О́, смире́нный моле́бниче и свети́льниче Христо́в, святи́телю Иоа́нне! Просвети́вый вся концы́ земна́я све́том богоразу́мия и ве́ры правосла́вныя, от восто́к со́лнца и до за́пад прославля́ет тя па́ства твоя́.

Хода́тайствует ны́не к тебе́ и оте́чество твое́ земно́е; и прославля́ет, и песносло́вит, и преклоня́ет вы́ю серде́ц в моле́нии те́плом. О́ богому́дре о́тче Иоа́нне, ни́щим поспе́шниче, больны́м целе́бниче, ско́рбным моли́твениче, малове́рам укрепле́ние, обездо́ленным приве́тниче! Был еси́ по сло́ву апо́стола немощны́м я́ко не́мощен - и немощны́я приобре́л еси́. Был еси́ всем вся - и пои́стинне спаса́еши к тебе́ прибега́ющия, моли́твами свои́ми и предста́тельством пред Престо́лом сла́вы Госпо́дней.

Те́мже ны́не заступи́ зе́млю оте́чества своего́ земна́го, отжени́ от ны врага́ и супоста́та, изба́ви ны от нападе́ния вра́жия и междоусо́бныя бра́ни, умудри́ власть иму́щыя, собери́ и примири́ наро́д ея́ воеди́но. Па́ки моли́ Бо́га, да утверди́т и расшири́т Це́рковь Свою́, насади́т се́мя Ева́нгелия по всем страна́м и возрасти́т его́ сло́вом про́поведи и испове́дания ве́ры правосла́вныя, да вси ку́пно прославля́ем Христа́ Бо́га на́шего, Ему́же вся́кая сла́ва, честь и держа́ва, во сла́ве святы́х уго́дник Свои́х, со Отце́м и Святы́м Ду́хом, ны́не и при́сно и во ве́ки веко́в. Ами́нь.