Ча́сть а҃

Глава̀ девя́тая

Ѡ҆ є҆́же не оѹ҆язвля́тися ли́цами, и҆ не порабоща́тися по́хотію плотско́ю.

Не оѹ҆язвля́йся се́рдцемъ въ красотѣ̀ лица̀ тлѣ́нныя пло́ти: трава̀ и҆ цвѣ́тъ є҆я̀ ѡⷮпадѐ: бжⷭтвенная же то́чію любо́вь пребыва́етъ во вѣ́ки. Не зри́мыми красота́ми оѹ҆язвля́й своѐ се́рдце, но къ зри́мыхъ и҆ незри́мыхъ содѣ́телю оѹ҆́мъ и҆ ду́шу свою̀ возводѝ.

[в҃] Воззрѣ́нія съ вожделѣ́ніемъ не красоту̀ чужду́ю, и҆ безсту́днагѡ прикоснове́нія, лобза́нія же и҆ ѡ҆сяза́нія, ꙗ҆́кѡ смертоно́сна ꙗ҆́да бѣ́гай, да не въ глубину̀ грѣхо́вную поги́бели впаде́ши, и҆ въ сѣ̑ти діа́воли ѡ҆ста́неши: преткну́вся же въ се́мъ, кромѣ̀ ско́рби и҆ тя́жести никогда́же пребу́деши.

[г҃] Не любодѣ́йствуй въ срⷣцѣ твое́мъ съ тва́рію, да не прогнѣ́ваеши гдⷭа сотво́ршаго ю҆̀: ѕѣлѡ́ бо вма́лѣ тва́рь и҆ плотска́я сла́сть прино́ситъ оѹ҆тѣше́ніе, пото́мже а҆́біе наво́дитъ ме́рзость и҆ тя́жесть душѣ̀. Ма́лое приѡбрѣ́теніе, вели́ка же тщета̀: ма́лое весе́ліе, вели́ка же ско́рбь: нѣ́сть ѡⷮ си́хъ толи́кѡ оѹ҆тѣше́нія, є҆ли́кѡ по си́хъ тя́жести и҆ го́рести.

[д҃] Не прельща́йся лѣ́потою, и҆ поста́вою и҆ прекра́снымъ лице́мъ: оѹ҆до́бь бо сокруша́емо и҆ и҆счезнове́нно є҆́сть. Па́мятствуй по премѣне́ніи красо́тномъ гно́й, и҆ по ѡ҆бурева́ніи по́хотномъ быва́ющыя скѡ́рби и҆ тя̑жести: то̀ никогда́же прельсти́шися, нижѐ ко́ею красото́ю пло́ти, и҆ по́хотію грѣхо́вною ꙗ҆́тъ бу́деши.

[є҃] Вѣ́дая бу́ди, ꙗ҆́кѡ въ ма́лѣ вре́мени сла́докъ є҆́сть грѣ́хъ, въ до́лго же вре́мя є҆́сть го́рекъ: вма́лѣ оѹ҆тѣ́шенъ, надо́лзѣ же ско́рбенъ: вма́лѣ ра́достенъ, надо́лзѣ же плаче́венъ, и҆ при разлуче́ніи ѡⷮ тѣ́ла, ѕѣлѡ̀ тя́жестенъ є҆́сть, и҆ многопеча́ленъ душѣ̀.

[ѕ҃] А҆́ще не и҆скуси́лъ є҆сѝ грѣха̀, и҆скуша́ти є҆гѡ̀ ве́щію не хощѝ, да не оѹ҆́дицу сме́ртную въ го́рести є҆гѡ̀ снѣ́си: и҆ не и҆скуша́ющи бо є҆гѡ̀ вѣ́си, ꙗ҆́кѡ ме́рзостенъ є҆́сть, и҆ по не́мъ горька̀ болѣ́знь, и҆ вкуси́вши є҆гѡ̀, нѣ́сть мо́щно и҆збы́ти ско́рби и҆ печа́ли.

[з҃] Не пріе́мли въ сла́сть вре́менныя сла́сти: вся́ка бо вре́менная сла́сть не пребыва́ющая вѣ́чнѡ, су́етна є҆́сть: вся́кое оѹ҆тѣше́ніе плотско́е и҆счезнове́нно є҆́сть: вся́кое наслажде́ніе вре́менное ꙗ҆́вственная пре́лесть и҆ тя́жесть душѣ̀. По́хоть плотска́я сме́рть є҆́сть душѐ: бжⷭтвенное же жела́ніе и҆ любо́вь, живо́тъ є҆́сть, и҆ присносу́щная ра́дость.

[и҃] Па́мятствуй, сла́сть вре́менную и҆ красоту̀ плотску́ю бы́ти гно́й, и҆ въ тлѣ́ніе ѡ҆браще́ніе, и҆ никогда́же настоя́щымъ безслове́снѡ пригвозди́шися. Плотско́ю любо́вію не оѹ҆води́ся, нижѐ оѹ҆тѣше́ніе своѐ въ не́й полага́й: преле́стна бо є҆́сть, ло́жна и҆ лицемѣ́рна, никогда́же во є҆ди́ной мѣ́рѣ стоя́щая, нижѐ во вѣ́ки пребыва́ющая.

[ѳ҃] Не прилѣпля́йся та́мѡ, и҆дѣ́же нѣ́сть вѣ́чно: нижѐ оѹ҆тѣше́нія и҆щѝ, и҆дѣ́же є҆́сть превра́тно: мно́зи бо безслове́снѡ оѹ҆язви́вшеся красото́ю лица̀, и҆ по́хотію плотско́ю прельсти́вшеся, мно́гъ собла́знъ и҆ претыка́ніе мнѡ́гимъ соста́вльше, жи́знь свою̀ ѕлѣ̀ сконча́ша, и҆ бѣ́су бы́ша подру̑чницы: и҆ маловре́менныя ра́ди сла́дости, жи́зни вѣ́чныя ѡⷮтщети́шася.

[і҃] Бг҃у є҆ди́ному бу́ди порабоще́нъ и҆ тогѡ̀ добро́тою, и҆ бжⷭтвенною любо́вію оѹ҆я́звлено се́рдце своѐ и҆мѣ́й, и҆ не прельсти́шися во вѣ́ки, но па́че всѣ́хъ пре́лестей превы́шше бу́деши, въ ми́рѣ и҆ поко́и всегда́шнемъ ѡ҆бря́щешися: пріи́меши же и҆ получи́ши бл҃гу́ю ча́сть, ꙗ҆́же не ѡⷮи́мется ѡⷮ тебѐ во вѣ́ки.