Ча́сть а҃

Глава̀ седма́я

Ѡ҆ є҆́же не порабоща́тися плотски́ми сладостра́стьми, но дх҃о́внагѡ оѹ҆тѣше́нія въ гдⷭѣ взы́скивати вы́ну.

Бога́тство вся́кихъ земны́хъ сласте́й а҆́ще тече́тъ, не прилага́й се́рдца своегѡ̀, гл҃етъ прⷪро́къ (ѱало́мъ ѯ҃а). Почто̀ къ си̑мъ и҆́маши прилага́ти своѐ се́рдце, поне́же тѝ не во вѣ́ки дана̀ су́ть, нижѐ ку́ю по́льзу тѝ прино́сятъ, но па́че вре́дъ; и҆скуси́лъ бо є҆сѝ не є҆ди́ною, и҆ позна́лъ є҆сѝ, ꙗ҆́кѡ вся́ка вре́менная сла́сть прино́ситъ тя́жесть: вся́кое плотско́е наслажде́ніе свя́зываетъ ду́шу, и҆ твори́тъ є҆́й всегда́шній мяте́жъ.

[в҃] Не ла́комься на сія̑, ꙗ҆̀же тебѣ̀ оѹ҆жѐ не є҆ди́ною дово́льнѡ въ сла́сть и҆ въ сы́тость бы́ша: не є҆ди́ною си́ми оѹ҆жѐ срⷣце и҆ ду́шу свою̀ ѡ҆бремени́лъ є҆сѝ, во ꙗ҆де́ніи и҆ питіѝ, во снѣ́ же и҆ во и҆ны́хъ всѣ́хъ ве́щехъ. да предваря́етъ и҆ предхо́дитъ пред̾ тобо́ю всегда̀ па́мять и҆ разсужде́ніе: да не въ забве́ніи всегда́шнѣмъ ча́стѡ претыка́ешися, и҆ во вся̀ ѕла̑я впаде́ши: воздержава́й плотскі̑я по́хѡти, да съ си́ми оѹ҆держи́ши вся̀ ѕла̑я.

[г҃] Не во вре́менныхъ сласте́хъ оѹ҆тѣше́нія и҆щѝ, но въ гдⷭѣ вся̑ сотво́ршемъ вѣ́чнагѡ и҆ прⷭносу́щнагѡ наслажде́нія всегда̀ взыску́й: не повину́йся горта́нному безслове́сному сладостра́стію, но то́чію ну̑ждная въ потре́бу бл҃горазу́мнѡ пріе́мли, а҆́ще бо повини́шися плотско́му сладостра́стію, тогда̀ связа́вши тя̀ оѹ҆́зами свои́ми, никогда́же ми́рна ѡ҆ста́витъ, но во вся̀ стра́стныя глубины̑ бѣ́днѣ ври́нетъ тя̀. Па́мятствуй, въ каковы́й коне́цъ сла́сть и҆ по́хоть плотска́я приходи́ти ѡ҆бы́че, и҆ ктому̀ мно́жае и҆́ми прельща́тися не хощѝ.

[д҃] Мню̀, ꙗ҆́кѡ не є҆ди́ною, но мно́гажды сла̑сти плотскі́я и҆скуси́лъ є҆сѝ: вѣ́си, ꙗ҆́кѡ вся́кая плотска́я сла́сть прино́ситъ тя́жесть, вся́кое земно́е оѹ҆тѣше́ніе влече́тъ съ собо́ю го́ресть. ѻ҆ба́че всегда̀ забве́ніемъ прельща́ешися: тогда̀ то́чію раскаява́ешися, є҆гда̀ го́ресть и҆ тя́жесть и҆́хъ ѡ҆бно́сиши: є҆гда́ же пре́йдетъ, тогда̀ па́ки на ты̑яжде, ꙗ҆́кѡ пе́съ на своя̑ блевѡ́тины (в҃ Петⷬ заⷱ ѯ҃з) безслове́снѡ ѡ҆браща́ешися. дѣ́йство є҆́сть твоегѡ̀ нечу́вствія и҆ слѣпоты̀.

[є҃] Не мнѝ ту́не восхи́тити нб҃о, а҆́ще небе́снѣ не поживе́ши: нижѐ црⷭтвіе нбⷭное наслѣ́диши, а҆́ще не воцари́шися над̾ похотьмѝ и҆ разумѣ́ньми. не льсти́те себѐ, речѐ, ни блудницы̑, ни та́тіе, ни пія̑ницы, црⷭтвія бж҃ія не наслѣ́дятъ (а҃ Коріⷩ заⷱ рл҃д). Ꙗ҆́коже бо кто̀ здѣ̀ стя́жетъ что̀, сіѐ и҆ та́мѡ съ собо́ю и҆мѣ́ти бу́детъ: каково̀ кто̀ и҆мѣ̀ дне́сь предложе́ніе и҆ дѣ́йствіе, сицево̀ та́мѡ воѡбрази́тся въ душѝ начерта́ніе. Тѣ́мже не ѕѣлѡ̀ жела́тельнѣ безслове́сному сладостра́стію прилѣжѝ, да не мзду̀ себѣ̀ си́ми воспріи́меши, да не оѹ҆слы́шиши гла́са рече́ннагѡ: воспрія́лъ є҆сѝ блага̑я твоя̀ въ животѣ̀ твое́мъ (Лукѝ заⷱ п҃г). не нѡ́ва бо тебѣ̀ сія̑ су́ть, не нѡ́ва: не є҆ди́ною бо оѹ҆жѐ си́ми ско́рбь и҆ смуще́ніе себѣ̀ сотвори́лъ є҆сѝ.

[ѕ҃] Претерпѣва́й ма́лую а҆́лчбу и҆ жа́жду неи́стовагѡ чревобѣ́сія, да не сугу́бѡ вре́дъ и҆ тяготу̀ пріи́меши, и҆ въ ѕѣ́льную по се́мъ ско́рбь и҆ печа́ль впаде́ши. вѣ́ждь бо, ꙗ҆́кѡ оѹ҆жѐ не є҆ди́ною прельсти́лся є҆сѝ, ктому̀ вя́щше прельща́тися не хощѝ, да не са́мъ себѣ̀ бу́деши ра́тникъ и҆ неми́лостивъ закла́тель.

[з҃] Не повину́йся плотско́й сла́сти и҆ по́хоти: но похотѣ́ніе плотско́е, пи́щу и҆ питіѐ, на бжⷭтвенное жела́ніе прелага́й, да сво́йственное бжⷭтвенное жела́ніе, несво́йственную плотску́ю сла́сть и҆ по́хоть дале́че ѡⷮ душѝ и҆стреби́тъ, и҆ сво́йственное оѹ҆тѣше́ніе душѣ̀ твое́й пода́стъ: не ѡ҆ хлѣ́бѣ бо, речѐ, є҆ди́номъ жи́въ бу́детъ человѣ́къ, но ѡ҆ вся́комъ глаго́лѣ и҆сходя́щемъ и҆з̾ оѹ҆́стъ бж҃іихъ (Матѳ. заⷱ з҃).

[и҃] Нѣ́сть бо сво́йственная сла́сть плотска́я душѣ̀ человѣ́чей во оѹ҆тѣше́ніе: но ѡⷮ преступле́нія а҆да́мля є҆́сть ро́ду на́шему прибы́вшая. по ну́ждѣ сія̀ плотска́я тлѣ́нная сла́сть до вре́мене попущена̀ бы́сть, поне́же бж҃е́ственныя дх҃о́вныя пи́щи є҆щѐ ꙗ҆́сти не научи́хомся, нижѐ навы́кнути є҆я̀ хо́щемъ: но безслове́снѡ ѡⷮрица́емся, нижѐ ꙗ҆́сти є҆я̀ разу́мнѣ и҆зволя́емъ.

[ѳ҃] Въ гряду́щемъ вѣ́чномъ вѣ́цѣ, не се́ю тлѣ́нною пи́щею и҆ питіе́мъ пита́тися и҆́мамы, но бж҃е́ственною, присносу́щною бл҃года́тію прест҃а́гѡ дх҃а. Потщи́ся ѡ҆ се́й разу́мнѣй бжⷭтвеннѣй пи́щи, є҆́юже пита́тися и҆́маши во вѣ́ки: нѣ́сть бо и҆звѣ́стногѡ оѹ҆тѣше́нія и҆ поко́я въ плотско́й сла́сти, но непреста́нное душѝ томле́ніе и҆ мяте́жъ. Нѣ́сть толи́кѡ оѹ҆тѣше́нія, є҆ли́кѡ тя́жести и҆ го́рести: не мо́жетъ бо несво́йственное прибы́вшее ѡⷮ преступле́нія тлѣ́нное пита́ніе, сво́йственнагѡ душѣ̀ дарова́ти оѹ҆тѣше́нія и҆ поко́я, но тя́жесть и҆ смуще́ніе всегда̀ приноси́ти ѡ҆бы́че.

[і҃] Въ плотско́й сла́сти, въ ꙗ҆́стіи и҆ питіѝ, нѣ́сть душѣ̀ ми́ра и҆ поко́я, но всегда́шняя борьба̀ и҆ мяте́жъ, мра́къ и҆ тма̀: и҆ са́мая та̀ пи́ща и҆ питіѐ, со ѕѣ́льнымъ попече́ніемъ и҆ молво́ю быва́ти ѡ҆бы́че: па́ки же и҆ въ со́нномъ спа́ніи нѣ́сть поко́я и҆ тишины̀, но мечта̑нія мра̑чная и҆ смущє́нія прелє́стная. Бж҃е́ственная же дх҃о́вная безсме́ртная пи́ща, ми́ръ є҆́сть душѝ, тишина̀ жи́зни, свобо́да ду́ха, простра́нство со́вѣсти, ра́дость же и҆ всегда́шнее весе́ліе: оѹ҆пію́тся бо, речѐ, ѡⷮ ту́ка до́му твоегѡ̀, и҆ пото́комъ сла́дости твоея̀ напои́ши я҆̀ (ѱало́мъ л҃є).