере́й показа́ся; Его́же си́и гада́нием прореко́ша, Сего́ он не то́чию ви́дети сподо́бися, но и брат Тому́ по пло́ти нарече́н бысть, и за превели́кое пра́вды его́ не то́чию от ве́ровавших, но и от всех иуде́й пра́ведник нарица́шеся.

Егда́ же бысть молва́ и зело́ вели́к мяте́жь во Иерусали́ме от е́реси фарисе́йския и саддуке́йския и про́чих, и́мже нача́льник Ана́ния архиере́й; егда́ на Па́вла воста́ша, е́же уби́ти его́, ему́же ну́жда бысть нарещи́ ке́саря; сего́ ра́ди от руки́ их исто́ржен бысть и в Рим к Неро́ну Фи́стом пуще́н бысть; они́ же погреши́ша наде́жду о Па́вле, е́же нань мышля́ху, на Иа́кова обрати́шася, и́щуще от него́, е́же не пропове́дати Иису́са, и вопроша́ху его́ вси, глаго́люще: Тебе́ ве́мы пра́ведна, что у́бо есть и́стинна я́же о Иису́се, рцы нам. Отвеща́в же вели́кий Иа́ков, рече́ к ним: «Се бо есть Сын Бо́жий, Его́же посла́ Бог на спасе́ние Изра́илеви и о Нем спасе́ние ве́рующим, неве́рующим же потребле́ние, и я́ко о Нем воскресе́ние ме́ртвым хощет быти». Не́цыи у́бо от них ве́роваша, ини́и же ни, но сопроти́в отвещева́ху. И ро́пот мног от сих в фарисе́ох и саддуке́ех; саддуке́и у́бо глаго́лют воскресе́нию не бы́ти, ни а́нгела, ни ду́ха; фарисе́и же испове́дают обоя́. Мно́зи же от наро́да ве́роваша от Иа́кова рече́нным. Архиере́и же и фарисе́и и кни́жницы бе́дно сия́ творя́ху мно́жества ра́ди ве́ровавших во Иису́са, и приидо́ша ко Иа́кову, глаго́люще: «Мо́лим ти ся, я́ко су́щу пра́ведну, уста́ви стремле́ние люде́й, я́ко вси заблуди́ша во след и́мени Иису́сова и Тому́ глаго́люще Христу́ бы́ти; Мо́лим же тя, я́ко да глаго́леши о Иису́се прише́дшим в пра́здник па́схи; я́ко вси тебе́ послу́шаем, и́бо от всех люде́й свиде́тельствован еси́ пра́веден и не зри́ши на ли́ца. Увеща́й у́бо лю́ди не заблужда́ти во след Иису́са; и́бо мы и вси лю́дие послу́шаем тебе́. Взы́ди у́бо и ста́ни на криле́ церко́внем, я́ко да высоты́ ра́ди всем во услы́шание бу́дут словеса́ твоя́, и́бо пра́здника ра́ди па́схи вся племена́ и мно́зи от язы́к приидо́ша». Возведо́ша вели́каго Иа́кова на крило́ церко́вное и возопи́ша архиере́и, фарисе́и же и кни́жницы, глаго́люще ко Иа́кову: «Вси у́бо тебе́ до́лжни есмы́ послу́шати, я́ко зело́ пра́ведна; рцы у́бо нам, поне́же заблуди́ша лю́дие во след Иису́са Пропя́таго, пове́ждь нам и́стинну, я́же о Нем». Воздви́г же вели́кий Иа́ков глас и возопи́ зело́: «Что мене́ вопроша́ете, и́бо аз и́стинну вам глаго́лю, я́ко се есть Сын Бо́жий, И́же и седи́т одесну́ю Бо́га Отца́ на небесе́х, И́же приити́ и́мать на о́блацех небе́сных со тма́ми а́нгел суди́ти всей вселе́нней в пра́вду». Мно́зе же от наро́да ве́роваша и извеще́ние прия́ша от него́ и возопи́ша, глаголю́ще: «Оса́нна Сы́ну Дави́дов, оса́нна в вы́шних!» Архиере́и же и фарисе́и и кни́жницы раска́яшася о сих, глаго́люще: «Не до́бре сотвори́хом, я́ко мно́жайше свиде́тельство от сего́ бысть Иису́сово; но прии́дем, низложи́вше, ве́рзем с высоты́ Иа́кова, я́ко да стра́хом таковы́х не прилага́ются наро́ди к ве́ре Иису́сове.» И возопи́ша, глаго́люще: «О́ле, и пра́ведный смяте́ся и заблуди́!» И возве́дше же на крило́, сверго́ша пра́веднаго на зе́млю и крича́ху, глаго́люще, е́же побити его́ ка́мением. Они́ же во мно́зе устремле́нии ка́мением побива́ху свято́го. Еще́ же дыша́ вели́кий Иа́ков, ма́ло воздви́гся и преклони́в коле́ни, моля́шеся, глаго́ля: «Го́споди Бо́же и О́тче, и Единоча́дый Твой Сын Госпо́дь наш Иису́с Христо́с, и Святы́й Твой Дух, отпусти́ им, не ве́дят бо, что творя́т!» Еди́н же от свяще́нных сыно́в Риха́вов возопи́, глаго́ля: «Оста́вите, что творите́, ‐ возбраня́я тех стремле́ние, ‐ ви́дите, мо́лится о вас пра́ведный!» Еди́н же от них, подви́гся от не́коего бе́са, взем дре́во бели́льно ударя́ет во главу́ пра́веднаго. И та́ко вели́кий Госпо́день апо́стол преда́ святу́ю свою́ ду́шу в ру́це Го́сподеви. Не́цыи же от ве́рных, взе́мше честно́е его́ те́ло, и погребо́ша в наро́чите ме́сте близ боже́ственныя це́ркве.

Ели́цы же бя́ху кро́тцы во гра́де и до́бре ве́дуще зако́н, тя́жко си вмени́ша соде́ланная, я́же о блаже́ннем Иа́кове, посла́ша о́тай к царю́ Агри́пе; той бо бя́ше прии́мник И́родова четверовла́стьства, моля́ще его́ посла́ти ко архиере́ю Ана́нии, е́же не твори́ти такова́я, возвеща́юще ему́ сотворе́нно зло е́же о вели́цем Иа́кове; друзи́и же от них Павли́на срето́ша, от тоя́ Александри́и гряду́ща, и пове́даша ему́ вся бы́вша от архиере́я; той у́бо по Фе́сте (Фи́сте?) от ке́саря поста́влен бысть иге́мон над жиды́, запове́да же без того́ сове́та ничто́же твори́ти архиере́ю Ана́нии. Слы́шав же он, написа́ к нему́ с гне́вом, претя́ ему́ ка́знию о сотворе́нном зле. Царь же Агри́па изве́рже Ана́нию от архиере́йства, три ме́сяцы в нем то́чию пребы́вшу, и поста́ви ино́го в ме́сто того́. Мно́га же лю́тая постиго́ша иуде́и по убие́нии вели́каго Иа́кова, я́коже пи́ша свиде́тельствует и́стине Ио́сиф евре́ин. Вели́кий же Иа́ков, Госпо́день апо́стол, пропове́да и испове́да вели́кое того́ и́мя, ве́ру соблюдя́ и тече́ние сконча́, прия́ пра́ведный вене́ц; Иа́ков брат Госпо́день, вме́сто тле́ннаго насле́дия, ему́же Христа́ прича́стне сотвори́, и той от Него́ поста́влен бысть прича́стник небе́снаго насле́дия, и я́ко пра́веден и непоро́чен и ве́рен строи́тель, умно́жи да́нный тому́ тала́нт, и́же и вни́де в ра́дость Го́спода своего́ и на́до мно́гими вла́стию почте́н от Него́, и я́ко пе́рвый архиере́й Но́ваго Заве́та и служи́тель та́йнам Благода́ти, во след отъи́де архиере́я вели́каго Иису́са, Сы́на Бо́жия, да́вшаго Себе́ за избавле́ние всего́ ми́ра, и преложи́ся ко всем пра́ведным я́ко пра́ведник, пра́веднаго отца́ пра́ведное ча́до, и ко святы́м святы́й, и к му́чеником я́ко му́ченик, и пе́рвый во епи́скопех муче́ния венце́м увязе́ся, я́коже во архидиа́конех Стефа́н и во апо́столех Иа́ков Зеведе́ов.

Сия́ у́бо тебе́, поели́ку возмо́жно, изобрази́х ма́лое гранесло́вие похвале́ и по́двиг страда́ния твоего́ и и́на про́чая. Ты же, о́ преблаже́нный, вели́кий Госпо́день апо́столе, и́же благода́тию Свята́го Ду́ха укра́шене, о́ свяще́нная и честна́я апо́столом главо́, и пе́рвый архиере́ом ве́нче, и сввященному́чеником честно́е украше́ние, и всем пра́ведным вели́кая похвало́, и, е́же всех высоча́йше, я́ко и брат быв Госпо́день по пло́ти, и дерзнове́ние неизрече́нно стяжа́, и со все́ми же небе́сными си́лами при́сно предстоя́ о́крест стра́шнаго престо́ла Его́, несы́тне наслажда́яся наисповеди́мых благ, и боже́ственым светоли́тием просвеща́емь, всегда́ зря вы́ну пречи́стый Его́ о́браз! Мы же ти ся мо́лим, от нас ны́не моли́твами свои́ми боже́ственными гнев отврати́, и́же благоче́стно ве́рующих, и ста́ни от всех к Бо́гу, я́коже Моисе́й и Ааро́н и Финее́с , преклоня́я Того́ человеколю́бие и отвраща́я пре́жний от нас губи́теля зме́я со все́ми кова́рствы. Ве́мы, я́ко зело́ и па́че о́нех мо́жеши, и́бо и дерзнове́ние па́че тех стяжа́; сего́ ра́ди и заступа́й нас мно́жае тех и, я́ко па́стырь до́брый, отжени́ от огра́ды Христо́вы мы́сленаго во́лка и весь ерети́ческий соста́в потреби́, и от скве́рны тех Це́рковь очи́сти, вся же иноплеме́нныя язы́ки низложи́, и правосла́вных царе́й рог вознеси́, и вся лю́ди бога́тыя и ни́щая, ста́рыя и ю́ныя заступа́я ми́лостивне, е́же ко Христу́ свои́ми моли́твами, я́ко Тому́ подоба́ет вся́ка сла́ва, честь и держа́ва со Отце́м и со Святы́м Ду́хом ны́не и при́сно и во ве́ки веко́в. Ами́нь.