Ча́сть а҃

Глава̀ ѻ҆сма́я

Ѡ҆ є҆́же всегда̀ во все́мъ послѣ́довати ра́зуму, а҆ не безсловє́снымъ плотски̑мъ по́хотемъ.

Бг҃ъ чл҃вѣ́ку поста́ви и҆ оѹ҆стро́и оѹ҆́мъ ꙗ҆́кѡ нѣ́коего цр҃я̀ над̾ похотьмѝ и҆ жела́ньми, да всегда̀ ѡ҆ се́мъ тщи́тся и҆ поуча́ется, ка́кѡ и҆́ми благоразу́мнѣ и҆ бл҃гопотре́бнѣ ѡ҆блада́ти и҆́мать. сегѡ̀ ра́ди ра́зуму во все́мъ послѣ́дуй, а҆ не безслове́снѣй по́хоти: слѣ́пъ бо слѣпа́го водя́й, ѻ҆́ба впаду́тъ въ ꙗ҆́му (Лукѝ заⷱ к҃з). Ра́зумъ да ѡ҆блада́етъ похотьмѝ и҆ жела́ньми, а҆ не по́хѡти ра́зумомъ: ху́до бо сѐ, а҆́ще тобо́ю ѡ҆блада́ти бу́дутъ по́хѡти, а҆ не ты̀ и҆́ми: ꙗ҆́коже, а҆́ще ѡ҆блада́ютъ рабѝ господи́номъ, не мо́щно бы́ти въ дому̀ то́мъ, кромѣ̀ всегда́шнягѡ смуще́нія, ско́рби же и҆ печа́ли, безчи́нія и҆ мяте́жа. Бг҃ъ разу́мна тя̀ сотворѝ, ты́ же не бу́ди безу́менъ: не подлега́й самоизво́льнѡ ра́зумомъ под̾ вла́сть и҆ рабо́ту плотски̑мъ по́хотемъ и҆ сласте́мъ.

[в҃] Вре́мя своѐ въ ко́ейждо ве́щи разумѣ́й и҆ познава́й, а҆ не безслове́сными похотьмѝ оѹ҆води́ся: безвре́меннѡ же ничто́же дѣ́лай: ѻ҆ба́че же и҆ во вре́мя своѐ полага́й воздержа́ніе во все́мъ: всегда̀ оѹ҆мѣ́й оѹ҆держава́ти ра́зумомъ безслове́сныя по́хѡти, да не во вся̑ ѕла̑я грѣхопадє́нія, скѡ́рби же и҆ печа̑ли всегда̀ впа́даеши. Ве́лія бо є҆́сть боя́знь и҆ стра́хъ на неѡбузда́нномъ жребцѣ̀ и҆мѣ́ти своѐ ѣ҆жде́ніе: си́це и҆ душѣ̀ твое́й на неѡбузда́нной пло́ти ра́зумомъ и҆ воздержа́ніемъ.

[г҃] Ра́зумомъ свою̀ жи́знь и҆мѣ́й ѡ҆кормля́ему, а҆ не безслове́сными похотьмѝ и҆ сластьмѝ, а҆́ще хо́щеши ми́рну и҆ немяте́жну и҆мѣ́ти жи́знь, и҆ и҆звѣ́стенъ бы́ти своегѡ̀ спасе́нія. А҆́ще ли нѝ, то̀ во вся̑ ѕлы̑я поги́бєльныя грѣхѝ, го́рєсти же и҆ мяте́жи впаде́ши, и҆ съ настоя́щею жи́знію, вѣ́чныя жи́зни по се́мъ ѕлѣ̀ ѡⷮтщети́шися.

[д҃] Плотско́е по́хотное всегда́шнее безслове́сное оѹ҆гожде́ніе, нѣ́сть ничто́же и҆́но, то́чію неду́гъ и҆ нездра́віе, то́чію болѣ̑зни и҆ разслаблє́нія, скѡ́рби же и҆ печа̑ли. є҆ли́кѡ наипа́че пло́ти оѹ҆гожда́ти бу́деши, толи́кѡ по се́мъ ве́сь разсла́бишися, и҆ непотре́бенъ весьма̀ ѡ҆ста́неши. є҆ли́кѡ вели́ко оѹ҆гожде́ніе, толи́кѡ вели́ки неду́ги и҆ болѣ̑зни: никогда́же бо кто̀ чревоѡб̾я́стна, и҆ пія́нчива, соверше́ннѡ здра́ва ви́дѣ. оѹ҆гожде́ніе всегда́шнее плотско́е, и҆ и҆сполне́ніе грѣхо́вное, нѣ́сть ничто́же и҆́но, то́чію тя́жесть, ско́рбь и҆ го́ресть душѐ, и҆ безвѣ́стіе спасе́нію. Па́мятствуй кончи́ну оѹ҆гожде́нія: тя́жесть и҆ го́ресть и҆́хъ да пребыва́етъ въ душѣ̀ твое́й вы́ну: ѡⷮту́ду мню̀, ꙗ҆́кѡ никогда́же си́ми мно́жае прельща́тися восхо́щеши.

[є҃] Сегѡ̀ ра́ди, толи́кѡ то́чію плотска́гѡ пита́нія воспріе́мли, є҆ли́кѡ тебѣ̀ въ подкрѣпле́ніе то́чію тре́бовательно є҆́сть, є҆́же си́льну тѝ бы́ти въ дѣ́лѣ бж҃іи: прѡ́чая же ꙗ҆́кѡ неключи̑ма и҆ и҆зли̑шняя да ѡⷮве́ржєна и҆́маши, наипа́че тщи́ся ѡ҆ дѣ́лѣ бж҃іи, ѡ҆ и҆справле́ніи дш҃е́внѣмъ, ꙗ҆̀же съ тобо́ю пребы́ти и҆́мутъ во вѣ́ки: пло́ть бо и҆стлѣ́етъ, и҆ по́хѡти є҆я̀ вско́рѣ поги́бнутъ, душа́ же сама̀ пребу́детъ во вѣ́ки: сѣ́яй бо въ пло́ть, ѡⷮ пло́ти по́жнетъ и҆стлѣ́ніе: сѣ́яй же въ дх҃ъ, ѡⷮ дх҃а по́жнетъ живо́тъ вѣ́чный (Гала́т. заⷱ сд҃і).

[ѕ҃] Не ла́комися на мимотеку́щыя сла̑сти, и҆ не бу́ди ꙗ҆́коже лю́дъ ѡⷮ гедеѡ́на руно́внагѡ на бра́нь и҆збра́нный, и҆̀хже бг҃ъ пре́жде питіе́мъ водны́мъ и҆скуси́ти повелѣ̀ (Суⷣ з҃): но поне́же не разсмотре́нно, ꙗ҆́кѡ безслове́сніи ско́ти, прекло́ньшеся до́лу, пи́ша, сегѡ̀ ра́ди ѡⷮлучи́ти и҆̀хъ, ꙗ҆́кѡ ла́комыхъ и҆ неиску́сныхъ къ вои́нстѣй хра́брости, заповѣ́да: дла́нію же и҆ску́снѡ и҆ возде́ржнѡ пи́вшихъ, при себѣ̀ ѡ҆ста́вити повелѣ̀, съ ни́миже и҆ побѣ́ду на врагѝ показа̀.

[з҃] Бу́ди ты̀ въ ꙗ҆де́ніи и҆ питіѝ подо́бяся пти́цѣ: пти́ца бо за ко́имждо клюва́ніемъ, сѣ́мѡ и҆ ѻ҆ва́мѡ смотрели́внѡ ѡⷮвсю́ду на лови́телей ѡ҆зира́ется, и҆ вма́лѣ ѡ҆щути́вши, а҆́біе вы́спрь возлета́етъ, тѣ́мже и҆ неудо́бь ꙗ҆́та быва́етъ ловя́щими. Сице́въ и҆ ты̀ бу́ди, всю́ду всегда̀ ѡⷮ всѣ́хъ стра́нъ ѡ҆зира́яйся, и҆ никогда́же во все́й жи́зни свое́й безпеча́ленъ бу́ди: и҆ ты́ бо и҆́маши ѡⷮвсю́ду лови́телей, ѡⷮвсю́ду сѣ̑ти, ѡⷮвсю́ду тенета̀: блюди́ся, да не впаде́ши въ ня̀, да не чи́мъ ꙗ҆́тъ бу́деши: и҆́бо ꙗ҆́тъ бы́вши, неудо́бь свободи́шися, нижѐ тя́жести и҆ го́рести и҆́хъ и҆збу́деши.

[и҃] Не бу́ди подо́бяся му́сѣ, и҆лѝ мра́вію, и҆̀же ма́лыя ра́ди медо́вныя сла́дости, всѐ свобо́дное своѐ движе́ніе губя́тъ: и҆лѝ свинія́мъ, ꙗ҆̀же а҆́ще и҆ наича́стѣе ѡⷮ ѡ҆гра́днагѡ ѕе́лія ѡⷮго́нятся, а҆́ще и҆ разли́чнѣ оѹ҆язвля́ютъ и҆̀хъ, ѻ҆ба́че ѻ҆́ныя ничто́же па́мятствующе, па́ки та́мѡ возвраща́ются: ты́ же си́це не бу́ди безу́менъ, не порабоща́йся ни є҆ди́ною сла́стію сегѡ̀ мі́ра. Па́мятствуй, ꙗ҆́кѡ на ѕѣлѡ̀ ма́лое вре́мя дана̀ сія̑ су́ть, но па́че си́хъ всѣ́хъ бу́ди свобо́дь: лу́чше бы́ти свобо́дну, не́же порабоще́нну, лу́чше є҆́сть самовла́стіе, не́же связа́ніе. Бг҃у є҆ди́ному бу́ди порабоще́нъ, а҆ не безслове́сной тлѣ́нной по́хоти, да и҆звѣ́стенъ своегѡ̀ спасе́нія бу́деши.

[ѳ҃] Вся́ку ве́щь, во вся́комъ начина́ніи и҆ дѣ́лѣ, мѣ́ра пра́ва и҆ разсмотре́ніе краси́тъ, чрез̾ мѣ́ру же непра́вымъ ра́зумомъ вся́ка ве́щь пріе́млема ѕѣлѡ̀ поврежда́етъ человѣ́ка: и҆ не то́чію во внѣ́шнемъ дѣ́йствіи, но и҆ въ дх҃о́вномъ и҆справле́ніи и҆ дѣ́ланіи, не съ ра́зумомъ и҆ разсмотре́ніемъ твори̑мая ѕѣлѡ̀ смуща́ютъ ду́шу. Сегѡ̀ ра́ди во всѣ́хъ ве́щехъ и҆ дѣ́лѣхъ да предпочте́нъ тѝ бу́детъ всегда̀ ра́зумъ и҆ разсужде́ніе, и҆ никогда́же ни въ че́мъ же прельще́нъ, нижѐ въ че́мъ по́хотію плотско́ю когда̀ ѡ҆кра́денъ бу́деши.

[і҃] Па́мятствуй, ꙗ҆́кѡ є҆ли́кѡ по́хотемъ свои́мъ плотски́мъ когда̀ без̾ ѻ҆пасе́нія и҆ разсмотре́нія забве́ннѡ въ че́мъ попусти́лъ є҆сѝ, кромѣ̀ ѕѣ́льныя ско́рби и҆ печа́ли никогда́же бы́лъ є҆сѝ: не бо̀ мо́гутъ не съ ра́зумомъ и҆ разсмотре́ніемъ вє́щи дѣ̑емыя бы́ти кромѣ̀ ско́рби и҆ печа́ли, и҆ ѕѣ́льнагѡ душѝ раска́янія. Тѣ́мже никогда́же въ че́мъ ѡ҆безпечаля́йся, но во все́мъ всегда̀ ѻ҆па́сенъ бу́ди: во бра́ни бо є҆сѝ сегѡ̀ мі́ра, съ пло́тію и҆ бѣ́сы, а҆ не въ поко́и: въ стра́нствіи сегѡ̀ мяте́жнагѡ вѣ́ка, а҆ не въ дому̀ сѣдя́й: во вре́менной жи́зни, а҆ не въ вѣ́чной: во ю҆до́ли плаче́внѣй, а҆ не въ ра́дости и҆ безпеча́ліи. Па́мятствуй всегда̀ гряду́щее вре́мя, и҆ находя́щій ча́съ, и҆ на вся́къ де́нь безпеча́ленъ и҆ без̾ѻпа́сенъ не бу́ди.