Ча́сть а҃

Глава̀ деся́тая

Ѡ҆ є҆́же не порабоща́тися блу́дными по́мыслы, и҆ скве́рными похотьмѝ.

Не бу́ди ѡ҆бурева́емь блу́дными по́мыслы, и҆ скве́рными похотьмѝ, и҆ дѣ́йствы, да не ѡⷮ бг҃а ѡⷮлучи́шися: нижѐ ревну́й творя́щымъ то̀, да не безу́мныхъ безу́мнѣйшій ꙗ҆ви́шися: на ма́ло бо вре́мя попуще́но бы́сть сіѐ чл҃вѣ́кѡмъ, да позна́вше суету̀, и҆зберу́тъ себѣ̀ лу̑чшая. Тѣ́мже чистоту̀ и҆ цѣлому́дріе всѣ́мъ срⷣцемъ возлюбѝ, да прилѣпи́шися чи́стѣ чⷭтому, чистоты̀ и҆ цѣлому́дрія ѻ҆́бразъ и҆з̾ себѐ показа́вшему: съ ни́мже пребу́деши любо́вію неразлу́чнѡ во вѣ́ки вѣкѡ́въ, наслажда́ющися бжⷭтвенныя сла́вы.

[в҃] Не бу́ди раскаява́яйся ѡ҆ свое́мъ предложе́ніи, и҆ и҆́ноческомъ ѡ҆бѣща́ніи, но бг҃у благодаре́ніе приносѝ, ꙗ҆́кѡ свободи́ тя ѡⷮ оѹ҆́зъ плотскі́я рабо́ты, и҆ приведе́ тя въ честно́е сіѐ ѡ҆бѣща́ніе, во ѻ҆гра́ду слове́сныхъ свои́хъ ѻ҆ве́цъ, и҆ дадѐ тебѣ̀ вла́сть ча́домъ є҆гѡ̀ бы́ти, и҆ безпрепина́тельнѡ ше́ствовати къ го́рнему присносу́щному наслажде́нію. А҆́ще бо ве́ліе є҆́сть въ человѣ́цѣхъ рабо́тати земно́му царю̀, и҆ и҆мѣ́ти ѡⷮ негѡ̀ благода́ть, коли́кѡ па́че цр҃ю̀ нбⷭному оѹ҆гожда́ти и҆ бы́ти всегда̀ въ любвѝ є҆гѡ̀.

[г҃] Ѡ коли́кѡ лу́чшее є҆́сть и҆ честнѣ́йшее чисто́тное по бз҃ѣ а҆́гг҃льское житіѐ па́че плотска́гѡ сплете́нія! Нѣ́сть ни є҆ди́нагѡ оѹ҆дивле́нія и҆ похвалы̀ жи́ти по пло́ти: си́це бо не то́чію хрістіа́нинъ, но и҆ ꙗ҆зы́цы, и҆ ѕвѣ́ріе, и҆ ско́ти жи́тельствуютъ: жи́ти же а҆́гг҃льски чи́стѡ, ѡ҆ є҆ди́номъ бз҃ѣ, дѣ́ло є҆́сть пресла́вно: си́це бо живя́ху ст҃і́и, и҆ бг҃у соедини́шася, пресла̑вная на землѝ содѣ́яша, и҆ просвѣти́шася ꙗ҆́кѡ со́лнце въ мі́рѣ, и҆ ны́нѣ почива́ютъ въ непреста́нной ра́дости во вѣ́ки вѣ́чныя. Ничто́же є҆́сть ве́ліе по пло́ти жи́ти: ѡⷮвнѣ̀ то́чію зря́щымъ пре́лестнѣ люби́мо, вну́трь же воззрѣ́вшымъ ѕѣлѡ̀ ме́рзостно є҆́сть: тягота̀ со́вѣсти, помраче́ніе ра́зума, безслове́сное связа́ніе, недоумѣ́ніе, порабоще́ніе: при сме́рти же ве́лія ско́рбь, и҆ тя́жесть душѝ.

[д҃] Наилу́чшее мірско́е по пло́ти житіѐ, не сравня́ется съ чисто́тнымъ а҆́гг҃льскимъ цѣлому́дреннымъ житіе́мъ. Бу́детъ ли добро̀ и҆ согла́сно по пло́ти въ супру́жествѣ житіѐ; ѻ҆ба́че безслове́сное порабоще́ніе, по руку̀ и҆ по но́гу связа́ніе: не согла́сно ли; ѕлѣ́йшее є҆́сть всѣ́хъ муче́ній. Не родя́тся ли ча̑да; печа́ль є҆́сть. родя́тся ли; сугу́бое є҆́сть попече́ніе. благі̑я ли су́ть ча̑да; мно́гъ мяте́жъ и҆ попече́ніе. ѕлы̑я ли су́ть; ѕѣ́льное душѣ̀ є҆́сть томле́ніе, сугу́бая ско́рбь и҆ печа́ль: и҆ вре́менное здѣ́шнее ѕлопожи́тіе, и҆ та́мошнягѡ неизвѣ́стное получе́ніе. И҆́ночествуяй же, и҆ чисто́тнѣ по бз҃ѣ живя́й, ѡ҆ все́мъ ми́ренъ и҆ безпеча́ленъ є҆́сть: оѹ҆до́бь спасе́ніе получи́тъ, ничи́мже бо свя́занъ є҆́сть: не порабоще́нъ є҆́сть плотско́ю стра́стію, ѡ҆ бз҃ѣ всегда̀ поуча́ется, на сме́рть вы́ну гото́въ: де́нь пребы́въ бл҃годари́тъ гдⷭа, ве́черъ мо́лится съ но́щію: ничи́мъ препина́емь и҆лѝ возбраня́емь є҆́сть: мѣ́рою пра́вою житіѐ оѹ҆правля́я, ꙗ҆́кѡ въ раѝ пребыва́ніе своѐ и҆́мать.

[є҃] Внемлѝ, ко́е оѹ҆тѣше́ніе и҆ поко́й прино́ситъ плотска́я любо́вь и҆ сла́сть; вма́лѣ то́чію сла́сть, и҆ посе́мъ тя́жесть: вма́лѣ по́хоть, и҆ посе́мъ ме́рзость: вма́лѣ красота̀, и҆ посе́мъ гно́й: вма́лѣ оѹ҆тѣше́ніе, и҆ посе́мъ ско́рбь: и҆ та́кѡ повсегда̀ непреста́ннѡ ра́туется, и҆ прельща́ется душа̀: презрѣ́вый же сія̑ вся̑, и҆ прилѣпи́выйся и҆́стинною любо́вію гдⷭви, ѡ҆ все́мъ без̾ печа́ли и҆ без̾ болѣ́зни є҆́сть: плотска́я бо безслове́сная по́хоть, и҆ любо́вь безу́мна, во все́мъ слѣпа̀ є҆́сть, плѣни́тся мно́гажды, и҆ связу́ется человѣ́къ, и҆ не вѣ́сть чесогѡ̀ ра́ди связу́ется: ни бо̀ є҆́сть жи́зни вѣ́чныя пода́тельна, ни че́сти и҆ сла́вы прилага́юща, па́че же и҆ ѡⷮе́млюща. А҆́ще ра́ди красоты̀ безслове́снѡ плѣни́тся, но бг҃ъ ю҆̀ созда̀: а҆́ще ра́ди бл҃голѣ́пія и҆ бл҃ги́хъ нра́вѡвъ, но бг҃ъ вся̑ оѹ҆стро́и. Бг҃у вся̑ сотво́ршему наипа́че подоба́етъ прилѣпля́тися: ѡⷮ негѡ́ бо су́ть вся̑, а҆ не ѡⷮ тлѣ́нной тва́ри.

[ѕ҃] Почто̀ тва́ри прилѣпля́ешися, а҆ не творцу̀ тва́ри; лу́чше почита́еши тва́рь, не́же созда́вшаго ю҆̀; красоту̀, не́же си́це оѹ҆краси́вшего ю҆̀; кто́ бо ко́е дѣ́ло лу́чше похваля́етъ па́че содѣ́лавшагѡ є҆̀; не вси́ ли глаго́лемъ, є҆гда̀ ви́димъ ко́е благохудо́жнѣ содѣ́ланное дѣ́ло, ѡ ка́кѡ се́й худо́жникъ до́бръ и҆ прему́дръ содѣ́лавый сіѐ дѣ́ло; не вси́ ли оѹ҆дивля́емся и҆ похваля́емъ худо́жника па́че, не́же дѣ́ло содѣ́ланное; дѣ́лу же не ѕѣлѡ̀ оѹ҆дивля́емся, поне́же дѣ́ло са́мо себѐ не содѣ́ла, нижѐ когда̀ содѣ́лати мо́жетъ, си́це и҆ бг҃у въ бж҃іихъ оѹ҆дивля́тися и҆ похваля́ти є҆го̀ и҆́мамы, и҆ є҆му̀ все́ю душе́ю свое́ю прилѣпля́тися, а҆ не тлѣ́нной тва́ри. А҆́ще бо похваля́еши тва́рь, лу́чше похваля́й созда́вшаго ю҆̀: тва́рь бо и҆стлѣ́етъ, и҆ въ пра́хъ и҆ пе́пелъ премѣни́тся: гдⷭь же є҆ди́нъ вѣ́ченъ, пребыва́яй во вѣ́къ вѣ́ка. Тва́рь оѹ҆́бѡ ты̀ не ѕѣлѡ̀ люби́ти до́лженъ є҆сѝ: поне́же тва́рь сама̀ себѐ не сотворѝ. а҆́ще бо є҆́сть красна̀ тва́рь, но не сама̀ себѐ си́це оѹ҆красѝ: а҆́ще бл҃голѣ́пна, но не сама̀ себѐ содѣ́ла: сегѡ̀ ра́ди творцу̀ всея̀ тва́ри и҆ созда́телю всѣ́мъ се́рдцемъ да прилѣпля́ешися, ѡⷮню́дуже ве́сь є҆сѝ: нигдѣ́же бо и҆́ндѣ ѡ҆бря́щеши вѣ́чный поко́й, и҆ ти́хое приста́нище, то́чію въ гдⷭѣ бз҃ѣ, и҆ въ прест҃о́й є҆гѡ̀ бл҃года́ти. Прилѣпле́ніе бо къ тва́ри, сме́рть є҆́сть, къ творцу́ же тва́ри, живо́тъ є҆́сть, и҆ присносу́щная ра́дость.

[з҃] Мно́зи бы́ша и҆сполня́юще плотскі̑я по́хѡти, и҆ и҆стлѣ́ша: и҆ дне́сь и҆сполня́ютъ, и҆ сі́и всѝ и҆стлѣ́ти и҆́мутъ: не пребу́детъ та́кѡ плотска́я любо́вь и҆ по́хоть во вѣ́ки, нижѐ красота̀ вре́менная си́це ѡ҆ста́нетъ, ꙗ҆́же не ѡ҆брати́тся въ тлѣ́ніе. Не пребу́детъ бога́тство, и҆ сни́детъ сла́ва: наше́дши бо сме́рть, вся̑ сія̑ погуби́тъ (І҆ѡа́н. Дамаск. глⷡа г҃), ꙗ҆́коже нѣ́кто речѐ. Мі́ръ се́й и҆ вся̑ настоя́щая вско́рѣ и҆змѣня́ются, и҆ по́хоть плотска́я, и҆ вся́ко земно́е наслажде́ніе ꙗ҆́кѡ сѣ́нь прехо́дитъ: нѣ́сть плотскі́я по́хоти и҆ любвѐ, ꙗ҆́же не преложи́тся въ тя́жесть: нижѐ красоты̀ вре́менныя, ꙗ҆́же не премѣни́тся въ тлѣ́ніе: ни сла́сти плотскі́я, ꙗ҆́же не претвори́тся въ ме́рзость: нѣ́сть нигдѣ́же и҆звѣ́стнагѡ оѹ҆покое́нія, то́чію во є҆ди́номъ гдⷭѣ бз҃ѣ, ꙗ҆́коже къ прⷪро́ку и҆ліѝ въ горѣ̀ хори́вской рече́ся: не бы́сть въ бу́рѣ страсте́й гдⷭь, ни во ѻ҆гнѝ блуда̀ и҆ раждеже́нія, ни въ ви́хри вся́кагѡ грѣхо́внагѡ страстова́нія, но въ ду́сѣ свѣ́та то́нка, безстра́стія и҆ чистоты̀: та́мѡ гдⷭь (г҃ Царⷭ глⷡа ѳ҃і) и҆ бл҃года́ть є҆гѡ̀, та́мѡ и҆ вѣ́чный поко́й.

[и҃] Коли́кѡ бя́ше въ мі́рѣ кра́сныхъ ли́цъ; и҆ и҆стлѣ́ша: коли́кѡ бя́ше благолѣ́пныхъ тва́рей; и҆ преидо́ша: коли́кѡ бѣ̀ благоуго́дныхъ и҆ люби́мыхъ тва́рей; вся̑ въ смра́дъ и҆ гно́й ѡ҆брати́шася, преидо́ша ꙗ҆́кѡ никогда́же бы́ша. Та́мѡ бо въ гряду́щей жи́зни, ни же́нятся, ни посяга́ютъ, нижѐ ктому̀ себѐ пло́тски люби́ти мо́гутъ: но ꙗ҆́кѡ а҆́гг҃ли бж҃іи бу́дутъ (Матѳ. заⷱ ч҃а), ѡ҆ са́момъ то́чію гдⷭѣ бз҃ѣ прⷭнѡ ра́дующеся и҆ веселя́щеся: не вре́менною красото́ю, ни любо́вію и҆ по́хотію плотско́ю оѹ҆тѣша́тися бу́дутъ, но то́чію сами́мъ гдⷭемъ, и҆ блгⷣтію є҆гѡ̀.

[ѳ҃] Ѻ҆ка́янная є҆́сть вои́стинну сія̀ по́хоть и҆ любо́вь плотска́я, є҆́йже въ слѣ́дъ ше́ствуетъ тя́жесть. Су́етна є҆́сть вои́стинну сія̀ сла́сть, ꙗ҆́же влече́тъ съ собо́ю го́ресть. Су́етна сія̀ красота̀, ꙗ҆́же въ смра́дъ и҆ гно́й ѡ҆браща́ется, ꙗ҆́же не да́руетъ поко́я, ни живота̀ вѣ́чнагѡ, па́че же ѡⷮе́млетъ. Вотщѐ человѣ́къ си́мъ оѹ҆тѣша́тися и҆́мать, є҆́же ѡⷮи́детъ вско́рѣ: ту́не и҆́мать къ си́мъ прилѣпля́тися душе́ю, ꙗ҆̀же съ ни́мъ не пребу́дутъ во вѣ́ки: всу́е къ сему̀ и҆́мать прилага́ти своѐ се́рдце, є҆́же ꙗ҆́кѡ сѣ́нь мимохо́дитъ.

[і҃] Ѡ ка́кѡ и҆ ко́ль красно̀, є҆́же а҆́гг҃льски чисто́тнѡ, безмяте́жнѡ и҆ безпеча́льнѡ со а҆́гг҃льскими и҆ преподо́бными ли́ки жи́ти вку́пѣ! ѡ҆ се́мъ бо гдⷭь ѡ҆бѣща̀ живо́тъ вѣ́чный, и҆ оѹ҆поко́итъ сицеву̀ ду́шу вѣ́чнымъ оѹ҆покое́ніемъ, и҆ да́руетъ є҆́й присносу́щную ра́дость, и҆ непреста́нное весе́ліе, и҆ рече́тъ є҆́й: пріидѝ вся̀ до́брая бли́жняя моя̀, и҆ поро́ка нѣ́сть въ тебѣ̀ (Пѣ́сн. пѣ́сн. глⷡа д҃). И҆ бу́детъ є҆́й бл҃года́ть прест҃а́гѡ дх҃а, пи́ща и҆ питіѐ та́мѡ, и҆ присносу́щное наслажде́ніе: воспою́тъ бо сицеві́и пред̾ прⷭто́ломъ бж҃іимъ пѣ́снь но́ву, є҆я́же никто́же и҆́нъ мо́жетъ пѣ́ти, то́чію сі́и, и҆̀же со жена́ми не ѡ҆скверни́шася: дѣ́вствєнницы бо су́ть (А҆пока́л. глⷡа д҃і), глаго́летъ та̑инъ ви́децъ.