О́, смире́нный моле́бниче и свети́льниче Христо́в, святи́телю Иоа́нне! Просвети́вый вся концы́ земна́я све́том богоразу́мия и ве́ры правосла́вныя, от восто́к со́лнца и до за́пад прославля́ет тя па́ства твоя́.
Хода́тайствует ны́не к тебе́ и оте́чество твое́ земно́е; и прославля́ет, и песносло́вит, и преклоня́ет вы́ю серде́ц в моле́нии те́плом. О́ богому́дре о́тче Иоа́нне, ни́щим поспе́шниче, больны́м целе́бниче, ско́рбным моли́твениче, малове́рам укрепле́ние, обездо́ленным приве́тниче! Был еси́ по сло́ву апо́стола немощны́м я́ко не́мощен - и немощны́я приобре́л еси́. Был еси́ всем вся - и пои́стинне спаса́еши к тебе́ прибега́ющия, моли́твами свои́ми и предста́тельством пред Престо́лом сла́вы Госпо́дней.
Те́мже ны́не заступи́ зе́млю оте́чества своего́ земна́го, отжени́ от ны врага́ и супоста́та, изба́ви ны от нападе́ния вра́жия и междоусо́бныя бра́ни, умудри́ власть иму́щыя, собери́ и примири́ наро́д ея́ воеди́но. Возно́сим с тобо́ю я́коже рекл еси́ усе́рдное моле́ние ко Го́споду Бо́гу, да Той да́рует нам времена́ благоприя́тныя, утверди́т про́чный мир на земли́, пода́ст убие́нным в бра́ни и положи́вшим живо́т за Оте́чество свое́ земно́е – Ца́рство Свое́ небе́сное.
Моли́ Бо́га, да утверди́т и расшири́т Це́рковь Свою́, насади́т се́мя Ева́нгелия по всем страна́м и возрасти́т его́ сло́вом про́поведи и испове́дания ве́ры правосла́вныя: да возсия́ет Свет Христо́в и по всей стране́ Кита́йстей моли́твами твои́ми, и да умно́жится и преизбу́дется о́вчее ста́до И́стиннаго Па́стыря. Рекл бо еси́, я́ко блаже́н и́же испо́лнит послуша́ние про́поведи Правосла́вия испове́данием ве́ры своея́ и живото́м свои́м и́же по ве́ре, – моли́ у́бо, да соверши́м во смире́нии послуша́ние свое́ и принесе́м де́лателен плод, да не ума́лится тала́нт и́же бы́ше вдан был нам.
Рекл еси́ па́ки, отче: «Блаже́н и́же чи́стым свиде́нием со́вести своея́ воскли́кнет: Ей, гряди́, Го́споди!». Си́це же воззове́м, потщи́вся зерца́лу пра́веднаго живота́; си́це возопие́м ко Го́споду, и да услы́шим ра́достию: «Ей, гряду́ ско́ро!». Ему́же вся́кая сла́ва, честь и держа́ва, во сла́ве святы́х уго́дник Свои́х, со Отце́м и Святы́м Ду́хом, ны́не и при́сно и во ве́ки веко́в. Ами́нь.