Ча́сть а҃

Глава̀ пе́рвая на́десять

Ѡ҆ є҆́же ꙗ҆́кѡ нѣ́сть сво́йственна чл҃вѣ́ку плотска́я по́хоть, но ѡⷮ преступле́нія а҆да́мля ро́ду на́шему прибы́вшая.

Ѡⷮ тлѣ́нія и҆ грѣха̀ рожде́нъ бы́вши, не къ тлѣ́нію и҆ грѣху̀ па́ки ѡ҆браща́йся, но ѡⷮ тлѣ́нія къ нетлѣ́нію оѹ҆се́рднѡ восходи́ти тщи́ся, ꙗ҆́кѡ да пре́жде ѻ҆́бщагѡ воскрⷭнія оѹ҆ме́ршую грѣхо́мъ и҆ страстьмѝ, безгрѣ́шіемъ и҆ безстра́стіемъ воскреси́ши ду́шу, и҆ ѡⷮ сме́рти къ безсме́ртію приведе́ши ю҆̀. Не дре́внягѡ а҆да́ма престу́пльшагѡ, но втора́гѡ хрⷭта̀ безгрѣ́шнагѡ жи́зни послѣ́дуй: живу́щіи бо по пло́ти по престу́пльшемъ а҆да́мѣ, оѹ҆мре́ти и҆́мутъ, хрⷭту́ же послѣ́дующіи, оѹ҆ме́ршіи въ вѣ́цѣ се́мъ плотско́му мудрова́нію, ктому̀ не оѹ҆́зрятъ сме́рти го́рестныя, то́чію ра́достное ѡ҆ гдⷭѣ ѡⷮ пло́ти преселе́ніе.

[в҃] А҆да́мъ, є҆гда́ бы пре́былъ въ сво́йственномъ є҆му̀ ѡⷮ гдⷭа оѹ҆строе́ніи, є҆гда́ бы пре́былъ при бз҃ѣ, любо́вію ѡⷮ тогѡ̀ не ѡⷮлуча́яся. ѡⷮ негѡ́же созда́нъ бы́сть, не бы̀ подпа́лъ сме́рти и҆ тлѣ́нію. Но поне́же ѡ҆ста́ви творца̀, къ тва́ри же прилѣпи́ся: ѡ҆ста́ви сво́йственное, ѡⷮню́дуже бытіѐ своѐ и҆мѣ̀, прилѣпи́ся же не къ сво́йственному плотско́му неразу́мному вожделѣ́нію, тогѡ̀ ра́ди по ну́ждѣ подпадѐ тлѣ́нію и҆ сме́рти: нетлѣ́нія бо и҆ жи́зни ѡⷮлучи́вся, по ну́ждѣ подпадѐ въ сицево̀ плотско́е неразу́мное сочета́ніе, и҆ ѡⷮ соверше́нна ра́зума и҆ во́зраста, преступле́ніемъ низведѐ є҆стество̀ на́ше въ дѣ́тскій во́зрастъ и҆ безслове́сное младоу́міе, во є҆́же ма́лыми нѣ́мотствующими ѻ҆троча́ты въ мі́ръ се́й все́мъ ражда́тися на́мъ. Ты́ же ѻ҆троча́темъ рожде́нъ бы́вый, не ктому̀ въ младоу́міе впа́дай, но въ соверше́нъ, ꙗ҆́коже во́зрастъ, си́це и҆ ра́зумъ возраста́й и҆ преуспѣва́й: са́мъ же возра́стши, и҆нѣ́хъ не въ безслове́сіе дѣ́тское, но въ соверше́нъ во́зрастъ и҆ ра́зумъ благовѣствова́ніемъ роди́ти тщи́ся: да ѡⷮ тмы̀ неразу́мія къ свѣ́ту ра́зума и҆ позна́нія приведе́ши всѣ́хъ.

[г҃] Не по преступле́ніи несво́йственной плотско́й жи́зни прилѣпля́йся, но пре́жде преступле́нія ѡⷮ гдⷭа безгрѣ́шному оѹ҆строе́нію благоразу́менъ подража́тель бу́ди. Є҆́же бо дне́сь по пло́ти житіѐ, по преступле́ніи то́е содѣ́яся, а҆ є҆́же по ду́ху, пре́жде преступле́нія, ѡⷮ гдⷭа самагѡ̀ сіѐ оѹ҆строе́ніе бѣ̀. Тѣ́мже не по преступле́ніи, но пре́жде преступле́нія духо́внѣй ѡ҆ гдⷭѣ послѣ́дуй жи́зни, да пре́жде сме́рти, сме́рти и҆ тлѣ́нія грѣхо́внагѡ свободи́шися. Лу́чше благоизво́льнѡ дне́сь во вре́менной жи́зни воскре́снути ду́хомъ, и҆ жи́ти всегда̀ гдⷭви, не́же по го́рестной сме́рти, съ неизвѣ́стнымъ ча́яніемъ, ча́яти воскрⷭнія и҆ жи́зни. Лу́чше дне́сь ѡ҆ставля́ти вре́менное плотско́е сладостра́стіе со ѡ҆правда́ніемъ и҆ похвало́ю, не́же посе́мъ со ѡ҆сужде́ніемъ и҆ поноше́ніемъ сегѡ̀ лиша́тися. Тѣ́мже не повини́ся плотско́му неразу́мному вожделѣ́нію, но ра́зумомъ плотскі́я по́хѡти востяза́й, да не ꙗ҆́кѡ младоу́менъ дѣ́тищь посмѣя́нъ бу́деши.

[д҃] Ꙗ҆́коже не ѡⷮ сочета́нія, и҆ безслове́сныя плотскі́я по́хоти а҆да́мъ и҆ є҆́ѵа и҆спе́рва сотворе́ни бы́ша, си́це и҆ мы̀ всѝ та́кѡ ражда́тися въ мі́ръ и҆мѣ́ли бы́хомъ: и҆ ꙗ҆́коже а҆да́мъ, а҆́біе всѝ ѡⷮ небытія̀ въ бытіѐ приведе́ни бы́ли бы́хомъ. Но поне́же преступѝ а҆да́мъ за́повѣдь, и҆ самоизво́льнѡ безслове́сію, и҆ по́хотемъ плотски́мъ подпадѐ, тогѡ̀ ра́ди по ну́ждѣ си́це безслове́снѡ бы́ти, и҆ ражда́тися въ мі́ръ, и҆ мы̀ ѡ҆сужде́ни є҆смы̀. Ѡⷮту́ду толи́кія ско́рби и҆ печа́ли, пла́ча же и҆ рыда́нія и҆спо́лнена жи́зни на́ша: послѣди́ же сме́ртію го́рькою ту́ю печатлѣ́емъ. Хотя́ бо гдⷭь и҆звестѝ честно́е ѡⷮ недосто́йнагѡ, сме́ртнымъ пресѣче́ніемъ, ѡⷮ плотска́гѡ сплете́нія пресѣка́ему жи́знь на́шу бы́ти оѹ҆стро́и, да не вѣ́чнующее пребу́детъ ѕло́е, но да возведе́тъ на́съ всѣ́хъ вѣ́рующихъ на лу́чшее дре́внее достоя́ніе и҆ первоѻбра́зіе: а҆́ще бо бы̀ сіѐ бы́ло добро̀ и҆ соверше́нно, не бы̀ взы́скивалъ бг҃ъ ѡⷮ на́съ лу́чшихъ, не бы̀ сме́ртію пресѣца́лъ плотску́ю жи́знь на́шу.

[є҃] Ѡⷮ сво́йственнагѡ сво́йства, въ несво́йственное плотско́е хотѣ́ніе попо́лзшеся, сме́рти и҆ тлѣ́нію подпадо́хомъ. И҆спе́рва бо не въ сме́рть, ни въ безслове́сное плотско́е похотѣ́ніе и҆ сочета́ніе ѡⷮ гдⷭа созда́ни бы́хомъ: но въ бж҃е́ственное жела́ніе и҆ любо́вь. И҆́бо въ раѝ пре́жде преступле́нія не бѣ̀ по́хоти и҆ плотска́гѡ вожделѣ́нія, но по преступле́ніи и҆ по и҆згна́ніи и҆з̾ рая̀ плотска́я по́хоть и҆ вожделѣ́ніе бы́сть, та́же посе́мъ сме́рть. Сегѡ̀ ра́ди по́хоть плотска́я сме́ртію оѹ҆праждня́ется, оѹ҆пражднена́ же бы́вши сме́ртію, не ктому̀ па́ки во гряду́щей вѣ́чной жи́зни слѣ́дъ є҆я̀ ѡ҆бря́щется, но бж҃е́ственнагѡ жела́нія и҆ любвѐ всѝ бг҃у оѹ҆гожда́ющіи во вѣ́ки вѣкѡ́въ наслажда́тися бу́дутъ.

[ѕ҃] Ражда́ется человѣ́къ ѡⷮ жены̀ пло́тски въ живо́тъ, и҆ па́ки безслове́снѡ соединя́яйся є҆́й, ѡ҆б̾умира́етъ ѡⷮ бг҃а душе́ю: ꙗ҆́коже со́ль ѡⷮ воды̀ ражда́ется, и҆ па́ки водѣ̀ прикаса́яся растопля́ется и҆ и҆счеза́етъ, си́це и҆ въ се́мъ є҆́сть. Сегѡ̀ ра́ди ѡⷮ плотска́гѡ грѣхо́внагѡ сочета́нія рожде́нъ бы́вши, не па́ки ко грѣхо́вному плотско́му сплете́нію лѣпи́ся, да не ꙗ҆́кѡ со́ль раста́еши. Не бо̀ на сіѐ ѡⷮ бг҃а сотворе́нъ є҆сѝ, да па́ки на та̑яжде грѣхѡ́вная плотска̑я дѣ̑йства ѡ҆браща́ешися и҆ оѹ҆мира́еши, но да ко первоѻбра́зному сво́йству, и҆ ѡⷮ гдⷭа безгрѣ́шному оѹ҆строе́нію восхо́диши, и҆ преуспѣва́еши взыску́я лу́чшихъ и҆ бл҃же́ннѣйшихъ. Прія́тенъ оѹ҆́бѡ є҆́сть по зако́ну дне́сь по пло́ти бра́къ, но чистота̀ и҆ цѣлому́дріе сугу́бѡ су́ть лу̑чша и҆ пресла̑внѣйша, въ ня́же и҆спе́рва ѡⷮ гдⷭа оѹ҆стро́енъ бѣ̀ а҆да́мъ. бра́къ оѹ҆́бѡ то́чію чисто́тствовати, и҆ вя̑щшая разумѣ́ти не хотя́щымъ, и҆лѝ не могу́щымъ, дне́сь на ма́лое вре́мя попуще́нъ є҆́сть, чистота́ же пребыва́ющая є҆́сть во вѣ́ки вѣ́чныя.

[з҃] Кр҃ще́ніемъ во хрⷭта̀, вторы́мъ дх҃о́внымъ порожде́ніемъ рожде́нъ бы́вши, ѡⷮ перворо́днагѡ грѣха̀ водо́ю и҆ дх҃омъ ѡ҆мы́лся є҆сѝ: не ктому̀ оѹ҆́бѡ па́ки грѣхо́мъ плотскі́я по́хоти и҆ дѣ́йствія плѣни́ся: да не возвраща́ющемуся псу̀ на своя̑ блевѡ́тины оѹ҆подо́бишися. Ѡⷮ тмы̀ и҆ безслове́сія ѡⷮврати́лся є҆сѝ, не па́ки ко тмѣ̀ и҆ безслове́сію ѡ҆браща́йся, но къ свѣ́ту ра́зума, и҆ всѣ́хъ веще́й позна́нія провозраста́й, и҆ присоедине́нъ быва́й. Бг҃омъ сотворе́нъ є҆сѝ, къ нему̀ лѣпи́ся. Бг҃омъ созда́нъ є҆сѝ, къ нему̀ любо́вію соедине́нъ бу́ди. Ѡⷮ негѡ̀ бытіѐ своѐ и҆́маши, къ нему̀ все́ю душе́ю твое́ю прилѣпля́йся: чрез̾ плотско́е бо грѣхо́вное вожделѣ́ніе и҆ по́хоть содѣ́яся сме́рть, и҆ ѡⷮ бг҃а всеконе́чное ѡⷮчужде́ніе: чрез̾ сохране́ніе же чистоты̀ живо́тъ, и҆ къ бг҃у соверше́нное присвое́ніе.

[и҃] Рожде́нное ѡⷮ пло́ти, пло́ть є҆́сть, и҆ рожде́нное ѡⷮ дх҃а, дх҃ъ є҆́сть (І҆ѡа́н. заⷱ и҃). Рожде́нъ є҆сѝ дх҃о́внымъ рожде́ніемъ кр҃ще́нія, па́ки же вторы́мъ дх҃о́внымъ рожде́ніемъ и҆́ночества роди́лся є҆сѝ не ктому̀ оѹ҆́бѡ плотско́му рожде́нію грѣхо́вному, и҆ сплете́нію тѣле́сному ревну́й, и҆лѝ зави́ди: но восходѝ на лу̑чшая и҆ пресла̑внѣйшая. Ꙗ҆́коже бг҃у ѡ҆бѣща́лся є҆сѝ, си́це дх҃о́внѣ возраста́й и҆ преуспѣва́й: са́мъ дх҃о́внѣ роди́вшися, и҆ и҆нѣ́хъ дх҃о́внѡ роди́ти тщи́ся, а҆ не плотско́ю сла́стію плѣне́нъ бу́ди. Плотско́е бо сочета́ніе то́чію не могу́щымъ, и҆лѝ не хотя́щымъ оѹ҆держава́тися, ѡ҆ста́влено бы́сть, не и҆зволя́ющымъ же лу̑чшая, ху̑ждшая ѡ҆ставля́ются. Є҆гда̀ любо́вь бж҃е́ственная презира́ется, тогда̀ плотско́е безслове́сное наступа́етъ связа́ніе.

[ѳ҃] Тѣ́мже преста́ни плотска́гѡ дѣ́тскагѡ и҆гра́нія жела́ти самоизво́льнѡ, да не по се́мъ ѡ҆ставля́ти бу́деши и҆ нево́лею съ вя́щшею свое́ю тя́жестію. Да не прельща́етъ тя̀ добро́та и҆ красота̀ лица̀ тлѣ́нныя пло́ти: и҆стлѣва́етъ бо и҆ и҆змѣня́ется, и҆ погиба́етъ вско́рѣ: нѣ́сть ви́дѣти состарѣ́вшагося бл҃голѣ́пна: нѣ́сть бо во гро́бѣ красоты̀ неистлѣ́вшія, нижѐ въ до́лго вре́мя сія̑ пребыва̑ющая су́ть. Вся́ка бо красота̀ плотска́я ѻ҆́гнь є҆́сть, вся́ко благолѣ́піе роса̀ оѹ҆́тренняя, вся́ка пло́ть трава̀, вся́ка сла́ва человѣ́ческая ꙗ҆́кѡ цвѣ́тъ се́льный: и҆́зше трава̀, и҆ цвѣ́тъ є҆я̀ ѡⷮпадѐ: глаго́лъ же гдⷭнь то́чію є҆ди́нъ, и҆ бжⷭтвенная є҆гѡ̀ любо́вь пребыва́етъ во вѣ́ки (І҆акѡⷡ заⷱ и҃).

[і҃] Призыва́етъ ли тя̀ оѹ҆язвля́тися красото́ю лица̀ и҆стлѣ́вшая во гро́бѣ пло́ть, ѡ҆бы́кшагѡ зрѣ́ти пристра́стнѡ зри̑мая; но оѹ҆́бѡ дне́сь зрѝ во гро́бѣ су́щихъ пре́жде тебѐ, тогда̀ посе́мъ навы́кнеши, ꙗ҆̀же бу́дутъ и҆ по тебѣ̀, ꙗ҆́кѡ нѣ́кто речѐ. Ничто́же бо и҆́но и҆ по тебѣ̀ бы́ти и҆́мать, то́чію є҆́же пред̾ тобо́ю со и҆нѣ́ми сбы́стся: а҆ є҆́же со и҆нѣ́ми сбы́стся, сіѐ и҆ съ тобо́ю вся́кѡ неизмѣ́ннѡ сбу́дется. Сегѡ̀ ра́ди не прилага́й се́рдца своегѡ̀ къ тва́ри, но все́ жела́ніе своѐ и҆ любо́вь возводѝ ко вся̑ сотво́ршему, ѡⷮню́дуже бытіѐ своѐ и҆́маши и҆дѣ́же тѝ є҆сте́ственнѣ сво́йственно є҆́сть: и҆́бо нигдѣ́же и҆́ндѣ, во всѣ́хъ си́хъ ѡ҆бря́щеши вѣ́чный живо́тъ, и҆ непрело́жну душѝ свое́й тишину̀, то́чію въ гдⷭѣ бз҃ѣ, и҆ въ прест҃о́й є҆гѡ̀ любвѝ, и҆ въ блгⷣти прест҃а́гѡ и҆ животворя́щагѡ дх҃а.